Tanınmış Koreya yazıçısı, 2019-cu ildə Bakıda keçirilən Avrasiyanın ədəbiyyat üzrə 3-cü LiFFt festivalının iştirakçısı Sungrye Hun

Beynəlxalq “Webzine K-Book Trends” nəşrinin fevral sayında tərcüməçi ampluasında çıxış edib. 

“Ədəbiyyat və incəsənət” portalı yazıcınının sosial mediya statusuna istinadən məlumat verir ki, “Webzine

K-Book Trends” Koreya ədəbiyyatını dünyaya çatdıran ən böyük platformadır. 

Sungrye Hun Yapon dilindən Koreya dilinə, eyni zamanda Koreya dilindən isə Yapon dilinə tərcümələr edir. İndiyədək o, bu iki dil arasında 200-dək kitab tərcümə etmişdir. 

1990-cı illərin əvvəllərindən tərcüməyə başlamış yazar xüsusən poeziya sahəsində uğurlu tərcümələr ortaya qoymuşdur. 

Oxucularımıza bildirək ki, “Webzine K-Book Trends” jurnalı ingilis dilində təqdim olunur.

Tanınmış Amerika yazıçısı Faren Miller 71 yaşında dünyasını dəyişib.

TASS agentliyi xəbər verir ki, yazıçı tənəffüs orqanlarındakı ciddi problemlər səbəbi ilə vəfat edib.

1950-ci ildə Kaliforniyada doğulan, nüfuzlu Lokus mükafatçısı Millerin 1991-ci ildə işıq üzü görən "İllüzionistlər" fantastik romanı oxucular tərəfindən böyük maraqla qarşılanmışdı və ona dünya şöhrəti gətirmişdi.

Lokusun saytında gedən nekroloqda Faren Millerin uzun zaman qəlblərdə qalacağına inam ifadə olunub.

Banqladeşin Fransadakı səfirliyinin təşəbbüsü, bu səfirliyin və UNESCO-nun Katibliyinin birgə təşkilatçılığı ilə Beynəlxalq Ana Dili Günü virtual tədbirlə qeyd edilib. Ölkəmizin qurum yanındakı Daimi Nümayəndəliyi tədbirdə “Şuşa İli” çərçivəsində Azərbaycan dili ilə bağlı videotəqdimatla iştirak edib.

AzərTAC xəbər verir ki, Ana Dili Günü virtual tədbirində Azərbaycan da daxil olmaqla, UNESCO-ya üzv 24 ölkə iştirak edib. UNESCO baş direktorunun təhsil üzrə müavini Stefania Cianni çıxış edərək, ana dili haqqında, təhsil və bu gün COVID-19 pandemiyasının təhsilə mənfi təsirlərindən söz açıb. Sonra ölkələrin Ana Dili Günü münasibətilə hazırladıqları videolar yayımlanıb.

Daimi Nümayəndəliyimizin hazırladığı videotəqdimatda Azərbaycan Prezidenti İlham Əliyevin ölkəmizdə 2022-ci ilin “Şuşa İli” elan edilməsi barədə imzaladığı müvafiq Sərəncama uyğun olaraq, 2021-ci ildə yenidən təşkil edilmiş “Xarıbülbül” musiqi festivalı çərçivəsində gənc istedadlı musiqiçimizin ifasında UNESCO-nun Bəşəriyyətin Qeyri-Maddi Mədəni İrs üzrə Reprezentativ Siyahısına daxil edilmiş muğamın “Bayatı –Şiraz” dəstgahı təqdim olunub. Virtual tədbirdə Azərbaycanın musiqi beşiyi, mədəniyyət paytaxtı –Şuşada, Cıdır düzündə “Xarıbülbül” musiqi festivalında səsləndirilmiş “Qarabağ şikəstəsi” yayımlanıb.

Daimi Nümayəndəliyimizin diplomatı Nigar Qurbanova Azərbaycan dili, tarixi və dilimizin inkişafı haqqında məlumat verib. Ana dilinin mədəniyyətin və özünəməxsusluğun ayrılmaz tərkib hissəsi, eləcə də dəyər və biliyin daşıyıcısı olduğunu qeyd edib. Ana dilinin həyatımızı zənginləşdirən adət-ənənələrin, ifadələrin, nəğmələrin qorunub saxlanması və ötürülməsi üçün həyati əhəmiyyət kəsb etdiyini deyib. Bu gün dünyada 50 milyondan çox insanın Azərbaycan dilində danışdığını bildirib. Azərbaycanın çoxmillətli və çoxkonfessiyalı ölkə olduğunu diqqətə çatdırıb.

Vurğulayıb ki, tarixi İpək Yolunun mərkəzində, Şərqlə Qərbin, Şimalla Cənubun kəsişməsində yerləşən Azərbaycan müxtəlif mədəniyyətlərin və dinlərin qaynayıb-qarışdığı məkandır. Uzun müddət davam edən bu mədəni və dini müxtəliflik Azərbaycanın müxtəlif mədəniyyətlərin və dinlərin dinc yanaşı yaşaması və harmoniyası modelini formalaşdırıb. Azərbaycanda bütün millətlərin, etnik azlıqların və qrupların nümayəndələri bir ailə, qarşılıqlı anlaşma çərçivəsində informasiya mühiti formalaşdırırlar.

Ana Dili Gününə həsr olunmuş tədbirdə görkəmli Azərbaycan şairi Səməd Vurğunun “Azərbaycan” poemasından bir parça söyləyib:

Könlüm keçir Qarabağdan,

Gah bu dağdan, gah o dağdan.

Axşamüstü qoy uzaqdan

Havalansın Xanın səsi,

Qarabağın şikəstəsi...

Daimi Nümayəndəliyimizin Ana Dili Gününə həsr olunmuş, üzərində görkəmli Azərbaycan şairi Səməd Vurğunun “Azərbaycan” poemasından, eləcə də Azərbaycan dili haqqında mühüm məlumatlar plakatlar nümayiş olunub. Milli musiqimiz səsləndirilib.

Xocalı soyqırımının otuzuncu ildönümü haqqında Azərbaycan Respublikası Prezidentinin Sərəncamı və Mədəniyyət Nazirliyinin tədbirlər planına uyğun olaraq M.F.Axundzadə adına Azərbaycan Milli Kitabxanasında “Khojaly genocide – 30” adlı ingilis dilində virtual sərgi açılıb.

Kitabxanadan bildirilib ki, ingilis dilində virtual sərginin hazırlanmasında əsas məqsəd xarici oxucuları Xocalı soyqırımı haqqında məlumatlandırmaqdan ibarətdir. Virtual sərgidə Xocalı faciəsini özündə əks etdirən ingilis dilində kitablar və altyazılı fotoşəkillər nümayiş olunur.

Virtual sərgi ilə tanış olmaq istəyənlər http://anl.az/el/vsb/Khojaly_genocide_30/index.htm linkindən istifadə edə bilərlər.

Azərbaycan Respublikasının Dağlıq Qarabağ bölgəsi ərazisində baş verən silahlı münaqişə zamanı törədilmiş ən qanlı cinayətlərdən biri idi.

Bu gün Novruz bayramının ilk çərşənbəsi olan Su çərşənbəsi qeyd olunur. Bu, baharın ilk addımı hesab edilir. 

Əsatirlərə görə, Tanrı suyu ilk olaraq yaratdığı üçün dörd çərşənbədən ilk olaraq su çərşənbəsi qeyd edilir. İlk çərşənbə ilə Novruz bayramına hazırlıqlar başlayır. Bu gün ilk Novruz tonqalları qalanır, ilk bayram aşları bişirilir.

Su ilə bağlı əsasən kənd yerlərində müxtəlif ayinlər keçirilir, su və su mənbələri təzələnir, arxlar qaydaya salınır, su hövzələrində abadlıq işləri görülür.

Bu çərşənbə ilə əlaqədar müxtəlif şənliklər keçirirlər, baharın addımlarını duyan insanlar sevinirlər. Xüsusən indiki bu ağır, pandemiya məhrumiyyətli dövrdə baharı hamı səbirsizliklə gözləyir! 

El adətinə görə, su çərşənbəsi suya tapınma inamı ilə bağlıdır. Hələ gün doğmamışdan hamı su üstünə gedir, əl-üzünü yuyur, bir-birinin üzərinə su çiləyir, su üstündən atlanır, yaralıların yarasına su çiləyirlər.

Xalqın inancına görə, Su çərşənbəsi günü "təzə su"dan keçənlər, azarını, bezarını ona verənlər il boyu xəstəlikdən uzaq olurlar. İnanca görə, "təzə su", yəni səhər dan yeri sökülməmiş götürülən köpüklü ağ su min bir dərdin dərmanı sayılır.

Həmin gün su üstündə müxtəlif mərasimlər keçirilir, qədim türklərdə su tanrıları sayılan Aban və Yadanın şərəfinə nəğmələr oxunur.

Su çərşənbəniz mübarək olsun!

Günün fotosu:

İspaniyada uşaq cinayətkarlığı pik həddə çatıb

Pandemiya İspaniyaya uşaq cinayətkarlığını pik həddə çatdırıb. “Latın bandaları” adlı uşaq cinayətkar qruplarında üzvlərin sayı təkcə Madriddə 2500-ə çatıb. Artıq 11 yaşdan ispan uşaqları belə qruplara üzv olurlar.

Foto: Euronews

Böyük Britaniyada Bella-Cey Dark adlı 5 yaşlı qız “İtmiş pişik” kitabını nəşr edərək dünyanın ən gənc yazıçısı olub.

TASS agentliyi bu barədə Britaniyanın “Deyli Meyl” nəşrinə istinadən məlumat yayıb.

Məlumata görə, Dark keçən il kitab yazmaq arzusunu ailəsinə çatdırıb. Ana və atası əvvəlcə buna önəm verməyiblər. Lakin Bella-Cey Dark kitabını bir il ərzində tamamlayıb. “İtmiş pişik” hekayəsi macəraya çıxan və çox keçmədən önəmli bir dərs alan pişik haqqındadır.

Hazırda kitab "Amazon" və "Vaterstones"da 4 funta satılır.

İsveçin ən iri qəzetlərindən biri olan “Expressen”də “İsveçli bəstəkar Yonas Valfridson: Olimpiya Oyunlarında mən Azərbaycana azarkeşlik edirdim” sərlövhəli məqalə dərc edilib.

AzərTAC xəbər verir ki, Pekin Qış Olimpiya Oyunlarının başa çatmasından və idman yarışlarına xüsusi marağının olmamasından söhbət açan bəstəkar yalnız Azərbaycana azarkeşlik etməsinin əsas səbəbini vurğulayıb.

Yonas Valfridson deyib: “Mən fiqurlu konkisürmədə kifayət qədər yaxşı çıxış edən Azərbaycana xəlvətcə azarkeşlik edirdim. Bu ölkəyə hansısa münasibətim olduğuna görə deyil. Onların möhtəşəm milli himnləri var”.

Azərbaycan himnini canlı eşitmək arzusunu bildirən bəstəkar yazır: “Bu mahnıdır, mənim mahnımdır. Bu, mənim haqqımdadır və mənim üçün yazılıb. Mən Azərbaycandan olan heç kəslə qarşılaşmamışam. Lakin bu bəstəni eşidən kimi mən özüm də tir üzərində bir neçə hərəkət və yerdə ağır sıxma hərəkətlərini yerinə yetirmək istəyirəm”.

Fevralın 27-də Abdulla Şaiq adına Azərbaycan Dövlət Kukla Teatrında “Qoğal” tamaşası nümayiş ediləcək.

Bu tamaşanın quruluşçu rejissoru Rusiyadan dəvət edilən məşhur rejissor Eduard Qaydar, quruluşçu rəssamı Tatyana Melnikova, bəstəkarı Əməkdar incəsənət xadimi Cahangir Zülfüqarovdur.

Rus xalq nağılı əsasında səhnələşdirilən “Qoğal” daha əvvəl azərbaycanlı azyaşlılara təqdim edilsə də, dəvətli rejissor bu dəfə məşhur nümunəyə fərqli yozum verib, onu tam yeni, musiqi ilə zəngin bir formada, mətn ilə yükləmədən təqdim edib.

Bir saatlıq tamaşada uşaqlar kukla oyununun bütün zərifliklərini usta kuklaçı ifalarında izləyə biləcəklər.

Fevralın 21-də Bakı Şəhər Mədəniyyət Baş İdarəsinin Xətai rayon MKS-nin Uşaq şöbəsinin təşkilatçılığı ilə Xətai rayon 95 nömrəli tam orta məktəbdə Beynəlxalq Ana Dili Günü ilə əlaqədar “Ana dilimiz milli sərvətimizdir” adlı tədbir təşkil edilib.

Baş İdarədən bildirilib ki, tədbirdə AYB-nin üzvü, Əməkdar incəsənət xadimi Baba Vəziroğlu, qiraətçi Xəzər Süleymanlı, AMEA kitabxanasının icraçı direktoru, dosent Şəhla Tahirqızı, ADNSU-nun dosenti Vəfa Abbasova, Vətən müharibəsi veteranı, tarzən Fərid Atazadə, gənc xanəndə Həmzə Həsənov, Cəbrayıl rayon Böyük Mərcanlı kənd orta məktəbin müəllim və şagird kollektivi iştirak ediblər.

Tədbir Azərbaycan Respublikasının Dövlət Himninin səsləndirilməsi ilə başlayıb.

Tədbirin aparıcısı Təranə Quliyeva bildirib ki, hər bir millətin varlığının mühüm amillərindən biri olan ana dili heç vaxt yaddan çıxmayan, unudulmayan qürur mənbəyidir. Tarix boyu başı bəlalar çəkmiş Azərbaycan xalqı zaman-zaman əzilsə də, repressiyalara məruz qalsa da, öz ana dilini qoruyub saxlaya bilib.

Sonra Baba Vəziroğlu qeyd edib ki, Ali Baş Komandan İlham Əliyevin rəhbərliyi ilə rəşadətli Ordumuz 44 günlük müharibədə torpaqlarımızı erməni qəsbkarlarından təmizlədi. Bu gün ana dilimiz vüsalına yetişdiyimiz Qarabağımızda səslənir və daim səslənəcək.

Tədbirdə çıxış edən ziyalılar dilin hər bir millətin maddi və mənəvi irsini qoruyan və inkişaf etdirən ən mühüm və ən güclü vasitə olduğu bildiriblər.

Daha sonra şeirlər oxunub, mahnılar ifa olunub.