Azərbaycan Yazıçılar Birliyinin "Natəvan” klubunda şair Vahid Aslanın Əməkdar artist Nuriyyə Hüseynovaya həsr etdiyi “Ləyaqət simvolu” kitabının imza günü və təqdimat mərasimi keçirilib.

“Ədəbiyyat və incəsənət” portalı AzərTAC-a istinadən xəbər verir ki, tədbirdə Azərbaycan Yazıçılar Birliyinin katibi, tanınmış şair Səlim Babullaoğlu çıxış edərək Vahid Aslanı çağdaş ədəbi mühitdə özünəməxsus üslubu və dəst-xəti olan qələm adamlarından biri kimi xarakterizə edib: “Əməkdar artist Nuriyyə Hüseynova isə gözəl səsə malik muğam ifaçısı, bəstəkar, pedaqoq və ləyaqətli bir xanımdır. Belə bir kitabın yazılması həm ədəbiyyatımız üçün, həm də musiqi mədəniyyətimiz üçün xüsusi əhəmiyyətə malikdir”.

Səlim Babullaoğlu, eyni zamanda, Vahid Aslanın son iki ildə nəşr olunan dörd kitabı haqqında da danışaraq, “Gədəbəy rayonunun Şəhidləri” kitabının əhəmiyyətini xüsusi olaraq qeyd edib.

"Sağlamlığın qorunması" İctimai Birliyinin sədri, tibb üzrə fəlsəfə doktoru Yazgül Abdiyevaya təqdim olunan kitabın başlıca xüsusiyyətlərindən danışıb. O müəllifə həm də kitabın qəhrəmanına yeni-yeni yaradıcılıq uğurları arzulayıb.

Milli Məclisin deputatı Fazil Mustafa kitabın adının və məzmununun Nuriyyə Hüseynova şəxsiyyətini tam ehtiva etdiyini vurğulayıb.

Professor Qulu Məhərrəmli bildirib ki, istənilən cəmiyyətdə Nuriyyə Hüseynova kimi ziyalılara böyük ehtiyac duyulur.

Daha sonra tanınmış həkim, professor Müşfiq Həsənli, professor Nailə Rəhimbəyli, kitabın rəyçisi dosent Şəhla Tahirqızı, həkim-şair Rəfiqə Abbasova və digərləri çıxış edərək, kitab haqqında fikirlərini bölüşüblər.

Tədbirin sonunda kitabın müəllifi Vahid Aslan və kitabın qəhrəmanı Nuriyyə Hüseynova çıxış edərək tədbirdə iştirak edən qonaqlara və tədbirin keçirilməsi üçün geniş şərait yaradan Azərbaycan Yazıçılar Birliyinin rəhbərliyinə təşəkkürlərini bildiriblər.

Sabah - aprelin 17-də Dövlət “Yuğ” Teatrında H.İbsenin əsəri əsasında hazırlanmış "Vəsvəsə" tamaşası nümayiş olunacaq.

Tamaşanın quruluşçu rejissoru Gümrah Ömər, quruluşçu rəssamı, Əməkdar rəssam Rəşid Şərif, geyim üzrə rəssamı Elnarə Bəkirova, musiqi tərtibatçısı Səbinə Süleymanova, rejissor assistenti Səidə Süleymanovadır.

Tamaşada rolları Amid Qasımov (Keşiş Manders), Mətanət Abbaslı (Frü Alvinq), Vüqar Hacıyev, (Enqstrand), Elgün Həmidov (Osvald) və Ləman Mərrih (Regina) ifa edəcək.

Şimal bölgəsinə səfər edən Mədəniyyət naziri Anar Kərimovun müvafiq əmri ilə Əliyar Əliyev Qusar Dövlət Ləzgi Dram Teatrının baş rejissoru vəzifəsinə təyin olunub.

“Ədəbiyyat və incəsənət” portalı xəbər verir ki, bu gün Mədəniyyət Nazirliyi nümayəndələrinin iştirakı ilə Əliyar Əliyev kollektivə təqdim edilib.

Qeyd edək ki, Əliyar Əliyev 1979-1980-ci illərdə Akademik Milli Dram Teatrında, 1983-1984-cü illərdə “Azərbaycanfilm” kinostudiyasında çalışıb. 1992-ci ildə “Qodonun intizarında” və “Dələduz” tamaşaları ilə Türkiyədə qastrol səfərində olub. Türkiyədə bir sıra özəl teatrlarda rejissor kimi fəaliyyət göstərib.

2010-2019-cu illər arasında Azərbaycan Dövlət Mədəniyyət və İncəsənət Universitetində pedaqoji fəaliyyətlə məşğul olub.

Prezident İlham Əliyevin tapşırığına uyğun olaraq, mərkəzi icra hakimiyyəti orqanlarının və digər idarəetmə qurumlarının rəhbərləri tərəfindən bölgələrdə vətəndaşların qəbulu keçirilir, onların müxtəlif məsələlərlə bağlı müraciətlərinin həlli ilə əlaqədar müvafiq addımlar atılır.

“Ədəbiyyat və incəsənət” portalının xəbər verdiyi kimi, 2022-ci ilin aprel ayında şəhər və rayonlarda keçiriləcək vətəndaşların qəbulu cədvəlinə əsasən, Azərbaycan Respublikasının mədəniyyət naziri Anar Kərimov bi gün Xaçmaz və Şabran sakinləri ilə görüşüb.

Qəbuldan öncə mədəniyyət naziri Anar Kərimov və Xaçmaz Rayon İcra Hakimiyyətinin başçısı Elnur Rzayev ümummilli lider Heydər Əliyevin Xaçmaz şəhərindəki abidəsini ziyarət edərək önünə tər çiçəklər qoyublar.

Daha sonra Xaçmaz Tarix-Diyarşünaslıq Muzeyində mədəniyyət nazirinin birinci müavini Elnur Əliyev və nazirliyin məsul əməkdaşlarının da iştirakı ilə vətəndaşların qəbulu keçirilib.

Qəbulda nazir Anar Kərimov Xaçmaz və Şabran rayonlarından sakinlərin müraciətlərini, ayrı-ayrı məsələlərə dair xahiş və təkliflərini dinləyib. Vətəndaşların müraciətləri əsasən əməyin qiymətləndirilməsi, işlə təmin olunma, iş yerinin dəyişdirilməsi və digər məsələlərlə bağlı olub.

Nazir müraciətlərdə qaldırılan məsələlərin operativ şəkildə araşdırılması və qanunvericiliyə uyğun həlli ilə bağlı müvafiq tapşırıqlar verib.

Günün fotosu: Ukrayna Ordusu “Moskva”nı sıradan çıxarıb

Rusiyanın Qara Dəniz Donanmasının tlaqmanı olan “Moskva” gəmisi Ukrayna Ordusunun raket zərbəsinə tuş gələrək sıradan çıxarılıb.

Foto: Euronews

Keçən il “Hakimə açılan atəş” romanım “Qanun” nəşriyyatında çıxdı. Heç gözləmədiyim halda ən çox satılan kitablardan oldu. O əsər birinci Qarabağ müharibəsində şəhid olmuş hakim Məhərrəm Məmmədovdan bəhs edir. Şəhid hakim obrazı oxucuların marağına səbəb olmuşdu. İndi də o kitabı məndən soruşurlar. Haqqında 5-6 məqalə yazıldı. Yaxşı reaksiyalar doğurdu, Mədəniyyət kanalında kitabla bağlı qısa süjet getdi, Azərbaycan radiosunda Savalan Talıblı bu mövzuda maraqlı bir veriliş hazırladı. Tədqiqatçı Gülhüseyn Kazımlı əsəri oxuyandan sonra mənə yazdı ki, sən Şuşada olmaya-olmaya Şuşanı necə gözəl təsvir etmisən? Bu, mənim üçün ən yüksək qiymətdir. 

Məni ən çox duyğulandıran və müəllif kimi qürur hissi yaşadan odur ki, bu romanın sonu Azərbaycan xalqının qələbəsi ilə bitir. “Qalib xalqın yazıçısı” hekayəsini yazanda da belə müəzzəm duyğular yaşadım.

Bir də 2016-cı ilin aprel döyüşlərində şəhid olmuş polkovnik Sənan Axundov haqqında bir roman yazmışam. O kitab da yəqin ki, yaxın zamanlarda çap olunar. Bu əsərlərin geniş oxucu kütləsinə çatması üçün isə yazıçının imkanları yoxdur. Efirlərdə diş məcunundan tutmuş prezervativə qədər hər şey reklam olunur, bircə kitabdan başqa!

Bu gün saat 19:00-da Müslüm Maqomayev adına Azərbaycan Dövlət Akademik Filarmoniyasında Fikrət Əmirovun 100 illik yubileyi münasibətilə Üzeyir Hacıbəyli adına Azərbaycan Dövlət Simfonik Orkestri çıxış edəcək.

Qeyd edək ki, orkestrin dirijoru Əməkdar artist Fuad İbrahimov, solisti Xalq artisti Yeganə Axundovadır.

Konsertdə Fikrət Əmirovun əsərləri səslənəcək, həmçinin Yeganə Axundovanın ifasında tərtib olunmuş audiodiskin təqdimatı olacaq. Eyni zamanda Azərbaycan Dövlət Film Fondunun təşkilatçılığı ilə F.Əmirova həsr olunmuş fotosərgi nümayiş ediləcək.

Aprelin 26-da YARAT Müasir İncəsənət Mərkəzində reallaşacaq tədbir zamanı Moskva kino məktəbinin tələbələrinin ərsəyə gətirdikləri işlər təqdim olunacaq. “Mədəni yenilənmə" layihəsinin qonağı Rusiya Kino və Televiziya Rəssamları Gildiyasının vitse-prezidenti, Moskva Kino Məktəbinin "Bədii quruluş" proqramının kuratoru Əddis Hacıyev olacaq. 

Tədbir çərçivəsində onun "İdrak" adlı qısametrajlı filmi nümayiş ediləcək. Film, 2021-ci ildə Türkiyədə keçirilən "Efeler Uluslararası Çevre Film Günleri" festivalında Aydın bələdiyyə başqanının mükafatını qazanıb. Nümayişdən sonra həmçinin Avropa, Rusiya və Azərbaycanda kino istehsalının xüsusiyyətlərinə dair müzakirələr aparılacaq. Eyni zamanda layihə çərçivəsində təhsil sahəsi üzrə ekspert Yekaterina Çərkəzzadə ilə kreativ sənayelərin inkişafına dair panel müzakirə keçiriləcək.

Azərbaycanın Fransadakı səfirliyinin təşkilatçılığı və dəstəyi ilə tanınmış Azərbaycan diplomatı, ictimai xadim, Azərbaycan emiqrasiyası tarixinin araşdırıcısı Ramiz Abutalıbovun tarix elmləri doktoru Georgi Mamulya ilə birgə hazırladığı və Azərbaycan mühacirətinin siyasi tarixindən bəhs edən (1920-1940) “Məşəli qoruyub saxlamaq” adlı kitabının təqdimatı olub.

“Ədəbiyyat və incəsənət” portalı AzərTAC-a istinadən xəbər verir ki, təqdimat mərasimində Fransada akkreditə olmuş səfirlər, mədəniyyət və ictimai xadimlər, diplomatlar, yerli ictimaiyyətin nümayəndələri, jurnalistlər iştirak ediblər.

Səfir Rəhman Mustafayev çıxış edərək kitab haqqında məlumat verib. O, cari ilin əvvəlində vəfat etmiş kitabın ideyaçısı və həmmüəllifi Ramiz Abudtalıbovun xatirəsini ehtiramla yad edib. Kitabın əhəmiyyətinə toxunan səfir R. Mustafayev Heydər Əliyev Fondu tərəfindən həmin kitabın Azərbaycan, rus, və türk dillərində nəşr edildiyini diqqətə çatdırıb. Bolşeviklər ölkəyə daxil olduqdan sonra birinci Azərbaycan Demokratik Respublikasının Paris Sülh Konfransına gəlmiş Azərbaycan nümayəndə heyətinin üzvləri, eləcə də Avropaya təhsil almağa göndərilmiş tələbələr ölkələrinə qayıda bilməmişlər. Bildirib ki, bu kitabda R. Abutalıbov Azərbaycan mühacirətinin siyasi tarixini ətraflı təqdim edib. Xaricdə yaşayan azərbaycanlı mühacirlər daim ölkənin müstəqilliyinin bərpası haqqında düşünmüş və müstəqilliyini bərpası uğrunda mübarizə aparıblar.

Tarix elmləri doktoru Georgi Mamulya Ramiz Abutalıbovun xatirəsinə ehtiramım bildirərək, kitabın ideyasının məhz ona aid olduğunu deyib. Bildirib ki, kitab müxtəlif ölkələrdəki arxiv məlumatları əsasında hazırlanıb. Ancaq Əlimərdan bəy Topçubaşovun arxivi bu arxivlər arasında ən zənginidir. O, kitabda mühacirətdə olan Azərbaycan siyasi partiya və təşkilatlarının rəhbərlərinin 1920-1940-cı illərdə Azərbaycanın və Qafqazın müstəqilliyinin bərpasına maraq göstərmiş Avropa dövlətlərinin rəsmi və qeyri-rəsmi nümayəndələri ilə münasibətlərinin dərindən təhlil edildiyini bildirib. İndiyə qədər istifadə olunmamış nadir arxiv sənədlərinə əsaslanan kitab bu illər ərzində Azərbaycanın siyasi mühacirət tarixinin ətraflı mənzərəsini təqdim edir. Mühacirətin son dərəcə çətin şərtlərinə baxmayaraq, Qafqazın digər xalqlarının nümayəndələri ilə daima birgə fəaliyyət göstərməyi arzu etmiş Azərbaycanın siyasi partiya və təşkilatlarının nümayəndələri qafqazlıları bu gündə ruhlandıra biləcək əməkdaşlıq strukturları yaratmağa və inteqrasiyanı inkişaf etdirməyə nail olublar.

Tədbir Ramiz Abutalıbovun xatirəsinə ithaf edilmiş konsert proqramı ilə davam edib. Fransız və azərbaycanlı musiqiçilərdən ibarət konsert proqramında Jehiel Kimfumu (piano), Ağarəhim Quliyev (fleyta), Misaki Baba (piano) Azərbaycan və Avropa bəstəkarlarının musiqilərini səsləndiriblər. Səddam Dağlı (klarnet və balaban), Nüşüt Kutas (nağara) və Haydar Barin (balaban və dəmkeş) Azərbaycan xalq musiqilərini ifa ediblər.