Dünən İsveçin ölkəmizdəki səfiri Kristian Kamill Azərbaycan Milli Kitabxanasında olub. 

Kitabxanadan AzərTAC-a bildirilib ki, Milli Kitabxananın Beynəlxalq əməkdaşlıq zalında İsveç və Azərbaycan arasında diplomatik münasibətlərin yaranmasının 30 illiyi münasibətilə “Linnaeus Apostles: Global Science and Adventures” adlı kitabın təqdimatı keçirilib. 

Kitab Linnaeus və onunla birgə olan səyyahların müxtəlif qitələrə olan səyahəti və heyvanlar, bitkilər, adət-ənənələr barəsində apardıqları qeydlərdən bəhs edir. 

Tədbiri Milli Kitabxananın direktoru professor Kərim Tahirov təqdimat mərasiminin Beynəlxalq əməkdaşlıq zalında keçirilməsinin heç də təsadüf olmadığını bildirib. Zalda 14 ölkənin guşəsinin mövcud olduğunu vurğulayan Kərim Tahirov 15-ci guşənin məhz İsveç olacağına ümid etdiyini vurğulayıb. 

“Səfirin Milli Kitabxanaya gəlişi iki ölkənin milli kitabxanaları arasında anlaşma memorandumunun imzalanmasına təkan verəcək. Eləcə də bu gün səfirin Milli Kitabxanaya hədiyyə etdiyi kitablar Milli Kitabxananın fondunda öz layiqli yerini tutacaq və İsveçə dair gələcəkdə yaradılacaq guşənin ilk kitabları olacaq”, - deyə K.Tahirov qeyd edib. 

Direktor gələcəkdə həmin guşənin önündə İsveç ilə əlaqəli tədbirlərin, İsveç yazıçıları ilə görüşlərin keçiriləcəyinə ümid etdiyini də bildirib.

Kristian Kamill keçirilən tədbirin iki ölkə arasındakı diplomatik münasibətlərin 30-cu ildönümünə həsr olunmuş silsilə tədbirlərdən biri olduğunu qeyd edib. İsveç və Azərbaycan arasında bir çox sahələrdə qarşılıqlı əməkdaşlığın mövcud olduğunu bildirən səfir bu əlaqələrin daha da möhkəmlənəcəyinə və inkişaf edəcəyinə inandığını bildirib. 

Daha sonra Kristian Kamill İsveç və Azərbaycan arasında diplomatik münasibətlərin qurulmasının 30-cu ildönümü münasibətilə isveçli səyyah və alim Carl Linneausun tələbələrinin dünyanın 60-dan çox ölkəsinin təbiəti, mədəniyyəti, tarixi və etnoqrafiyası haqqındakı əlyazma və qeydlərinin əks olunduğu “Linnaeus Apostles: Global Science and Adventures” adlı 8 cildlik kitabı Milli Kitabxanaya hədiyyə edib.

Bu il Türkiyənin Antalya vilayətində təşkil olunacaq 59-cu “Qızıl portağal” beynəlxalq film festivalı oktyabrın 1-də başlayacaq.

Antalya Böyükşəhər Bələdiyyəsindən verilən açıqlamaya görə, festival çərçivəsində "Edebiyat Uyarlaması Uzun Metraj Senaryo" müsabiqəsi də keçiriləcək.

Türkiyədə böyük maraqla gözlənilən müsabiqə kino və ədəbiyyatı bir araya gətirərək hər iki sahə üçün məhsuldar mühit yaratmağı hədəfləyir.

Qeyd edək ki, festival oktyabrın 8-dək davam edəcək.

Azərbaycan aşıq sənətinin görkəmli nümayəndəsi, söz ustadı Aşıq Ələsgərin xatirəsinin əbədiləşdirilməsi məqsədilə Bakı şəhərində ucaldılacaq abidəsinin hazırlanması üçün heykəltəraşlar arasında elan edilən açıq müsabiqəyə eskiz-layihələrinin qəbulu başa çatıb.

Mədəniyyət Nazirliyindən verilən məlumata görə, qəbul edilən layihələrin müzakirəsi qapalı şəraitdə keçiriləcək.

Qeyd edilib ki, eskiz layihələr nazirliyin “Heykəltəraşlıq abidələrinin, xatirə-memorial və memarlıq komplekslərinin ucaldılması və demontajı üzrə Ekspert komissiyası”nın üzvləri tərəfindən qiymətləndiriləcək. Müsabiqənin qalibi iyulun 15-də elan olunacaq. Nəticələrə dair məlumat nazirliyin saytında (culture.gov.az) yerləşdiriləcək. Həmçinin ikinci və üçüncü yeri tutan müəlliflərə müvafiq olaraq 2000 manat və 1000 manat məbləğində pul mükafatı təqdim ediləcək.

Qeyd edək ki, müsabiqə ötən ilin dekabr ayında elan edilmişdi. Lakin eskiz layihələrin Aşıq Ələsgər obrazının tam xarakterini əks etdirmədiyi üçün müsabiqə komissiya üzvləri tərəfindən 3 ay müddətinə - iyunun 30-dək uzadılmışdı.

Müdafiə Nazirliyinin təşkilatçılığı, Mədəniyyət Nazirliyi və Azərbaycan Könüllülər İctimai Birliyinin dəstəyi ilə Azərbaycan Hərb Tarixi Muzeyində Silahlı Qüvvələr Gününə həsr olunan hərbi vətənpərvərlik mövzusunda 5 – 15 yaş kateqoriyası arasında “Rəngli perimetr” adlı rəsm sərgisinin açılışı və qaliblərinin mükafatlandırma mərasimi kecirilib.

“Ədəbiyyat və incəsənət” portalı Mədəniyyət Nazirliyinə istinadən xəbər verir ki, əvvəlcə Azərbaycan xalqının ümummilli lideri Heydər Əliyevin və ölkəmizin ərazi bütövlüyü uğrunda canlarından keçən şəhidlərimizin əziz xatirəsi bir dəqiqəlik sükutla yad edilib, eləcə də hərbi orkestrin ifasında Azərbaycan Respublikasının Dövlət Himni səsləndirilib.

Açılış mərasimində Müdafiə Nazirliyinin Şəxsi Heyət Baş İdarəsinin İdeoloji İş və Mənəvi-Psixoloji Təminat İdarəsinin rəisi general-mayor Bəkir Orucov,  Azərbaycan Respublikası Mədəniyyət Nazirliyinin Muzey, qalereya və sərgilər şöbəsinin Sərgi və qalereyalar sektorunun müdiri Aqşin Mirfeyzullazadə, Xalq Rəssamı Azərbaycan Rəssamlar İttifaqının katibi, Xalq rəssamı Ağali İbrahimov, Azərbaycan Könüllülər İctimai Birliyinin mədəniyyət və incəsənət departamentinin rəhbəri Ülviyyə Bəbirli çıxış ediblər.

Çıxış zamanı onlar müsabiqənin qaliblərinin çəkdikləri rəsmlər arasında çox gözəl işlərin olduğunu vurğulayaraq, heç bir iştirakçının diqqətdən kənar qalmadığını, mükafata layiq görüldüklərini, həmçinin uşaq rəsm müsabiqəsinin gənc istedadların üzə çıxarılması və onlara dəstək göstərilməsini, eləcə də bunun gənclərin hərbi vətənpərvərlik tərbiyəsində əhəmiyyətli rol oynadığını bildiriblər.

Təbdirin sonunda general-mayor Bəkir Orucov Mədəniyyət Nazirliyinin Muzey, qalereya və sərgilər şöbəsinin Sərgi və qalereyalar sektorunun müdiri Aqşin Mirfeyzullazadənin keçirilən sərginin təşkilində fəal iştirakına görə Azərbaycan Respublikası Müdafiə naziri, Azərbaycan Respublikasının müdafiə naziri, general-polkovnik Zakir Həsənov cənab Zakir Həsənovun imzaladığı diplomla təltif edib.

Ağstafa rayon Heydər Əliyev Mərkəzində Azərbaycan Respublikası Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidməti və Azərbaycan Memarlar İttifaqının birgə təşkilatçılığı ilə “Gəncə-Daşkəsən və Qazax-Tovuz iqtisadi rayonlarının tarixi irsinin qorunması və şəhərsalma inkişafı” adlı plenumu keçirilib.

“Ədəbiyyat və incəsənət” portalı Mədəniyyət Nazirliyinə istinadən xəbər verir ki, plenumda Azərbaycan Memarlar İttifaqının İdarə heyətinin sədri Elbay Qasımzadə, Azərbaycan Respublikasının Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin rəisi Azad Cəfərli, Ağstafa rayonu İcra Hakimiyyətinin başçısı Seymur Orucov, Azərbaycan Memarlıq və İnşaat Universitetinin rektoru Gülçöhrə Məmmədova, eləcə də memarlar, ekspertlər iştirak edib.

Tədbir iştirakçıları öncə ümummilli lider Heydər Əliyevin şəhərin mərkəzində ucaldılmış abidəsini ziyarət edib, önünə gül dəstələri qoyublar.

İştirakçılar Ağstafa rayon Heydər Əliyev Mərkəzinin foyesində “Müasir Azərbaycan memarlığı” adlı sərgi ilə tanış olublar.

Sonra mərkəzin akt zalında tədbirin rəsmi hissəsi başlayıb.

Tədbirdə çıxış edən Azərbaycan Memarlar İttifaqının İdarə heyətinin sədri Elbay Qasımzadə ölkəmizdə tarixi abidələrə, eləcə də müasir memarlığın inkişafına göstərilən dövlət qayğısından danışıb. Qeyd edib ki, bu gün ölkəmizin hər yerində tarixi abidələr bərpa-konservasiya edilir, yeni-yeni parklar açılır, binalar tikilir. Vurğulayıb ki, bu sahədə memarlarımız öz sözünü deməkdədir.

Ağstafa rayonu İcra Hakimiyyətinin başçısı Seymur Orucov rayonun şəhərsalma ənənələrindən söz açıb. Qeyd edib ki, rayonda aparılan tikinti işləri zamanı milli memarlıq elementlərinin istifadəsinə xüsusi diqqət yetirilir.

Azərbaycan Memarlıq və İnşaat Universitetinin rektoru Gülçöhrə Məmmədova tarixi abidələrin yerlərdə dayanıqlı inkişafa təkan verməsi üçün daha səmərəli istifadə olunmasının vacibliyini qeyd edib. Bildirib ki, bu məsələdə dövlət, bələdiyyələr, həm də ayrı-ayrı maraqlı şəxslər sıx əlaqədə işləməlidirlər.

Dövlət Xidmətinin rəisi Azad Cəfərli regionda yerləşən tarixi abidələr haqqında ətraflı məlumat verib. Bildirib ki, bu regionda 9 rayon və iki şəhər üzrə dövlət tərəfindən qorunan daşınmaz-tarix mədəniyyət abidələrinin reyestrində 783 tarix-mədəniyyət abidəsi mövcuddur. Onlardan 405-i memarlıq, 346-ı arxeoloji, 24-ü bağ-park, monumental və xatirə abidələri və 8-i dekorativ-tətbiqi sənət nümunələridir.

Vurğulayıb ki, Azərbaycan Respublikasının Prezidenti İlham Əliyev tərəfindən mədəni irsimizin qorunması, bərpası-konservasiyası, eləcə də idarə olunmasında səmərəliliyin artırılması istiqamətində imzalanan fərman və sərəncamlar bu sahəyə göstərilən diqqət və qayğının bariz nümunəsidir.

Daha sonra Dövlət Şəhərsalma və Arxitektura Komitəsi sədrinin müavini İlqar İsbatov, “Keşikçidağ” Dövlət Tarix-Mədəniyyət Qoruğunun direktoru Musa Mursaquliyev, AMEA-nın Memarlıq və İncəsənət İnstitutunun şöbə müdiri Raihə Amənzadə məruzələrlə çıxış ediblər. Məruzələrdə Gəncə-Daşkəsən və Qazax-Tovuz iqtisadi rayonlarında mövcud olan tarix-mədəniyyət abidələrinin qorunması, bərpa olunma xüsusiyyətləri, eləcə də müasir şəhərsalma tendensiyalarının inkişafı məsələlərindən danışıblar.

Sonda plenumun qətnaməsi səsə qoyularaq qəbul olunub.

Tədbir iştirakçıları daha sonra “Avey” Dövlət Tarix-Mədəniyyət Qoruğu ilə tanış olublar.

Qapaq şəklində: Qazaxdakı Didivan qülləsi. 

İç şəkillər plenumdan çəkilib.

Ölkəmizdə milli musiqimizin, mədəni irsimizin qorunması, ifaçılıq sənətinin inkişafı, təbliği həmçinin bu istiqamətdə dinləyici auditoriyası formalaşdırmaq üçün müxtəlif təbliğat tədbirləri artıq sistemli hal alıb.

“Ədəbiyyat və incəsənət” portalı xəbər verir ki, Mədəniyyət Nazirliyinin “Yeni adlar” layihəsi də gənclər arasında Azərbaycan musiqi mədəniyyətinin təbliği, onların musiqi və estetik zövqünün formalaşdırılması məqsədi daşıyır və istedadlı gənclərin üzə çıxarılması, geniş auditoriya tərəfindən tanınmasına köməyi hədəfləyir. Gənc ifaçıların tanınmış dirijorların rəhbərliyi altında simfonik, kamera və xalq çalğı alətləri orkestrləri ilə Azərbaycanın mötəbər konsert zallarında ifası üçün imkanların yaradılması onların inkişafı üçün böyük stimuldur.

Layihə çərçivəsində növbəti konsert M.Maqomayev adına Azərbaycan Dövlət Akademik Filarmoniyasında gerçəkləşdi. İstedadlı tarzənlər İsmayıl Zülfüqarov və Mircavid Cəfərov Azərbaycan Dövlət Xalq Çalğı Alətləri Orkestrinin (bədii rəhbər və baş dirijor – Xalq artisti Ağaverdi Paşayev) müşayiətində tarın sehr və incəliklərini tamaşaçılara çatdırdılar.

Tofiq Bakıxanovun və Hacı Xanməmmədovun tar və orkestr üçün konsertləri özünəməxsus ifa emosionallığı olan musiqiçilərin təqdimatında fərqli bir ovqat yaratdı, dinləyicilərin könlünü oxşadı.

1995-ci ildə anadan olan İsmayıl Zülfüqarov 2013-cü ildə paytaxtdakı Bülbül adına Orta İxtisas Musiqi Məktəbini tar ixtisası üzrə bitirib. Azərbaycan Milli Konservatoriyasının bakalavr və magistr pillələrini müvəffəqiyyətlə başa vurub. Gənc ifaçıların II Respublika müsabiqəsində (2013) Qran-pri mükafatına layiq görülüb. 2017-ci ildə Litvanın Vilnüs şəhərində keçirilən “Skamba skamba kankliai” 45-ci Beynəlxalq Folklor Festivalında “Şuşa” muğam triosu ilə səhnəyə çıxıb. Müxtəlif illərdə ölkəmizi Çin, Rusiya, Fransa, Türkiyə, Şimali Kipr və Litvada təmsil edib.

Mircavid Cəfərov 1996-cı ildə Bakıda tar və ud ifaçısı, Xalq artisti Mircavad Cəfərovun ailəsində anadan olub. 2013-cü ildə G.Şaroyev adına 35 nömrəli onbirillik Musiqi məktəbini tar üzrə bitirib, Azərbaycan Milli Konservatoriyasının bakalavr və magistr pillələrini fərqlənmə diplomu ilə başa vurub. 2010-cu ildə keçirilən uşaq musiqi və incəsənət məktəbləri şagirdlərinin xalq çalğı alətləri üzrə II Respublika müsabiqəsində və 2011-ci ildə milli musiqi alətləri ifaçılarının Respublika festivalında Qran-pri mükafatına layiq görülüb. 2013-cü ildə adı Azərbaycanın gənc istedadlarının  “Qızıl kitabı”na yazılıb və Prezident təqaüdünə layiq görülüb.

C.Cəfərov 2016-cı ildə Norveçdə keçirilən “Azərbaycan cazı” layihəsinin, elə həmin ildə Qazaxıstanın Astana şəhərində təşkil olunan “Astana Keşteri” Beynəlxalq Caz Festivalının, 2019-cu ildə Rusiya Federasiyasının Sankt-Peterburq şəhərində keçirilən beynəlxalq etno-caz festivalının iştirakçısı olub.

Bakı Şəhər Mədəniyyət Baş İdarəsi Nərimanov rayon Mərkəzləşdirilmiş Kitabxana Sisteminin Mərkəzi Kitabxanasında Qarabağ xanlığının sonuncu varisi Xan qızı Xurşidbanu Natəvanın anadan olmasının 190 illik yubileyi ilə əlaqədar tədbir təşkil olunub.

Baş İdarədən verilən xəbərə görə, tədbirdə görkəmli şairin həyatı və yaradıcılığı haqqında ətraflı məlumat verilib. Bildirilib ki, Xurşidbanu Natəvan Azərbaycan ədəbiyyatı tarixində diqqətəlayiq yer tutan söz ustalarındandır, eləcə də incəsənətin ayrı-ayrı növlərinə dərindən bələd olan sənətkar mənəvi saflığa çağıran və insana məhəbbət, həqiqətə inam hissi aşılayan, zərif lirizmə malik və parlaq bədii boyalarla zəngin bir irs qoyub gedib. 

Sonda kitabxananın fəal oxucuları şairin şeirlərini səsləndiriblər. Həmçinin Xan qızının məşhur fransız yazıçısı Aleksandr Düma ilə görüşündən bəhs edən videoçarx nümayiş etdirilib.

Azərbaycan Yazıçılar Birliyinin Natəvan klubunda şair Yusif Nəğməkar Türk dünyası Araşdırmaları Beynəlxalq Elmlər Akademiyasının "Türk dünyası ədəbiyyatına xidmət"ə görə beynəlxalq mükafatı ilə təltif olunub. 

“Ədəbiyyat və incəsənət” portalı xəbər verir ki, mükafatlandırma mərasimində iştirak edən qurumun Azərbaycan üzrə təmsilçisi Elçin İsgəndərzadə, akademiyanın rəhbəri Xeyrəddin İvgin və fəxri professoru, fəxri mədəniyyət səfiri Özkan Hüseyn şairin türk dünyasına verdiyi töhfələrini yüksək dəyərləndiriblər.

Bildirilib ki, Azərbaycan Yazıçılar və Jurnalistlər Birliyinin üzvü, şair-publisist Yusif Nəğməkar 20-dən çox kitabın müəllifidir. Onun sözlərinə saysız-hesabsız musiqilər bəstələnib və bu günədək tanınmış müğənnilər tərəfindən ifa olunur. 

Milli Qəhrəman Çingiz Mustafayev haqqında yazdığı “Çingiz çini” poeması, 20 yanvar Bakı qırğınından bəhs edən “Şər Şənbə” poeması, Rəsul Rzaya və Bəxtiyar Vahabzadəyə ithaf etdiyi “Sizli”, “Bəxtiyar” poemaları, elat həyatından bəhs edən “Zal ağacı”, “Nizami demiş”, “Güllər atılmasın” poemaları Yusif Nəğməkar yaradıcılığının bir hissəsidir.

Yusif Nəğməkar, həmçinin bir sıra mükafatların qalibi olub. 2015-ci ildə “Çanaqqala – Türkə qala” poemasına görə Çanaqqala zəfərinin 100 illiyi münasibətilə keçirilən ədəbi müsabiqənin qalibi adını qazanıb və həmin il Azərbaycanda ilin şairi elan olunub.

Bundan əlavə o, Rəsul Rza və Şahmar Əkbərzadə adına beynəlxalq ədəbi mükafatların qalibidir.

Şairin “Vəslin edamı” poeması Birinci Qarabağ müharibəsinə həsr olunub.

Qeyd edək ki, Yusif Nəğməkar hazırda İkinci Qarabağ müharibəsində Zəfəri tərənnüm edən iri həcmli əsər üzərində çalışır.

Yusif Nəğməkar Türk dünyası Araşdırmaları Beynəlxalq Elmlər Akademiyası nümayəndələrinə təltifə görə minnətdarlığını bildirib.