“Bridgerton” serialının ikinci sezonu cəmi 17 gün ərzində “Netflix”də üçüncü ən populyar ingilis serialı adını alıb.

“Netflix”in aprelin 4-dən 10-dək yeni açıqladığı ilk 10-luq məlumatlarına görə, romantik janrda olan bu serial Britaniya televiziya cədvəlində 115,75 milyon saat izlənilib və 91 ölkədə ardıcıl üçüncü həftədir ən çox baxılan serial siyahısına daxil olub.

Beləliklə, serial ümumi 560,50 milyon saat baxışla 3-cü ən populyar serial siyahısına düşüb.

Bu gün saat 12-də Azərbaycan Dövlət Film Fondunda Xalq artisti, kinorejissor Eldar Quliyevin vəfatının ildönümü ilə əlaqədar anım tədbiri keçiriləcək.

Tədbirdə Eldar Quliyevin Moskvada Ümumittifaq Dövlət Kinematoqrafiya İnstitutunun tələbəsi olarkən lentə aldığı iki qısametrajlı bədii film – fondun kolleksiyasına şəxsi arxivdən daxil olmuş “Gözləmə saatı” və Dövlət Film Fondunda elektron bərpa olunmuş “Biri vardı, biri yoxdu...” filmləri nümayiş olunacaq.

Ukrayna ərazilərinə soxulan və ədalətsiz müharibə aparan Rusiyada mədəni həyat hər halda davam etməkdədir. Aprelin 23-də bu həyatın nəbzi Azərbaycan musiqisi ilə döyünəcək. 

“Ədəbiyyat və incəsənət” portalı kultura.ru saytına istinadən xəbər verir ki, həmin gün Dövlət Kreml Sarayında Azərbaycan müğənnisi və bəstəkarı, Xalq artisti Müslüm Maqomayevin anadan olmasının 80 illiyinə həsr olunmuş “Sənsiz mahnı yoxdur” adlı qala-konserti keçiriləcək.

“Rusiya Filarmoniyası” Moskva Şəhər Simfonik Orkestrinin müşayiətilə konsertdə “XXI əsrin Tenor A” art layihəsinin solistləri və bas-bariton Nikolay Ryabuxa çıxış edəcəklər. Orkestrin dirijoru Sergey Tararindir.

Tamaşaçılar Müslüm Maqomayevin repertuardan “Gözəllik kraliçası”, “Yer üzünün ən yaxşı şəhəri”, “Şeytan çarxı”, “Mənə deyin, qızlar”, “Melodiya”, “Sənə minnətdaram”, “Mavi əbədiyyət” mahnılarını və digər bəstələri dinləyəcəklər.

Publisist, sosial media fəalı Elman Eldaroğlu redaksiyamıza bir yazı ünvanlayıb. Həmin yazı Azərbaycan Yazıçılar Birliyi sədrinin birinci müavini, sevilən şair Rəşad Məcidə həsr olunub. Çox səmimi yazıdır.

Zaman-zaman Elman Eldaroğlunun yaratdığı publisistik portretlər oxucunun diqqətini çəkir, marağına səbəb olur. Eynən bu yazı da elədir. 

Beləliklə, “Tanıdığınız və tanımadığınız Rəşad Məcid”.

*

Heç vaxt görüşməmişik, nə dalanda, nə yolayrıcında, nə də ki... Amma məndə ona qarşı heyranlıq yaradan, Amerikada yoldaşlıq etdiyim Fikrət Qoca oldu. Adı rəhmətliyin dilinin əzbəri idi. Ona xüsusi hörmət bəsləyirdi. Hər dəfə həmsöhbət olanda tez-tez ondan danışar, işgüzar, etibarlı adam olduğunu söyləyərdi. Elə o vaxtdan da içimdəki bu heyranlığı SÖZə çevirməyə, fikirlərimi ifadə etməyə çalışırdım. Amma haradan başlayacağımı bilmirdim. Onu şair kimi təqdim edim, yoxsa bir şəxsiyyət kimi? Bu çaşqınlıq məni yubadırdı.

Qərara aldım ki, portretini əlahəzrət SÖZün rəngləri ilə, elə xalq şairi Fikrət Qocanın təqdim etdiyi kimi yaratmağa səy göstərim...

Xeyirxah insandır, onun köməyinə həmişə bel bağlamaq olar. Hörmət qazanmağı, diqqət mərkəzində olmağı bacarır. Daxilən zəngindir, uşaq vaxtlarındakı saflığı qoruyub saxlaya bilib. İnsanlarda daha çox özünü büruzə verən paxıllıq, xainlik onu hər şeydən çox hiddətləndirir...

Deyir ki,- "Hamı şedevr yarada bilməz ki! Olanımız ortadadır - yaxşısı da var, pisi də var.

Amma yaradılanları, ortada olanları görmədən, oxumadan hökm vermək məyusluq yaradır. Həssas sənət adamlarına münasibət də həssas olsa yaxşıdır..."

Dostluqda vəfalıdır. Səxavətli, qonaqpərvərdir. İnsanlıq üçün fəda etməyi özünə borc bilir. Həm də hökmlü adamdır. Özündən əmindir və mükəmməl qərar verməkdə qətiyyətlidir. Emosional xarakteri bəzən ona güc gəlsə də, vaxtında dillənməyi, zamanında susmağı bacarır...

Davranışında mehribandır. İçindəki həyat eşqi onu həmişə gülümsəməyə, ətrafına müsbət enerşi paylamağa sövq etdirir. Ən mürəkkəb problemləri belə həll etməyə qadir zəkaya malikdir. İntuisiyası güclü olduğundan hadisələri öncədən hiss edə bilir. Düzgün mülahizə qabliyyəti var...

Deyir ki,- "Sənət adamlarını danlayan kimi, onlar bir-birinin ardınca gözəl əsərlər yaratmağa başlayırlar..."

İnsanlar müxtəlifdir. Kimisi ürəyinin, kimisi ağlının hökmü ilə hərəkət edir. O isə ürəklə ağılın vəhdətindən doğan əminlikdən yararlanır. İdarəetməni, təşkilati məsələləri dərindən bilir. Odur ki, ona tapşırılan hər bir vəzifənin öhdəsindən uğurla gəlir. Bir sözlə, həm tələbkar və həm də bacarıqlı rəhbərdir...

Bəli, xalq şairi Fikrət Qoca onu mənə belə tanıtdırıb. 

Əlbəttə ki, söhbət Rəşad Məciddən gedir...

75-ci Kann Film Festivalı cari il mayın 17-dən 28-dək keçiriləcək.

Festivalın əsas nümayəndəsi Tyeri Fremo Kann Film Festivalının 75-ci yubileyinin xüsusi pandemiya, Ukraynadakı müharibə, dəyişmiş və yenidən dəyişəcək dünya şəraitində baş tutacağını bildirib. 

“Ədəbiyyat və incəsənət” portalı AzərTAC-a istinadla xəbər verir ki, bu il Kann Festivalına 2200-dən çox film təqdim olunub. Onlardan yalnız 20-si “Qızıl Palma” mükafatına namizəd seçiləcək. 

Qeyd edək ki, 2014-cü ildən Kann Film Festivalının prezidenti 76 yaşlı Pyer Lekur (Pierre Lescure) üçün bu sonuncu festivaldır. Onu beynəlxalq profilə malik hüquqşünas və kinoda uzunmüddətli karyerası olan İris Nobloçun (İris Knobloch) əvəz edəcəyi qeyd edilib.

Eyni zamanda, bu il Kann Film Festivalı tarixi yayım tərəfdaşı olan “Canal+” televiziya kanalı ilə tərəfdaşlığı France Televisions-Brut-Tik-Tok komandası ilə əvəz etməklə, mediada və Fransa hüdudlarından kənarda sosial şəbəkələrdə əhatə dairəsini gücləndirmək niyyətindədir. 

Bildirilib ki, Kann Film Festivalının münsiflər heyətinin adları yaxın günlərdə açıqlanacaq.

Ötən gün Milli İncəsənət Muzeyində Gürcüstandan gəlmiş mədəniyyət xadimləri ilə görüş keçirilib.

“Ədəbiyyat və incəsənət” portalı AzərTAC-a istinadən xəbər verir ki, görüşdə mədəniyyət nazirinin müavini Sevda Məmmədəliyeva və Üzeyir Hacıbəyli adına Bakı Musiqi Akademiyasının rektoru, Xalq artisti Fərhad Bədəlbəyli qonaqları salamlayaraq onlara ölkələrimiz arasındakı strateji tərəfdaşlığın mədəniyyət sahəsində də əlaqələrin inkişafına geniş imkanlar yaratdığını bildiriblər.

Bu il Azərbaycan ilə Gürcüstan arasında diplomatik əlaqələrin qurulmasının 30-cu ildönümünün tamam olduğunu qeyd edən Sevda Məmmədəliyeva deyib: “Bizim dostluğumuz qədim tarixə malikdir. Bilirəm ki, sizin aranızda incəsənətin müxtəlif istiqamətləri üzrə tanınmış mütəxəssislər var. Sabah sizi Şuşaya səfər gözləyir”.

Fərhad Bədəlbəyli bir çox tanınmış Azərbaycan musiqiçilərinin həyat və yaradıcılığının Gürcüstanla bağlı olduğunu söyləyib.

Çıxışlarda hər iki ölkənin qədim tarixə və zəngin mədəni irsə sahib olduğu, birgə mədəni tədbirlərin təşkilinin iki ölkə arasında əlaqələrin gücləndirilməsində mühüm rol oynadığı vurğulanıb.

Görüşdə 30 ilə yaxın işğal dövründə Azərbaycanın maddi mədəniyyət nümunələrinə qarşı ermənilər tərəfindən edilən vandalizm və qəddarlıq, həmçinin 44 günlük Vətən müharibəsində əldə etdiyimiz Qələbə nəticəsində işğaldan azad edilən ərazilərdə aparılan bərpa və quruculuq işləri barədə nümayəndə heyətinə məlumat verilib.

Natiqlər Gürcüstan və Azərbaycan musiqi və mədəniyyətinə dair fikirlərini bölüşüblər.

Sonda hər iki xalqa məxsus musiqi nömrələri səsləndirilib.

Qeyd edək ki, nümayəndə heyəti bi gündən başlayaraq aprelin 17-dək Gəncə, Füzuli, Cəbrayıl, Şuşa, Ağdam şəhərlərinə səfər edəcək.

Azərbaycan Respublikası Mədəniyyət Nazirliyi, Azərbaycan Respublikasının Amerika Birləşmiş Ştatlarındakı Səfirliyi və Birləşmiş Ştatlar – Azərbaycan Ticarət Palatasının təşkilatçılığı ilə 3 may 2022-ci il tarixində ABŞ-ın Vaşinqton şəhərində “The Voice of Orchid” adlı xeyriyyə konsertinin keçirilməsi planlaşdırılır.

“Ədəbiyyat və incəsənət” portalı Mədəniyyət Nazirliyinə istinadən məlumat verir ki, tədbirdən toplanılan vəsait işğaldan azad edilmiş ərazilərimizin minalardan təmizlənməsi məqsədilə altı minaaxtaran itin “Marshall Legacy institute” vasitəsilə alınaraq Azərbaycana göndərilməsinə sərf olunacaqdır.

Konsertdə Əməkdar artist, dirijor Fuad İbrahimovun rəhbərliyi ilə Bakı Kamera Orkestri, həmçinin Xalq Artistləri Briliant Dadaşova, Ənvər Sadıqov, Nəzakət Teymurova, Əməkdar artist Abbas Bağırov və digər solistlər çıxış edəcəkdir.

UNESCO-nun Mədəni Müxtəliflik üzrə Beynəlxalq Fondu (IFCD) növbəti layihə müraciətlərinin qəbulu ilə bağlı məlumat yaymışdır. “Ədəbiyyat və incəsənət” portalı Mədəniyyət Nazirliyinə istinadən xəbər verir ki, məlumatda  Fondun 16 mart-15 iyun 2022-ci il tarixlərində dövlət və qeyri-hökumət təşkilatlarından (QHT) layihə müraciətlərini qəbul edəcəyi qeyd edilir.

Təqdim ediləcək bütün layihələr aşağıdakı istiqamətləri əks etdirməlidir:

- Mədəni məhsulların və xidmətlərin müxtəlifliyinin yaradılması, istehsalı, paylanması və əldə edilməsinə təsir göstərən siyasət və strategiyaların hazırlanması və ya tətbiqi;

- 2005-ci il Konvensiyasının üzv ölkələrində yerli və regional mədəni sənaye sahələrini və bazarları dəstəkləmək üçün dövlət sektorunda və vətəndaş cəmiyyəti təşkilatlarında bacarıqların gücləndirilməsi.

Qalib seçilmiş layihələrə 100.000 ABŞ dollarına qədər maliyyə dəstəyi veriləcəkdir.

Sayca 13-cü olan layihə qəbulu çağırışına son müraciət tarixi 15 iyun 2022-ci ildir.

Fonda layihələrin təkmil formada təqdim edilməsi üçün Azərbaycan Respublikası Mədəniyyət Nazirliyi, Azərbaycan Respublikasının UNESCO yanında Daimi Nümayəndəliyi və UNESCO-nun Katibliyi xüsusi onlayn təlim təşkil edəcəkdir.

Təlimin vaxtı: 28 aprel 2022-ci il, saat 15:00-18:00

Təlimin formatı: “online” (Microsoft Teams vasitəsilə)

Təlimin dili: ingilis

Təlimdə iştiraka dair müraciət etmək üçün aşağıdakı keçid vasitəsilə qeydiyyatdan keçməyiniz xahiş olunur:

https://docs.google.com/forms/d/1XP3nxTwAQb2UrAkyZTDxO1tPvY0VPPQ8ZsaRARdZpFs/edit

Son iştirakçı siyahısı UNESCO Katibliyi ilə razılaşdırıldıqdan sonra təsdiqlənəckdir.

Son müraciət tarixi: 21 aprel 2022-ci il, saat 12:00

Bu gün Leopold və Mstislav Rostropoviçlərin ev-muzeyində Dünya İncəsənət Günü ilə bağlı tədbir təşkil olunacaq.

Tədbir L. və M.Rostropoviçlərin ev-muzeyinin və Bakı Şəhər Mədəniyyət Baş İdarəsinin birgə təşkilatçılığı ilə keçiriləcək.

Tədbirdə L.və M.Rostropoviç adına 21 nömrəli onbirillik musiqi məktəbinin şagirdləri, Respublika və beynəlxalq müsabiqə laureatları konsert proqramı ilə çıxış edəcəklər. Həmçinin incəsənət günü ilə bağlı videoçarx təqdim olunacaq.