Super User
Şuşa - Qarabağın dünəni, bu günü, sabahı” layihəsində Mehmandarovların malikanəsi
"Şuşa İli" elan edilməsi haqqında Sərəncama əsasən, Azərbaycan İstiqlal Muzeyi tərəfindən həyata keçirilən "Şuşa - Qarabağın dünəni, bu günü, sabahı" adlı layihə davam edir.
“Ədəbiyyat və incəsənət” portalı Mədəniyyət Nazirliyinə istinadən məlumat verir ki, layihə çərçivəsində təqdimatlardan biri Şuşa şəhərində yerləşən Mehmandarovların malikanəsinə həsr olunub.
Şuşada yerləşən, XVIII əsrə aid Mehmandarovlar ailəsinə məxsus malikanə kompleksi böyük yaşayış binası, kiçik yaşayış binası və ailə məscidindən ibarətdir.
Mehmandarovların malikanə kompleksi ilk dəfə 1977-78-ci illərdə Azərbaycan SSR Mədəniyyət Nazirliyi tərəfindən pasportlaşdırılıb. Bina sovetlər dönəmində Şuşa Şəhər Xəstəxanası kimi fəaliyyət göstərib.
1987-ci il mayın 19-dan vaxtilə Mehmandarovlar ailəsinə məxsus olan yaşayış kompleksində Azərbaycan Xalçası və Xalq Tətbiqi Sənəti Dövlət Muzeyinin (indiki Azərbaycan Milli Xalça Muzeyi) Şuşa filialı fəaliyyətə başlayıb. 1992-ci ildə Şuşa şəhəri Ermənistan silahlı qüvvələri tərəfindən işğala məruz qaldığı üçün filialdakı daşınması mümkün olan eksponatlar təxliyə olunaraq Bakıya gətirilib.
Müharibə dövründə Mehmandarovların malikanə kompleksinə də ciddi ziyan dəyib, dağıntılar törədilib. Mehmandarovların kiçik yaşayış binası isə ermənilər tərəfindən Şuşa Tarix Muzeyi kimi fəaliyyət göstərib. Kompleks ərazisindəki məscid isə ermənilər tərəfindən mənimsənilib və Geologiya Muzeyinə çevrilib.
İşğaldan azad olunan ərazilərimizdə Azərbaycan dövləti tərəfindən həyata keçirilən nəhəng yenidənqurma işləri, o cümlədən Şuşada aparılan bərpa və quruculuq prosesi Şuşanın orijinal memarlıq üslubuna uyğun olaraq gerçəkləşdirilir. Hazırda Mehmandarovların malikanə kompleksində təmir-bərpa işləri aparılır. Prezident İlham Əliyevin göstərişi ilə bərpa olunan Mehmandarovların evi şəhərin tarixi ünvanlarından biri kimi keçmiş şöhrətini tezliklə özünə qaytaracaq.
Parisdə azərbaycanlı rəssamların əsərlərindən ibarət sərgi açılıb
Parisdə “Village Suisse” incəsənət şəhərciyində tanınmış rəssam, “Toile d’Or” (Qızıl kətan) mükafatçısı Nigar Nərimanbəyovanın təşkilatçılığı ilə azərbaycanlı rəssamların əsərlərindən ibarət “Xəyal tətili” adlı sərginin açılışı olub.
“Ədəbiyyat və incəsənət” portalı AzərTAC-a istinadən xəbər verir ki, “Village Suisse” incəsənət şəhərciyinin “İnternational Art” qalereyasında təşkil olunmuş sərgidə Nigar Nərimanbəyovanın cari ilin iyul və avqust aylarında Bakıda xalqımızın, qəhrəman hərbçilərimizin və vətənimizin kompozisiya və simvolik obrazının yaradılmasına həsr edilmiş “44 günlük Vətən müharibəsində Qələbə”, “Doğma diyarın peyzajı”, “Azərbaycan qadınlarının portreti” və “Nizami Gəncəvi İli”nə həsr edilmiş ustad dərslərində iştirak etmiş şagirdlərinin əsərləri nümayiş olunub. Mədinə Abbaslı, Mədinə Qarayeva, Məryəm Qarayeva, Tahir Qarayev, Əli Həşimli, Cavad Həşimli, Fərəh Hacızadə, Əfruz Rəhimova kimi azərbaycanlı rəssamların əsərləri ziyarətçilər tərəfindən böyük maraqla qarşılanıb. Kiçik rəssamlar rəngli dünyalarını və arzularını fırça dili ilə kətan üzərində əks etdiriblər.
Nigar Nərimanbəyova bildirib ki, əsərlərinin Parisdə nümayiş olunması kiçik rəssamlar üçün böyük stimuldur.
“Belə istedadlı uşaqların əsərlərini geniş auditoriyaya təqdim etmək, beynəlxalq aləmdə tanıtmaq vacibdir. Burada nümayiş olunan əsərlərdə kiçik rəssamlarımızın duyğularını görürük. Nümayiş olunan əsərlər fərqli və təkrarsızdır. Hər bir əsər uşaqların rənglərə çevirdikləri duyğu və hisslərini təqdim edir. Əsərlərin mövzuları da rəngarəngdir.
Əminəm ki, bu sərgi rəssamlarımız üçün motivasiya mənbəyi olacaq, onları daha da ruhlandıracaq”, - deyə N.Nərimanbəyova bildirib. Qeyd edib ki, bu rəssamların əsərləri sentyabrın ikinci yarısında Luvr muzeyinin Karusel salonunda da nümayiş olunacaqdır.
“Business Art Fair” Salonunun komissarı, “La Gazette des Arts & Livre d’art” jurnalının naşiri Jorj Levi azərbaycanlı uşaqların istedadından söz açaraq, onların əsərlərini yüksək qiymətləndirib. Azərbaycanlı rəssamlara sertifikatlar təqdim olunub.
“İnternational Art” qalereyasında təşkil olunmuş “Xəyal tətili” sərgisi sentyabrın 12-dək davam edəcək.
Azərbaycan Haaqada səfirliklər festivalında təmsil olunub
Niderland Krallığının Haaqa şəhərində səfirliklər festivalı (“Embassy Festival”) keçirilib. Festival bu ölkədə akkreditə olunmuş 50-dən çox səfirliyin birgə təşkilatçılığı ilə reallaşıb.
“Ədəbiyyat və incəsənət portalı AzərTAC-a istinadən xəbər verir ki, müxtəlif ölkələrin mədəniyyətlərinin təqdim edildiyi festivalda Azərbaycan Respublikasının Niderland Krallığındakı səfirliyi də təmsil olunub. Festivalda iştirakçı dövlətlər mədəniyyətlərini, mətbəxlərini, musiqilərini təqdim ediblər.
Azərbaycan pavilyonunda milli mətbəxin ən ləziz təamları - şahı olan plov, dolma, kabablar, şirniyyatlarımız və içkilərimiz təqdim edilib.
Niderlandda yaşayan Azərbaycan icmasının üzvləri festivala qatılaraq, ziyarətçilərə ölkəmizin mədəniyyəti, incəsənəti və turizmi haqqında ətraflı məlumat verib, broşürlər paylayıblar.
Ölkəmizin Niderlanddakı fövqəladə və səlahiyyətli səfiri Fikrət Axundov Azərbaycan pavilyonunda həmkarlarının, eləcə də pavilyonumuzun ziyarətçilərinin ölkəmiz haqqında olan suallarını cavablandırıb.
Haaqa şəhərinin meri Jan Hendrikus Cornelis van Zanen hər ölkənin pavilyonuna yaxınlaşıb səlahiyyətli nümayəndələrlə görüşüb, onlarla festival haqqında fikir mübadiləsi aparıb, ölkələrin milli mədəniyyəti və mətbəxi ilə tanış olub.
Festival hər il on minlərlə ziyarətçini qəbul edir. Ziyarətçilər Azərbaycanın məhsullarına və kulinariya incilərinə heyranlıqlarını bildirib və ölkəmizin mədəniyyəti ilə daha yaxından tanış olmaq arzularını ifadə ediblər.
Milli rəqs qrupumuzun çıxışı festivala xüsusi rəng qatıb. Rəngarəng rəqslər təqdim edən qrupun təqdimatı alqışlarla qarşılanıb.
Corce Enesku festivalına start verilib
Rumıniyanın paytaxtı Buxarestdə nüfuzlu Corce Enesku adına Beynəlxalq Musiqi Festivalı başlayıb.
Festival sentyabrın 18-dək davam edəcək. Bu festivalda dünyanın 37 ölkəsindən ifaçılar iştirak edir. İki həftə ərzində tamaşaçılar dünya klassiklərinin əsərlərini gənc istedadlı pianoçu, violonçel və skripkaçıların ifalarında dinləyə biləcəklər.
Corce Enescu Festivalı Avropa mədəniyyəti aləmində hər il keçirilən ən böyük tədbirlərdən biridir.
“Ədəbiyyat və incəsənət” portalı xəbər verir ki, Corce Enescu məşhur rumın bəstəkarıdır və Bakıda, Binəqədi rayonunda ona abidə də ucaldılıb. (Şəkildə)
Nəhayət, “Youth ArtCamp Shusha and Baku” layihəsinə yekun vuruldu
Sentyabrın 4-də Beynəlxalq Muğam Mərkəzində “Youth ArtCamp Shusha and Baku” (Şuşa və Bakı Gənclər İncəsənət Düşərgəsi) adlı beynəlxalq layihənin bağlanış mərasimi keçirilib.
“Ədəbiyyat və incəsənət” portalı AzərTAC-a istinadən xəbər verir ki, layihə çərçivəsində Muğam Mərkəzində Ağdam, Füzuli, Cəbrayıl və Şuşa şəhərlərini ziyarət edən 16 gənc rəssamın çəkdikləri rəsmlər əsasında sərgi açılıb.
Tədbirdə çıxış edən mədəniyyət naziri Anar Kərimov layihənin Azərbaycan Mədəniyyət Nazirliyi, Azərbaycan Respublikasının UNESCO üzrə Milli Komissiyası, ölkəmizin İspaniyadakı səfirliyi və Andorranın UNESCO üzrə Milli Komissiyasının təşkilatçılığı ilə ərsəyə gəldiyini bildirib: “Biz çalışırıq yaradıcı düşərgəni dünyanın bütün bölgələrində gerçəkləşdirək. Bu dəfə layihə Azərbaycanın mədəniyyət paytaxtı Şuşa şəhərində keçirildi. Ağdam Şuşa və digər bölgələrdə tarixi abidələrimiz dağıdılsa da, biz, Qarabağı yenidən quracağıq. Biz çalışırıq bu bölgədə sülhün yaradıcısı olaq. Şuşa və Qarabağın digər bölgələrini ziyarət edən rəssamlar təbiətdən ilhamlanaraq öz təəssüratlarını kətan üzərinə köçürən zaman bir növ Azərbaycanın mədəniyyət elçisinə çevrilir. Əminəm ki, burada olarkən gənc rəssamlar Azərbaycan xalqının sülhsevər və qonaqpərvər bir xalq olduğunu görüb. Şadam ki, UNESCO tərəfindən yaradılan bu layihə gələcəkdə Şuşanı dünya mədəniyyətinin böyük bir mərkəzinə çevirəcək”.
UNESCO-nun mədəni diplomatiya üzrə xoşməramlı səfiri Hedva Ser gənc rəssamları Azərbaycanda görməkdən məmnun olduğunu söyləyib. O deyib: “Mən Şuşanın müharibədən əvvəlki və sonrakı vəziyyətini şəkillərdə görərkən çox təsirləndim. Rəssamların gördüyü işlər mənim çox xoşuma gəldi. 2012-ci ildən başlanan layihə incəsənət nümayəndələrini tək bir araya gətirmək üçün deyil, həmçinin dünya xalqları arasında mədəni körpünün qurulmasına xidmət edir”.
Əməkdar rəssam Əsmər Nərimanbəyova sərginin layihədə iştirak edən rəssamlar üçün çox əhəmiyyətli olduğunu deyib. Bildirib ki, bu rəsmlər Ağdam, Füzuli, Cəbrayıl və Şuşanın bir güzgüsüdür. Rəssamlar Qarabağdan ilhamlanaraq onu olduğu kimi əks etdiriblər.
Sonra layihədə iştirak edən rəssamlara sertifikatlar təqdim olunub.
Layihə çərçivəsində gənc rəssamların çəkdiyi rəsm əsərlərindən ibarət kataloqun hazırlanması və xarici ölkələrdə yayımlanması, həmçinin rəsm əsərlərindən ibarət sərginin təşkili nəzərdə tutulur.
Ən çox oxunan: Azərbaycanlı musiqiçi, Vətən müharibəsi iştirakçısı evində ölü tapılıb
Azərbaycanlı DJ Murad Pikanın (Murad Abbaslı) vəfat etməsi xəbəri yayılıb. “Ədəbiyyat və incəsənət” portalı olay.az-a istinadən xəbər verir ki, bu barədə Muradın "beatmaker"i olduğu "Destroy" leyblı məlumat yayıb.
Murad Pikanın avqustun 29-u evində ölü tapıldığı qeyd edilir. Məlumata görə, 27 yaşlı M. Pika yuxudan oyanmayıb.
Qeyd edək ki, Murat "Rock", "Jazz" və "Blues" qruplarının aparıcı üzvü olub. O, gitarist, pianist, bəstəkar, beatmaker, DJ olmaqla yanaşı, həm də İkinci Qarabağ müharibəsi veteranı idi və iki medal ilə təltif edilmişdi.
Romada Azərbaycan Mədəniyyət Mərkəzinin açılışı olub
Prezident İlham Əliyev Romada Azərbaycanın İtaliya Respublikasındakı səfirliyinin yeni binasında Azərbaycan Mədəniyyət Mərkəzinin açılışı münasibətilə təşkil edilən “Mənim Azərbaycanım” adlı rəsm sərgisi ilə tanış olub.
Ölkəmizin rəsmi mənbələrinin yaydıqları xəbərə görə, sərgidə realizmdən tutmuş modernizm və postmodernizmədək Azərbaycanın təsviri sənətinin nadir nümunələri nümayiş etdirilir.
Qeyd edək ki, Azərbaycan Prezidenti İlham Əliyev 2020-ci ilin fevralında İtaliyaya dövlət səfəri zamanı birinci xanım Mehriban Əliyeva ilə Roma şəhərində səfirliyimiz və onun tabeliyində Azərbaycan Mədəniyyət Mərkəzi üçün nəzərdə tutulan bina ilə tanış olub, binanın əsaslı təmiri ilə bağlı tapşırıq və tövsiyələrini veriblər.
Bildirilib ki, ötən əsrin 40-cı illərində inşa edilmiş bina diplomatik nümayəndəliklərin yerləşdiyi Nomentano-Villa Torlonia ərazisindəki Via Giovanni Battista De Rossi 27 ünvanındadır.
Binanın 1-ci və 2-ci mərtəbələri Azərbaycan Mədəniyyət Mərkəzi, 3-5-ci mərtəbələri isə səfirlik üçün nəzərdə tutulub.
Dünyanın ən zəngin tarixi irsinin yerləşdiyi Romada Azərbaycan Mədəniyyət Mərkəzinin fəaliyyətə başlaması ölkəmizin təbliği istiqamətində atılan ən mühüm addımlardan biridir və dünyada multikulturalizmin beşiyi sayılan Azərbaycanın ən yüksək səviyyədə tanıdılmasına xidmət edir. Birinci xanım Mehriban Əliyevanın rəhbərliyi ilə Heydər Əliyev Fondunun Azərbaycanın dünya miqyasında tanıdılması istiqamətində mühüm tədbirlər həyata keçirdiyi ölkələr arasında İtaliya xüsusi yerə malikdir. Romada Azərbaycan Mədəniyyət Mərkəzinin fəaliyyətə başlaması ölkəmizin zəngin tarixi-mədəni irsinin tanıdılmasına, Azərbaycan və İtaliya arasında mədəniyyət, elm, təhsil, humanitar sahələrdə daha səmərəli fəaliyyətin həyata keçirilməsinə geniş imkanlar açacaq.
Mədəniyyət Mərkəzinin daxili tərtibatında Azərbaycanın dövlət rəmzlərindən, milli sənətkarlıq elementlərindən, o cümlədən şəbəkədən istifadə edilib. Mərkəzin müxtəlif ekspozisiya zallarında Azərbaycan tarixini əks etdirən eksponatlar təqdim olunur. Qədim silahlar, misgərlik məmulatları, xalça sənətinin nümunələri, zinət və bəzək əşyaları, milli geyim və aksessuarlar da daxil olmaqla bütün eksponatlar Azərbaycanın qədim, zəngin tarixindən və mədəniyyətindən xəbər verir. Mərkəzdə müxtəlif tədbirlərin və görüşlərin keçirilməsi üçün hər cür imkan yaradılıb.
Azərbaycan xalçaları mərkəzdəki ekspozisiyanın ən qiymətli inciləri sırasındadır. Milli xalçaçılığımızın müxtəlif məktəblərinin nümunələrinin təqdim edildiyi mərkəzdə qədim xalça və xalça məmulatlarının geniş çeşidi sərgilənir. Burada Azərbaycan xalçaçılıq məktəblərinin tarixi və keçdiyi inkişaf yolları barədə italyan dilində məlumat verilir. Bundan başqa, Azərbaycan miniatürləri, ölkəmizdə qədimdən yaranıb formalaşan rəssamlıq sənəti - miniatür məktəbi barədə ətraflı məlumat verilir. Zinət və müxtəlif bəzək əşyalarının, xalq incəsənətinin bütün istiqamətlərinə dair nümunələrin, taxta üzərində oyma sənətinin təqdim olunduğu mərkəzin ekspozisiyasında Azərbaycan milli geyimləri də diqqəti cəlb edir.
Azərbaycan Mədəniyyət Mərkəzində Heydər Əliyev Fondu tərəfindən italyan dilində nəşr olunmuş Azərbaycanın mədəniyyəti, incəsənəti, sənətkarlığı, qayaüstü rəsmlər, miniatür sənəti, milli musiqimiz, zərgərlik məmulatları, xalçalar ilə bağlı kitablar nümayiş etdirilir. Mərkəzdə, həmçinin Azərbaycanın tarixi, mədəniyyəti, ədəbiyyatı, xarici siyasəti ilə bağlı son illər İtaliyada nəşr edilmiş kitablar da təqdim olunur.
Prezident İlham Əliyev mərkəzin açılışı münasibətilə təşkil edilən “Mənim Azərbaycanım” adlı rəsm sərgisi ilə də tanış olub. Sərgidə realizmdən tutmuş modernizm və postmodernizmədək Azərbaycanın təsviri sənətinin nadir nümunələri nümayiş etdirilir.
Mərkəzdə iki ölkə arasında elm-təhsil mübadilələri çərçivəsində onlayn dərslərin keçirilməsi, Azərbaycan dilinin tədrisi üçün xüsusi avadanlıqlarla təchiz olunmuş otaq da vardır. Burada Azərbaycan musiqisinin təbliğinə də geniş yer ayrılıb. Qədim musiqi alətlərimizin sərgisi təşkil olunub və bütün musiqi janrlarımızla bağlı CD-lər və italyan dilində nəşrlərdən ibarət guşə də yaradılıb. Bundan başqa, mərkəzdə Azərbaycanın milli mətbəxinin nümunələrinin hazırlanması və müvafiq master-klasların və təlimlərin keçirilməsi üçün şərait var.
ƏSA Teatrı bu gün 6 yaşını qeyd edir
Azərbaycanın ilk inklüziv teatrı olan ƏSA Teatrının fəaliyyətə başlamasının bu gün 6-cı ili tamam olur. Əlilliyi olan və olmayan aktyorlardan ibarət bu teatr 2016-cı il sentyabrın 3-də rejissor Nihad Qulamzadə tərəfindən təsis olunub.
ƏSA Teatrı yarandığı gündən bu günədək 6 il ərzində böyük uğurlara imza ataraq, dünya və Azərbaycan ədəbiyyatının ən sevilən əsərlərinə quruluş verib, eləcə də vacib layihələr həyata keçirib.
Gənc olmasına baxmayaraq, teatr U.Şeksprin, C.Steynbekin, M.F.Axundzadənin, M.Meterlinkin, J.B.Molyerin, J.P.Sartrın, P.Turrinin əsərləri olmaqla 10 tamaşa və üç performans təqdim edib. Teatr səhnə ilə kifayətlənməyərək, ölkədə əlilliyi olan şəxslərə daha çox diqqət ayrılması üçün sosial çarxlar ənənəsinin əsasını qoyub, həmçinin çox sayda rəqəmsal layihələr həyata keçirib. 2016-cı ildən bu günədək ƏSA Teatrı yerli və xarici, dövlət və qeyri-dövlət qurumları ilə yaradıcı əməkdaşlıq edib.
ƏSA Teatrı öz fəaliyyəti ilə Azərbaycan mədəniyyətini dünyada uğurla təmsil edir. Teatrın təsisçisi Nihad Qulamzadə 2018-ci ildə ABŞ-da “Açıq Dünya” Proqramında ölkəmizdəki inklüziv incəsənətin, teatrın fəaliyyəti və inkişafı haqqında ətraflı məlumat verib. 2021-ci ildə Rusiya Federasiyasının “Sosial-Mədəni Təşəbbüslər Fondu” tərəfindən “İsti ürək” beynəlxalq mükafatına layiq görülüb. Həmçinin Azərbaycan bölgələrini qarış-qarış gəzməyi qarşısına məqsəd qoyan ƏSA Teatrı Naxçıvanda və Lənkəranda anşlaqla tamaşalar nümayiş etdirib. Ötən il respublika üzrə keçirilən “4.4 Qısa Tamaşalar Festivalı”nda “Qonşu” tamaşası ilə birinci yerə layiq görülüb.
Qeyd edək ki, 7-ci mövsümə başlayan ƏSA Teatrı sentyabr ayından etibarən tamaşaçıların görüşünə gələcək.
Bu gün 6 yaşını qeyd edən ƏSA Teatrında 20-dən çox əlilliyi olan və olmayan istedadlı aktyor heyəti fəaliyyət göstərir. ƏSA Teatrına ən böyük arzusu qarşıdakı teatr mövsümündə kollektivin məkanla təmin olunmasıdır.
18 sentyabrda Opera və Balet Teatrı mövsümü “Leyli və Məcnun” operası ilə açacaq
Azərbaycan Dövlət Akademik Opera və Balet Teatrı yeni 114-cü teatr mövsümünü sentyabrın 18-də Üzeyir Hacıbəylinin “Leyli və Məcnun” operası ilə açacaq.
Səhnə əsərində Məcnun rolunu Xalq artisti Mənsum İbrahimov, Leyli obrazını isə gənc solist, Əməkdar artist Arzu Əliyeva ifa edəcək. Digər rolları Əməkdar artistlər Cahangir Qurbanov, Təyyar Bayramov və başqaları canlandıracaq.
Tamaşanın quruluşçu rejissoru Əməkdar incəsənət xadimi Hafiz Quliyevdir. Səhnə əsərini dirijor Sevil Hacıyeva idarə edəcək.
Qeyd edək ki, müsəlman Şərqində ilk opera sayılan “Leyli və Məcnun” dahi bəstəkar Üzeyir Hacıbəyli tərəfindən 1908-ci ildə qələmə alınıb. Opera elə həmin il yanvarın 12-də ilk dəfə səhnəyə qoyulub. Ölməz bəstəkarın bu əsəri 114 ildir ki, Opera və Balet Teatrının repertuarındadır.
Biletləri iTicket.az saytı və şəhərin kassalarından əldə etmək mümkündür.
Günün fotosu: ABŞ-da ilk iqlim qaçqınları peyda olub
Günün fotosu: ABŞ-da ilk iqlim qaçqınları peyda olub
Aramsız yağan yağışlar, sel və daşqınlar ABŞ-ın Luiziana ştatını təbii fəlakətə sürükləmişdir. Evlər, təsərtüfatlar su altında qalmışdır. Nəticədə kənd və qəsəbələrin sakinləri qaçqın düşmüşlər.
Foto: Euronews
