Super User
Rəsm qalereyası: Klod Mone, “Lalələr”
Rəsm qalereyası: Klod Mone, “Lalələr”
“Avara”dan “Disko rəqqas”a qədər…
Bu il Hindistandan ölkəmizə 47 mindən çox ziyarətçi səfər edib
Kənan Məmmədli, “Ədəbiyyat və incəsənət”
“Gözəllik” bölümümümzdə həm də turizm mövzuları əhatə olunur, bu dəfə turizmdən danışacağıq. Amma kino vurğusu ilə!
Qabaqlar biz azərbaycanlılar hind filmlərini çox sevərdik. Yeni hind fiımi gələndə tək Bakı, Sumqayıt, Gəncə kimi böyük şəhərlər deyil, ucqar dağ kəndləri belə toy-bayram edərdi. Zəmanə dəyişdi, daha biz Bollivuda elə də maraq göstərmirik. Əvəzində isə indi biz hindlilər üçün maraqlı olmuşuq. Hər il daha çox turist uzaq Qanq sahillərindən, Budda diyarından, müqəddəs inəklər səltənətindən, fəlsəfə və yoqa məkanından ölkəmizə təşrif buyurur.
Bu ilin birinci yarımilliyində Hindistandan Azərbaycana düz 47 min 670 nəfərdən çox xarici ziyarətçi səfər edib.
Dövlət Turizm Agentliyinin bildirdiyinə görə, qeyd olunan ziyarətçi sayı ötən ilin eyni dövrü ilə müqayisədə 3 dəfədən çoxdur ki, bu da 2019-cu ilin eyni dövrü ilə müqayisədə 1,7 dəfə artım deməkdir.
Və mənim diqqətimi daha bir fakt cəlb eləyib. Bu barədə daha ətraflı danışmaq istəyərdim. Dünən Hindistanla turizm üzrə əməkdaşlıq perspektivləri Dövlət Turizm Agentliyinin sədri Fuad Nağıyevlə Hindistanın Azərbaycandakı səfiri Sridharan Madhusudhanan arasında keçirilən görüşdə müzakirə olunub.
Görüşdə ikitərəfli münasibətlərin inkişaf perspektivləri, qarşılıqlı tanıtım tədbirləri, ölkəmizdə hindistanlı turistləri cəlb edən mədəni-tarixi amillər, son dövrlərdə hindistanlı turistlərin Azərbaycana səfərlərinin intensivləşməsi, birbaşa uçuşların sayının artırılması məsələləri müzakirə olunub.
Elə bu yerdə Hindistan sevdalı oxucularımıza şad xəbər çatdırmaq istəyirəm: cari ilin avqust ayından etibarən “IndiGo Airlines” aviaşirkəti tərəfindən Hindistandan Azərbaycana birbaşa uçuşların həyata keçirilməsi planlaşdırılır. Hindistan vətəndaşlarına Azərbaycana səyahət üçün sadələşdirilmiş “e-visa” sistemi tətbiq olunur. Hazırda isə Delhi-Bakı-Delhi istiqamətində "Azərbaycan Hava Yolları" tərəfindən birbaşa uçuşlar həyata keçirilir.
Demək, o tərəf - bu tərəfli gediş-gəliş tam rahatlaşacaq.
Bu arada onu deyim ki, babam “Avara” və “Cənab 420”, atam “Zita və Gita” və “Qığılcım”, mənsə “Disko rəqqas” dövrünün adamlarıyıq. Nə xoş ki, bundan sonra hindistanlılar “Qəbələ bumu”, “Bakı möhtəşəmliyi”, “Gəncə klassikası” dövrünün adamları olacaq.
“Ədəbiyyat və incəsənət”
(21.07.2023)
“Xəbərlər heç vaxt yatmırlar"...
SABAH MİLLİ MƏTBUAT GÜNÜDÜR
Elman Eldaroğlu, “Ədəbiyyat və incəsənət”
22 iyul Azərbaycanda milli mətbuat günüdür. Bu münasibətlə ustad Qulu Məhərrəmli başda olmaqla, BDU-nun Jurnalistika fakultəsinin müəllim və tələbə heyətini, o cümlədən AJB-nin sədri Elçin Şıxlınski və bütün jurnalist dostlarımı təbrik edirəm…
Yəqin ki, bu günlərdə milli mətbuatımızın yaradıcısı Həsən Bəy Zərdabidən bəhs edən və eləcə də Azərbaycan mətbuatının inkişaf yolu haqqında çıxışlar çox olacaq. Maraqlı olar deyə, dünyanın ən qabaqcıl ölkəsi sayılan Amerika Birləşmiş Ştatlarının mətbuat tarixi haqqında qısa məlumat vermək istəyirəm. Öncə bir faktı qeyd edim ki, Amerikada jurnalistikanın tarixi XVII əsrdən başlayır…
İlk dəfə bu işə 1690-cı ildə Benjamin Harris adlı bir amerikalı başlasa da, ilk mükəmməl qəzet “The Boston News-Letter” adıyla 1704-cü ildə Bostonda, Jon Kempell tərəfindən buraxılıb. Bir müddət sonra ABŞ-ın bir sıra şəhərlərində də qəzetlər işıq üzü görməyə başlayıblar. Onların arasında ən yaxşı nümunə kimi, Ceyms Franklinin buraxdığı “The New England Courant” qəzetini göstərmək olar. Həmin qəzet 1721-1727-ci illərdə işıq üzü görüb və o dövrün ən yaxşı qəzetlərindən biri sayılırdı…
1750-ci ildə ABŞ-da artıq 14 adda həftəlik qəzet buraxılırdı. 1765-ci ildə qəzet kağızına qoyulan vergi qəzetlərin fəaliyyətinə mənfi təsir göstərsə də, bir müddət sonra qəzetlərin sayı artaraq 35-ə çatdı. Bu qəzetlərin ümumi tirajı hər həftə 40 mini keçirdi...
Ümumiyyətlə, ABŞ-ın ictimai-siyasi həyatında qəzetlərin böyük rolu olub. Vətəndaş müharibəsi dövründə qəzetlər hərbi toqquşmalardan yazır, onların təfərrüatını ictimaiyyətə çatdırmağa çalışırdılar. Dinclik dövründə isə tənqidi yazılarla hökumət strukturlarının işinə ictimai nəzarət edirdilər…
Bir müddət sonra Nyu York, Filadelfiya, Vaşinqton və Boston şəhərlərində daha böyük tirajla çıxan qəzetlər meydana gəldi. Və bu qəzetlərin böyük əksəriyyətinin heç bir siyasi asılılığı yox idi. 1835-ci ildə Ceymsom Qordon tərəfindən ərsəyə gətirilən “The New York Herald” qəzeti onların arasında ən məşhuru kimi, ictimaiyyət arasında böyük nüfuz qazandı. Daha sonra partiyaları təmsil edən qəzetlər də işıq üzü görməyə başladılar. 1841-ci ildən buraxılan “New York Tribune” qəzeti buna bariz nümunədir. Bu gün dünyada məşhur olan “New York Times” qəzeti isə 1851-ci ildən işıq üzü görür...
Bu nümunələrin sayını ardıcılıqla artırmaq da olar. Amma əsas məqsəd, “online” qəzetlərin çox olmasına baxmayaraq, ABŞ-da ənənəvi mətbuatın hələ də yaşamasını qeyd etməkdir. Bu gün nəinki müstəqil və ya siyasi partiyaların, hətta hər bir iri müəssisənin, təşkilatın, hətta ictimai qrumların da öz qəzetləri var.
Mətbuat azadlığına gəldikdə isə Amerikada jurnalistlərin fəaliyyətinə heç bir məhdudiyyət qoyulmur. Burada jurnalistlərin əsas şüarlarından biri də: “Xəbərlər heç vaxt yatmırlar”-dır…
İnanıram ki, Azərbaycanda da jurnalistlərə nə vaxtsa mənzil, “əməkdar jurnalist” fəxri adı yox, tam müstəqillik veriləcək…
Bayramınız mübarək, cənab jurnalistlər!
“Ədəbiyyat və incəsənət”
(21.07.2023)
“Uşaqlıq duyğularımın rəngləri” adlı sərgiyə əsər qəbulu davam edir
Xətai Sənət Mərkəzində “Heydər Əliyev İli” çərçivəsində elan olunan “Uşaqlıq duyğularımın rəngləri” adlı şou-sərgi üçün əsər qəbulu davam edir.
Mərkəzdən verilən məlumata görə, sərgi Mədəniyyət Nazirliyi, Azərbaycan Rəssamlar İttifaqı, Azərbaycan Dövlət Rəsm Qalereyası və Xətai Sənət Mərkəzi təsviri sənətə ictimai marağı artırmaq, böyüklərin uşaq məsumluğu və səmimiyyəti ilə ərsəyə gətirdikləri rəsm əsərlərini görmək məqsədilə təşkil olunub.
Yaşı 18-dən yuxarı rəssam və müxtəlif peşə sahibləri təqdim edəcəyi əsər və əsərlərin fotosu ilə bərabər rəsmin adı, müəllifin soyadı, adı, təvəllüdü, peşə və əlaqə nömrəsini qeyd edərək Bu email ünvanı spambotlardan qorunur. Onu görmək üçün JavaScripti qoşmaq lazımdır. ünvanına göndərməlidir. Uşaq ikən çəkdiyiniz rəsmlə də sərgiyə qatılmaq olar.
Sərgiyə əsər qəbulu üçün son tarix oktyabrın 5-də başa çatır.
Nümayiş olunan əsərlər geri qaytarılmır. Əsəri sərgilənən müəlliflərə sertifikat təqdim ediləcək.
“Ədəbiyyat və incəsənət”
(21.07.2023)
Güneydən səslər: “Və əllərimi gözlərində qızdırıram” - Zaman Paşazadə
Ədəbiyyat və incəsənət” portalında dərc edilən Güney Azərbaycan ədiblərinin ən yaxşı nümunələrini diqqətinizə çatdırmaqdayıq.
Portalımızın Güney Azərbaycan təmsilçisi Əli Çağlanln təqdimatında bu həftə Zaman Paşazadə öz şeirləri ilə hüzurunuzdadır.
O, bu dəfə “Sadəcə sən bilirsən” deyəcək.
SADƏCƏ SƏN BİLİRSƏN…
Indi yerin boş olsa da
Önümdəki oturacaqda kapşenimi çiyninə atmışam
Və əllərimi gözlərində qızdırıram.
Sadəcə mən bilirəm bu kafedə gözlərinin rəngində bir içki serv olur
Yoxsa çoxları qəhvəni şəkərsiz içir.
Yoxsa çoxları Jak Brelin “məni tərk etmə” mahnısını qəhvə ilə qarışdırır mənasını bilmədən
Sadəcə sən bilirsən bütün mənaları
Və bir an öncə tərk etdin kafeni.
Sadəcə sən bilirsən taksilər yolları qısaltmaq deyil, hadisə yerindən uzaqlaşmaq üçündür
Sadəcə sən bilirsən caddələr gəlmək deyil, tərk etmək üçündür.
Sadəcə mən bilirəm
Daha Sezen get mahnısını mə-ləməyəcək
Get
Deyəcək
Get…
Amma hardasa, ürəyinə quraşdırdığım saatlı bomba partlayıb
Düyünlü yumruğunu barmaq-barmaq parçalayacaq
Və görüşə uzanacaq əlin.
İndi yerin boş olsa da
Gözlərinin rəngi üstümə dağılmış
Və kapşenimin cibini axtarır polislər.
Sadəcə sən bilirsən mən özümü öldürməmişəm
Və qatil soyuq qanlılıqla uzaqlaşır taksidə.
“Ədəbiyyat və incəsənət”
(21.07.2023)
Beynəlxalq Türk Mədəniyyəti və İrsi Fondu Rumıniya ilə əməkdaşlığı genişləndirir
Beynəlxalq Türk Mədəniyyəti və İrsi Fondunun Prezidenti Günay Əfəndiyeva Rumıniyanın Müsəlman icmasının müftisi Murat Yusuf, Rumıniya Parlamentinin üzvü, Parlamentdəki Tatar icmasının nümayəndəsi Amet Varol və Rumıniyanın Türk-Müsəlman Tatarlarının Demokratik Birliyinin vitse-prezidenti Arslan Özgün ilə görüşüb.
Fonddan verilən məlumata görə, görüşdə həmçinin Rumıniyanın Azərbaycan səfiri Vasile Soare iştirak edib.
Görüşdə Günay Əfəndiyeva Fondun üzv və müşahidəçi dövlətlərini əhatə edən fəaliyyəti ilə yanaşı, müxtəlif ölkələrdə yaşayan türk kökənli xalqların mədəni irsinin qorunması və təbliğ edilməsi istiqamətində həyata keçirilən layihələrindən bəhs edib. Təşkilatın fərqli mədəniyyətləri və xalqları bir araya gətirən missiyasına diqqət çəkən Fondun prezidenti tatarların sıx məskunlaşdığı Litva və Polşa ilə davam edən uğurlu əməkdaşlıq barədə danışıb. Günay Əfəndiyeva həmçinin, Rumıniyada yaşayan tatarların da qədim mədəni irsinin daha geniş auditoriyaya tanıdılmasının vacibliyinə toxunub.
Rumın nümayəndə heyətinin üzvləri Beynəlxalq Türk Mədəniyyəti və İrsi Fondu ilə əməkdaşlığın genişləndirilməsində maraqlı olduqlarını qeyd edərək, ölkədə yaşayan tatarlar da daxil olmaqla, bütün milli azlıqların hüquqlarının və mənəvi dəyərlərinin qorunmasına yönəlmiş dövlət sisteminin mövcud olduğu barədə ətraflı məlumat veriblər. Fond ilə bu sahədə təcrübə mübadiləsinin aparılması və gələcəkdə ikitərəfli əməkdaşlığın çərçivəsini anlaşma memorandumunun imzalanması imkanlarından söz açıblar.
Bununla yanaşı, görüşdə iki tərəf arasında tərəfdaşlığın digər istiqamətləri və qarşılıqlı maraq doğuran məsələlər müzakirə edilib.
“Ədəbiyyat və incəsənət”
(21.07.2023)
“Mənim bu dünyadan alacağım var” - Vasif Süleyman
“Ədəbiyyat və incəsənət” portalının Poetik qiraət rubrikasında bu dəfə sizlərə Vasif Süleymanın “Sevgi şeirlərimə” adlı şeirini təqdim edirik.
SEVGİ ŞEİRLƏRİMƏ
Sevgi şeirlərim, sözüm var, gəlin,
Daha ürəkmi var, oda düşəsi…
Elə unudurlar adamı, vallah,
Təzədən sevməkmi yada düşəsi…
Sizdə mənim kimi bir belə təmiz,
Sizdə mənim kimi belə utancaq.
Eh, məni bir qıza sevdirmədiniz,
Mən sizi yüzünə sevdirdim, ancaq.
Atılan nə qədər atan nə qədər,
Nə qədər zalım var, atam, nə qədər…
Ürək də yazıqdı çəksə, bu dərdi.
Başını sındırma sevilməyənlər,
Elə sevənlərin sayı qədərdi.
Elə sevənlərdi sevilməyənlər,
Sevsə də, yansa da bəlası birdi.
Ağlımız kəsəndən sevən atılıb,
Canım yarımağa yar nə gəzirdi…
Mənim bu dünyadan alacağım var,
Mənim nə günüm var, olacağım var…
Sevgi şeirlərim sizdən savayı,
Mənim də nə küməm, alaçığım var.
Sevgi şeirlərim, sözüm var, gəlin,
Daha ürəkmi var, oda düşəsi…
Elə unudurlar adamı, vallah,
Təzədən sevməkmi yada düşəsi…
“Ədəbiyyat və incəsənət”
(21.07.2023)
Reza Deqatinin “Dərin sükut” sərgisində Azərbaycanda çəkdiyi şəkillər də nümayiş olunur
Məşhur fotoqraf Reza Deqatinin fotolarından ibarət sərgiləri İsveçdə, eləcə də Fransanın əyalətlərində təşkil olunub. “Dərin sükut” adlı sərgisi ilə R. Deqati əsl sənətkar kimi sözünü, fikirlərini fotoları vasitəsilə ötürür. Onun reallığı əks etdirən fotoları qarşısında sözün heç yeri yoxdur. Bu sərgilər hər şeyi fotoların dili ilə çatdırır.
AzərTAC xəbər verir ki, həmişə olduğu kimi R. Deqati sərgilərində Azərbaycan, eləcə də onun işğalçılar tərəfindən yerlə yeksan edilmiş şəhər və kəndlərini əks etdirən fotoları da nümayiş olunur. Erməni işğalı dövründə vəhşicəsinə dağıdılmış şəhər və kəndlərimizi əks etdirən Deqati fotoları ictimaiyyətə əsl həqiqətləri çatdırır.
Yeni sensasiya qarşısında, lal trans, hipnoz, daxili tüğyan hisslərinə qərq olmuş, insan qəlbinin dərinliklərinə yol açan bu fotolar insanı ovundurmaq üçün göz yaşları və dərin sükutdan başqa arqument tapmır. Reza bu fotoları vasitəsilə insana özünün ən yaxşı hisslərinə qovuşmağı təklif edir.
Uzun illərdir dünyanın müxtəlif qaynar nöqtələrindən çəkdiyi fotolarla Reza humanist baxışını beynəlxalq media, eləcə də kitablar, sənədli filmlər, konfranslar, seminarlar və sərgilər vasitəsilə Fransada və xaricdə bölüşür. O, 1979-cu ildən dünyada baş verən sarsıntıların əsl şahididir. Reza “sülh müxbiri” titullu müharibə müxbiridir. Fotoqrafiya doğma ölkəsindən didərgin düşmüş Rezanı həyata bağlayan yeganə teldir.
Reza Deqati Azərbaycanın 30 illik işğal dərdini də fotoları vasitəsilə beynəlxalq ictimaiyyətə çatdırır.
Reza sərgiləri çərçivəsində təşkil etdiyi konfranslar vasitəsilə də Azərbaycan reallıqlarını sənətsevərlərə ötürür. Onun bu ilki sərgilərinin komissarları Raşel Deqati və Fransada sərgilər kuratoru Pyer Bonciovanidir.
R. Deqati sərgiləri yay fəsli ərzində yerli ictimaiyyət və xarici turistlərin ən sevimli ziyarət məkanı olur.
“Ədəbiyyat və incəsənət”
(21.07.2023)
Venesiya Film Festivalına təhlükə var
SƏBƏB HOLLİVUDDUR
Bildiyiniz kimi Hollivud kinoaktyorları və ABŞ Kinematoqrafçılar Gildiyasının təşkil etdiyi tətilə qoşulublar, bu tək Hollivudun fəaliyyətini iflic etməyib, həm də ətraf dünyanı da silkələyib. Belə bir fikir var ki, tətilə görə ABŞ filmləri və aktyorları 80-ci Venesiya Film Festivalına qatılmaya bilərlər. Bəzi mənbələrin məlumatına görə, 80-ci Venesiya Film Festivalının Ümumavropa festivalı olacağı ehtimal edilir.
Bu barədə “Ədəbiyyat və incəsənət” portalı week-end nəşrinə istinadən məlumat verir.
Venesiya Film Festivalının rəhbəri Alberto Barbera, tətil səbəbindən Amerika film və ulduzlarının tədbirdə iştirak etməyəcəyi təqdirdə bundan sarsılacaqlarını dilə gətirib, amma onu da deyib ki, belə olarsa, həyata keçiriləcək "B" planı üzərində çalışırlar.
A.Barbera hadisələrin necə olacağını söyləməyin hələ tez olduğunu bildirib: “Amerikalı prodüser və rejissorların nə etmək niyyətində olduqlarını öyrənməyə çalışmalıyıq. Biz də boş dayanmır, alternativ proqram yaratmaq üçün addımlar atırıq”.
Qeyd edək ki, sentyabrın 7-dən 17-dək davam edəcək Venesiya Film Festivalının Avropa festivalı olacağı proqnozları pozula da bilər. Belə ki, bəzi kino funksionerləri ABŞ Kinematoqrafçılar Gildiyasının təşkil etdiyi aktyorların tətilinin sentyabradək yekunlaşacağını ehtimal edirlər.
Şəkildə: Hər ehtimala qarşı, Alberto Barbero gülümsəyir və nikbin olmağa çalışır.
“Ədəbiyyat və incəsənət”
(21.07.2023)
Heydər Əliyevin 100 illiyinə həsr edilmiş “Vətən oğulsuz olmasın” kitabının təqdimatı olub
İyulun 20-də Ulu Öndər Heydər Əliyevin 100 illik yubileyi münasibətilə “Mirvarid Dilbazi Poeziya Məclisi” İctimai Birliyinin nəşr etdirdiyi “Vətən oğulsuz olmasın” kitabının M.S.Ordubadi adına Naxçıvan Respublika Kitabxanasında təqdimatı keçirilib.
Naxçıvan Muxtar Respublikası Mədəniyyət Nazirliyinin dəstəyi ilə reallaşan təqdimat mərasimində əvvəlcə Ümummilli Lider Heydər Əliyevin abidəsi, muzeyi, daha sonra Hüseyn Cavidin məqbərəsi ziyarət olunub.
Təqdimatda çıxış edən, “Mirvarid Dilbazi Poeziya Məclisi” İctimai Birliyinin sədri, şair-publisist Güllü Eldar Tomarlı bildirib ki, Ümummilli Lider Heydər Əliyev poeziyamızın inkişafına böyük diqqət göstərib. Bu da, həmin dövrün yazıçı və şairlərinin yaradıcılığında öz əksini tapıb. İstər yazarların, istərsə də, ədəbiyyatşünasların dayağı olan Ulu Öndər ədəbiyyata dərindən bələd olub və daim sözə sevgi ilə yanaşıbdır. Eyni dövrdə yaşayıb, yaratmış Xalq şairi Mirvarid Dilbazinin yaradıcılığında xalqın qeyrətli oğlu Heydər Əliyev dühası xüsusi yer tutur.
Tədbirdə Azərbaycan Yazıçılar Birliyinin Naxçıvan bölməsinin sədri Asim Yadigar, Naxçıvan Muxtar Respublikası Mədəniyyət Nazirliyinin əməkdaşı, Naxçıvan Muxtar Respublikası İcra başçısının müavini Təhminə Mustafayeva, şəhid Xansu Qurbanovun anası Yəmən Abbasova, şəhid İbrahim Vəlizadənin anası Kifayət xanım, şairlər və yazıçılar çıxış ediblər.
Tədbir çərçivəsində bütün həyatını xalqına həsr edən Ulu Öndər Heydər Əliyevin milli-mənəvi dəyərlərimizin qorunub saxlanılması istiqamətində imzaladığı tarixi fərman və sərəncamların əhəmiyyətindən, elm və mədəniyyətimizin inkişafına göstərdiyi diqqət və qayğıdan bəhs olunub.
“Ədəbiyyat və incəsənət”
(21.07.2023)
