“İçərişəhər” Dövlət Tarix-Memarlıq Qoruğu İdarəsinin dəstəyi ilə nəfis şəkildə çap olunan yeni kitab belə adlanır - “Qarabağ – tarixi-mədəni irsimizdən”.

AzərTAC xəbər verir ki, Azərbaycan və ingilis dillərində nəşr olunan kitabda Azərbaycanın və ümumiyyətlə, bəşəriyyətin ilk insan məskənlərindən biri olan Qarabağın tarixi, numizmatikası, epiqrafik abidələri, xalçaçılıq məktəbi, dulusçuluq, milli geyimlər, bədii və zinət əşyaları, ədəbi mühit, musiqi və teatrı haqqında geniş məlumatlar verilir. Qarabağın tarixi zəngin qaynaqlar əsasında araşdırılaraq, “Qarabağ" sözünün etimologiyası, qədim dövrlərdən bəri bölgənin tarixinə dair maraqlı məlumatlar əksini tapır. Kitabda toplanan materiallar Qarabağın xristian və İslam dövrü epiqrafik abidələrinin Azərbaycan xalqının mədəni irsi olduğunu bir daha təsdiqləyir.

Nəşrdə İslam dövrü abidələri üzərindəki epiqrafik yazılara əsasən Qarabağda yaşayıb fəaliyyət göstərən alim, memar, naqqaş, xəttat və sufi şeyxlərin, Qarabağ memarlıq məktəbinin banilərinin adları çəkilir. Eyni zamanda, Qarabağın əsrlər boyu bənzərsiz sənət əsərlərini yaradan istedadlı sənətkarları, onları yetişdirən sənətkarlıq məktəbləri haqqında geniş məlumat verilir. Bununla yanaşı, kitabda Qarabağ ədəbi mühitinin formalaşmasından, görkəmli ədib, şair, yazıçıların, mütəfəkkirlərin, musiqiçilərin həyat və yaradıcılığından da bəhs olunur.

2020-ci ildə 44 günlük Vətən müharibəsində qazanılan şanlı Zəfər nəticəsində Qarabağ torpağı erməni işğalından azad edilib. 44 günlük haqq savaşımızın təfərrüatları da, təbii olaraq, kitabda öz əksini tapıb. Təsadüfi deyil ki, Prezident İlham Əliyevin qarşıya qoyduğu hədəflər çərçivəsində reallaşan yeni nəşr işğaldan azad edilmiş ərazilərimizdə məsələlərin mərkəzləşdirilmiş qaydada həll edilməsi məqsədilə yaradılmış Əlaqələndirmə Qərargahının nəzdində fəaliyyət göstərən İdarələrarası Mərkəzin “Elm, təhsil və mədəniyyət məsələləri üzrə” İşçi Qrupu tərəfindən də müzakirə edilib.

“Qarabağ – tarixi-mədəni irsimizdən” kitabı erməni vandalları tərəfindən Qarabağda Azərbaycan xalqına, onun mədəni irsinə qarşı aparılan soyqırımına bir cavabdır və hazırda mədəni irsin bərpası istiqamətində daha bir əhəmiyyətli vasitədir.

1932-ci il yanvarın 26-da Bakıda dünyaya göz açan Əzizə Əhmədovanın ilk hekayəsi "Qorxmazın səhvi" adlanırdı, 1957-ci ildə "Pioner" jurnalında dərc edilib. 1967-ci ildə o, "Gənclik" nəşriyyatına direktor təyin edilib, əsərləri keçmiş SSRİ və xarici ölkə xalqlarının dillərinə tərcümə olunub. Əzizə Əhmədovanın əsərləri 30, 40, 50 min tirajla çap edilirdi, bunlardan "Xınalı qayalar", "Yaz qarı", "Onu çiçəklər sevdi", "Bu ellərə vurulmuşam", "Bir ürək sındırmışam" məşhur idi.

Əzizə Əhmədova tərçüməçi kimi də böyük işlər görüb, V.Hauf, A.Kuprin, A.Qaydar, İ.Franko, A.Rıbakov, A.Lindqren və onlarla başqalarının əsərlərini dilimizə tərcümə edib. 1985-ci ildə Əzizə xanımın yeni kitabı olan "Damda yaşayan Karlsonla bacada yaşayan Damdabacanın macəraları" böyük əks-səda doğurmuşdu. 

Əzizə xanım filologiya elmləri doktorudur. Amma heç bir fəxri adı yoxdur. 90 illiyində düşünürük ki, bunu nəzərə alarlar.

Böyük azərbaycanlı Məmməd Əmin Rəsulzadə Firidun bəy Köçərli haqqında belə deyib: “Köçərli Azərbaycan ədəbiyyatının tədqiqiylə yeganə məşğul bulunan qiymətdar bir mühərrir, müəllim və alim idi”.

Görkəmli Azərbaycan maarifçisi, ədəbiyyatşünası, Azrbaycan ədəbiyyatı tarixi elminin banisi Firudin bəy Köçərli 26 yanvar 1863-cü ildə Şuşa şəhərində anadan olub. 1872–1876-cı illərdə Şuşada Mirzə Kərim Münşinin mədrəsə məktəbində təhsil alıb. Daha sonra 1876-cı ildə Şuşadakı rus məktəbinə daxil olub, 1878-ci ildə Aleksey Çenyayevski (“Dəli Kür” filmini xatırlayın) Zaqafqaziya Müəllimlər Seminariyasına tələbə toplamaq məqsədi ilə bu məktəbə gələndə Firidun bəyi də təhsil almaq üçün Qoriyə aparıb. 1879–1885-ci illər ərzində o, seminariyada təhsil alıb. Təhsil aldığı müddətdə müəllimləri Çernyayevski və M.Kipiani ilə yaxın münasibət saxlayıb.

1885-ci ildə seminariyanı bitirdikdən sonra Firidun bəy İrəvan gimnaziyasına təyinat alıb. 1885–1890-cı illərdə gimnaziyada ana dili, hüsnxətt fənlərini tədris edib, pansion mürəbbisinin köməkçisi vəzifəsini daşıyıb. Pedaqoji sahədə müvəffəqiyyətlərinə görə dəfələrlə mükafatlandırılıb. Ona "Kollecski sekretar", "Titulyar sovetnik" və "Statski sovetnik" rütbələri verilib. 1895-ci ildə Firidun bəy İrəvan şəhərini tərk edib, Qori Seminariyasında "tatar şöbəsi"-nin Azərbaycan dili və şəriət müəllimi təyin edilib. 

Firidun bəy 1899-cu ildə III dərəcəli "Müqəddəs Anna ordeni ilə, 1902-ci ildə isə II dərəcəli "Müqəddəs Stanislav” ordeni ilə təltif edilib.

1918-ci ilə qədər Qoridə pedaqoji fəaliyyətini davam etdirib. 1897-ci ildə Qazaxın məşhur Vəkilovlar nəslindən olan Badisəba xanım Köçərli ilə ailə həyatı qurub. 1910-cu ildə Qori Seminariyasının Azərbaycan şöbəsinin müvəqqəti təlimatçısı, sonradan isə seminariyanın Azərbaycan şöbəsinin inspektoru vəzifəsinə təyin olunan Firidun bəy 1916–1917-ci illərdə seminariyanın Azərbaycana köçürülməsi üçün təşəbbüs göstərib, təkliflər irəli sürüb. O, çarizmin azərbaycanlılara qarşı həyata keçirdiyi müstəmləkəçilik siyasətinə qarşı siyasi proseslərə qoşularaq, "Müsavat” partiyasına üzv olub.

1918-ci ildə Qori Müəllimlər Seminariyasının Azərbaycan şöbəsini tədris ləvazimatı və avadanlığı ilə birlikdə öz xərci ilə Qazax şəhərinə köçürmüş, bunun əsasında Azərbaycan Müəllimlər Seminariyası yaradılmışdır. Firidun bəy Köçərli seminariyanın ilk direktoru təyin olmuşdur. 17 sentyabr tarixindən Qazax Müəllimlər Seminariyasında ilk dərslər başlamışdır. 

Sonradan Firidun bəy Qazaxda ilk uşaq evini də açıb. 1918-ci il 28 may tarixində müstəqilli qazanılanda o, Azərbaycan Xalq Cumhuriyyəti Milli Şurasının üzvü seçilib, İstiqlal bəyannaməsini imzalayıb, 1919-cu il fevralın 1-də Müsavat partiyasının səyyar bürosunun Mərkəzi Komitəsinin təşəbbüsü ilə təşkil edilmiş Qazax şöbəsinə sədr seçilir. Sovet işğalına qədər Firidun bəy Qazax Müəllimlər Seminariyasına rəhbərlik edib. 

Yaradıcılığına gəlincə, Firidun bəy 1884-cü ildə "Təlimi-Sokrat" əsərini yazıb. İrəvan gimnaziyasında çalışdığı illərdə Zöhrabzadə ilə birlikdə "Təlimi-lisani-türkü" adlı dərslik tərtib edib. 1886-cı ildə o, ilk teatr tamaşasını qoyub. 1890-cı ildə isə İrəvanda "Müsyö Jordan və dərviş Məstəli şah" komediyasını tamaşaya qoyub. 1891-ci ildə "Təlimi-Sokrat" adlı kitabı Bağçasarayda, "Tərcüman" mətbəəsində, 1892-ci ildə isə Puşkindən tərcümə etdiyi "Torçu və balıq" mənzum nağılı İrəvan şəhərində kitab halında çapdan çıxıb. Lermontovun "Üç xurma ağacı" və Koltsovun "A kişi, niyə yatıbsan?" şeirlərinin tərcüməsindən ibarət kitabı Şuşada çap edilib. "Tatar komediyaları" adlı ilk elmi məqaləsi "Novoye obozreniye" qəzetində dərc olunub. 1898-ci ildə "Ərəb əlifbası və onun qüsurları" silsilə məqaləsi "Qafqaz" qəzetində dərc olunub. 

1900-cü ildə Müəllimlər Seminariyasının Ümumdünya Paris sərgisində Qori Seminariyasından nümayiş etdirilən eksponatlar sırasına F.Köçərlinin kitabları da daxil edilib. 1903-cü ildə Tiflisdə "Azərbaycan tatarlarının ədəbiyyatı" kitabı rus dilində çap edilib. Elə həmin ildə o, M.F.Axundovun "Aldanmış kəvakib” povestini rus dilinə çevirib. 1906-cı ildə "Molla Nəsrəddin” jurnalının nəşrə başlamasını təqdir edərək, jurnalın birinci üç aylıq fəaliyyəti barədə icmal hazırlayıb, "Tiflisskiy listok" qəzetində dərc etdirib. "İrşad" qəzetində "Bir darülmüəllimin kifayətdir" adlı məqalə ilə çıxış edərək, Azərbaycanda müstəqil Müəllimlər Seminariyası yaradılması məsələsini qaldırıb. Mirzə Cəlilin "Usta Zeynal" kitabçası haqqında eyni adlı məqaləni "Znaniye" qəzetində çap etdirib. 1911-ci ildə Mirzə Fətəlinin anadan olmasının 100 illik yubileyi münasibətilə Tiflisdə keçirilən təntənəli yığıncaqda məruzə ilə çıxış edib. "Mirzə Fətəli Axundov" adlı kitabı çap olunub. 1912-ci ildə uşaqlar üçün yazdığı "Balalara hədiyyə" kitabı Bakıda "Kaspi" mətbəəsində çap olunub. 

1913-cü ildə Firidun bəy yazdığı "Azərbaycan ədəbiyyatı tarixi" adlı üç cildlik əsərini tamamlayıb. Bu əsər mədəniyyətimizin qızıl irsinə daxil edilib. 

1920-ci ildə "Vətən dili"nin I hissəsinin yenidən işlənməsində xidmətləri olub. Onlarla dərsliyə düzəliş etmiş, nəzəri materialı, hekayələri artırmış, metodika və stilistikasını zənginləşdirmişdir. Ölümündən sonra 1925-ci ildə "Azərbaycan ədəbiyyatı tarixi materialları" kitabının I hissəsi, 1926-cı ildə isə kitabın II hissəsi çap edilib. Uşaqlar üçün yazdığı "Balalara hədiyyə" kitabı isə 1967,1972 və 2013-cü illərdə çap edilib.

O ki qaldı bu böyük şəxsiyyətin dünyadan köçməsinə, bolşevik işğalından sonra o da qırmızı terora məruz qalmış görkəmli şəxsiyyətlərimizdən biri kimi həyatını itirmiş oldu. 1920-ci ilin mayında communist hakimiyyət Köçərlini və digər "Müsavat” funksionerlərini "xalqa xəyanətdə", "milli nifaq törətməkdə", "torpaq və mülk zəbt etməkdə", general-qubernator Xoyskinin etibarlı şəxsləri olmaqda ittiham etdilər. Qazax İnqilab Komitəsinin Gəncə Fövqəladə Komitəsinə təqdimatına əsasən, ədib həbs olundu, 20-ci diviziyanın 7-ci xüsusi bölməsi xüsusi şöbəsində şahidlər dindirilmədən, verilmiş izahatlar nəzərə alınmadan güllələnməsi haqqında qərar çıxarıldı. Qərar 7-ci xüsusi bölmənin rəisi Liberman və fövqəladə komissar Həmid Sultanov  tərəfindən təsdiq edildi, hökm yerinə yetirildi. 

Güllələnmə haqqında çıxarılmış qərar:

Mən, iyirminci diviziyanın xüsusi şöbəsinin hərbi müstəntiqi bu gün Firidun bəy Köçərlinskinin əksinqilabçı kimi ittihamnaməsi üzrə işinə baxaraq və Qazax İnqilab Komitəsinin ona verdiyi xasiyyətnaməni nəzərə alaraq bildirirəm ki, müttəhim Köçərlinski özünün hakimiyyətindən və böyük səlahiyyətindən istifadə edərək zəhmətkeş xalqa zorakılıq göstərmişdir. Köçərlinski Qazaxda "Müsavat" partiyasının sədri olarkən millətçilik ehtiraslarını qızışdırmışdır. Nəticədə qonşu millətlər arasında toqquşmalar baş vermişdir. Onun verdiyi izahat heç də inandırıcı deyildir... Məttəhim Köçərlinskinin şahidlərin dindirilməsi haqqında ərizəsini nəticəsiz qoymaq (rədd etmək) lazımdır. Onun gələcəkdə azadlıqda qalması Qazax qəzasında əksinqilabi hərəkatın baş verməsinə, fəhlə və kəndlilərin günahsız olaraq qanlarının tökülməsinə səbəb ola bilər.

Qərara alınır: müttəhim Köçərlinski güllələnsin.

Təsdiq edirəm: 7№-li Xüsusi bölmənin rəisi Liberman

Təsdiq edirəm: Fövqəladə komissar H.Sultanov

Qarabağın tacı olan Şuşa xalqımız üçün müqəddəs və əziz məkandır. Şuşa sevgisi hər bir azərbaycanlının mənəvi varlığının ayrılmaz parçasıdır.

Prezident İlham Əliyevin müvafiq sərəncamı ilə 2022-ci il ölkəmizdə “Şuşa İli” elan olunub. Dövlət başçısının mədəniyyət paytaxtımızla bağlı bu sərəncamı Mədəniyyət Nazirliyinin də üzərinə müəyyən öhdəliklər və ciddi vəzifələr qoyur. Nazirliyin yaydığı məlumata görə, bu mötəbər hadisəni rəhbər tutaraq, Mədəniyyət Nazirliyi qədim şəhərimizin zəngin mədəni irsini tanıtmaq məqsədilə “Şuşa mədəniyyətinin inciləri” adlı layihəyə start verir.

Şuşa şəhəri Azərbaycan incəsənətinin və mədəniyyətinin mərkəzi kimi qədim tarixə malikdir. Şuşanın zəngin mədəniyyətini daha geniş əhatə etmək üçün layihə yeddi bölmədən ibarət olacaq: “Şuşanın memarlıq salnaməsi”, “Azərbaycan musiqisinin məbədi – Şuşa”, “Muğam ocağı – Şuşa”, “Qarabağ xalçaçılıq məktəbi – Şuşa”, “Şuşanın ədəbi həyatı”, “Şuşanın simaları”, “Şuşa milli geyim üslubu”.

Layihə çərçivəsində hazırlanan məlumatların internet məkanında, o cümlədən sosial media hesablarında yayımlanması nəzərdə tutulur. Təbliğat materialları ilkin olaraq Mədəniyyət Nazirliyinin rəsmi “Facebook”, “İnstagram” və “Twitter” səhifələrində yayımlanacaq.

Sankt-Peterburqun Mariinski Teatrında Azərbaycanın dahi bəstəkarı Fikrət Əmirovun 100 illik yubileyi münasibətilə “Min bir gecə” baleti təqdim edilib.

AzərTAC xəbər verir ki, “Min bir gecə” baleti Rusiya Federasiyasının Əməkdar incəsənət xadimi, tanınmış xoreoqraf, həmyerlimiz Eldar Əliyevin quruluşunda səhnələşdirilib. Tamaşada Mariinski Teatrının simfonik orkestri və xoruna Azərbaycan Dövlət Akademik Opera və Balet Teatrının baş dirijoru, beynəlxalq müsabiqələr laureatı Əyyub Quliyev dirijorluq edib. Musiqi dolğunluğu, rəngarəng harmonik dil və orkestrləşdirmə, səmimi lirika səhnələri ilə zəngin “Min bir gecə” baleti yerli sənətsevərlər tərəfindən alqışlarla qarşılanıb. Tamaşa anşlaqla keçib.

Səhnə əsərinin nümayişindən sonra tədbirdə fəxri qonaq qismində iştirak edən Azərbaycan Respublikasının Sankt-Peterburqdakı baş konsulu Sultan Qasımov xoreoqraf Eldar Əliyevi, dirijor Əyyub Quliyevi və teatrın solistlərini uğurlu çıxışları münasibətilə təbrik edib. Diplomat Fikrət Əmirovun dahi əsərinin yeni quruluşda Rusiyanın aparıcı teatrının səhnəsində ifa edilməsini mədəni əlaqələrin inkişafında mühüm hadisə adlandırıb.

Mədəniyyət xadimləri qarşısında çıxış edən baş konsul Sultan Qasımov Mariinskiy Teatrının rəhbərliyinə və artistlərinə, həmçinin orkestrə Azərbaycanın dünyaşöhrətli bəstəkarı Fikrət Əmirovun ölməz “Min bir gecə” əsərini uğurla səhnələşdirdiklərinə görə minnətdarlığını bildirib. Tamaşanın yekununda balet truppasının üzvlərinə baş konsulluq adından gül dəstələri hədiyyə edilib.

Tədbirin yekununda baş konsul Sultan Qasımov Mariinskiy Teatrının rəhbərliyi və balet truppası ilə xatirə şəkili çəkdirib.

Bu barədə “Ədəbiyyat və incəsənət” portalı Euronews-a istinadən məlumat verir. 

73 yaşlı moda dizaynerinin şöhrətinin zirvəsi Avropada ilk dəfə Moda nümayişini Paris konsert salonunda rok festivalına çevirən və moda evinin on illiyini qeyd etmək üçün təxminən 6 min tamaşaçı toplayan səksəninci illərə təsadüf edir.

1992-ci ildə Thierry Magler satış lideri olan "Angel" ətriyyatını buraxaraq növbəti likə imza atdı.

2002 -ci ildə dizayner Moda Evinin yaradıcı direktoru vəzifəsini tərk etdi, lakin məşhurlarla əməkdaşlıq etməyə və nümayişlər keçirməyə davam etdi. Onun istedadının ulduz pərəstişkarları arasında Lisa Minnelli, Milen Farmer, Kim Kardaşyan (üzdəniraq), Beyons, Lady Gaga və bir çox başqaları var idi. 

Thierry Maglerin təbii səbəblərdən öldüyü bildirilir. Modelyer Jan-Batist Rujun sözlərinə görə, ustanın ölümü onun üçün gözlənilməz olub. Kuturye  çox işləyirdi, həftənin əvvəlində yeni layihələr haqqında məlumat verməyi planlaşdırırdı. 

Amma əcəl imkan vermədi.

Türkiyənin "Yaşılcam" səhnəsinin məşhur aktrisası Fatma Girik İstanbulda müalicə aldığı xəstəxanada 79 yaşında dünyasını dəyişib.

SonDakika xəbər ajansının məlumatına görə, sənətçi covidə tutulmuşdu, müalicə alırdı. 

1942-ci il dekabrın 12-də İstanbulda anadan olan aktrisa 1957-ci ildə “Ləkə” filmi ilə kinoda ilk addım atıb. 180 ekran əsərində rol alan Fatma Girik “Rabiyə", " Böyük and", "Övlad" kimi filmləri ilə sevilib.

Yanvarın 19-dan 23-dək Madriddə keçirilmiş 42-ci illik Beynəlxalq FITUR-2022 turizm sərgisi işini başa çatdırıb. Turizm sənayesində ən iri tədbir olan FITUR sərgisi bütün dünyada turizm sektoru nümayəndələrinin görüşü üçün nadir bir məkan, habelə kommersiya müqavilə və sazişləri bağlamağa şərait yaradan əla biznes vasitəsidir.

AzərTAC xəbər verir ki, FITUR-2022 turizm sərgisinin işində dünyanın 107 ölkəsindən 7000 şirkət iştirak edib.

Qeyd etmək lazımdır ki, Berlində (ITB) və Londonda (WTM) təşkil edilən analoji sərgilərdən fərqli olaraq Madrid sərgisi (FITUR) 2020-ci il və 2021-ci illərdə COVID-19 pandemiyası səbəbindən ləğv edilməyib və oflayn rejimdə keçirilib.

FITUR-2022 turizm sərgisi pandemiyadan əvvəlki miqyası, əsas arzusu, əvvəllər olduğu kimi təhlükəsiz və məhdudiyyətsiz səyahət etməkdən ibarət olan ziyarətçilərin və burada nümayiş etdirilən eksponatların sayı hər kəsi təəccübləndirib. 42-ci Madrid turizm sərgisi 110.193 ziyarətçini qəbul edib. Bütün proqnozları üstələyən bu göstərici COVID-19 pandemiyası ilə əlamətdar olan iki ildən sonra beynəlxalq turizmin bərpa olunacağına nikbinlik yaradıb. Rəqəmsal dünya ilə əyani ünsiyyəti əlaqələndirən hibrid model sayəsində FiturLIVEconnect platforması 33 mindən çox istifadəçiyə xidmət etmək imkanı yaradıb. Bütün platformalarda #FITUR-2022 həştəqinin əhatə dairəsi 600 milyondan çox potensial baxış imkanı yaradıb. Beləliklə, builki sərgi sosial medialarda ən yaxşı tədbir kimi qiymətləndirilir. Beynəlxalq sərginin gəliri 150 milyon avrodan çox olub.

Azərbaycan turizm sərgisində Dövlət Turizm Agentliyinin və Azərbaycanın İspaniya Krallığındakı səfirliyinin təşkilati dəstəyi ilə təmsil olunub.

Beynəlxalq sərginin işində Azerbaijan Tourism Board, Avantage Group və başqaları iştirak ediblər. Sərgidə Azərbaycanın turizm potensialını əks etdirən stend ingilis və ispan dillərində materiallarla təmin edilib. Sərgi çərçivəsində İspaniyanın və digər ölkələrin turizm şirkətləri ilə işgüzar görüşlər keçirilib.

2022-ci ilin Azərbaycanda Şuşa İli elan edilməsi ilə əlaqədar sərgidə Azərbaycanın mədəniyyət paytaxtı, milli musiqi və ədəbiyyatımızın beşiyi, bənzərsiz gözəlliyə malik olan incisi Şuşaya həsr edilmiş guşə tərtib edilib.

Ölkəmizin turizm brendi bu dəfə də “Azərbaycan – yeni baxışla nəzər sal” şüarı ilə təqdim edilib. Bu, Latın Amerikasından olan turistlərin Azərbaycan – zəngin tarixi, mədəniyyəti, milli mətbəxi və qonaqpərvərliyi ilə seçilən ölkəmiz barədə təsəvvürlərini həqiqətən yeniləşdirmək imkanı verib.

Gözlənildiyi kimi, sərgidə Azərbaycana çox böyük maraq müşahidə olunub. Ölkəmizi təmsil edən şirkətlər Azərbaycanın turizm potensialını fəal təbliğ ediblər.

Bu barədə bazar ertəsi qurumun baş qərargahında qərar qəbul edilib. Az öncə ABŞ, Böyük Britaniya və Fransa  öz diplomatlarını Kiyevdən təxliyyə edib. 

Foto: Euronews

C. Cabbarlı adına “Azərbaycanfilm” Kinostudiyasının 1969-cu ildə istehsal etdiyi “Bir cənub şəhərində” bədii filmi rəqəmsal formatda bərpa olunub.

Filmin bərpası “Balans” Milli Rəqəmsal Bərpa Studiyası tərəfindən həyata keçirilib.

Yanvarın 27-də “Nizami” Kino Mərkəzində sözügedən ekran əsərinin yenilənmiş versiyası nümayiş olunacaq.

Rüstəm İbrahimbəyovun ssenarisi əsasında rejissor Eldar Quliyevin quruluş verdiyi filmdə əsas rollarda Həsən Məmmədov, Eldəniz Zeynalov, Hacımurad Yegizarov, Süsən Məcidova, Almaz Əsgərova və başqaları çəkiliblər.

Xatırladaq ki, “Balans” studiyası bundan öncə Tofiq Tağızadənin 1960-cı ildə çəkdiyi “Mateo Falkone”, Həsən Seyidbəylinin 1973-cü ildə quruluş verdiyi “Nəsimi" filmlərini rəqəmsal formatda bərpa edib.