Super User
2019-cu ildə çəkilmiş “Vağzalı” komediyasının premyerası, axır ki, baş tutdu
Pandemiya səbəbindən uzun müddət qapıları bağlı qalan konsert salonları, teatr zalları, kinoteatrlar yenidən tamaşaçılarla ünsiyyətə sevinməkdədir, bu da, əlbəttə ki, çox müsbət haldır.
2019-cu ildə çəkilən və 2020-ci ildə premyerası pandemiyaya görə baş tutmayan “Vağzalı” komediyası da nəhayət ki, tamaşaçıların ixtiyarına verildi.
“Ədəbiyyat və incəsənət” portalı xəbər verir ki, martın 1-də “Nizami” kino mərkəzində baş tutan premyeraya filmin yaradıcı heyəti, ölkə mədəniyyətinin tanınmış xadımləri, kinosevərlər təşrif buyurmuşdular.
Rejissor Şahin Qəhrəmanın lentə aldığı, ideya müəllifi və prodüsseri Əlibala Məhərrəmzadə, ssenari müəllifləri Ənvər Abbasov və Samid Ağayev olan “Vağzalı” filmində baş rolları sevilən komedik aktyorlar İlkin Misgərli və Nicat Rəhimov, eləcə də Nərgiz Əliyeva, Elçin Rəsulov və Elşən Hacıbabayev canlandırırlar. Və bu koloritli aktyor heyətinə qoşulmuş, filmdə “tərcüməçi uşaq” obrazını canlandıran Bakı məktəblisi Səttar Məhərrəmzadənin yaddaqalan ifasını ayrıca qeyd etməyə dəyər. Epizodik rollarda və kütləvi səhnələrdə yer almış Quba rayonunun sakinlərini də alqışlamaq lazımdır.
Hadisələr Qubada cərəyan edir. Bu cənnətməkan rayonun gözəl təbiət lövhələri, eyni zamanda filmin sponsorlarından olan “Şahdağ Quba-Truskavets” sanatoriyasının göz oxşayan guşələri filmə əlavə rəng qatır.
Filmin çatdırdığı əsas mesajsa odur ki, insan qismətdən artığına nə qədər can atsa da, çata bilmir, odur ki, atalar demiş, nəğdini qoyub nisyənin ardınca qaçmağa dəyməz.
Film olduqca dramatik süjet xəttinə malikdir: Eyvanda təmir işləri görən usta yıxılıb aşağı mərtəbənin eyvanına düşür, orada yaşayan qızın qardaşı da onu bacısının gizlin adaxlısı zənn edib okivar döyür və namus məsələsini ortaya atıb məcbur edir ki, bacısının adına söz çıxmasın deyə gərək bacısını alsın.
O da üstünə çəkilən “ləzgi xəncərinin” qorxusundan çar-naçar, razılaşmalı olur.
Nə baş verirsə toy günü baş verir. Gəlin öz sevgilisi olduğu üçün zorla ərə verilməsi ilə barışmır, toya meyxanaçı qismində dəvət olunmuş İlkinlə Nicatın maşınında gizlənərək toy məkanından qaçır. Gəlinin qardaşı və bəy onları təqib edirlər, bu yandan qızın öz sevgilisi də hadisə yerinə gəlir, macəra dolu, bol gülüşlü səhnələrə ərəb turistləri ilə bağlı epizodlar xüsusi kulminasiyalar gətirir.
Sonluğu, təbii ki, bu gündən ölkə kinoteatrlarında nümayişi başlanacaq “Vağzalı” kinokomediyasına baxıb özünüz görəcəksiniz, əziz kinosevərlər. Amma bəri başdan deyək ki, sonluq əsil novellasayağı, trillersayağıdır, gözlənilməzdir.
Sevilən bəstəkar Vaqif Gərayzadənin filmə yazdığı məxsusi musiqi isə süjetlərin sanki dramatizm kəsərini xeyli artırmış olur.
Premyeradan sonra filmin komandası səhnəyə dəvət olunaraq təqdim ediləndə zalın alqışlara bürünməsi, əlbət ki, haqqına olan prosedur idi. Premyeraya gəlmiş tanınmışların hamısı bir ağızdan filmi bəyəndiklərini izhar etdilər. Tamaşaçıların filmi bəyənməsinə isə onların saat yarım ərzində gülüb qəşş eləmələri əyani sübut idi.
Portalımız adından filmin yaradıcı heyətini təbrik edir, onlara, necə deyərlər, “qəşəng kassa” arzulayırıq.
Şəkillərdə: Filmdən fraqmentlər
Xalça Muzeyində “Bir xalqın tarixi - bütün dünya üçün” adlı sərgi açılıb
Martın 1-də Azərbaycan Milli Xalça Muzeyində israilli rəssam Rami Meirin “Bir xalqın tarixi - bütün dünya üçün” adlı sərgisi açılıb.
AzərTAC xəbər verir ki, Azərbaycan Milli Xalça Muzeyinin direktoru Şirin Məlikova sərginin ərsəyə gəlməsinin heç də təsadüfi olmadığını vurğulayıb. Bildirib ki, Bakıda boya-başa çatan Rami Meir uzun illərdir xaricdə yaşayır, uğurlu yaradıcılıq fəaliyyəti ilə məşğuldur. Qeyd edib ki, xaricdə yaşamasına baxmayaraq, o, öz doğma yurdunu sevir və yaradıcılığını məhz Vətənə həsr edir. Şirin Məlikova Rami Meirin, ilk növbədə, kolleksiyaçı olduğunu və maraq dairəsini Azərbaycanda məskunlaşan dağ yəhudilərinin tarixi və həyatı təşkil etdiyini deyib. O vurğulayıb ki, rəssamın kolleksiyasında həm arxiv materiallar, həm də artefaktlar saxlanılır.
“Ekspozisiyada Rami Meirin “Dağ yəhudiləri” silsiləsində işlədiyi 30-dan çox tablo, metal üzərində döymə texnikasında pannolar, ağacoyma nümunələri, rəssamın rəngkarlıq əsərlərinin motivləri əsasında qiymətli metallardan hazırlanmış dekorativ sikkələr nümayiş olunur. Burada rəssamın “Qırmızı Qəsəbədən Quba xalçaçıları” rəngkarlıq əsəri əsasında xüsusi olaraq bu sərgi üçün toxunmuş eyniadlı xalça da yer alıb. Sərginin mərkəzi eksponatlarından biri olan, ənənəvi texnikada toxunan çoxfiqurlu portret-xalça Rami Meir və “Azərxalça” ASC-nin birgə layihəsi çərçivəsində Bakıda hazırlanıb”,- deyə Ş.Məlikova əlavə edib.
Sərginin muzey üçün tarixi-etnoqrafik yönlü olduğunu vurğulayan Şirin Məlikova bildirib ki, sərginin əsas leytmotivi muzeyin fəaliyyət istiqaməti ilə həmahəngdir. “Azərbaycan qədim zamanlardan bəri müxtəlif millətlərin əmin-amanlıq şəraitində yaşadığı doğma vətənidir. Əsrlər boyu bu ərazidə məskunlaşan xalqların sırasında yəhudi mənşəli həmvətənlərimizi xüsusi qeyd edə bilərik. Onlar Azərbaycanda özlərini böyük bir ailənin üzvi kimi hiss edir və ölkəmizin həyatında fəal rol oynayırlar”, - deyən Şirin Məlikova tədbir iştirakçılarını Od çərşənbəsi münasibətilə təbrik edib və onları sərgiyə baxmağa çağırıb.
Rəssamla ilk tanışlığının xalçaçı qızlar mövzusunda xalça toxunması işi ilə başladığını bildirən “Azərxalça” ASC-nin İstehsalat üzrə direktoru Əlisəfa Nuriyev deyib: “Xalça toxunandan sonra mən orada azərbaycanlı və yəhudinin ruhunu bir vəhdətdə gördüm. Onun digər əsərləri ilə tanış olandan sonra özümə yaxın bir insan bildim. Rami Meirin xalça üzərində öz ideyasının əks etdirməsi xalqlar arasında bir körpü yaradır”.
Sonra çıxış edən Milli Məclisin Mədəniyyət komitəsinin sədri Qənirə Paşayeva Rami Meirin yəhudi mənşəli Azərbaycan rəssamı olduğunu vurğulayıb. “Vətəninə sadiq olan bütün insanlar bizim üçün dəyərlidir. Sami Meirin yaradıcılığı onun Azərbaycana olan münasibətinin göstəricisidir. Azərbaycan tarix boyu multikultural bir dövlət kimi heç bir xalq arasında fərq qoymayıb. Azərbaycan və yəhudi xalqlarını hər zaman dərin tellər birləşdirib. Biz bunu 44 günlük Vətən müharibəsində də gördük. İsrail xalqı bir yumruq kimi bizə dəstək oldu. Buna görə yəhudi xalqına təşəkkürümü bildirirəm”, - deyə Q.Paşayeva qeyd edib.
İsrail səfirliyinin əməkdaşı Mark İfraimov Qafqazda doğulub sonradan İsrailə getdiyini, indi isə öz xalqını burada təmsil etdiyini söyləyib. O bildirib ki, sərgidəki rəsmlərdə əks olunanlar Azərbaycan mədəniyyətinin nümunələridir. Çünki Azərbaycan çoxmillətli ölkədir.
Sərginin kuratoru Mariya Filatova Rami Meirlə olan tanışlığından danışıb. Bildirib ki, 1980-ci illərdə o, Bakıda Rami Meirlə bir küçədə yaşayıb. “Sərgini hazırlayanda mən yalnız Raminin kolleksiyası haqqında düşünürdüm. Onun özünəməxsus dəst-xətti var”, - deyə o bildirib.
Xalça Muzeyində ona yer ayırdıqları üçün təşəkkürünü ifadə edən Rami Meir deyib: “Bu ekspozisiya mənim üçün çox vacibdir. Çünki mən burada təkcə şəxsi kolleksiyamı deyil, həm də dağ yəhudilərin mədəniyyətini təqdim edirəm. Sərgidəki bütün eksponatları bir mövzu birləşdirir. Bu, özünəməxsus mədəniyyətə və “cuhuri” adlanan dilə malik dağ yəhudilərinin tarixi və adət-ənənələridir. Mənə göstərdiyi səmimi münasibətə görə Azərbaycan xalqına minnətdaram”.
Sonda bildirilib ki, Rami Meir bir neçə il ərzində yaratdığı “Dağ yəhudiləri” silsilə əsərləri üzərində işləyərkən tarixçi-dokumentalist kimi araşdırma aparıb, öz xalqının tarixini zərrə-zərrə bərpa edib. O, həyatın təkcə zahiri tərəfini deyil, həm də bütöv bir etnik qrupun varlığının estetikasını parçaların faktura və ornamentlərində, sinaqoqların memarlığında, yaşayış evləri və sənətkarların dükanlarının bəzədilməsində, insan obrazlarında ən aydın şəkildə çatdırıb. Bundan əlavə, öz mədəniyyətinin dərin qatlarına bələd olan rəssam xalqın mənəvi həyatını, dərin müdrikliyini, fəlsəfəsini əks etdirib.
Qeyd edək ki, sərgi aprelin 1-dək davam edəcək.
“Günümüzün gəncləri” adlı fortepiano musiqi axşamı keçirilib
M.Maqomayev adına Azərbaycan Dövlət Akademik Filarmoniyasının Kamera və Orqan Musiqisi zalında "Gənclərə dəstək" layihəsi çərçivəsində "Günümüzün gəncləri" adlı konsert təşkil olunub.
AzərTAC xəbər verir ki, konsertdə Respublika və Beynəlxalq müsabiqələr laureatları, Prezident təqaüdçüləri Vurğun Vəkilov və Atabala Manafzadə çıxış edib.
Konsert proqramında Modest Musorqskinin "Sərgidən şəkillər", Aleksandr Skryabin "Sonata № 3", Sergey Raxmaninovon "Prelüd №7" əsərləri səsləndirilib.
Konsert böyük maraq və alqışlarla qarşılanıb.
Qeyd edək ki, "Gənclərə dəstək" layihəsinin əsas vəzifəsi ölkədə gənc istedadların üzə çıxarılması və dəstəklənməsidir. Bundan əlavə, layihədə məqsəd dünya və yerli musiqi mədəniyyəti ənənələrinin qorunub saxlanılması və inkişafıdır. Layihə çərçivəsində təqdim olunan proqramlar müxtəlif zövqlərə malik çox geniş auditoriyaya - yüksək akademik üslubun bilicilərinə, muğam, caz, estrada, eləcə də xor musiqisi həvəskarlarına ünvanlanıb.
Növbəti “Xarıbülbül” festivalının vaxtı açıqlanıb
“Şuşa İli”nin ilk böyük tədbiri “Xarıbülbül” Beynəlxalq Folklor Festivalı olacaq.
Bunu Mədəniyyət Nazirliyi Media və kommunikasiya şöbəsinin müdiri Məryəm Qafarzadə bildirib.
O qeyd edib ki, tədbir Mədəniyyət Nazirliyi, Heydər Əliyev Fondu və Şuşa Şəhəri Dövlət Qoruğu İdarəsinin təşkilatçılığı ilə may ayında keçiriləcək: "İyul ayında Şuşada növbəti Vaqif Poeziya Günlərinin, iyul-avqust aylarında “Muğam” Televiziya Müsabiqəsinin final mərhələsinin və qaliblərin qala-konsertinin keçirilməsi planlaşdırılır. Həmçinin il ərzində “Şuşa – 2022” beynəlxalq incəsənət, “Şuşanın 4 fəsli” (“4 seasons of Shusha”) adlı beynəlxalq fotoqrafiya festivallarının və s. keçirilməsi nəzərdə tutulur".
Möhsün Sənanigilin Bilgəhdə uşaqlarla görüşə apardıqları “sehirli xalat” niyə oğurlanıb?
Yazıçı Əyyub Qiyasın təqdimatında “AZƏRBAYCAN AKTYORLARININ HƏYATINDAN MARAQLI ANLAR” layihəsində bu dəfə sizə MÖHSÜN SƏNANİNİN (1900-1981) iki xatirəsini təqdim edəcəyik.
Milli kinomuzun tarixində rolu olub Mövsüm Sənaninin. Ruhu şad olsun!
*
Tiflisdə fəaliyyət göstərən Mustafa Mərdanov, Mirzəli Abbasov kimi aktyorlar ifalarıma tamaşa edir, istedadıma, gələcəyimə ümidlə baxırdılar. Bu ümid səhnəyə olan marağımı daha da artırdı. Sənətimə paxıllıq edən və içimdə baş qaldıran həvəsi söndürmək istəyənlər də tapılırdı və bunlar atam molla Sadığın dostları idi.
– Sən rəhmətlik molla Sadığın oğlu deyilsən, a bala?
– Bəli, Sadığın oğluyam, necə bəyəm?
– Sənin atan, savadlı ruhani idi, özü də sənin ruhani olmağını istəyirdi. Sənsə qoşulmusan bir ovuc kafirə, orda-burda oyunbazlıq eləyirsən. Nə qədər gec deyil, daşı ətəyindən tök, atanın yolunu tut. Atanın da ruhu şad olsun.
– Sərvaz əmi, məsləhətin üçün çox sağ ol, amma mən öz yolumu tutmuşam. Bir gün gələcək atamın ruhu da bu yolu tutduğum üçün şad olacaq…
*
Tez-tez məktəblərdə, pioner düşərgələrində görüşlərimiz olurdu. Belə görüşlərdən biri də Bilgəhdəki pioner düşərgəsində baş tutdu. Əlisəttar Atakişiyev, Əlağa Ağayev, mən, bir neçə gənc aktyorla birlikdə uşaqlarla görüşə getdik. Daha da maraqlı olsun deyə, gedərkən “sehrli xalat”ı da kinostudiyadan götürdük. Uşaqlar xalatı görəndə çox sevindilər. Onu əyninə geymək istəyən, sirli səyahətə uçmaq arzusunda olanların sayı-hesabı yox idi. Bir də ayıldıq ki, xalat yoxa çıxıb. Düşərgə bir-birinə dəydi. Bir qədər sonra arıq, çəlimsiz bir oğlan bizə yaxınlaşdı:
– Xalatı axtarmayın, – dedi, – Rizvan həmin xalatla keçmişə uçdu.
Sən demə bu Rizvan deyilən oğlanın nənəsi də düşərgədə aşpaz işləyirmiş. Arvad bunu eşidən kimi dizlərinə döyməyə başladı.
– Vay, evim yıxıldı. Tez olun nəvəmi mənə qaytarın, – deyib, üstümüzə gəldi.
Çox gərgin vəziyyət yaranmışdı. Uşaqlar da, nənə də Rizvanın doğrudan da keçmişə uçduğuna inanmışdılar.
Düşərgə rəhbərliyi hər yerdə “itkin səyyah”ı axtarırdı.
Birdən həmin o Rizvan deyilən oğlan haradansa peyda olub xalatı birbaşa mənim üstümə atdı:
– Bu, kinodakı xalat deyil. Əfsunu neçə dəfə təkrar eləsəm də xalat işləmədi.
Əlisətarr xalatı məndən alıb, oğlana yaxınlaşdı, başını sığallayb dedi:
– İo Kio baba əfsunun sözlərini dəyişib ki, xan bir də oğurlayıb eləsə, xalat onu heç yerə aparmasın.
Hamımız vəziyyətdən çıxdıq. Uşaq dünyasına xəyanət etmək olmazdı. Həmin görüş uzun illər xatirəmizdə yaşadı.
“Oğul” sənədli filminin təqdimatı keçirilib
Nizami Kino Mərkəzində Böyük Britaniyanın “Broken Pot Media” şirkətinin istehsalı olan “Oğul” sənədli filminin təqdimatı keçirilib.
Tədbirdə mədəniyyət nazirinin birinci müavini Elnur Əliyev, nazirliyin əməkdaşları, yaradıcı heyət, filmin qəhrəmanı Natiq Qasımovun ailə üzvləri və digər qonaqlar iştirak ediblər.
“Ədəbiyyat və incəsənət” portalı Mədəniyyət Nazirliyinə istinadən məlumat verir ki, təqdimatdan öncə jurnalistlərin suallarını cavablandıran ekran işinin rejissoru və ssenari müəllifi Karan Sinq bildirib ki, film italiyalı hərbi fotoreportyor Enriko Sarsininin dərc olunmamış fotoları əsasında ekranlaşdırılıb: “Mən Enriko ilə ilk dəfə görüşəndə onun Vyetnamla bağlı şəkilləri haqqında danışmaq istəyirdim. Amma daha sonra o, mənə Qarabağda baş verənlər haqqında danışdı. Ondan sonra başa düşdüm ki, bu hekayə bütün dünyaya tanıdılmalıdır. Bu bəşəri bir hekayədir. Bu filmi izləyən hər kəs ailədə itkinin nə demək olduğunu çox yaxşı anlayacaq”.
Rejissor qeyd edib ki, üç il ərzində ərsəyə gələn film ABŞ-da iki festivalda iştirak edib. Film martın 1-dən “Park Cinema”da Azərbaycan və ingilis dillərində nümayiş olunacaq.
Tədbirdə çıxış edən mədəniyyət nazirinin birinci müavini Elnur Əliyev film haqqında məlumat verib. Bildirib ki, ekran əsəri Azərbaycan bayrağını düşmənə təslim etməyən, sonra aqibəti bəlli olmayan cəsur Vətən oğlundan bəhs edir: “Mənim yaxın bir qohumum da Şuşada itkin düşmüşdü. Ona görə də bu ağrı mənə çox yaxındır. Film, əslində, Azərbaycan tarixinin bir səhifəsinin ifadəsidir. Filmdə bir çox maraqlı məqamlar var. Xocalı faciəsi ilk növbədə düşmənimizi tanımaqda çox vacib bir mərhələ oldu. Düşmənin bu amansızlığını araşdıraraq niyə bizə belə böyük nifrət etdiklərini anlamaqla, əslində, öz tariximizi araşdırmağa başladıq”.
Bu il Xocalı faciəsinin 30-cu ildönümünün qeyd edildiyini söyləyən Elnur Əliyev Xocalı soyqırımına münasibətin həm də mədəniyyət məsələsi olduğunu bildirib: “Xocalı soyqırımı milliyyətindən, dinindən asılı olmayaraq hər bir insan üçün böyük bir faciədir. Ancaq biz görürük ki, düşmən hələ də bunu faciə olaraq qəbul edə bilmir, hətta əsaslandırmağa çalışır. Bu gün Xocalı soyqırımı haqqında danışmaqda bizim məqsədimiz bu faciənin bir daha baş verməsinin qarşısını almaqdır. Mən Britaniyadan gələn qonaqlarımıza təşəkkür edirəm. Onlar bu mövzuya diqqət yönəldib, belə bir film ərsəyə gətiriblər”.
Daha sonra “Oğul” sənədli filmi nümayiş olunub.
Sonda ekran əsərinin rejissoru və ssenari müəllifi Karan Sinq çıxış edərək filmin nümayişində göstərdiyi dəstəyə görə Mədəniyyət Nazirliyinə təşəkkürünü bildirib.
Qeyd edək ki, film 1992-ci ildə, Birinci Qarabağ müharibəsi zamanı əsir götürülən azərbaycanlı hərbçi Natiq Qasımov haqqındadır. Natiq müharibə zamanı beş gün təkbaşına mühasirədə qalır, ermənilərə müqavimət göstərərək təslim olmur. Yalnız ermənilər onu Xocalıda girov götürülən 22 sakini öldürəcəkləri ilə təhdid etdikdən sonra silahını ataraq sığındığı alban kilsəsindən çıxır. Lakin son ana qədər əlindəki Azərbaycan bayrağını ermənilərə vermir. Natiq Qasımovun sonrakı aqibəti məlum deyil.
Rejissor K.Sinq üç il Ermənistan, Azərbaycan, İtaliya, Böyük Britaniya və Rusiyada şahidlərlə danışıb. Natiq Qasımov erməni hərbçiləri tərəfindən dindirilən zaman orada olan italiyalı hərbi fotoreportyor Enriko Sarsininin müsahibəsi də filmdə yer alıb.
Təsvir rejissoru Simon Stanford olan 46 dəqiqəlik filmdə faktın bərpası üçün azərbaycanlı aktyorların ifasından da istifadə edilib.
Azərbaycan Respublikasının mədəniyyət naziri vətəndaşları qəbul edəcək
Mərkəzi icra hakimiyyəti orqanları və digər idarəetmə qurumlarının rəhbərlərinin şəhər və rayonlarda vətəndaşların qəbulu cədvəlinə əsasən Azərbaycan Respublikasının Mədəniyyət naziri Anar Kərimov tərəfindən 2022-ci ilin mart ayının 11-də saat 11:00-da Astara rayon Heydər Əliyev Mərkəzində Lənkəran, Lerik və Astara rayolarından olan vətəndaşların qəbulu keçiriləcək.
Bu barədə “Ədəbiyyat və incəsənət” portalı Mədəniyyət Nazirliyinə istinadən məlumat verir.
Vətəndaşlar nazirliyin Bu email ünvanı spambotlardan qorunur. Onu görmək üçün JavaScripti qoşmaq lazımdır. elektron poçt ünvanı və (012) 493-30-02 telefon nömrəsi vasitəsi ilə 9 mart 2022-ci tarixinə qədər qəbula yazıla bilərlər.
Qəbula gəlmək istəyən vətəndaşların həmçinin aşağıda qeyd olunmuş əlaqələndirici şəxslərə müraciət etmələri tövsiyə olunur.
№
Şəhər (rayon)
Əlaqələndirici şəxs
Əlaqə telefonu
1
Lənkəran
Kəkəyev Anar Nəriman oğlu
(Lənkəran Regional Mədəniyyət İdarəsi, məsləhətçi)
(050) 243 68 43
(025) 255 43 21
2
Lerik
Dənziyev Müqəddəs Nağdəli oğlu
(Lənkəran Regional Mədəniyyət İdarəsi, baş məsləhətçi)
(050) 682 32 69
(070) 282 32 69
(025) 274 62 09
3
Astara
Bayramov Şadoğlan Xanoğlan oğlu
(Lənkəran Regional Mədəniyyət İdarəsi, baş məsləhətçi)
(050) 324 24 10
(077) 324 24 10
(025) 225 31 40
“Teknofest” festivalının media tərafdaşlarından biri radio TMB olacaq
Mayın 26-dan 29-dək Rəqəmsal İnkişaf və Nəqliyyat Nazirliyinin dəstəyi ilə ölkəmizdə ilk dəfə keçiriləcək “Teknofest” Festivalına “Türk Millətləri Birliyi” Radiosu (TMB 100.5 FM) media tərəfdaşlığı edəcək.
Qeyd edək ki, “Teknofest” innovasiya, startap və texnologiya sahəsində dünyanın ən qabaqcıl tədbirlərindən biridir. Azərbaycanda bu festivalın keçirilməsinin məqsədi gəncləri qeyd olunan sahələr üzrə maarifləndirmək, onların marağını, diqqətini cəlb etmək və müvafiq istiqamətlər üzrə inkişafını təmin etməkdir.
“Radio TMB” 100.5 FM-in aparıcı media resurs və böyük dinləyici auditoriyasına sahib olduğunu nəzərə alaraq, gələcəkdə silsilə yayımlar təşkil olunacaq. Radio TMB-də yayımlanan İKT sahəsi üzrə “Smart Lab” proqramı “Teknofest”in hazırlıq prosesinin işıqlandırılması və tədbir çərçivəsində müxtəlif qonaqların efirə dəvət olunması kimi öhdəliyi öz üzərinə götürür.
Karan Sinq: “Biz filmin çəkilişlərini apararkən Qarabağ işğal altında idi”
“Filmin ideyası italyan hərbi fotoqrafı Enriko Sarsini tərəfindən irəli sürülmüşdü. Mən onunla ilk dəfə görüşəndə Vyetnamda çəkdiyi şəkillərlə bağlı danışmaq istəyirdim, ancaq o, Qarabağda baş verən hadisələrdən danışdı. Mən hərbi əsir Natiq Qasımov haqqında öyrənəndən sonra başa düşdüm ki, bu hekayə dünyaya çatdırılmalıdır.
AzərTAC xəbər verir ki, bu sözləri “Oğul” sənədli filmin rejissoru və ssenari müəllifi Karan Sinq filmin təqdimatı zamanı jurnalistlərə müsahibəsində deyib.
“Ermənistana gedəndə ailəsinə söz verdim ki, Natiq Qasımovun başına gələnləri mütləq öyrənəcəyəm. Onu tapa bilməsəm də, haqqında çox məlumatlar öyrənə bildim. Qasımovlar ailəsinə dərin minnətdarlığımı bildirirəm, çünki onlar olmasaydı film də ərsəyə gəlməzdi”, - deyə Karan Sinq bildirib.
Mövzunun tək Azərbaycana xas olmadığını, bəşəri bir məna daşıdığını deyən rejissor bildirib ki, ailədə kimsə itkin düşərsə bunun hansı effekt verəcəyini başa düşmək, dərindən anlamaq çox vacibdir.
Qeyd edib ki, çəkiliş qrupu filmi çəkərkən bir çox çətinliklərlə rastlaşıb: “Qarabağda çəkilişlər apararkən bu ərazilər o zaman Ermənistanın işğalı altında idi. Buna baxmayaraq biz Ermənistandan Qarabağa keçib, erməni zabitlərindən və bu hadisənin şahidi olmuş insanlardan müsahibə götürməyi bacardıq. Bizim üçün çox vacib idi ki, apardığımız araşdırmalar qərəzsiz, dəqiq olsun və heç bir tərəfkeşlik edilməsin”.
Filmin 3 il ərzində ərsəyə gəldiyini deyən rejissor bildirib ki, ekran əsərinin çəkilişləri 2016-cı ildə başlayıb və 2019-cu ildə başa çatıb. Bunun üçün yaradıcı heyət Azərbaycana gəlib, sonra Ermənistan tərəfdən Qarabağa keçib, Rusiyada olub və hətta münaqişənin baş verdiyi kilsənin yerini tapıb.
“Film beş dilə tərcümə olunub. Filmin ilk premyerası 2021-ci ilin iyul ayında ABŞ-ın “Whistleblower Film Festivalı”nda, daha sonra noyabrda “Şimali Dakota İnsan Hüquqları Film Festivalı”nda təqdim edilib. Filmi Xocalı soyqırımın 30-cu ildönümündə Bakıda nümayiş etdirməyi özümüzə borc bildik”, - deyə rejissor əlavə edib.
Musiqili əsər müəlliflərinin hüquqlarının qorunması məqsədilə yeni təşkilat fəaliyyətə başlayıb
“Ədəbiyyat və incəsənət” portalına “Müəllif Hüquqları Uğrunda” İçtimai Birliyinin oxuculara yönəli bir məlumatı daxil olub. Həmin məlumatı diqqətinizə çatdırırıq.
"Müəllif Hüquqları Uğrunda" İçtimai Birliyi könüllü üzvlük və hüquq bərabərliyi prinsiplərinə əsaslanan, musiqili əsər müəlliflərin hüquqlarının qorunması, onlara müxtəlif istifadəçilər tərəfindən ödənilməli olan qonorarların yığılması və müəlliflər arasında bölünməsi, musiqili əsər müəlliflərinin hüquqlarını pozan şəxslərin qanunsuz fəaliyyətlərinin qarşısının alınması məqsədilə yaradılmışdır. Bu funksiyalar Azərbaycan Respublikasının Konstitusiyasında və “Qeyri-hökumət təşkilatları (içtimai birlik və fondlar) haqqında”, “Müəlliflik hüququ və əlaqəli hüquqlar” haqqında, Azərbaycan Respublikası qanunlarında və Azərbaycan Respublikasının iştirakçısı olduğu beynəlxalq müqavilələrə nəzərdə tutulur.
“Müəllif Hüquqları Uğrunda” İctimai Birliyi 16 iyun 2021-ci il tarixdə Azərbaycan Respublikası Ədliyyə Nazirliyində yeni dəyişiklərlə dövlət qeydiyyatına alınmış və “Müəlliflik hüququ və əlaqəli hüquqlar” haqqında Azərbaycan Resdpublikası qanununun 41.3-cü maddəsinin tələbinə uyğun olaraq, əmlak hüquqlarını kollektiv əsasda idarə edən təşkilat kimi Azərbaycan Respublikası Əqli Müqlkiyyət Agentliyində qeydiyyatdan (akkreditasiyadan) keçmiş və təşkilata şəhadətnamə verilmişdir.
Hazırda 100-ə yaxın üzvü olan Birlik öz fəaliyyətinə - müsiqili əsər müəlliflərin əmlak hüquqlarının təmin edilməsi və bununla əlaqədar həmin hüquqların kollektiv əsasda idarə edilməsi ilə bağlı zəruri işlərə (bildiriş və məktubların göndərilməsi, müqavilələrin bağlanması və s.) başlamışdır.
“Müəllif Hüquqları Uğrunda” İçtimai Birliyi müsiqili əsər müəlliflərinin hüquqlarının təkcə Azərbaycanda deyil, ölkə xaricində də qorunması üçün müvafiq beynəlxalq qurumlarla sıx əməkdaşlıq etməyi planlaşdırır. Bu məqsədlə təşkilatın yaxın vaxtlarda beynəlxalq əlaqəli qurumlarla layihələr həyata keçirməsi, müəllif hüquqlarının qorunması və inkişaf etməsi üçün digər xarici təşkilatlarla birgə monitorinqlər aparması və müvafiq müqavilələrin imzalanması nəzərdə tutulur.
Kollektiv təşkilat olaraq, bildiririk ki, musiqili əsər müəlliflərinin hüquqlarının qorunması sahəsində bütün əlaqəli orqan və təşkilatlarla əməkdaşlıq etməyə hazırıq.
“Müəllif Hüquqları Uğrunda” İçtimai Birliyi
