Beynəlxalq Türk Mədəniyyəti və İrsi Fondunun prezidenti Günay Əfəndiyeva tanınmış modelyer-dizayner, Azərbaycan Milli Geyimlər Mərkəzinin rəhbəri, sənətşünaslıq üzrə fəlsəfə doktoru Gülnarə Xəlilova ilə görüşüb.

Fonddan AzərTAC-a bildirilib ki, görüşdə Azərbaycanın, bütövlükdə türk dünyasının zəngin adət-ənənələrinin, mədəniyyətinin təbliği məqsədilə birgə həyata keçirilən layihələr barədə müzakirələr aparılıb. Gülnarə Xəlilova fond üçün xüsusi hazırladığı Azərbaycan milli geyim nümunələrini təşkilatın muzeyinə hədiyyə edib.

Qeyd edək ki, keçən ilin noyabr ayında Beynəlxalq Türk Mədəniyyəti və İrsi Fondunda birgə əməkdaşlıq çərçivəsində Gülnarə Xəlilovanın Qarabağ bölgəsinə xas geyim nümunələrindən ibarət “Qarabağ” milli geyim kolleksiyasının təqdimat mərasimi keçirilib. Başlanğıcını türk dünyasının ən qədim yazılı abidələrindən olan "Kitabi-Dədə Qorqud" eposundan götürən kolleksiya, əsrlər boyu formalaşmış milli adət-ənənələri özündə təcəssüm etdirir. Milli geyimlərdə Qarabağın 12 tarixi şəhəri – Ağdam, Ağdərə, Cəbrayıl, Füzuli, Xankəndi, Xocalı, Xocavənd, Kəlbəcər, Qubadlı, Laçın, Şuşa, Zəngilan əks olunub.

Təqdimat Azərbaycanın tarixi torpaqlarının işğaldan azad edilməsi ilə qazanılan Şanlı Zəfər Gününə həsr olunub.

Tədbirdə Azərbaycanın görkəmli dövlət, ictimai və mədəniyyət xadimləri, səfirlər, beynəlxalq təşkilatların rəhbərləri iştirak edib.

Milli Məclisin Mədəniyyət komitəsinin 2022-ci ilin yaz sessiyasında ilk iclası keçirilib.

Milli Məclisin Mətbuat və ictimaiyyətlə əlaqələr şöbəsindən bildirilib ki, videokonfrans formatında keçirilən iclası açan komitə sədrinin müavini Fazil Mustafa gündəlik barədə məlumat verib.

Sonra komitədə 2021-ci ilin payız sessiyasında görülən işlərin hesabatı təqdim edilib. Fazil Mustafa diqqətə çatdırıb ki, ötən müddətdə komitənin 14 iclası keçirilib, 21 məsələyə baxılıb, 6 qanun layihəsi, o cümlədən bir sıra qanunlara dəyişiklik və əlavələrin edilməsi barədə məsələlər müzakirə olunub. Qeyd olunub ki, komitə üzvləri, həmçinin “Azərbaycan Respublikasının 2022-ci il dövlət büdcəsi haqqında” və “Turizm haqqında” qanun layihələri ilə bağlı müzakirələrdə iştirak ediblər, qeyd və təkliflərini bildiriblər.

Diqqətə çatdırılıb ki, payız sessiyası ərzində komitənin ünvanına 1012 müraciət daxil olub. Müraciətlər baxıldıqdan sonra lazımi tədbirlərin görülməsi üçün aidiyyəti qurumlara göndərilib.

Daha sonra iclasda komitənin 2022-ci ilin yaz sessiyası üçün iş planı barədə məlumat verilib. Komitə sədrinin müavini bildirib ki, bu sessiyada qanunvericilik təşəbbüsü qaydasında təqdim edilən qanunvericilik aktları, “Qeyri-maddi mədəni irsin qorunması haqqında” qanun layihəsi müzakirəyə çıxarılacaq. Plana əsasən, parlamentin digər komitələrindən daxil olan layihələrə rəy və təkliflərin hazırlanması, habelə dinləmələrin keçirilməsi nəzərdə tutulub. Eyni zamanda, komitə üzvləri tərəfindən vətəndaşların qəbulu, daxil olan müraciətlərlə iş, 2022-ci ilin yaz sessiyası dövründə komitənin fəaliyyətinə dair hesabatın hazırlanması ilə bağlı müddəalar da iş planında öz əksini tapıb.

Müzakirələr zamanı çıxış edən deputatlar Sabir Rüstəmxanlı və Novruzəli Aslanov payız sessiyasında komitə sədrinin və üzvlərinin səmərəli fəaliyyət göstərdiyini qeyd ediblər, yaz sessiyasının iş planı barədə fikir və təkliflərini səsləndiriblər.

Tədbirdə Mədəniyyət komitəsinin 2021-ci ilin payız sessiyasında görülən işlər barədə hesabatı qənaətbəxş hesab edilib, komitənin 2022-ci ilin yaz sessiyası üçün iş planı təsdiqlənib.

Onlayn iclasda komitə üzvləri Ülviyyə Ağayeva, Nizami Cəfərov, Əziz Ələkbərov, Cavanşir Feyziyev, Ülviyyə Həmzəyeva, Mixail Zabelin iştirak ediblər.

Milli Məclisin Mədəniyyət komitəsinin 2022-ci ilin yaz sessiyasında qanunvericilik təşəbbüsü qaydasında təqdim edilən qanunvericilik aktları, “Qeyri-maddi mədəni irsin qorunması haqqında” qanun layihəsi müzakirəyə çıxarılacaq.

Parlamentin Mətbuat və ictimaiyyətlə əlaqələr şöbəsindən bildirilib ki, Mədəniyyət komitəsinin iş planına əsasən, yaz sessiyasında parlamentin digər komitələrindən daxil olan layihələrə rəy və təkliflərin hazırlanması, habelə dinləmələrin keçirilməsi nəzərdə tutulub.

 Sumqayıtda kukla teatrı fəaliyyətə başlayıb. Sumqayıt Gənclər Evində yerləşən teatrın təsisçisi Ayişə Səfərli  “Ədəbiyyat və incəsənət” portalına açıqlamasında bunları deyib:

"Teatr uşaqların dünya görüşünün inkişafına, teatr estetikasının dərk edilməsinə xidmət edir, onlarda teatra sevgi aşılayır. Nağıllar vasitəsilə uşaqlar fantaziyanı gerçəyə çevirərək təxəyyülünü inkişaf etdirir, nağıllarda olan müsbət xarakterli obrazlara rəğbət bəsləyərək onları özlərinə nümunə seçir.

Mən də Sumqayıtda müasir standartlara cavab verən kukla teatrının olmadığını nəzərə alaraq " Günəşim " kukla teatrını yaratmaq qərarına gəldim. "Günəşim" kukla teatrı 16 aprel 2019-cu ildən güclü komandanın əməyi nəticəsində fəaliyyətə başlamış və həmin gündən " Balaca dahilərin" sevimli teatrına çevrilmişdir. Teatrın repertuarında "Tıq- Tıq xanım", "Qırmızı papaq", "Qoğal", "Cırtdan" və digər məşhur nağıllarımız var.

2020-ci ilin mart ayında pandemiya başlayanda bütün teatrlar, o cümlədən "Günəşim" kukla teatrı tamaşa zallarının qapılarını bağlamalı oldu. Buna baxmayaraq tamaşalar onlayn təqdim olunmuş və yenidən fəaliyyətini bərpa etmişdir.

Teatrımız təkcə Sumqayıtda deyil Xızı rayonunda da səyyar tamaşalarla uşaqları sevindirir. Düşünürəm ki, uşaqların asudə vaxtının səmərəli təşkili hər birimizin mənəvi borcu, sosial məsuliyyətidir və bu yolda ilk yardımçımız analar və müəllimlər olacaq. Maraqlı və məsuliyyətli işdə hər birimizə uğurlar arzu edirəm!"

Teatrla maraqlananlar bu telefon nömrəsi ilə əlaqə yarada bilərlər - 077 767 12 72, İnstagram səhifəsi - gunesimkuklateatrı

Özbəkistandakı Heydər Əliyev adına Azərbaycan Mədəniyyət Mərkəzinin təşəbbüsü ilə gənc Azərbaycan şairi Fuad Cəfərlinin “Kədərin şəkli” şeirlər kitabı özbək dilində işıq üzü görüb. 

AzərTAC xəbər verir ki, kitabakı “Ön söz”ün müəllifi Özbəkistan Yazıçılar İttifaqı sədrinin müavini, şair Qayrat Məcid, özbək dilinə çevirən tərcüməçi Şahista Kamranlıdır.

Qayrat Məcid “Ön söz”də Azərbaycan poeziyasının gənc nümayəndələrindən olan Fuad Cəfərlinin ədəbiyyatda özünəməxsus üslubu olduğunu qeyd edərək, onun özbək dilində ilk dəfə olaraq çap edilən şeirlər kitabının ədəbiyyatşünaslar, poeziyasevərlər tərəfindən maraqla qarşılanacağına əmin olduğunu bildirir. 

Qeyd edək ki, Fuad Cəfərli Azərbaycan Prezidentinin təqaüdünə layiq görülüb. O, Azərbaycan Yazıçılar Birliyinin Gənclər Şurasının üzvü, Dünya Gənc Türk Yazarlar Birliyinin müşaviridir. Fuad Cəfərlinin şeirləri indiyədək türk, ingilis, rus, ispan və fars dillərinə tərcümə olunub.

Nəşr Özbəkistanın kitabxanalarına hədiyyə ediləcək.

Yanvarın 24-də M.F.Axundzadə adına Azərbaycan Milli Kitabxanasında bir sıra ali təhsil müəssisələrinin rəhbərlərinin, ölkəmizdə fəaliyyət göstərən diplomatik nümayəndələrin, habelə yazarların və digər incəsənət xadimlərinin “Nizami Gəncəvi-880” xatirə döş nişanının təqdimetmə mərasimi keçirildi. Xatirə nişanı Mədəniyyət Nazirliyi tərəfindən “Nizami Gəncəvi İli”ndə öz yaradıcılığı ilə fərqlənən musiqi, teatr, kino və incəsənətin müxtəlif sahələrində çalışanlara, habelə elm və ədəbiyyat xadimlərinə təqdim edilir.

Təqdimat mərasimində Elnur Əliyev diqqətə çatdırdı ki Prezident İlham Əliyevin sərəncamı ilə 2021-ci ilin ölkəmizdə “Nizami ili” elan edilməsi dövlətimizin Azərbaycan xalqının mədəniyyətinə, milli kimliyinə sadiqliyinin sübutudur. “Nizami ili” çərçivəsində ölkəmizdə və xaricdə reallaşan layihələrdən söz açan Elnur Əliyev dedi: “Xalqın ən böyük sərvətlərindən biri onun milli-mənəvi dəyərlərinin, mədəniyyətinin formalaşmasında mühüm rol oynayan dahi şəxsiyyətləri, tanınmış mütəfəkkirləridir”.

Daha sonra Elnur Əliyev ali təhsil müəssisələrinin rəhbərlərinin, ölkəmizdə fəaliyyət göstərən diplomatik nümayəndələrə, habelə yazarlar və digər incəsənət xadimlərinə “Nizami Gəncəvi-880” xatirə nişanlarını təqdim etdi. Təltif olunanlar arasında bir çox təhsil müəssisələrin rəhbərləri Bakı Dövlət Universitetinin rektoru Elçin Babayev,  Azərbaycan Respublikasının Prezidenti yanında Dövlət İdarəçilik Akademiyasının rektoru Urxan Ələkbərov, Azərbaycan Dövlət İqtisad Universitetinin rektoru Ədalət Muradov və digərləri olub.

Azərbaycan Respublikası Mədəniyyət Nazirliyinin dəstəyi ilə hər həftənin şənbə və bazar günləri AVTO FM-də (107.7) yayımlanan AzerNyuMedia Şirkətinin “Cinema Radio” kino-radio kanalının III ənənəvi “Müasir Audiovizual Baxış” mükafatı təqdim olunacaq. Mükafat il ərzində fəaliyyətində müasir audiovizual düşüncəsi ilə seçilən şəxslərə təqdim olunur.

Mükafat ilk dəfə 2019-cu ildə təqdim olunub. 2020-ci ildə mükafat Azərbaycanın inklüziv teatrı olan “Əsa” teatrı haqqında çəkilmiş “Döngə” sənədli filminin ssenari müəllifi və rejissoru Vəfa Ağabalayevaya Bakı Qısa Filmlər Festivalı çərçivəsində təqdim olunub.

“Cinema Radio” kino-radio kanalının III “Müasir Audiovizual Baxış” Mükafatı 2021-ci ilin yekunlarına əsasən təqdim olunacaq. Tədbir 26 yanvar saat 16.00-da “CinemaPlus” kinoteatrlar şəbəkəsinin "Gənclik Mall"da yerləşən kinoteatrında keçiriləcək.

Təqdimetmə mərasimi Mədəniyyət Nazirliyi və "CinemaPlus"un dəstəyi ilə keçiriləcək. Mərasimdə, həmçinin, Azərbaycan filmlərindən “saundtreklər səslənəcək. Mərasimin sponsoru “Azman Holdinq” şirkətidir.

Yanvarın 24-də Azərbaycan Yazıçılar Birliyinin “Natəvan” klubunda şair-publisist Zərəngiz Dəmirçi Qayalının 60 illik yubileyi qeyd olunub.

AzərTAC xəbər verir ki, Azərbaycan Yazıçılar Birliyinin (AYB) sədr müavini Rəşad Məcid çıxış edərək müəyyən səbəblərə görə tədbirdə iştirak edə bilməyən bir sıra şair və yazıçıların salamlarını çatdırıb.

Sonra o, təmsil etdiyi qurumun təbrik məktubunu oxuyub.

Bildirib ki, Zərəngiz Dəmirçi Qayalı 8 kitab, 50-dən çox poema, yüzlərlə şeir və ballada, publisist yazılar, esselər, ədəbi araşdırma, oçerk və məqalələrin müəllifidir: “Ötən il o, “Zəfər sədası” və “ İki qardaş gücü” kitablarını oxuculara təqdim edib. Həmin kitabları bir növ şairənin keçdiyi ömür yolunun yaradıcılıq hesabatı kimi də dəyərləndirmək olar”.

Yazıçı-publisist Zemfira Məhərrəmli deyib: “Azərbaycan çağdaş poeziyasında Zərəngiz Dəmirçi Qayalı adlı bir imza var. Onunla söhbətim bu günə deyil, əvvəlki illərə təsadüf edir. Mən onu AZƏRTAC-da fəaliyyətə başladığı illərdən tanıyıram. Onun yaradıcılığı ilə tanış olandan sonra istedadlı bir şair olduğunu kəşf etdim”.

Qeyd edib ki, hər bir qələm əhli onun yazılarına dəyər verməsini istəyir. O jurnalist etikası ilə hər birimizin kitab təqdimatlarını böyük həvəslə, özünəməxsus üslubu ilə işıqlandırıb.

Vurğulanıb ki, Zərəngiz Dəmirçi Qayalı 60 illik ömrünün 45 ilini söz sənətinə həsr edib və söz də onu mərtəbə-mərtəbə yüksəkliklərə qaldırıb.

Sonra Z.Məhərrəmli Zərəngiz Dəmirçi Qayalının “Qazaxdan gəlmişəm qələbəyə mən” şeirini oxuyub.

Azərbaycan Yazıçılar Birliyinin İdarə Heyətinin üzvü, mətbuat xidmətinin rəhbəri Xəyal Rza bildirib ki, ədəbi mühitdə Zərəngiz Dəmirçi Qayalını tanımayan insan yoxdur. O, öz istedadı və qələmi ilə bu hörməti qazanıb, istər poeziyada, istərsə də nəsrdə öz sözünü deyib. Xəyal Rza yubilyarı təbrik edib, ona yeni yaradıcılıq uğurları arzulayıb.

Azərbaycan Milli Kulinariya Mərkəzinin rəhbəri Tahir Əmiraslanov deyib: “Qədimdən adəti üzrə yubileylər 12 ildən bir keçirilərdi. 12 yaş uşaqlıq, 24 gənclik, 36 yaş insanın oturuşmuş dövrüdür. 48 yaşında insan dünyəvi hadisələri fikirləşir, 60 yaşda isə müdriklik dövrünə qədəm qoyur. Bu gün Zərəngiz Dəmirçi Qayalının 5-ci dəfə yubileyi tamam olur. İndi Zərəngiz Dəmirçi Qayalının yazılarında püxtələşmiş bir insanın düşüncələrini görürük. Zərəngiz Dəmirçi Qayalı AZƏRTAC-ın müxbiri kimi hər zaman Milli Kulinariya Mərkəzinin tədbirlərini işıqlandırıb. Buna görə ona təşəkkürümü bildirirəm”.

Sonra Tahir Əmiraslanov Azərbaycan Milli Kulinariya Mərkəzinin fəxri diplomunu yubilyara təqdim edib.

“Qazax xeyriyyə” İctimai Birliyi İdarə Heyətinin üzvü şair Rafael İncəyurd bildirib ki, Zərəngiz xanım olduqca istiqanlı, ailə insanı, həm də həyatda özünü tapan bir xanımdır. O, İctimai Birliyin təbrik məktubunu oxuyub və fəxri diplomunu yubilyara təqdim edib.

Bakı Dövlət Universitetinin dosenti Anar Fuad, şair Səxavət Ənvəroğlu, hərbi jurnalist Zəminə Xınalı, "Mirvarid Dilbazi poeziya məclisi” İctimai Birliyinin sədri Güllü Eldar Tomarlı və başqaları çıxış edərək yubilyarın yaradıcılığından söz açıb, onun göstərdiyi xidmətləri vurğulayıblar.

Azərbaycan Respublikasının Prezidentinin 17 dekabr 2021-ci il tarixli Sərəncamı ilə Azərbaycanda memarlığın inkişafında xidmətlərinə görə bir qrup memar dövlət təltiflərinə layiq görülüb.

Azərbaycan Memarlar İttifaqının binasında təntənəli təltifetmə mərasimi keçirilib.

“Ədəbiyyat və incəsənət” portalı Mədəniyyət Nazirliyinə istinadən xəbər verir ki, tədbirdə Azərbaycan Respublikasının mədəniyyət naziri Anar Kərimov, Mədəni İrsin Qorunması, İnkişafı və Bərpası üzrə Dövlət Xidmətinin rəisi Azad Cəfərli, Azərbaycan Memarlıq və İnşaat Universitetinin rektoru, professor Gülçöhrə Məmmədova və digər rəsmi qonaqlar iştirak edib.

Azərbaycan Memarlar İttifaqı İdarə Heyətinin sədri Elbay Qasımzadə qonaqları salamlayıb, müasir dövrdə Azərbaycan memarlığı və şəhərsalması dövlət siyasətinin ayrılmaz bir hissəsi olmaqla Prezident İlham Əliyevin daim diqqət mərkəzində olduğunu qeyd edib.

O, bildirib ki, 17 dekabr 2021-ci il tarixində imzalanmış həmin Sərəncam memarlarımızın fəaliyyətinə verilən yüksək qiymətin göstəricisidir.

Tədbirdə çıxış edən mədəniyyət naziri Anar Kərimov respublikada memarlığın inkişafından söz açıb.

Nazir təltif edilmiş memarlara vəsiqələri və təltifləri təqdim edib.