Super User
Mehmet Akif Ersoyn büstü hazırlanıb
Heykəltəraş Elxan Zeynalov böyük Türk filosof şairi Mehmet Akif Ersoyun büstünü hazırlayıb.
“Ədəbiyyat və incəsənət” portalı xəbər verir ki, Elxan Zeynalov ilk dəfə Mehmet Akif Ersoyla orta məktəbdə oxuyan zaman ədəbiyyat dərsliyində "İstiqlal Marşı" əsəri vasitəsi ilə tanış olub.
“Əlbəttə, hələ uşaq idim, amma o böyük əsəri müəlliməmiz elə gözəl izah etdi ki, hər birimiz Türk olduğumuzla qürur duyduq! Sözü fəth etmiş böyük Şairimizin qələmə aldığı əsərin hər misrası böyük məna kəsb edir! Nə qədər illər keçsə də daim qəlbimizdə yaşayacaq şəxsiyyətlərimizi hər zaman gələcəyə təbliğ etməliyik! Yaşasın böyük Türk xalqı!”-deyir Elxan Zeynalov.
Əminik ki, bu incəsənət əsəri müəyyən dairələrdə maraq doğuracaq və gənc heykəltəraşın əməyinə lazımınca qiymət veriləcək.
Dünyada bütün siyasi ambisiyalar bir körpənin göz yaşlarına dəyməz
Bu foto işğalçı Rusiya rejiminə əsl ittihamdır
Müharibənin 2-ci ayına keçən gün ilk 134 ukraynalı qaçqın Moldovadan uçaqla Frankfurta gəliblər. Bu, Almaniyanın qəbul etməyə razılaşdığı 2500 qaçqının ilk dəstəsidir.
“Ədəbiyyat və incəsənət” portalı Euronews-a istinadən məlumat verir ki, təkcə Moldovaya 379 min ukraynalı qadın, uşaq və qoca qaçmağa məcbur olub. Polşaya gələnlərin sayı isə artıq 2 milyonu haqlayıb. Medıka sərhəd məntəqəsində BMT-nin qaçqınlar agentliyi və yerli volontyorlar qaçqınları qəbul etmək üçün çiyin-çiyinə gecə-gündüz çalışırlar.
Reuters-in yayınladığı bu fotoda Medıkada ağlayan körpəsini sakitləşdirmək istəyən ukraynalı qaçqın ananı görürsünüz. Milyonlarla insanı evindən didərgin salan, doğum evlərini, uşaq bağçalarını, mədəniyyət ocaqlarını, yaşayış evlərini bombalayan Putin rejiminin tarixin ən qəddar cinayətkarları sırasında yer alacağı şübhə doğurmur!
Bakı Kitab Mərkəzində çox dəyərli bir kitab təqdim olunacaq
Martın 31-də, saat 14-də ölkənin ən elitar kitab məkanı olan Bakı Kitab Mərkəzində Adəm İsmayıl Bakuvinin “Məhşər Divanı: Yalanın 17 anı” kitabının təqdimat mərasimi keçiriləcək.
“Ədəbiyyat və incəsənət” portalı xəbər verir ki, olduqca maraqlı süjet xətti olan - xəyali bir dünyada 17 erməniyə məhşər divanı qurulmasından bəhs edən sənədli romanda eramızdan əvvəldən ta ki bu günədək bütün erməni cinayətlərinə güzgü tutulur. Kitabın məhz martın 31-də - azərbaycanlıların soyqırımı günündə istimaiyyətə təqdim olunması lap yerinə düşür. Belə ki, 1918-ci ilin mart qırğınları barədə kitabda müfəssəl məlumat var.
Yazıçı romanının təqdimat dəvətnaməsində yazır: “Azərbaycan xalqının ədalət axtarışına töhfə vermək və faktların üzə çıxarılması üçün öz üzərimə düşən vəzifəni icra etmək fikri ilə qələmə aldım.”
Bəli, vətənpərvər yazıçı öz üzərinə düşən vəzifəni şərəflə icra edib. “Məhşər Divanı: Yalanın 17 anı” zamanında üzə çıxan, düşməni faktlarla və sübutlarla yerində oturdacaq çox qiymətli kitabdır. Bu kitabın əcnəbi dillərə çevrilərək xaricdə yayılması, düşünürük ki, faydalı olar. Çünki, ədəbiyyat çox güclü silahdır.
Tanınmış azərbaycanlı alim Almaniyada vəfat edib
Almaniya Azərbaycanlıları Alyansının İdarə Heyətinin üzvü, Azərbaycan diasporunun tanınmış simalarından biri, Azərbaycan elmini Almaniyada və Avropada yüksək səviyyədə təmsil edən Rostok Universitetinin dosenti, şöbə müdiri Cavid Səfərov vəfat edib.
“Ədəbiyyat və incəsənət” portalı xəbər verir ki, Cavid Səfərov 1965-ci il dekabrın 10-da Qazax rayonunun Ürkməzli kəndində anadan olmuşdu, Azərbaycan Texniki Universitetində, “Panorama” və “168 saat” qəzetlərində çalışmışdı, gözəl alim, ləyaqətli insan kimi yaddaşlara yazılmışdı. Ötən illərdə Bakıya gəlib burada qızının toyunu da etmişdi.
Ölüm qaşla göz arasındadır, çox qəfil ölüm oldu.
Allah rəhmət eləsin!
Moldovanın Baş naziri Nizami Gəncəvi Beynəlxalq Mərkəzinin İdarə Heyətinin üzvləri ilə görüşüb
Moldova Respublikasının Baş naziri Natalia Qavrilita Nizami Gəncəvi Beynəlxalq Mərkəzinin İdarə Heyəti üzvlərini qəbul edib.
AzərTAC xəbər ki, görüşdə Mərkəzin üzvləri - Bosniya və Herseqovinanın sabiq Baş naziri Zlatko Laqumdziya, Gürcüstanın sabiq Baş nazir müavini Eka Tkeşelaşvili, Rumıniyanın sabiq Baş naziri Petre Roman və Mərkəzin Baş katibi Rövşən Muradov iştirak edib.
Daha sonra nümayəndə heyətinin üzvləri Moldovanın Baş nazirinə VIII Qlobal Bakı Forumu barədə məlumat veriblər. Forumun mühüm əhəmiyyət daşıdığı, qlobal problemlərin müzakirə edildiyi nüfuzlu siyasi, elmi platformaya çevrildiyi vurğulanıb və IX Qlobal Bakı Forumuna hazırlıqla bağlı müəyyən məsələlər – dəvət olunan qonaqlar, mövzular, həmçinin yeni layihələr, əməkdaşlıq imkanlarının genişləndirilməsi və bu istiqamətdə atılacaq konkret addımlar müzakirə edilib.
Baş nazir Natalia Qavrilita 2022-ci ildə keçiriləcək IX Qlobal Bakı Forumuna dəvət olunub.
Görüşdə Ukrayna müharibəsinin nəticəsi olaraq yaranmış qaçqın böhranı və bunun yaratdığı sosial-iqtisadi böhran, Azərbaycanın Avropanın enerji təhlükəsizliyində oynadığı önəmli rol müzakirə olunub.
Baş nazir Natalia Qavrilitaya Mərkəzin həmsədri xanım Vayra Vike-Freyberqanın müəllifi olduğu Nizami Gəncəvinin “Yeddi gözəl”i və ədəbiyyatdan digər esselər kitabı və “Xəmsə”dən seçilmiş miniatürlər kitabı təqdim olunub.
Qeyd edək ki, Nizami Gəncəvi Beynəlxalq Mərkəzinin İdarə Heyəti üzvlərinin Kişineuya səfəri çərçivəsində Moldova Respublikasının xarici işlər naziri Nikub Popesku və əmək və sosial müdafiə naziri Marsel Spatari ilə də görüşləri keçirilib.
Rəsm qalereyası: Kevin Lee, “Görməzdən gələn yoxsulluq”
Rəsm qalereyası: Kevin Lee, “Görməzdən gələn yoxsulluq”
Günün fotosu: Səudiyyə Ərəbistanında neft anbarına raket zərbəsi endirilib
Günün fotosu: Səudiyyə Ərəbistanında neft anbarına raket zərbəsi endirilib
Səudiyyə Ərəbistanının Ciddə şəhərində yerləşən neft anbarına raket zərbəsi endirilib. Raket hücumu Husi qruplaşması tərəfindən həyata keçirilib.
Yanğın Ciddədə keçirilən Formula 1 üzrə Səudiyyə Ərəbistanı Qran-Prisinin təşkil olunduğu trasın yaxınlığında olduğuna görə yarışın vaxtı dəyişdirilib.
Foto: BBC
Əhməd Cavadın yurdu barədə kitab
Ötən gün “Azərkitab” kitab təbliğatı mərkəzində dəyərli ziyalıların iştirakı ilə Əhməd Cavadın doğma yurdu, Şəmkir rayonu, Seyfəli kəndinin dünəni, bu günü, tarixi, dəyərli ziyalıları haqqında zəngin ensiklopedik məlumatlara əsaslanan, gözəl tərtibatlı “Seyfəli və Seyfəlililər” kitabının təqdimat mərasimi keçirilib.
“Ədəbiyyat və incəsənət” portalı xəbər verir ki, kitabın ideya müəllifi tanınmış alim, ziyalı, Seyfəli kəndinin dəyərli oğlu mərhum Elmidar Zeynalovdur.
Kitabın redaktoru BDU-nun Maddə quruluşu kafedrasının müdiri, Rusiya Pyotr Elm və İncəsənət Akademiyasının akademiki, Nyu-York Elmlər Akademiyasının həqiqi üzvü. professor Eldar Əli oğlu Məsimovdur.
Kitab müxtəlif dövrlərdə şəhid olmuş Seyfəlilərin əziz xatirəsinə həsr olunub.
Rusiya Liberal Demokratik Partiyasının sədri Jirinovskinin öldüyünü rəsmi Rusiya təsdiqləmir
Dünən Rusiya Liberal Demokratik Partiyasının sədri və Dövlət Dumasının deputatı Vladimir Jirinovskinin ölməsi xəbəri yayılmışdı.
“Ədəbiyyat və incəsənət” portalı
bu xəbəri Rusiya mənbələrinə, o cümlədən RİA Novosti agentliyinə istinad edən BBC-yə güvənib yaymışdı.
Xəbərdə deyilirdi ki, koronavirus diaqnozu ilə Jirinovski bir neçə gün öncə ağır vəziyyətdə Moskvanın Mərkəzi Klinik Xəstəxanasına yerləşdirilmişdi. Həkimlər xəstəxanaya qəbul edilən gündən onun vəziyyətini çox ağır olaraq qiymətləndirirdi. 76 yaşlı siyasətçinin vəziyyəti daha da ağırlaşıb və həkimlərin səyinə baxmayaraq onu koma
vəziyyətindən xilas etmək mümkün olmayıb.
Gecə saatlarında isə Euronews Rusiya Səhiyyə Nazirliyinin məlumatını yaydı. Məlumatda deyilir ki, Jirinovskinin ölməsi xəbəri
həqiqətə uyğun deyil, o, xəstəxanadadır, vəziyyəti ağır, stabildir.
Euronews Jirinovskinin ölüm xəbərinin ilkin olaraq senator Aleksandr Pronyuşkin tərəfindən sosial mediada yayıldığını, sonra isə silindiyini də qeyd edib, eyni zamanda Rusiya
prezidentinin mətbuat katibi Dmitriy Peskovun fikirlərinə də yer ayırıb: “Jirinovskiy sağdır, amma çox ağır vəziyyətdə, həkim nəzarəti altındadır”.
Yaqub Öməroğlu: “ O çox kitab oxuyan insanlar bizi xilas edəcəklər”
“Ədəbiyyat və incəsənət” portalının “Ulduz” jurnalı ilə birgə layihəsi olan “Şənbə qonağı”ında İntiqam Yaşar bu dəfə sizi tanınmış Türkiyə yazarı, Avrasiya Yazarlar Birliyinin başqanı Yaqub Öməroğlu ilə görüşdürür.
-Salam, Yaqub bəy, hər vaxtınız xeyir. Artıq 3-cü ayını tamamlamaq üzrə olduğumuz 2022-ci il Yaqub Öməroğlu üçün necə keçir?
-Salam, İntiqam bəy. 2022-ci il mədəniyyətyönümlü fəaliyyətlərlə, çox sıx qrafiklə başladı. Uluslararası yaşanan hadisələrdən dolayı həm dünyamız, həm də Türk dünyası adına böyük çaşqınlıqlar, əndişələr də yaşadıq. Arzu edirik ki, 2022-ci ilin başlanğıcında baş verən bu ağır hadisələr yerini gözəlliklərə buraxsın.
-Rəhbərlik etdiyiniz Avrasiya Yazarlar Birliyinin Azərbaycan-Türkiyə ədəbi əlaqələrində önəmli yeri var. Qardaş ölkələr arasında təşkilatınızın ədəbiyyat sahəsində nə kimi planları var?
-Avrasiya Yazarlar Birliyi göstərdiyi fəaliyyətləri mütəmadi, davamlı hala gətirməyə çalışan, bunu müəyyən bir miqyasda da bacaran bir təşkilatdır. Biz fəaliyyətə başladığımızda görəcəyimiz işin davamlılığını öncədən hesablamağa çalışırıq. Bu fəaliyyətlərin ən mühümlərindən biri “Qardaş qələmlər” dərgisinin fəaliyyətidir. Ədəbiyyat dərgiləri, adətən, öz oxucuları, yazarları ilə bir mühit yaradır. Ümumi mühitdə öz atmosferini ərsəyə gətirir. “Qardaş qələmlər” dərgisi də bu atfosmeri yarada bilmiş dərgilərdən biridir. Bu il dərgimizin 16-ci illiyidir. Təbii ki, bu illər ərzində dərgiçilikdə də yeni proseslər, yeni yanaşmalar yaranıb. Biz də dərgimizin fəaliyyətində bu yenilkləri öndə tuturuq, dərgimizi gəncləşdirərək davam edirik. Bundan başqa Türk dünyasına yayınladığımız kitab yayınımız 400 kitaba yaxınlaşdı. Bunlar ədəbi əsərlərdir. Bu, tarixdə görünmüş iş deyil ki, bir nəşriyyat yalnız Türk xalqlarından əsərlər çap etsin və bu əsərlərin sayı 400-ə çatmış olsun. Biz, sadəcə, kitabları çap edən və öz ətrafına paylayan nəşriyyatlardan olmaq istəmədik. “Bengü” yayın evi mövcud şərtlərə uyğun olaraq, digər nəşriyyatlar necə çalışırsa o cür çalışan bir qurumdur. Hətta “Bengü” nəşriyyatının Avrasiya Yazarlar Biriyinin nəşriyyatı olduğunu bilməyən çox insan var. Nəşriyyatın adını tanıyırlar, amma onun bu təşkilata aid olduğunu bilmirlər. Çünki, onu biz də belə istədik. Bu fəaliyyətlərimizi də zamanın tələblərinə uyğun şəkildə davam etdirmək arzusundayıq. Bunu da vurğulayım ki, Sovetlər birliyinin dağılmasından 30 il zaman keçsə də, “Bengü” yayınları bəzi türk xalqlarının ədəbiyyatından ilk dəfə əsər çap edən nəşriyyatdır. Məsələn, Saxa-Yakutyada yaşayan qardaşlarımızın əsərlərindən ilk dəfə bir romanı biz çap edirik Türkiyədə. Tuva, Altay, Noqay ədəbiyyatlarından ilk dəfə bu il çap olunur əsərlər. Kitab fuarına yetişdirmək üçün bu kitabları çap edib çatdırmağa çalışırıq. Bu il Baharın sonlarında bütün Türk xalqlarından Türkiyədə roman, hekayə kitabları çap olunmuş olacaq. Təşkil etdiyimiz “Mahmud Kaşğari hekayə yarışması”nı yenə davam etdirmək istəyirik. Yeni yazarların yetişməsi üçün yazar kurslarımız var. Bu kurslar Türkiyənin sərhədlərindən kənara çıxıb artıq. Dörd ildir ki, Balkanlarda, Avropa türklərinin arasında bu kurslar fəaliyyət göstərməkdədir. İki ildir ki, Güney Azərbaycandan, Krımdan, Azərbaycan Respublikasından da qatılanlar var. Bu il İraqda Türkmən elindəki qardaşlarımıza da yazarlıq təhsili vermək planımız var. Bundan başqa yazarların, tarixi şəxsiyyətlərin anma günləri ilə bağlı fəaliyyətlərimizi də davam etdirəcəyik.
-Yaqub bəy, Türkiyə və Azərbaycan arasında olan ədəbi əlaqələrimizi necə qiymətləndirirsiniz, sizcə, qənaətbəxşdirmi?
-Keçmişlə müqayisədə çox yaxşı durumdayıq. Öncəki zamanlarda çox az idi ədəbi əlaqələr. Çox az Azərbaycan müəllifinin əsərləri Türkiyədə nəşr olunmuşdu. Eləcə də Türkiyə müəllifləri Azərbaycanda çox az sayda çap olunmuşdu. Təbii ki, bunu da ifadə edim ki, Azərbaycan da bizimdir, Türkiyə də bizimdir. Azərbaycan ədəbiyyatından Türkiyədə çap olunan kitab sayı Türkiyədən Azəbaycanda çap olunanlardan bir neçə dəfə çoxdur. Bu məqamda onu da vurğulamaq lazımdır ki, Türkiyədə çap olunan kitablar Azərbaycanda çeviriyə gərək olmadan kitab evlərində satılır. Bu da kitabın çevrilib yayılmasından daha yaxşı bir prosesdir. Kitabı çap olunduğu kimi oxuculara çatdırmaq yaxşıdır. Bunu Türkiyədə Azərbaycan kitabları üçün də etməliyik. Azərbaycan kitabları Türkiydəki mağazalarda orjinal olaraq satılmalıdır, bu istiqamətdə də bizim planlarımız var. Bizim bir kitab evimiz var. Bu kitab evi pandemiya dönəmində açıldı. Pandemiya şərtləri daxilində o kitab evini yaşatmaq bizim üçün çox çətin oldu. İndi onu internet imkanlarını da cəlb etməklə daha aktiv hala gətirmək arzusundayıq. Biz bu mağaza vasitəsi ilə Azərbaycan kitablarını orjinal halı ilə Türkiyədə satmaq istəyirik. İstəyirik oxucu onu orjinal halında oxusun. Bizim əlifba problemimiz qalmayıb. Ola bilər ki, bir neçə sözlük yardım lazım ola bilər. Onu da bir-iki kitabı səbr edib oxuduqdan sonra tam olaraq anlamış olacaq oxuyan. Bunları biz bu dönəmdə inkişaf etdirməliyik. Azərbaycandan Türkiyəyə gələn kitab sayında olduğu kimi Türkiyədən Azərbaycana gedən kitab sayını da artırmalıyıq. Nəşriyyatlarımız bu istiqamətdə bir-biri ilə əlaqələrini genişlətdikcə, yazarlarımız da daha çox tanınacaq, əlaqələrimiz da artacaqdır deyə ümid edirəm.
-Türk dünyası ədəbi qüvvələri arasında əlaqələrin genişlənməsi üçün Azərbaycan və Türkiyə ədəbi qurumları üzərinə hansı vəzifələr düşür?
-Azərbaycan və Türkiyə arasında olan münasibətlər həm Türk dünyası, həm də dünya üçün örnək münasibətlər oldu. Bu vəsilə ilə mən Prezidentlərimizə də şükranlarımı çatdırmaq istəyirəm. Onların münasibətləri bu qədər yaxınlaşdırmaları Türk dünyası tərəfindən izlənilir və ö dövlətlər üçün də bir nümunədir. Biz ədəbiyyat qurumları olaraq bu bərabər çalışmaları həyata keçirməliyik. Azərbaycan və Türkiyə ədəbi qurumları arasında görülən işlər digər dövlətlərimizin ədəbi qurumları tərəfindən də izlənilir və onlar da bu prosesə qoşulurlar. Bunu söyləmək yanlış olmaz ki, Türkiyə və Azərbaycan arasında ədəbi əlaqələr Türk dünyasında öndər əlaqələrdir.
-Türkiyədə kitaba oxucu marağından danışaq bir az da. Bir ədəbiyyat adamı kimi orada kitaba maraq sizi qane edirmi?
-Doğrusu, bu məsələyə iki cür yanaşmaq mümkündür. Birincisi, mən çox pozitiv insanam. Türkiyədə çox sayda kitab çap olunur. Ədəbi əsərlər də çox sayda çap olunur. Bu bizi çox sevindirir. İldə ortalama 400-dən çox yeni roman çap olunur. Bu rəqəm özü sübut edir ki, oxucu kütləsi var. Təbii, bəzi yazarlar, aydınlar oxucu sayının az olduğundan şikayətçidir, bu elektronik zamandan sonra gənclərin az oxumalarından şikayətçidirlər. Doğrudur, çox az oxuyan gənclər var, az oxuyan insan kəsimləri var. Amma çox oxuyan insanlar da var. O çox oxuyanlar bizi xilas edəcəklər. Mən onlara çox ümidliyəm.
-Azərbaycan müəlliflərinin kitablarının Türkiyədə çap olunması çox böyük önəm daşıyır. Çünki, Türkiyə daha böyük meydandır bu baxımdan. Bu istiqamətdə hansı addımları atmaq olar?
-Təbii, bu çox önəmli prosesdir. Bu mövzuda mən ilk hekayələr kitabı Türkiyədən əvvəl Azərbaycanda çap olunmuş bir yazaram. Bu mənim üçün çox sevindirici bir durumdur. İlk kitabı Türkiyədə çap olunmadan Bakıda çap olunan Nazim Hikmət olub. Onun şeir kitabı Bakıda çap olunmuşdu. Amma hekayə kitabı Türkiyədə çap olunmadan Azərbaycanda çap olunan ilk yazar mənəm. Bu, çox böyük xoşbəxtlikdir. Bəzi kitablar Bakıda çap olunmadan Türkiyədə çap olundu. Buna misal olaraq Xalq yazıçısı Anarın “Kərəm kimi” kitabını göstərə bilərik. Amma, biz bunu qəsdən elə planladıq. Söylədiyim kimi, Nazim Hikmətin kitabı öncə Bakıda çap olunmuşdu. Ona nəzirə olsun deyə, biz bu kitabı öncə Ankarada çap etdik. Nəşriyyat sektorunu da, oxucunu da bir-brinə yaxınlaşdırmalıyıq. Azərbaycan yazarlarının Türkiyədə oxucuları olmalıdır. Onların kitabları Türkiyədə çap olunduğunda kitab evləri, nəşriyyatlar o kitabları oxuculara sata bilməlidir. Bunun üçün də çox da böyük zaman qalmadı, bir neçə ilə o prosesləri də yaşayacağıq, inşallah.
-Azərbaycan ədəbi mühiti ilə kifayət qədər sıx əlaqəniz var. Kimlərin yaradıcılığını izləyirsiniz?
-Azərbaycan ədəbi mühitində çox dostum var. Həm onları yazar olaraq izləyirəm, həm də dostlarımın fəəaliyyəti olaraq təqib edirəm. Anarın, Mövlud Süleymanlının, Kamal Abdullanın, Rəşad Məcidin, Elçin Hüseynbəylinin yaradıcılığını oxuyuram və izləyirəm. Kamal Abdullanın əsərlərinin Azərbaycan ədəbiyyatına yeniliklər gətirdiyini düşünürəm. Bu siyahıya çox yazarları əlavə edə bilərəm. Mümkün olduğu qədər onların yeni əsərlərini izləməyə çalışıram.
-Öncə “Qardaş qələmlər” dərgisindən bəhs etdiniz. Dərgi haqda bir sual da vermək istəyirəm. Mütəmadi olaraq dərgidə Azərbaycan müəlliflərini dərc edirsiniz. 2022-ci ildə dərginin Azərbaycanla bağlı nə kimi planları var?
-Aylıq ədəbiyyat dərgisi canlı bir yayım orqanı olduğundan, doğrusu, biz onu bir neçə özəl sayı xaricində çox da uzun fəaliyyət planı ilə nəşr etmirik. Ümid edirəm ki, bu il gənc şairlərdən gözəl şeirlər, nasirlərdən gözəl hekayələr gələr. Biz gənclərə önəm verməyə çalışırıq. Sizin də şeirləriniz “Qardaş qələmlər” dərgisində çap olundu. Azərbaycan üçün bu il “Şuşa” özəl sayını hazırlayırıq. Bu sayda həm Azərbaycandan, həm də Türk dünyasının müxtəlif nöqtələrindən gözəl yazıların gələcəyinə inanırıq.
-Təşəkkür edirəm.
-Uğurlar olsun.
