Super User
Məhəmmədəminlərin sayı artmaqdadır
Ötən 2022-ci ildə Azərbaycanda yeni doğulan 4 körpəyə Məhəmmədəmin adı qoyulub. Bu barədə Ədliyyə Nazirliyinin məlumatında bildirilir.
Məlimatda o da bildirilir ki, ümumilikdə son 4 ildə Məhəmmədəmin adı verilən körpələrin sayı 20 nəfər olub.
Əlbəttə, bir xalqa istiqlaliyyət verən şəxsin adı xalq arasında daha populyar olmalıdır, rəqəmlər yüz dəfə artmalıdır.
Amma buna da şükür.
“Ədəbiyyat və incəsənət”
(05.01.2023)
Azərbaycandan, sizcə, neftdən sonra ən çox nə ixrac edilib?
Sualın cavabı İqtisadi İslahatların Təhlili və Kommunikasiya Mərkəzinin “İxrac icmalı”nın noyabr sayında verilib. Azərbaycanda cari ilin yanvar-noyabr aylarında ixrac edilən qeyri-neft məhsulları siyahısında liderlik karbamidə, pambıöa və qızıla aiddir. İndi isə təfərrüatı.
On bir ayda ixrac edilən qeyri-neft sektoruna aid malların siyahısında karbamid (198,6 milyon ABŞ dolları) birinci olub. Bu siyahıda pambıq mahlıcı (161,1 milyon dollar) ikinci, qızıl (156,1 milyon dollar) isə üçüncü yerdədir.
Bu ilin noyabr ayında ixrac edilən qeyri-neft sektoruna aid malların siyahısında emal olunmamış aşqarlanmamış alüminium (19,8 milyon dollar) birinci, karbamid (16,9 milyon dollar) ikinci və pomidor (tomat) (13,7 milyon dollar) üçüncü olub.
“Ədəbiyyat və incəsənət”
(05.01.2023)
AŞPA-nın qış sessiyasının gündəliyi açıqlanıb
Avropa Şurası Parlament Assambleyasının (AŞPA) 2023-cü il qış sessiyası yanvarın 23-dən 27-dək Strasburqda keçiriləcək. Azərbaycan nümayəndə heyətinin üzvləri qış sessiyasında iştirak edəcək və müzakirə olunan məsələlərə dair fikirlərini bildirəcəklər.
“Ədəbiyyat və incəsənət” portalı AzərTAC-a istinadən xəbər verir ki, Rusiya-Ukrayna münaqişəsinə dair hüquqi məsələlər, eləcə də insan hüquqlarının pozulması ilə bağlı təcili debatlar, həmçinin İslandiyanın Baş naziri və Almaniya xarici işlər nazirinin çıxışları qış plenar iclasının əsas məqamlarındandır. Sessiyada Avropa Şurası Baş katibi də çıxış edəcək.
Qış sessiyası çərçivəsində Parlament Assambleyası, həmçinin yenilənmiş, təkmilləşdirilmiş və gücləndirilmiş Avropa Şurası üçün dördüncü Sammitə dair hesabatı müzakirə edəcək. Avropa Şurasının dövlət və hökumət başçılarını bir araya gətirəcək Sammit may ayında Reykyavikdə keçiriləcək.
Qadınlara qarşı zorakılığın aradan qaldırılmasına dair İstanbul Konvensiyası, qadınlar və qızlara qarşı zorakılığın aradan qaldırılmasında kişilərin və oğlanların rolu və məsuliyyəti, ər-arvad əsarətinin həlli yollarının tapılması ilə bağlı birgə müzakirələr diqqət mərkəzində olacaq.
“Ədəbiyyat və incəsənət”
(05.01.2023)
Mahsun Kırmızıgül Bakıya gəlir
Türkiyənin ən reytinqli müğənniləri sırasında yer alan Mahsun Kırmızıgül Bakıya gəlir. Fevralın 12-də Bakı Konqres Mərkəzində Türkiyənin sevilən müğənnisinin konserti təşkil olunacaq.
Və o da var ki, məşhur pop müğənni 17 illik fasilədən sonra yenidən Bakıda öz sevilən ifaları ilə pərəstişkarları qarşısında çıxış edəcək.
Biletləri iTicket.az saytı və şəhərin kassalarından əldə etmək olar.
“Ədəbiyyat və incəsənət”
(05.01.2023)
Günün fotosu: Braziliya Pele ilə vidalaşdı
Günün fotosu: Braziliya Pele ilə vidalaşdı
On minlərlə braziliyalı Santos şəhərinin küçələrinə doluşaraq əfsanəvi futbolçu Pele ilə vidalaşdı. Pelenin tabutunu qəbristanlığa kimi göz yaşları içində müşayiət etdilər.
Foto: AP
“Ədəbiyyat və incəsənət”
(05.01.2023)
Gənc şairimizin şeirləri Rumıniya qəzetində dərc edilib
Güneyli soydaşımız, istedadlı şair Ümid Nəccarinin şeirləri Rumıniyanın Vocea Dunării (Dunarinin səsi) dərgisində, rumın dilində dərc edilib.
“Ədəbiyyat və incəsənət” portalı xəbər verir ki, bu barədə Ümid Nəccari özü sosial mediada məlumat paylaşıb.
Şeirləri azərbaycancadan rumın dilinə Mihai Firică tərcümə edib.
“Ədəbiyyat və incəsənət”
(05.01.2023)
Tətil günlərinə “Cadenza” orkestri rəng qatdı
Yeni il tətili günlərinə “Cadenza” orkestri Beynəlxalq Muğam Mərkəzində “Kiçik dəniz küçəsi” adlı konsert proqramı ilə rəng qatıb.
Konsertdə Tahir İbişovun “Halqa” (solist Zakir Əsədov), “Şəkil dəftərindən təsvirlər” (solist İslama Abdullayeva), Səid Qəninin “Adajio” (solist Fəqan Həsənli), “Proyeksiyalar”, Ayaz Qəmbərlinin “İlğım”, “Kiçik dəniz küçəsi” və Türkər Qasımzadənin “Zikr” (solist Humay Qasımzadə), “G.Richterin üç foto-rəsmi üçün musiqi” (violin Qleb Xoxlov) adlı əsərləri səsləndirilib.
Solo piano üçün yazılmış əsərlər Humay Qasımzadə, Fəqan Həsənli, Zakir Əsədovun ifasında dinləyicilərə təqdim olunub. Konsertdə ilk dəfə səslənən “Şəkil dəftərindən təsvirlər” əsəri bəstəkar Tahir İbişov tərəfindən şair Səlim Babullaoğlunun türkiyəli fotoqraf İlyas Göçmənin fotosuna yazdığı “Təsvirə ithaf” şeri əsasında bəstələnib. İlk dəfə səslənməsinə baxmayaraq, əsər solist İslama Abdullayevanın ifasında xüsusi maraqla qarşılanıb. Proqramda yer alan “Halqa”, “Adajio” (ilk ifa) əsərlərinin həsr olunduğu pianoçular - Zakir Əsədov, Fəqan Həsənlinin ifasında səslənməsi və pianoçu Humay Qasımzadənin elektron vasitə ilə birlikdə yüksək peşəkarlıqla ifa etdiyi “Zikr” əsəri həm də müasir musiqi ifaçılığının müxtəlif istiqamətlərini ehtiva edib.
“Ədəbiyyat və incəsənət”
(05.01.2023)
Xalq artisti Eyyub Yaqubovun fərqli formatda konserti olacaq
Bu musiqi janrı sevilir, özü də çox sevilir. Söhbət şanson mahnılarından gedir. Və nə gözəl ki, bu janrın Azərbaycanda da məxsusi ifaçıları var. Onlardan biri “Əlvuda”, “Mənə dəniz verin”, “Kim bilir”, “Yenə o bağ olaydı”, “Həsrətinin yollarındayam” deyən populyar müğənni, xalq artisti Eyyub Yaqubovdur.
Müğənninin pərəstişkarları üçün şad xəbərimiz var. Fevralın 15-də Heydər Əliyev Sarayında o, “Big band sound pro" qrupu ilə birgə konsert verəcək.
Yox, ağlınıza başqa şey gətirməyin, “Big band sound pro” qrupu əcnəbi qrup deyil, bizimkidir, qrupun bədii rəhbəri orijinal ifaları ilə seçilən Fuad Musayevdir.
Həmin gün qrupun müşayiətində Eyyub Yaqubov tək oxumayacaq, o, xalq artisti Cavan Zeynallı və Fuad Musayev bənzərsiz ifaları ilə tam fərqli şou formatında tamaşaçıların qarşısına çıxacaqlar.
Biletləri iTicket.az saytı və şəhərin kassalarından əldə etmək mümkündür.
Yeri gəlmişkən, böyük tamaşaçı marağı olacağını nəzərə alıb təşkilatçılar fevralın 16-na da konsert salıblar.
Xoş anlar yaşanacaq konsertlərə bilet almağa tələsin!
“Ədəbiyyat və incəsənət”
(05.01.2023)
“Ayaqqabısını cənnətdə qoyan peyğəmbər” -Yunus Oğuzun felyetonu
Şəhər telefonuna zəng gəldi. Dinşünas, teoloq-alim dostumun səsini xəttin o biri başından eşitdim. "Bəli" deməyimlə dostum danışmağa imkan vermədi.
-Neyləyirsən, Mirzə? - deyə soruşdu.
-Heç, - dini söhbətlərdən qaçmaq üçün candərdi dilləndim, - yazı-pozu ilə məşğulam.
Ancaq hiss etdim ki, qanı qaradır.
-Mirzə, gəl çay içək. Bu dəfə ağ gilas mürəbbəsi ilə çayın yeddi manat pulunu mən verəcəm.
(Bu parklarda çay satanlar lap ağ ediblər e..! Çay 7 manat. Hələ bu ən aşağısıdır. Parka gələnlər termosda özlərilə çay götürürlər ki, mağazada satılan bir qucaq quru çaya burada bir çaynikin pulunu verməsinlər. O da əgər varsa)
Hiss etdim ki, dilxordur. Çar-naçar razılaşdım.
Həmişəkindən fərqli olaraq çayxanaya məndən tez gəlmişdi. Çay və mürəbbə də masanın üstündə bizi gözləyirdi.
Xoş-beşdən sonra soruşdum ki, imam əfəndi (otuz ildi onu belə adlandırıram), nə məsələdir? Qanın niyə qaradır?
Dostum elə bu suala bəndimiş. Ürəyi açıldı:
-Mirzə, təsəvvür edirsən, bu gün çadır yasına getmişdim. İçəri girən kimi məni yuxarı başda, molladan bir az kənarda əyləşdirdilər. Vəzifəli bir adamın qohumunun yası olduğundan çadır adamla dolu idi. Tanıyan da, tanımayan da, acıyan da, acımayan da yasda idi. Molla da "savadlı" adama oxşayırdı. Yas əhlinin başını qarışdırmaq üçün əleyhissalam İdrislə Cəbrayılın hekayətini danışırdı. Söhbətin o yerinə çatdım ki, İdris peyğəmbər Cəbrayıla yalvarır ki, bəs mənə cənnəti göstər. Cəbrayıl əleyhissalam da dirənib ki, yox, olmaz, bəs ora girən çıxmaq istəməyəcək. Peyğəmbər deyir ki, yox söz verirəm çıxacam cənnətdən.
"İmam əfəndi" soyuq çayından bir qurtum içib söhbətinə davam etdi. (Deyəsən ağ gilas mürəbbəsini yemək yadından çıxmışdı.)
- Nə isə... Allah Təalanın izni ilə Cəbrayıl (ə) İdrisə (ə) cənnəti göstərir. Peyğəmbər cənnətə necə hayıl-mayıl olursa burada qalmaq istəyir, ancaq Cəbrayıla (ə) söz verib axı cənnətdən çıxmaq barədə. Düşünüb-daşınır, cənnətin səkkiz qapısının birindən çıxmaq istəyəndə ayaqqabısını soyunub cənnətdə saxlayır ki, qayıdıb götürəndə bir də oradan çıxmasın...
Ağ gilasdan ləzzətlə yeyib, üstündən bir qurtum soyuq çay da içdim. Çayçıya əlimlə işarə etdim ki, çayı təzələsin, amma o danışdıqca üzümdən təbəssüm çəkilmirdi.
-Sonra nə oldu?
-Nə olacaq, Mirzə? Elə bil məni cin atına mindirdilər. Bu camaat da başını aşağı salıb mollaya elə diqqət və maraqla qulaq asırdı ki, elə bil Qurandan "İxlas" surəsini dinləyir. Bəziləri, arada başlarını yelləyib razılıqlarını bildirdikcə, molla da qızışıb söhbətinə davam edirdi. Indi bildim ki, cəhalət, xurafat hardan gəlir...
-Hardan?
-Qanmazlığımızdan Mirzə, qanmazlığımızdan, oxumamaqdan, düşünməməkdən. Yas yerində molla elə bilir k, çadırın yiyəsi odur: istədiyini danışa bilər, ancaq mən onun sözünü kəsdim. Özümün axmaq yerinə qoyulmasını istəmədim. "Molla! - dedim, - İki məsələdə böyük qələt elədin. - Hamı bizə maraqla baxdı. Mollasa belə şey gözləmədiyindən bərəlmiş və donuxmuş gözlərini mənə zillədi. - Cənnət sənin qonşunun qapısı deyil ki, kandarında ayaqqabını çıxarıb evə girəsən. Cənnət mal, mülk aləmi deyil, ora ilahi aləmdir, ora saf, təmiz, əməli saleh olan insanların, ruhların aləmidir. Bu sənin birinci qələtin. İkinci qələtinsə odur ki, İdris peyğəmbəri yalançı etdin. Elə bil qonşudan toya getməyə borc çəkmə alıb, indi qaytarmaq istəmir. Cəbrayıl (ə) da uşaq-muşaqdır, elə bil Allahın qüdrətli mələklərindən, batin elmindən xəbər verən deyil. Molla vəziyyətdən çıxmaq üçün dedi ki, bəs mən neyləyim? Hədisləri mənə belə yazıb veriblər. Amma, harda yazıb veriblər demədi. Onsuz da bilirəm".
Bu ara məni gülmək tutdu. Gülüşümün səbəbini soruşdu.
-Heç- dedim, - Molla Nəsrəddinin ayaqqabı əhvalatı yadıma düşdü. -Danışmaq növbəsi məndə idi. - Molla bir yasa gedir. Ayaqqabısını kandarda çıxarıb içəri girir. Çölə çıxanda görür ki, ayaqqabısını oğurlayıblar. Bu bir neçə dəfə təkrar olunur. Molla Nəsrəddin ayaqqabı almaqdan bezir. Növbəti yasa gedəndə ayaqqabısını çıxarıb qoltuğuna vurur. İçəridə hamı ondan soruşur ki, Molla, nə məsələdir, ayaqqabını qoltuğuna niyə vurmusan? Molla da cavab verir ki, bilmək olmaz, bəlkə yolum burdan o yana düşdü.
Əlavə etdim: - Sən ayaqqabının kəramətinə bax e...e... onun hesabına cənnətdə qalmaq olurmuş. Ona görə də Molla Nəsrəddin ayaqqabısını özü ilə götürübmüş.
Bu dəfə dostum qəhqəhə çəkib güldü... Dostumdan ayrılandan sonra barmağımı dişləyib düşündüm. Elə bil nəyisə kəşf etmişdim: "Ay xətakar, xristianlar, Cənnətə düşməkçün kostyumda, ayaqqabıda dəfn olunurlar. Ona görə bizdən qabaqdadılar. Yəqin sayları orada müsəlmanların sayından da çoxdur. Biz ayaqqabı axtarana qədər, onlar cənnətdəkilərə kəf gəlirlər. Ay, xətakarlar!"
“Ədəbiyyat və incəsənət”
(05.01.2023)
Lənkəranın Çəmə-plovu
Azərbaycan mətbəxinin şahı sayılan plovun 200-ə yaxın növü var. Bunlardan şah plov, şüyüd plov, toyuq plov, çığırtma plov, qiymə plov, döşəmə plov, səbzi-qovurma plov, boranı plov, lobya plov, fisincan plov, südlü plov, kükü plov çox bişirilir.
Şübhəsiz, plovun ən fərqli növlərinə cənub bölgəsində rast gəlinir. Lənkəranlı gənc aşpaz Tural Kərimli yeni plov ortaya çıxarıb, adını da "çəmə-plov" qoyub. Görünüşündən pizzaya oxşayan bu dadlı yemək bəs necə hazırlanır?
Tural Kərimli yeməyin hazırlanma qaydasını belə izah edir: "Çəmə" bizim deməkdir, yəni bizim plov. Çəmə plovu hazırlamaq üçün əvvəlcə düyü suda dəmə qoyulur ki, qazmaq alınsın. Qazanda dəm alan düyüdən qazmaq hazırlamaq üçün bir stəkan qatıq tökülür, 5 yumurta əlavə olunaraq qarışdırılır. Sonra az miqdarda duz əlavə edilir və düyü ilə qarışdırılır. Sonra tavaya 100 qram yağ əlavə edilərək isidilir. Tava tam qızdıqdan sonra düyü qarışığı tökülür. Qabın ağzı bağlanaraq sobaya qoyulur".
Bu yeməyin hazırlanması üçün mütləq kənd cücəsi seçmək lazımdır. Cücə 4 yerə bölünür, duz-istiot vurulur. Sonra üzərinə alça turşusu əlavə olunur, əl ilə yaxşı qarışdırılır. İsti tavaya 100 qram kərə yağı atılır, yağ əridikdən sonra cücəni qoyub, üzərinə 250 qram su əlavə edilir.
"Yeməyə əlavə dad verəcək ləvəngini hazırlamaq üçün 1 baş ağ soğan, 1 baş qırmızı soğan, 100 qram qoz ləpəsi doğranaraq kiçik qabda qarışdırılır. Sonra cücənin bişdiyi tavaya tökülür. Bir saat qazanda bişməsi üçün gözləyirik. Qazmaq hazır olan kimi onu süfrəyə gətiririk. Bu zaman ləvəngi ilə bişən cücəni qazandan götürüb onu sümüyündən ayırırıq. Didilən toyuq ətini tam şəkildə qazmağın üzərində yayırıq. Üzərinə 50 qram zirinc əlavə edirik. Sonra bu yeməyin üzərinə kiçik doğranmış pendir tökülür. İki pomidor dilimlənərək yeməyin üzərinə qoyulur. Daha sonra bişməsi üçün sobaya verilir. 20 dəqiqədən sonra üzərindəki pendir əriyir və yemək tam hazır olur", - deyə aşpaz bildirib.
Biz, düzü, bu plovdan dadmamışıq. Amma görünüşü iştahaçandır deyə sizə məsləhət görürük.
Nuş olsun!
“Ədəbiyyat və incəsənət”
(05.01.2023)
