Super User
Teatrda “Oskar”ın analoqu sayılan Tony mükafatı “Mulen Ruj”a qismət oldu
İki illik fasilədən sonra Nyu-Yorkun teatr mərkəzi sayılan Brodveydə yenidən "Tony" mükafatının - teatr sahəsinin “Oskar”ı sayılan mükafatın təqdimetmə mərasimi keçirildi. Pandemiya ilə əlaqəli məhdudiyyətlər səbəbindən "Tony" nin 74-cü mərasimi bir neçə dəfə ertələnmiş, teatrsevərləri intizarda saxlamışdı. Baş mükafat "Mulen Ruj” müziklına (Moulin Rouge) təqdim edildi. Bu barədə “Ədəbiyyat və incəsənət” portalı TASS-a istinadən məlumat verir.
Bu dəfə teatr "Oskar"ının təqdimedilmə mərasimi - ilin əsas hadisəsi, çoxları onun virtual keçiriləcəyini zənn etsələr də, əyani şəkildə baş tutdu. Zalda iştirak edənlər qoruyucu maskalarda idilər. Mərasimin aparıcısının sözlərinə görə, hər bir qonaq vaksinasiyadan keçmişdi.
28 nominasiyadan baş mükafatdan savayı ayrı-ayrılıqda "Ən yaxşı tamaşa" və "Ən yaxşı remeyk" mükafatları fərqlənir, daha prestijli hesab olunur. Tamaşanın yenidən tərtibatına görə - Ən yaxşı remeyk mükafatını Amerika ordusunun sıralarında irqi problemlərdən bəhs edən "Soldier' s Play" (Əsgər pyesi) qazandı. Laureatlar təqdimat zamanı polisin ötən ilin mayında saxlamasından sonra həlak olmuş afroamerikalı Corc Floydun adını çəkdilər.
Ən yaxşı tamaşa "The Inheritance” (İrs) oldu.
Brodveydə bütün tamaşaların nümayişi pandemiyaya görə 12 Mart 2020-ci ildə dayandırılmışdı. O zamankı repertuarda 31 tamaşa və müzikl, o cümlədən səkkiz yeni şou var idi. Hələ səkkiz tamaşanın məşqləri gedirdi, onların premyeralarının ötən ilin baharında keçirilməsi nəzərdə tutulurdu. Ta ki builki sentyabrın 14-dək tamaşaçılar intizarda qaldılar, məhz bu tarixdən Brodvey teatrları yenidən tamaşaçıları qəbul etməyə başladılar. Və ayın sonlarına doğru da dərhal Tony mükafatları təqdim edildi.
ICESCO-nun 14-cü Baş Konfransına ev sahibliyini Misir edəcək
Bu ilin dekabrında keçirilməsi nəzərdə tutulan İslam Dünyası Elm, Təhsil və Mədəniyyət Təşkilatının (ICESCO) 14-cü Baş Konfransına ev sahibliyi Misir edəcək.
Bu barədə xəbər telekanalları Misirin Baş naziri Mustafa Mədbuli ilə ICESCO-nun Baş direktoru Salim bin Məhəmməd Əl-Malik arasında Qahirədə keçirilən görüşün nəticəsi olaraq məlumat yayıb.
Məlumata görə, görüşdən sonra ICESCO-nun Baş direktoru Misirin yeni inzibati paytaxtına gedib və burada Baş Konfransın keçiriləcəyi Konqres Mərkəzi ilə tanış olub.
İCESCO rəsmisi Misiri müsəlman dünyasında kifayət qədər nüfuzu olmasına və qədim dünya mədəniyyətinə verdiyi töhvələrə görə dəyərləndirməkdədir.
Qırğızıstanda keçirilən Beynəlxalq Dünya Eposları Festivalında ölkəmiz də təmsil olunub
Qırğızıstanda keçirilən Beynəlxalq Dünya Eposlarının VI festivalı başa çatıb. AzərTAC Qırğızıstanın Mədəniyyət, İnformasiya, İdman və Gənclər Siyasəti Nazirliyinin mətbuat xidmətinə istinadla xəbər verir ki, ölkə müstəqilliyinin 30 illiyi və tanınmış qırğız şairi, akını və dastançısı Toqolok Moldunun anadan olmasının 160 illiyinə həsr edilən festivala dünyanıın 20 ölkəsindən gələn nümayəndələr qatılıb.
Tədbirdə ölkəmizi kulturoloq və yaponşünas alim Əbülfəz Babazadə təmsil edib.
Sentyabrın 25-dək davam edən festivalda müxtəlif xalqların milli oyunları və rəqsləri nümayiş olunub.
Festival çərçivəsində “Dünya xalqlarının epik ənənələri” və “Manas” eposu dünya mədəniyyətində: elm, incəsənət, ədəbiyyat” mövzularında simpoziumlar keçirilib.
Azərbaycan aliminin “Manas” eposu dünya mədəniyyətində: elm, incəsənət, ədəbiyyat” mövzusundakı tədbirdə Türk xalqlarının və yaponların dastan ənənələri, əfsanələri haqqında öz elmi tədqiqatları əsasında hazırladığı “Yapon mədəniyyətində Türk faktoru“ adlı məruzəsi iştirakçılar tərəfindən maraqla qarşılanıb. Ə. Babazadə, eyni zamanda festivalın dünya xalqları mədəniyyətlərinin inteqrasiyası üçün bir platforma olduğunu da diqqətə çatdırıb.
Bu gün “Qaranlığı günahlandırmaqdansa bir şam yandır” söyləyən Konfutsinin günüdür
28 sentyabr. Beynəlxalq Konfutsi günü
Çin tarixi ilə Konfutsinin ad günü səkkizinci Ay ayının 27-ci gününə təsadüf edir, o da bu gündür. Bu müdrik filosofun günündə ən azı onun dillər əzbəri olmuş müdrik kəlamlarını xatırlamaq yerinə düşər. Məsələn, “Heç nə nə gec olur, nə də tez. Hər şey vaxtında olur”. Gözəl deyib, deyilmi? Yaxud, “Zaman pula bənzəyir – lazımsız yerə xərcləməsən hər şeyə çatar”. Birini də deyimmi? “Kamil insan gözəl söz deyə bilən insan deyil, söylədiyini edən və edə bildiyini söyləyən insandır”. Yaxşı, birini də deyim, yekunlaşdırım: ”Uzaq planları olmayan insanı yaxında fəlakətlər gözləyir.” Konfutsinin ən çox yayılan və təqdir edilən fikri isə yəqin ki, bilirsiniz, budur: “Qaranlığı günahlandırmaqdansa bir şam yandır”.
Bizə bəzən məhz bu çatışmır: Qaranlıqda bir şam yandırmaq!
28 sentyabr. Ümumdünya quduzluqla mübarizə günü
İnsanlarda və heyvanlarda rast gəlinən bu xəstəliyin ağır fəsadları olur, təkcə Amerikada hər il bu xəstəlikdən 55 min adam vəfat edir, hər 10 dəqiqəyə bir adam. Bu, böyük göstəricidir. Adətən it qapması nəticəsində bu xəstəliyə tutulan insanın müalicəsi əlbəttə mümkündür, amma bu müalicə çox bahadır, xüsusən inkişaf etməkdə olan ölkələrdə quduzluğun müalicəsi çətin alınır. Bu gün Quduzluqla Mübarizə Alyansı dünya ölkələrinə müraciət edir ki, quduzluğa yoluxanların müalicəsinə diqqət ayırsınlar.
Öz aramızdır, Bakıda gecə saatlarında küçələrə hakim olan küçə itləri sürülərini məgər az görmüşük? Adama hücum edərlər, quduzluğa yoluxdurmaq bir yana, parça-parça eləyərlər. Allah qorusun!
28 sentyabr. “Səfeh sual ver” günü
Bu gün insanlardan bir-birinə səfeh sual vermək tələb olunur, bu, əhval-ruhiyyəni yüksəltməyə, şənlənməyə xidmət edən bir aksiyadır. Səfeh sual kateqoriyasına aid olunan sualları təxmin etmək asandır. Fəlsəfədə belə bir anlam var, səfeh suala səfeh sualla cavab vermək. Maraqlı məntiqdir. Deyilənə görə, bir filosofa “Hansı arılar süd verir” sualı ünvanlananda o, “Bəs hansı inəklər bal verir” sualını cavab olaraq söyləyib. Bəşər tarixində ən səfeh sual isə ABŞ-da bir internet forumunda qeydə alınıb. Bir iştirakçı belə bir sual ünvanlayıb: “Əgər mən özümü yesəm, kilom iki dəfə artar, yoxsa yox olaram?”
Bəzən ən yüksək kürsülərdən ən yüksək çinli insanlar elə suallar səsləndirirlər ki, heç insan qəsdən səfeh sual vermək istəyəndə səfehlik dərəcəsi bu qədər yüksək ola bilmir. Elə bizim parlamentdə bu sayaq sualları eşitməyə, bir növ, adətkərdəyik. Çox dərinə getməyək amma.
28 sentyabr. Bu günə təsadüf edən əlamətdar hadisələr
Aclıqdan azad olunma günü. Daha çox Afrikada aclıqdan əziyyət çəkən insanlara dəstək məqsədini güdür. Beynəlxalq təhlükəsiz abort günü. Ev şəraitində riskli abortlar əleyhinə yönəli bir gündür. Beynəlxalq informasiyaya çatma günü. Məqsəd odur ki, hər bir insanın informasiyanı axtarmaq, tapmaq və yaymaq hüququna malik olması tanınsın. Simxat Tora günü. Yəhudi bayramıdır, Tövratın kütləvi oxunmasının illik siklinin başa çatması və yeni siklin başlamasını özündə ehtiva edir. Lombard günü. 1618-ci ildə Brüsseldə ilk lombardın açılması şərəfinədir. Bricit Bordo günü. 1934-cü ildə dünyanın seks simvolu adlandırılan fransız aktrisanın dünyaya gəlməsi şərəfinədir. Marçello Mastroyani günü. Bu isə dünyaşöhrətli italyan aktyorun 1924-cü ildə doğulması şərəfinədir.
Amerikanın da bu gün öz əlamətdar hadisələri var: Oğullar günü. İctimai torpaqlar günü. Yeyib-içmək də öz yerində: Uşaqlarla nahar eləmək günü. Çiyələk cemli piroq günü. Və ən nəhayət, Pivə içmək günü.
Varisin “21-30 sentyabrın təqvimi” yazısından
“İgidlərin sözü” layihəsindən: Həsən Kür, “Son döyüş”
Xəbər verdiyimiz kimi, “Söz” ədəbi layihəsi və Mədəniyyət Nazirliyinin dəstəyi ilə tezliklə “İgidlərin sözü!!!” adlı antologiya işıq üzü görəcək. Bu gündən etibarən döyüşən əsgərlərimzin şerlərini öz ifalarında dinləyicilərə, “SÖZ” layihəsinin pərəstişkarlarına və geniş oxucu kütləsinə layihə təşkilatçıları YouTube platformasında və digər sosial medialarda təqdim etməyə başlayıb.
“İgidlərin SÖZÜ” kitabında toplanan şerlərin, esselərin içərisində həm də döyüşlər gedən anda yazılanları vardır. Xatırlatmaq istəyirik ki, “İgidlərin SÖZÜ” kitabının ideya müəllifi “SÖZ” ədəbi layihəsinin rəhbəri Nigar Həsənzadə, kitabın redaktoru isə Aida Eyvazlı Göytürkdür.
“İgidlərin sözü” kitabında aprel şəhidləri Nazim Şamaxılı, Mikayıl Vahabzadə, Mirsalam Cəfərov, II Qarabağ şəhidləri polkovnik-leytenant Elzamin Təhməzov, mayor Mehman Süleymanov, şəhid əsgərlər Şahgündüz Cabbarov, Murad Mayıl oğlu Nəbiyev, Vətən müharibəsi iştirakçıları Vüsal Hətəmov, Kərəm Aydın, Emin Piri, Sərxan Yolçuyev, Həsən Kür, Orxan Səlifov, Cavid Əli oğlu , Tofiq Əhməd, Eyvaz Əyyub, Araz Əfəndi, Səbuhi Qurbanov, Elvin İntiqamoğlu, Oğuz Alparslan, Nicat Ağayevin yaradıcılıqları yer alıb.
“Ədəbiyyat və incəsənət” portalı sizə layihəyə qatılmış gənc şair Həsən Kürün “Son döyüş” şeirini təqdim edir:
Son döyüş
(Şeirdə adları çəkilən Raqil və Sübhan eyni gün döyüşə qatılan, eyni gün şəhid olan Salyan rayon, Dayıkənd kəndinin şəhidləridir.)
-Raqil eşidirsən? Mənə cavab ver!
-Sübhan, mən deyəsən yaralanmışam.
Tərpədə bilmirəm heç bir yerimi,
Elə bil ölmüşəm, cansız bir daşam.
-Yox , sən ölməyəcək, yaşayacaqsan,
İndi harda olsa gələr uşaqlar.
Qardaş ürəyini buz kimi saxla,
Onlar gəlib bizi aparacaqlar.
-Sübhan, sən necəsən? Yaran dərindi?
-Bilmirəm, amma bərk ağrıyır başım.
-Özünü qorxutma, bir az möhkəm ol,
Sən sağ qalacaqsan, əziz qardaşım.
-Komandir! Komandir! Yoldaş leytenant!
-Dayan Sübhan, dayan, yorma özünü.
Deyəsən komandir şəhid olubdur,
Həyata əbədi yumub gözünü.
-Yazıq... yetim qoydu uşaqlarını
Canın qurban verdi Ana Vətənə.
Dünən gecə yarı bir az dərdləşdik,
Qızının şəklini göstərdi mənə.
-Danışma qardaşım, taqətdən düşmə,
Mənim indi səndən bir istəyim var.
Götür bu məktubu, mən şəhid olsam,
Verərsən anama, açıb qoxlayar.
Bilsin ki içimdən nə hisslər keçib,
Bilsin ki Vətəni necə sevirdim.
Təsəlli tapsın ki, mən şəhid oldum,
Sevinə-sevinə məzara girdim.
-Yox, ölməyəcəksən, belə danışma!
Anan qalmayacaq gözləri ağlar.
Bütün qohumların, bütün dostların,
Gələn il toyuna yığılacaqlar.
Birlikdə gəlmişik cəbhəyə, Raqil,
Kəndə də, birlikdə qayıdaydıq kaş.
Əgər yolumuzu ölüm kəsdisə,
Sən ölmə, yerinə mən ölüm, qardaş.
-Ay Sübhan, bədənim oldu buz kimi,
Gözüm heç bir yeri görmür elə bil...
-Dayan... bir az dayan, ölmə qardaşım,
Raqil... ölmə Raqil... cavab ver Raqil...
Müharibə iştirakçıları və şəhidlərin şeirləri yer alan “İgidlərin sözü” layihəsinə start verildi
Vətəni şəhidlər, qazi, döyüşçü qanı müqəddəs edir. Azərbaycan Ordusunun müzəffər oğulları həm döyüşməyi, həm də söz deməyi bacarırlar. 30 ildir ki, canlarını “uf” demədən Vətənə qurban edən həmin oğulların adları Vətən tarixinə qanları ilə yazılıb. Onların arasında sözü ilə də tarixləşən, yaddaşlarda qalan şəhidlərimiz, qazilərimiz, Vətən müharibəsi iştirakçılarımız vardır.
“Söz” ədəbi layihəsi və Mədəniyyət Nazirliyinin dəstəyi ilə tezliklə “İgidlərin sözü!!!” adlı antologiya işıq üzü görəcək. Bu gündən etibarən layihə çərçivəsində döyüşən əsgərlərimzin şerlərini öz ifalarında dinləyicilərə, “SÖZ” layihəsinin pərəstişkarlarına və geniş oxucu kütləsinə layihə təşkilatçıları YouTube platformasında və digər sosial medialarda təqdim etməyə başlayıb. Sözlü-söhbətli igidlərimiz həm də 6 oktyabrda Bakıda keçirilən Beynəlxalq Kitab sərgisində çıxış edəcəklər.
“İgidlərin SÖZÜ” kitabında toplanan şerlərin, esselərin içərisində həm də döyüşlər gedən anda yazılanları vardır. Bizim şəhidlərimiz və igidlərimiz həm süngüləri ilə döyüşüb, həm də qələmləri ilə tarix yazıblar! Bu şerlər çox gözəldir! Bu şerlərdən güllə səsi, torpaq ətri, barıt qoxusu, qan qoxusu, Vətən qoxusu gəlir!
Xatırlamaq istəyirik ki, “İgidlərin SÖZÜ” kitabının ideya müəllifi “SÖZ” ədəbi layihəsinin rəhbəri Nigar xanım Həsənzadə, kitabın redaktoru isə Aida Eyvazlı Göytürkdür.
“İgidlərin sözü” kitabında aprel şəhidləri Nazim Şamaxılı, Mikayıl Vahabzadə, Mirsalam Cəfərov, II Qarabağ şəhidləri polkovnik-leytenant Elzamin Təhməzov, mayor Mehman Süleymanov, şəhid əsgərlər Şahgündüz Cabbarov, Murad Mayıl oğlu Nəbiyev, Vətən müharibəsi iştirakçıları Vüsal Hətəmov, Kərəm Aydın, Emin Piri, Sərxan Yolçuyev, Həsən Kür, Orxan Səlifov, Cavid Əli oğlu , Tofiq Əhməd, Eyvaz Əyyub, Araz Əfəndi, Səbuhi Qurbanov, Elvin İntiqamoğlu, Oğuz Alparslan, Nicat Ağayevin yaradıcılıqları yer alıb.
Rembrandt.
“Ulduzlu gecə”
Tiflis Dövlət Peşəkar Azərbaycan Dram Teatrında növbəti premyera olub
Heydər Əliyev adına Tiflis Dövlət Peşəkar Azərbaycan Dram Teatrının yaradıcı kollektivi tanınmış türk yazıçısı Əziz Nesinin “Öldür məni, əzizim” əsərini səhnələşdirib.
AzərTAC-ın xüsusi müxbiri Tbilisidən xəbər verir ki, sentyabrın 26-da Tbilisidə, Kote Marcanişvili adına Dövlət Dram Teatrının səhnəsində tamaşanın premyerası olub.
Tamaşanın quruluşçu rejissoru və musiqi tərtibatçısı Giorgi Apxazavadır.
Tamaşada rolları aktrisalar Aida Tağıyeva, Leyla Qasımova və aktyor Telman İsfahanlı ifa ediblər.
Mərhum Dərviş Osman Əhmədoğlunun yeni şeirlər kitabının təqdimatı keçirilib
“Azərkitab - kitab mərkəzində” "Mirvarid Dilbazi poeziya məclisi" İctimai Birliyinin təşkilatçılığı ilə Gürcüstan Aşıqlar Birliyinin mərhum sədri, şair-publisist Dərviş Osman Əhmədoğlunun “Mən Borçalıda qaldım” adlı şeirlər kitabının təqdimatı keçirilib. Bu, onun sayca səkkizinci kitabıdır.
Kitab mərkəzinin mətbuat katibi Aysel Kərimin verdiyi məlumata görə, tədbirdə çıxış edən “Mirvarid Dilbazi poeziya məclisi” İB-nin sədri Güllü Eldar Tomarlı kitab barədə açıqlama verib, bildirib ki, kitaba şairin indiyə qədər işıq üzü görməyən şeirləri, saz-söz adamlarının ona həsr etdikləri ithaflar və ürək sözləri yer alıb.
Türkiyənin Azərbaycandakı səfirinin birinci müavini Barış Sayğın, “Dədə Ələsgər ocağı” İctimai Birliyinin sədr müavini Vüsal Əmirov, “Aşıq Pəri məclisi”nin sədri Pərvanə Zəngəzurlu və digərləri çıxış edərək mərhum şairin şeirlərindən söyləyiblər, ürək sözlərini bildiriblər.
Sonra iştirakçılara kitablar hədiyyə olunub.
Kitabın redaktoru Güllü Eldar Tomarlı, “Ön söz” müəllifi isə Azərbaycan Aşıqlar Birliyinin sədri, Əməkdar elm xadimi, professor Məhərrəm Qasımlıdır.
“Hərəmiz bir eşqə qurban getmişik” – yazıçı Əyyub Qiyasın şeirləri
İstedadlı yazıçı Əyyub Qiyası biz romanları ilə tanıyırıq. Xüsusən onun “Qara işıq”, "Sonuncu büt" və "Köpək bürcü" kimi romanları, “İtvuran” hekayəsi böyük oxucu kütləsinin rəqbətini qazanıb. Amma ara-sıra o, sosial şəbəkədə Qi Or El təxəllüsü ilə yazdığı şeirlərini də paylaşır. Bu gün Əyyub Qiyas öz yeni şeirlərindən bir neçəsini “Ədəbiyyat və incəsənət” portalının oxucularına təqdim edir. Buyurun, lirik ovqata köklənin.
XATİRƏ DƏFTƏRİ
Mənim ürəyimin ucqar yerində
Sənə oxşatdığım bir qadın qalıb.
Köhnə kağızların içində itən
Ünvanın, xatirən və... adın qalıb...
Zaman qərinəni adlayıb keçib,
O vaxtdan indiyə adlar dəyişib.
Adamlar dəyişib o vaxtdan bəri,
Doğmalar dəyişib, yadlar dəyişib.
Hərəmiz bir eşqə qurban getmişik,
Susub barışmışıq bu dünya ilə.
Çoxu bu savaşdan məğlub ayrılıb,
Bizim savaşımız bitməyib hələ.
Gözümüz yol çəkir gör neçə vaxtdır,
Səsimiz illərin içində itib.
Çoxunun başını ayrılıq qatıb,
Hərə bir küçədə, bir tində itib.
Gündüz yuvasından perik quşlara
Baxıb evimizə dönmüşük gecə.
Hərdən araq içib sərxoş olmuşuq...
Hərdən ayılmışıq araq içincə...
Nə qədər sirr qalıb ürəyimizdə,
Qatıb başımızı bu oğul-uşaq.
Elə bilmişik ki o güzgülərdən
Nə vaxtsa bir cavan adam baxacaq...
Bəzən üzümzdə donub təbəssüm,
Bəzən sıxılmışıq deyib-güləndə.
Ürək ev deyil ki qapısı ola,
Açasan ən əziz qonaq gələndə.
Hər ürək gör neçə eşqə məzardı,
Vaxt olub özgəyə “balam” demişik.
Ağzımız gerçəklə dolub, hər dəfə
Vurub ağzımızdan yalan demişik.
Yalandır dən düşüb saça, yalandır...
Biz ağlı kəsməyən uşağıq hələ.
Quzeyə yığılan qar topasıyıq
Günəşin gözündən uzağıq hələ.
Bilirəm, evinin gizli yerində
“Xatirə dəftəri” qalıb toz çəkir.
Məni unutmağa nə var ki, qadın,
Oxu yazdığımı... sözü söz çəkir.
Salam, unutduğum, sevdiyim qadın...
Dur aç o dəftəri, orda adım var...
Bəlkə o günlərə bir də qayıtdıq...
Dünyanın işini nə bilmək olar...
SƏN Kİ, YUXULARIMIN...
Sən ki yuxularımın ən əziz qonağısan,
Mən səni gerçəklərin qucağında tapmışam.
Niyə çox gecikmisən, kaş ki heç gəlməyəydin...
Niyə səni ömrümün bu çağında tapmışam?!
Ay zalımın balası, bu qədər zalım olma,
Eşq kiminə sevincdir, kiminə də dərd, kədər.
Kim deyir ki, Leylilik, Məcnunluq vaxtı keçib?!
Eşq var elə indi də adamı başdan edər.
Hə, mənim "küçələrə su səpən..." vaxtım deyil,
Eyvanların altında dolaşmağımdan keçib.
Evinizin titində məni pusquya salan
Məhlə uşaqlarıyla dalaşmağımdan keçib.
Əslində çox şey keçib - zaman... qatar... ömür... sən...
Keçməyən ürəyimin içindəki bir addı.
Bax, sənin gözlərində yaş kimi sallanmışam,
Ordan ölümə qədər – cəmi ikicə addım...
Sən ki, yuxularımın ən əziz qonağıydın...
Məni həsrət qoymusan bu gözəl qonaqlığa.
Özün yaxşı bilirsən, yeyib-içən oğlanam,
Gəlsən şərab içərik yenə “həmən” sağlığa!
Amma açığın deyim, özümdə də günah var,
Yuxum ərşə çəkilib, yəqin xəbər tutmusan.
Bəlkə gəlib-gedirsən... yatağımda olmuram,
Mənsə elə bilirəm, sən məni unutmusan...
Nəsə... yatmaq vaxtıdır, səhərə lap az qalır,
Gedim atım kəlləmi. Bəlkə gəldin – kim bilir?!
Sən ki yuxularımın ən əziz qonağısan...
Mənim yuxularımda sevdiklərim dirilir...
ŞƏKİLDƏKİ QADIN
Sabahların birində oyanırsan yataqda,
Elə bilirsən hələ yuxu görürsən, yuxu.
Gözlərini döyürsən:
– Nə ətirdir otaqda?!
Otağın havasını dəyişmişdim mən axı...
Yatağında dikəlib, baxırsan divarlara....
Çərçivədən bir şəkil sənə baxıb qımışır.
Birdən qəribsəyirsən:
– Mən hara, bura hara?
O kimdir, yan otaqda, öz-özünə danışır?!
O kimdir pıçıldaşır?
Axı kim var bu evdə?
O nə səsdir, bir baxım...
Cumursan yan otağa.
Görürsən bir qadın var, büzüşüb bir tərəfdə,
Qorxursan yaxınlaşıb, saçına toxunmağa...
Üzünü görmək üçün bilmirsən nə edəsən.
Danışmaq istəyirsən,
səsin batır eləcə...
– Ətri də tanış gəlir mənə axı deyəsən.
Bu qadın buralara necə gəlib, bəs necə?
– Bəs onun gəlişindən niyə yoxdur xəbərim?
Kim onu qarşılayıb?
Bəs kim açıb qapını?
Oyatmaq istəyirsən köhnə xatirələri,
Birdən xatırlayırsan şəkildəki qadını.
– Bu ki odur, o qadın...
Tanış saçlar, xoş qoxu...
Bəlkə yuxu görürəm?!
Çimdikləyin bir məni .
Evdəkilər hardadır?
Hara gediblər axı?!
Kim asıb divarımdan o qadının şəklini?
Bir az cəsarət tapıb ona doğru gedirsən,
İrəli uzadırsan titrək barmaqlarını.
Qəribədir, sən onu şəkil tək hiss edirsən...
Qəlbinin döyüntüsü yarır qulaqlarını.
Üzünə toxunursan, gözlərinə baxırsan...
Onun hərarətindən barmaqların alışır.
– Hey... səni tanıyıram, şəkildəki qadınsan.
Bax, evimdə nə varsa ancaq səndən danışır...
Axı hara getmişdin, gözlərim yol çəkirdi?!
Nə yaman uzun oldu bu sonuncu gedişin?!
Səni hansı küləklər yenə bura gətirdi?!
Daha başından çıxart bu qəribə vərdişi...
Üzünə gülümsəyir, evinə nur çilənir,
Sənə baxıb astaca pıçıldayır nə isə.
– Nə dedin, eşitmədim, səsin qırıldı yenə...
Bir az ucadan danış... Bax da... əgər mümkünsə...
Bu dəfə onun səsi qucaqlayır ruhunu .
– Susma, danış, nə olar!
Davam elə, sən danış...
Dünyanın işinə bax, nə qəribə adamam,
Taleyimdə bir səsə tamarzı qalmaq varmış.
Kimsə toxunur sənə, çiyninə bir əl dəyir.
Gözlərini açırsan:
– Bu nə şirin yuxudur...
Çiyninə toxunan əl: “Səhər açılıb”, – deyir.
Bu tanış səs bəs nədən səni belə qorxudur?!
Tez durursan yataqdan, gözlərini döyürsən.
Ağzında hiss edirsən o yuxunun dadını.
Ürkək-ürkək yenə də o səsə boylanırsan;
O anda tanıyırsan şəkildəki qadını...
BİR GÜN QAPINI AÇIB...
Bir gün qapını açıb
Yerimi boş görərsən.
Tez baxarsan güzgüyə,
Gözündə yaş görərsən.
Görərsən pəncərəmdən
Sənə baxır kitablar.
Elə bilərsən yenə
Otağımda kimsə var.
Masamı toz basacaq,
Silməyə əlin gəlməz.
Bəsdir zəhəri çəkdin
Deməyə dilin gəlməz.
Otağımda bir sükut,
Başlayacaq o gündən.
Axtaracaqsan məni
O sükutun içində.
Üstünə yeriyəcək
Divardakı şəkillər.
Baxıb köks ötürərsən:
"Harda qaldı o illər?"
Yazdığın son işmarış
Yenilənər əlində:
"İki çörək, bir sabun,
Bir də ət al gələndə."
O gündən xatirələr
Həmdəm olar səninlə.
Yoxluğumla barışıb
Yaşayacaqsan belə.
Hər şeyi belə qoyub
Çəkiləcəm gözündən.
Qayğıların bitəcək...
Muğayat ol özündən.
ARZULAR TÜKƏNİR...
Arzular tükənir, bitir,
Yerində ümid doğulur.
Çəkdiyimiz ahla birgə
Göylərdə bulud doğulur.
Səsimiz səsə qovuşur,
Toyumuz yasa qovuşur,
Ruhumuz bizə qovuşur,
Beşikdən tabut doğulur.
Yanır – sonunda şam ölür,
Gecə düşür – axşam ölür,
Hardasa bir adam ölür,
Hardasa bir it doğulur.
MƏNİ SEVMƏK YASAQDIR
Mən sevgi göylərində
Mən ürəkdə son arzu,
İlkin umud kimiyəm...
Məni sevmək yasaqdır.
Dərdlə, qəmlə qalmışam
Ömrün ötən köçündə.
Mən yaşaya bilmədim
Bu dünyanın içində.
Dünən də belə idim,
Mən beləyəm bu gün də.
Məni sevmək yasaqdır.
Məni sevmək boş xəyal,
Məni sevmək ümidsiz.
Birdən xəbərim olmaz,
Çaşıb məni sevərsiz –
Məni sevmək yasaqdır.
Göydən yerə boylanan
Mələklərdən qaçıram,
Eşq yolunda saralan
Çiçəklərdən qaçıram.
Mənlə oyun oynayan
Fələklərdən qaçıram...
Məni sevmək yasaqdır.
Ruhumda gəzdirmişəm
Sevgi adlı əzabı.
Sevib unutmaq imiş
Taleyimin savabı.
Sevə bilənlər üçün
Məni sevmək cəzadır,
Məni sevmək yasaqdır.
Dünyanın göylərində
Ayaq izlərim yetim.
Sevgi ömür kimidir
Sonunda ölüm-itim.
Niyə qulaq asmadın,
Axı mən sənə dedim –
“Məni sevmək yasaqdır”.
Hər əvvəlin bir sonu –
Yəqin ki, sonum çatıb.
Ağlım kəsəndən bəri
Bu eşq məni aldadıb.
Gör neçə illərdi ki,
Girib içimdə yatır,
Məni sevmək yasaqdır.
Eşqimin son mənzili
Birotaqlıq olacaq.
O mənzilin hər yeri
Zil qaranlıq olacaq.
Məni sevməyin sonu
Ya edamlıq olacaq,
Ya da – özün bilərsən...
Məni sevmək yasaqdır.
