Super User
Azərbaycan Yazıçılar Birliyində şair-publisist Zərəngiz Dəmirçi Qayalının 60 illik yubileyi qeyd olunub
Yanvarın 24-də Azərbaycan Yazıçılar Birliyinin “Natəvan” klubunda şair-publisist Zərəngiz Dəmirçi Qayalının 60 illik yubileyi qeyd olunub.
AzərTAC xəbər verir ki, Azərbaycan Yazıçılar Birliyinin (AYB) sədr müavini Rəşad Məcid çıxış edərək müəyyən səbəblərə görə tədbirdə iştirak edə bilməyən bir sıra şair və yazıçıların salamlarını çatdırıb.
Sonra o, təmsil etdiyi qurumun təbrik məktubunu oxuyub.
Bildirib ki, Zərəngiz Dəmirçi Qayalı 8 kitab, 50-dən çox poema, yüzlərlə şeir və ballada, publisist yazılar, esselər, ədəbi araşdırma, oçerk və məqalələrin müəllifidir: “Ötən il o, “Zəfər sədası” və “ İki qardaş gücü” kitablarını oxuculara təqdim edib. Həmin kitabları bir növ şairənin keçdiyi ömür yolunun yaradıcılıq hesabatı kimi də dəyərləndirmək olar”.
Yazıçı-publisist Zemfira Məhərrəmli deyib: “Azərbaycan çağdaş poeziyasında Zərəngiz Dəmirçi Qayalı adlı bir imza var. Onunla söhbətim bu günə deyil, əvvəlki illərə təsadüf edir. Mən onu AZƏRTAC-da fəaliyyətə başladığı illərdən tanıyıram. Onun yaradıcılığı ilə tanış olandan sonra istedadlı bir şair olduğunu kəşf etdim”.
Qeyd edib ki, hər bir qələm əhli onun yazılarına dəyər verməsini istəyir. O jurnalist etikası ilə hər birimizin kitab təqdimatlarını böyük həvəslə, özünəməxsus üslubu ilə işıqlandırıb.
Vurğulanıb ki, Zərəngiz Dəmirçi Qayalı 60 illik ömrünün 45 ilini söz sənətinə həsr edib və söz də onu mərtəbə-mərtəbə yüksəkliklərə qaldırıb.
Sonra Z.Məhərrəmli Zərəngiz Dəmirçi Qayalının “Qazaxdan gəlmişəm qələbəyə mən” şeirini oxuyub.
Azərbaycan Yazıçılar Birliyinin İdarə Heyətinin üzvü, mətbuat xidmətinin rəhbəri Xəyal Rza bildirib ki, ədəbi mühitdə Zərəngiz Dəmirçi Qayalını tanımayan insan yoxdur. O, öz istedadı və qələmi ilə bu hörməti qazanıb, istər poeziyada, istərsə də nəsrdə öz sözünü deyib. Xəyal Rza yubilyarı təbrik edib, ona yeni yaradıcılıq uğurları arzulayıb.
Azərbaycan Milli Kulinariya Mərkəzinin rəhbəri Tahir Əmiraslanov deyib: “Qədimdən adəti üzrə yubileylər 12 ildən bir keçirilərdi. 12 yaş uşaqlıq, 24 gənclik, 36 yaş insanın oturuşmuş dövrüdür. 48 yaşında insan dünyəvi hadisələri fikirləşir, 60 yaşda isə müdriklik dövrünə qədəm qoyur. Bu gün Zərəngiz Dəmirçi Qayalının 5-ci dəfə yubileyi tamam olur. İndi Zərəngiz Dəmirçi Qayalının yazılarında püxtələşmiş bir insanın düşüncələrini görürük. Zərəngiz Dəmirçi Qayalı AZƏRTAC-ın müxbiri kimi hər zaman Milli Kulinariya Mərkəzinin tədbirlərini işıqlandırıb. Buna görə ona təşəkkürümü bildirirəm”.
Sonra Tahir Əmiraslanov Azərbaycan Milli Kulinariya Mərkəzinin fəxri diplomunu yubilyara təqdim edib.
“Qazax xeyriyyə” İctimai Birliyi İdarə Heyətinin üzvü şair Rafael İncəyurd bildirib ki, Zərəngiz xanım olduqca istiqanlı, ailə insanı, həm də həyatda özünü tapan bir xanımdır. O, İctimai Birliyin təbrik məktubunu oxuyub və fəxri diplomunu yubilyara təqdim edib.
Bakı Dövlət Universitetinin dosenti Anar Fuad, şair Səxavət Ənvəroğlu, hərbi jurnalist Zəminə Xınalı, "Mirvarid Dilbazi poeziya məclisi” İctimai Birliyinin sədri Güllü Eldar Tomarlı və başqaları çıxış edərək yubilyarın yaradıcılığından söz açıb, onun göstərdiyi xidmətləri vurğulayıblar.
Memarların təntənəli mükafatlandırma mərasimi keçirilib
Azərbaycan Respublikasının Prezidentinin 17 dekabr 2021-ci il tarixli Sərəncamı ilə Azərbaycanda memarlığın inkişafında xidmətlərinə görə bir qrup memar dövlət təltiflərinə layiq görülüb.
Azərbaycan Memarlar İttifaqının binasında təntənəli təltifetmə mərasimi keçirilib.
“Ədəbiyyat və incəsənət” portalı Mədəniyyət Nazirliyinə istinadən xəbər verir ki, tədbirdə Azərbaycan Respublikasının mədəniyyət naziri Anar Kərimov, Mədəni İrsin Qorunması, İnkişafı və Bərpası üzrə Dövlət Xidmətinin rəisi Azad Cəfərli, Azərbaycan Memarlıq və İnşaat Universitetinin rektoru, professor Gülçöhrə Məmmədova və digər rəsmi qonaqlar iştirak edib.
Azərbaycan Memarlar İttifaqı İdarə Heyətinin sədri Elbay Qasımzadə qonaqları salamlayıb, müasir dövrdə Azərbaycan memarlığı və şəhərsalması dövlət siyasətinin ayrılmaz bir hissəsi olmaqla Prezident İlham Əliyevin daim diqqət mərkəzində olduğunu qeyd edib.
O, bildirib ki, 17 dekabr 2021-ci il tarixində imzalanmış həmin Sərəncam memarlarımızın fəaliyyətinə verilən yüksək qiymətin göstəricisidir.
Tədbirdə çıxış edən mədəniyyət naziri Anar Kərimov respublikada memarlığın inkişafından söz açıb.
Nazir təltif edilmiş memarlara vəsiqələri və təltifləri təqdim edib.
Rəsm qalereyası: Aypara Ayxan, "Atım,atım, gözəl atım"
Rəsm qalereyası: Aypara Ayxan, "Atım,atım, gözəl atım"
"Mart-aprel aylarında pandemiya tamamilə bitəcək"
“Ədəbiyyat və incəsənət” portalı xəbər verir ki, COVID-19-un "Omicron" variantının simptomları son günlərdə həm internetdə ən çox axtarılan, həm də həkimlərdən soruşulan sualdır. Bu variant ölkəmizdə yanvar ayının 10-da aşkarlansa da, təxminən bir aydan artıq müddətdir ki, "Omicron" ştammının simptomları ilə xəstə olan insanlar var və onların sayı günbəgün artmaqda davam edir.
Bir çox hallarda həmin simptomlarla PCR testi etdirənlərin nəticəsi neqativ çıxır. Lakin düşüncələrə görə, həmin variantın bizim laboratoriyalarda aşkarlanması üçün imkanlar yetərli deyil. Səhiyyə Nazirliyindən sorğumuza cavabda bildirilmişdi ki, COVID-19-a yoluxmanın hansı ştamla baş verdiyi xüsusi laboratoriyalarda aparılan araşdırma ilə aşkar edilir. "Azərbaycanda neçə belə laboratoriya var?" sualına isə nazirliyin cavabı belə olub ki, mütəmadi olaraq genetik analizlər aparılır.
Ümumdünya Səhiyyə Təşkilatının (ÜST) Avropa regional bürosunun direktoru Hans Kluqe mətbuat konfransında bildirib ki, bu ştamm çox sürətlə yayılsa da, yoluxanların çoxunda asimptomatik hallar qeydə alınır, ölüm halları yüksək deyil.
İmmunoloq Vladimir Bolibok da mətbuata açıqlamasında deyib ki, "Omicron" yoluxduruculuq baxımından qızılcanı keçib. Düzdür, bu varianta yoluxanların əksəriyyəti xəstəliyi ağır keçirmir, amma yoluxma sayının bu qədər sürətlə getməsi Azərbaycan səhiyyəsinin istər tibbi personal, istərsə də xəstəxanalarda çarpayı sayı, dərman ehtiyatı baxımından vəziyyətini nəzərə alsaq, nə dərəcədə təhlükəli ola bilər?
Farmakoloq-həkim Müşfiq Hüseynov söyləyir ki, yeni ştammın daha yüngül simptomlarla müşahidə edilməsi hansısa təhlükənin olacağı ehtimalını zəiflədir: "Bəli, son günlərdə demək olar ki, hamı kütləvi şəkildə yoluxur. Amma sevindirici haldır ki, xəstəlik 14 günə deyil, daha az müddətə bitir. Bu variantda iybilmə, dadbilmənin itməsi çox nadir hallarda olur. Ciyərlər elə də ciddi zərər görmür. Əsas simptomları tamamilə qripə bənzəyir. Qızdırma, öskürək, boğazda ağrı, burun axması kimi simptomlarla müşahidə olunur".
"Buna görə də Azərbaycan səhiyyəsinin vəziyyəti necə olur-olsun, bu ştamla bağlı hansısa təhülkə hiss etmirəm və olası da deyil. Xəstəxanalar bu işdə kifayət qədər professionallaşıb. İnsanlar da anlayıblar ki, hər xırda şeydən ötrü həkimə getməyin mənası yoxdur. Çox adam evdə özü-özünü müalicə edir və edəcək", - deyə mütəxəssis bildirib.
Həkim qeyd edir ki, "Omicron" ştammı Azərbaycanda çoxdan var: "Mən digər müsahibələrimdə də demişəm. Bu variantın Azərbaycanda aşkarlanması son günlərdə təsdiq edilsə də, mən hesab edirəm ki, bizdə çoxdan var idi. Sadəcə laboratoriyalar bu ştammı təyin edə bilmirdi. Həkimlər simptomlarından əmin deyildilər. PCR testinin də neqativ çıxmasına görə yoluxanlar qrip kimi müalicə olunurdular. 15-20 gündür ki, şəhərin böyük bir hissəsi, ən çox da uşaqlar qripdirlər".
Həmsöhbətimizin fikrincə, bu cür kütləvi yoluxma COVID-19-un sonuncu dalğasının yaşandığını təsdiqləyir: "Mən bunu sentyabr ayında da demişdim, yenə də bildirirəm ki, mart-aprel aylarında COVID-19 tamamilə bitəcək və həyat normal axarına geri qayıdacaq. Yay aylarında koronavirusla bağlı hansısa problem olmayacaq".
"Yoluxma sayında bir müddət artım müşahidə olunacaq. Bu da əvvəlcədən təxmin olunan idi. Fevral-mart aylarında sonuncu dalğa yaşanacaq. Amma bundan da qorxmaq lazım deyil. Ümumiyyətlə, "Delta" variantı haqqında da qorxulu fikirlər səsləndirilirdi. Amma təhlükəsi deyildiyi kimi hiss olunmadı. İnsanlar artıq özlərini necə qorumalı olduqlarını, hansı halda həkimə müraciət etməli, necə müalicə olunmalı olduqlarını bilirlər", - deyə Hüseynov fikrini yekunlaşdırdı.
Çirkli insanlarla necə təmiz davranmaq olar? Məşhur komik aktyordan müdrik məsləhətlər
Sovet kinematoqrafiyası həqiqətən də gözəl komedik filmlər çəkmişdir. Biz əfsanəvi üçlük - Nikulin, Vitsin və Morqunovu unuda bilərikmi? Əsla yox.
“Ədəbiyyat və incəsənət” portalı xəbər verir ki, böyük Sovet komediya ustadı Yuri Nikulinin dünyadan köçməsindən tam 23 il keçir. Bu münasibətlə sənətkarın yaşadığı binada - Moskvanın Böyük Bronn küçəsində memorial lövhə ucaldılıb (şəkildə).
Dostları və həmkarları Nikulini həmişə ətrafdakıların əhval-ruhiyyəsini qaldırmağı bacaran həyatsevər, şən bir insan kimi yadda saxlayıblar. Amma çoxları bilmir ki, Nikulin həm də müdrik fikirlər, xırda əhvalatlar yazıb, yəni ki, onu aktyor olmasıyla bərabər yazıçı kimi də təqdim etmək mümkündür. Bu gün biz aktyorun ən parlaq fikirlərini bir yerdə xatırlayacağıq.
Nikulin sağlığında danışırdı ki, yaxşı yumor hissi və səhnəyə sevgi ona atası tərəfindən aşılanıb. O, daim zarafat edirdi və həyata ironiya ilə, şən və nikbin yanaşırdı.
Az adam xatırlayır ki, kinoya və sirkə düşməzdən əvvəl böyük komediyaçı Böyük Vətən müharibəsi keçmişdir.
Orta məktəbi bitirdikdən dərhal sonra qırmızı orduya xidmətə çağırılmış, Leninqrad altında döyüşmüşdür.
- Mənim xarakterim gəncliyimdə sərtləşdi. Mən həmişə əmin idim ki, hansı problemlər yaransa da onları həll etmək mümkündür. Təki bir daha müharibə olmasın!
- Sən sevincindən göyə tullanırsansa, mütləq diqqət et ki, kimsə altından yeri çəkməsin.
- Həqiqətən, xoşbəxt olmaq və yalnız öz həyatınıza diqqət yetirmək paxıl, xəyanətkar və yaltaqlara zərər vermək üçün ən yaxşı yoldur.
Heç vaxt alçaq insandan qisas almağa cəhd göstərməyin. Sizin xoşbəxt olmağınız elə ən böyük qisasınızdır.
-Mənə kinoda yalnız başdanxarab, səfeh, boşboğaz və alkoqoliklərin rollarını oynamağı təklif edirlər, amma mən bundan darılmıram. Yəqin belə məsləhətdir. Niyə də olmasın, əgər insanlar əylənirsə, demək bu obrazları canlandırmağa dəyər.
- Mükəmməl yumor hissi ilə mükəmməl insanlar yoxdur.
- Yumor hissi yaşamağa kömək edir. Onun köməyi ilə xoşagəlməz vəziyyətləri komik hala gətirə bilirsiniz. Ruhən də yüngülləşirsiniz.
- Zaldakı bütün insanları eyni zamanda güldürmək mümkün deyil. Mən bir neçə dəfə sirkdə belə bir vəziyyəti müşahidə etmişəm: Baxın, zal qəhqəhə sədaları ilə dolduğu zaman bir tutqun adam oturub, gülmür. Az sonra zalda sakitlik bərqərar olduğu zaman bu dəfə birinin qəhqəhə çəkdiyinə şahid olursan. Hər kəsin fərqli bir yumor hissi var, amma bir insanı güldürmək mümkün oldusa, o zaman gününün boş yerə keçmədiyini demək olar.
İstəkli oxucularımıza onu da bildirək ki, Yuri Nikulin həm də lətifələr qoşmaqda mahir idi, bu lətifələr dillər əzbəri idi. Onlardan biri isə xüsusən məşhur idi:
Bir dəfə Allah yerə enir (əğstafurulla), 3 ən böyük ölkələrin rəhbərləri ilə görüşür. Amerikalı Reyqan, britaniyalı Tetçer və sovet adamı Qorbaçovla.
Reyqan ondan soruşur:
- Qurban olduğum, Amerikada cənnət nə zaman qurular?
Allah cib dəftərçəsinə baxıb deyir:
- 27 ilə.
Reyqan köks ötürür:
- Heyif ki, mən o günü görə bilməyəcəm.
Sonra Tetçer soruşur:
- Qurban olduğum, bəs Britaniyada?
Allah dəftərçədən - 35 ilə - deyə oxuyur.
Tetçer də içini çəkir:
- Əfsus, mən də o günü görə bilməyəcəm.
Nəhayət Qorbaçov sual edir:
- SSRİ-də necə, cənnət haçan qurulacaq?
Allah növbəti dəfə cib dəftərçəsinə baxıb köksünü ötürür:
- Təəssüf ki, mən o günü görə bilməyəcəm.
Hazırladı: Kənan Məmmədli
Pulluların nəzərinə - Roma şəhərindəki məşhur “Avrora” villası hərraca çıxarılıb
Diqqət! Pulunu xarici daşınmaz əmlaka yatırdan milyardçılar üçün gözəl bir xəbər var. Romanın məşhur Avrora villası hərraca çıxarılıb.
“Ədəbiyyat və incəsənət” portalı BBC-yə istinadən xəbər verir ki, bu, heç də adi villa deyil, onun divarlarını Karavadconun yeganə freskası bəzəyir (şəkildə).
Ötən həftəsonu hərrac ticarətində villaya 471 milyon avro qiymət qoyulmuşdu, amma alıcı çıxmayıb deyə aprel ayında hərrac təkrarlanacaq. Bu dəfə qiymətin 20 faiz azaldılacağı nəzərdə tutulur.
Bu sayaq informasiyalardan hansısa bir azərbaycanlının yararlanacağı sizə fantastik görünməsin. Yararlanırlar, özü də, necə lazımdır.
Siciliya” The White Lotus” serialına qucaq açacaq
Amerikalı rejissor Mayk Vaytın səhnələşdirdiyi “The White Lotus” serialı tropik bölgədə yerləşən otelə gələn qonaqların başına gələnlər barədədir.
Filmdə qonaqlar bir həftə oteldə dincəlir və tətil edirlər. Hər keçən gün onların başına bir macəra gəlir, onlar qaranlıq və mürəkkəb hadisələrlə üzləşir.
Böyük maraq doğuran serialın daha böyük maraqla gözlənilən ikinci sezonunun İtaliyanın Siciliya adasında çəkiləcəyi məlum olmuşdur.
TASS agentliyi xəbər verir ki, “HBO” telekanalı serialın ikinci sezonunun İtaliyada keçiriləcəyi ilə bağlı əvvəlki xəbərləri rəsmi olaraq təsdiqləyib.
Komediya, dram və macəra janrlarında çəkilən filmin baş rollarını tanınmış sənətkarlar Murray Bartlett, Conni Brayton, Jennifer Kollidj və Aleksandra Daddario calandırırlar.
“Yuğ” teatrı “Təklif” tamaşasını təqdim etdi
Azərbaycan Dövlət “Yuğ” Teatrının yaradıcı kollektivi ilin ilk səhnə əsəri - “Təklif” tamaşasını yanvarın 23-də Abdulla Şaiq adına Dövlət Kukla Teatrında nümayiş olunub.
Bu səhnə əsərinin quruluşçu rejissoru Günay Səttar, quruluşçu rəssamı Əməkdar rəssam Rəşid Şerif, bəstəkarı Əməkdar artist Vüqar Camalzadədir.
Tamaşada Xalq artisti Vidadi Həsənov, aktyorlar Zümrüd Qasımova və Elgün Həmidov çıxış ediblər.
Sözügedən səhnə əsəri təkrar yanvarın 29-da teatrsevərlərin ixtiyarına veriləcək.
Azərbaycanlı rejissorun filmi Triest Film Festivalının proqramında yer alıb
Azərbaycanlı rejissor Hilal Baydarovun “Durna çırağı” bədii filmi İtaliyada 33-cü Triest Film Festivalının proqramında yer alıb.
AzərTAC xəbər verir ki, yanvarın 21-dən 30-dək keçirilən festivalın məqsədi audiovizual istehsal sahəsində məlumatların yayılması, müzakirə və əməkdaşlığı təşviq etməkdir. Hilal Baydarovun filmi yanvarın 24-də nümayiş olunacaq.
“Durna çırağı” filmində hüquq təhsili olan qızla dörd qadını oğurlamaqda ittiham edilən kişi arasında münasibətdən bəhs edilir.
Filmdə Orxan İskəndərli, Elşən Abbasov, Hüseyn Nəsirov, Rəna Əsgərova, Aytəkin Mirişova, Məryəm Nağıyeva, Nigar İsayeva, Səda Həsənova, Kamran Hüseynov və başqaları rol alıblar. Filmin bəstəkarı Kənan Rüstəmlidir.
Qeyd edək ki, sözügedən film 2021-ci ildə 34-cü Tokio Beynəlxalq Film Festivalında “İncəsənətə töhfəyə görə” xüsusi mükafata layiq görülüb.
Bakıda akvarel əsərlərinin satış sərgisi təşkil olundu
Yanvarın 23-də Xətai Sənət Mərkəzində “Akvarel təəssüratları” adlı akvarel əsərlərindən ibarət satış sərgisi açılıb.
Sərgidə iştirak etmək üçün 150-dən çox rəssamın 400-ə yaxın əsəri təqdim edilib. İlkin seçimlərdə 60 rəssam 80 əsəri ilə sərgidə iştirak etmək hüququ qazanıb.
Beynəlxalq Akvarel Cəmiyyətinin 10 illik yubileyinə həsr olunmuş sərgi Milli Məclisin Mədəniyyət Komitəsi, Mədəniyyət Nazirliyi, Azərbaycan Rəssamlar İttifaqı, Azərbaycan Dövlət Rəsm Qalereyası, Beynəlxalq Akvarel Cəmiyyətinin Azərbaycan nümayəndəliyi və Xətai Sənət Mərkəzinin nəzdindəki Xətai Akvarel Qalereyasının təşkilatçılığı ilə reallaşıb.
İştirakçı rəssamlara hədiyyələr və sertifikatlar təqdim ediləcək.
