Super User
Mədəniyyət nazirinin Cəlilabad rayonuna səfərinin təfsilatı
Xəbər verdiyimiz kimi, Azərbaycan Respublikasının mədəniyyət naziri Anar Kərimov oktyabrın 21-də Cəlilabad rayonuna səfər edərək tarixi abidələrə və bir sıra mədəniyyət müəssisələrinə baxış keçirib.
“Ədəbiyyat və incəsənət” portalı xəbər verir ki, Cəlilabad rayon Göytəpə şəhərində yerləşən yerli əhəmiyyətli tarixi abidəni – pravoslav kilsəsini (inv. № 4177) ziyarət edən Anar Kərimova tikili haqqında məlumat verilib. Bildirilib ki, cənub bölgəsində bənzəri olmayan Göytəpə pravoslav kilsəsi 1878-ci ildə inşa olunub və tikintisi yerli ustalar tərəfindən aparılıb. Məhz buna görədir ki, abidənin pəncərələri Azərbaycan milli memarlıq üslubunda hazırlanıb.
Səfər çərçivəsində Cəlilabad rayon Privolnoye kənd Mədəniyyət evinə və həmin binada fəaliyyət göstərən rayon Mərkəzləşdirilmiş Kitabxana Sisteminin (MKS) kənd kitabxana filialına da baxış keçirilib. Məlumat verilib ki, 1977-ci ildə istifadəyə verilən müəssisənin binası 400 nəfərlik tamaşa zalı, 100 yerlik iclas zalı olmaqla, ümumilikdə, 17 otaqdan ibarətdir.
Sonra Göytəpə şəhər Uşaq Musiqi Məktəbinə gələn nazir təhsil ocağının fəaliyyəti haqqında məlumat alıb. Qeyd olunub ki, 1989-cu ildən fəaliyyət göstərən məktəbdə fortepiano, tar və qarmon ixtisasları üzrə 94 şagird təhsil alır, 14 müəllim çalışır.
Daha sonra nazir Anar Kərimov rayon Heydər Əliyev Mərkəzində Masallı, Cəlilabad və Yardımlı rayonlarında fəaliyyət göstərən mədəniyyət işçiləri ilə görüş keçirib. Görüşdə nazirliyin məsul əməkdaşları da iştirak ediblər.
Nazir çıxış edərək bildirib ki, müntəzəm olaraq bölgələrə səfərlərinin əsas məqsədi yerlərdə mədəniyyət müəssisələrinin fəaliyyəti ilə tanış olmaq, mövcud imkanları müəyyənləşdirmək, mədəniyyət və incəsənət sahəsində çalışan şəxsləri nazirliyin prioritetləri və qarşıya qoyulan məqsədləri barədə yerində məlumatlandırmaqdır. Eyni zamanda bu sahədə fəaliyyət göstərən insanların nazirlik tərəfindən aparılan islahatlara cəlb edilməsi, mədəniyyət sahəsinin dayanıqlı inkişafına töhfə vermələrinə nail olmaq da əsas vəzifələrdəndir.
Görüş zamanı mədəniyyət müəssisələrində mövcud olan problemlərdən söz açılıb, onların həlli yolları ilə bağlı təkliflər dinlənilib.
Anar Kərimov bildirib ki, bölgələrdə fəaliyyət göstərən mədəniyyət işçiləri dövrün tələbləri ilə ayaqlaşmalıdırlar. Bunun üçün peşəkarlıq səviyyəsi və təşəbbüskarlığın artırılması zəruridir.
Nazir çıxışının sonunda problemlərin aradan qaldırılması, müəssisələrin daha səmərəli fəaliyyətinin təşkili ilə bağlı müvafiq tapşırıq və tövsiyələrini verib.
Görüşdən sonra nazir Anar Kərimov Cəlilabad rayon Mədəniyyət Mərkəzi nəzdində fəaliyyət göstərən Xalq teatrının tamaşasını izləyib.
Ulyanovskda Müslüm Maqomayevin 80 illiyinə həsr olunmuş təntənəli yaradıcılıq gecəsi təşkil edilib
Rusiyanın Ulyanovsk şəhərində Azərbaycanın əfsanəvi sənətkarı, dünyaşöhrətli bəstəkar-müğənni Müslüm Maqomayevin anadan olmasının 80 illiyi münasibətilə təntənəli yaradıcılıq gecəsi keçirilib.
“Ədəbiyyat və incəsənət” portalı xəbər verir ki, Diasporla İş üzrə Dövlət Komitəsindən AzərTAC-a bildirilib ki, “Qubernatorski” Mədəniyyət Sarayında baş tutan tədbir “Ulyanovsk Regional Azərbaycan Milli-Mədəni Muxtariyyəti” (URAMMM) ictimai təşkilatının təşəbbüsü və vilayətin İncəsənət və Mədəniyyət Siyasəti Nazirliyinin dəstəyi ilə gerçəkləşdirilib.
Tədbirdə vilayət administrasiyasının, hökumətin, Azərbaycan diasporunun və yerli ictimaiyyətin nümayəndələri iştirak ediblər.
Konsertdən əvvəl vilayətin vitse-qubernatoru Aleksandr Korobko, incəsənət və mədəniyyət siyasəti naziri Yevgeniya Sidorova, “Ulyanovsk Regional Azərbaycan Milli-Mədəni Muxtariyyəti” ictimai təşkilatının sədri İslam Hüseynov çıxış edərək, Müslüm Maqomayevin iki ölkənin musiqi mədəniyyətinin inkişafına misilsiz xidmətlər göstərdiyindən, öz bənzərsiz səsi, ölməz yaradıcılığı ilə hər zaman milyonlarla tamaşaçıya gözəl anlar bəxş etməsindən danışıblar.
URAMMM sədri İslam Hüseynov tədbirin yüksək səviyyədə təşkilinə və bütövlükdə milli icmaların fəaliyyətinə göstərdikləri dəstəyə görə Azərbaycan diasporunun adından vilayətin qubernatoru Aleksey Russkixə, vitse-qubernator Aleksandr Korobkoya və nazir Yevgeniya Sidorovaya minnətdarlığını bildirib: “Ulyanovsk azərbaycanlıları fəxr edirlər ki, belə gecələrin ənənəsinə uzun illər əvvəl başlayıblar. Zaman keçdikcə belə tədbirlər regionun mədəni həyatının ayrılmaz hissəsinə çevrilib. Azərbaycan xalqının görkəmli oğlunun yaradıcılığı bu gün də xatırlanır, sevilir. Bizimlə birlikdə Müslüm Maqomayevin xatirəsini və onun ən zəngin mədəni irsini ehtiramla yad edən bütün tamaşaçılara təşəkkür edirik”.
Konsert “Derjava” Ulyanovsk dövlət nəfəsli alətlər orkestrinin ifasında görkəmli Azərbaycan bəstəkarı Fikrət Əmirovun “Azərbaycan kapriççiosu” əsərinin səsləndirilməsi ilə başlayıb. Sonra “Bolşoy Teatr”ın və Perm Akademik Opera və Balet Teatrının solisti Konstantin Suçkovun və digər müğənnilərin ifasında Müslüm Maqomayevin repertuarından mahnılar səsləndirilib. Konsert zamanı səhnədəki iri monitorda Müslüm Maqomayevin həyat və yaradıcılığını, Azərbaycandakı mədəniyyət hadisələrini, azad olunmuş torpaqlarımızda Azərbaycanın Dövlət Bayrağının dalğalandırılmasını əks etdirən fotolar nümayiş etdirilib.
Konserti orkestrin bədii rəhbəri və baş dirijoru Kiril İlyin idarə edib.
Xalq şairi Xəlil Rza Ulutürkün 90 illiyi ilə əlaqədar tədbir təşkil edilib
Bakı Şəhər Mədəniyyət Baş İdarəsinin Sabunçu rayon Mərkəzləşdirilmiş Kitabxana Sisteminin 2 nömrəli filialı 10 nömrəli peşə məktəbinin şagirdləri ilə birlikdə Xəlil Rza Ulutürkün 90 illiyi ilə əlaqədar tədbir keçirib.
“Ədəbiyyat və incəsənət” portalı xəbər verir ki, Baş İdarədən bildirilib ki, şöbə müdiri Sevinc Əliyeva şagirdlərə şairin həyat və yaradıcılığı haqqında məlumat verib.
“Azərbaycan poeziyasının orijinal ədəbi siması olan Xəlil Rza Ulutürk ədəbiyyatımızın görkəmli nümayəndəsi, filosof və mütəfəkkir şair, milli-demokratik hərəkatımızın yorulmaz mücahididir. O, Azərbaycan ədəbiyyatında türkçülük, azərbaycançılıq və istiqlalçılıq ideologiyasının ən yaxşı davamçılarından biridir. Xəlil Rza Ulutürk çoxlarından fərqli olaraq, poeziyada şəxsiyyətini, şəxsiyyətində isə poeziyasındakı amallarını gerçəkləşdirmiş şairlərdəndir. Xəlil Rza Ulutürkün yaradıcılığında azərbaycançıllıq ideası böyük yer tutur. Onun poeziyalarının kökü vətən eşqi, torpaq ilə bağlıdır. Şair xalqın milli mübarizəsində göstərdiyi xüsusi xidmətlərinə görə “İstiqlal” ordeni ilə mükafatlandırılıb. Xəlil Rza Ulutürk 1994-cü ildə vəfat edib və Fəxri xiyabanda dəfn edilib”, - deyə şöbə müdiri bildirib.
Müğənni Tünzalə ad günündə xəyanətə uğramasından danışdı
Ən çox oxunan xəbər: Xalq artisti Tünzalə Ağayevanın 46 yaşı tamam oldu və bu münasibətlə o, şəxsi həyatı ilə bağlı gizlinləri açdı.
“Ədəbiyyat və incəsənət” axşam.az-a istinadən xəbər verir ki, ifaçı "Səhərin səsi" proqramında olarkən yaşla bağlı insanlarda yaranan tərəddütlərə aydınlıq gətirib:
"İnsanlarda rəqəmə ilişib qalmaq var. Deyirlər, 40 yaşım var, indi nə edəcəyəm? Həyat 40 yaşından sonra başlayır".
Şəxsi həyatı ilə bağlı maraqlı açıqlamalar verən müğənni xəyanətə uğradığını etiraf edib:
Xəyanəti bağışlamaram. Hamı kimi. Xəyanətini gördüyüm insanı dərhal kəsib atıram. İzahat belə vermədən. Mən də xəyanətə uğramışam. Başımı yastığa rahat qoyuram. Çünki kimsəyə xəyanət etməmişəm. Məndən istifadə edənlər həyatımda yoxdur".
Bir gecəyə 150 min dollar qazanacaq
Türkiyəli müğənni Hadisə Yeni ildə Kiprdə konsert verəcək.
Türkiyə mediasının yazdığına görə, sənətçi bunun müqabilində 150 min dollar (təxminən 255 min manat) məvacib alacaq.
Günün fotosu: İki mənfur rejim bir-birinə kömək edir
Günün fotosu: İki mənfur rejim bir-birinə kömək edir
Söhbət Rusiyadan və İrandan gedir. Rəsmi Vaşinqton bir daha dəlil sübutlar gətirib ki, İran anneksiya olunmuş Krımın ərazisindən Ukraynaya dronlar buraxır.
Foto: Euronews
Görəsən sevmək günahdırmı? - Habil Yaşardan kəlamlar
“Ədəbiyyat və incəsənət” portalı istedadlı gənc yazar Habil Yaşarın tezliklə işıq üzü görəcək “Yeddinci ayın yeddisi” romanından seçmə kəlamları oxucularının diqqətinə çatdırır.
Nifrət etdiyin hər zaman biri olacaq, amma birinə görə hər kəsə nifrət edə bilməzsən
Bütün insanlar yalançı olmasa da, bütün yalanlar insana məxsusdur
Şahidi Tanrı olanın, tanrısı Sevgi olsa gərək
Sevirəm! Görəsən gunahmı edirəm? Ya günah etdiyimi bilə-bilə görəsən niyə sevirəm?
Sevgi zamana bənzəyir: Gəldisə saxlaya, getdisə qaytara bilməzsən
Günün fotosu: Mosulda 2700 yaşlı qaya rəsmləri aşkarlanıb
Günün fotosu: Mosulda 2700 yaşlı qaya rəsmləri aşkarlanıb
İrakın Mosul şəhərində arxeoloqlar 2700 yaşı olan qaya rəsmləri aşkar etmişlər.
Foto: Euronews
Bəhram Bağırzadə: “İndi yas məclislərinin də Hacı sponsoru olur”
“Bir dəfə yas məclisində idim. Molla xanım mikrofonu götürdü ki, bugünki yasın, mərhumə xanımın məclisinin sponsoru filankəs hacıdır. Elə çıxdı ki, filan hacı oturub başda, məclisin tədarükünü görüb. Atam ağlıma gəldi, hönkür-hönkür ağladım. O vaxt Bakıda mağar qurulmasına icazə verilmirdi. Cümə axşamları olanda atam gedirdi, nəyə gücü çatır yasda süfrənin altına qoyurdu, gəlirdi. Heç kim bilmirdi: nə xanımı, nə uşağı utanırdı. İndi restoranda oturanda biri kənardan qışqırır: Bəhram müəllim, durarsınız, qonağımsız. Bütün hamı bilir ki, hesabı ödəyib. Mədəni insan susmalıdır, yola verməlisən".
“Ədəbiyyat və incəsənət” axşam.az-a istinadən xəbər verir ki, bu sözləri Əməkdar artist Bəhram Bağırzadə "Astar" YouTube layihəsində deyib. Aktyor bildirib ki, yas məclisinə də sponsorluq edirlər.
Bağırzadə qazanc yerini açıqlayıb. O, restoranı olması haqda suala belə cavab verib:
"Yeni filmlərə çəkilirəm ki, ailəmi dolandırım. Pul üçün yola verirəm, reklamlardan qazanıram. Bir də ağlım var. Şirkətlər dəvət edir, onlar üçün layihə yazıram. Restoranım yoxdur, sinif yoldaşımın məkanıdır. reklam edir, pul qazanıram".
Opera və Balet Teatrında “Kənd namusu” operasının tamaşası nümayiş olunub
Azərbaycan Dövlət Akademik Opera və Balet Teatrında italyan bəstəkarı Pyetro Maskaninin “Kənd namusu” operasının tamaşası keçirilib.
Teatrın mətbuat xidmətindən “Ədəbiyyat və incəsənət” portalına bildirilib ki, tamaşada əsas rolları Xalq artisti Fidan Hacıyeva (Santutsa), Əməkdar artistlər Ramil Qasımov (Turiddu), Səbinə Vahabzadə (Lüçiya), aparıcı solistlər Nina Makarova (Lola) və Taleh Yahyayev (Alfio) ifa ediblər.
Opera tamaşasında Əməkdar incəsənət xadimi Sevil Hacıyevanın rəhbərliyi altında xor kollektivinin və Azərbaycanın Xalq artisti, professor Yalçın Adıgözəlovun idarə etdiyi simfonik orkestrin professional ifaları xüsusilə diqqəti cəlb edib.
Xronometrajı 1 saat 50 dəqiqə olan səhnə əsərinin əsas qəhrəmanları - öz məhəbbətinə hədsiz dərəcədə sədaqətli olan Santutsa, yüngül xasiyyətli, şıltaq Lola, ehtiraslı Turiddu və öz rəqibindən amansız qisas alan Alfiodur. Operanın İtaliya xalq mahnılarının əsasında qələmə alınmış musiqisi, əsərin kəskin süjet xəttinə uyğun olub, qəhrəmanların xarakterinin daha aydın şəkildə açılmasına yardım edir.
Anşlaqla baş tutan tamaşa boyu tamaşaçılar solistlərin ifalarını alqışlarla qarşılayıblar.
Qeyd edək ki, “Kənd namusu“ operasının ilk tamaşası 1890-cı ildə Romanın “Konstants” teatrında keçirilib. Bu opera son dərəcə gözəl musiqisi və kəskin dramatik süjeti ilə fərqlənir. Opera Maskani yaradıcılığının ən uğurlu əsərlərindən biri hesab edilir və bu günə kimi bir çox dünya teatrlarının repertuarını bəzəyir.
Azərbaycan Dövlət Akademik Opera və Balet Teatrında “ Kənd namusu “ operası 2015-ci ildə almaniyalı rejissor Lüdviq Bauman və dirijor Korneliya fon Kerssenbrok tərəfindən səhnəyə qoyulmuş və repertuara daxil edilib.
