Super User
Bu gün görkəmli rejissor Tofiq Tağızadənin 104 illiyidir
Azərbaycan kino tarixində qızıl lentlər sırasında qərar tutan iki film də var, “Uzaq sahillərdə” və “Yeddi oğul istərəm”. Bu gün o filmlərə təkrarən baxmağın yeri var.
Bu gün Azərbaycan kino sənətinin inkişafında böyük xidmətləri olan, adı çəkiləndə gözlərimiz qarşısında sevə-sevə seyr etdiyimiz bir çox filmlərdən maraqlı epizodlar canlanan rejissor, Xalq artisti Tofiq Tağızadənin anadan olmasından 104 il ötür.
O, 1919-cu ildə Bakı şəhərində anadan olub. Moskvada Ümumittifaq Dövlət Kinematoqrafiya İnstitutunun kinorejissorluq fakültəsini bitirdikdən sonra C.Cabbarlı adına “Azərbaycanfilm” Kinostudiyasında fəaliyyətə başlayan Tofiq Tağızadə milli kino tarixinin yeni səhifələrini yazıb.
Ömrünün 40 ilə yaxın dövrünü kinoda keçirən Tofiq Tağızadə çəkdiyi filmlərdə özünü professional rejissor kimi təsdiq etməyi bacarıb. Onun ekran əsərləri Azərbaycan kinosunun ən nadir nümunələridir. Bu filmlərin əksəriyyətinin tarixi yarım əsrdən artıq bir dövrü əhatə etsə də, mövzu və ideya baxımından bu gün da aktuallığını qoruyub saxlayır.
Görkəmli rejissorun ərsəyə gətirdiyi “Görüş”, “Uzaq sahillərdə”, “Əsl dost”, “Mateo Falkone”, “Mən rəqs edəcəyəm”, “Arşın mal alan”, “Mən ki, gözəl deyildim”, “Yeddi oğul istərəm”, “Qızıl qaz”, “Dədə Qorqud”, “Babamın babasının babası”, “Bağ mövsümü” və digər kinofilmləri onun yaradıcılığında əsas yeri tutur. Bu filmlərdə Azərbaycanın tarixi, mədəniyyəti, məişəti çox böyük sənətkarlıqla öz əksini tapıb. Onun Azərbaycanın kino tarixinə qızıl hərflərlə yazılmış filmləri bu gün də əsl məktəbdir. Bu ekran əsərlərindən çox şey öyrənmək, əxz etmək mümkündür.
Tofiq Tağızadə hər birimizin yaddaşımızda zamanın problemlərini ekrana gətirən və insanları bu aktual məsələlər ətrafında düşünməyə sövq edən görkəmli rejissor kimi qalıb. Rejissorun daxili dünyası onun filmlərində əksini tapır. Hər bir filmində onun böyük bir insan və şəxsiyyət kimi dəyərləri görünür. O, tamaşaçı ilə açıq mükaliməyə girir, onun daxili “mən”ini özü ilə üzbəüz qoyur.
Yazının əvvəlindəki qeydimizə qayıdaq: Rejissorun İmran Qasımov və Həsən Seyidbəylinin ssenarisi əsasında çəkdiyi məşhur “Uzaq sahillərdə” filmi bütün zamanlarda Azərbaycan tamaşaçılarının sevə-sevə baxdıqları ekran əsəridir. Rejissorun yaratdığı Mixaylo obrazı bu gün də tamaşaçılar tərəfindən sevilir. Bu ekran əsəri 1959-cu ildə Kiyevdə Ümumittifaq Kinofestivalında diploma layiq görülüb, dahi bəstəkar Qara Qarayevə isə filmin musiqisinə görə kinofestivalın ikinci mükafatı verilib.
Tofiq Tağızadə kinorejissor olmaqla yanaşı, bir çox filmlərdə rol alıb, həmçinin uzun illər respublikamızda kino işinin təşkilində və milli kadrların hazırlanmasında da əvəzsiz xidmət göstərib.
Azərbaycan kino sənətinin görkəmli nümayəndəsi Tofiq Tağızadə ömrünün son illərində xüsusi studiya da yaradıb. Lakin amansız əcəl onun işlərini yarımçıq qoydu. Tofiq Tağızadə 1998-ci il avqustun 27-də dünyasını dəyişib.
Qeyd edək ki, Azərbaycanın görkəmli kino rejissoru, Əməkdar incəsənət xadimi, Xalq artisti Tofiq Tağızadənin anadan olmasının 100 illiyi ölkə başçısının müvafiq Sərəncamı ilə silsilə tədbirlərlə qeyd edilib.
Ruhu şad olsun!
Şəkildə: Tofiq Tağızadə (solda) çəkiliş zamanı.
“Ədəbiyyat və incəsənət”
(07.02.2023)
Anar sədaqəti
Ülviyyə Hrydərova yazır
Rüstəm İbrahimbəyovun doğum günü ilə bağlı məzarını zirarət etdim. Düzü, heç kimə xüsusi dəvət gəlməmişdi. Yəni kim istəyirdi gedə bilərdi. Birinci Fəxri Xiyabanın darvazasından içəri girəndə gördüm uzaqdan Xalq yazıçısı Anar ağır addımlarla dostu Rüstəm müəllimin məzarından ayrılıb əlində bir dəstə güllə daha bir yaxın dostu Vaqif Səmədoğlunun uyuduğu məzara doğru gedir. Yanında heç kim yox idi. Mənzərə məni o qədər duyğulandırdı. Onu heç vaxt unutmaram. Anar müəllimə yaxınlaşa da bilərdim. Amma narahat etmək istəmədim. Eləcə ayaq saxlayıb uzaqdan baxdım. Anar müəllimin dostluğu da bir nümunədir. Fəxri Xiyabandan çıxanda gördüm Ramiz Həsənoğlu maşınını parkovka edir. Buna əbədi, əzəli dostluq deyilir. Anar müəllimə, Ramiz müəllimə can sağlığı arzulayıram! Rüstəm müəllimə, Vaqif müəllimə Uca Tanrıdan rəhmət diləyirəm. Nur içində yatsınlar!
“Ədəbiyyat və incəsənət”
(07.02.2023)
Ülviyyə Heydərova: “Əminəm ki, bu gün ustadımın da ruhu şad oldu”
Kino Məktəbinin tələbələrinə ötən gün diplomlar təqdim olundu
Xalq yazıçısı Rüstəm İbrahimbəyovun ad günündə Azərbaycan Kinematoqrafçılar İttifaqı (AKİ) Kino Məktəbinin təntənəli buraxılış gecəsi keçirilib.
13 tələbəyə (rejissor, ssenarist, animasiya rejissoru kursları üzrə) diplomlar təqdim olunub.
Diplomları Azərbaycan Kinematoqrafçılar İttifaqın sədri Rasim Balayev, Xalq yazıçısı Anar, Əməkdar incəsənət xadimi Firəngiz Qurbanova, Məktəbin rəhbəri Oleq Səfərəliyev təqdim ediblər.
Ssenarist Ülviyyə Heydərova “Ədəbiyyat və incəsənət”lə sevincini belə bölüşüb: “Azərbaycan Kinematoqrafçılar İttifaqının Rüstəm İbrahimbəyovun Bakı Kino Məktəbində bu gün buraxılış gecəsi oldu. Ötən il elə ustadın iştirakı ilə təntənəli gecə olacaqdı. Amma qismət olmadı. Bu gün Rüstəm müəllimin doğum günündə Azərbaycan Kinematoqrafçılar İttifaqı gecə təşkil elədi. Kino Məktəbinin 13 tələbəsinə diplomlar təqdim olundu. Nə xoşbəxt mənə ki Rüstəm İbrahimbəyovun Bakı Kino Məktəbində "Kinodramaturgiya" ixtisası üzrə elə ustad Rüstəm İbrahimbəyovun özündən dərs almışam. Bu gün təntənəli gecədə ssenaristlərə diplomu elə Rüstəm müəllimin dostu, silahdaşı Xalq yazıçısı Anar təqdim elədi. Tarixi günü, həyatımda unudulmaz günlərdən birini yaşadım bu gün. İstəyirəm sizinlə bölüşəm. Əminəm ki, bu gün ustadımın da ruhu şad oldu.”
“Ədəbiyyat və incəsənət”
(07.02.2023)
Bu gün Xalq artisti Şövkət Ələkbərovanın anım günüdür
Bu gün görkəmli müğənni, Xalq artisti Şövkət Ələkbərovanın anım günüdür. Mərhum müğənninin vəfatından 30 il keçir.
1922-ci il oktyabrın 20-də Bakıda dünyaya gələn unudulmaz sənətkar Asəf Zeynallı adına Musiqi Məktəbində Hüseynqulu Sarabskinin sinfini bitirdikdən sonra səhnə yaradıcılığına başlayıb.
1938-1945-ci illərdə Azərbaycan Dövlət Mahnı və Rəqs Ansamblında solist kimi çalışan sənətkar, sonralar M.Maqomayev adına Azərbaycan Dövlət Filarmoniyasının solisti olub. Şövkət Ələkbərovanın ifaçılığı üçün yüksək vokal mədəniyyəti, emosionallıq və lirizm, muğam yaradıcılığı üçün isə məharətli improvizasiya bacarığı səciyyəvi idi.
Üzeyir Hacıbəyli, Səid Rüstəmov, Bülbül kimi sənətkarların diqqətini çəkərək onların xeyir-duasına alan Ş.Ələkbərova ömrünün sonunadək ifası ilə özünü sübut etməklə yanaşı, sənətə əsl sənətkar kimi xidmət göstərib. Onun “Qarabağ şikəstəsi”ni məlahətli səsi ilə mükəmməl səviyyədə ifa etməsi peşəkar musiqi sənətinə gəlişinin əsasını qoydu. Şövkət Ələkbərovanın ifasında səslənən xalq mahnıları, muğamlar, bəstəkar mahnıları Azərbaycanda çox böyük məşhurluq qazandı.
Dünyanın bir çox şəhərlərində uğurla çıxış edən Şövkət Ələkbərovanın repertuarına “Segah”, “Qatar”, “Şahnaz” kimi muğamlar, Azərbaycan bəstəkarlarının və Orta Şərq xalqlarının mahnıları daxil idi. Şövkət xanım haqqında bir çox bəstəkarlarımız, o cümlədən Tofiq Quliyev, Arif Məlikov, Cahangir Cahangirov, Ramiz Mirişli və başqaları öz xatirələrini bölüşüblər. Bu sənət adamlarının dediklərində bir ümumi xətt var. O da Şövkət xanımı əsl professional kimi xarakterizə etməkdir. Burada ümumi bir fikirlə də rastlaşırıq: “Şövkət Ələkbərova istər xalq lirik mahnılarının, istərsə də bəstəkarlarımızın yaratdıqları lirik mahnıların bənzərsiz ifaçısıdır”.
“Dərələr”, “Ağ çiçəyim”, “Bir könül sındırmışam”, “Gedək üzü küləyə”, “Ağlaya-ağlaya”, “Haradasan”, “Məhəbbət”, “Tez gəl”, “Süsən sünbül”, “Dəli Ceyran”, “Ay qadası”, “Yar gəldi”, “Kürdün gözəli”, “Ceyran” və digər onlarla mahnı böyük sənətkarın ifasında möhürlənib. Şövkət xanımın repertuarında olan mahnılarda söz, musiqi və ifa bir-birini tamamlayaraq, vəhdət təşkil edib. Elə buna görə də, müğənninin ifa etdiyi mahnılar ilk ifadan dinləyicilərin ürəklərinə yol taparaq yaddaşlarda dərin iz buraxıb. Onun konsertlərində iştirak edən insanlar etiraf edirlər ki, Şövkət Ələkbərovanın mahnıları dillər əzbəri olduğundan tamaşaçıların dodaqlarının tərpənməsini müşahidə etməmək mümkünsüz idi.
Hələ də onun ifa etdiyi mahnılar ürəklərə yol taparaq yaddaşlarda əbədi həkk olunmaqadır. Şövkət Ələkbərova o nadir şəxsiyyətlərdəndir ki, sağlığında özü haqqında xoş təəssürat, dünyasını dəyişəndən sonra isə xoş xatirələr qoyub. Bu isə insanın fəxr etdiyi ən yüksək zirvədir.
Bu gün bənzərsiz ifaları ilə könülləri fəth edən Şövkət Ələkbərovanın möhürünü qoyduğu mahnılar tələbələrinin, tanınmış və gənc sənətçilərin ifasında yenidən səslənir. Onun ifasında dinlədiyimiz hər bir nəğmə harada səslənməsindən asılı olmayaraq bu böyük sənətkarı xatırladır.
Musiqidə belə bir məqam var ki, xalq tərəfindən sevilən mahnılar zaman keçdikcə xalq mahnıları kimi qəbul olunur. Sözsüz ki, belə mahnıları yaradan sənətkarlar üçün bu, böyük xoşbəxtlikdir. Şövkət xanımın ifa etdiyi mahnılar məhz bu qəbildən idi. Onun mahnıları səsləndikcə Şövkət xanımı da yaşadacaq.
Ruhu şad olsun!
“Ədəbiyyat və incəsənət”
(07.02.2023)
Türkiyədə tarixi Qaziantep qalası zəlzələ nəticəsində dağılıb
APA “CNN Türk”ə istinadən xəbər verir ki, ötən gün səhər saatlarında Türkiyənin Kahramanmaraş vilayətində baş verən zəlzələ ümumilikdə 10 şəhərə təsir edib.
Eyni zamanda, zəlzələ nəticəsində tarixi Qaziantep qalası da dağılıb.
“Ədəbiyyat və incəsənət”
(07.02.2023)
Məşhur aktrisanın ailəsi dağıntılar altında qaldı: “Nənəm və bibim binada qalıb”
Təbii ki, bu günlərdə ən çox oxunan xəbərlər qardaş Türkiyədə baş vermiş zəlzələ ilə bağlı xəbərlərdir. Kahramanmaraşda baş verən zəlzələdə nənəsi və bibisi dağıntılar altında qalan aktrisa Melisa Aslı Pamuk sosial media hesabından kömək istəyib.
“Ədəbiyyat və incəsənət” azxeber.com-a istinadən xəbər verir ki, Türkiyədə baş verən güclü zəlzələdən sonra 6.4 maqnitudalı afterşok qeydə alınıb.
Təxminən 30 saniyə davam edən və bir çox vilayətdə hiss edilən zəlzələdə bir çox bina dağıldığı halda, dağıntılar altında qalan vətəndaşların xilas edilməsi işləri davam edir. Aktrisa Melisa Aslı Pamuk bibisi və nənəsinin zəlzələdə qapalı qaldığını bildirib.
Tvitter hesabında ailəsinin zəlzələdən sonra binada qapalı qaldığını deyən Melisa Aslı Pamuk, "Nənəm yeriyə bilmir, xəstədir. Bibimlə birlikdə binada qapalı qalıblar. Mənzildə vəziyyət necədir bilmirik", - deyə o paylaşımında qeyd edib.
“Ədəbiyyat və incəsənət”
(07.02.2023)
“Özünü aldaltmaq, özünə yalan satmaq — bunlar sevginin xarakterik xüsusiyyətləridir”
Unudulmayan sevgi romanları, “Qırmızı ləçəklər”, Varis
Sevən sevdiyinin fiziki görünüşünə, daxili aləminə, xasiyyətinə o qədər valeh olur ki, mövcud qüsurları sadəcə görmək istəmir. Bunu psixoloqlar "Çəhrayı eynək effekti" adlandırırlar. "Çəhrayı eynək" yalnız gözəllikləri, müsbət keyfiyyətləri göstərməyə aiddir, mənfiliklər, eybəcərliklər heç cür onun görmə əhatəsinə düşə bilmir.
Hətta sevən sevdiyinin qarşılıqlı sevgisinə tuş gəlsə belə, açıq-aşkar hislərin birtərəfli olduğunu görəndə belə özünü aldadır, sevdiyinin münasibətinə "sevmir" kimi yox, "xasiyyəti belədir, bir az soyuqdur, sevgisini izhar etməkdə çətinlik çəkir" şəklində izah verməklə özünü ovudur.
Özünü aldaltmaq, özünə yalan satmaq — bunlar da sevginin xarakterik xüsusiyyətləridir.
"Çəhrayı eynəyi" yaxşılıq etmək naminə dartıb sevənin gözündən çıxarmaq lazımdırmı? Bax bu, bütün zamanların ən mübahisə doğuran məsələsidir. Çünki sual oluna bilər ki, sənin yaxşılığına yaxşılıq etmək istədiyinin çoxmu ehtiyacı var?
“Ədəbiyyat və incəsənət”
(07.02.2023)
Mədəniyyət Nazirliyinin “Düşün və yarat” rəsm müsabiqəsi davam edir
Mədəniyyət Nazirliyi, Elm və Təhsil Nazirliyi, “Azərbaycan Televiziya və Radio Verilişləri” Qapalı Səhmdar Cəmiyyəti, Xətai Rayon İcra Hakimiyyəti, Azərbaycan Rəssamlar İttifaqı, Azərbaycan Dövlət Rəsm Qalereyası və Xətai Sənət Mərkəzinin təşkilatçılığı ilə “Düşün və yarat” adlı yaradıcılıq müsabiqəsi davam edir.
“Heydər Əliyev İli” çərçivəsində reallaşan müsabiqə düşüncənin inkişaf etdirilməsi məqsədilə keçirilir. Müsabiqədə iştirak etmək istəyənlər Bakı Xətai Sənət Mərkəzinin feysbuk qrupuna daxil olmaqla (https://www.facebook.com/groups/144172178999749/?ref=share) əsərin fotosu ilə bərabər, texnikası, materialı, adı, həmçinin müəllif adı, soyadı, təvəllüdü, təhsil aldığı məktəb və əlaqə nömrəsini yerləşdirərək qoşula bilərlər.
Müsabiqədə 12 yaşdan yuxarı hər kəs iştirak edə bilər. Ölçü və texnika sərbəstdir. İştirakçı bir və ya iki əsəri təqdim edə bilər. Əsərlər tək-tək yerləşdirilməlidir.
Müəllifin yaşı nəzərə alınmaqla ərsəyə gətirdiyi əsər əsas götürüləcək. Kənar (müəllim, valideyn) müdaxiləsiz işlərə üstünlük veriləcək.
Müsabiqədə xarici ölkə vətəndaşları da iştirak edə bilərlər. Birinci turdan keçmiş müəlliflərin əsərləri sərgidə nümayiş olunmaq üçün Xətai Sənət Mərkəzinə dəvət olunacaq.
Müsabiqəyə əsər qəbulu fevralın 15-dək nəzərdə tutulur.
“Ədəbiyyat və incəsənət”
(07.02.2023)
“Radio Sarajevo” fotokitabı təqdim olunur
Fevralın 10-da YARAT Müasir İncəsənət Mərkəzində məşhur türk fotoqraf Engin Güneysunun “Radio Sarajevo” fotokitabının təqdimatı olacaq.
Beş fəsildən ibarət fotokitab, keçmiş Yuqoslaviyadan tutmuş indiki Bosniyaya qədər dövrü – “Sarayevo-1984 Qış Olimpiyadası”, “Bosniya müharibəsi”, “Srebrenitsa qətliamı”, “Duje Reabilitasiya Mərkəzi”, “müasir Bosniya” dövrlərini əhatə edir.
Tədbirdə fotokitabın yaranma tarixindən, əsərlərin arxasında dayanan hekayələrdən və fotoqrafın təcrübəsindən bəhs ediləcək.
Engin Güneysunun fotoəsərləri bir çox müsabiqələrdə mükafatlara layiq görülüb, onların arasında Türkiyədə keçirilən beynəlxalq “National Geographic” yarışmasında ikinci yerə çıxıb. Onun fotoşəkilləri 2011-ci ildə açılan Türkiyənin Fotoqrafiya Muzeyinin daimi kolleksiyasına daxil edilib.
Hazırda müxtəlif jurnallarda fotoredaktor kimi fəaliyyət göstərir. O, "Radio Sarajevo" fotokitabı layihəsinə 2012-ci ildə start verib.
“Ədəbiyyat və incəsənət”
(07.02.2023)
“Azərbaycan teatr sənətində fövqəladə vəziyyət elan olunmalıdır...” – Fuad Poladov
Bəzən jurnalist müsahibindən söz ala bilmir. Necə edəsən ki, müsahibin danışsın? “Ədəbiyyat və incəsənət” portalı tanınmış tənqidçi Əsəd Cahangirlə “Ustad dərsləri” rubrikasını təqdim edir. Burada Əsəd Cahangirin müxtəlif illərdə götürdüyü ən maraqlı müsahibələr tarixi ardıcıllıqla təqdim olunur.
Xalq artisti Fuad Poladovdan 23.05.1998-ci il tarixində götürülmüş müsahibə.
May ayının 24-də görkəmli aktyorumuz, Xalq artisti Fuad Poladovun 50 yaşı tamam olur. Bu münasibətlə Fuad bəyi təbrik edir, ona sənətdə və şəxsi həyatında uğurlar diləyirik.
-Fuad bəy, artıq on ildir ki, Rus Dram Teatrının səhnəsindəsiniz. Ömrünüzün iyirmi ilini həsr etdiyiniz Milli teatr üçün darıxmırsınızmı?
-Darıxıram, amma hələ ki fəaliyyətimi bu teatrda davam etdirməliyəm. Burada işləmək məni qane edir. Əlbəttə, öz doğma dilində obraz yaratmaq tamam başqa şeydir. Amma aktyor üçün dil gərək maneəyə çevrilməsin.
-Necə fikirləşirsiniz, Rus Dram Teatrının səhnəsində bir aktyor kimi boy artımınız olubmu?
-Şübhəsiz ki, mən burada daha samballı dramaturji materialla işləmişəm: Çexov, Bernard Şou, Hüseyn Cavid, Artur Miller… Hər bir aktyorun arzusudur ki, Çexov dramaturgiyası ilə yaradıcılıq əlaqəsində olsun. Mən onun iki obrazını yaratmışam: “Albalı bağı”nda Lopaxini, “Qu quşunun nəğməsi”ndə Svetlovidovu.
-Siz təxminən 25-30 il əvvəl İlyas Əfəndiyevin “Mahnı dağlarda qaldı” pyesində çeçen əsgəri Rəhman surətini yaradanda həmin tamaşada baş rolları oynayan Həsən Turabov və Amaliya Pənahova kimi aktyorlarla müqayisədə ikinci dərəcəli rollar oynayırdınız. Bu gün isə hamını geridə qoyaraq, birinci dərəcəli teatr aktyoru imici yaratmısınız. Buna necə nail oldunuz?
-Əvvəla, mən o fikirdə deyiləm ki, o vaxtlar ikinci dərəcəli aktyor olmuşam. Sadəcə, onda teatra təzə gəlmişdim. Adlarını çəkdiyiniz aktyorlar isə təxminən on illik səhnə təcrübəsi olan, püxtələşmiş sənətkarlar idi. “Mahnı dağlarda qaldı”dan əvvəl mən İlyas Əfəndiyevin “Məhv olmuş gündəliklər”ində Savalan obrazını yaratmışam.
-Deyilənə görə, bu tamaşa dörd aktyorun debütü olub...
-Yox, iki aktyorun – Vəfa Fətullayevanın və mənim.
-Vəfa xanımla siz uzun illər səhnədə yöndaş olmusunuz. Bu, şəxsi münasibətlərdən irəli gəlirdi?
-Biz teatra eyni vaxtda gəlmişik. Eyni nəslə mənsub aktyorlar idik. “Məhv olmuş gündəliklər” və “Mahnı dağlarda qaldı” tamaşalarından başqa biz onunla Şekspirin “Heç nədən hay-küy”, Mirzə İbrahimovun “Kəndçi qızı” pyeslərində, Mehdi Hüseynin “Alov”, İlyas Əfəndiyevin “Atayevlər ailəsi”ndə televiziya tamaşalarında da birlikdə çıxış etmişik.
-Teatr tənqidçiləri sizin ifanızı özünü dərk etmiş ruhun oyunları hesab edir. Bu fikrə münasibətiniz necədir?
-Qoy, bu suala həssa tamaşaçı və qərəzsiz tənqidçilər cavab versinlər.
-Heç sizi qərəzli tənqid ediblər?
-Bunu deyə bilmərəm. Bir də ki ən böyük tənqidçi mən özüməm. Elə işlərim olub ki, tərifləyiblər, amma özüm bəyənməmişəm. Bəzən də olub ki, tənqid olunan işlərimdən özüm razı qalmışam.
-Ölümdən sonrakı həyata inanırsınız?
-Yox, amma elə əziz adamlar var ki, onların fiziki yoxluğunu heç cür qəbul edə bilmirəm.
-Aktyor daim öz içini araşdırır. Bu zaman içinizdən elə şeylər çıxırmı ki, özünüzə də qəribə gəlsin.
-Bu, mürəkkəb obrazlar üzərində iş zamanı baş verir. Ona görə, həmişə Dostoyevski və ya Bulqakovun əsərlərində oynamaq istəmişəm.
-Əksər aktyorlar 50 yaşdan sonra yerində saymağa başlayırlar. Belə bir təhlükə Fuad Poladovu gözləyirmi?
-Aktyorluq sonsuz sənətdir. Əgər siz dediyiniz kimi aktyor öz içini araşdırmaqla məşğuldursa və insanın daxili dünyası sonsuzdursa, deməli, aktyorluq sənətinin də sonu yoxdur. Əgər kimsə 50 yaşdan sonra tükənirsə, deməli, o çox dayaz adamdır və onun halına acımaq lazımdır. 50 yaş əsil aktyor üçün çiçəklənmə dövrüdür.
-Xarakteriniz bir aktyor kimi yüksəlişinizə mane olmayıb ki?
-Çox mane olub. Xarakter varsa, demək, insana mane olmalıdır.
-Sizi yenidən Milli Teatra dəvət etsələr, bu təklifi qəbul edərsinizmi?
-Mən istənilən vaxt ora qayıda bilərəm. Amma mənim oradan getməyimə səbəb olan prinsiplərin heç biri həyata keçməyib. Adama deməzlər ki, niyə getmişdin və niyə gəldin? Mən özümə qarşı çox tənqidi yanaşan adamam və Milli teatrdan getməyimi həyatım boyu qəbul etdiyim ən düzgün qərarlardan biri hesab edirəm.
-Deyirlər ki, siz 70-ci illərin Alen Delonu olmusunuz. Gənc qızlar sizə çoxlu sevgi məktubları yazırmışlar.
-(təbəssümlə) Elə indi də yazırlar. İyirmi il azərbaycandilli tamaşaçıalr yazıb, on ildir ki, rusdilli tamaşaçılar yazırlar.
-Bu məktublar şəxsi tanışlığa gətirib çıxarırmı?
-(qətiyyətlə) Əsla! Çünki mən bilirəm ki, məktub sahibləri mənim qəhrəmanlarımı sevirlər.
-Sizi həyatda sevən qadın sənətdə sevən qadınlara qısqanırmı?
-Mənim xanımım sənətimi başa düşən, bütün bunlara adi hal kimi baxmağı bacaran bir qadındır.
-Həyatınızda ən xoşbəxt gün nə vaxt olub?
-Ailə qurduğum gün. Övladlarım dünyaya gəldiyi gün.
-Övladlarınız öz atalarının yolunu davam etdirirlərmi?
-İki övladım var, oğlum Ağarəhim və qızım Fəridə. Mən gec evlənmişəm, 40 yaşımda.
-???
-(təbəssümlə)Başım sənətə qarışıb.
-Kinofilmlərə niyə az çəkilmisiniz?
-Mən özümü sırf teatr aktyoru hesab edirəm, amma son vaxtlar iki televiziya filminə çəkilmişəm. Afaq Məsudun “Cəza”sında Səid, “Mövlud Süleymanlıın “Fatehlərin divanı”nda Əmir Teymur.
-Sizdən əvvəl Teymurləng obrazını Yusif Vəliyev və Hamlet Xanızadə oynayıblar. Bu sizi narahat etmirdi ki?
-Qorxurdum ki, onları təkrar edəm. Mən onalrın hər ikisini böyük aktyor hesab edirəm. Çalışırdım ki, onlara bənzəməyəm. Deyilənlərə görə, buna nail olmuşam.
-Teatrlarımızın indiki səviyyəsi sizi qane edirmi?
-Qətiyyən! Azərbaycan teatr sənətində fövqəladə vəziyyət elan olunmalıdır. Meyarlar itib. Teatr aləmində bir kabus dolaşmaqdadır. Guya hər şey yaxşıdır, hər şey gözəldir. Bu, ən qorxulu tendensiyadır.
-Yeni nə üzərində işləyirsiniz?
-Ramiz Rövşənin ssenarisi əsasında “Ölü kimdir, diri kim?” filminə çəkilirəm. Ramiz yaxşı şairdir. Mən onun təfəkkürünə inanıram. Odur ki, filmin yaxşı alınacağına əminəm.
-50 illik yubileyinizi niyə qeyd etmədiniz?
-50 illiyimdə Bulqakovun Molyer əsərini hazırlamaq istəyirdim. Bu tamaşaya Bakı teatrlarının seçmə aktyorları cəlb olunmalı idi. Qismət olmadı. Amma yəqin ki, nə vaxtsa bu ideyanı həyata keçirəcəyəm.
-Bu tamaşa ilə nə demək istəyirdiniz?
-Teatr aləmində bir silkələnmə, bir oyanış etmək istəyirdim.
-Bu qiyamətdir ki!
-Qiyamət qopanda hamı yer üzünü tərk edir.
-Təsəvvür edin ki, sehrli xalçaya minib gələcəyə gedirsiniz. Geri dönməyəcəksiniz. Özünüzlə yalnız bir şey götürməyə icazə verirlər. Nəyi götürərdiniz?
-Mən ailə üzvlərimi götürərdim.
“Ədəbiyyat və incəsənət”
(07.02.2023)
