Super User
Şəhidlər barədə şeirlər – Orxan Qəhrəmanov
“Ədəbiyyat və incəsənət” portalı Azərbaycan Yazıçılar Birliyinin üzvü Coşqun Xəliloğlunun “Şəhidlər barədə şeirlər” silsiləsini təqdim edir. Bu gün Orxan Qəhrəmanova həsr edilmiş şeirlə tanış olacaqsınız.
ORXAN SƏLVƏR OĞLU QƏHRƏMANOV
(28.03.1991.-23.10.2020.)
Bakı şəhərinin Qaraçuxur qəsəbəsində anadan olmuş Qarabağ uğrunda Vətən müharibəsinin şəhidi
BU YURDUN BALASI
Baharda doğulmuşdu, necə xoş soraq idi,
Hamı onu sevirdi, zirəkdi, qoçaq idi.
Böyüdü halallıqla, eldə üzü ağ idi,
Fəxr edirdi bu yurdun, bu elin balasıdır.
Qarabağsız yurd olmaz, insan olar qara baxt,
Anlayırdı, işğalda qala bilməz Qarabağ,
Ürəkdən inanırdı gələcəkdi həmin vaxt,
Fəxr edirdi bu yurdun, bu elin balasıdır.
Əmisi şəhid idi, dözəmmirdi bu dərdə,
İntiqamı yağıdan almaq bir borcdur mərdə,
Özünü ləyaqətlə aparırdı hər yerdə,
Fəxr edirdi bu yurdun, bu elin balasıdır.
O, hərbi xidmətini çoxdan vursa da başa,
Zaman gəldi, könüllü yola düşdü – savaşa,
Dedi, qurbanam sənə, dedi - vətənim, yaşa
Fəxr edirdi bu yurdun, bu elin balasıdır.
Topçu oldu, düşmənə, necə də uddurdu qan,
Azad oldu Cəbrayıl, azad oldu Zəngilan.
Hər döyüşdə deyirdi; - Yaşa, can Azərbaycan!
Fəxr edirdi bu yurdun, bu elin balasıdır.
Qubadlı döyüşündə göstərdi o, rəşadət,
Soy-kökündən gəlirdi bu hünər, bu mətanət.
Şəhadətə qovuşdu göstərərək şücaət,
Fəxr edirdi bu yurdun, bu elin balasıdır.
Orxan Qəhrəmanovla fəxr edirik hamımız,
Onu unutmayacaq millətimiz, xalqımız,
Zəfər qazanmışıq biz, sönməz zəfər şamımız,
Orxanlardır bu elin sevimli balaları,
Orxanlardır bu yurdun, yenilməz qalaları!
“Ədəbiyyat və incəsənət”
(05.03.2024)
Yaşasaydı, bu gün 68-ni qeyd edərdi - SABİR SARVANIN XATİRƏSİNƏ
Elman Eldaroğlu, “Ədəbiyyat və incəsənət”
Əli Kərim adına Poeziya klubuna yolum düşəndə, rastlaşıb söhbətləşərdik. Çox çılğın və emosional adam idi. Bir anda coşa, bir dəqiqə sonra sakitləşə bilirdi. Güclü yaddaşı vardı. Demək olar ki, əksər klassiklərin, eləcə də zəmanə şairlərinin poeziya nümunələrini əzbərdən söyləməyi bacarırdı. O vaxt yüksək postda çalışan qohumunun vasitəsi ilə AYB-nin Sumqayıt bölməsini yaratmışdı və bölməyə özü rəhbərlik edirdi. Münasibətinin kimlərlə necə olduğunu deyə bilmərəm, amma onun vəzifəsinə göz dikənlərin də olduğundan məlumatlıydım. Hətta AYB-nin sədri, xalq yazıçısı Anara, eləcə də müxtəlif distansiyalara yazılı, şifahi müraciətlər edirdilər ki, onu tutduğu vəzifədən uzaqlaşdıra bilsinlər. O isə bu xəyanətlərə tab gətirirdi. Elə bil, hansısa sehirli qüvvə onu qoruyub saxlayırdı...
Haqqında söhbət açdığım şair Sabir Sarvan (Sabir Soltan oğlu Məlikov) 1956-cı il mart ayının 5-də Ağsu rayonunun Pirhəsənli kəndində anadan olmuşdu. Əsl anası Cəmilə xanım olsa da, bir yaşından Sarvan kəndində yaşayan ana nənəsi Səkinə xanımın himayəsində böyüyüb, təlim-tərbiyə almışdı. 1971-ci ildə Sarvan kəndində səkkizillik məktəbi, 1973-cü ildə isə Növcü kənd orta məktəbini bitirmişdi. 1977-ci ildə o vaxtkı M.A. Əliyev adına Azərbaycan Dövlət İncəsənət İnstitutunun Dram və kino aktyorluğu fakultəsini bitirmişdi. Bir müddət N. Vəzirov adına Lənkəran Dövlət Dram teatrında, sonra isə Bakı Tədris Teatrında aktyor işləmişdi. 1996-cı ilin dekabr ayından AYB-nin Sumqayıt bölməsinin sədri vəzifəsində çalışırdı.
2017-ci ilin mart ayında xəstəlikdən vəfat etdi…
Uzun illər evli olsa da övladı yox idi. Amma uşaqları çox sevirdi...
Həyat yoldaşı Zərnigar xanımın söylədiyinə görə, həkim ondan son istəyini soruşduqda, Sabir Sarvan dərindən ah çəkərək: “Ölüm məni qorxutmur, torpaqdan gəlmişik, torpağa da qovuşacağıq, amma bir arzum var, keşkə Qarabağı azad görüb öləydim.” Həkm təəccüblə üzünə baxaraq, sən Qarabağlısanmı?- deyə soruşduqda isə, Sabir Sarvanın cavabı qısa və sərt olub: “Mən Azərbaycanlıyam. Bunu istəmək üçün Qarabağlımı olmalıydım?!”
Xarizmatik xüsusiyyətlərilə çoxlarından seçilirdi. Mərdanə davranışı, ağayanə xarakteri vardı. Sözü üzə deməyi bacarırdı. Yaxşı təşkilatçı, bacarıqlı inzibatçıydi. Şəhər rəhbərliyi ilə münasibəti çox yaxşıydı. Bütün bunlarla yanaşı, Sabir Sarvan necə deyərlər, təpədən dırnağa şair idi. Şəxsiyyətilə yaradıcılığı üst-üstə düşən şair...
Deyirdi ki,- “Ədəbiyyat, sənət ilk növbədə səmimiyyətdən başlayir. Səmimiyyət olmayan yerdə insanlıq və deməli sənət də yoxdur. Mənim müşahidələrimə görə paytaxt ədəbi mühitində səmimiyyət itib, Sumqayıt ədəbi mühitində isə ayrı-ayrı qələm sahiblərinin sayəsində hələ ki, bir duruluq var və buna görə də, bu fikirlə razıyam ki, Sumqayıt ədəbi mühiti daha fəal, daha güclüdür. Paytaxt ədəbi mühitinin nümayəndələrinin Sumqayıtda görüşlər keçirmək istəyi də elə bununla bağlıdır. Amma təəssüf ki, səmimiyyətdən kənar, bir-birini oxumadan belə, bir-birini tərifləmək bizim ədəbi mühitə də ayaq açır. Ümumilikdə isə, bizim ədəbi mühitdə elə imzalar var ki, təbliğatı “tanrının yanına” qaldırılan paytaxt yazıçısından, yaxud şairindən qat-qat üstündür. Sadəcə, reklamı yoxdur. Günahı da budur ki, əyalətdə yaşayır.”
Vəfatından az öncə, 2017-ci ildə AYB-nin "Natavan" klubunda 60 illik yubileyi geniş şəkildə qeyd edilib. Vəsiyyətinə əsasən, doğulduğu Ağsu rayonunun Pirhəsənli kəndində dəfn olunub.
Sağlığında hər dəfə Pirhəsənliyə yolu düşəndə ahıl insanlara, kimsəsizlərə baş çəkər, onların dərd-sərini öyrənib, əlindən gələn köməyi edərdi...
Sabir Sarvanın Miri deyə müraciət etdiyimiz bir həmkəndlisi və sinif yoldaşı ilə mehriban münasibətim var. Hər dəfə Sabir Sarvandan söz düşəndə, söhbətə atası Soltan müəllimdən başlayıb deyir ki,- “Soltan müəllim çox ciddi və zabitəli kişi idi. Onun zabitəsindən hamımız çəkinirdik. Bu gün nail olduğumuz ali təhsilə, mədəni davranışa görə, məhz ona minnətdarıq. Elə bir kişinin oğlu pis adam ola bilməzdi. Şairin ölümü hamımızın sinəsinə dağ çəkib...”
Söhbətimin sonunda, bir daha vurğulamaq istəyirəm ki, bəli, Sabir Sarvan mərdanə kişilərdən idi. Bunu sağlığında ondan qalaq-qalaq şikayətlər yazıb yuxarılara göndərən qələm yoldaşları da, sonradan başa düşdülər və haqqında ürək dolusu danışmağa başladılar...
Bu gün onun yaratdığı bölmədən necə deyərlər, evinə əməkhaqqı aparan bir neçə adam var. Onlardan biri də Sabir Sarvanın vəzifəsini daşıyan Gülnarə Cəmaləddindir. Sağ olsun, Sabir bəyin açdığı cığırı daha da genişləndirərək, AYB-nin Sumqayıt bölməsinin köhnə nüfuzunu qoruyub saxlaya bilir...
Yaşasaydı, bu gün şairin 68 yaşı tamam olacaqdı.
Ruhu şad olsun!..
“Ədəbiyyat və incəsənət”
(05.03.2024)
“ASAN xidmət”in “Bilim Bakı” mərkəzinin komandaları növbəti uğura imza atıb
2-3 mart 2024-cü tarixində Bakı İdman Sarayında Naxçıvan Dövlət Universitetinin və “Robotex Türkiyə”nin birgə təşkilatçılığı ilə “Robotex Azərbaycan Avrasiya Çempionatı” təşkil olunub.
Tədbirdə 6 universitetin, 41 məktəbin, 10 özəl müəssisənin 250-dən çox komandası, 1500-dən çox iştirakçı, 5000-dən çox qonaq iştirak edib. Komandalar 18 kateqoriyada 4 yaş qrupunda yarışıb.
Çempionatda Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “Bilim Bakı” mərkəzinin 7 komandası müxtəlif kateqoriyalar üzrə qalib seçilib. Bu barədə “Ədəbiyyat və incəsənət” portalına “ASAN xidmət”dən məlumat verilib.
Belə ki, mərkəzin "O-Line" komandası “Lego Xəttinin Təqibi” kateqoriyası üzrə 1-ci yerin, "MMR" komandası isə 2-ci yerin qalibi olub. "Karanlığın yıldızları", "Turan Tech" və "DİS Robot” komandaları isə münsiflər heyətinin xüsusi mükafatı ilə təltif olunub.
“RoboLig” kateqoriyası üzrə “Kings” komandası, “Sağlamlıq elmləri və texnologiyaları” kateqoriyası üzrə isə “CREATORS” komandası 3-cü yerin qalibi olub.
Festivalda dərəcə göstərən komandalara kubok və sertifikatlar təqdim olunub.
“Bilim Bakı” mərkəzinin qalib komandaları ölkəmizi Antalyada keçiriləcək yarımfinal mərhələsində təmsil edəcək.
“Robotex Azərbaycan Avrasiya Çempionatı” regionun ən parlaq zəkalı gənclərini təhsil və texnologiya sahəsində bir araya gətirir, onlara bilik və bacarıqlarını beynəlxalq səviyyədə sınamaq və nümayiş etdirmək imkanı verir.
Xatırladaq ki, "Bilim Bakı" mərkəzi Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin və Türkiyə Texnologiya Komandası Fondunun əməkdaşlığı ilə yaradılıb. Məqsəd 6 -14 yaşlı şagirdlərin texnologiya, innovasiya, elm və sahibkarlıq sahəsində bilik və bacarıqlarını inkişaf etdirmək, onlara məktəbdə öyrədilən anlayışları tətbiqi təlimlər vasitəsilə əyani nümayiş etdirmək, gündəlik həyatda elm və texnologiyanın ekvivalentini göstərmək və nəzəriyyəsi məlum olan elmi hadisələrin praktikada necə işlədiyini müşahidə etmək imkanlarını yaratmaqdır.
“Ədəbiyyat və incəsənət”
(04.03.2024)
“ASAN xidmət” beynəlxalq tədbirdə təqdim olunub
Monteneqronun paytaxtı Podqoritsa şəhərində Almaniya Beynəxalq Əməkdaşlıq Cəmiyyətinin (GIZ) və Qərbi Balkanlar Regionu üzrə Dövlət İdarəçilik Məktəbinin (ResPA) təşkilatçılığı ilə “Mükəmməllikdə tərəfdaşlıq təməlinin qurulması” mövzusunda seminar keçirilib.
Əsas məqsəd keyfiyyətli idarəetmə sistemləri qrupuna aid olan “Ümümi Qiymətləndirmə Çərçivəsi”nin dövlət qurumlarının təşkilati fəaliyyətinin təkmilləşdirilməsində rolu, habelə müvafiq modelin Şərq Tərəfdaşlığına (ŞT) üzv ölkələrdə mümkün tətbiqi barədə müzakirələrin aparılması olub.
Proqram çərçivəsində ölkəmizin “ASAN xidmət” təcrübəsi barədə iştirakçılara ətraflı məlumat verilib. Bu barədə “Ədəbiyyat və incəsənət” portalına “ASAN xidmət”dən məlumat verilib.
Həmçinin səfər zamanı Dövlət Agentliyinin nümayəndə heyəti ilə Monteneqronun Dövlət İdarəçiliyi Nazirliyinin Dövlət idarəçiliyində strateji planlaşdırma idarəsinin baş direktoru arasında ikitərəfli görüş keçirilib. Tərəflər arasında 2017-ci ildə imzalanmış Anlaşma Memorandumunun icrası çərçivəsində birgə həyata keçirilmiş tədbirlər, planlaşdırılan layihələr, o cümlədən Dövlət Agentliyi tərəfindən dövlət xidmətlərinin göstərilməsi sahəsində icra olunan mövcud innovativ həllərin Monteneqroda tətbiqinə dair müzakirələr aparılıb.
“Ədəbiyyat və incəsənət”
(04.03.2024)
“ASAN Məktub” sosial proqramı balacaların arzularını reallaşdırmağa davam edir.
"ASAN Könüllüləri" Təşkilatının "ASAN Məktub" sosial proqramının təşkilatçılığı ilə həyata keçirilən “Bir qəlbi də sən isit!” aksiyası zamanı öhdəliyə götürülən 91 uşağın arzusu reallaşdırılıb. Bu barədə “Ədəbiyyat və incəsənət” portalına “ASAN xidmət” dən məlumat verilib.
Sumqayıt şəhərindən olan balacalara “Sevinc paylaşdıqca çoxalır” deyərək öz istəklərinə uyğun hədiyyələr təqdim olunub.
“ASAN Məktub” sosial proqramı çərçivəsində cari ilin yanvar və fevral ayları ərzində Bakı və bir sıra regionlar üzrə 374 uşağın arzusu reallaşdırılıb.
Siz də kiçik dostlarımızın sevgi dolu qəhrəmanına çevrilmək istəyirsinizsə, www.asanmektub.az saytına daxil olaraq öhdəliyə məktub götürə bilərsiniz.
“Ədəbiyyat və incəsənət”
(04.03.2024)
“YAŞAT" Fondunun "Onlar bizə əmanət" layihəsi davam edir
19-20 sentyabr 2023-cü il tarixində Qarabağda aparılan lokal xarakterli antiterror tədbirləri zamanı şəhid olan qəhrəmanımız Sadıqov Samir Cəbrayıl oğlunun Bakı şəhərində doğulan övladı Amirin zəruri xərcləri "YAŞAT" Fondu tərəfindən qarşılanıb. Bu barədə “Ədəbiyyat və incəsənət” portalına “YAŞAT” Fondundan məlumat verilib.
Dünyaya yeni göz açan körpənin adına depozit hesabı açılacaq və 5 000 AZN vəsait onun hesabına yerləşdiriləcək. Körpənin ilkin zəruri xərclərinin qarşılanması üçün 1 000 AZN vəsait isə ananın hesabına köçürüləcək. Həmin hesaba vəsait Fonda edilən ianələr hesabına toplanmış məbləğdən köçürülür. Şəhidin övladı bu vəsaiti üzərinə mütəmadi toplanan faizləri ilə birlikdə 18 yaşına çatdıqdan sonra hesabından çıxara biləcək.
"Onlar bizə əmanət" layihəsi indiyədək 119 şəhid övladını əhatə edib.
Xatırladaq ki, “YAŞAT” Fonduna müraciət etmək və Fondun fəaliyyəti ilə tanış olmaq üçün yashat.gov.az portalı istifadədir.
Fondun hesabatlılığı ilə tanış olmaq üçün keçid: https://yashat.gov.az/report/tableau
Həmçinin Fondun 8110 “Çağrı” Mərkəzi fəaliyyət göstərir.
“Ədəbiyyat və incəsənət”
(04.03.2024)
Kamera və Orqan Musiqisi Zalında Eynaudinin əsərləri səsləndirilib
Müslüm Maqomayev adına Azərbaycan Dövlət Akademik Filarmoniyasının Kamera və Orqan Musiqisi Zalında pianoçu Nigar Əsədullayevanın konserti keçirilib.
AzərTAC xəbər verir ki, konsert yüzlərlə şamın işıqlandırdığı sehirli ab-havada keçib. Proqramda tanınmış italyan bəstəkarı Lüdoviko Eynaudinin “Una matına”, “Divenire”, “Le Onde”, “Elements”, “Primavera”, “Life” və s. kimi məşhur əsərləri səsləndirilib.
Üzeyir Hacıbəyli adına Bakı Musiqi Akademiyasının məzunu, Rəşid Behbudov adına 2 saylı 11 illik musiqi məktəbinin müəllimi Nigar Əsədullayeva “Baku Chamber Orchestra”da görkəmli dirijorların rəhbərliyi ilə konsertmeyster işləyib, Azərbaycanda və xaricdə konsertlər verib, müxtəlif festivallarda, musiqi layihələrində iştirak edib. Klassik pianoçu təhsili alan Nigar müxtəlif janrlarda musiqi ifa etməyə, eləcə də klassik musiqi ilə müasir musiqini sintez etməyə başlayıb.
Nigar Əsədullayeva AZƏRTAC-ın əməkdaşı ilə söhbətində Eynaudini müasir dövrün ən tələb olunan bəstəkarlarından biri adlandırıb.
“Onun musiqisini müxtəlif nəsillərin nümayəndələri sevir, onun əsərləri bütün dünyada dinləyicilər tərəfindən çox yaxşı qəbul olunur. Onun yaradıcılığı vasitəsilə mən öz qəlbimin incə təbiətini çatdıra bilirəm”, - deyə pianoçu bildirib.
Konsert böyük uğurla keçib, tamaşaçılar pianoçunu təkrar səhnəyə çağırıblar. Nigar Əsədullayevanın sözlərinə görə, bu, onun “RED EVENTS & Distribution ltd.” şirkəti ilə birgə təşkil olunan üçüncü konsertidir. Əvvəlki iki konsert kimi bu konsert də tədbirin qonaqlarında xoş təəssürat yaradıb. Hazırda pianoçu, özünün də qeyd etdiyi kimi, bu vaxta qədər Bakıda bənzəri olmayan yeni musiqi layihəsinə hazırlaşır.
“Ədəbiyyat və incəsənət”
(04.03.2024)
Mədəniyyət Nazirliyində "TikTok"un nümayəndə heyəti ilə görüş olub
Mədəniyyət Nazirliyində nazir müavini Səadət Yusifovanın iştirakı ilə "TikTok" videoməzmun sosial media platformasının nümayəndə heyəti ilə görüş keçirilib.
Bu barədə “Ədəbiyyat və incəsənət” portalı Mədəniyyət Nazirliyinə istinadən məlumat verir. Görüşdə görüşdə “TikTok” platformasının Şərqi Avropada dövlət siyasəti və korporativ əlaqələr departamentinin direktoru Sergey Sokolov, “TikTok Live”ın baş direktorunun müavinləri Junjiao Bay, Junqing Wu və digər qonaqlar iştirak ediblər.
Söhbət zamanı qonaqlara Mədəniyyət Nazirliyinin dəstəyi ilə həyata keçirilən “#TikTokDanÖyrən” (#LearnOnTikTok) müsabiqəsi barədə məlumat verilib. Layihənin əhəmiyyəti vurğulanıb, fikir mübadiləsi aparılıb. Həmçinin nazirliyin tabeliyində olan müəssisələrin layihədə aktiv iştirakının təşviq edilməsi, mədəniyyət müəssisələrinin layihəyə cəlb olunması üçün "TikTok" tərəfindən əlavə təlimlərin keçirilməsi, “TikTok Live” vasitəsilə mədəniyyət sahəsinə dair məzmunun yaradılması mövzuları diqqət mərkəzinə çəkilib.
Xatırladaq ki, #TikTokdanÖyrən" layihəsinin məqsədi fevralın 21-dən aprelin 21-dək mədəniyyət müəssisələri tərəfindən yaradıcı videoların paylaşılması ilə bu müəssisələrə “TikTok” platforması vasitəsilə daha çox ziyarətçinin cəlb edilməsidir. Bu günədək müsabiqəyə 6 muzey, 1 kitabxana, 13 teatr qoşulub. Milli Azərbaycan Tarixi Muzeyi kolleksiyalarının eksponatlarını və Azərbaycan Milli İncəsənət Muzeyi sərgilərini nümayiş etdirir, Azərbaycan Milli Xalça Muzeyi isə qısa virtual turlar keçirir. Eyni zamanda, Azərbaycan Dövlət Akademik Rus Dram Teatrı tamaşaların necə ərsəyə gəlməsi, Dövlət Gənc Tamaşaçılar Teatrı aktyorların məşq prosesi və Akademik Milli Dram Teatrı aktyorların tamaşaya hazırlıq prosesi barədə məlumatlar təqdim edirlər.
“Ədəbiyyat və incəsənət”
(04.03.2024)
Sumqayıtda Şərqin böyük mütəfəkkiri və şairi Məhtimqulu Fəraqinin 300 illiyi qeyd olunub
Sumqayıtda Şərqin böyük mütəfəkkiri və şairi Məhtimqulu Fəraqinin anadan olmasının 300 illiyinə həsr olunmuş tədbir keçirilib.
“Ədəbiyyat və incəsənət” portalı AzərTAC-a istinadən xəbər verir ki, tədbirdə Türkmənistanın ölkəmizdəki səfiri Qurbanməmmet Elyasov, Azərbaycanın gənclər və idman nazirinin müavini Fərhad Hacıyev, Sumqayıt Şəhər İcra Hakimiyyəti başçısının müavini Akif Quliyev, SOCAR-ın “Azərkimya” İstehsalat Birliyinin baş direktoru Elnur Məmmədli və digər rəsmi şəxslər iştirak ediblər.
Tədbir iştirakçıları dost ölkələr olan Türkmənistan ilə Azərbaycanın ikitərəfli münasibətlərində mədəniyyət, humanitar və idman sahələrində əməkdaşlığı yüksək qiymətləndirib və gələcək inkişaf məsələlərini müzakirə ediblər.
“Ədəbiyyat və incəsənət”
(04.03.2024)
Aktotı Raimkulova: Antalya Forumu dünyadakı mənfi proseslərin diplomatik yolla həllinə töhfəsini verəcək
Antalya Diplomatiya Forumunda dünyanın bir çox ölkəsindən diplomatlar toplaşıb dövrümüzün ən aktual məsələlərini nəzərdən keçirirlər. Bu mühüm platforma şübhəsiz ki, müxtəlif dövlətlər arasında sülh münasibətlərinin qorunmasına və ya yenidən qurulmasına, eləcə də beynəlxalq aləmdə cərəyan edən bütün mənfi proseslərin diplomatik yolla həllinə töhfəsini verəcək.
Bu fikirləri AzərTAC-a açıqlamasında Beynəlxalq Türk Mədəniyyəti və İrsi Fondunun (BTMİF) prezidenti Aktotı Raimkulova bildirib.
Forumun əhəmiyyətinə toxunan A.Raimkulova qeyd edib: “Türk Mədəniyyəti və İrsi Fondu tərəfindən Türk dünyasının mədəniyyəti və irsi ilə bağlı görüşlər keçirilir, həmçinin mədəniyyət və təhsil sahələrində aktual məsələlər müəyyənləşdirilir. Bizim fond öz fəaliyyətində “Türk dünyasının baxışı–2040” və “TÜRKTAYM” kimi proqram sənədlərinə əsaslanır. Bu proqram sənədlərində bütün Türk təşkilatlarının fəaliyyətinin strateji istiqamətləri və prioritetləri əks olunub. Biz də öz növbəmizdə Türk dövlətlərinin mədəniyyətinin təbliği, mədəni irsinin qorunması və dəstəklənməsi çərçivəsində həmin bu sənədlərə uyğun işləyir, həmçinin Türk Dövlətləri Təşkilatına üzv ölkələrin təşkilatları, dövlət idarələri ilə də əməkdaşlıq edirik”.
“Ədəbiyyat və incəsənət”
(04.03.2024)
