Super User
3-cü minilliyin trendləri: multimedia şousu
Bu bəhs edəcəyimiz mövzu özündə həm kinonu, həm də musiqini ehtiva edir, ona görə də onu “Ədəbiyyat və incəsənət” portalının hansı bölümündə yerləşdirmək barədə xeyli baş sındırmalı olduq.
Sizə 3-cü minilliyin mədəniyyət trendləri barədə bilgi verməkdə davam edirik, bu dəfə miltimedia şousundan danışacağıq. Özü də dünən müşahidə etdiyimiz bir nümunə üzərində.
Ətrafına peşəkar sənət adamlarını toplayan “Art-East Media Group” şirkəti paytaxt sakinləri və şəhərimizin qonaqlarına iki yaradıcılıq layihəsi təqdim etdi. Və təqdim edilən yeni yaradıcılıq layihəsi “Azərbaycanfilm” kinostudiyası və Azərbaycan Dövlət Film Fondu kimi mötəbər sənət ocaqları ilə əməkdaşlıq çərçivəsində ərsəyə gəlmişdi. Belə ki, “Art-East Media Group” şirkətinin brendi olan “Avanqard” Kamera Orkestrinin təqdimatında “Azərbaycanfilm” kinostudiyasının 100, Azərbaycan kinosunun 125 illiyinə həsr olunmuş yüksək bədii zövqlə yeni aranjeman edilmiş milli kinomuzun parlaq nümunələrindən olan musiqi əsərlərini özündə ehtiva edən multimedia şousu nümayiş edilirdi.
Ekranda filmdən parça nümayiş olunur, səhnədə instrumental musiqi, yaxud rəqqaslar həmin parçanın inikasını nüçayiş etdirirlər. Baxımlıdır və zövqoxşayandır.
“Kinokonsert” adlanan multimedia şousu qarşısına ölkəmizin ictimai və mədəni həyatında fəal iştirak etmək, dünyada və ölkədə cərəyan edən sənət prosesinə uyğun ideyalar reallaşdırmaq və yüksək sənəti dərk etməyə qadir mütərəqqi tamaşaçı zövqünü formalaşdırmaq kimi məqsədlər qoymuşdu və bu məqsədlərimə də nail oldu.
Bunu səhnə əsərini izləyənlər arasında yer alan həm görkəmli sənət adamları, sənət tənqidçiləri, ictimai xadimlərin, həm də sıravi tamaşaçı rəyləri sübut edir.
Tanınmış aktyor Ruslan Sabirlinin aparıcılığı ilə baş tutan multimedia şousunda “Avanqard” Kamera Orkestri “Arşın mal alan”, “Baladadaşın ilk məhəbbəti”, “Güllələnmə təxirə salınır”, “Bəxtiyar”, “Alma almaya bənzər”, “Böyük dayaq”, “Əhməd haradadır?”, “Ölsəm bağışla”, “Uşaqlığın son gecəsi”, “O olmasın, bu olsun”, “Gün keçdi” və s. filmlərin saundtreklərini təqdim etdi, bir çox səhnələr peşəkar rəqqas qismində çıxış edən Bakı Xoreoqrafiya Akademiyasının şagird-tələbə heyətinin canlandırdığı xoreoqrafik nömrələrlə müşayiət olundu.
Rislan Sabirli “Ədəbiyyat və incəsənət”ə günün tələbləri olan yeni mədəniyyət trendlərinə, o cümlədən də indi nümayiş etdirilən multimedia şousuna bundan sonra da müraciət edəcəklərini vurğuladı.
“Ədəbiyyat və incəsənət”
(02.03.2023)
Mədəniyyət abidələrinin bərpasına investisiyanı necə tapmalı?
Hər bir xalqın ululuğu, qədimliyi, eləcə də mədəni səviyyəsi onun həm yazılı ədəbiyyatı, digər mədəni artefaktları ilə, həm də qədim abidələri ilə ehtiva olunur.
Vətənimizin öyünə biləcəyi nəsnələri çoxdur, qədim mədəniyyətimizin möhürü pozulmazdır.
Bu gün 6308 tarixi mədəni abidəmiz vardır, bunların 4000-ə yaxını Mədəniyyət Nazirliyinin nəzarətindədir. Təbii ki, həmin abidələrə mütəmadi şəkildə investisiya ayrılır. Abidələr təmir və restovrasiya olunur, böyük sayda heyət onlara xidmət edir. Amma gözdən-könüldən uzaq qalan, uçulub dağılmaqda olan abidələr də az deyil.
Bu gün işğaldan azad olunmuş ərazilərdə 700-800 tarixi mədəniyyət abidəsi qeydiyyata alınıb və proses davam etdirilir. Onların bərpasına çox ciddi ehtiyac var.
Mətbuatda da haqlı olaraq qeyd olunur ki, tarixi mədəni abidələrimiz təhlükədədir.
Tarixi abidələrə qayğı, onların bərpası çox böyük və daim yenilənən maliyyə xərcləri tələb edir. Bu maliyyə mənbələrini tapmaq da bir ayrı problemdir. Bəs nə etməli?
Mədəniyyət naziri vəzifəsini icra edən mədəniyyət nazirinin birinci müavini Adil Kərimli problemin həllini bu cür görür: Ucqar kəndlərdə kitabxanaların və orada 20 min kitab fondunun olduğu deyilir, amma baxırsan ki, heç 2 min kitab yoxdur. Kənddə yaşayan əhalinin həmin kitabları oxuyub-oxumaması sualına cavab tapmaq lazımdır. Bu qədər aktual olmayan kitabxana lazımdırmı? Rayonlarda, ucqar kəndlərdə 7 minə yaxın mədəniyyət müəssisəsi var. Mədəniyyət müəssisələrində çalışan və büdcədən əmək haqqı alan 30 min işçinin hamısı yerlərdədir. Bəlkə bu yükü azaldıb mədəniyyətin zəruri olan sferasına yönəldə bilərik? Ən əsası da tarixi abidələrin bərpasına.
Ekspert Mayil Səlimbəyli isə ayrı-ayrı bölgələrdə olan tarixi abidələrin bərpa və təmirinə elə həmin bölgələrdən olan iş adamlarının maliyyə resurslarının cəlb ediıməsini zəruri hesab edir. İş adamlarımızın milli-mədəni dəyərlərimizə könüllü ianə yatırmaları əlbəttə ki mümkün olan işdir.
Bəli, göründüyü kimi, problemi həll etmək mümkündür. Xüsusən işğaldan azad edilmiş Qarabağ bölgəmizin yerlə-yeksan edilmiş mədəniyyət abidələrinin bərpası bizimçün başlıca məqsəd kimi görünür.
“Ədəbiyyat və incəsənət”
(02.03.2023)
Mədəniyyət Nazirliyinin daha bir vəzifəli şəxsi işdən çıxarıldı, yerinə başqası təyin olundu
Prezident İlham Əliyev Səbinə Xalid qızı Hacıyevanın Azərbaycan Respublikasının Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin rəisi təyin edilməsi haqqında sərəncam imzalayıb.
Bununla bağlı “Ədəbiyyat və incəsənət” portalı Mədəniyyət Nazirliyinə istinad edərək məlumat verir.
Prezident İlham Əliyev Azad Məhyəddin oğlu Cəfərlinin Azərbaycan Respublikasının Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin rəisi vəzifəsindən azad edilməsi haqqında Sərəncam imzalayıb.
Qeyd edək ki, 45 yaşlı A.Cəfərli 2021-ci ilin fevralında sözügedən Xidmətin rəisi təyin edilmişdi.
Xatırladaq ki, ötən gün Prezidentin sərəncamları ilə nazirin birinci müavini Vaqif Əliyev və nazir müavini Sevda Məmmədəliyeva işdən çıxarılıblar, Səadət Yusifova Azərbaycan mədəniyyət nazirinin müavini təyin edilib.
“Ədəbiyyat və incəsənət”
(02.03.2023)
Mədəniyyət nazirinin yeni müavini kimdir?
Xəbər verdiyimiz kimi, Yusifova Səadət Vidadi qızının Azərbaycan Respublikası mədəniyyət nazirinin müavini təyin edilməsi haqqında Azərbaycan Respublikasının Prezidenti bu gün Sərəncam imzalayıb. Sərəncamda deyilir:
Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq qərara alıram:
1. Səadət Vidadi qızı Yusifova Azərbaycan Respublikası mədəniyyət nazirinin müavini təyin edilsin.
2. Bu Sərəncam imzalandığı gündən qüvvəyə minir.
“Ədəbiyyat və incəsənət” portalı araşdırma apararaq mədəniyyət nazirinin yeni müavininin dosyesini hazırlayaraq oxucularına təqdim edir.
Ondan başlayaq ki, mədəniyyət nazirinin müavini vəzifəsinədək Səadət Yusifova Prezident Administrasiyasının Qeyri-hökumət təşkilatları ilə iş və kommunikasiya şöbəsinin müdir müavini vəzifəsində çalışıb. Bu təyinata qədərsə o, Azərbaycan Respublikası Prezidenti Administrasiyasının Siyasi təhlil və informasiya təminatı şöbəsinin müdiri olub.
O, 1974-cü ildə anadan olub. 1998-ci ildə “Hər gün” qəzetində jurnalist kimi fəaliyyət göstərib. Hüquq üzrə fəlsəfə doktorudur.
Səadət Yusifova Azərbaycan Respublikası Prezidentinin Administrasiyasının Hüquq mühafizə orqanları ilə iş şöbəsinin baş məsləhətçisi vəzifəsində də çalışıb.
Bakı Dövlət Universitetinin Beynəlxalq hüquq kafedrasının müəllimi, Azərbaycan Hüquqşünaslari Konfederasiyasinin İdarə Heyətinin üzvüdür.
S.Yusifova 2013-cü ildə dövlət qulluğunda səmərəli fəaliyyət göstərdiyinə görə medalla da təltif olunub. O, Prezidentin 27 iyun 2013-cü il tarixli fərmanı ilə “Dövlət qulluğunda fərqlənməyə görə” medalı ilə təltif edilib.
“Ədəbiyyat və incəsənət”
(01.03.2023)
S.V.Yusifovanın Azərbaycan Respublikası mədəniyyət nazirinin müavini təyin edilməsi haqqında Azərbaycan Respublikasının Prezidentinin Sərəncamı
Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq qərara alıram:
1. Səadət Vidadi qızı Yusifova Azərbaycan Respublikası mədəniyyət nazirinin müavini təyin edilsin.
2. Bu Sərəncam imzalandığı gündən qüvvəyə minir.
İlham Əliyev
Azərbaycan Respublikasının Prezidenti
Bakı şəhəri, 1 mart 2023-cü il
S.Y.Məmmədəliyevanın Azərbaycan Respublikası mədəniyyət nazirinin müavini vəzifəsindən azad edilməsi haqqında Azərbaycan Respublikası Prezidentinin Sərəncamı
Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq qərara alıram:
1. Sevda Yusuf qızı Məmmədəliyeva Azərbaycan Respublikası mədəniyyət nazirinin müavini vəzifəsindən azad edilsin.
2. Bu Sərəncam imzalandığı gündən qüvvəyə minir.
İlham Əliyev
Azərbaycan Respublikasının Prezidenti
Bakı şəhəri, 1 mart 2023-cü il
V.Q.Əliyevin Azərbaycan Respublikası mədəniyyət nazirinin birinci müavini vəzifəsindən azad edilməsi haqqında Azərbaycan Respublikası Prezidentinin Sərəncamı
Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq qərara alıram:
1. Vaqif Qadir oğlu Əliyev Azərbaycan Respublikası mədəniyyət nazirinin birinci müavini vəzifəsindən azad edilsin.
2. Bu Sərəncam imzalandığı gündən qüvvəyə minir.
İlham Əliyev
Azərbaycan Respublikasının Prezidenti
Bakı şəhəri, 1 mart 2023-cü il
Gənc Tamaşaçılar teatrında dəyirmi masa keçirilib
Azərbaycan Gənc Tamaşaçılar Teatrında Ümummilli Lider Heydər Əliyevin 100 illiyi münasibətilə təşkil olunan “Heydər Əliyev və mədəniyyət mövzusunda dəyirmi masa” adlı tədbir keçirilib.
Teatrın mətbuat xidmətindən verilən məlumata görə, tədbirdə Azərbaycan Dövlət Gənc Tamaşaçılar teatrın direktoru Naidə İsmayılzadə, teatrın baş rejissoru, Əməkdar incəsənət xadimi Mehriban Ələkbərzadə, Səbail rayon YAP təşkilatının sədri Muxtar Nağıyev, teatrşünas Məryəm Əlizadə, sənətşünas Vidadi Qafarov, A. Şaiq adına mənzil-muzeyinin direktoru Ülkər Talıbzadə, yazıçı-dramaturq İlqar Fəhmi, Xalq artisti Yasin Qarayev, Əməkdar artist Nicat Kazımov, habelə yaradıcı və inzibati heyət iştirak edib.
Tədbiri giriş sözü ilə teatrın direktoru Naidə İsmayılzadə açaraq qonaqları salamlayıb. Heydər Əliyevin parlaq şəxsiyyətindən, sənətə, teatra, ümumilikdə yaradıcı insanlara olan diqqət və qayğısından bəhs edib.
Daha sonra teatrın baş rejissoru Mehriban Ələkbərzadə Heydər Əliyevin 100 illiyinin ölkə səviyyəsində qeyd olunmasının vacibliyindən, dəyirmi masanın əhəmiyyətindən bəhs edib.
Tədbirdə çıxış edən qonaqlar Ulu Öndərlə bağlı maraqlı xatirələrini, bu xatirələrin yaratdığı xoş təəssüratları bölüşüblər.
Sonda tədbir iştirakçıları xatirə şəkil çəkdiriblər.
“Ədəbiyyat və incəsənət”
(01.03.2023)
Mədəniyyət Nazirliyinə yeni Aparat rəhbəri, nazirə isə iki müşavir təyin edilib
Mədəniyyət Nazirliyinə yeni təyinatlar olub.
“Ədəbiyyat və incəsənət” portalı “Report"a istinadən xəbər verir ki, bu barədə mədəniyyət nazirinin birinci müavini, nazir səlahiyyətlərini icra edən Adil Kərimli müvafiq əmrlər imzalayıb.
Belə ki, nazirliyin Aparat rəhbəri vəzifəsinə Xanlar Ağalarov təyin edilib.
Digər əmrlə Cahangir Səlimxanov və Əmirbəyli Oleq Arnoldoviç müşavir vəzifələrinə gətirilib.
Qeyd edək ki, X.Ağalarov bu təyinata qədər Prezident Administrasiyasının Strateji araşdırma və planlaşdırma, Qeyri-hökumət təşkilatları ilə iş və kommunikasiya şöbələrində müxtəlif vəzifələrdə çalışıb.
Müşavir C.Səlimxanov bu vaxtadək Bəstəkarlar İttifaqında, Azərbaycan Dövlət Konservatoriyasında, Azərbaycan Musiqi Xadimləri İttifaqında, Bakı İncəsənət Mərkəzində müxtəlif vəzifələrdə işləyib.
Digər müşavir Oleq Əmirbəyov 2010-cu ildən Səməd Vurğun adına Azərbaycan Dövlət Rus Dram Teatrında fəaliyyət göstərir.
“Ədəbiyyat və incəsənət”
(01.03.2023)
Adil Kərimlinin növbəti qəbulu Biləsuvarda olacaq
Mərkəzi icra hakimiyyəti orqanları və digər idarəetmə qurumlarının rəhbərlərinin şəhər və rayonlarda vətəndaşların qəbulu cədvəlinə əsasən Azərbaycan Respublikasının mədəniyyət nazirinin birinci müavini, nazir vəzifəsini icra edən Adil Kərimli tərəfindən 2023-cü il 31 mart tarixində Biləsuvarda növbəti qəbul baş tutacaq.
Saat 10:00-dan başlayaraq Biləsuvar şəhəri Heydər Əliyev Mərkəzində (Biləsuvar şəhəri, Mübariz İbrahimov küçəsi 213) əsasən Biləsuvar şəhəri, Salyan, Neftçala və Cəbrayıl rayonlarından olan vətəndaşların qəbulu keçiriləcək.
“Ədəbiyyat və incəsənət” portalı Mədəniyyət Nazirliyinə istinadən xəbər verir ki, vətəndaşlar 27 mart 2023-cü il tarixinə qədər nazirliyin Bu email ünvanı spambotlardan qorunur. Onu görmək üçün JavaScripti qoşmaq lazımdır. elektron poçt ünvanı, (012) 493-30-02 telefon nömrəsi vasitəsi ilə və “Whatsapp” xidmətinə (0 777 147 147) müraciət etməklə qəbula yazıla bilərlər.
“Ədəbiyyat və incəsənət”
(01.03.2023)
