Super User
I Türk Dünyası Mədəniyyət Forumu çərçivəsində 9 bənddən ibarət Şuşa Bəyannaməsi qəbul olunub
Mədəniyyət Nazirliyinin təşkilatçılığı ilə Şuşa şəhərində Ümummilli lider Heydər Əliyevin 100 illik yubileyi münasibətilə keçirilən I Türk Dünyası Mədəniyyət Forumu öz işini başa vurub.
2-ci iş günündə - oktyabrın 14-də forum iştirakçıları tərəfindən Şuşa Bəyannaməsi qəbul edilib.
Bəyannamədə qeyd olunur:
1. Türk dünyasının ilk mədəniyyət forumuna dəstəyinə görə Azərbaycan Respublikasının Prezidenti cənab İlham Əliyevə bütün iştirakçılar adından təşəkkür edirik.
2. Azərbaycanın işğaldan azad edilmiş ərazilərində, eləcə də Türk dünyasının 2023-cü il üzrə mədəniyyət paytaxtı Şuşaya Böyük Qayıdışı və bu yolda sürətlə aparılan genişmiqyaslı bərpa-quruculuq işlərini və mədəni mühitin canlandırılmasını alqışlayırıq.
3. 30 illik işğal dövründə, Azərbaycanın Qarabağ və Şərqi Zəngəzur bölgələrində Türk dünyası mədəni irsinin ayrılmaz tərkib hissəsi tarixi və mədəni abidələrin geniş miqyaslı dağıdılması, həmçinin mədəni mülkiyyətin qaçaqmalçılığı və qanunsuz dövriyyəsi kimi ağır beynəlxalq humanitar hüquq pozuntularını qəti şəkildə pisləyir və bütün aidiyyəti beynəlxalq təşkilatlar tərəfindən bu məsələdə sərt mövqe tutulmasını tələb edirik.
4. Şuşada baş tutan diskussiyalar və geniş fikir mübadilələri çərçivəsində türk mədəniyyətinin dünəni, bu günü və sabahı nəzərə alınaraq mövcud çağırışların birgə əməkdaşlıqda həlli üçün yeni mexanizmlərin yaranmasını dəstəkləyirik.
5. Türk dilləri və ədəbiyyatı vasitəsilə ortaq mədəni mövqeyimizin gücləndirilməsini zəruri hesab edir və bu irsin rəqəmsal mühitə transformasiyasını sürətləndirməyə çağırırıq.
6. I Türk Dünyası Mədəniyyət Forumu çərçivəsində əldə edilmiş müsbət nəticəni nəzərə alaraq türk tarixi-mədəni irsinin araşdırılması, bərpası, mühafizəsi və təbliği sahəsində birgə fəaliyyət və ən yaxşı təcrübənin bölüşülməsinə xidmət edəcək Türk dünyasının İrs üzrə rəhbərlərinin şəbəkəsinin yaradılmasını alqışlayır və mütəmadi əsaslı platforma fəaliyyətinə başlamasını tövsiyə edirik.
7. Türk dünyasında mədəni marşrutlar proqramının təsis edilməsini və ilk mədəni marşrutun yaradılması təşəbbüsünü perspektivli ortaq layihə kimi yüksək qiymətləndirir və bütün maraqlı tərəfləri bu təşəbbüsün irəlilədilməsində fəal iştiraka çağırırıq.
8. Mədəniyyətin rəqəmsallaşması, habelə XXI əsrdə türk mədəniyyəti qarşısında duran çağırışlara cavab verən ortaq həlləri təşviq edirik və mədəniyyət sahəsindəki yaradıcı sənayelərin ortaq bazarların yaradılması üzrə müzakirələrin intensivləşməsini təklif edirik.
9. Azərbaycan Respublikasının təşəbbüsü ilə yaradılmış Türk Dünyası Mədəniyyət Forumu bütün əsas maraqlı tərəflərin təmsilçilərini bir araya gətirən mühüm universal platforma kimi uğurlu olduğunu qeyd edirik və Forumun iki ildən bir keçirilməsini təklif edirik.
“Ədəbiyyat və incəsənət”
(16.10.2023)
“Yıldız tozu”, “Abdulla Aripov” və “Sonuncu”…
“Ədəbiyyat və incəsənət” portalının Sual - cavab rubrikasını Könül aparır.
SUAL:
Hörmətli redaksiya. Bildiyimiz kimi, Azərbaycan Respublikası Mədəniyyət Nazirliyi, Heydər Əliyev Mərkəzi, Beynəlxalq Türk Mədəniyyəti Təşkilatı – TÜRKSOY, Azərbaycan Respublikası Kino Agentliyi və Bakı Media Mərkəzinin təşkilatçılığı ilə 8-11 oktyabr tarixlərində paytaxtımızda III “Korkut Ata” Türk Dünyası Film Festivalı keçirildi. Xəbərləri izləsəm də festivalın bütün qalibləri barədə konkret xəbər görə bilmədim. Hər yerdə adda-budda hamsısa nominasiya qalibi qeyd edilirdi. Tam siyahını dərc edərmisiniz?
(Könül Bayramova, Mingəçevir)
CAVAB:
Könül xanım və digər kinosevərlər, sizin nəzərinizə çatdırırıq ki, III “Korkut Ata” Türk Dünyası Film Festivalının laureatlar siyahısı bu cürdür:
1.
"Ən yaxşı bədii film” nominasiyasında "Yıldız tozu" (Türkiyə, rejissor Ahmet Sönmez) filmi qalib olub.
2.
“Ən yaxşı ssenari” mükafatına “Abdulla Oripov” (Özbəkistan) filmi layiq görülüb.
3.
"Ən yaxşı sənədli film" nominasiyasında 3-cü mükafat “Mənim dairəm” (Özbəkistan), 2-ci mükafat “Arqau” (Qazaxıstan), 1-ci və əsas mükafata isə “Sonuncu” (Azərbaycan) filmləri layiq görülüb.
4.
"Ən yaxşı rejissor" nominasiyasında Zhuraeva Asel Talibzhanova ("Tanrıverdi", Qırğızıstan) qalib olub.
5.
“Ən yaxşı aktyor” nominasiyası üzrə mükafatı Ahmet Amandurdiyev ("Qızıl alma", Türkmənistan), "Ən yaxşı aktrisa" nominasiya üzrə mükafatı isə Təhminə Rafaella ("Məryəm", Azərbaycan) qazanıb.
6.
“Jambıl" filminə görə qazaxıstanlı aktyor Dosjan Janbotaev, "Hep 33 yaşında" filminə görə türkiyəli rejissor Murat Pay jürinin xüsusi mükafatına layiq görülüb.
7.
Türk dünyası kinematoqrafiyasına verdiyi töhfələrə görə Hocaqulu Narlıyev, Mayagözəl Aymedova, Çarlıyar Seyidli (hər üçü Türkmənistan), Serdar Gökhan, Metin Günay ( hər ikisi Türkiyə), Həmidə Ömərova, Oqtay Mirqasımov, Orman Əliyev, Ağasi Məmmədli (hamısı Azərbaycan), Firdavs Abduxalikov (Özbəkistan) və Azamat Satıbaldı (Qazaxıstan) fəxri mükafatlarla təltif olunublar.
Şəkildə: “Yıldız tozu” filmindən fraqment.
“Ədəbiyyat və incəsənət”
(16.10.2023)
“Xanəndə Məşədi Qafar Qaryağdı”
Beynəlxalq Muğam Mərkəzinin nəşrləri seriyasından növbəti kitab işıq üzü görüb. Kitab publisist-yazıçı, filologiya üzrə fəlsəfə doktoru Gülhüseyn Kazımlı və texnika üzrə fəlsəfə doktoru, mühəndis Turan İbrahimov tərəfindən ərsəyə gətirilib. Kitabda XX əsrin əvvəllərində fəaliyyət göstərmiş xanəndə Məşədi Qafarın yaradıcılığına işıq salınıb. Təqdim olunan nəşrdə Məşədi Qafar Qaryağdının musiqi irsi, səs yazıları siyahısı və arxivi haqqında geniş məlumat verilir. Həmçinin xanəndənin bioqrafiyası, nəsil şəcərəsindən söz açılır, Məşədi Qafarın Şuşadan çıxmış istedadlı Qaryağdılar nəslinin nümayəndəsi və məşhur xanəndə Cabbar Qaryağdının kiçik qardaşı olduğu bildirilir.
Kitabın məsləhətçisi Beynəlxalq Muğam Mərkəzinin direktoru Sahib Paşazadə, ön sözün müəllifi Azərbaycan Milli Konservatoriyasının prorektoru, Əməkdar incəsənət xadimi, professor Lalə Hüseynova, redaktoru professor Abbasqulu Nəcəfzadədir.
“Ədəbiyyat və incəsənət”
(16.10.2023)
Bazar günü Bakıda iki möhtəşəm konsert oldu
Oktyabrın 15-də - bazar günü Bakıda iki möhtəşəm konsert oldu. Caz Festivalı çərçivəsində Heydər Əliyev Mərkəzində braziliyalı musiqiçi Mario Bakuna bakılılar qarşısına çıxdı.
Auditorium zalında keçirilən konsert “Braziliya mənzərələri” adlanırdı.
Məşhur caz ifaçısı eyniadlı albomu ilə artıq Avropanın 16 ölkəsində qastrolda olub. “Braziliya mənzərələri” albomu digərlərindən məşhur braziliyalı bəstəkarların əsərlərinin yeni aranjimanının təqdimatı ilə fərqlənir.
Oktyabrın 15-də Heydər Əliyev Sarayının səhnəsində isə İrlandiyanın əfsanəvi “Rhythm of the Dance” qrupu çıxış etdi.
Bu dəfə tamaşaçıları orijinal kelt melodiyaları, möhtəşəm İrlandiya stepi, canlı musiqi və solistlərin heyranedici ifalarından ibarət sehrli bir performans gözləyirdi. İnanılmaz hərəkət enerjisi, dəqiqlik və sinxronluq, xalq elementlərinin böyük şəhərin müasir ritmləri ilə birləşməsi - bütün bunlar “Rhythm of the Dance” qrupunu dünyada daha da məşhurlaşdırır.
Hər iki konsert bakılılara xoş ovqat bəxş etdi.
“Ədəbiyyat və incəsənət”
(16.10.2023)
Ölkəmizə türk dövlətlərindən səfər edən turistlərin sayı artıb
Nihad Alimoğlu, “Ədəbiyyat və incəsənət”
Sovetlər dönəmində 15 qardaş respublika deyilən bir anlayış vardı, erməniyə də, özbəyə də qardaş dedirdirdilər xalqımıza.
Uzaq Kuba sosialist ölkəsiydi deyə dost, yaxın Türkiyə isə kapitalist ölkəsiydi deyə düşmən sayılırdı. İndi sular axdı, öz məcrasını tapdı, dosta dost, düşmənə də düşmən deməyə başladıq. Və bu gerçəklikdə Türk dövlətləri birliyi yarandı, gələcək türkündür deyə dünyaya müsajlar ötürüldü.
Diqqəti çəkən dövlətlər səviyyəsində birliyin qurulmasından savayı, xalq kütlələrinin də
qaynayıb qarışmasıdır. İndi türkdilli xalqların nümayəndələri bir-birinə qonaq gedir, dostlaşır.
Dövlət Turizm Agentliyinin sədrinin müşaviri Kənan Quluzadə son illərdə Azərbaycana türk dövlətlərindən səfər edən turistlərin sayının artdığını qeyd edib. Bildirib ki, 2023-cü ilin 9 ayı ərzində Azərbaycana səfər edən Qazaxıstan, Özbəkistan, Türkiyə, Macarıstan, Qırğızıstan, Türkmənistan vətəndaşlarının sayında ardıcıllığa müvafiq olaraq 32 faiz, 59 faiz, 20 faiz, 91 faiz, 78 faiz, 188 faiz artımlar müşahidə edilib. Kənan Quluzadə, həmçinin şəhərlər arasında birbaşa uçuşların sayında da artımın qeydə alındığını və prosesin qarşılıqlı olduğunu diqqətə çatdırıb.
Əlbəttə ki, faktlar hər şeyi deyir.
Türk birliyi çiçəklənəcək, daha da inkişaf edəcək.
Yeri gəlmişkən, onu da xatırladım ki, bizim Şamaxı şəhəri 2023-cü il üçün Türk Dünyasının Turizm Paytaxtı seçilmişdi, 2024-cü il üçün isə Qazaxıstanın Türkistan şəhəri Türk Dünyasının Turizm Paytaxtı seçilib.
“Ədəbiyyat və incəsənət”
(16.10.2023)
"Təkərli kitab dükanı" ilə ilk dəfə yola çıxdıq
Şahbaz Xuduoğlu yazır
Qərara aldıq ki, yaxın kəndlərin birinə gedək, həm təkərli dükanı sınaqdan keçirək, həm də insanların münasibətini öyrənək.
Masazırdan isti çörək aldıq, Novxanıdan isə ləzzətli qutablar.
Fatmayi kəndini seçdik.
Avtomobilimizi Fatmayi kəndinin mərkəzində taksilər dayanan yerdə saxladıq. Yol qovşağı, kəndə gələn avtobusların da son durağıdır. Məktəb yolunun üstü və Məscidin yanı. Bir tərəfimizdə də Mədəniyyət sarayı. Dəmir hasarla “qorunan” Mədəniyyət sarayı.
“Təkərli kitab dükanı"nı yolun kənarında, yola paralel saxladıq ki, gediş-gəlişə mane olmayaq. Həm də yaşayış evinin darvazasına yaxınlaşdırdıq. Qonşu dedi ki, saxlaya bilərsiz. Taksi sürücüləri ilə də məslətləşdim və yer rahat olduğundan qapıları açdıq, 1 manatlıq kitabları, kataloqları masaya düzdük.
Məktəblilərin dərsdən çıxan vaxtıydı, sevinclə "təkərli dükanı" dövriyyə aldılar.
Qonşu bizi yeməyə dəvət etdi, anası üçün "Şorbalar" kitabı aldı. Anası isə dualar kitabı istədi. Mən ona duaların yerinə "Aforizmlər" kitabını hədiyyə etdim.
Valideynlərdən biri oğlunun autist olduğunu dedi, uşağı üçün rəngləmə kitabçaları aldı ki, "motoriklər" yaxşı işləsin. Dərhal ağlıma gəldi ki, autizmlə bağlı kitab nəşr etmək lazımdır.
Uşaqlardan birini valideyn göndərmişdi ki, bitkilərə baxmaqla bağlı kitab alsın, o da bizdə olmadı, amma dəftərimə yazdım.
Fatmaiydə Quran və başqa dini məzmunlu kitablara daha çox maraq göstərdilər.
Belə, yolumuza davam edək.
Niyyətiniz Azərbaycanın bütün guşələrində, kəndində, dağ-dərəsində yaşıyan hər kəs üçün kitabı əlçatan etməkdir.
“Ədəbiyyat və incəsənət”
(16.10.2023)
QƏZƏL SAATInda İslam İslamovun 2 qəzəli
Bu dəfə Qəzəl saatında əruz vəznində kifayət qədər uğurlu işlər ortaya qoyan İslam İslamovdur. Gənc müəllif səfalı rayonlarımızdan olan Qəbələdə dünyaya göz açıb. Ədəbiyyata marağı uşaq yaşlardan yaranıb. Əruz vəzni isə sevdiyi vəzn kimi qəlbində yer alıb. İslama görə "əruzun zirvəsi" dahi Füzulidir.
Beləliklə, gənc müəllifin 2 qəzəlini sizlərə təqdim edirik:
Birdəfəlik
Xəstəyəm, könlümü şad eylə, gülüm birdəfəlik,
Məni ağuşuna al ki, düzəlim birdəfəlik.
Ya mənim qəlbimi bir anlıq ovutmaqçün gəl,
Ya da gəl, qəlbimə daş bağla, ölüm birdəfəlik.
Bu rəvadırmı, gözümdən gələ eşqim dən-dən,
Əl uzat sil, ya da əl çək ki, silim birdəfəlik.
Bu nə getməkdi, gedirsən, qayıdırsan tez-tez,
Gəlmə, getdinsə, gülüm, gözlə, gəlim birdəfəlik.
Könlümün qayəsi zülfündə qərar tutmaqdır.
Bir telin göstər, o səmtə yönəlim birdəfəlik.
Bağrımın başına basdın bu bəla baltasını,
Qəsdin ölmümdüsə, gizlətmə bilim birdəfəlik
Onsuz İslamə ölümdən daha ağırdı qəmin.
Gəl mənim canımı al, get, gözəlim birdəfəlik.
*
Görər
Küfr' qılmazsan əgər ki, zülfünü aləm görər,
Görsə aləm zülfünü, ta görmədikcə qəm görər.
Ey, üzü qur'an özü baği-behiştin cilvəsi,
Göz ki, hüsnün görməz ol göz hər nə görsə kəm görər.
Sən ki, ey ərşi, təcəssüd etmiş Allah nurusan,
Allah-Allah, bilməz idim Həqqi bir
adəm görər.
Məhrəmi-raz ol deyə razü niyaz eylər könül,
Dəhrə naməhrəm birin çünki könül məhrəm görər.
Dərdi-bidərmanə düçar olsam etməzdim təlaş,
Əhli-eşqin qəddin aləm ta əzəldən xəm görər.
Vüsləti-dildarə yetmək qəsdi ilə ağlayan,
Məst olar, səccadəsin agah olub pürnəm görər.
Təxti-mülki-könlümə sulta'n sənsən, ey sənəm,
Dideyi-qəlbim səni hər dəm duyar, hər dəm görər.
Acizanə vəsf edib, İslamın aciz gözləri,
İnşəAllah gül üzarın həşrdə bahəm görər...
Ədəbiyyat və incəsənət”
(16.10.2023)
Axtarırsansa itir, itirirsənsə tap məni! - ESSE
Jalə İslam, “Ədəbiyyat və incəsənət”
Çox yaxşı xatırlayıram, o gecənin qaranlığı bir başqa idi, səmada ulduzların nizamı mənə doğru baxan bir cüt gözü əks etdirirdi. Və sonra bu nizamı göy üzünü büsbütün ağuşuna alan günəş yox etdi, baxmayaraq ki, saat 03:00 idi. Şüaları kəskin bıçaq kimi ətrafıma sədd çəkmişdi və onlara toxunan yara ala bilərdi. Ətrafımı bütövlükdə öz əlinə alan bıçaqlar bir ayna kimi məni göstərirdi. Özümə baxarkən həm qorxur, həm də heyrətlənirdim.
Bir anda bütün aynalar parçalanmağa başladı, sanki günəş onları öz yanına çağırırdı. Olduğum yerdə donub qalmışdım. Məni o gecə qanım isidir, tərim yuyurdu. Bu dəmdə əlləri ilə çiynimə arxadan kimsə toxundu, demək olar ki, hərarəti boğazımda hiss edirdim. Önüm tamamilə qaranlıq idi, mən ilk toxunuşu hiss edərək varlığın qarşısında vücudumu əksinə çevirdim. Ayna mənim tam qarşımda dayanmışdı, amma o məni göstərmirdi. Varlıq içində yoxluğu bütünləşdirmişdi. Daxilim mənə: -İşıq gələn tərəfə get - deyərək, məni odun əlləri arasından xilas etməyə bir addım belə atmırdı!
“Ədəbiyyat və incəsənət”
(16.10.2023)
13 yaşlı pişikləri niyə öldürürlər?
Leyla Səfərova, “Ədəbiyyat və incəsənət”
Min illərdir insanlarla bir arada yaşayan pişiklərə münasibətlər olduqca dəyişkəndir. Qədimdə Tanrı elçisi adlandırilıb baş əyilən bu sevimli heyvanlar orta çağda cadugər, şeytan adlandırılaraq yandırılıb, işkəncə görüb.
Pişiklərin hissiyyatlarının nə dərəcə güclü olduğu hamıya məlumdur. Bu, onlardakı "yakanson" adlanan orqanla bağlıdür. Üçüncü göz orqanı deyilən bu orqan onlarda ağız nahiyyəsində yerləşir və fəaliyyəti pişiklərin bir çox təhlükəni hiss etməsinə səbəb olur. Bununla belə, bu canlıların telepatiya bacarıqları hələ də sirlidir.
Əsrlərlə pişiklər haqda fikirlər yayılıb. Belə ki, bir dönəm yayılan vəba xəstəliyinə səbəbkar da bu canlılar görülüb və pisliklərdən, şeytandan arınmaq məqsədilə təəssüflər olsun ki, minlərlə pişik diri-diri yandırılıb. Hətta indi də bəzi bölgələrdə belə bir inanc var ki, 13 yaşına çatan pişik artıq insandan belə ağıllıdır, o, cinlərə qulluq edəcəkdir. Buna görə də ən mərhəmətli ev sakinləri belə 13 yaşlı pişiklərini ya azdırır, ya yandıraraq, boğaraq vicdansızcasına öldürür.
Küçələrdə minlərlə ac, zərərsiz heyvan var, amma biz onlara nəinki yardim edir, hətta bəzilərimiz görəndə təpikləyir, yerindən qovuruq. Dəyişməyən tək şey bu heyvanın sevimliliyi və sirri deyilmiş, insan oğlunun qatilliyi, insanlıqdan uzaqlığı da elə eyni qalıbmış...
“Ədəbiyyat və incəsənət”
(26.10.2023)
Nüşabə xanımın “Zəngulə”si
Mina Rəşid, “Ədəbiyyat və incəsənət”
Həyata, insanlara sevgisi ilə hər kəsin doğmasına çevrilən Vaqif Bayatlı Odər yazır ki,
Dünyaya baca kimidir şair qələmi,
baca evin tüstüsünü,
hisini çəkəntək
şair qələmi də çəkər,
çəkər ötürər canından
dünya deyilən
damlar damının dərdlərini.
Şair də, yazıçı da, bir sözlə qələm adamları dünyanın, yaşadığı mühitin, mənsub olduğu xalqın dərdlərini bir başqa cür çəkər. Sanki süçəkən kimi bu dərdlər onun canına hopar, qanına keçər. Onu elə bir hala gətirər ki, yazıçı son anda təsəlli kimi əlini ən yaxın dostu, həmdəmi olan qələmə uzadar. Qələm də sevdiyi əllərə, ürəklərə könül verər. Qələmlə ürək birləşəndə bir hayqırtı, zəngulə meydana gələr.
Tanınmış yazıçı Nüşabə Məmmədlinin “Zəngulə”si kimi...
Hələ illər öncə topaqlarımız yağı tapdağında qalanda Nüşabə xanımın elə bu dərdlərdən ürəyinin qanı ilə yazdığı “Zəngulə” romanını oxumuşdum. Sonra müəlliflə görüşüb yazı hazırlamışdım. Sən demə, Nüşabə xanım erməni qaniçənlərinə əsir düşmüş azərbaycanlı qadın və uşaqların həyatını, həmin anda onların çəkdiyi sözə sığmayan əzablarını qələmə alarkən sarsıntıdan üstünə dəfələrlə təcili yardım maşını gəlib…
Amma o bir az özünə gələn kimi yenə qələmə sarılıb. Çünki ədəbiyyatın qanunu budur və yazmaq onun taleyidir... Tənqidçi deyir ki, yazıçı ən çətin məqamları, faciəni, dəhşəti qələmə almalı, amma soyuqqanlığını da itirməməli, əsəri yarımçıq qoyub ölməməlidir!
Yəqin elə bu cür əziyyətdən doğulduğuna görə “Zəngulə” romanı ötən günlərin birinə təsadüf edən yubiley törənində yazıçının başına toplaşanların dilindən düşmədi. Kim onun hansı əsərindən danışsa da, sonu gəlib “Zəngulə”yə çıxırdı...
Doğrudan da, musiqi, səs və incəsənətin bütün növləri kimi ədəbiyyat da, qələm də, söz də bir silahdır. 30 ildə gözlədiyimiz bu gözaydınlığına qədər ədəbiyyatımız susmadı, nə şairimiz dayandı, nə yazıçımız durdu. Nüşabə Məmmədlinin “Zəngulə”si də beləcə bütün dünyaya hayqırdı. Əsərin qəhrəmanı kimi, romanın özü də Azərbaycanın sərhəddini aşdı. Azərbaycanda 2005-ci ilin kitabı seçilən “Zəngulə” romanına görə müəllif Rusiya Federasiyasının Yazıçılar İttifaqı tərəfindən milli ədəbiyyatımıza verdiyi samballı töhfəyə görə Q. R. Derjavin adına orden ilə təltif edildi.
Nüşabə Məmmədli 1000-ə yaxın publisistik məqalənin müəllifidir. O, Rusiya Federasiyası İrkutsk vilayətinin Ust-İlimsk şəhərində yaşayan zaman Qarabağ həqiqətlərini ictimaiyyətə çatdırmaq məqsədilə məqalələrini “Комсомольская правда”, “Аргументы и факты”, “Усть-Илимская правда” qəzetlərində dərc etdirib.
N. Məmmədli Türkiyədə baş verən dağıdıcı zəlzələdən bəhs edən 10-dan çox hekayə yazıb. Avrasiya Kitabxanaçılar Birliyi Dərnəyi tərəfindən I Uluslararası Avrasiya Türk Dünyası Uşaq Ədəbiyyatı Nəşri Simpoziumunda iştirak etdiyinə görə sertifikart alıb (2014).
İstedadlı yazıçının əsərləri rus, türk, ingilis, özbək və Ukrayna dillərinə tərcümə olunub. Kitabları İngiltərə, Rusiya Federasiyası, Türkiyə, Çexiya, Almaniya, Serbiya, Sloveniya, Ukrayna, Özbəkistan, Türkmənistan kitabxanalarının fondlarına daxil edilib. Bir çox mükafat və fəxri fərmanlarla təltif edilib.
Yasamal rayon İcra Hakimiyyətinin Heydər Əliyev Mərkəzində yazıçının yaradıcılığına və 70 illik yubileyinə həsr edilmiş tədbirdə çıxış edən tanınmış ziyalılar, mədəniyyət xadimləri, eləcə də, ədəbiyyatşünas alimlər, şair və nasirlər iştirak etdilər. Professorlar- Asif Rüstəmli, Rüstəm Kamal, Azad Şükürov, millət vəkili Aydın Mirzəzadə, Əli Əmirli, eləcə də tanınmış iqtisadçı alim Azər Əlioğlu, ehtiyatda olan polis polkovniki Sahib Həsənov, “Təzadlar” qəzetinin baş redaktoru Asif Mərzili, Azərbaycan Yazıçılar Birliyinin şöbə müdiri Sayman Aruz və başqaları yazıçının həyat və fəaliyyətindən maraqlı xatirələr, əsərlərinin bədii üslubundan danışdılar.
Yasamal MKS-nin təşkil etdiyi həmin tədbirdə yubilyara Yazıçılar Birliyinin, Heydər Əliyev Mərkəzinin mükatları təqdim edildi.
Yazıçıya hər kəsin bir arzusu da bundan sonra Azərbaycanın 44 günlük Zəfər yürüşündən, möhtəşəm qələbələrimizdən və dogma torpaqlara, Qarabağa, Şərqi Zəngəzura əbədi qayıdışımızdan yazması oldu...
Hörmətli Nüşabə xanım, Sizi 70 illik yubileyiniz münasibətilə təbrik edir və dünyaya göz açdığınız dogma Ağdamın işğaldan azad edilməsi ilə bağlı Sizə gözaydınlığı veririk.
Qələminiz həmişə əlinizdə, ömrünüz bərəkətli və sevinciniz belə möhtəşəm olsun!
“Ədəbiyyat və incəsənət”
(16.10.2023)
