“Fərqlənənlər” rubrikasında bu dəfə sizə publisist Elman Eldaroğlunun tanınmış rejissor Mehriban Ələkbərzadə barədə qeydlərini təqdim edirik. 

İti zəka, zəngin bilik, dərin təfəkkür, hadisələri araşdırmaq qabiliyyəti, olanlara mükəmməl şərh vermək, parlaq istedad hər insana nəsib olmur. Onun ərsəyə gətirdiyi bütün sənədli televiziya filmlərində bu keyfiyyətlər açıq-aşkar görünür…

Deyir ki,- "Hər hansı bir həqiqəti axtarıb tapmaq istəyirsənsə, sadəcə tarixin boz səhifəsini araşdırmalısan. Yəni gözləməlisən ki, həmin rəngli səhifə nə vaxt bozaracaq. Bozarandan sonra bütün bəzəklər, təhriflər silinəcək. Sadəcə hadisələrin məğzi qalacaq"…

Hər kəsin bir daxili dünyası vardır, deyirlər. Onun dünyasında haqq-ədalət öz zəhmiylə hökm sürür, həyat tərzini büsbütün nizamlayır. Necə deyərlər, düzə düz, əyriyə əyri söyləməyə onu vadar edir. Həm də rejissordur. Bir sıra tamaşalara, onlarla filmə quruluş verib...

Haqqında söhbət açdığım Mehriban Ələkbərzadə Gəncədə dünyaya gəlsə də uşaq yaşlarından ailəsi ilə birlikdə Sumqayıt şəhərinə, elə mənim də böyüyüb başa çatdığım 8-ci mikrorayona köçüblər.  Yaxşı yadımdadır, rəhmətlik atasının “Pobeda” avtomobili də vardı. 

1982-ci ildə 17 saylı orta məktəbi bitirib. Bir il Sumqayıt Dövlət Dram Teatrında rejissor köməkçisi işləyib. 1983-cü ildə Azərbaycan Dövlət İncəsənət İnstitutunun rejissorluq fakültəsinə daxil olub və 1988-ci ildə oranı uğurla başa vurub. Həmin il təyinatla Lənkəran Dövlət Dram Teatrına göndərilib. 1990-cı ildə Lənkərandan Bakıya qayıtdıqdan sonra "Azərbaycanfilm" kinostudiyasında "Güzgü" qısametrajlı bədii filmini ərsəyə gətirib.

1991-ci ildə Milli Dram Teatrına rejissor köməkçisi ştatına işə götürülüb. 1994-cü ildən isə həmin teatrda quruluşçu rejissor işləyib.

Mehriban xanım müxtəlif vaxtlarda Azərbaycan Dövlət Televiziyasında Nahid Hacızadənin "Yaşa, ey haqq!", Jan Koktonun "İnsan səsi", Marşa Normanın "Gecən xeyrə qalsın, ana", Mehriban Vəzirın "İlğım", Afaq Məsudun "Cəza" əsərlərini tamaşaya hazırlayıb. "Space" televiziyasında özünün həm rejissoru, həm müəllif-aparıcısı olduğu verilişlərdə bir sıra layihələrlə tamaşaçıların zövqünü oxşayıb. 2017-ci ildə Azərbaycan Dövlət Yuğ Teatrının baş rejissoru vəzifəsinə təyin olunub. AMEA-nın "Yeni tarix" şöbəsinin elmi işçisidir. 

2003-cü ildə Naxçıvan MR-nın əməkdar incəsənət xadimi, 2013-cü ildə isə Azərbaycan Respublikasının əməkdar incəsənət xadimi fəxri adlarına layiq görülüb. Bir neçə ildir ki, dalbadal Prezident Mükafatı alır…

2008-ci ilin əvvəllərində mətbuata verdiyi açıqlamasında televiziya fəaliyyətinə son qoyduğunu bildirib. Bunu nə üçün etdiyini bilmirəm, amma Mehriban xanımın "sehirli qutuda" yenidən görünməsini arzulayan tamaşaçılar çoxdur. 

Bayağı verilişlərin baş alıb getdiyi zamanda onun müəllif proqramı ilə hər hansı bir televiziya kanalında görünməsi həmin telekanala nüfuz gətirməzmi?..

Bəli, tarixin rəngli səhifəsi bozaranda həqiqət olduğu kimi görünəcək. Onda Mehriban xanım Ələkbərzadəni indikindən də çox sevəcəklər…

Bəzən vətəndaş cəmiyyəti və media ayrı-ayrı haqsızlıqlara və qanunsuzluqlara reaksiya verməklə bu kimi halların qarşısını ala bilir.  Bakı şəhəri Yasamal rayonu, İslam Səfərli küçəsi 12 ünvanında 1880-ci ildə inşa edilmiş tarixi-arxitektur bina ilə bağlı baş vermiş məlum insident də məhz elə bu vətəndaş sayıqlığı nəticəsində aradan götürülüb.

“Ədəbiyyat və incəsənət” portalı xatırladır ki, işbazlar tərəfindən sözügedən binanın 

dam örtüyündə əlavə mansardın tikilməsi faktı dərhal medianın diqqətini cəlb edib. Xəbər saytları bu qanunsuzluq faktını istimailəşdiriblər. Ayrı-ayrı vətəndaşlar da xəbəri sosial mediada gündəmdə saxlayıblar. 

Və bir gün keçmiş Bakı Şəhər İcra Hakimiyyəti məlumat yayıb ki, binanın sahibkarı tərəfindən tarixi abidədə mansardın tikilməsi struktur idarələr tərəfindən nəzarətə götürülüb və tikintinin qarşısı alınıb. Məlimatın tam mətni belədir:

“Qanunsuz tikinti ilə bağlı sahibkara xəbərdarlıq edilib və tarixi binanın üzərində hər hansı tikintinin aparılmasının yolverilməz olduğu bildirilib. Artıq binanın damında inşa edilmiş konstruksiyaların sökülməsinə qərar verilib və söküntü işlərinə başlanılıb. Ərazi aidiyyəti qurumlar tərəfindən tam nəzarətə götürülüb”.

Bu yerli əhəmiyyətli tarix-memarlıq abidəsinə edilən qanunsuz müdaxilənin qarşısının alınmasında Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin sanksiyası və müdaxiləsi isə əsas rol oynayıb. 

Bu barədə Dövlət Xidmətinin rəsmi açıqlamasında bildirilir. Açıqlamada qeyd olunur ki, həmin tarixi-memarlıq abidəsinin üzərində əlavə mərtəbənin inşasına başlanıldığı aşkar edilən kimi tikinti dayandırılıb, taxta konstruksiya ilə aparılan tikinti işləri sökülərək, tarixi bina əvvəlki görkəminə qaytarılıb.

Amma gəlin razılaşaq ki, paytaxtımızda indiyə qədər neçə-neçə tarixi abidə media və vətəndaş müdaxiləsi olunmayıb deyə işbazların qurbanına çevrilib. 

Ayıq-sayıq olmaq, dəyərli hər şeyimizi qorumaq bizim borcumuzdur. 

Və sonda bir ritorik sual: tarixi abidə statuslu bina niyə dövlətin balansında olmasın, bir işbaz sahibkarın xüsusi mülkiyyəti sayılsın?

Hümbət Həsənoğlunun növbəti 10 aforizmi

1) Arzu insan ağlının yelkənidir.

2) Təvəzökarlıq özünü nümayiş etdirməyin incə üsuludur.

3) Şair - qəlbini çıxarıb hamıya göstərə bilən insandır.

4) Şəxsiyyət özünün hamı kimi olmadığını dərk etməkdən başlayır.

5) Saatın əqrəbi irəli getsə də, hər kəsin vaxtını geri sayır.

6) Sənin əvəzinə öləcəyini seçiblər, sənin seçimin isə yaşamaq olmalıdır.

7) Sevgi iki ruhun bir-birində təsəlli tapmasıdır.

8) Nəfəs verib bir cüt soyuq əli qızdıra bilmirsənsə, nəfəs almağın əbəsdir.

9) Maraqlı yaşamaq üçün bekarçılığını qurban verə bilməlisən.

10) Musiqi qəlbin nəfəsliyidir.