Mədəniyyət Nazirliyinin dəstəyi ilə C.Cabbarlı adına “Azərbaycanfilm” Kinostudiyasının və İctimai Televiziyanın (İTV) birgə istehsal etdiyi “Görünməyən qəhrəmanlar” sənədli filmlər silsiləsinin nümayişi davam edir.
Mədəniyyət Nazirliyi xəbər verir ki, hər biri 44 dəqiqə olmaqla 5 sənədli filmdən ibarət olan silsilədə müxtəlif qoşun növlərinin qəhrəman zabit və əsgər heyətinin 44 günlük müharibədə keçdiyi şərəfli döyüş yolundan bəhs edilir. Filmlərdə real döyüş xatirələri nəql olunur, eksklüziv kadrlar göstərilir. Sənədli serialın prodüseri Fariz Əhmədovdur.
Seriyanın ilk filmi – “Görünməyən qəhrəmanlar: 27 sentyabr” filmi Vətən müharibəsinin başladığı günün ildönümündə – sentyabrın 27-də İTV-də nümayiş olunub.
Noyabr ayının əvvəlindən başlayaraq Zəfər Gününə qədər silsilənin bütün filmləri İTV-nin efirində yayımlanıacaq.
Filmlər:
“Görünməyən qəhrəmanlar: 27 sentyabr” – rejissor: Seyran Mahmudoğlu / ssenari müəllifi: Seyran Mahmudoğlu
“Görünməyən qəhrəmanlar: Hərbi Hava Qüvvələri” – rejissor: Bəhruz Qədirov / ssenari müəllifi: Billurə Aslanova
“Görünməyən qəhrəmanlar: Artilleriya” – rejissor: Ayşad Səfərəliyev / ssenari müəllifi: İdris Heydərli
“Görünməyən qəhrəmanlar: Hərbi Dəniz Qüvvələrinin xüsusi təyinatlıları” – rejissor: Seyran Mahmudoğlu / ssenari müəllifi: İdris Heydərli
“Görünməyən qəhrəmanlar: Dövlət Sərhəd Xidməti” – rejissor: Seyran Mahmudoğlu / ssenari müəllifi: Esmira Bədəlova-Məmmədova
Qeyd edək ki, Mədəniyyət Nazirliyi bir il ərzində Vətən müharibəsinə həsr olunmuş 20-dən artıq müxtəlif metrajlı filmlərin istehsalına dəstək göstərib. Bu filmlərin istehsalı həm dövlət studiyaları, həm də özəl prodüser mərkəzləri tərəfindən aparılıb.
“Görünməyən qəhrəmanlar” silsiləsindən artıq yayımlanmış filmləri aşağıdakı linklər vasitəsilə izləyə bilərsiniz:
 
Sənədli film: "Görünməyən qəhrəmanlar – 27 sentyabr"
https://youtu.be/4B4EVRFJySE
 
Sənədli film: "Görünməyən qəhrəmanlar – Hərbi Hava Qüvvələri"
https://youtu.be/8mU3M6LSvx8
 
Sənədli film: "Görünməyən qəhrəmanlar – Artilleriya"
https://youtu.be/iViZqJZKJ7w
 
Sənədli film: "Görünməyən qəhrəmanlar – Hərbi Dəniz Qüvvələrinin xüsusi təyinatlıları"
https://youtu.be/J9hhVhiYjBU

Noyabrın 1-də start verən “4.4 Qısa Tamaşalar Festivalı”nın dördüncü günü festivalın layihə rəhbəri Vidadi Qafarov giriş sözü ilə başlayıb. O, münsiflərə və festival iştirakçılarına öz təşəkkürünü bildirərək, proqram haqqında məlumat verib. Sonra festivalın üçüncü gününün qısa icmalını özündə əks etdirən videoçarx nümayiş olunub.
Festivalın 4-cü günündə Bakı Uşaq və Gənclər Teatrının “Son nəfəsə qədər” (müəllif və rejissor  Könül Şahbazova-Qasımova), Lənkəran Dövlət Dram Teatrının “Ana” (müəllif Oruc Qurbanov, Ağaddin Babayev; rejissor Oruc Qurbanov), müəllif və rejissor Cavid İmamverdiyev olan “Döyüşən tar”, Mingəçevir Dövlət Dram Teatrının “Bazar günü” (müəllif Ülviyyə Heydərova, rejissor İlqar Rəhimov), Gəncə Dövlət Kukla Teatrının “Xarı bülbül əfsanəsi” (müəllif və rejissor Zülfiyyə Əliyeva), "Əsa" Teatrının “Qonşu” (müəllif və rejissor Nihad Qulamzadə) tamaşaları nümayiş olunub.
Tamaşadan sonra münsiflərin və tamaşaların yaradıcı heyətinin iştirakı ilə müzakirə keçirilib. Maraqlı keçən müzakirədən sonra dramaturq Əli Əmirlinin “Pyes necə yazılmalıdır?” adlı vörkşopu baş tutub.
Xatırladaq ki, xalqımızın 44 günlük Vətən Müharibəsində qazandığı zəfərə həsr olunan “4.4 Qısa Tamaşalar Festivalı”nın 5 noyabr saat 19:00-da mükafatlandırma və bağlanış mərasimi keçiriləcək.

Sumqayıtda fəaliyyət göstərən “Cahan Art" Uşaq Rəsm Qalereyasında olduqca istedadlı uşaqlar bir araya gəliblər. Onların çox gözəl rəsmləri var. Hətta ilk baxışda bu rəsmlər peşəkar işlər kimi də qəbul edilir.
“Ədəbiyyat və incəsənət” portalının məlumatına görə, uşaq rəssamlar belə bir təşəbbüs irəli sürüblər:  bu rəsmlərin satışını təşkil edib qazandıqları pulları "Yaşat Fondu" və "Qarabağ İnkişaf Fondu"na köçürsünlər.
Onlar bununla əlaqədar böyüklərdən köməklik və dəstək istəyirlər.
Qeyd edək ki, rəsmlərin çoxu "Zəfər günü"nə həsr edilib, düşmən üzərində qazanılan qələbəni və işğaldan azad olunmuş ərazilərimizin gözəl mənzərələrini əks etdirir.
“Cahan Art" Rəsm Qalereyasının rəhbəri Nigar xanımla əlaqə yaradıb
(+994 70 795 11 01) ətraflı məlumat əldə etmək mümkündür.
Gəlin böyük ürəkli bu kiçik varlıqlara dəstək olaq!

 44 günlük Vətən müharibəsinin ildönümünün qeyd olunması ilə bağlı “Azərxalça” ASC- nin elan etdiyi “Zəfər” kolleksiyası üçün ən yaxşı xalça müsabiqəsi başa çatıb. Bu ilin iyul ayında elan olunan müsabiqəyə müraciət edən yüzlərlə gənc sırasından yalnız 13 nəfər seçmə mərhələni keçərək təlimlərə qatılmışdır. Bir ay davam edən təlimlər zamanı gənc dizayner və rəssamlar həm yerli, həm də xarici mütəxəssislərlə təcrübələrini bölüşdülər. Təlimlər həm nəzəri, həm də praktik yöndə baş tutub.
AzərTAC xəbər verir ki, noyabrın 4-də “Azərxalça” ASC –nin İçərişəhərdə yerləşən qalereyasında müsabiqənin son mərhələsi keçirilib. Tədbiri “Azərxalça” ASC sədri Emin Məmmədov açıq elan edərək, hər bir gəncə müsabiqədə iştirakına görə təşəkkür edib.
Bildirilib ki, milli xalçaçılıq irsimizin qorunması və gənclər arasında xalçaçılıq sənətinə marağın artırılması yönündə “Zəfər” kolleksiyası xalça müsabiqəsinin müstəsna rolu olacaq. Sədr qeyd edib ki, milli-mənəvi dəyərlərimizin qorunub saxlanılmasında, gənclərimiz arasında təbliğ olunmasında müsabiqələrin keçirilməsi vacibdir və bundan sonra “Azərxalça” ASC gənclərlə daha sıx əməkdaşlıq edəcək. 13 gənc təlimçilər, rəssamlar və tanınmış incəsənət xadimlərinə öz əsərlərini təqdim etdi. Hər bir gənc əsərini təqdim etməklə yanaşı onun fəlsəfəsini də hər kəsə izah edərək müdafiəsini yekunlaşdırdı.
Xatırladaq ki, noyabrın 4-dən etibarən 10 gün ərzində 13 müsabiqə iştirakçısının əsəri İçərişəhər, Böyük Qala 15 ünvanında, “Azərxalça” ASC showroom- da sərgilənəcək. Maraqlanan hər kəs əsərləri seyr etməklə yanaşı qalibin müəyyən olunamsında, səsvermədə də iştirak edə bilər. 10 gündən sonra qaliblər elan olunacaq. Qaliblərin əsərləri əsasında isə “Azərxalça” nın “Zəfər” xalça kolleksiyası hazırlanacaq! Yeni xalça kolleksiyası həm yerli, həm də xarici bazarda xalçasevərlərin istifadəsinə təqdim olunacaq.

Noyabrın 4-də Beynəlxalq Muğam Mərkəzində Azərbaycan Respublikasının Prezidenti yanında Dövlət İdarəçilik Akademiyasının professoru, siyasi elmlər doktoru Elçin Əhmədovun “ŞUŞA – Azərbaycanın tarixi və strateji əhəmiyyətli mədəniyyət paytaxtı” kitabının təqdimatı keçirilib.
AzərTAC xəbər verir ki, Şuşa Şəhər İcra Hakimiyyətinin təşkilatçılığı ilə reallaşan tədbirdə əvvəlcə Dövlət Himni səsləndirilib, şəhidlərimizin ruhu bir dəqiqəlik sükutla yad edilib.
Vətən müharibəsində canlarından keçən şəhidlərimizin ruhuna ithaf olunmuş videoçarx nümayiş olunub.
Təqdimat mərasimində Milli Məclisin deputatı, akademik Ziyad Səmədzadə Şuşanın tarixinə, mədəniyyətinə həsr olunan kitabın nəşrini təqdirəlayiq hal kimi dəyərləndirib. Otuz il yaxın bir müddət ərzində düşmən tapdağında olan torpaqlarımızda ermənilər tərəfindən həyata keçirilən vandalizm aktlarının dünyaya çatdırılmasında müəllifin fəaliyyətini, xidmətlərini yüksək qiymətləndirərək ona uğurlar arzulayıb.
Kitabın xalqın yaddaşında, tarixində daim yaşayacaq və gələcək nəsillərə çatdırılacaq bir məxəz, mənbə olduğunu qeyd edən Xalq yazıçısı Çingiz Abdullayev deyib: "Ermənilər uzun müddət idi torpaqlarımızı işğal etmişdilər, özləri də başa düşürdülər ki, bu torpaqlar onların deyil. Buna görə də məktəbləri, xəstəxanaları, hər yeri dağıtmışdılar. İnanırdıq ki, biz qayıdacağıq və Ali Baş Komandanın rəhbərliyi ilə qayıtdıq da. Ötən ilin sentyabrında başlanan 44 günlük Vətən müharibəsində dünyaya sübut etdik ki, biz qəhrəman, döyüşkən xalqıq. Müəllifin Vətən müharibəsində tarixi qələbəmizi şərtləndirən amillərdən bəhs edən kitabının nəşrini uğurlu addım kimi qiymətləndirirəm"
Tədbirdə professor Vilayət Quliyev, Şuşa Şəhər İcra Hakimiyyətinin başçısı Bayram Səfərov və başqaları çıxış edərək kitab haqqında öz fikirlərini bölüşüblər.
Çıxışlarda qeyd edilib ki, kitabda Azərbaycanın İkinci Qarabağ müharibəsində tarixi qələbəsini şərtləndirən amillər, xüsusilə hərbi-diplomatik və informasiya məkanındakı uğurları geniş təhlil olunub. Xüsusilə, Şuşa şəhərinin işğaldan azad edilməsi müharibənin sonrakı gedişinə və taleyinə həlledici təsir göstərməklə, Azərbaycanın hərbi-diplomatik uğurlarının nəticəsi kimi dəyərləndirilir. Bundan başqa, Azərbaycanın tarixi mədəniyyət paytaxtı, Qarabağın tacı olan Şuşanın qədim tarixi, mədəni və strateji əhəmiyyəti tədqiq edilir. Kitabda Qarabağ xanlığının paytaxtı - Şuşa qalasının və şəhərin qədim məhəllələrinin salnaməsi açıqlanır. Ümummilli lider Heydər Əliyevin ermənilərin əsassız iddialarına qarşı mübarizəsi və Şuşaya zəngin tarixi abidə kimi qayğısı vurğulanır. Bununla yanaşı, ötən il noyabrın 8-də Prezident, Ali Baş Komandan İlham Əliyevin rəhbərliyi ilə Azərbaycan Ordusu tərəfindən Şuşanın işğalçılardan azad edilməsi, eləcə də 2021-ci ildə şəhərin əsl tarixi siması, ənənələri və qədim mədəni abidələrinin bərpası istiqamətində aparılan işlər geniş tətbiq edilir.
Təqdimat mərasimində Elçin Əhmədov bildirib ki, 2020-ci il noyabrın 8-də Ali Baş Komandan İlham Əliyevin rəhbərliyi ilə rəşadətli Ordumuz tərəfindən tarixi, mədəni və strateji əhəmiyyətə malik, Qarabağın tacı olan Şuşa şəhərinin işğalçılardan azad edilməsi Azərbaycanın Qarabağda başladığı və 44 gün ərzində aparılan Vətən müharibəsindəki uğurlu əks-hücum əməliyyatları sırasında ən mühüm tarixi hadisə və böyük hərbi qələbə oldu. Azərbaycanın hərbi-diplomatik uğurları, xüsusilə qədim Şuşa şəhərinin rəşadətli Ordumuz tərəfindən işğaldan azad edilməsi müharibənin sonrakı gedişinə və taleyinə həlledici təsir göstərərək Zəfər Günü kimi tariximizə yazıldı. Dövlət başçısı İlham Əliyevin qətiyyətli və prinsipial mövqeyi hərb meydanında olduğu kimi, diplomatiya meydanında da uğurlarımızı şərtləndirdi.
Kitab haqqında məlumat verən müəllif tədbirin təşkilatçılarına və iştirakçılarına öz təşəkkürünü bildirib.

Noyabrın 10-da yazıçı Mirmehdi Ağaoğlunun “Zəfərin izi ilə” adlı yeni kitabının təqdimat mərasimi və imza günü olacaq.
Təqdimat mərasimi saat 18:00-da "LIBRAFF"ın "Park Akademiya" filialında (Elmlər Akademiyası m/s-nın əsas girişi ilə üzbəüz) keçiriləcək.
Kitaba müəllifin 44 günlük Vətən müharibəsindən sonra işğaldan azad olunmuş ərazilərə səfərləri zamanı hazırladığı reportajlar daxildir.
Kitabın ideya müəllifi Vüsalə Mahirqızı, redaktoru Nurşən Quliyev, bədii redaktor və korrektoru Elnaz Eyvaz, dizayneri Mahir Vəliyev, fotoqraf İlkin Nəbiyevdir.
Kitab “Mücrü” nəşriyyatında dərc edilib.

Azərbaycan Milli İncəsənət Muzeyində Mədəniyyət Nazirliyinin təşkilatçılığı və dəstəyi ilə Şanlı Qələbəmizin ildönümünə həsr olunmuş “Mədəniyyətimizin incisi - Qarabağ” adlı sərgi açılacaq.
Bu sərgidə Azərbaycan Milli İncəsənət Muzeyi, Azərbaycan Musiqi Mədəniyyəti Dövlət Muzeyi, Cəfər Cabbarlı adına Azərbaycan Dövlət Teatr Muzeyi, Üzeyir Hacıbəylinin Ev-Muzeyi, Bülbülün Memorial Muzeyi və Niyazinin xatirə muzeyinin fondlarına məxsus eksponatlar nümayiş olunacaq.
İştirakçılar sərgidə Qarabağ bəstəkarlarının, ifaçılarının və musiqiçilərinin Azərbaycanın mədəni irsinə verdiyi böyük töhfələrə canlı şahid olacaq.
Sərginin ekspozisiyasında Qarabağ xalça və xalça məmulatları, bədii tikmələr, milli geyimlər, məişət əşyaları nümayiş olunacaq. Sərgidə Xurşidbanu Natəvanın əlyazmaları, Usta Qəmbər Qarabaği və Mir Möhsün Nəvvabın rəsmləri, M.M.Nəvvabın “Dəvazdəh bənd” əlyazma kitabı, Üzeyir Hacıbəylinin, Bülbülün, Niyazinin şəxsi əşyaları və bu sənətkarların həyat və yaradıcılıqlarını əks etdirən çoxsaylı fotoşəkillər yer almaqdadır. İzləyicilər vernisajda 250-yə yaxın Qarabağ incisi ilə tanış ola biləcəklər.

Bu günə təsadüf edən tarixi hadisələr barədə sizləri məlumatlandıracağıq. Bu bir həftəyə Beynəlxalq Menecer günü, ingilisdilli ölkələrdə Qay Foks – yəni alov və atəşfəşanlıq günü, böyük satirikimiz Baba Pünhanın doğum günü və sair hadisələr təsadüf edir. İndi isə daha ətraflı.

5 noyabr. Beynəlxalq sunami barədə informasiyaların yayılması günü

Sunami böyük təlafat və dağıntılar gətirməklə bir çox ölkələrə ziyan vurur. Ən dəhşətli sunamilərin tarixinə nəzər yetirsək belə bir mənzərə görərik: 2011-ci il, Yaponiya, 2009-cu il, Samoa və Tonqa, 2004-cü il, Hind Okeanı sahilləri dövlətləri, 2001-ci il, Peru, 1999-cu il, Türkiyənin Aralıq dənizi sahilləri, 1998-ci il, Papua-Yeni Qvineya, 1976-cı il, Filippin və 1960-cı il, Çili.

BMT-nin təşəbbüsü ilə qeyd edilən bu gündə sahil hövzəsi əhalisinə sunami təhlükəsi barədə tam məlumat verilir, təhlükəsizlik qaydaları başa salınır.

5 noyabr. Beynəlxaql Layihə menecerliyi, yaxud Menecer günü

Baxırsan, indi toya gedən müğənnilərin disk daşıyanları deyirlər ki, mən prodüsserəm. Toyuq fabrikinin marketlərə toyuq paylayanları da mən menecerəm deyirlər. Amma menecment kifayət qədər ciddi sahə, menecersə ciddi peşədir. 2004-cü ildən təqvimə salınan bu gündə layihə müxtəlifliyi, komanda idarəçiliyi sayəsində uğur qazanan menecment təsisatları qeyd edilir, uğur qazanan menecerlər fərqləndirilirlər. Ensiklopedik nəşrlərdə menecerlərə belə tərif verilir: ”inzibati-təsərrüfat müstəqilliyinə malik olan istehsalın, satışın, servisin təşkili və idarə edilməsi üzrə professional şəxslər menecerlər adlanır”. Menecerlərin əsas işi maliyyə, informasiya, insan resurslarından effektiv və səmərəli şəkildə istifadə edərək şirkəti məqsədlərinə çatdırmaqdır. Bir sözlə, idarə müdirinin muzdla tutduğu iş idarəçisidir menecer. Yoxsa ki, mağazalara toyuq paylayan hara, menecer hara.

5 noyabr. Üçlərin hərbi kəşfiyyat günü

Ruslar hərbi kəşfiyyat gününü qeyd edəcəklər. Yəqin ki, bu qeydetmə Dağlıq Qarabağda məskunlaşmış rus hərbçilərindən də yan ötməyəcək. Belaruslar da qonşularından dala qalmayaraq hərbi kəşfiyyat gününü qeyd edəcəklər. Belarusda isə hərbi kəşfiyyat işinin prioritet tərəfi hakimiyyətə gəlmək istəyən müxalifəti zərərsizləşdirməkdir yəqin ki. Amma bədxah qonşularımızda da bu gün hərbi kəşfiyyat günüdür. Axı onlar ruslar və beloruslarla hərbi ittifaqdadırlar. Hərblərinin və kəşfiyyatlarının nə gündə olmasını isə biz bir il öncə - 44 günlük müharibə zamanı görmüşük, bizə nağıl danışmağın yeri yoxdur.

İrlandiyada çox qəribə bir gündür – Milli sarışın saçlıları bəyənənlər günü. Cənubi Afrikada malyariya əleyhinə mübarizə günüdür. Qay Foks gegəsini dünən britanlar keçirirdi, bu günsə Yeni Zelandiyada və Kanadada qeyd edəcəklər. Hinduslar od festivalından qopub indi də Kanakadas Cayanti festivalını qeyd edəcəklər, bol məhsul arzulayacaqlar. ABŞ-da isə Milli Çin yeməyini evə sifariş vermək günüdür. Günün dəqiqliyinə baxın siz. Milli Çin yeməyi günü olsaydı sadə görsənərdi, amma belədə cizgilər tam bəlli olur. Üstəlik, hegemon dövlət bu gün Milli ponçik gününü də qeyd edir. Ponçik nədir? Yağda qızardılmış kökə deyim də.

5 noyabr. Baba Pünhan günü

1948-ci ilin bu günündə Kürdəxanıda Baba Pünhan dünyaya gəlib. Düzü düz, əyrini əyri yazan satirik şair.

Əsrlər itirdik illər içində,
Qanqallar bitirdik güllər içində,
Çaqqallar dolaşır ellər içində,
Aslanlar, pələnglər daş qəfəsdədir,
Bakının dərdi var, Bakı xəstədir.

Bu gün Vilayət Quliyevin, Mələkxanım Əyyubovanın, Oleq Bloxinin, Co Dassenin, Brayan Adamsın və digər çox sayda ünlülərin doğum günüdür həm də.

Varisin “Həftənin təqvimi” yazısından seçmələr

Yazıçı Kənan Hacının "Hakimə açılan atəş" romanı çapdan çıxıb. Müəllifin verdiyi məlumata görə, “Qanun” nəşriyyatında çap edilən "Hakimə açılan atəş” romanı uzun illər ədliyyə sistemində çalışmış, Cəbrabyıl və Zərdab rayon məhkəmələrinə sədrlik etmiş, Birinci Qarabağ savaşında şəhid olmuş Məhərrəm Məmmədovun ömür yolundan bəhs edir.
Eyni zamanda romanda Azərbaycanın müstəqillik illərində yaşanılan hadisələr geniş təsvir olunur. Romanda Birinci Qarabağ müharibəsi və Zəfər günümüz təsvir edilir.
Geniş oxucu kütləsi üçün nəzərdə tutulmuş romanın oxucular tərəfindən bəyəniləcəyinə əminlik bildiririk.

Azərbaycan Dövlət Akademik Milli Dram Teatrında görkəmli teatr və kino aktyoru, Xalq artisti Yaşar Nurinin (1951–2012) 70 illiyinə həsr olunan yubiley tədbiri keçirilib. Tədbirdə mədəniyyət naziri Anar Kərimov, teatr və kino ictimaiyyətinin nümayəndələri, sənətkarın ailə üzvləri iştirak ediblər.
Mədəniyyət Mazirliyinin məlumatına görə, yubiley gecəsində çıxış edən Anar Kərimov Yaşar Nurinin həyat və sənət yoluna nəzər salıb, onu Azərbaycan mədəniyyətinin böyük sənətkarı kimi xarakterizə edib: “Özünəməxsus səhnə mədəniyyəti və davranışı, improvizə qabiliyyəti, yaradıcılıq istedadı, obrazlara məxsusi yanaşma tərzi onu həmkarlarından fərqləndirirdi. Onun film və tamaşalarda yaratdığı obrazların dili ilə dediyi sözlər az qala hər birimizin dilində gündəlik işlədilən və tez-tez rast gəldiyimiz ifadələrə çevrilib. Yaşar Nurinin yaratdığı obrazlar hər bir tamaşaçı tərəfindən daima seviləcək və xatırlanacaq. Bu, sənətkarın xoşbəxtliyidir. Böyük teatr və kino aktyoru, gözəl insan Yaşar Nuri hər zaman böyük hörmət və ehtiramla anılacaq”.
Çıxışının sonunda nazir Azərbaycan xalqını qarşıdan gələn Zəfər Günü münasibətilə təbrik edib, müharibədə qazanılan Qələbənin teatr və kino əsərlərində də təcəssüm olunmasını arzulayıb.
Teatrşünas, professor İlham Rəhimli deyib ki, Azərbaycanın teatr və kino sənətində nadir sənətkarlarından biri də Yaşar Nuri idi: “Yaşarın həssas ürəyi olduğu üçün tamaşaçının daxilində keçən duyğuları hiss edə bilirdi. O, Azərbaycanın nadir sənətçilərindəndir ki, satira, faciə və komediya janrında bənzərsiz rollar yaradıb. O, Dövlət Akademik Milli Dram Teatrında yeganə aktyorlardandır ki, kukla teatrında da rol oynayıb. Onun daxilində o qədər enerji var idi ki, obrazlı şəkildə desək, onunla su dəyirmanını hərəkətə gətirmək olardı”.
Xalq artisti Vaqif Mustafayev bildirib ki, Yaşar Nuri canlandırdığı obrazları daxilən dərindən hiss etdiyindən, onu bütün varlığı ilə yaşadığından çəkilişlər bitəndən sonra da həmin obrazdan uzun müddət çıxa bilmirdi. Xarici qastrol səfərlərində də Yaşar öz istedadı ilə tamaşaçıların üzündə təbəssüm yaradırdı. “Hər şey yaxşılığa doğru” filmində Yaşar Nuri “Pobeda za nami” (Qələbə bizimlədir) sözünü işlətmişdi. Belə də alındı, apardığımız 44 günlük müharibədə Azərbaycan xalqı uzun illər gözlədiyi Zəfəri qazandı”.
Xalq artisti Ramiz Həsənoğlu və başqa çıxış edənlər də sənətkarın yaradıcılıq keyfiyyətlərindən danışıb, xatirələrini bölüşüblər. Bildirilib ki, sevilən sənətkarın səhnədə “Övlad”da Silva, “Bağlardan gələn səs”də Pərviz, “Ölülər”də Məşədi Oruc, “Od gəlini”ndə Altunbay, “Bizim qəribə taleyimiz”də Davud, “Bəşərin komediyası və yaxud Don Juan”da Sqanarel, “Dəli yığıncağı”nda Sərsəm Salman və s. rolları ona geniş tamaşaçı rəğbəti qazandırıb.
Yaşar Nuri eyni zamanda televiziya tamaşalarında da yaddaqalan obrazların görkəmli ifaçısıdır. “Yollar görüşəndə”, “Ömrün yolları”, “Qatarda”, “Evləri köndələn yar”, “Qonşu qonşu olsa”, “Kökdən düşmüş piano”, “Topal Teymur”, “Yarımştat” və s. teletamaşalarda bənzərsiz rolların mahir ifaçısı kimi sevilib.
Diqqətə çatdırılıb ki, kino sahəsində də bir-birindən parlaq obrazlar yaradan aktyor “Dörd bazar günü”, “Bəyin oğurlanması”, “Ad günü”, “Yol əhvalatı”, “Yaramaz”, “Yuxu”, “Hər şey yaxşılığa doğru”, “Lətifə”, “Qətl günü”, “Fransız”, “Yoxlama” və digər filmlərdə də səhnədəki uğurlarını təkrarlayıb,
Xalq artisti Brilliant Dadaşova, Əməkdar artistlər Teymur Əmrah və Aybəniz Haşımova, sənətkarın qızı Ülkər Nuriyevanın ifasında musiqi nömrələri yubiley gecəsinə rəng qatıb.
Gecədə həmçinin Yaşar Nurinin rol aldığı səhnə əsərləri, film və televiziya tamaşalarından fraqmentlər tamaşaçıların könlünü oxşayıb.
Sənətkarın ailəsi adından çıxış edən qızı Ülviyyə Nuriyeva yubiley tədbirinin təşkilinə görə Mədəniyyət Nazirliyinə və Akademik Milli Dram Teatrına təşəkkürünü bildirib.