Super User
Xəzər TV yeni sezonda üç məşhur serialı ekranına daşımağa hazırlaşır.
“Ədəbiyyat və incəsənət” olay-a istinadən xəbər verir ki, “Xəzər” telekanalında yeni mövsümdə iki türk, bir rus serialı yayımlanacaq.
Belə ki, TRT 1 istehsalı "Masumlar apartmanı" və "Uyanış: Büyük Selçuklu" "Xəzər"in yeni efirə verəcəyi türk seriallarıdır. Türkiyədə yüksək reytinq toplayan layihələr azərbaycanca yayımlanacaq.
"Masumlar apartmanı"nın adı tərcümə edilərək "Məsumlar məkanı" qoyulub.
Tarixi janrda olan digər ekran işinin isə adı olduğu kimi saxlanılıb. "Uyanış: Büyük Selçuklu" sentyabrın 12-dən yayımlanacaq. Film 11-12-ci əsrlərdə təşəkkül tapan Böyük Səlcuqlu imperiyasından bəhs edir.
Rusiya istehsalı serial məşhur rus aktyoru Sergey Bezrukovun baş rolu canlandırdığı, 4 dostun kriminal aləmdə yaşadıqlarından bəhs olunan, 2000-ci illərin ən populyar serialı "Briqada"dır.
Hər gün kitablar haqqında 5 qeyri-adi fakt
“Ədəbiyyat və incəsənət” portalı LitRes ədəbiyyat dərgisindən kitablar barədə maraqlı faktları sizinlə bölüşür.
1. “Qulliverin səyahəti " kitabı astronomlardan 100 il əvvəl Ayın və Marsın peyklərinin ölçüsünü və fırlanma sürətini təsvir etmişdir.
2. Böyük Britaniyada bütün zamanların ən çox satılan kitabı "Bozun 50 çaları"dır. Qadın yazar olan E. Ceymsin bu romanı, yeri gəlmişkən erotik romandır. (Gəlin daha Avropanın yüksək mənəvi dəyərlərindən danışmayaq).
3. Daniel Defonun "Robinzon Kruzo" romanı ilk ingilis romanı sayılır.
4. İlk əlyazma şəklində olan “Bibliya” (çap maşınının ixtirasına qədərki dövrdə) 12 il ərzində yazılmışdır və indi 8 milyon dollar dəyərindədir.
5. “Quran-i Kərim” yeganə müqəddəs kitabdır ki, orada çoxlu sayda elmi və tarixi faktlar vardır ki, kitab yazılan dövrdə hələ heç kəsə məlum deyildi.
Bir daha İltəriş Xaqana məxsus külliyə barədə - Qazaxıstan prezidenti bu faktı yüksək dəyərləndirib
Xəbər verdiyimiz kimi Beynəlxalq Türk Akademiyası və Monqolustan Elmlər Akademiyası Arxeologiya İnstitutunun birgə apardığı elmi arxeoloji tədqiqatların nəticəsində Monqolustanın Arxanqay bölgəsinin Nomqon düzündə İltəriş Xaqana məxsus külliyə (abidə kompleksi) aşkar ediliməsi Türk dünyasında və dünyada böyük marağa və hadisəyə səbəb oldu.
“Ədəbiyyat və incəsənət” portalına Beynəlxalq Türk Akademiyasından verilən məlumata görə, bu münasibətlə ötən gün Qazaxıstan Respublikasının Prezidenti Kasım -Jomart Tokayev Beynəlxalq Türk Akademiyasının prezidenti Darxan Kıdıralini qəbul edib. Kasım Jomart Tokayev Monqolustanın Nomqon vadisinin Arxanqay aymakında akademiyanın alimlərdən ibarət arxeoloji ekspedisiyasının nəticələri ilə tanış olub. Qazaxıstan prezidenti tədqiqatçıların aşkar etdiyi Kutluq Elteriş xaqana məxsus nadir yazılar yazılmış daş külliyəsi ilə maraqlanıb.
Darxan Kıdırali deyib ki, yeni tapılan daş yazılar qədim türklərin insanlıq siivilizasiyasında daha erkən vaxtlar da töhvfə verdiyini sübut edir. Ərazidə tapılan ritual və ayinlər kompleksində də Kutluq xaqanın hakimiyyəti dövrünə aid artefaktlar və simvollar mövcuddur.
Görüşdə hadisənin tarixi əhəmiyyəti fonunda, həm də Akademiyanın fəaliyyəti və ümumi türk dərs vəsaitlərinin hazırlanması məsələsi də müzakirə olunub. Kasım -Jomart Tokayev Monqolustanda elmi tədqiqatlar aparan ekspedisiyanın nəticələrini və Beynəlxalq Türk Akademiyasının fəaliyyətini yüksək qiymətləndirib.
Aida Eyvazlı
Kukla Teatrının sentyabr repertuarı açıqlanıb
Abdulla Şaiq adına Azərbaycan Dövlət Kukla Teatrı növbəti teatr mövsümünün sentyabr ayı üçün nəzərdə tutulan repertuarını açıqlayıb.
Repertuarla tanış olun:
16 sentyabr – “Qar kraliçası”, “Durna balığı” (rus dilində)
17 sentyabr – “Düyməcik”
17, 25 sentyabr – “Çipollino” (rus dilində)
18 sentyabr – “Ağca və Yeddi Cırtdan”, “Qoğal” (rus dilində)
20 sentyabr – “Qoğal”
23 sentyabr – “Maşa və ayı” (iki dəfə Azərbaycan və rus dilində)
24 sentyabr – “Cırtdan”, “Üç cəsur” (rus dilində)
25 sentyabr – “Yeddi nar çubuğu”
30 sentyabr – “Qoğal”
Tarix-memarlıq abidələrinə müdaxilələrə qarşı barışmaz mövqe sərgilənəcək
Sentyabrın 1-dən etibarən Bakı şəhərində tarix-memarlıq abidələrinin fasadına, ümumi eksteryerinə, interyerinə, bir sözlə ilkin görünüşünə edilən müdaxilələrlə bağlı operativ monitorinq tədbirlərinə başlanılıb.
“Ədəbiyyat və incəsənət” portalı xəbər verir ki, bu barədə Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətindən bildirilib.
Qeyd olunub ki, istənilən qanunsuz və iznsiz müdaxiləyə qarşı ən sərt formada tədbirlər həyata keçiriləcək.
“İcra prosesi ilə bağlı protokol tərtib ediləcək, cərimələr müəyyən ediləcək və əlavə qanunsuz müdaxilələr nəticəsində dəyən zərər aradan qaldırılacaq. Məqsədimiz heç bir fiziki və ya hüquqi şəxsi cərimələmək olmasa da, çevik tədbirlər üçün SOS təbilini elan etmək zamanı yetişib”, - məlumatda vurğulanır.
ABŞ-da azərbaycanlı musiqişünasın xatirə gecəsi təşkil ediləcək
ABŞ-dakı İndiana Universitetinin Ceykobs musiqi məktəbində Azərbaycan əsilli amerikalı musiqişünas, pedaqoq, sənətşünaslıq üzrə fəlsəfə doktoru Aida Hüseynovanın xatirəsinə həsr olunmuş konsert keçiriləcək.
AzərTAC Diasporla İş üzrə Dövlət Komitəsindən a istinadən xəbər verir ki, keçmiş həmkarlarının təşəbbüsü ilə sentyabrın 11-də təşkil ediləcək konsert universitetin Ford-Krouford zalında baş tutacaq.
Xatırladaq ki, soydaşımız bu il iyunun 21-də ömrünün 58-ci ilində vəfat edib.
1964-cü ildə Bakıda dünyaya gələn Aida Hüseynova Azərbaycan Dövlət Konservatoriyasının (indiki Bakı Musiqi Akademiyası) məzunu olub, Sankt-Peterburq Konservatoriyasında sənətşünaslıq üzrə fəlsəfə doktoru elmi dərəcəsi alıb. Bakı Musiqi Akademiyasında pedaqoji fəaliyyətlə məşğul olub, ABŞ və Böyük Britaniyanın Harvard, Prinston, Berkli, Stenford, Kolumbiya və Kembric universitetlərində mühazirələr oxuyub.
Xalq artisti Azər Paşa Nemətova həsr olunan kitab-albom çap olunub
Azərbaycan Teatr Xadimləri İttifaqının sədri, Akademik Milli Dram Teatrının bədii rəhbər-direktoru, Xalq artisti Azər Paşa Nemətovun 75 illik yubileyinə həsr olunan kitab-albom çap olunub.
“Elm və Təhsil” nəşriyyatında Azərbaycan, rus və ingilis dillərində işıq üzü görən yeni nəşrdə əvvəlcə Azər Paşa Nemətovun atası, görkəmli teatr rejissoru Zəfər Nemətovun həyat yolundan danışılır. Kitab-albom daha sonra “Uşaqlıq və gənclik illəri”, “Portretlər”, “Tamaşalardan fraqmentlər”, “Sənət, həyat, düşüncələr...” bölmələri ilə davam edir.
Nəşrdə Azər Paşa Nemətovun Azərbaycan Dövlət Gənc Tamaşaçılar Teatrında, Leninqrad Gənc Tamaşaçılar Teatrında, Arxangelsk Dövlət Dram Teatrında, Tallin Gənc Tamaşaçılar Teatrında, Azərbaycan Dövlət Akademik Milli Dram Teatrında hazırladığı tamaşalardan, eyni zamanda görkəmli rejissorun yaradıcı səfərlər zamanı lentə alınan fotolar öz əksini tapıb.
Kitab-albomda Azərbaycan Teatr Xadimləri İttifaqının, Azərbaycan Dövlət Teatr Muzeyinin, Akademik Milli Dram Teatrının muzeyinin, o cümlədən, Azər Paşa Nemətovun şəxsi arxivindən istifadə olunub.
Yeni nəşrin tərtibçisi Cavid Zeynallı, rus və ingilis dillərinə tərcümə edəni Ayna Zərbəliyeva, redaktoru Aida Qafarova, bədii tərtibatçısı Aqil Əmrahovdur.
Gender Bərabərliyi üzrə Beynəlxalq Müasir İncəsənət layihəsi təşkil ediləcək
Latviyanın ölkəmizdəki səfirliyi BMT-nin Azərbaycandakı nümayəndəliyi və Norveç Krallığının Ankaradakı səfirliyi ilə birgə əməkdaşlıq çərçivəsində “Qız Qalası. Qadın olmaq” layihəsinin davamı olaraq Gender Bərabərliyi üzrə Beynəlxalq Müasir İncəsənət “O” layihəsini təşkil edəcək.
Bu il layihənin əsas mövzusu dayanıqlı gələcək üçün qadınların rolunu vurğulayan BMT Təhlükəsizlik Şurasının Qadınlar, Sülh və Təhlükəsizlik haqqında 1325 saylı Qətnaməsinə həsr olunacaq.
Səfirlikdən AzərTAC-a bildirilib ki, layihə, gender bərabərliyi ilə bağlı təcrübələrini bölüşmək, eləcə də müasir incəsənət vasitəsilə qadınların həyatına təsir edən pandemiya və post-konflikt vəziyyətlərini əks etdirmək üçün beynəlxalq iştirakçıları bir araya gətirəcək.
Layihənin proqramına müəllif təqdimatlar, müzakirələr, film nümayişi, ədəbiyyat axşamı, sərgi və konfrans daxildir. Hər bir element incəsənət və mədəniyyət vasitəsilə sosial inteqrasiyanın təşviqi və gücləndirilməsinin yeni strategiyasında mühüm rol oynayır.
“Açıq Qapı” tədbiri beynəlxalq şöhrətli məşhur Azərbaycan rəssamı İrina Eldarovanın studiyasına ziyarət etmək imkanı yaradacaq. Qonaqlara rəssamın yaradıcılıq prosesini izləmək, geniş sənət kolleksiyasını görmək, eləcə də rəssamla birbaşa canlı ünsiyyətdə olmaqdan həzz almaq kimi unikal imkan təqdim olunacaq.
Noyabr ayında xalq diplomatiyası proqramının bir hissəsi kimi Azərbaycan Respublikasının Əməkdar İncəsənət xadimi Səbinə Şıxlinskayanın kuratorluğu ilə Müasir İncəsənət Muzeyində www.tobeawoman.az internet səhifəsi əsasında fəaliyyətlərin davamı kimi “O” adlı sərgi təşkil olunacaq. Sərginin mövzusu qadınlara həsr olunur- onların həyatları, cəmiyyətdəki rolu, sevincləri və problemlərinə. Azərbaycan dilində “o” hər iki cins üçün eynidir, yalnız məzmunda hansı cinsin nəzərdə tutulduğu aydın olur. Bu da simvolikdir, çünki gender bərabərliyi mövzusunun mahiyyəti gender birliyi və bərabərliyinə əsaslanır.
Səfirlik noyabr ayında həmçinin “Qadınlar dayanıqlı sabah üçün” adlı beynəlxalq konfrans təşkil edəcək.
Müslüm Maqomayevin “Şah İsmayıl” operası yenidən nümayiş olunacaq
Oktyabrın 26-da Azərbaycan Dövlət Akademik Opera və Balet Teatrında Müslüm Maqomayevin “Şah İsmayıl” operası növbəti dəfə nümayiş olunacaq.
Teatrın mətbuat xidmətindən verilən məlumata görə, səhnə əsərində Şah İsmayıl rolunu Təyyar Bayramov, Aslan Şah obrazını isə Taleh Yahyayev ifa edəcək. Digər rolları Gülüstan Əliyeva, Fəridə Məmmədova, Fərid Əliyev, Tural Ağasiyev, Nəzər Bəylərov, Əli Əsgərov və başqaları canlandıracaq.
Tamaşanın quruluşçu rejissoru Xalq artisti Ağababa Bünyadzadə, rejissoru Əməkdar incəsənət xadimi Hafiz Quliyev, quruluşçu rəssamı Əməkdar rəssam Ənvər Almaszadə, xormeysteri Sevzixan Sərdərov, baletmeysteri SSRİ Xalq artisti Qəmər Almaszadə və dirijoru Xalq artisti Cavanşir Cəfərovdur.
Biletləri iTicket.az saytı və şəhərin kassalarından əldə etmək mümkündür.
Mədəniyyət naziri Ağdaşda vətəndaşları qəbul edəcək
Mərkəzi icra hakimiyyəti orqanları və digər idarəetmə qurumlarının rəhbərlərinin şəhər və rayonlarda vətəndaşların qəbulu cədvəlinə əsasən Azərbaycan Respublikasının mədəniyyət naziri Anar Kərimov tərəfindən 2022-ci il 23 sentyabr tarixində saat 10:00-da Ağdaş rayon Heydər Əliyev Mərkəzində (Ağdaş rayonu, Bakı-Şamaxı-Yevlax avtomagistral yolunun 240-cı kilometrliyi) Ağdaş, Göyçay, Zərdab və Ucar rayonlarından olan vətəndaşların qəbulu keçiriləcək.
Vətəndaşlar 19 sentyabr 2022-ci il tarixinə qədər Nazirliyin Bu email ünvanı spambotlardan qorunur. Onu görmək üçün JavaScripti qoşmaq lazımdır. elektron poçt ünvanı, (012) 493-74-24 telefon nömrəsi vasitəsi ilə və “Whatsapp” xidmətinə (0 777 147 147) müraciət etməklə qəbula yazıla bilərlər.
