Super User
“Tut ağacı"nın altında "Bu dünyanı nağıl bilək"
Elman Eldaroğlu yazır
Bakını özü üçün cazibə nöqtəsi hesab edir. Yerlipərəstlikdən uzaq olsa da, onun üçün Vətən ata-baba yurdu Buzovnadan başlayır. Xatirələrində olan Bakı tamam başqadır.
“Əvvəllər yaşlı insanlar söhbət edəndə deyirdilər ki, bizim vaxtımızda Bakı elə olub, belə olub... Həmişə bunu eşidəndə gülürdüm ki, bu yalnız yaşla, həyata baxışın dəyişməsiylə bağlıdır. Amma bizim dövr, sözün əsl mənasında Bakını tam dəyişdi, keçmişlə bağlı bir çox körpülər qırıldı. Şəhərimizin bir çox əraziləri gündən-günə gözəlləşir, abadlaşır, bunları görməmək və ya görüb deməmək olmaz. Amma insanların davranışı, mədəni səviyyəsi daha yaxşını arzulamağa vadar edir. Şəhər mədəniyyətini kənd qanunlarına tabe eləmək olmaz. Şəhərdə şəhərli kimi davranmaq lazımdır. Bütün bunlar düzələnə qədər mahnılarımı içimdə qoruduğum Bakıya yazacağam yəqin.”- söyləyir.
Avtomobildə gedə-gedə radioya qulaq asmaqdan həzz alır. Bəyəndiyi ifanı tapana kimi dalğaları tez-tez dəyişir. O qədər ifasını bəyənmədiyi, qulaq asmağa səbri çatmadığı müğənnilər olur ki, vaxtının 15 dəqiqəsini mahnıları dəyişməyə sərf edir. Nəhayət klassik musiqi, caz, muğam, retro-estrada fərq etməz, əhvalına uyğun musiqi seçib dinləyir. Onun üçün Akif İslamzadə, Brilliant Dadaşova, Zeynəb Xanlarova, Nisə Qasımova, Rəşid Behbudov, Şövkət Ələkbərova, Rübabə Muradova, Sezen Aksu, Ajda Pekan, Ququş, Alla Puqaçova, Xulyo İqlesias, Dems Russos, Stinqin ifaları, ABBA qrupu və şübhəsiz ki, klassik Avropa və Azərbaycan musiqi nünələri daha önəmlidir…
Haqqında söhbət açdığım bəstəkar Aygün Səmədzadə 1967-ci ildə tanınmış iqtisadçı alim, millət vəkili, akademik Ziyad Səmədzadənin ailəsində dünyaya gəlib. 1985-ci ildə Bülbül adına Orta İxtisas Musiqi Məktəbini qızıl medalla bitirib. Elə həmin il Üzeyir Hacıbəyli adına Azərbaycan Dövlət Konservatoriyasının tarix-nəzəriyyə fakültəsinə daxil olub. Oxuduğu müddətdə qabaqcıl tələbə kimi "Üzeyir Hacıbəyov təqaüdü" alıb. 1990-cı ildə konservatoriyanı da fərqlənmə diplomu ilə bitirən Aygün xanım elə o vaxtdan da bitirdiyi elm ocağının musiqi tarixi kafedrasında müəllimlik edir.
Türk bəstəkarı Əhməd Adnan Sayqunun yaradacılığına həsr olunan elmi monoqrafiyanın və bir sıra elmi məqalənin müəllifidir. 2003-cü ildən sənətşünaslıq üzrə fəlsəfə doktorudur…
Deyir ki,- “Mən tələbələrimə də deyirəm, bizdə musiqi tənqidçisi kimi formalaşmaq çətindir. Çünki Azərbaycan mühiti, insanların bir-birinə münasibəti fərqlidir. Sağlam tənqidi çox vaxt təhqir kimi qəbul edə bilərlər və yaxud təhqir edib, onu tənqid kimi qələmə verə bilərlər. Yəni sərhədlər itib, insanlarda "üz üzdən utanar” psixologiyası daha dərindir. Heç kəs "dost”, "qardaş”, "yaxşı oğlan” münasibətində olduğu musiqiçini, zəif ifasına görə tənqid etmir. Musiqi tənqidi də elədir ki, gərək obyektiv olasan, eyni zamanda həm o musiqi mühitinin içində olmalısan, həm də sənin musiqi mühitiylə əlaqən olmamalıdır ki, onu tənqid edə biləsən. Məsələn, ixtisasca həm də musiqişünas, tənqidçiyəm, amma bu dəqiqə heç kimi tənqid eləmərəm. Əslində, deməyə sözüm çoxdur. Amma özüm də bu sahədə çalışdığım üçün mənim dediklərimi obyektiv qəbul etməyəcəklər. Bu gün Azərbaycan estradasında 90 faiz mahnıları bəyənmirəm. Ona görə yox ki, mən onlardan yaxşı yazıram, özüm haqqında yüksək fikirdəyəm. Sadəcə, mənim aldığım musiqi tərbiyəsi başqadır. İndi mən bunu hardasa desəm, deyəcəklər Aygün Səmədzadə qərəzlidir. Bir- iki dəfə olub ki, hansısa müğənniyə "sən bu mahnını oxuma, filan xalq mahnısı sənin üçün deyil”, ya da "xalq və klassik mahnılarımız da digər sənət abidələrimiz kimi toxunulmazdır, onları hər kim gəldi oxuya bilməz”- demişəm. Görürəm ki, buna görə məndən inciyiblər...”
Kiməsə ilk baxışda qapalı, özündən razı adam, eqoist kimi görünə bilər, amma çox təvazökar, daxilən zəngin insandır. Əsl xanımlara xas olan əda, davranış, mədəniyyət ona da xasdır, kübarlığı ilə seçilir. Bəstəkar kimi musiqiyə 1996-cı ildə Flora Kərimovanın ifa etdiyi, Xanım İsmayılqızının sözlərinə bəstələdiyi "Ruhumuz qovuşacaq" mahnısı ilə gəlib. 2000-ci ildə keçirilən "Yaxşıların yaxşısı" müsabiqəsində onun sevimli şairimiz Kamalə Abıyevanın sözlərinə bəstələdiyi "Məktəb illəri" mahnısı müəllifinə "ilin bəstəkarı" nominasiyasında qələbə qazandırıb. 2002-ci il isə onun üçün daha uğurlu olub. Belə ki, bu ilin fevralında keçirilən "Nəğmələrin nəğməsi" müsabiqəsində onun Zəkirə Allahverdiyevanın sözlərinə bəstələdiyi "Tut ağacı" mahnısı "Qran-Pri"yə, yenə də Kəmalə xanım Abiyevanın sözlərinə bəstələdiyi "Bu dünyanı nağıl bilək" mahnısı birinci, "Yağış" mahnısı isə ikinci yerə layiq görülüb...
Konservatoriyanı 1990-cı ildə bitirsə də, yaradıcılığa 1996-cı ildə başlayıb. Bunu da onunla əlaqələndirir ki, tələsməyib, özünü püxtələşmiş bəstəkar kimi təqdim etməyi planlaşdırıb...
“Mən peşəkar musiqi təhsili alıb, mahnılarımı tam hazır şəkildə dinləyicilərə təqdim etmək istəmişəm. Yəni aradakı 6 ili boş yerə sərf etməmişəm. Biliyimi artırmaqla, tədqiqat işləri aparmaqla məşğul olmuşam. Və nəhayət, ürəyimin istəyini üzə çıxarmışam. Mənə elə gəlir ki, yaradıcı insan üçün bu müddət elə də gec deyil. Hamı deyir ki, 20-30 ildir, sənətdədir, amma onlar bunu nə ilə sübut eləyə bilərlər? Başqaları müxtəlif işlərlə məşğul olanda, mən ali musiqi təhsili almışam, aldığım biliyi də ilk və ən çox sevdiyim "Ruhumuz qovuşacaq" adlı mahnımla ortaya qoymuşam. Düzdür, buna qədər bir sıra kiçik pyeslər yazmışam. İlk mahnımı isə Bülbül adına Musiqi məktəbinin 10-cu sinfində oxuyanda Cəfər Cabbarlının "Dan ulduzu" şerinə bəstələmişəm. Ancaq müəyyən vokal imkanları nəzərə almadığıma görə mahnını indiyə qədər heç bir müğənniyə göstərməmişəm. Yəni bu mahnı düzəlişlər ediləndən sonra oxuna bilər.”- söyləyir...
Musiqi yaranan zamandan yeddi notdan ibarət olub. Hələ indiyədək heç kim bu notların sayını artırmaq iqtidarında olmayıb. İndiyədək bəlkə də milyonlarla musiqi bəstələnib, çoxları da artıq unudulub. Amma əsl musiqi unudulmazdır, əbədidir...
Deyir ki,- “Mənim üçün notların göy qurşağında olduğu kimi hər birinin öz rəngi var. Məsələn, Do quruyan qızılgül ləçəyinin rəngindədir, Re və Sol yaşıl, Mi və Sol qəhvəyi, Fa göy, Lya sarı rəngdədir. Əgər insanın ruhu rəngarəngdirsə, demək, o, canlıdır, hərəkətlidir və yaradacaq. İlhama gəldikdə isə bu xüsusiyyət ruhun xüsusi halıdır və duyğularla, müsbət və hətta mənfi emosiyaların təzahürü ilə bağlıdır. İnsana ilham gələndə, öz potensialını tam reallaşdırmağa, fikir və səylərini konkret işlərə, əsərə çevirməyə hazırdır. İnsan bu halda-zehni və emosional vəhdətin yüksəliş məqamında dağları devirə bilər. Əksəriyyət üçün ilham qaynağı fərdi xarakter daşıyır. Amma daha dəqiq desəm, əslində bizə motivasiya verə biləcək hadisələr özləri bizi seçir və bizdən asılı heç nə yoxdur. Bu əsəri yazmaq mənim qismətimdədirsə, onun ilhamı da elə mənə gələcək. Məsələn, məşhur “Tut ağacı” kompozisiyam küskün və əsəbi bir əhvaldan sonra ərsəyə gəlib. Ümumiyyətlə, bütün əsərlər ağır və fərəhli anların, yaşadıgım hisslərin, dinlədiyim həyat hekayələrinin və sevgi tarixçilərinin, oxudugum kitabların, ən əsası isə məni əhatə edən bütün gerçəkliyin nəticəsidir. Elə məqamlar olur ki, müəyyən hadisələrin təsiri altında musiqi yazıram, gözlərimdən yaş axır və bu əsəri dinləyən insanların da göz yaşı axıtdığını görəndə heyrətlənmirəm. Bilirəm ki, içimdəki sevinci də, göz yaşını da dinləyicilərə ötürməyi bacardım, buna cəhd göstərməsəm də.”
Bəli, haqqında danışdığım əməkdar incəsənət xadimi, xalq artisti, alim, bəstəkar Aygün Səmədzadə gözəl bəstələri- musiqiləri ilə insanları düşündürməyi, kövrəltməyi, ağladıb güldürməyi bacarır. Bu, onun taleyinə yazılan ilahi qüdrət, Allahın hədiyyəsidir...
Yanvarın 11-i Aygün xanımın növbəti ad günü oldu. Ona möhkəm cansağlığı, yaradıcılıq uğurları arzulayırıq.
Arzularınız çin olsun, Aygün xanım!
“Ədəbiyyat və incəsənət”
(12.01.2023)
Bu gün vokalçımız beynəlxalq müsabiqədə çıxış edəcək
Yanvarın 12-dən 22-dək Moskvada vokalçıların və konsertmeysterlərin Xibla Gerzmava adına Beynəlxalq müsabiqəsi keçiriləcək. Rusiyanın Xalq artisti Xibla Gerzmavanın təşəbbüsü ilə keçirilən müsabiqəyə Rusiya Prezidenti yanında Mədəni Təşəbbüslər Fondu dəstək verir.
42 vokalçı və 16 konsertmeysterin yarışacağı müsabiqənin seçim mərhələsində Ekspert şurası 38 ölkədən daxil olmuş 800 ərizəni araşdırıb. Seçilmiş 42 vokalçı iştirakçı arasında hazırda Sankt-Peterburq Mariinski Teatrının dəvətli solisti olan soydaşımız Həmid Abdulov da var.
28 yaşlı vokalçı Bülbül adına Orta İxtisas Musiqi Məktəbinin, Sankt-Peterburq Konservatoriyasının, Yelena Obraztsovanın Beynəlxalq Musiqi Akademiyasının məzunudur.
Qeyd edək ki, müsabiqənin Ekspert şurasının üzvlərindən biri də soydaşımız Stanislavski və Nemiroviç-Dançenko adına Moskva Dövlət Akademik Musiqili Teatrının dirijoru Arif Dadaşovdur.
“Ədəbiyyat və incəsənət”
(12.01.2023)
“Fabelmanlar”ın triumfu - “Qızıl qlobus” laureatları elan olunub
Adətən yeni qədəm qoymuş ilin ən birinci mədəniyyət hadisəsi Hollivudda baş verir, orda akkreditə olunmuş Xarici Jurnalistlər Assosiasiyası ilin yekunlarına əsasən “Qızıl qlobus” mükafatı qaliblərinin adlarını açıqlayırlar. Ötən gün 2023-cü ilin laureatlarının adları açıqlanıb.
“Ədəbiyyat və incəsənət” portalı TASS-a istinadən xəbər verir ki, 80-ci mükafatlandırma mərasimi Beverli-Hilzdəki “Beverli-Hilton” otelində keçirilib. Qaliblərin adları nominasiya sıralanması ilə təqdim olunur:
“Ən yaxşı rejissor”
Stiven Spilberq (“Fabelmanlar”),
“Ən yaxşı ssenari” - Martin Makdona (“Banşi İnişerina”),
“Ən yaxşı dram filmi” - “Fabelmanlar”,
“Ən yaxşı müzikl və ya komediya” - “Banşi İnişerina”,
“Ən yaxşı dram serialı” - “Əjdahanın evi",
“Ən yaxşı komediya serialı və ya müzikl” - "Abbott ibtidai məktəbi",
“Ən yaxşı miniserial və ya telefilm - "Ağ lotus",
“Xarici dildə ən yaxşı film” -"Argentina 1985",
“Dram janrında ən yaxşı qadın və kişi rolları” - Keyt Blanşett ("Tar") və Ostin Batler ("Elvis"),
“Dram janrında ən yaxşı ikinci plan qadın və kişi aktyoru” - Anjela Bassett ("Qara pantera: Əbədi Vakanda") və Ke Hyu Kuan ("Hər yerdə və birdən"),
“Komediya və ya müziklda ən yaxşı kişi və qadın rolu” - Mişel Yeoh ("Hər yerdə və birdən") və Kolin Farrell ("Banşi İnişerina"),
“Dram serialında ən yaxşı kişi və qadın aktyoru” - Zendaya ("Eyforiya") və Kevin Kostner ("Yellouston"),
“Komediya və ya musiqili serialda ən yaxşı kişi və qadın aktyoru” - Quinta Brunson ("Abbott ibtidai məktəbi") və Ceremi Allen Uayt ("Ayı"),
“Dram və ya komediya serialında ən yaxşı ikinci plan kişi və qadın aktyoru” - Tayler Ceyms Uilyams ("Abbott ibtidai məktəbi") və Culiya Qarner ("Ozark"),
“Miniserialda ən yaxşı ikinci plan kişi və qadın aktyoru” - Cenifer Kulidc ("Ağ lotus"), Pol Volter Houser ("Qara quş"),
“Ən yaxşı cizgi filmi” - “Pinokkio Qilyermo del Toro",
“Ən yaxşı soundtrek” - Castin Hurvitz ("Babylon"),
-“Ən yaxşı mahnı” - "Naatu Naatu" ("RRR: İnqilab təhlükəsi").
“Ədəbiyyat və incəsənət”
(12.01.2023)
Cəmiyyətə gələcəyə yönəlik müsbət impulslar ötürüldü
“Azərbaycan Respublikasının Zəfər savaşından sonrakı beynəlxalq mövqeyi, iqtisadi gücü hər kəs tərəfindən birmənalı şəkildə qəbul olunur. Bu gün Azərbaycan tək regional geopolitik proseslərə deyil, həm də qlobal miqyasda siyasi proseslərə təsir etmək gücündədir. Bütün bu amillərin mərkəzində isə heç şübhəsiz mükəmməl daxili və xarici siyasət yürüdən lider amili dayanır. Məhz Prezident İlham Əliyevin şəxsi nüfuzu, diplomatik gedişləri, idarəçilik bacarığı bugünkü qüdrətli Azərbaycanı formalaşdıran əsas şərtdir. Prezident və Ali Baş Komandan kimi xalq sevgisinin mükəmməl nümunəsini göstərən İlham Əliyev bütün nəticələr və gələcək hədəflərlə bağlı mütəmadi olaraq ictimaiyyəti məlumatlandırmaqla da liderlik örnəyi sərgiləyir. Bu baxımdan ötən ilin yekunlarına və cari ilin planları ilə bağlı Prezident İlham Əliyevin yerli televiziya kanallarına müsahibəsi ictimaiyyət tərəfindən maraqla izləndi.
Müsahibədə ölkəmizin iqtisadi gücündən danışan dövlətimizin başçısı konkret rəqəmlərlə görülən və nəzərdə tutulan digər layihələr haqqında geniş hesabat verdi. Azərbaycan ərazisində həm Orta Dəhlizlə, həm də Şimal-Cənub dəhlizi ilə bağlı bütün əsas işlərin yekunlaşdığını bildirən Prezident vurğuladı ki, təkcə Şimal-Cənub nəqliyyat dəhlizi ilə Azərbaycan ərazisindən mərhələli qaydada 15 milyon tondan 30 milyon tona qədər yük daşına bilər, şübhəsiz bu, böyük rəqəmdir və Azərbaycanın bütün tranzit imkanları bunun kiçik bir faizini təşkil edir. Məhz bütün bunların fonunda Şimal-Cənub nəqliyyat dəhlizi Orta Dəhlizlə rəqabət apara biləcək layihədir.
Dövlətimizin başçısı aparılan siyasətin mərkəzində insan amilinin dayandığını, vətəndaş məmnunluğunun artırılmasının, yeni iş yerlərinin yaradılmasının prioritet təşkil etdiyini diqqətə çatdırdı. Ölkəmizdə 60 min ailənin özünüməşğulluq proqramına cəlb olunması, əhalinin sosial rifahının daim diqqətdə saxlanılması bunun sübutudur. Prezident İlham Əliyevin haqlı olaraq qeyd etdiyi kimi, Azərbaycan sosial dövlətdir və dövlət bunu fəaliyyəti ilə təsdiqləyib.
Ölkənin xarici siyasətindən danışan dövlətimizin başçısının müsahibəsi önəmli məqamlarla yadda qalmaqla yanaşı, həm də anti-Azərbaycan dairələrə ciddi xəbərdarlıq mesajı idi. Fransanın ölkəmizə qarşı qərəzli mövqeyindən söhbət açan Azərbaycan Prezidenti bildirdi ki, bu ölkənin Senatı, Milli Assambleyası ölkəmizin əleyhinə qətnamələr qəbul etdi. Bir neçə ölkəni təzyiq altında saxlamaqla, BMT-də hay-həşir qoparmaqla heç nəyə nail ola bilmədilər. Frankofoniyada olduğu kimi uğursuzluğa doğru gedirlər. Sadəcə, bəzi Qərb mətbuatında ölkəmizə qarşı çirkin qarayaxma kampaniyasına başlayıblar. Azərbaycanın Vətən müharibəsindəki parlaq Qələbəsi dostlarımızı sevindirdiyi kimi bizə düşmən kəsilən ölkələri də məyus edib. Dünyanın qəbul etdiyi Azərbaycan reallığı Fransa və digərlərində qıcıq yaradır.
Ölkə rəhbərinin bildirdiyi kimi, geriyə baxdıqda bir daha əmin oluruq ki, keçmiş Minsk qrupu, Fransa hər vəchlə münaqişənin ədalətli şəkildə həllini tapmasına maneçilik törədirdi. Azərbaycan bu işğalla barışmadı, Prezident İlham Əliyevin rəhbərliyi ilə qəhrəman Ordumuz onların bütün planlarını alt-üst etdi və bu qüdrətin qarşısında onlar Ermənistanı xilas edə bilmədilər. Ölkəmizə qarşı belə kin, küdurətin də başlıca səbəbi budur.
Ekofəalların Şuşa ərazisindən keçən Laçın-Xankəndi yolunda təşkil etdikləri etiraz aksiyasına toxunan dövlətimizin başçısı bunu “blokada” adlandırmağın insafsızlıq olduğunu qeyd edərək, tələblərin tam ədalətli olduğunu, qanunsuz istismarın dayandırılmasını tələb etdiklərini və buna nail olacaqlarını qeyd etdi.
Bununla yanaşı, təmas xəttindəki vəziyyəti şərh edən Prezident İlham Əliyevin sözlərinə görə, vizual müşahidə bizə imkanlar yaradır ki, istənilən təhlükəni əvvəlcədən görək və yerindəcə qarşısını alaq. Üç dəfə bu tipli ardıcıl şəkildə hərbi və siyasi uğursuzluğa düçar olmuş Ermənistan başa düşəcək ki, sülh müqaviləsini imzalamaq qaçılmazdır. Dövlətimizin başçısı qeyd etdi ki, bəzi ölkələr Ermənistanı silahlandırmağa çalışır və təəssüflər olsun, onların arasında Hindistan da var. Bu hücum silahlarının hədəfi Azərbaycandır və hər kəs bunu bilməlidir ki, bizimlə heç kim zarafat etməsin. Təxribatlara qarşı cavabımız həmişəki kimi sarsıdıcıdır.
Prezident İlham Əliyevin geniş və əhatəli müsahibəsi ölkə həyatı, dövlətin perspektivi istiqamətində mühüm mesajları ilə yadda qaldı. Bu mesajlar aparılan mükəmməl siyasi kursun nəticələrinin yüksək göstəricisi ilə yanaşı, gələcəyə yönəlik müsbət impulsları da cəmiyyətə ötürdü. Bu isə vətəndaş üçün dövlətə inamın başlıca şərtidir. Prezident İlham Əliyev bugünkü qüdrətli Azərbaycanın qurucusu kimi həm də böyük gələcək hədəfləri gerçəkləşdirən lider olaraq xalq sevgisinin və inamının tək ünvanıdır.”
Sitat Milli Məclisin deputatı, YAP İdarə Heyətinin üzvü Rəşad Mahmudovdan gətirilmişdir.
“Ədəbiyyat və incəsənət”
(12.01.2023)
ABŞ-da “Qədim alimlər türk xalqları haqqında” kitabı nəşr olunub
Türkologiya sahəsində zəngin akademik təcrübəsi olan, ABŞ-ın Berneli Universitetinin keçmiş qonaq professoru, bir sıra kitabların müəllifi, dünyanın nüfuzlu universitetlərində, o cümlədən Stenford və Kaliforniya universitetlərində mühazirələr oxumuş, məruzə və çıxışlar etmiş tanınmış türkoloq A.Sanduçinin “Qədim alimlər türk xalqları haqqında” kitabı ABŞ-da “World Scholarly Press” tərəfindən iki cilddə nəşr olunub.
“Türkologiya” jurnalının məsul katibi Aysel Qəriblinin mediaya açıqlamasına görə, monoqrafiya “Ön söz”, səkkiz fəsil və biblioqrafiyadan ibarətdir. “Ön söz”də “türk” etnonimi, eləcə də ən qədim dövrlərdən başlayaraq türklərin daşımış olduğu müxtəlif adlar barədə yığcam məlumat verilir. Əsərdə latın əsaslı müasir türk əlifbası beynəlxalq ingilis əlifbası ilə müqayisədə təqdim edilir. Bu da əsərdə sıx-sıx verilmiş türk sözlərinin oxucuya, xüsusilə müxtəlifdilli mütəxəssislərə mümkün qədər düzgün fonetik tərkibdə çatdırılması məqsədi daşıyır.
Çoxsaylı, çoxdilli və son dərəcə zəngin mənbələrə əsaslanmış tədqiqatçı mükəmməl elmi-metodoloji quruluşu ilə seçilən monoqrafiyasında türklər (və türkologiya) üçün artıq müəyyənləşmiş, mübahisə doğurmayan məsələlərdən bəhs etməklə yanaşı, olduqca mübahisəli, polemik problemlərə geniş yer verir.
Birinci fəsildə türklərin Bibliyaya görə tarixşünaslığı araşdırılır. İkinci fəsildə bu qədim etnosun tanrıları, ana yurdları və ilkin tayfa diferensiasiyası barədə təsəvvür yaradılır, üçüncü fəsil isə türk tayfalarının qədim əlaqələrinə, etnik inteqrasiya məsələlərinə həsr olunub.
Aysel Qəribli A.Sanduçinin zəngin linqvistik, arxeoloji, etnoqrafik və s. materialların yer aldığı “Qədim alimlər türk xalqları haqqında” əsərini türk xalqları tarixi ilə maraqlanan hər kəs üçün dəyərli töhfə hesab edir.
“Ədəbiyyat və incəsənət”
(12.01.2023)
X Qlobal Bakı Forumunun vaxtı açıqlanıb
Martın 9-11-də Azərbaycan paytaxtında növbəti beynəlxalq tədbir – X Qlobal Bakı Forumu keçiriləcək. Bu barədə Forumun təşkilatçısı olan Nizami Gəncəvi Beynəlxalq Mərkəzinin tviter səhifəsində bildirilib.
Səhifədə qeyd edilib ki, Forumun mövzusu “Dünya bu gün: çağırışlar və ümidlər” olacaq.
Qeyd edək ki, Qlobal Bakı Forumu Azərbaycan Respublikası Prezidentinin himayəsi altında və Nizami Gəncəvi Beynəlxalq Mərkəzinin təşkilatçılığı ilə 2013-cü ildən keçirilir. Forumlarda dünya gündəminin aktual mövzuları, qlobal problemlər müzakirə olunur.
2022-ci ilin iyununda keçirilən IX Qlobal Bakı Forumu “Qlobal dünya nizamına təhdidlər” mövzusuna həsr olunmuşdu. Foruma 50-dək ölkədən nümayəndə heyətləri, o cümlədən dövlət başçıları, nazirlər, sabiq prezidentlər, eləcə də beynəlxalq təşkilatların rəhbərləri və yüksəkvəzifəli şəxsləri qatılmışdı.
Xatırladaq ki, dünyanın bir sıra sabiq dövlət və hökumət başçılarının təmsil olunduğu Nizami Gəncəvi Beynəlxalq Mərkəzi 2012-ci ildə Gəncədə, dahi şairin 870 illik yubiley tədbirləri çərçivəsində təsis edilib.
“Ədəbiyyat və incəsənət”
(11.01.2023)
Prezident İsrailə ilk səfirimizi təyin etdi
M.M.Məmmədovun Azərbaycan Respublikasının İsrail Dövlətində fövqəladə və səlahiyyətli səfiri təyin edilməsi haqqında
Azərbaycan Respublikası Prezidentinin Sərəncamı
Azərbaycan Respublikası Konstitusiyasının 109-cu maddəsinin 15-ci bəndini rəhbər tutaraq qərara alıram:
Muxtar Məmməd oğlu Məmmədov Azərbaycan Respublikasının İsrail Dövlətində fövqəladə və səlahiyyətli səfiri təyin edilsin.
İlham Əliyev
Azərbaycan Respublikasının Prezidenti
Bakı şəhəri, 11 yanvar 2023-cü il
“Ədəbiyyat və incəsənət”
(11.01.2023)
İncəsənət adamı belə vəhşilik edərmi?
Ən çox oxunam xəbər çox inanılmazdır: Amerikalı məşhur müğənni Madonna afrikalı uşaqların alverində, onların cinsi istismarında, həmçinin homoseksuallığı və transseksuallığı təbliğ etməkdə ittiham olunub.
“Ədəbiyyat və incəsənət” xarici KİV-ə istinad edən oxu.az-a istinadən xəbər verir ki, "Ümumdünya Efiopiya Federasiyası"adlı xeyriyyə təşkilatı dövlət başçısı Lazarus Çakveradan sənətçi haqqında araşdırma aparmağı tələb edib.
Prosesin başlanması tələbinə səbəb müğənninin 2006-cı ildə Afrika ölkələrindən birində təsis etdiyi "Education Malawi" fondu olub. Təşkilatın işi sayəsində Avropa və ABŞ sakinləri afrikalı uşaqları övladlığa götürə biliblər.
"Uşaq alveri, cinsi istismar, cinsi köləlik, məcburiyyət, hədələr, fırıldaqçılıq, aldatma və səlahiyyətlərdən sui-istifadə ilə bağlı təhqiqat aparılana qədər Madonna və onun tərəfdaşlarının afrikalı uşaqlarla ünsiyyəti ehtiyat tədbiri olaraq məhdudlaşdırılmalıdır", - federasiyasının bəyanatında deyilir.
Təşkilat həmçinin Madonnanı "digər qadınla ədəbsiz davranışda" ittiham edərək, ölkədə belə hərəkətlərin qanunla cəzalandırıldığını qeyd edib.
“Ədəbiyyat və incəsənət”
(11.01.2023)
20 yanvar yaxınlaşır
1990-cı il yanvarın 19-dan 20-nə keçən gecə Azərbaycan tarixinə əbədi yazılıb. Hər bir xalqın özünü dərk etməsində dönüş nöqtəsi olan, qan yaddaşında silinməz iz qoyan hadisələr var, bizdə də bu, 20 yanvar hadisələridir.
Bu gün yanvarın 11-idir, növbəti ildönümündən bizi cəmi 9 gün ayırır. Milli birlik və vətənpərvərliyin simvoluna çevrilmiş o qanlı gecədən artıq 33 il keçir...
Ayın 18-də Cəfər Cabbarlı adına Azərbaycan Dövlət Teatr Muzeyində “Bir qərinə keçsə də, unutmadıq!” adlı tədbir keçiriləcək.
Tədbirdə 20 Yanvar hadisələrindən söhbət açılacaq, o qanlı gecənin günahsız qurbanlarına həsr olunmuş videoçarx nümayiş etdiriləcək. Beynəlxalq hərbi mahnılar müsabiqəsinin mükafatçısı Rauf Məmmədzadənin, respublika və beynəlxalq müsabiqələr laureatı pianoçu Əli Vahidov və tələbələrinin ifasında vətənpərvərlik ruhunda musiqi nömrələri səsləndiriləcək.
“Ədəbiyyat və incəsənət”
(11.01.2023)
Osloda Gülnarə Xəlilovanın “Cizgi”nin Şimal hekayələri" adlı ekspozisiyasının açılışı olub
Osloda "Deichman Bjorvika" Mədəniyyət Mərkəzində Azərbaycan Milli Geyim Mərkəzinin rəhbəri, Avrasiya etnodizaynçılar Assosiasiyasının üzvü, sənətşünaslıq üzrə fəlsəfə doktoru, modelyer-dizayner Gülnarə Xəlilovanın “Northern Stories by Cizgi” (“Cizgi”nin Şimal hekayələri) adlı ekspozisiyasının açılışı olub.
“Ədəbiyyat və incəsənət” portalı AzərTAC-a istinadən xəbər verir ki, tədbir Oslodakı “Azərbaycan Evi” və Norveç üzrə Skandinaviya Azərbaycanlıları Koordinasiya Şurası tərəfindən təşkil olunub.
Tədbirdə "Azərbaycan Evi" nin sədri, Norveç üzrə Skandinaviya Azərbaycanlılarının Koordinasiya Şurasının koordinatoru Ramil Əliyev, "Azərbaycan Evi"nin nümayəndələri Arzu Rzayeva, Günay Əliyeva, ictimaiyyətin və yaradıcı ziyalıların nümayəndələri iştirak ediblər.
Qonaqlara Gülnarə Xəlilovanın Norveç və Qarabağ ornamentləri ilə əl işləri, ipək yaylıqlar və libaslar təqdim olunub.
Gülnarə Xəlilova: “Mən öz əsərlərimi Norveçdə, görkəmli arxeoloq, səyyah və yazıçı Tur Heyerdalın vətənində təqdim edirəm, hansı ki, uzun illər aparılan araşdırmalardan sonra belə nəticəyə gəlib ki, vikinqlər əslən Azərbaycandan gəliblər-qədim zamanlarda məhz ölkəmizin ərazisindən Skandinaviyaya yolları başlayıb. Keçən ilin may ayında Oslo şəhərinin məşhur Cosmopolite konsert salonunda Qarabağ bölgəsinin milli geyim ənənələrini əks etdirən "Xarıbülbül və Qarabağ" defilesini təqdim etdim. Bu dəfə sərgi formatında Norveçin ornamentlərinə üstünlük verərək əsərləri təqdim etdim və bu da qonaqların böyük marağına səbəb olub. Onlar təkcə yaradılan kompozisiyaların dəqiqliyinə deyil, həm də ilk dəfə olaraq onların milli ornamentlərinin ipək üzərində təqdim olunmasına xoş təəccübləndilər. Ümumiyyətlə, Norveç ornamentləri ənənəvi olaraq toxunma və tikiş üslubu ilə əks olunur".
Qeyd edək ki, bundan əvvəl Gülnarə Xəlilovanın kolleksiyaları ABŞ, Böyük Britaniya, İsveç, Avstriya, Rumıniya, Türkiyə, Rusiya, Çin, Qazaxıstan, Qırğızıstan, Özbəkistan, Bolqarıstan, Norveç və digər ölkələrdə keçirilən moda həftələrində və beynəlxalq tədbirlərdə uğurla nümayiş etdirilib.
“Ədəbiyyat və incəsənət”
(11.01.2023)
