Azərbaycanda mədəniyyət obyektlərində say məhdudiyyəti olmayacaq.

Bu barədə Nazirlər Kabinetinin qərarında qeyd edilib.

Artıq martın 6-dan mədəniyyət obyektlərinin, eləcə də kinoteatrların, teatrlar və konfrans zallarının, istirahət və əyləncə məkanlarının, həmçinin uşaq əyləncə məkanlarının (bulvar və parkların ərazisində olanlar daxil olmaqla), habelə iri ticarət mərkəzlərinin nəzdindəki uşaq və digər əyləncə mərkəzlərinin, kinoteatrların fəaliyyəti ilə bağlı vaxt və say məhdudiyyəti ləğv edilib.

Ukraynanın və Rusiyanın xalq artisti Nikolay Baskov "müharibənin təbliği və əsaslandırılması"nda şübhəli bilinərək Ukrayna məhkəməsi tərəfindən qiyabi həbs cəzası alıb, Ukrayna prokurorluğu bununla bağlı vəsatəti təmin edib.

“Ədəbiyyat və incəsənət” portalı RİA-Novosti agentliyinə istinadən xəbər verir ki, bu barədə Ukraynanın Baş prokuroru İrina Venediktova məlumat yayıb.

Daha əvvəl Baskov Rusiya prezidentinin hərəkətlərini dəstəklədiyi barədə fikrini İnstagram postuna yerləşdirərək bildirmişdi ki, Rusiyanın hərəkətləri "beynəlxalq hüquqa tam uyğundur", həmçinin,  bəyan edilən əməliyyatın məqsədi "Rusiyanın sərhədlərinin aşkar hərbi təhlükələrdən qorunması"dır. 

Müğənni sosial şəbəkədə daha bir dəfə yazıb ki, bu, "sülhyaratma əməliyyatı, soyqırımının sonu, Rusiyaya hücumun qarşısının alınması, həmçinin Rusiyanın özünü müdafiə etməsi və müttəfiqlərinin müdafiəsi"dir.

Xatırladaq ki, dörd gün öncə Ukrayna analoji qərarı müğənni Oleq Qazmanov barəsində də çıxarmışdı.

Ölkəmizi “Avroviziya-2022”də təmsil edəcək mahnı seçilib.

Bu barədə ölkəmizi yarışmada təmsil edəcək Nadir Rüstəmli bildirib.

Onun sözlərinə görə, mahnının adı yaxın günlərdə açıqlanacaq.

Qeyd edək ki, İtaliyanın Turin şəhərində keçiriləcək və şüarı "The sound of beauty" ("Gözəlliyin səsi") olan "Avroviziya-2022" mahnı müsabiqəsinin yarımfinal mərhələləri mayın 10 və 12-də, final mərhələsi isə mayın 14-də "PalaOlimpico"da təşkil olunacaq.

Azərbaycan təmsilmisi ikinci yarımfinalda mübarizəyə qoşulacaq.

Xəbər verdiyimiz kimi, Azərbaycan Teatr Xadimləri İttifaqında “Gənc rejissorların yaradıcılıq laboratoriyası”nın “Baxış-2” teatr festivalı keçirilir. 

Benkrt Alforsun “İllüziyaçılar” əsəri əsasında səhnələşdirilən eyniadlı tamaşasının nümayişi ilə başlanan festivala (Tərcüməsi Zümrüd Quliyevaya məxsus əsərə Müşfiq Əliyev quruluş verib. Tamaşada rolları Kərəm Hadızadə, Zümrüd Quliyeva və Əməkdar artist Elnur Hüseynov canlandırıblar) bu gün yekun vurulacaq.

Ümumiyyətlə, festivalda “Gənc rejissorların yaradıcılıq laboratoriyası”nın beş və İttifaqın digər laboratoriyalarının qonaq qismində üç tamaşası oynanılıb. 

Səhnə əsərləri Azərbaycan Teatr Xadimləri İttifaqının Mustafa Mərdanov adına səhnəsində nümayiş etdirilib.

Sabah, martın 10-da isə festival çərçivəsində nümayiş edilən tamaşaların mükafatlandırma mərasimi təşkil olunacaq. 

Qeyd edək ku, “Gənc rejissorların yaradıcılıq laboratoriyası”nın bədii rəhbəri Azərbaycan və Kalmıkiya respublikalarının Əməkdar incəsənət xadimi Bəhram Osmanovdur.

XX əsr Azərbaycan ədəbiyyatının Əbdürrəhimbəy Haqverdiyev, Cəlil Məmmədquluzadə, Süleyman Rəhimov, Əli Vəliyev, Mir Cəlal, Ənvər Məmmədxanlı, Anar, Əzizə Cəfərzadə, Maqsud İbrahimbəyov, Yusif Səmədoğlu, Elçin, İsi Məlikzadə, Mövlud Süleymanlı, Kamal Abdulla, Şahmar, Sara Nəzirova, Rafiq Tağı, Saday Budaqlı, Etimad Başkeçid kimi tanınmış yazıçılarının çex dilinə tərcümə edilmiş hekayələrinin toplandığı “Sarı gəlin” Azərbaycan hekayələri antologiyası kitabı Çexiyada işıq üzü görüb.

Azərbaycan Dövlət Tərcümə Mərkəzindən AzərTAC-a bildirilib ki, kitaba daxil edilən əsərlərin orijinaldan çex dilinə tərcümə müəllifləri tanınmış çex tərcüməçiləri İvana Bozdexova və Klara Xoulikovadır.

Praqanın zəngin ənənəli “Karolinum” nəşriyyatında çap olunmuş kitab akademik Nizami Cəfərovun çex dilinə tərcümə olunmuş “Ön söz”ü ilə təqdim olunur.

Nəfis tərtibatda nəşr edilmiş toplunun yaxın günlərdə Praqanın mərkəzi kitabxanalarına, universitet və kitab evlərinə yerləşdiriləcəyi, tanıtım və təqdimat mərasimlərində elmi-ədəbi ictimaiyyətə təqdim ediləcəyi gözlənilir.

İldə dörd dəfə görüşünüzə gələn “Qobustan” sənət toplusunun yaz nömrəsi çapdan çıxıb. Toplu 8 Mart-Beynəlxalq Qadınlar Günü ərəfəsində çıxdığı üçün sənətin müxtəlif yönlərində tanınmış Azərbaycan qadınlarına həsr edilib. Öz sahələrində ilklərə imza atmış XIX-XX əsrin qadın simaları da var topluda, müasir xanımlar da.

Yazıçı Təranə Vahid “Odla təmas və ya zərif qanadların uçuşu” məqaləsində sənətin müxtəlif yönlərində birinci olan xanımlardan yazır. 

Dərgi yazıçı Günel Anarqızının ad gününü Narıngül Nadirin məqaləsi ilə təbrik edir. 

Kəmalə Səlim Müslümqızı “Cənubi Azərbaycanın xatunu”ndan, Pərvin Etisamidən söz açır. 

Gənc filoloq Xumar Paşazadə Nurəngiz Gün haqda məqaləsində şairənin ömür və yaradıcılıq yoluna nəzər salır.

Sevilən aktrisa Zemfira Əbdülsəmədova dərginin əməkdaşı Esmira Nəzərli ilə söhbətində həyat və yaradıcılıq yolunu yada salır. Humay Quliyevanın “Anam haqda dörd esse” silsiləsini dərginin baş redaktoru Pərvin “Uçmaq üçün” məqaləsi ilə təqdim edir. 

Sevinc Kərimzadə gənc və istedadlı vokalist xanım İslama Abdullayeva ilə söhbətinin təəssüratlarını bölüşür. Sənətşünaslıq üzrə fəlsəfə doktoru Nuranə Səlimli “Rəssam qadınlarımız” məqaləsində təsviri sənətimizdə izləri olan xanımlardan söz açır. 

Aysel Kərim “Yoxluğunu bilə-bilə” məqaləsi ilə bəstəkar Elza İbrahimovanın təkrarsız mahnılarından və kədərli həyat yoldan danışır. 

Aynur Hilali “Tarixdə türk qadını” essesi ilə Azərbaycan-türk xanımlarının xarakterinin tarixi köklərinə nəzər salır. 

Zülfiyyə Qəniyevanın "Qurama"sında fərqli qadınlar haqda kiçik, amma maraqlı faktlar yer.

“Söz gənclərdə” layihəsində Azərbaycan Dövlət Pedaqoji Universitetinin tələbələri Qarabağ müharibəsi zamanı fədakarlıqlar göstərmiş Fulya Öztürkə həsr olunmuş “Fulya” filminə aid təəssüratlarını bölüşürlər.

Günün fotosu:

Avropa nüvə partlayışı vahiməsi içindədir

Rusiyanın Zaporojye Atom Elektrik Stansiyasına bomba atması və orada yanğın törədilməsi artıq Avropanı təşvişə salıb. Belçikada apteklərdə vətəndaşlara ailəbaşına 10 qutu pulsuz yod paylayırlar. 

Foto: Euronews

Sumqayıtda fəaliyyət göstərən “Günəşim” kukla teatrı sabah balaca tamaşaçıları üçün gün ərzində 4 dəfə tamaşa təqdim edəcək. 

Saat 11-də “Balıqçı pişik” tamaşası Azərbaycan dilində, 13-də rus dilində oynanılacaq. 

Saat 15-də isə “Qırmızı papaq” Azərbaycan dilində, 17-də rus dilində oynanılacaq.

Balaca tamaşaçılar, “Günəşim” yolunuzu gözləyəcək!

Martın 5-də Heydər Əliyev Sarayında Azərbaycan muğam sənətinin, Qarabağ̆ xanəndəlik məktəbinin görkəmli nümayəndəsi, Xalq artisti Xan Şuşinskinin xatirə gecəsi keçiriləcək.

“Şuşa İli” çərçivəsində baş tutacaq gecədə Xalq artistləri Alim Qasımov, Mənsum İbrahimov, Nəzakət Teymurova, Mələkxanım Eyyubova, Teyyub Aslanov, Gülyaz Məmmədova, Gülyanaq Məmmədova, Natiq Şirinovun rəhbərliyi ilə “Natiq” ritm qrupu, Əməkdar artistlər Təyyar Bayramov, Sevinc Sarıyeva, Anar Şuşalı, Babək Niftəliyev, Səbuhi İbayev, tanınmış̧ xanəndələr Səbinə Ərəbli, Mirələm Mirələmov, Anar Quliyev, Rəvanə Qurbanova, Eldəniz Məmmədov, Əməkdar artist Nailə Məmmədzadənin rəhbərliyi ilə “Azərbaycan mirvarisi” rəqs ansamblı və Bakı Xoreoqrafiya Akademiyasının rəqs ansamblı iştirak edəcək. İfaçıları Rövşən Qurbanovun rəhbərliyi ilə “Buta” instrumental ansamblı müşayiət edəcək.

Xatirə gecəsində xanəndənin repertuarında yer alan “Mahur-Hindi”, “Bayatı-Qacar”, “Qatar” muğamları, “Qarabağ̆ şikəstəsi”, “Arazbarı”, “Heyratı” zərbi muğamları ilə yanaşı, xalq mahnıları və təsniflər ifa olunacaq. Həmçinin Xan Şuşinskinin bəstələdiyi “Qəmərim”, “Şuşanın dağları”, “Ay gözəl”, “Məndən gen gəzmə”, “Al yanağında”, “Dağlarda çiçək”, “Gözəl yarım”, “Dilbərim”, “Ay qəşəng ceyran”, “Ay qara qız”, “Qızılgül” və sairə mahnıları incəsənət ustalarının ifasında təqdim olunacaq.

Biletləri sarayın kassasında və ya onlayn əldə edə bilərsiniz.