Super User
Poetik qiraətdə Elxan Yurdoğludur – “Şair, yağış, quş balaları”
“Ədəbiyyat və incəsənət” portalının “Ulduz” jurnalı ilə birgə “Biri ikisində” layihəsinin diqqətçəkən şeirlərindən ibarət Poertik Qiraət rubrikasında bu həftə Elxan Yurdoğlunun şeirlərinin növbəsidir.
ŞAİR, YAĞIŞ, QUŞ BALALARI
Yağış pəncərəmdə quş balasıdır,
Hələ alışmayıb qanad çırpmağa.
Açıram ovcumda atılıb-düşür
Sevincdən ürəyim dönür bir dağa.
Yağış dimdikləyir ovuclarımı,
Uşaqtək sevinib çölə qaçıram.
Quş balalarına uçmaq öyrədir,
Qoşulub onlara mən də uçuram.
Elə bil çoxdandır bir küncdə küsən
İçimdən uşaqlıq inadım çıxır.
Hər tində, döngədə xatirələrim
Tutur əllərimdən – qanadım çıxır.
Sərçələr sevincək uçur yanımca,
Qopur qanadımdan bir lələk qələm.
Göylərə xoşbəxtlik şeiri yazıram,
Enirəm aprelin üzündən öpəm.
“Ədəbiyyat və incəsənət”
(05.01.2023)
Oljas Süleymenovun həyat yoldaşı vəfat edib
Alaşın - qazax yurdunun mənəvi yazarı, millətin böyük oğlu Oljas Süleymenovun ailəsi daha bir ciddi faciə ilə üzləşib.
“Ədəbiyyat və incəsənət” portalı Ulukbek Esdeuletə - Qazaxıstan Yazıçılar İttifaqı İdarə Heyətinin sədrinə istinadən xəbər verir ki, Oljas Süleymenovun həyat yoldaşı Marqarita vəfat edib.
Biz türk dünyasının böyük ədibinin kədərini bölüşürük, ona və ailəsinə səmimi başsağlığı veririk.
“Ədəbiyyat və incəsənət”
(01.05.2023)
Milli Muğam Müsabiqəsinin qalibləri məlum olub
Xəbər verdiyimiz kimi, ölkəmizdə növbəti musiqi yarışması keçirilir, muğam ifaçılığı üzrə öncüllər müəyyənləşirdi.
Dünən, aprelin 30-da Heydər Əliyev Fondu və Mədəniyyət Nazirliyinin təşkilatçılığı, Elm və Təhsil Nazirliyinin, Azərbaycan Milli Konservatoriyasının dəstəyi ilə Azərbaycan Milli Konservatoriyasında keçirilən Milli Muğam Müsabiqəsinin qaliblərinin adı açıqlandı və onlar mükafatlandırılıldılar.
“Ədəbiyyat və incəsənət” portalı xəbər verir ki, xanəndə və instrumental ifaçılıq kateqoriyaları üzrə keçirilən Milli Muğam Müsabiqəsində İnstrumental ifaçılıq üzrə münsiflər heyətinin sədri, Milli Konservatoriyanın rektoru, Xalq artisti Siyavuş Kərimi, üzvləri isə Xalq artistləri Fəxrəddin Dadaşov, Möhlət Müslümov, Əməkdar artistlər Şirzad Fətəliyev, Çinarə Heydərova idilər.
Xanəndəlik üzrə isə münsiflər heyətinin sədri, Milli Konservatoriyanın rektoru, Xalq artisti Siyavuş Kərimi, üzvləri isə Xalq artistləri Səkinə İsmayılova, Mənsum İbrahimov, Zabit Nəbizadə, Əməkdar artist Qəzənfər Abbasov idilər.
Dünənki mərasimdə öncə Azərbaycan Milli Konservatoriyasının rektoru, Xalq artisti Siyavuş Kərimi çıxış edərək Milli Muğam Müsabiqəsinin əhəmiyyətindən danışdı. Müsabiqənin təşkilində göstərdiyi dəstəyə görə Heydər Əliyev Fonduna təşəkkür etdi. Bütün qalibləri təbrik edən Xalq artisti onlara uğurlar arzuladı.
Münsiflərin yekdil rəyinə əsasən xanəndəlik üzrə müsabiqədə yerlər bu cür bölüşdürüldü:
1-ci yer:
Mirəli Sarızadə;
2-ci yer:
Xəyal Hüseynov;
3-cü yer:
Zümrüd Məmmədova və Daşqın Kürçaylı.
İnstrumental ifaçılıq kateqoriyasında isə mükafatçılar aşağıdakılar oldu:
1-ci yer:
Vaqif Təhməzov;
2-ci yer:
Cahandar Mikayılov;
3-cü yer Bayraməli Əliyev və Soltan Nadirov.
Sonra qaliblər qala-konsert proqramı ilə çıxış etdilər.
Qapaq şəklində Mirəli Sarızadəni mükafatlandırma zamanı görürsünüz.
“Ədəbiyyat və incəsənət”
(01.05.2023)
Prezident İlham Əliyev “TEKNOFEST” festivalında dünyanın yeni formalaşan siyasi düzəninə real qiymət verib
“Ədəbiyyat və incəsənət” portalı QHT sədri, internet-media eksperti Səbuhi Abbasovun aktual şərhini diqqətinizə çatdırır.
Prezident İlham Əliyev İstanbulda keçirilən “TEKNOFEST” aerokosmik və texnologiya festivalındakı çıxışında dünyanın yeni formalaşan siyasi düzəninə real qiymət verib.
Bu çıxışa həm mənəvi, həm də siyasi baxımdan yanaşmaq lazımdır - "Atalarımızın, əcdadlarımızın ruhu şaddır, çünki Türkiyə və Azərbaycan bir yerdədir" deməklə Prezident bütün dünyaya müttəfiqliyin nümunəsini göstərdi. Bu həm də Türkiyə və Azərbaycanın yeni geosiyasi reallıqlarda artan gücünün ən bariz nümunəsidir.
Ulu Öndər Heydər Əliyevin “Bir millət, iki dövlət” devizini xatırlatmaqla əcdadlarımızın mirasının etibarlı əllərdə olduğunu vurğulayıb. Məsələnin siyasi tərəfinə gəldikdə isə Türkiyənin hərb sənayesinin fantastik inkişafının əsas göstəricisi olan “TEKNOFEST” aerokosmik və texnologiya festivalını təhlil etmək yerinə düşərdi. Prezident İlham Əliyev çıxışında bu nüansa xüsusi diqqət ayırır və bir növ qarşıda duran hədəflərin yol xəritəsini açıq şəkildə bəyan edir.
Azərbaycan Prezidenti çıxışında “Bu gün “TEKNOFEST”də iştirak edərkən “TEKNOFEST”in qurucusu əziz qardaşımız Selçuk Bayraktarın xidmətlərini də qeyd etmək istərdim. Selçuk bəy Azərbaycanda dəfələrlə olub, o cümlədən azad edilmiş torpaqlarda - Şuşada və son gəlişində - bu ayın əvvəlində - aprelin 3-də Azərbaycanda olarkən biz gələcək əməkdaşlıq haqqında danışdıq və Bayraktar mərkəzinin Azərbaycanda yaradılması haqqında anlaşdıq”, - deməklə əslində yaxın 100 ilin regional və beynəlxalq təhlükəsizlik konsepsiyasının indidən hazır olduğunu qeyd edir. Bu çox mühüm məqamdır. Bütövlükdə Türkiyə-Azərbaycan münasibətlərinin dünyada analoqu yoxdur. Bəzi beynəlxalq beyin mərkəzləri üçün araşdırma mövzusudur.
“Ədəbiyyat və incəsənət”
(01.05.2023)
“Hər bir işdə ən vacib olanı başlamaqdır” – Qay Kavasaki
Professor Əlibala Məhərrəmzadə “Ədəbiyyat və incəsənət” portalının oxucuları üçün “Ev tapşırığı: Uğur düsturunu tapacağıq” layihəsini təqdim edir. Uğur şərtləri barədə danışmaqda davam edirik. Burada, əsas yerlərdən birini də kitablar tutur.
Zaman-zaman ən yaxşıların seçimini etməyə ən müxtəlif mənbələr cəhd göstəriblər. Onların ən nüfuzlularını qruplaşdıranda (bu qruplaşmada tiraj, satış həcmi, yayıldığı areal, buraxdığı iz və s. əsas götürülür) kitab mağazalarındakı yüzlərlə rəngbərəng cildlərin içində azmayaraq «nəyi və niyə oxumaq» sualına mütləq cavab tapmaq mümkün olur.
Biz öncə peşə fəaliyyətində, biznesdə uğur qazanmağın yolunu göstərən ən çox tələb olunan kitablara nəzər yetirək. Bu, o kitablardır ki, onların hesabına bir neçə nəsil uğurlu mütəxəssis və iş adamı yetişmişdir.
Beləliklə ən yaxşı onluq.
10 -5-ci yerlərlə tanış olmuşduq. Bu gün 4-cü yerlə tanış olacağıq.
10-cu yer:
Henri Ford. «Mənim həyatım, mənim nailiyyətlərim»
9-cu yer:
Riçard Brenson. «Çılpaq biznes»
8-ci yer:
Riçard Brenson. «Hər şey cəhənnəmə, giriş və elə!»
7-ci yer:
Robert Kiyosaki. «Varlı ata, kasıb ata»
6-cı yer:
Ayn Rend. «Atlant çiyinlərini düzəltdi”»
5-ci yer
Toni Şey. «Xoşbəxtlik gətirərək. Sıfırdan milyardadək»
-----------
4-cü yer
Qay Kavasaki. «Startap»
Bu kitabın alt başlığı belədir: “Apple-in eks-yevangelisti, Çaxmaq daşı vadisinin ən cəsarətli kapitalistindən 11 master-klass“
Qay Kavasaki adı əminəm ki, çoxlarınıza tanışdır. Onun istedadı və peşəkarlığı sayəsində Macintosh kompaniyası adını qızıl hərflərlə tarixə yazdırıb, Apple kompaniyası isə müasir dövrümüzün ən tanınmış brendlərindən birinə çevrilib.
Qiymətli, qızıl məsləhətlərlə bol olan, oxucunun əlindən tutaraq onu biznesdə uğur qazanmağın daşlı-kəsəkli yolları ilə apararaq əsl bələdçilik edən bu kitab təsadüfi deyil ki, ən böyük iş adamlarının stolüstü kitabıdır.
«Əgər sənin devizin «Daha boşboğazlıq və çərənçilik yetər, mənə de ki, mən nə iş görməliyəm» - dirsə, demək sən düzgün ünvanı tapmısan», – söyləyir yapon əsilli havaylı öz kitabı barədə.
O yazır:
- Hər bir işdə ən vacib olanı başlamaqdır. Unutmayın: hələ heç kəs yalnız planlaşdırma ilə uğur qazanmağa müvəffəq olmayıb.
- Sizə və sizin kompaniyaya xeyir gətirməklə bütün cəmiyyətə ziyan gətirən fəaliyyətin heç bir dəyəri yoxdur.
- Özünüzün istənilən hərəkətinizə elə yanaşın ki, sanki onu bütün publika görəcək, sanki o, hər yerdə əks-səda verəcək. Unutmayın, siz nə iş görürsünüzsə, sizin «əl izləriniz» həmişə və hər kəs tərəfindən görünəcək.
- Hər şey həyata keçməyincə mümkünsüz görünür. Sahibkarlıq fəaliyyəti məhz budur – sən başqalarının qeyri-mümkün hesab etdiyini eləyirsən.
- Yaponlarda belə bir məsəl var, deyirlər axmaqlar iki yerə bölünür. Birincilər heç vaxt Fudzi dağının zirvəsinə qalxmayanlardır ki, ətrafın gözəl mənzərəsindən zövq ala bilmirlər. İkincilər isə həmin zirvəyə iki dəfə qalxanlardır.
Oxucularıma onu da söyləyim ki, Qay Kavasaki həm də biznesdə yevangelizm təliminin banisidir. Bir baxın, bu insanın təlimi müştəriyə satdığı məhsulun ən yaxşı olması barədə elə bir inam aşılamaqdır ki, müştəri heç bir təlimat olmadan, könüllü şəkildə ətrafdaki insanlara məhz bu məhsulu almağı tövsiyyə etsin!
Təsəvvür edirsiniz, yüz minlərlə müştərilər brendin könüllü təbliğatçısına çevrilirlər, Qay Kavasakinin dühalığı məhz bundadır.
O, inandırmağı gözəl bacarır. Oxucularım, sizi əmin edirəm ki, «Startap»ı oxusanız Qay Kavasaki özünün uğura doğru getmək qaydalarına və şərtlərinə sizləri mütləq inandıracaq.
4-cüyerdəkikitablatanışlıqdabaş tutdu. Bəs 3-cü yerdə hansı kitabqərarlaşıb? Bunu sabah biləcəksiniz.
“Ədəbiyyat və incəsənət”
(01.05.2023)
Uşaq İncəsənət Festivalının birinci mərhələsi yekunlaşdı
750 İŞTİRAKÇI ÖZ QÜVVƏSİNİ SINAYIB
Ümummilli Lider Heydər Əliyevin 100 illik yubileyi münasibətilə Mədəniyyət Nazirliyi, Elm və Təhsil Nazirliyi və Heydər Əliyev Mərkəzinin birgə təşkil etdiyi Uşaq İncəsənət Festivalının birinci mərhələsi yekunlaşlb.
Bakı şəhəri üzrə festivalın ilk mərhələsi altı məkanda – Binəqədi rayon mərkəzi Mədəniyyət evi, Mərdəkan Mədəniyyət Sarayı, Ə.Əmirov adına Mədəniyyət sarayı, H.Abbasov adına Mədəniyyət Mərkəzi, Binə qəsəbə Mədəniyyət Mərkəzi, Şağan qəsəbə Mədəniyyət Mərkəzində keçirilir.
Seçim turunun ilk günündən indiyədək 738 iştirakçı Azərbaycan xalq çalğı alətləri ifaçılığı, heykəltəraşlıq, rəsm, solo milli rəqs, piano ifaçılığı, estrada oxuma, akademik vokal, caz ifaçılığı (kollektiv), aşıq sənəti, rəqəmsal incəsənət, aktyorluq, bədii qiraət nominasiyaları üzrə öz qabiliyyətini nümayiş etdirib. Uşaqların ifaçılıq və yaradıcılıq qabiliyyətləri münsiflər heyəti tərəfindən qiymətləndirilib.
Qarşıdakı günlərdə dekorativ-tətbiqi sənət, klassik nəfəs alətləri ifaçılığı, solo müasir rəqs, milli rəqs ansamblı, müasir rəqs ansamblı, xor, xanəndəlik sənəti, klassik simli alətlər ifaçılığı və digər nominasiyalar üzrə iştirakçılar münsiflərin önünə çıxacaqlar.
Xatırladaq ki, festivalın birinci mərhələsi aprel-iyun aylarını əhatə edir.
“Ədəbiyyat və incəsənət”
(01.05.2023)
Öncə rəqs, sonra caz
İstirahət günlərində mədəniyyət aləmində iki bayram qeyd edildi. Şənbə günü Beynəlxalq rəqs, bazar günü isə Beynəlxalq caz günləri.
“Ədəbiyyat və incəsənət” portalı hər iki bayramı zəruri xatırlatmalarla yada salır. Öncə rəqsdən başlayaq.
RƏQS
Dünyada növbəti dəfə peşəkar və ya həvəskar rəqslə məşğul olan, rəqsi sevən hər kəsin bayramı qeyd edildi. Beynəlxalq Rəqs Günü 1982-ci ildə UNESCO-nun Beynəlxalq Rəqs Şurası tərəfindən təsis olunub. Bu əlamətdar tarix fransalı baletmeyster, balet nəzəriyyəçisi və islahatçısı, 18-ci əsrdə yaşamış Jan Jorj Noverrin anadan olduğu gündə qeyd olunur. Günün təsis olunmasında məqsəd ictimaiyyətin diqqətini rəqs sənətinə cəlb etməkdir.
Təbii ki, dünyanın əksər ölkələrində olduğu kimi, Azərbaycanda da Beynəlxalq Rəqs Günü təsis olunduğu tarixdən hər il qeyd olunur.
Azərbaycanda rəqsin tarixi olduqca zəngin və qədimdir. İncəsənətin bir qolu olan rəqslərimiz ülvilik, gözəllik və birlik rəmzi sayılır.
Kökləri eramızdan əvvəlki minilliklərə gedib çıxan milli rəqslərimiz tariximizlə ayrılmaz surətdə bağlı olub, xalqımızın milli xüsusiyyətini, həyat və məişətini əks etdirir. Qobustan qayaüstü rəsmlərində əksini tapmış rəqs səhnələri bunu sübut edir.
Azərbaycan xalq rəqsləri olduqca rəngarəngdir. Onlar quruluş, süjet və mövzu baxımından biri-birindən çox fərqlənir. Bu gün məşhur olan milli rəqslərimizə – “Azərbaycan”, “Heyvagülü”, “Uzundərə”, “Toy rəqsi”, “Turacı”, “Tərəkəmə”, “Cəngi”, “Şalaxo”, “İnnabı”, “Qızılgül”, “Qazağı”, “Qaytağı”, “Qoçəli”, “Lalə”, “Misri”, “Naznazı”, “Vağzalı”, “Yallı” və digərlərini misal gətirmək olar.
Dahi bəstəkar Üzeyir Hacıbəyli tərəfindən yaradılmış Azərbaycan Dövlət Mahnı və Rəqs Ansamblı bu gün tamaşaçılara bir-birindən gözəl rəqslər və xoş ovqat bəxş edir.
Əminə Dilbazi, Afaq Məlikova, Roza Xəlilova, Təranə Muradova, Tamilla Məmmədova, Böyükağa Məmmədov, Kamil Dadaşov, Böyükağa Atababayev və başqaları öz ifalarında milli elementləri qoruyub saxlamaqla milli rəqsimizi inkişaf etdirərək yeni çalarlarla zənginləşdiriblər.
CAZ
Beynəlxalq Rəqs gününün səhərisi Caz Gününün kimi qeyd edilməsi ənənəsinin kökü nisbətən yaxındadır. 2012-ci ildə UNESCO tərəfindən elan edilən bu gün dünyanın cazsevər ölkələrində keçirilən konsert proqramları ilə yadda qalır. Əlamətdar gün hər il dünyanın 190-dək ölkəsində qeyd edilir: dəyirmi masalar, caz improvizələrinə dair ustad dərsləri, habelə caz mövzusu ilə bağlı müxtəlif tədbirlər təşkil olunur. Bu tədbirlər cazın vətəni hesab edilən Yeni Orleanın Konqo meydanında xüsusi konsert proqramı ilə davam etdirilir.
Dünyada Azərbaycan cazının özünəməxsus yeri var. Bunu ölkəmizdə keçirilən beynəlxalq caz festivallarına olan maraq bir daha sübut edir.
Amerika cazı və muğam musiqisi üzərində qurulan Azərbaycan cazının bünövrəsi 30-cu illərin sonunda Niyazi və Tofiq Quliyevin yaratdığı “Dövlət Cazı” adı ilə tanınan Dövlət Estrada Orkestri tərəfindən qoyulub. Azərbaycanda estrada və caz musiqisinin ikinci həyatı Rafiq Babayevin yaratdığı “Qaya” ansamblı ilə başlayır. Bu ansambl keçmiş SSRİ-də böyük şöhrət qazanmışdır. Vaqif Mustafazadə dövrü isə Azərbaycanda cazın intibah dövrü hesab edilə bilər. Virtuoz musiqiçi muğamla cazın sintezini yaradıb. Özündən sonra onun yolunu qızı Əzizə Mustafazadə davam etdirir.
Böyük təməllər üzərində qurulmuş Azərbaycan cazı indi gənc ifaçıların timsalında daha da inkişaf edir. Beynəlxalq Montre Caz Festivalının qalibi İsfar Sarabskinin adını çəkmək yetərlidir ki, Azərbaycanda caz ənənəsinin necə yaşadığının şahidi olasan. Həmçinin Rain Sultanov, Salman Qənbərov, Emil Əfrasiyaboğlu, Şahin Növrəsli kimi tanınmış ifaçılar bu ənənələri uğurla davam etdirirlər.
Milli rəqsimiz də, cazımız da daim inkişafda, təkmilləşmədədir.
Uğurlar və zirvələr!
“Ədəbiyyat və incəsənət”
(01.05.2023)
Beynəlxalq Türk Mədəniyyəti və İrsi Fondu tərəfindən Çingiz Aytmatovun 95 illiyi qeyd olunub
Beynəlxalq Türk Mədəniyyəti və İrsi Fondunun təşkilatçılığı ilə “Heydər Əliyev İli” çərçivəsində Qırğızıstanın görkəmli yazıçısı, ictimai-siyasi xadimi Çingiz Aytmatovun 95 illik yubileyi münasibətilə Azərbaycan Milli Akademik Dram Teatrında ədibin “Ana tarla” povesti əsasında hazırlanmış tamaşanın premyerası keçirilib.
AzərTAC xəbər verir ki, Fondun Bakı Bələdiyyə Teatrı ilə əməkdaşlığı çərçivəsində səhnələşdirilmiş tamaşanın quruluşçu rejissoru Azərbaycanın Xalq artisti Mərahim Fərzəlibəyovdur.
Tamaşanın premyerasında görkəmli ictimai, mədəniyyət, incəsənət, ədəbiyyat xadimləri, səfirlər, Milli Məclisin deputatları və yaradıcı gənclər iştirak ediblər.
Həmçinin tədbir çərçivəsində Çingiz Aytmatovun Ümummilli Lider Heydər Əliyev və Azərbaycan Respublikasının Prezidenti İlham Əliyevlə görüşlərini, Bakıya səfərlərini və s. əks etdirən fotoşəkillərdən ibarət sərgi təşkil olunub.
Tədbirin açılışında çıxış edən Beynəlxalq Türk Mədəniyyəti və İrsi Fondunun prezidenti Günay Əfəndiyeva Azərbaycanın Ümummilli Lideri Heydər Əliyevin 100 illik yubileyinin bütün Türk dünyası üçün əlamətdar olduğunu qeyd edib.
Fondun prezidenti Ulu Öndərin mədəniyyətə, incəsənətə vurğunluğuna diqqət çəkib. Günay Əfəndiyeva bildirib ki, Heydər Əliyevin mədəniyyət və incəsənət nümayəndələri ilə - yazıçılarla, şairlərlə, rejissorlarla, aktyorlarla, rəssamlarla, bəstəkarlarla özünəməxsus, isti münasibətləri var idi.
“Bu münasibət təkcə Azərbaycanla məhdudlaşmayıb, digər ölkələrin incəsənət nümayəndələrinə, o cümlədən Türk dünyasının simalarına da şamil edilirdi. Onlardan biri də bu il 95 illik yubileyi qeyd olunan, qırğız xalqının fəxri, Türk dünyasının böyük yazıçısı, ictimai-siyasi xadim Çingiz Aytmatov olub, - deyə Günay Əfəndiyeva bildirib.
Fondun prezidenti Heydər Əliyevlə Aytmatovun bir-birinə bəslədikləri doğmalıqdan və rəğbətdən, onların dostluq əlaqələrindən bəhs edib.
Günay Əfəndiyeva Beynəlxalq Türk Mədəniyyəti və İrsi Fondunun fəaliyyətindən danışaraq təşkilatın Türk dünyasının zəngin mədəniyyətini öyrəndiyini, qoruduğunu və dünyada təbliğ etdiyini vurğulayıb. Günay Əfəndiyeva 2018-ci ildə Fond tərəfindən Çingiz Aytmatovun 90 illik yubileyinin Azərbaycanda təntənəli şəkildə qeyd olunduğunu xatırladıb. Həmin tədbir çərçivəsində qırğız sənətçilərin ifasında Aytmatovun "Cəmilə" povesti əsasında hazırlanmış tamaşa təqdim olunub.
Aytmatovun əsərlərinin beynəlxalq səviyyədə geniş tanındığını vurğulayan Fondun prezidenti vurğulayıb:
“Ana tarla” əsəri bir qadının faciəsi, bir ananın fəryadıdır. Amma bir ananın simasında minlərcə, milyonlarca anaların ağrısı, acısı, iztirabıdır. Neçə-neçə nəsillərin taleyidir. Bunları danışarkən Vətən müharibəsində doğma Qarabağ uğrunda canlarını fəda etmiş igid oğullarımız gözlərimizin önündən keçir. Bu tamaşa, eyni zamanda, onların, bizim qəhrəmanlarımızın ruhlarına olan ehtiramdır. Və əlbəttə, onları bizə bağışlayan Analara ithafdır”.
Daha sonra Günay Əfəndiyeva tamaşanın hazırlanmasında əməyi keçən hər kəsə, Bakı Bələdiyyə Teatrının kollektivinə və onun rəhbəri Aynur Muxtarovaya, quruluşçu rejissor Azərbaycanın Xalq artisti Mərahim Fərzəlibəyova minnətdarlığını bildirib.
Qırğız Respublikası Prezidentinin xüsusi tapşırıqlar üzrə xüsusi nümayəndəsi Taalatbek Masadıkov çıxış edərək bildirib ki, bu il Azərbaycan xalqının Ümummilli Lideri, müstəqil Azərbaycan dövlətinin qurucusu, görkəmli siyasi və dövlət xadimi Heydər Əliyevin anadan olmasının 100 illiyi qeyd olunur. Taalatbek Masadıkov Heydər Əliyevin Azərbaycan xalqının və bütün Türk dünyasının dahi oğlu olduğunu vurğulayıb.
"Heydər Əliyev şəxsiyyətinin böyüklüyü zaman keçdikcə bizim tərəfimizdən daha çox dərk olunur. Bu gün biz siyasi dünyanın və tarixin gedişatına təsir edən bu iradəli şəxsiyyətə heyranlıqla baxırıq", - deyə o bildirib.
Çingiz Aytmatovun yaradıcılığından danışan Taalatbek Masadıkov böyük qırğız yazıçısının Türk dünyasının ən görkəmli mədəniyyət xadimlərindən biri olduğunu qeyd edərək, onun ümumtürk mədəni irsinə verdiyi misilsiz töhfəsindən bəhs edib.
“Aytmatov yaradıcılığı qırğız xalqının adət-ənənələri və tarixində dərin köklərə malikdir. Onun əsərləri bütün dünya oxucularında əks-səda doğuran ümumbəşəri məhəbbət, itki və insanlıq mövzularını tədqiq edir. Aytmatov ənənəvi qırğız mədəniyyətini müasir ədəbi formalarla birləşdirmək bacarığına malik idi. Bu gün də Aytmatovun irsi yeni nəsil yazıçı və sənətkarları ruhlandırmaqda davam edir və onun türk mədəni irsinə təsiri şübhəsiz ki, gələcək nəsillərə də ötürüləcək”, - deyə o bildirib.
Qırğız Respublikası Prezidentinin xüsusi tapşırıqlar üzrə xüsusi nümayəndəsi tədbirin təşkilinə görə Fondun prezidenti Günay Əfəndiyevaya, eləcə də Bakı Bələdiyyə Teatrının yaradıcı kollektivinə minnətdarlığını bildirib.
Qırğızıstanın Azərbaycandakı səfiri Kayrat Osmonaliyev Ulu Öndər Heydər Əliyevin Çingiz Aytmatova həm yazıçı, həm də görkəmli ziyalı kimi yüksək qiymət verdiyini vurğulayıb. Diplomat qeyd edib ki, əsası Heydər Əliyev tərəfindən qoyulan siyasət bu gün də uğurla davam etdirilir.
"Azərbaycanda daxili sabitlik, xalqla iqtidar arasında möhkəm birlik var, iqtisadiyyat möhkəmlənir, mədəniyyət və ictimai həyatın digər sahələri inkişaf edir. Qırğızıstan ilə Azərbaycan arasında 30 illik diplomatik münasibətlər ərzində güclü qardaşlıq əlaqələri qurulub", - deyə o bildirib.
Səfir “Ana tarla” hekayəsindən söz açaraq qeyd edib ki, “Əsərin qəhrəmanı Tolqonay müharibənin ağır illərində cəsarəti, mənəvi gücü və müdrikliyi Ana Torpaqdan götürüb”. Kayrat Osmonaliyev bu tamaşanın izləyicilər tərəfindən maraqla qarşılanacağına əminliyini ifadə edib.
Daha sonra Çingiz Aytmatovun qızı Şirin Aytmatovanın videomüraciəti tədbir iştirakçılarının diqqətinə təqdim olunub.
Çıxış edənlər türk mədəniyyətinin və irsinin təbliği kimi mühüm missiyanı yerinə yetirdiyinə görə Beynəlxalq Türk Mədəniyyəti və İrsi Fonduna, eləcə də Bakı Bələdiyyə Teatrına və bu genişmiqyaslı tədbirin təşkilində əməyi olan hər kəsə minnətdarlıqlarını bildiriblər.
Povestin baş qəhrəmanı - Tolqonayın obrazını Azərbaycanın Əməkdar artisti Hüsniyyə Mürvətova canlandırıb. Tamaşanın quruluşçu rejissoru Azərbaycanın Xalq artisti Mərahim Fərzəlibəyovdur.
Çingiz Aytmatovun əsərini Azərbaycan dilinə Teymur Elçin tərcümə edib. Tamaşada Əməkdar artist Səmayə Sadıqova, aktyorlar Rəşad Kəsəmənli, Tural Əhməd, Namiq Cavadov, Elçin Muradov, Ülviyyə Rza, İsmayıl Atakişiyev, Zülfiyyə Məmmədova, Günel Qəmidova, Aynur Abbasova, Arzu Ağayeva iştirak ediblər.
“Ədəbiyyat və incəsənət”
(28.04.2023)
Ümummulli lider Heydər Əliyevin 100 illik yubileyinə həsr olunmuş Ədəbiyyat Forumu keçiriləcək
5-7 may tarixlərində Azərbaycan Yazıçılar Birliyi Ədəbiyyat Fondunun təşkilatçılığı ilə Ümummulli lider Heydər Əliyevin 100 illik yubileyinə həsr olunmuş “Heydər Əliyev və Azərbaycan ədəbiyyatı” Forumu keçiriləcək.
“Ədəbiyyat və incəsənət” portal xəbər verir ki, Quba şəhərində yerləşən “Şahdağ Quba-Truskavets” sanatoriyasının evsahibliyi edəcəyi Forumda ölkənin ədəbi elitası bir araya gələcək.
Heydər Əliyevi - bu böyük və müdrik insanı şəxsən tanıyıb, onunla yaxından təmasda olanlar onunla bağlı xatirələrini dilə gətirəcəklər, məruzəçilər Heydər Əliyevin ədəbiyyatımıza verdiyi töhfələrdən, qələm əhlinə diqqət və qayğısından söz açacaqlar.
İki günlük Forum zamanı həm də Azərbaycan Yazıçılar Birliyinin Heydər Əliyevin 100 illiyinə hazırladığı töhfə - “Əbədi ömrün yüz ili” kitabının təqdimatı baş tutacaq.
“Ədəbiyyat və incəsənət”
(28.04.2023)
Aktyorlar arasında bədii qiraət müsabiqəsi təşkil olunacaq
Mədəniyyət Nazirliyi və Azərbaycan Teatr Xadimləri İttifaqının təşkilatçılığı ilə mayın 3-dən 5-dək müstəqil Azərbaycan dövlətinin qurucusu, Ümummilli Lider Heydər Əliyevin 100 illiyinə həsr olunmuş "Sən elə bir zirvəsən..." adlı bədii qiraət müsabiqəsi təşkil ediləcək.
Sözügedən müsabiqənin məqsədi dövlətçilik salnaməmizdə silinməz izlər qoymuş, azərbaycanlı olması ilə hər zaman fəxr etmiş milli qürur və iftixar mənbəyimiz olan Ulu Öndər Heydər Əliyevə həsr edilmiş ədəbi-bədii nümunələri təbliğ etmək, habelə milli mədəniyyət məkanında baş verən yaradıcılıq proseslərini fəallaşdırmaq, bədii qiraətə olan marağı artırmaq, eyni zamanda yeni yaradıcılıq axtarışlarına şərait yaratmaqdır.
Müsabiqədə ilk üç yerin sahiblərinə fəxri fərman və pul mükafatı təqdim olunacaq.
“Ədəbiyyat və incəsənət”
(28.04.2023)
