Super User
Rəşad Nuri Güntəkin və Löpe de Veqa
Varisin “Həftənin təqvimi” yazısından
Bu günə təsadüf edən əlamətdar hadisələri diqqətinizə çatdırırıq:
25 noyabr. Şükranlıq günü
Bu gün xristian dünyası insanları Allaha onlara verdiyi ömür, nazu-nemətlər üçün minnətdarlıq bildirəcəklər. Şükranlıq günü qədirbilməz, daim narazı insanları tərbiyələndirəcək bir gündür. Yaxşı olar ki, müsəlman dünyası da bu ənənəyə qoşulsun. Çünki şükranlıq etmək Quranda da buyrulub.
25 noyabr. Beynəlxalq qadınlara qarşı zorakılığın ləğv edilməsi günü
Bu günün qeyd edilməsini BMT Baş Assambleyası 2000-ci ildə lazım bilib, beynəlxalq təşkilatları, qeyri-hökumət orqanlarını mövcud problemə ictimaiyyətin diqqətini cəlb etmək üçün tədbirlər keçirməyə dəvət edib. Bəs niyə 25 noyabr? Çünki 1961-ci ilin həmin günündə Dominikan Respublikasında padşah Truxilyonun əmri ilə 3 siyasi fəal - Mirabal bacıları vəhşicəsinə qətlə yetiriliblər.
“Zərif və zəif cinsin nümayəndələri olan qadınlara qarşı zorakılıq cəmiyyəti və ailələri iflic vəziyyətinə salır, buna yol vermək olmaz” söyləyir BMT qətnaməsi. Əlbəttə ki, düz buyurur. Mən bu yerdə ölkəmizlə bağlı cəmi bir neqativ fakta toxunmağı özümə borc bilirəm. Xüsusən Cənub bölgələrimizdə 13-14 yaşlı kiçik qızların ərə verilməsi cinayətdir, bununla hələ də yetərli mübarizə aparılmır.
25 noyabr. Gorasöymə günü
Təqvimdə 25 noyabra düşən maraqlı qeydetmələr var, məsələn Ev mətbəxi günü. Deyilir ki, kafe-restoran qidası nə qədər dadlı olsa belə ev mətbəxinin yerini verə bilməz. Yaxud, Alış-verişi xatırlama günü. Son dönəmdə aldıqlarının siyahısını tutub əmin ol ki, onların nə qədəri boşunadır, pulunu yelə vermisən. Amerikalıların isə bu gün qeyd etdikləri gün Milli dostunla ye günüdür, yəni, bu gün boğazından tək çörək keçirmə, dostunla nuşi-can elə.
1889-cu ilin bu günündə İstanbulda dünyaya Rəşad Nuri Güntəkin gəlib. Əsərləri dillər əzbəri olan bu yazıçının “Çalı quşu” romanı xüsusən məşhurdur, kitabı yüz minlər oxuyub, serialına isə yüz milyonlar baxıb. 1562-ci ilin bu günündə Madriddə də məşhur ispan dramaturqu, əsərləri günü bu gün də aktuallığını itirməyərək teatr repertuarlarına daxil edilən Löpe de Veqa doğulub.
Bu gün dünya doğum günü bu günə təsadüf edən Çili hərbi xunta yaradıcısı Auqusto Pinaçetin – bəşəriyyətin ən qanlı diktatorlardan birinin goruna söyəcək, biz azərbaycanlılar da gəlin bu gün doğulan, sovet diktaturasının ən bariz nümayəndəsi, xalqımıza zillətlər yaşatmış erməni Anatas Mikoyanın göruna söyək. Rusiyadakı həmyerlilərimizdən də xahiş edək ki, nə olar, milli qürur nümayiş etdirin, o köpək oğlunun adına olan kolbasa kombinatının kolbasa-sosislərini alıb yeməyin.
“Ədəbiyyat və incəsənət” (25.11.2022)
Kəlbəcərin de yure azadlığı günüdür
Kəlbəcər rayonunun sahəsi 3054 km2-dir, bu nəhəng ərazili rayonda bir şəhər, bir şəhər tipli qəsəbə (İstisu), 145 kənd vardır. Ağdərə rayonunun 20-yə qədər kəndi də Kəlbəcər inzibati bölgüsünə daxildir. Mərkəzi Kəlbəcər şəhəridir. Rayonunun əhalisinin sayı 85,5 min (01.04.2013) nəfərdir. Əhalisinin 98 % azərbaycanlılardan, 2 % ruslardan, İrandan gəlmə kürdlərdən və digər millətlərdən təşkil olunub. “Kəlbəcər” toponiminin mənşəyi qədim türk dilində (oykonimin ilkin forması Kevliçer kimi qəbul edilib) “çay üstündə qala” deməkdir. Kevli “çayın üstü”, çer/car “qala” mənasını verir.
Kəlbəcər şəhəri Bakıdan təxminən 450 km qərbdə, Bərdə - İstisu avtomobil yolunun kənarında, Tərtər çayı sahilində, sıldırım qayalıqlar üzərində yerləşir. Azərbaycanın cənnət məkanı olan Kəlbəcər rayonunu başdan-başa gülüstan adlandırmaq olar. 30 000-dən artıq bulağı olan rayon əsl təbiət muzeyidir. Rayon ərazisində 4 mindən artıq bitki növü bitir ki, bunlardan da 200-ü dərman bitkisidir. Zəngin meşələr diyarı olan Kəlbəcərdə yüzlərlə mineral bulaq var. Min bir dərdin dərmanı olan İstisuyun şöhrəti dünyanı gəzir, zirvəsindən tufanı-çəni heç zaman əskik olmayan Murov və Dəlidağ əsl məğrurluq və gözəllik rəmzi sayılır. Məhz bu səbəbdən də Qafqaz geologiyasının atası hesab edilən V.Avix Kəlbəcər haqqında demişdir: “Kim Tərtərçay dərəsi boyunca təbiəti seyr etməmişdirsə, İsveçrənin gözəlliyinə yalnız o məftun ola bilər”.
Kəlbəcər rayonu ərazisində Azərbaycanın qədim xristianlıq dövrünə aid çoxlu tarixi abidələr var, Xaçın knyaz sarayı, Gəncəsər, Havaptux, Müqəddəs Tanrı anası monastırları, Mamakan xatun, Müqəddəs Stepanos və Xilaskar kilsələri bu qəbildəndir.
Kəlbəcər rayonu 2 aprel 1993-cü ildə ermənilər tərəfindən işğal olunmuşdu. 321 nəfər əsir düşmüş və ya girov götürülmüş, 511 nəfər vəhşicəsinə qətlə yetirilmiş, 97 məktəb, 9 uşaq bağçası, 116 kitabxana, 43 klub, 42 mədəniyyət evi, tarix-diyarşünaslıq muzeyi, 9 xəstəxana, 75 tibbi məntəqə, 32 ambulatoriya və aptek, yüzlərlə inzibati bina, minlərlə mənzil, 100 min baş qaramal, 500 min baş qoyun-quzu, yüzlərlə maşın, texnika talan edilmiş, rayonun milyardlarla manatlıq sərvəti Ermənistana daşınmışdı. Kəlbəcərin 71 000-dən çox əhalisi məcburi köçkün kimi Azərbaycanın digər yaşayış məntəqələrində məskunlaşmışdı. Ötən il sentyabrın 27-də növbəti erməni təxribatının qarşısını alan müzəffər Azərbaycan ordusu ərazilərimizi bir-birinin ardınca düşmən tapdağından azad etdi. 10 noyabr 2020-ci ildə imzalanan sülh müqaviləsinə əsasən 25 noyabrda Ermənistan Silahlı Birləşmələri Kəlbəcər rayonunu Azərbaycan Silahlı Qüvvələrinə təhvil verdi. Düzdür, hazırda rus sülhməramlılarının “niyyətləri” Azərbaycanın ərazi bütövlüyünə maneçilik törədir, amma hər şeyin yaxşı olacağına ümidimiz böyükdür.
“Ədəbiyyat və incəsənət” (25.11.2022)
Mingəçevir teatrına yeni direkor təyin olunub
Mədəniyyət naziri Anar Kərimovun 18 noyabr 2022-ci il tarixli əmri ilə Əməkdar artist Həsənli İntiqam Soltan oğlu Mingəçevir Dövlət Dram Teatrının direktoru vəzifəsinə təyin olunub.
“Ədəbiytat və incəsənət” portalının Mədəniyyət Nazirliyindən aldığı məlumata görə, İntiqam Soltan 1986-1990-cı illərdə Azərbaycan Dövlət Mədəniyyət və İncəsənət Universitetində Teatr sənəti fakültəsində təhsil alıb, 1990-1995-ci illərdə Azərbaycan Dövlət Akademik Milli Dram Teatrında, 1995-2002-ci illərdə Gənclər Teatrında aktyor, 2002-ci ildən bu günə qədər Bakı Uşaq və Gənclər Teatrında direktor-bədii rəhbər vəzifəsində çalışıb. 100-dən çox tamaşanın rejissorudur. Bir çox beynəlxalq festivalda iştirak edib.
Onun 1990-cı ildə yaratdığı "Körpəm" Eksperimental Uşaq Teatrı ölkəmizdə ilk peşəkar uşaq teatrı və azyaşlılara teatr sənətini öyrədən ilk müəllif məktəbi olub. Bir çox teatrla bağlı layihələrin müəllifidir. Teatr sahəsindəki uğurlu fəaliyyətinə görə 2016-cı ildə Türkiyə Mədəniyyət və Turizm Nazirliyi tərəfindən "Kristal Çinar" mükafatına layiq görülüb. Üç kitabın müəllifidir.
2014-cü ildə Azərbaycan Respublikası Mədəniyyət Nazirliyinin "Fəxri mədəniyyət işçisi" adı ilə təltif olunub.
2018-ci ilin mayında isə teatr sahəsindəki səmərəli fəaliyyətinə görə Azərbaycan Respublikasının "Əməkdar artisti" fəxri adına layiq görülüb.
O, 2018-ci ildən Respublika İncəsənət Gimnaziyasında pedaqoji fəaliyyətilə məşğuldur.
“Ədəbiyyat və incəsənət” (25.11.2022)
Küveyt məktəbində “Şuşa İli” ilə əlaqədar tədbir təşkil olunub
Azərbaycanın Küveytdəki səfirliyinin dəstəyi ilə “Şuşa İli” ilə bağlı Küveytdə fəaliyyət göstərən “Vətənsevər” Azərbaycan-Küveyt Mədəniyyət və Dostluq Cəmiyyəti Küveytin “Əl-Əvail” məktəbində “Azərbaycan küveytli uşaqların gözü ilə” adlı Beynəlxalq Gün təşkil edib.
“Ədəbiyyat və incəsənət” portalı AzərTAC-a istinadən xəbər verir ki, Azərbaycanın Dövlət Himninin səsləndirilməsi ilə açıq elan edilən tədbir iştirakçılarına ölkəmiz haqqında geniş məlumat verilib. Onların diqqətinə çatdırılıb ki, 2022-ci il Azərbaycan Respublikasında “Şuşa İli” elan olunub. Məktəb rəhbərliyinə Şuşanın tarixi, coğrafiyası və mədəniyyəti, habelə Azərbaycan hökuməti tərəfindən işğaldan azad olunmuş ərazilərdə aparılan bərpa və quruculuq işləri və orada keçirilən mədəni tədbirlər haqqında məlumat verilib.
Sonra səfirliyin dəstəyi ilə ərəb dilində nəşr olunmuş “Şuşa: Azərbaycan mədəniyyətinin paytaxtı, Qarabağın incisi” adlı kitab və Şuşa şəhərində təşkil olunmuş “Xarıbülbül” Festivalına həsr olunmuş jurnallar və digər təbliğat materialları iştirakçılara təqdim olunub. Bununla yanaşı, ölkəmizin tarixi və müasir mədəniyyət abidələrini, görməli yerlərini, tarixi məkanlarını və milli mənəvi sərvətlərini əks etdirən broşürlər, habelə milli geyim və mətbəx nümunələrimiz nümayiş olunub.
İştirakçılar tərəfindən xüsusi maraqla qarşılanan tədbirdə şagirdlər Azərbaycan dilində uşaq mahnıları ifa ediblər.
“Ədəbiyyat və incəsənət” (25.11.2022)
Karvansaranı xilas etmək lazımdır
Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin rəisi Azad Cəfərli Abşeron ərazisində bir sıra abidələrə baxış keçirib.
“Ədəbiyyat və incəsənət” portalının Mədəniyyət Nazirliyindən aldığı məlumata görə, İlk olaraq Qaradağ rayonunun Ələt qəsəbəsində yerləşən sənaye borusuna baxılıb.
İqtisadiyyat Nazirliyi yanında Əmlak Məsələləri Dövlət Xidmətinin və Ələt azad iqtisadi zonası üzrə layihələndirmə işlərini aparan şirkətin əməkdaşları ilə birgə keçirilən baxış zamanı ətrafında tikinti işlərinin aparılması planlaşdırılan, abidə kimi reyestrə daxil olmayan sənaye borusunun mühafizəsi istiqamətində fikir mübadiləsi aparılıb.
Mühəndis tikililəri tipinə daxil olan belə borular, inşa texnikasına, dayanıqlı konstruksiyasına və maraqlı kompozisiyasrna görə diqqəti cəlb edir. Bu kimi tikililər ölkəmizin sənaye tarixinin mühüm elementlərindəndir.
Daha sonra Qaradağ rayonu Səngəçal qəsəbəsində yerləşən Karvansara və ovdanlara baxış keçirilib. Bunlar isə tarixi abidələr sayılır və onların uçulub dağılmasının qarşısının alınması çox önəmlidir.
Xidmət rəisi həmin abidələrin mühafizəsinin gücləndirilməsi istiqamətində tapşırıq və tövsiyələrini verib.
Bu cür baxışlar növbəti aylarda da davam edəcək.
“Ədəbiyyat və incəsənət” (25.11.2022)
Avstriyada gənc azərbaycanlı pianoçunun “Azərbaycandan dünyaya musiqi töhfəsi” adlı layihəsi təqdim olunub
Avstriyanın Lints şəhərində “Ticarətçilər Cəmiyyətinin Sarayı”nda (“Palais Kaufmännischer Verein”), ”Bechstein” piano mərkəzinin təşkilatçılığı və Azərbaycan Diasporla İş üzrə Dövlət Komitəsinin dəstəyi ilə Avstriyanın Anton Brukner adına Konservatoriyanın tələbəsi, respublika və beynəlxalq müsabiqələr laureatı, “Qran Pri” mükafatçısı, gənc azərbaycanlı pianoçu Ayan Məmmədlinin “Azərbaycandan dünyaya musiqi töhfəsi” (Vətənimin rəngləri) adlı layihəsinin təqdimatı keçirilib.
“Ədəbiyyat və incəsənət” portalı AzərTAC-a istinadən xəbər verir ki, tədbirin təşkilatçısı “Bechstein” piano markasının nümayəndəsi Qeorq Vizenqer tədbiri giriş sözü ilə açaraq, Ayan Məmmədli ilə bir neçə müddətdir əməkdaşlıq etdiklərini və onun istedadını yüksək dəyərləndirdiyini vurğulayıb. Qeyd edilib ki, Ayanın ifasında Azərbaycanın milli musiqilərinin əks olunduğu yeni maraqlı layihənin geniş tamaşaçı auditoriyasını yaxından tanış etmək üçün mərkəz tərəfindən musiqili gecə təşkil edilib. O, Ayan Məmmədlinin uğurlu ifalarının çox bəyənildiyini bildirərək, gələcəkdə yeni əməkdaşlıq əlaqələrinin daha da genişləndirilməsi istəyində olduqlarını bildirib.
Gecədə Avstriya parlamentinin deputatı Renate Haytz çıxış edərək tədbirdə iştirak edən Azərbaycan Respublikasının Avstriyadaki səfiri Rövşən Sadıqbəylini, onun şəxsində Azərbaycan diplomatik missiyasının digər nümayəndələrini və bütün tədbir iştirakçılarını ürəkdən salamlayıb. Avstriya ilə Azərbaycan arasında uzun illər mövcud olan əlaqələrdən söz açaraq bildirib ki, hər iki ölkə arasında bütün sahələrdə olduğu kimi, mədəni sahədə də əlaqələrin daim inkişaf etdirilməsi vacib və önəmlidir. Xanım Haytz Ayan Məmmədlinin bir gənc kimi bu istiqamətdəki fəaliyyətində ona uğurlar arzulayıb.
Gecədə çıxış edən Azərbaycan Respublikasının Avstriyadakı səfiri Rövşən Sadıqbəyli bu il Azərbaycanla Avstriya arasında mövcud olan diplomatik əlaqələrin 30 ilinin tamam olduğunu diqqətə çatdırıb. Səfir Azərbaycanla Avstriya arasında mövcud münasibətlərin dərin tarixi köklərə malik olduğunu qeyd etməklə bildirib ki, bu əlaqələr hələ orta əsrlərdə Ağqoyunlu hökmdarı Uzun Həsənin dövründən başlayıb. O, öz çıxışında, həmçinin Azərbaycanın Sumqayıt şəhəri ilə qardaşlaşmış Yuxarı Avstriya əyalətinin paytaxtı olan Lints şəhəri ilə bir çox sahələrlə yanaşı mədəniyyət sahəsində də təcrübə mübadiləsinin aparılması barədə razılığın əldə olunmasını qeyd edib və bu şəhərdə yerləşən Anton Brukner adına Konservatoriyanın tələbəsi gənc pianoçu Ayan Məmmədlinin bir mədəniyyət nümayəndəsi kimi gələcəkdə bu əlaqələrin inkişafı yolunda layiqli töhfələr verəcəyinə inandığını bildirib. Səfir qeyd edib ki, hazırkı tədbir Azərbaycanın dahi bəstəkarı Fikrət Əmirovun 100 illiyinin tamam olduğu günə təsadüf edir.
Tədbirdə çıxış edən musiqi gecəsinin səbəbkarı, gənc pianoçu Ayan Məmmədli bildirib ki, bu layihəni hazırlamaqda əsas məqsəd milli musiqi əsərlərinin bütün dünyaya tanıdılması və xarici ölkələrlə mədəni əlaqələrimizin gələcək yeni istiqamətlərdə inkişaf etdirilməsinə töhfə verməkdir. Ayan Məmmədlinin tədbirdə təqdim etdiyi “Bayatı-Şiraz” muğamı, Azərbaycanın xalq mahnıları olan “Laçın”, “Küçələrə su səpmişəm”, “Şuşanın dağları”, “Sarı gəlin” mahnıları, Fikrət Əmirovun və Avropa bəstəkarlarının əsərlərindən səsləndirdiyi bəzi nümunələr tədbir iştirakçıları tərəfindən böyük hərarət və alqışlarla qarşılanıb. Tədbirin sonunda gecənin təşkilatçısı “Bechstein” piano şirkətinin nümayəndəsi Qeorq Vizenqer gənc pianoçu Ayan Məmmədliyə həm yerli Avstriya tamaşaçılarına həm də azərbaycanlı qonaqlara belə maraqlı musiqi axşamı bəxş etdiyi üçün öz dərin təşəkkürünü bildirib və gələcəkdə bu əməkdaşlığın daha da inkişaf etdirilməsinin zəruriliyini qeyd edib.
“Ədəbiyyat və incəsənət”
(25.11.2022)
Ermənistanda Azərbaycan yazarlarının dərc edilməsi yaxşıdırmı, pisdirmi?
Tural Turan yazır
Ermənistanda çap olunan azərbaycanlı müəllifləri ürəkdən təbrik edirəm! Böyük uğurdur. Ardı gəlsin.
İllər əvvəl bu haqda yazmışdım. Demişdim ki, düşməni məğlub etmək istəyirsənsə və ya onunla dostlaşmağı düşünürsənsə, qarşı tərəfə mədəniyyətlə, şeirlə, nəsrlə yaxınlaşmalısan.
Təəssüf ki, onlar bu dəfə də bizi qabaqladılar. Özlərini sülhə əl uzadan ilk tərəf kimi göstərə bildilər. Biz yenə də ermənilərə uduzduq.
Mən illərdir Yazıçılar Birliyinə, onun rəhbərliyinə bu barədə açıq müraciətlər etmişəm. Qulaqardına vurdular.
Onlara bu sərf etmirdi. Çünki Kreml qafalı adamlara bu cür unikal ideyalar lazım deyil.
Onlara ucuz tədbir keçirib şəkil paylaşmaqla görüntü yaratmaq sərf edir.
Ermənistanda Azərbaycan yazıçılarını çap etdiyinə görə Zara Hatutyana və digərlərinə təşəkkür edirəm!
Heç olmasa, ardını biz gətirək və gələn dəfə özümüzünküləri təbrik etmək diləyi ilə...
Redaksiyadan:
Bu mövzu ciddi fikir ayrılıqları yaradıb. “Düşmən düşməndir, heç bir yaxınlıqdan söhbət gedə bilməz” deyənlər də əksəriyyətdir. Biz əks fikirdə olanların da mövqelərini dərc edəcəyik.
“Ədəbiyyat və incəsənət” (24.11.2022)
Türkoloq Xaqani Ədıboğlu vəfat edib
I Qarabağ müharibəsinin qazisi, “Azərbaycan Vətən Müharibəsi Veteranları” İB-nin Mətbuat xidmətinin rəhbəri, istedadlı qələm sahibi, türkoloq Xaqani Ədəboğlu (Rzaquliyev) haqqın dərgahına qovuşub.
Bu barədə “Ədəbiyyat və incəsənət” portalına şair Əkbər Qoşalı məlumat verib.
Əsasən türkçülük mövzularını tarixi aspektdə araşdıran Xaqani Ədəboğlu 4 sanballı kitabın müəllifiydi.
Onu Azərbaycan uğrunda qılınc və qələmini eyni kəskinliklə işlədən fədakar cəngavər obrazı ilə təsvir edənlər haqlıdır.
Xaqani Ədəboğlu usta qələm adamı olaraq 30 ilə yaxındır Azərbaycanın, türk ölkə və topluluqlarının başına gətirilən müsibətlər haqqında, erməni cinayətləri barədə, sözün həqiqi mənasında tarix yazırdı.
Ocağı sönməsin, ruhu şad olsun!
“Ədəbiyyat və incəsənət” (24.11.2022)
Mədəniyyət Nazirliyi əməkdaşları ANAMA-nın təlimində iştirak ediblər
Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin əməkdaşları Azərbaycan Respublikasının Ərazilərin Minalardan Təmizlənməsi üzrə Milli Agentliyinin (ANAMA) Göygöl Regional Təlim Bazasında mina və partlamamış hərbi sursatların təhlükəsindən qorunma ilə bağlı təlim kursunda iştirak ediblər.
Bu barədə “Ədəbiyyat və incəsənət” portalı Mədəniyyət Nazirliyinə istinadən məlumat verir.
Təlim kursuna Dövlət Xidmətinin Salyan və Şabran regional idarələrinin əməkdaşları da qatılıb.
Təlimin təşkil olunması işğaldan azad olunmuş ərazilərdə yerləşən tarixi abidələrin monitorinqi, inventarlaşdırılması və mühafizə tədbirləri zamanı mina və partlamamış hərbi sursatlardan qorunma ilə bağlı maarifləndirmə və təlimatlandırma məqsədi daşıyır.
Tədbirdə ANAMA-nın məsul əməkdaşları tərəfindən iştirakçılara mina və partlayıcı sursatlar, partlamamış sursatlar, minalanmış ərazi və təhlükəsizlik nişanları barəsində geniş məlumat verilib, hər bir mövzuya uyğun olaraq təqdimatlar nümayiş olunub.
Təlimdə minanın piyada əleyhinə və tank əleyhinə kimi növləri, formaları, partlayıcı sursatların ümumi əlamətləri, təhlükəsizlik nişanlarının mənası və əhəmiyyəti, minalanmış ərazinin relyefinin xüsusiyyətləri haqqında ətraflı məlumat verilib.
Tədbirin sonunda təlim iştirakçılarına ANAMA tərəfindən hazırlanan işğaldan azad edilmiş ərazilərdə mina və partlayıcı sursatların təhlükəsinə dair fərdi təlimat kitabçası təqdim olunub.
“Ədəbiyyat və incəsənət” (24.11.2022)
“Regionlarda xalça sənətinin inkişafına dəstək" layihəsi uğurla yekunlaşıb
“Azərbaycan xalçaçıları” İctimai Birliyi Azərbaycan Respublikasının Qeyri-Hökümət Təşkilatlarına Dövlət Dəstəyi Agentliyinin dəstəyi ilə həyata keçdiyi "Regionlarda xalça sənətinin inkişafına dəstək" layihəsinə yekun vurmuşdur.
“Ədəbiyyat və incəsənət” portalı xəbər verir ki, layihə çərçivəsində Mingəçevir şəhərində, Ağdam, Bərdə, Qazax, Ağstafa və Şəmkir rayonlarında gənclərin, peşə təhsili mərkəzlərinin müəllim və tələbə heyətinin, mədəniyyət işçilərinin iştirakı ilə bir sıra görüşlər keçirilib.
Canlı ünsiyyət formatında baş tutan məlumatlandırıcı sessiyaların məqsədi gənclərin xalça sənətinə və ümumilikdə mədəni irsimizə marağını artırmaq, bu sahəni inkişaf etdirmək üçün problemləri öyrənmək və müvafiq tövsiyələri verməklə gənc nəslə dəstək olmaqdır.
Tədbirlər tanınmış rəssamların, xalçaçıların ustad dərsləri ilə müşayiət olunub.
Üzümüzə gələn gün isə “NUR Art House” qalereyasında “Azərbaycan xalçaçıları” İctimai Birliyi “Regionlarda xalça sənətinin inkişafına dəstək" layihəsinin yekunları ilə bağlı mətbuat konfransı keçirəcəkdir.
