XIX əsrdə iki dövlət arasında gedən müharibənin nəticəsində vahid Azərbaycan iki hissəyə parçalanıb. O gündən bir hissəsi Qafqazda yerləşən Şimali Azərbaycan və İranın tərkibində qalan Cənubi Azərbaycan məfhumları yaranmağa başlayıb. Beləliklə azərbaycanlılar ikiyə parçalanıb və soydaşlarımız bir-birlərindən ayrı salınıblar. İranda olan etnik azərbaycanlılar həmişə həsrətlə Arazın bu tayında olan Azərbaycan Respublikasına baxıblar, doğmalarını görmək həsrəti ilə yaşayıblar. Bir xalqın ikiyə bölünməsi və doğmalar arasındakı ayrılıq... Bu gün burada səsləndirdiyimiz “Ayrılıq” mahnısının mənşəyi həmin tarixdən başlayır.

“Ədəbiyyat və incəsənət” AzərTAC-a istinadən xəbər verir ki, bu fikirləri məşhur fotoqraf Reza Deqati Parisdə “Zulma” nəşriyyat evi tərəfindən təşkil edilmiş və görkəmli Azərbaycan müğənnisi Rəşid Behbudovun ifasında “Ayrılıq” mahnısı ilə başlayan ədəbi gecədə deyib. 

Fotoqraf bildirib ki, vaxtilə həmin mahnını ailələrində hər kəs oxuyurmuş. Bu mahnı Azərbaycan ərazisinin iki yerə bölünməsi ilə İran ərazisində qalmış azərbaycanlılara həmişə ayrılıq hissini yaşadıb. Təəssüflər olsun ki, bu gün 30 milyondan çox azərbaycanlı İranda hələ də ayrılıq nisgili ilə yaşayır.

Ədəbi gecədə R. Deqatinin Azərbaycanın təbiətini, tarixi məkanlarını, abidələrini, tolerantlıq mühitini, Qarabağ müharibəsini əks etdirən fotolarından ibarət “Günahsızların kütləvi qırğını” (Le massacre des innocents) və “Alovun zərifliyi” (L'Elégance du feu) kitabları təqdim olunub. 

Müharibə fotoqrafı deyiləm, sülh müxbiriyəm deyən Reza Deqati “fotoqrafiya insanlığın xidmətində” devizi ilə dünyanın ən qaynar nöqtələrinə səyahət edib. Gördüyü hər anı çəkdiyi fotolarda əbədiləşdirib. Onun fotoları beynəlxalq jurnallarda (“National Geographic”, “Time Magazine”, “Stern”, “Newsweek”, “El País”, “Paris Match”, Geo…) nəşr edilib.

“Ədəbiyyat və incəsənət”

(15.02.2023)

ŞƏHİD AİLƏLƏRİ ZƏLZƏLƏDƏN ZƏRƏR ÇƏKMİŞLƏRƏ YARDIM EDİBLƏR

Şəhid mayor Teymur Əzizovun həyat yoldaşı Zeynəb Səmədovanın təşəbbüsü və dəstəyi ilə Sumqayıtdakı şəhid ailələri tərəfindən Türkiyədə zəlzələdən zərər çəkənlərə 17 min dollarlıq humanitar yardım göndərilib.

Zeynəb Səmədovanın “Ədəbiyyat və incəsənət”in əməkdaşına verdiyi məlumata görə, göndərilən yardımlarda quru, kalorili və hazır qidalara üstünlük verilib, həmçinin şam və poverbanklar, geyim, yataq dəstləri, uşaq bezləri kimi lazımlı əşyalar da var. Onların çeşidlənməsində digər şəhid ailələri də köməklik göstəriblər. 
Qeyd edək ki, şəhidimizin yoldaşı Zeynəb Səmədova heyvanları da yaddan çıxarmayıb. Onun təşəbbüsü ilə həmin bölgələrə heyvan yemləri də yollanılıb.

44 günlük müharibədə şəhid olan Teymur Əzizovun həyat yoldaşı Zeynəb Səmədova deyir: “Mənim həyat yoldaşım Teymur hər zaman kimsəsizə, ehtiyacı olana əl tutardı. Əsgərlərə qardaş idi.  Bilirəm ki, indi onun ruhu narahatdır. Bu gün mənim təklifimlə köməyə gələn şəhid ailələri itkinin, ağrının və evsizliyin nə olduğunu gözəl anlayır. Çünki mən də, digər şəhid ailələrinin üzvləri də  Qarabağa və digər bölgələrimizə düşmən hücum edərkən evsizlik, aclıq və səfalət ağrısını yaşamışıq. Ona görə də biz Türkiyədəki qardaş və bacılarımızı, uşaqlarımızı və hətta insanlardan yardım uman Tanrının yaratdığl heyvanları da unutmadıq.”

“Ədəbiyyat və incəsənət”

(14.02.2023)

Azərbaycanın tanınmış dəzgah və kitab qrafikası ustası, Xalq rəssamı Arif Hüseynovun 80 illik yubileyi gəlir. Bu münasibətlə fevralın 17-də Azərbaycan Milli Xalça Muzeyində yubilyarın fərdi sərgisi açılacaq. 

“Azərbaycan nağılı” adlı sərgi Milli Məclisin Mədəniyyət komitəsi, Mədəniyyət Nazirliyi, “Azərxalça” ASC, Rəssamlar İttifaqı və Milli Xalça Muzeyinin birgə təşkilatçılığı ilə keçiriləcək.

Arif Hüseynovun əsərləri hazırda Azərbaycan Milli İncəsənət Muzeyi, Azərbaycan Dövlət Rəsm Qalereyası, Moskvada Dövlət Şərq Xalqları İncəsənəti Muzeyi, həmçinin şəxsi kolleksiyalarda saxlanılır.

Şəkillərdə: Arif Hüseynovun nağıl illüstrasiyaları.

“Ədəbiyyat və incəsənət”

(14.02.2023)

67 İLLİK BİR TARİX

1936-cı ildə Azərbaycan Radiosu fəaliyyətə başladıqdan düz 30 il sonra – 1956-cı il fevralın 14-də Azərbaycan televiziyası fəaliyyətə başladı. Bakıda televiziya mərkəzi üçün binanın inşasına 1954-cü ildə başlanıldı. Tikintidən ötrü yer Bakının ən hündür məkanlarından birində – Mehdi Hüseyn 1 adlanacaq ünvanda seçilmişdi. Yerli inşaatçı və mütəxəssislərin moskvalı, leninqradlı həmkarları ilə birgə ucaltdıqları və müvafiq avadanlıqla təchiz etdikləri telemərkəzin binası 1955-ci ilin sonunda təhvil verildi. 1956-cı ilin fevralına qədər Bakı studiyasının ara-sıra sınaq verilişləri yayımlanırdı. İlk veriliş günü ekranda gənc aktrisa Hökumə Qurbanova göründü. Çıxışını "Göstərir Bakı!" kəlməsi ilə açan Hökumə Qurbanova tamaşaçıları televiziyanın fəaliyyətə başlaması münasibətilə təbrik etdi. Həmin gün ekranda "Bəxtiyar" bədii filmi nümayiş etdirildi.

Həmin tarix xalqımızın siyasi və mədəni həyatına böyük yenilik gətirdi.

Şərqdə ilk televiziyanın ölkəmizdə fəaliyyətə başlamasından ötən 67 il ərzində Azərbaycanda televiziya yayım şəbəkəsi qurulub, ən müasir standartlara əsaslanan rəqəmli televiziya yayımvericiləri istismara verilib.

1996-cı ildə istismara verilən Bakı Teleqüllə Kompleksi bu gün ölkənin əsas yayım mərkəzi hesab olunur. 310 metr hündürlüyü olan və unikal konstruksiyaya malik bu kompleks vasitəsilə yerli və bir çox xarici ölkələrin televiziya proqramları yayımlanır.

Teleradionun uğurlu fəaliyyəti Ümummilli Lider Heydər Əliyevin adı ilə bağlıdır. Azərbaycan Televiziyasını xalqın milli sərvəti adlandıran Ulu Öndər onun cəmiyyət həyatında, dövlət quruculuğunda, ölkəmizdə gedən ictimai-siyasi proseslərdə, milli-mənəvi dəyərlərin təbliğindəki rolunu yüksək qiymətləndirir, siyasətin bu tribunadan xalqa çatdırılmasına böyük əhəmiyyət verirdi. Azərbaycan Teleradiosu bu gün də xalqın əsl tribunasıdır. O, ölkə vətəndaşlarına Azərbaycan həqiqətlərini təqdim edir. Prezident İlham Əliyevin rəhbərliyi ilə müstəqil dövlət quruculuğu prosesi, davamlı və ardıcıl olaraq həyata keçirilən uğurlu islahatlar, ölkənin dinamik inkişafı, qazanılan nailiyyətlər bu kanalın gündəlik fəaliyyətində öz əksini tapır. Dövlət əhəmiyyətli ictimai-siyasi tədbirlərin operativ işıqlandırılması, dövlətimizin rəsmi mövqeyinin həm ölkə daxilində, həm dünyada tam dəqiqliklə yayımlanması Azərbaycan Teleradiosunun müstəsna xidmətidir. Artıq onun hədəfi təkcə Azərbaycan tamaşaçısı, dünya azərbaycanlıları deyil, dünya ölkələri, dünya tamaşaçısıdır.

Televiziyanın efirində ərsəyə gələn hər bir verilişdə, hər bir videosüjetdə böyük yaradıcı kollektivin əməyi var. Hazırda Azərbaycan Televiziyasında müxtəlif mövzularda tok-şoular, portret və səyahət verilişləri, musiqili-əyləncəli proqramlar, televiziya tamaşaları, sənədli və bədii filmlər nümayiş etdirilir. Televiziyanın analitik proqramları da kifayət qədərdir.

Peşəkarların yetişməsi üçün isə Azərbaycan Teleradiosunun imkanları genişdir: studiyalar, çəkiliş pavilyonları, zəngin maddi-texniki baza, ən müasir texniki imkanlara malik avadanlıqla təchiz olunan montaj otaqları. Ölkə başçısının birbaşa diqqəti və qayğısı ilə həyata keçirilən islahatların məqsədi isə Azərbaycan Teleradiosunun nüfuzunu daha da artırmaq, tamaşaçı və dinləyicilərə yüksək səviyyəli proqramlar təqdim etməkdir.

Azərbaycan Televiziyasındakı dəyişikliklər, həm də verilişlərin məzmun və formatında özünü büruzə verir, yaradıcılıq imkanlarını artırır. Dövlət əhəmiyyətli ictimai-siyasi tədbirlərin istər ölkə daxilində, istərsə də xaricdə operativ şəkildə işıqlandırılmasında televiziyamızın müstəsna xidmətləri var.

2009-cu il fevralın 1-dən efirə çıxan “İdman Azərbaycan” kanalı isə idman ictimaiyyəti və idmansevərlərə gözəl hədiyyə olub. Prezident İlham Əliyevin təşəbbüsü ilə yaradılan telekanalın fəaliyyəti dövlətimizin idmana, gənclərin sağlam ruhda böyüməsinə verdiyi önəmin təsdiqinə çevrilib.

2011-ci ildə isə Azərbaycan Televiziyasının nəzdində ziyalıların və sənətçilərin çoxdankı arzusu olan “Mədəniyyət” kanalı ilk dəfə tamaşaçıların görüşünə gəlib. İndi “Mədəniyyət” kanalı Azərbaycan mədəniyyətini dünya mədəniyyətinin tərkib hissəsi kimi təbliğ edir, dünya mədəniyyətinin incilərini isə Azərbaycan tamaşaçılarına çatdırır.

Bu gün Azərbaycan Teleradiosunun nəzdində, həmçinin ölkənin ən nüfuzlu musiqi kollektivləri fəaliyyət göstərir. Azərbaycan Radiosunun da maddi-texniki bazası modernləşdirilib, radio verilişlərinin ideya-bədii məzmunu keyfiyyətcə yenilənib.

Son illər Teleradionun həyatında baş verənlər də dövlətin bu sahəyə qayğısının nəticəsidir. İndi bu sərvət müasirliyi özündə ehtiva edən, 3 peyklə dünyaya yayımlanaraq yüksək “əyarlı” peşəkar telekanala çevrilərək, ən son texniki standartlara tam uyğunlaşıb.

Bayramınız mübarək, əziz televiziya işçiləri! 

“Ədəbiyyat və incəsənət”

(14.02.2023)

Rəsm qalereyası: Rafael Əsədov, “Payız mənzərələri” silsiləsindən.

Günün fotosu: ABŞ vətəndaşlarına xəbərdarlıq edib

ABŞ-ın Rusiyadakı səfirliyi öz saytında Rusiyadakı ABŞ vətəndaşlarına təcili ölkəni tərk etmək barədə xəbərdarlıq etmişdir. 

Foto: AP

“Ədəbiyyat və incəsənət”

(14.02.2023)

Yanvar ayında ölkədə 9 milyard 690,2 milyon manatlıq və ya əvvəlki ilin eyni dövrü ilə müqayisədə 1,5 faiz az ümumi daxili məhsul istehsal olunub.

Bu barədə Dövlət Statistika Komitəsinin məlumatında bildirilir. Məlimatda o da bildirilir ki, iqtisadiyyatın neft-qaz sektorunda əlavə dəyər 4,6 faiz azalıb, qeyri-neft-qaz sektorunda isə 1,7 faiz artıb. ÜDM istehsalının 52,8 faizi sənaye, 9,5 faizi ticarət; nəqliyyat vasitələrinin təmiri, 5,3 faizi nəqliyyat və anbar təsərrüfatı, 3,2 faizi tikinti, 2,6 faizi kənd təsərrüfatı, meşə təsərrüfatı və balıqçılıq, 1,6 faizi informasiya və rabitə, 1,4 faizi turistlərin yerləşdirilməsi və ictimai iaşə sahələrinin, 15,5 faizi digər sahələrin payına düşüb. Məhsula və idxala xalis vergilər ÜDM-in 8,1 faizini təşkil edib. Əhalinin hər nəfərinə düşən ÜDM 956,6 manata bərabər olub.

“Ədəbiyyat və incəsənət”

(14.02.2023)

Musiqinin sərhədi olmur- bu leytmotivlə Bakıdakı Rus Evində musiqişünas, pedaqoq, publisist, Azərbaycan Bəstəkarlar və Jurnalistlər ittifaqlarının üzvü, “Humay” mükafatının laureatı Raya Abbasovanın yaradıcılıq gecəsi keçirilib. 

Rusiya İnformasiya-Mədəniyyət Mərkəzinin mətbuat xidmətinin bildirdiyinə görə, tədbirdə Xalq artisti, Azərbaycan Dövlət Akademik Xalq Çalğı Alətləri Orkestrinin baş dirijoru və bədii rəhbəri Ağaverdi Paşayev, Əməkdar mədəniyyət xadimləri professor Zemfira Qafarova, Cəlal Abbasov, Lalə Quliyeva, Əməkdar artistlər Töhfə Babayeva, Samara Aşumova, Cəmilə Kərimova, Ceyla Babayeva, dosent, Milli Konservatoriyanın Dirijorluq kafedrasının müdiri Leyla Zalıyeva, Azərbaycanın Əməkdar rəssamı Cəsar Məmmədov iştirak ediblər. 

Tədbirdə Azərbaycanın Rusdilli Təhsil Müəssisələri Assosiasiyasının sədri Lyubov Yakunina çıxış edərək təşəkkürünü bildirib. 

Qeyd olunub ki, Raya Abbasova bir çox elmi məqalələrin və kitabların müəllifidir. O, Azərbaycanın Xalq artistləri Rəfiqə Axundova və Maqsud Məmmədovun həyat və yaradıcılıqlarına həsr olunmuş “Balet, ömrüm mənim” sənədli filminin ssenari müəllifi və musiqi redaktorudur. Bu ekran əsərində əfsanəvi artistlər, dünya baletinin ulduzları iştirak ediblər. 

Mübaliğəsiz olaraq söyləmək olar ki, Raya Abbasova musiqişünaslıq, jurnalistika, elmi işin müxtəlif sahələrində çoxşaxəli yaradıcılıq fəaliyyəti ilə Azərbaycanın musiqi mədəniyyətinin təbliğinə ciddi töhfə verib. Onun ensiklopedik bilikləri, musiqinin müxtəlif janrlarının sehrli sirlərini dinləyicilərə məntiqli çatdırmaq qabiliyyəti və pedaqoji təcrübəsi ölkəmizin mədəniyyət həyatında əlamətdar sayıla bilər.

“Ədəbiyyat və incəsənət”

(14.02.2023)

Kulis.az “Skafandrlı adam” kitabına istinadla Fuad Poladovun qızı Fəridə Poladova ilə olan müsahibəni təqdim edib. Həmin müsahibəni Daycest bölümündə diqqətinizə çatdırırıq.

- Fəridə xanım, ananız da, Ağarəhim də dedilər ki, ailənizdə Fuad müəllimə ən çox siz oxşayırsınız - həm zahirən, həm də xasiyyətcə. Necə fikirləşirsiniz, doğrudan belədir?

- Oxşamaq barədə deyə bilmərəm, amma bizim öz yaxınlığımız var idi. Görünməsə belə... Çünki o, heç kimlə danışan, sıx yaxınlıq quran insan deyildi. Evdə uşaqlarına qarşı da belə idi. Amma bizim, sanki özəl bir bağlılığımız vardı. Bir-birimizi çox tez, sözsüz başa düşürdük.

- Bu necə bir şeydir? Adətən ən sərt atalar belə qızlarına qarşı daha mehriban olurlar, ən azından, müəyyən yaşa qədər. Sizin yaxınlığınız da belə idi, yoxsa daha fərqli bir bağı nəzərdə tutursunuz?

- Fərqli -di. Çünki dediyim kimi, oxşamaq, öpmək, qucaqlamaq bizim atamızda belə şeylər yox idi. Ancaq çox uzun müddətə ezamiyyətə gedəndə bizi öpüb qucaqlayıb qapıdan çıxırdı və bir də qayıdanda qucaqlayırdı.

- Necə qucaqlayırdı? Bərk, yoxsa yüngülvari?

- Gedəndə yüngülvari. Qayıdanda daha bərk qucaqlayırdı. O, hisslərini başqa cür ifadə eləyirdi. Məsələn, baxışları ilə. Mən həmişə anama da, qardaşıma da deyirəm ki, həyatda nəyə nail olmuşamsa, onun baxışları üçün nail olmuşam, o, mənə elə baxsın deyə.

- Necə baxırdı?

- Fəxrlə - “Fəridəm, qızım!”, - deyən baxışları vardı. O baxışları, arxamızda dayanmağı... Biz həmişə bilirdik ki, arxamızda ata var, heç nədən qorxmurduq. Hərdən fikirləşirəm ki, o, sağ olanda mən nə balaca ikən, nə də böyüyəndən sonra heç nədən qorxmamışam. Hətta ölümdən də. Bilirdim ki, atam var. İzah olunası hiss deyil bu.

- Fuad müəllim qapalı, hisslərini göstərməyən insan idi. Yəni anladığım qədəri ilə, “qorxma, qızım, mən varam, səni çox istəyirəm” filan kimi sözlər deməyib. Bəs haradan bilirdiniz ki, ona həmişə güvənə bilərsiniz?

- Qətiyyən deməyib. Bizim maraqlı münasibətimiz vardı. Mən bilirdim ki, heç kim xətrimə dəyə bilməz; onun sevgisini həmişə çox aydın hiss eləmişəm. Düzdür, heç vaxt “səni çox sevirəm” deməyib, amma baxışları... Mən də, qardaşım da... Məsələn, biz yüngülvari soyuqlayanda, xəstələnəndə kişi ağlını itirirdi, çox narahat olurdu.

- Heç olub ki, məktəbdə, küçədə kiminləsə dalaşasınız, sonra gəlib ona şikayət eləyəsiniz?

- Hə, olub. Əslində, mən sakit, necə deyərlər, düzgün uşaq olmuşam, həmişə onun standartlarına, onun istəklərinə layiq olmaq üçün özümə, dərslərimə çox fikir vermişəm. Onun o baxışlarını qazanmağa çalışmışam. Bilmirəm, yəqin, psixologiyada bütün bunların izahı var.

Ona sizi incidən uşaqlardan şikayət eləyəndə nə deyirdi?

- Belə şey bircə dəfə olub. Bir oğlan vardı məktəbdə, mənə nəsə demişdi, indi tam xatırlamıram, ibtidai sinifdə idik. Bizim məktəb evə çox yaxın idi. O qədər yaxın idi ki, bir dəfə ayaqqabı geyinməyi unutmuşdum, ev başmaqları ilə getmişdim dərsə. Həmin gün də qaça-qaça gəlmişdim üstünə. Gəldi məktəbə, sinfin qarşısında həmin uşağın başını sığalladı, dedi ki, mən bilirəm, sən elə oğlan deyilsən, yaxşı oğlansan, belə şey deməzsən. Gəlib hamının yanında o uşağa “sən belə oğlan deyilsən” dediyinə görə mən də bir az pərt oldum.

- Əks-psixologiya tətbiq eləyib.

- Hə. Ondan sonra elə bir şey olmayıb ki, gəlim, kimdənsə, nədənsə şikayət eləyim.

- Ananız deyəndə ki, Fəridə xasiyyətcə ona daha çox oxşayır, düşündüm ki, bəlkə, siz onu hər kəsdən daha yaxşı anlayarsınız. O niyə o qədər qapalı idi, niyə özünü gizlədirdi?

- Hərdən mən də özümə bu sualları verirəm. Bilirsiniz, biz onun keçmişi - 40 yaşına qədər olanlar barədə çox şey bilmirik. Bildiklərimizi də elə onun müsahibələrindən öyrənmişik. O qədər qapalı insan idi! Kim bilir, bəlkə də, o vaxtlar kimsə ona çox ağır zərbə vurub? Dostlarından, yaxınlarından kimsə... və ondan sonra belə olmağı seçib. Biz ondan bu barədə soruşanda heç vaxt danışmazdı öz keçmişindən.

- Məsələn, bir ailə məclisidir, deyib-gülürsünüz, hər kəs uşaqlığından, gəncliyindən, tələbəliyindən bir xatirəsini danışır. Belə anlarda da heç nə danışmırdı?

- Belə də... standart şeylər. Elə bir şey desin ki, sən maraqlı nəsə öyrənəsən, suallar verəsən, yox, belə şeylər danışmazdı. O nəyi danışıb nəyi danışmayacağını çox yaxşı bilirdi. Yadımdadır ki, bir dəfə, deyəsən, yaxınlarımızdan kiminsə ad günündən gəlmişdik, bir az içmişdi. Hamımız otaqda idik - atam, anam, mən və qardaşım. Nəsə danışdı. Nə olduğunu söyləməyəcəyəm, amma gəncliyində baş vermiş çox maraqlı bir əhvalat danışdı. Ertəsi gün “ata, dünən sən belə bir şey danışdın, o barədə bir şey soruşmaq istəyirəm” deyəndə... o anda üzümüzə elə baxdı ki! Baxışları ilə - “Sizin başınız xarabdır? Mən sizə elə bir şey danışmamışam!”, - dedi. Bu, elə bir baxış idi ki, hamımız özümüzü dəli kimi hiss elədik, fikirləşdik ki, bəlkə, kollektiv şəkildə yuxuda görmüşük bunu? Elə o cür baxa-baxa əlavə elədi ki, gedin, işinizlə məşğul olun. Üçümüz də döndük və getdik işimizlə məşğul olmağa. Yəni o, işini, söhbətini bilən insan idi. Belə baxanda hər şeyi açıb-tökməyi nəyə yarayardı? Ancaq insanların marağını söndürərdi. Məncə, onun sənəti ilə eləmək istədiklərinə, vermək istədiyi mesajlara bunun heç bir təsiri olmayacaqdı. Sadəcə insanların marağını təmin eləyəcəkdi.

- Ananıza qarşı qısqanc olubmuş. Bəs sizə qarşı?

- Həmçinin. Yadımdadır, anam danışırdı ki, mənə elçi gələcəyini öyrəndiyi gün atam gecə səhərə qədər yatmayıb siqaret çəkibmiş.

- Elçilik necə keçmişdi?

- Maraqlı keçmişdi. Əslində, elçilər gedəndən sonra mənə dedi ki, sakitləşdim, düşünülmüş bir addım atdığını başa düşdüm. Çünki mən çox tez, iyirmi bir yaşımda ailə qurmuşam. O belə tez gözləmirdi.

Nişanlınızla ilk dəfə elçilikdə tanış olmuşdu?

- Hə, orada tanış olmuşdu. Sonra mənə dedi ki, onu görəndən, söhbət eləyəndən sonra bir az rahatlaşdım. Elçilikdə qayınanam bir söz işlətdi. Dedi ki, biz artıq oğlumuzun böyüdüyünü, ailə qurmağa hazır olduğunu başa düşmüşük. Atam da qayıtdı ki, amma biz hələ başa düşməmişik. Onlar da çıxıb gedəndə anlamadılar ki, bu, hə idi, ya yox. Bir-iki dəfə gəlib gedəndən sonra razılığını aldılar.

- Fuad müəllimin tamaşalarına gedirdiniz?

- Gedirdik.

- Ən çox hansı rolunu xoşlayırdınız?

- Teatr Xadimləri İttifaqında oynadığı bir tamaşa vardı adı “Növbəti” idi. O tamaşanı çox xoşlayıram, bircə dəfə baxmışam, amma yadımdan çıxmır. Qocalar evində olan iki yaşlı aktyordan bəhs eləyirdi. Onlardan birini atam oynayırdı, tərəf müqabili isə Rafiq Əliyev idi. Yadımdadır ki, çox təsir eləmişdi mənə. Sonralar çalışdım, onun videoyazısını tapım, təəssüf ki, tapa bilmədim. İttifaqdan dedilər ki, ola bilsin, rejissorun özündə var. Tamaşanı səhnələşdirən rejissoru Ələkbər Tağızadəni Moskvadan dəvət eləmişdilər, ittifaqda “Kaktus çiçəyi” və “Növbəti” tamaşalarını qoyub sonra getmişdi. Onunla da əlaqə qura bilmədim. Hə, bax, bir o tamaşanı çox sevirdim, bir də “Şah Qacar”. “Qacar”a neçə dəfə getmişəm. Əslində, həmişə deyirdi ki, nəyinizə lazımdır, gəlməyin. Amma biz onu dinləmirdik.

- Sonra fikirlərinizi deyirdiniz?

-Özü soruşurdu həmişə və çox maraqla dinləyirdi.

- Tənqid elədiyiniz nə isə olubmu?

- İndi yadımda deyil, yəqin, olub. Amma, əminəm ki, Ağarəhim tənqid eləməsəydi, olmazdı. Ola bilsin, mən fikirləşmişəm ki, indi heç nə deməyim, premyera günü əhvalını pozmayım. Amma Ağarəhim deməmiş olmaz.

- Sizin ixtisasınız nədir?

- İki ixtisasım var. İqtisadçı və insan resurslarının idarəsi.

- Heç incəsənətlə məşğul olmaq istəməmisiniz?

- Üç, ya dörd yaşımda bir dəfə demişdim ki, ata, mən aktrisa olmaq istəyirəm. O vaxt çox balaca olmağıma baxmayaraq, nədənsə həmin gün çox aydın yadımdadır. Köhnə evimizdə atam qonaq otağı ilə şüşəbəndin arasında bizim üçün turnik asmışdı. Mən həmin turnikdən sallanırdım. Bizdə evdə qəşəng açıqcalar vardı. Hər birində hansısa xarici aktrisanın şəkli və haqqında kiçik məlumat olurdu. Çox gözəl qadınlar idilər. Mən də turnikdən sallanırdım, arada düşüb həmin açıqcalara baxırdım. Onlara baxa-baxa dedim ki, ata, mən də aktrisa olmaq istəyirəm. Atam televizora baxırdı. Çevrildi. Onun bir baxışı vardı. Daha doğrusu, baxışlar silsiləsindən biri... baxdı və dedi ki, çox böyük səhv eləyirsən. Onunla da bitdi. Amma deyim ki, mənim incəsənətlə bağlı heç bir istedadım yoxdur. Ona görə də sonralar bir də bu məsələyə qayıtmadım.

- Evdə birlikdə filmlərə və s. baxırdınız?

- Ümumiyyətlə, atam televizora çox baxırdı. Evdə olanda sevimli yeri televizorun qarşısı idi. Köhnə evimizdə mətbəximiz yox idi, amma yeni evdə ən xoşladığı yer mətbəx idi. Orada divan da vardı. Özü çay dəmləyirdi, otururdu divanda və televizora baxırdı.

Dəmlədiyi çayı da özündən başqa heç kimə süzmürmüş.

- Hə. Biz ona süzəndə də bəyənmirdi. Gah deyirdi, açıq süzürsünüz, gah başqa şey. Filmlərə çox baxırdı, bizimlə birlikdə izləməyi də xoşlayırdı. Sonra fikirlərimizi bölüşürdük. Amma öz filmlərinə baxmağı sevmirdi. Heç vaxt birlikdə baxmamışıq, özünü də baxan görməmişik. Bəlkə, tək baxırmış, bilmirəm. Artıq özünü pis hiss eləməyə başlayanda bir filmi çıxmışdı. Kommersiya filmi idi. Ona baxmağı təklif elədim, dedi ki, yox, mən diski götürmüşəm, tək baxacağam.

- Sizə elə gəlmir ki, o, xəstəliyə lap başdan təslim olmuşdu? Ola bilsin, diaqnozu məlum olduğuna görə imiş. Adətən insanlar ən çarəsiz zamanlarda həyata daha çox sarılırlar.

- Elə idi. Xüsusən ilk vaxtlar. İlk vaxtlar deyəndə ki, həmin müddət o qədər də uzun olmadı: diaqnoz qoyulandan mayın beşinə qədər - heç bir il çəkmədi. Əvvəllər çox təslim olmuş kimi idi. Mənə elə gəlir ki, xəstəlik onu ən həssas yerindən vurmuşdu - səsindən. O bilirdi ki, bir də heç vaxt səhnəyə qayıda bilməyəcək. Hətta ömrünü bir neçə il uzatsalar belə... Məncə, mübarizə aparmamağının səbəbi bu idi; yaşamaq üçün səbəb görmürdü. Buna görə ağır söhbətlərimiz olmuşdu, çünki təslim olmağı mənə çox təsir eləmişdi. Bir tərəfdən onu başa düşürdüm, digər tərəfdən çox pis təsir edirdi. Düşünürdüm ki, məgər onun yaşamaq üçün elə bircə səbəbi varmış? Ancaq bizim söhbətlərdən sonra çox dəyişdi.

Xaricə getməyə, alternativ terapiya almağa razılıq verdi. Sonralar müsahibələrindən birində (mən həmin müsahibəni o rəhmətə gedəndən sonra oxudum) demişdi ki, mən nəvəmi məktəbə aparmaq istəyirəm. Bu, mənim sözlərim idi. Ona qınaq gətirmişdim, demişdim ki, sən nəvəni məktəbə aparmalısan. Bu mesajın ona çatması, sonra özünün də dilinə gətirməsi mənim üçün çox böyük məna daşıyırdı. Həmin söhbətlərimizdən sonra onun xəstəliyə münasibəti bir az dəyişdi, ümidi yarandı. Ancaq son bir neçə ayda artıq özü də başa düşürdü ki, məsələ hara gedir. Son günlərdə hətta doğma bacısını da evinə buraxmadı. Heç kimin onu görməyini istəmirdi. Detallara çox varmaq istəməzdim, özünüz bilirsiniz də... Həm də bunları təsvir eləmək çox çətindir.

- Siz zahirən də Fuad müəllimə çox oxşayırsınız.

- Saçımı qırxsam, demək olar ki, onun hayatını bir də yaşaya bilərəm.

- Bu, yaxşıdır?

- Zahirən ona bu qədər oxşamaq çox yaxşıdır. Həmişə bunu özümə fəxr bilmişəm. Hərdən kiminləsə təzə tanış olanda deyir ki, sizi kiməsə oxşadıram. Sonra başa düşəndə “Aaa!” eləyirlər. Kişiyə bənzədilmək adama maraqlı gəlir. Amma heç vaxt buna görə heyifsilənməmişəm, kompleks keçirməmişəm. Anamı görmüsünüz, çox gözəl qadındır. Cavanlıqda da çox gözəl olub. Ancaq ona da demişəm ki, sənə yox, atama oxşadığıma görə xoşbəxtəm. Bu, mənim sanki vizit kartımdır.

- Etiraf eləyim ki, biz Fuad müəllimlə danışanda sizinlə görüşmək istədiyimi demişdim, qəti etiraz eləmişdi. Hətta, məncə, teatrdan, qrim otağından çıxmaq istəməməsinin səbəbi də bu idi. O istəyirdi ki, mən də oradan kənara çıxmayım.

- Həmişə özünə qapanırdı, özü ilə çox söhbət edirdi. Səhərlər tez qalxanda onun özü ilə söhbətlərini eşidə bilərdin. Ayla danışan bir insan idi. Uşaqlıqda hər il yayda bizi Pirşağıda bir bağa aparırdı. Gecələr dənizdən qayıdanda özü qabaqda tək gedirdi, ayla söhbət edirdi. Təsəvvür edin: ailəsi - üç nəfər onun ardınca gəlir, o isə dönüb ailəsi ilə söhbət eləmir, ayla danışır. Çox introvert insan idi və bu, onun komfort zonası idi. Qəribə olanı budur ki, o, obraz deyildi. Yəni bizi ona görə gizlətmirdi ki, nələrisə bilirik, danışacağıq və hamı Fuad Poladovun, əslində, belə yox, elə insan olduğunu anlayacaq.

O necǝ idisə, elə idi. Mənə elə gəlir ki, ən dəyərlisi də elə budur. Məsələn, adətən ciddi olmağına baxmayaraq, hərdən elə şaqqanaq çəkirdi ki, bir anlıq təəccüblənirdin. Amma o elə təbii gülüş, elə təbii hal idi ki! O da atam idi. Başını arxaya atıb ürəkdən gülən adam da atam idi, adətən qaşqabaqlı olan adam da atam idi. Hamısı o idi, özü idi. Heç vaxt fərqli görünmək istəmirdi. Mənim oğlumla - Suadla həmişə o ki var gülürdü, onun hər şıltaqlığına dözürdü. Düzdür, onda Suad balaca idi. Suadın ikinci ad günündə artıq diaqnozunu bilirdik, heç kimin əhvalı yaxşı deyildi. Atamın yanına aparmışdım onu, elə orada öz aramızda qeyd elədik. Axıra qədər nə qədər ki ayağa dura bilirdi - onun üçün dururdu. Nə zaman dura bilmədi, dedi ki, gətirmə, dura bilmirəm.

- Ata deyəndə ən birinci yadınıza nə düşür?

- Qoxusu yadıma düşür. Odekolonunun qoxusu.

“Ədəbiyyat və incəsənət”

(14.02.2023)