Super User
Yeni “The Batman” filmi tamaşaçılara təqdim olunub
Məşhur “Batman” filminin yeni bölümünün ilk fraqmenti ötən həftə paylaşılmışdı. Robert Pattinsonun baş rolda oynadığı film dünən - martın 4-ü tamaşaçılara təqdim olunub.
Qeyd edək ki, filmdə Zoe Kraviz, Paul Dano, Ceffri Uric, Endi Serkis, Kolin Farel və Con Turturro yer alıb.
Filip Barkley: VII Britaniya Film Festivalında 7 ekran əsəri nümayiş ediləcək
Bu il Böyük Britaniya üçün çox xüsusi bir ildir. Biz Azərbaycanla Britaniya arasında diplomatik əlaqələrin 30-cu ildönümünü qeyd edirik. İkitərəfli əlaqələrimiz çox güclüdür və əminəm ki, gələcəkdə daha da sıx olacaq.
AzərTAC xəbər verir ki, bu sözləri Böyük Britaniya səfirinin müvəqqəti işlər vəkili Filip Barkley VII Britaniya Film Festivalının açılışı zamanı jurnalistlərə müsahibəsində deyib.
Festivalın ilk günü “Hersoq” retro-komediyasının nümayiş olunduğunu deyən Barkley bildirib ki, filmdə baş rolu Cim Brodbent oynayır: “Aktyor “Harry Potter and the Half-Blood Prince” filmində professor Horace Sluqhorn rolunu möhtəşəm oynayıb. Mənim qızlarım bu filmi çox sevir. Düşünürəm ki, tanınmış kino tənqidçilərinin rəğbətini qazanan “Hersoq” tamaşaçılara xoş anlar bəxş edəcək”, - deyə Barkley əlavə edib.
Bildirib ki, martın 15-dək davam edəcək festival çərçivəsində 7 film nümayiş ediləcək. Filmin nümayişləri Nizami Kino Mərkəzi və “YARAT” Müasir İncəsənət Məkanında olacaq.
İlin qadın müğənnisi Oliviya Rodriqo olub
Nüfuzlu “Billboard Women in Music Awards” mükafatının builki qalibi müğənni Oliviya Rodriqo olub.
Olivia Isabelle Rodrigo amerikalı aktrisa, müğənni və bəstəkardır.
Digər nominasiyalarda qalibləri də təqdim edirik: Bonni Rayt ilin ikonası, Qabbi Barret isə əsas yüksələn ulduz kimi mükafatlandırılıb.
O ki qaldı əvvəlki illərə, 2021-ci ildə mükafatlar heç kimə verilməyib. 2020-ci ildə isə əsas mükafatı amerikalı hip-hop sənətçisi Cardi B. qazanıb. Müğənni Cennifer Lopez musiqi sənayesinə xidmətlərinə görə ilin ikonası, kantri müğənnisi Dolli Parton isə 2020-ci ilin əsas hitmeykeri hesab edilib.
İspan yazıçısı Maria Saraqosa İdalqo “Premio de Azorina romana” mükafatına layiq görülüb
İspan yazıçısı Maria Saragosa İdalqo “Alov kitabxanası” romanına görə İspaniyanın ən mühüm ədəbiyyat mükafatına - “Asorinin roman üçün mükafatı”na layiq görülüb.
45 min avro məbləğində pul çeki və qızılı statuetkadan ibarət mükafat 1994-cü ildən təqdim olunur.
Genoveva Vilar təxəllüsü ilə tanınan yazıçının romanında hadisələr müharibədən sonrakı dövrdə cərəyan edir. Süjetə görə kitabxananın gənc əməkdaşı vətəndaş müharibəsində qalib gələn tərəfin yandırmaq istədiyi kitabları qorumaq məsuliyyətini öz üzərinə götürür.
Yeri gəlmişkən, “Premio de Azorina romana” mükafatı ispan dilində yazılmış və çap olunmamış romanlara görə verilir.
“Canımda bir susmaz ağrı darıxır...” - Şəfa Vəlinin yeni şeiri
Əlimdə bir qələm qırıldı, şair,
Bir şeir çatmadı mənzil başına...
Mən də dərd edirəm, soruşma nəyi,
Açıb-bükəmmirəm, bəzək vururam
Döydüyüm başımla səbir daşına...
Adını bilmirəm, bircə gülüm var,
Sulamaq yadımdan elə çıxır ha...
Son dəfə tökdüyüm bir ovuc sudan
Yarısı sıçradı şeirimin üstə...
Şeirim suya dönüb elə axır ha...
Adını söylədi son hekayəmin,
"Bacım da oxuyub..." - yaman sevindim...
Bulud gözlərimin, qar əllərimin
Sevinci çırpıldı ruhuma, şair,
Bacım: "Oxudum da... Unutdum..." - dedi...
"Yazıçı günü"ymüş...
Yazıram, şair,
Bütöv xoşbəxtlikdi sonuncu abzas.
Di gəl, naşükürdü insan ürəyi...
Şeirlər yazılmır toy dəftərinə,
Hekayə oxumur bank işçiləri...
Bir esse boyuyla gülmür ofisiant,
Demir ki:" Cibimə iki misra bas."
...ah, şair, qələmim qırıldı, axı...
Daha şeirlərim yadımda qalar?
"Tanrı şəfa versin!" - təsəllisiylə
Canımda bir susmaz ağrı darıxır...
Bir gün bu ağrıya könül bağlayıb
Ölsəm, təsəllilər adımda qalar?
(2022)
Filarmoniyada "Gənclərə dəstək" layihəsi çərçivəsində növbəti konsert keçirilib
Müslüm Maqomayev adına Azərbaycan Dövlət Akademik Filarmoniyasında "Gənclərə dəstək" layihəsi çərçivəsində "Milli musiqi alətlərimiz milli sərvətimizdir" adlı konsert keçirilib.
Konsertdə Azərbaycan Respublikasının Xalq artisti Ağaverdi Paşayevin dirijorluğu ilə Azərbaycan Dövlət Xalq Çalğı Alətləri Orkestri çıxış edib.
Gənc istedadların ifasında Üzeyir Hacıbəylinin "Koroğlu" operasından "Cəngi", Süleyman Ələsgərovun "Şalaxo", Süleyman Ələsgərovun "Vətənimdir", Həsən Rzayevin "Çahargah rapsodiyası", Vittorio Montinin "Çardaş" kimi Azərbaycan və Avropa bəstəkarlarının əsərləri səsləndirilib.
Konsertdə Azərbaycan Dövlət Uşaq Filarmoniyasının Uşaq Gənclər Xalq Çalğı Alətləri Orkestrinin solistləri, həmçinin bölgələrdən gələn tələbə və şagirdlər çıxış ediblər.
Bakı Xoreoqrafiya Akademiyasının tələbə və şagirdləri beynəlxalq festivalda uğur qazanıblar
İsveçin paytaxtı Stokholm şəhərində onlayn formatda keçirilən “AURORA” ifaçılıq və bədii sənət üzrə II Beynəlxalq müsabiqə-festivalda Bakı Xoreoqrafiya Akademiyasının tələbə və şagirdləri 2 nominasiya üzrə: Xalq artisti Yusif Qasımovun yetirmələri olan akademiyanın orta ixtisas (kollec) tələbələrindən ibarət “Bakının ulduzları” rəqs ansamblı milli rəqs nominasiyasında, Əməkdar mədəniyyət işçisi Lyudmila Qutlyanskayanın yetirmələri olan tam orta məktəbin şagirdləri Əmirsalamova Şirin, Bernadina Liana, Dəmirova Leyla klassik rəqs nominasiyasında iştirak ediblər. Klassik rəqs nominasiyasında D.Minkusun “Amurlar”, L.Delibin “Pyatsekato” əsərlərindən Pas-deux-trois ilə çıxış edən Bernadina, Əmiraslanova və Dəmirova I dərəcəli Laureat, “Cəngi” və “Cıdır düzü” rəqs nömrələri ilə müsabiqəyə qatılan akademiyanın “Bakının ulduzları” rəqs ansamblı isə müsabiqənin Qrand-Prix mükafatına layiq görülmüşdür.
Müsabiqədə Azərbaycan Respublikasından yalnız Bakı Xoreoqrafiya Akadmiyası iştirak edirdi, bununla yanaşı Rusiya Federasiyası, Norveç, Belorusiya, Niderland, Tatarstan, Özbəkistan, İsveç, Finlandiya, Fransa kimi ölkələrdən (ümumilikdə 18 ölkədən) iştirakçılar qatılmışdılar.
Müsabiqənin əsas məqsədi və amalı yaxın və uzaq xarici ölkələrlə mədəni əlaqələrin inkişafı və möhkəmləndirilməsi, mədəni mübadilənin aktivləşdirilməsi, festival iştirakçıları arasında onlayn formatda ünsiyyət üçün yaradıcı mühitin yaradılması, onlayn formatda qarşılıqlı əlaqə, təcrübə mübadiləsi üçün şəraitin yaradılmasıdır.
Kanadalı məşhur soydaşımızdan muzeyə 11 soyuq silah hədiyyəsi
Azərbaycan Milli Xalça Muzeyində Kanadada yaşayan soydaşımız, tanınmış silah ustası Emin Məmmədovun muzeyə bağışladığı yeni əl işlərinin təqdimatı keçirilib.
“Ədəbiyyat və incəsənət” portalı Mədəniyyət Nazirliyinə istinadən məlumat verir ki, əvvəlcə tədbir iştirakçıları muzeyə hədiyyə edilən nümunələrlə tanış olublar.
Milli Xalça Muzeyinin direktoru, Əməkdar mədəniyyət işçisi Şirin Məlikova təqdim olunan əl işləri haqqında məlumat verib. Bildirib ki, Emin Məmmədovun muzeyə hədiyyə etdiyi 11 ədəd soyuq silah nümunəsindən bir neçəsi ictimaiyyətə təqdim olunur. Bu unikal əl işləri sırasında XVIII əsrin sonuna aid, Qacarlar dövründə geniş yayılmış iki qalxan, XIX əsrə məxsus xəncər, həmçinin sənətkarın müəllifi olduğu qılınc və xəncərlər var. Böyük ustalıqla, yüksək zövqlə polad və tuncdan hazırlanmış qalxanlar incə, zəngin nəbati naxışlarla bəzədilib. Bu qalxanlar döyüş məqsədilə deyil, xüsusi mərasimlər üçün hazırlanır və dövrün yüksəkvəzifəli şəxslərinə hədiyyə edilirdi.
Muzeyin direktoru vurğulayıb ki, silah ustasının “Şəmşir” qılıncı və Qaşqay xəncər dəsti 2000-ci illərdə polad, dəri, ağac, buynuz kimi materiallardan hazırlanıb. Onların tiyələri üzərində “Azərbaycan” sözü və sənətkarın adı həkk edilib.
Təqdimat mərasimində çıxış edən mədəniyyət naziri Anar Kərimov bildirib ki, Azərbaycan Milli Xalça Muzeyinin kolleksiyası milli mədəni irs nümunələri ilə davamlı olaraq zənginləşir. Kanadada yaşayıb-yaradan Emin Məmmədov da bu işə öz töhfəsini verir. Yeni-yeni unikal sənət nümunələri yaradan sənətkar böyük xeyirxahlıq göstərərək onları doğma vətənindəki muzeyə bağışlayır.
Nazir qeyd edib ki, hazırda Azərbaycanın mədəniyyət strategiyasının əsas hədəflərindən biri maddi-mənəvi irsimizin qorunub saxlanılması və inkişaf etdirilməsidir.
“Xaricdə olan dəyərli irs nümunələrimizin ölkəyə qaytarılması çox əhəmiyyətlidir. Mədəniyyət Nazirliyi olaraq bu işdə səylərimizi daha da artırmışıq. Ötən il Azərbaycanın üç xalçasını hərraclardan alaraq ölkəmizə gətirdik. Onların ikisini Milli Xalça Muzeyinə, birini Milli İncəsənət Muzeyinə hədiyyə etdik. Ölkəmiz və mədəniyyətimiz üçün xüsusi əhəmiyyət kəsb edən bu işdə əməyi olan Birinci vitse-prezident Mehriban xanım Əliyevaya, Heydər Əliyev Fondu başda olmaqla bütün təşkilatlara, azərbaycanlı və xarici mesenatlara, kolleksiyaçılara dərin təşəkkürümüzü bildiririk...”, – deyə Anar Kərimov qeyd edib.
Nazir çıxışının sonunda Emin Məmmədova bu xeyirxah təşəbbüsünə görə təşəkkür edib, ona peşəsində yeni uğurlar arzulayıb.
Daha sonra çıxış edən AMEA-nın A.Bakıxanov adına Tarix İnstitutunun baş direktoru, tarix üzrə elmlər doktoru, professor Kərim Şükürov Azərbaycanda silah sənətinin çox dərin kökləri olduğunu söyləyib. Bildirib ki, silah nümunələri hərb tariximizin simvolu olmaqla yanaşı, gözəl bədii tərtibatı ilə sənət əsəri kimi də qiymətlidir.
Sonda Emin Məmmədov çıxış edərək göstərilən diqqətə görə tədbir iştirakçılarına təşəkkürünü bildirib.
Qeyd edək ki, Kanada vətəndaşı olan Emin Məmmədov Azərbaycanın qədim silahsazlıq sənəti ənənələrini yaşadır, bu sahədə tədqiqat və təbliğat aparır. O, 2021-ci ildə UNESCO tərəfindən Parisdə təşkil olunan “Sülh üçün mədəniyyət” (Culture for Peace) müsabiqəsində birinci yerə layiq görülüb.
Günün fotosu: Abramoviç “Çelsi”ni satışa çıxarmağa məcbur olub və…
Günün fotosu:
Abramoviç “Çelsi”ni satışa çıxarmağa məcbur olub və…
İngiltərədə yaşayan rusiyalı milyardçı Roman Abramoviç rusiyalı iş adamlarına tətbiq edilən sanksiyalara görə sahibi olduğu “Çelsi” futbol klubunu
satışa çıxarıb. O, gözəl bir jest edərək Putinə etiraz əlaməti olaraq əldə ediləcək vəsaiti yardım kimi Ukraynaya verəcək.
Foto: Euronews
Rəsm qalereysı: “Gernika”, Pablo Pikasso
Rəsm qalereysı:
“Gernika”, Pablo Pikasso
