Super User
Anar, İsa Həbibbəyli, Çingiz Abdullayev, Sabir Rüstəmxanlı, Vahid Əziz, Elmira Axundova və digərləri…
ƏDƏBİYYAT FORUMU BÖYÜK MARAQLA GÖZLƏNİLİR
5-7 may tarixlərində Azərbaycan Yazıçılar Birliyi Ədəbiyyat Fondunun təşkilatçılığı ilə Ümummilli Lider Heydər Əliyevin 100 illik yubileyinə həsr olunmuş “Heydər Əliyev və Azərbaycan ədəbiyyatı” Forumu keçiriləcək.
“Ədəbiyyat və incəsənət” portalı xəbər verir ki, Quba şəhərində yerləşən “Şahdağ Quba-Truskavets sanatoriyasının ev sahibliyi edəcəyi Forumda ölkənin ədəbi elitası bir araya gələcək.
Heydər Əliyevi - bu böyük və müdrik insanı şəxsən tanıyıb, onunla yaxından təmasda olanlar onunla bağlı xatirələrini dilə gətirəcəklər, məruzəçilər Heydər Əliyevin ədəbiyyatımıza verdiyi töhfələrdən, qələm əhlinə diqqət və qayğısından söz açacaqlar.
Forumda olacaq çıxışların bir qismini nəzərinizə çatdırırıq:
Anar, Xalq yazıçısı, AYB-nin sədri - “Heydər Əliyev obrazını Azərbaycan ədəbiyyatında yaradan ilk iri həcmli əsər: “Unudulmaz görüşlər”im barədə”
İsa Həbibbəyli, AMEA-nın prezidenti - “Heydər Əliyev dühası və Azərbaycan ədəbiyyatı”
Çingiz Abdullayev, Xalq yazıçısı, AYB-nin Baş katibi - “Bir azərbaycanlı yazıçının dünya arenasına çıxmasına Ümummilli liderin dəstəyi”
Sabir Rüstəmxanlı, Xalq yazıçısı - “Heydər Əliyev barədə xatirələrim”
Jalə Əliyeva, Milli Məclisin deputatı - “Heydər Əliyev və Ana dilimiz”
Elmira Axundova, Xalq yazıçısı -
“Əbədiyaşar məhəbbət” Zərifə və Heydər Əliyevlər barədə” kitabım necə yarandı”
Fuad Məmmədov, Azərbaycan milli kulturologiya elminin banisi, “Simurq Assosiasiyasının prezidenti - “Heydər Əliyev və yeni mədəniyyət konsepsiyası”
Vahid Əziz, Xalq şairi - “Heydər Əliyevin kadrı olaraq ondan öyrəndiklərim”
Hüseynbala Mirələmov, yazıçı - “Rusiyanın məşhur “JZL” seriyasından Heydər Əliyev barədə yazdığım kitabın rezonansı”
Seymur Şeydayev, Təhlükəsizlik məsələləri üzrə ekspert, ehtiyatda olan polkovnik - “Heydər Əliyev yazıçılarımızı KQB-nin qanlı caynağından necə xilas etdi”
Azər Turan “Ədəbiyyat qəzeti”nin baş redaktoru - “Heydər Əliyev obrazı ilk dəfə ədəbi müstəvidə; Cavid Turandan Heydər Əliyev barədə eşitdiklərim”
Əkbər Qoşalı, Beynəlxalq “Alaş” Ədəbiyyat mükafatı laureatı, Milli Məclisin mədəniyyət eksperti - “Heydər Əliyev və türk dünyası”
Elnarə Akimova, Filologiya elmləri doktoru, AMEA Nizami Gəncəvi adına Ədəbiyyat İnstitutunda şöbə müdiri, YAP İdarə Heyətinin üzvü - “Heydər Əliyevlə yaddaşlaşan ədəbiyyat: sovet epoxasından müstəqillik təntənəsinə”
Elçin Hüseynbəyli, AYB katibi - “AYB-nin 100 illiyə töhfəsi: Əbədi ömrün yüz ili” kitabının ərsəyə gətirilməsi tarixçəsi”
Qəşəm Nəcəfzadə, AYB-nin Uşaq Ədəbiyyatı bölməsinin rəhbəri - “Heydər Əliyevin uşaq ədəbiyyatına qayğısı”
Sayman Aruz, AYB sədrinin müşaviri - “Heydər Əliyev və Cənubi Azərbaycan ədəbiyyatı”
İbrahim İlyaslı, AYB Poeziya bölməsinin müdiri - “Heydər Əliyev obrazının Azərbaycan poeziyasında təcəssümü”
İntiqam Yaşar, Dünya Gənc Türk Yazarlar Birliyinin başqanı - “Heydər Əliyevin ədəbi gəncliyə qayğısı”
İki günlük Forum zamanı həm də Azərbaycan Yazıçılar Birliyinin Heydər Əliyevin 100 illiyinə hazırladığı töhfə - “Əbədi ömrün yüz ili” kitabının təqdimatı olacaq.
“Ədəbiyyat və incəsənət”
(02.05.2023)
Sumqayıtda yazıçı Varislə gənclərin görüşü keçirilib
Sumqayıt Dövlət Universitetinin, Sumqayıt Tibb, Musiqi və Texniki kolleclərinin, Sumqayıt Gənclər Klubunun və Bookland Cafe & shop-un təşkilatçılığı ilə Sumqayıtda, Bookland məkanında yazıçı Varislə tələbələrin görüşü keçirilib.
“Ədəbiyyat və incəsənət” portalı xəbər verir ki, dörd saata yaxın davam edən görüşdə Varis ədəbiyyata gəlişi, necə məşhurlaşması, beynəlxalq reputasiya qazanması barədə danışmış, sualları cavablandırmışdır.
Daha sonra yazıçı gənclərə Uğura gedən yol, hədəfi necə seçmək, bir neçə planla necə hərəkət etmək barədə söhbət açmış, “Arzuların gerçəkləşməsi” metafizika qanununu izah etmişdir.
Sonra kitab imzalama mərasimi baş tutmuş, xatirə şəkilləri çəkdirilmişdir.
“Ədəbiyyat və incəsənət”
(02.05.2023)
Ümummilli Liderin 100 illiyi ilə əlaqədar şeir müsabiqəsi təşkil olunub
Mayın 1-də Bakı Şəhər Mədəniyyət Baş İdarəsi Sabunçu rayon Mərkəzləşdirilmiş Kitabxana Sisteminin Mərkəzi Kitabxanasında Ümummilli Lider Heydər Əliyevin 100 illiyi ilə əlaqədar şeir müsabiqəsi təşkil edilib.
Baş İdarədən verilən məlumata görə, əvvəlcə tədbirin əhəmiyyətindən danışılıb. Şeir müsabiqəsinin keçirilməsində əsas məqsədin Ulu Öndər Heydər Əliyevin mədəniyyətə və gənclərə qayğısını rəhbər tutaraq, mədəniyyət sahəsində inkişafın təmin edilməsi, uşaqların vətənpərvərlik ruhunda, mədəniyyətə, incəsənətə, adət-ənənələrimizə bağlı tərbiyə edilməsi olduğu vurğulanıb.
Müsabiqədə 107, 169, 252 nömrəli tam orta məktəblərin şagirdləri Ümummilli Lider Heydər Əliyev və vətənpərvərlik mövzusunda şeirlər söyləyiblər. İştirakçıların söylədiyi şeirlər münsiflər heyəti tərəfindən qiymətləndirilib və birinci mərhələnin qalibləri müəyyən olunub.
Qeyd edək ki, müsabiqənin növbəti ikinci mərhələsi mayın 10-da keçiriləcək.
“Ədəbiyyat və incəsənət”
(02.05.2023)
Yazarımız Qaraqanda və Astanada səfərdə olub
Azərbaycanlı yazar, Beynəlxalq “Alaş” Ədəbiyyat Mükafatı laureatı, DGTYB Məsləhət Şurasının başqanı Əkbər Qoşalı, DGTYB Məsləhət Şurasının üzvləri – “MİMAR” İB başqanı Yılmaz Okuklu, telejurnalist Səlim Yuhay bugünlərdə qardaş Qazaxıstanda səfərdə olublar.
Əkbər Qoşalı “Ədəbiyyat və incəsənət” portalına bildirib ki, onlar “Qaraqanda Yazı – 2023” Poeziya Festivalında və Astanada keçirilən VI Avrasiya Beynəlxalq Kitab Sərgi-Yarmarkasında iştirak ediblər.
DGTYB Məsləhət Şurası təmsilçiləri Poeziya festivalının açılışında və yeni nəsil qazax yazarları ilə görüşdə çıxış ediblər.
Qazaxıstan Yazıçılar Birliyi, TÜRKSOY Yazarlar Birliyi və Qaraqanda Hakimatının ortaq düzənlədiyi Festivalın iştirakçıları “KarLaq”ı - Sovet repressiya illərinin acı izlərini yaşadan “Qaraqanda İslah-Əmək Düşərgəsi” əsasında taradılmış muzeydə və Akd. Bukenov adına Dövlət Universitetində olublar.
Astanada keçirilən nüfuzlu Kitab Sərg-Yarmarkasında isə Əkbər Qoşalının qazaxcaya çevrilmiş, “Foliant” Nəşriyyatında nəfis tərtibatla gün üzü görmüş şeirlər toplusu – “Turanın bir qom yovşanı” kitabının geniş təqdimatı olub. Qazaxıstan Yazıçılar Birliyinin katibi, Əməkdar mədəniyyət xadimi Devletkerey Kapulının aparıcısı olduğu təqdimatda Qazaxıstanın İnformasiya və Sosial işlər naziri Akd. Darxan Kıdırali, Azərbaycanın Qazaxıstandakı səfirliyinin müşaviri Rövşən Kazımov, “Foliant” Nəşriyyatının baş direktoru Nurlan İsabekov, tanınmış şair-tərcüməçi Tanagöz Tolkınqızı, Saxa-Yakutiyalı şair-tərcüməçi Arılı Duydax,
qazax şair-yazıçıları çıxış edib. Ə.Qoşalıya Qazaxıstanın İnformasiya və Sosial işlər Nazirliyinin, Qazaxıstan Mədəniyyət və İdman Nazirliyinin “Fəxri Fərmanı” təqdim olunub. İstedadlı qazax məktəblisi Abdulxadi Sərsenbek Azərbaycanlı yazarın ağ-qara rənglə işlədiyi pirtretini ona bağışlayıb.
Ə.Qoşalı Astanada çıxan kitabını qazax oxucuları üçün imzalayıb.
Səfər müddətində Qazaxıstanın İnformasiya və Sosial işlər naziri Akd. Darxan Kıdırali, Qazaxıstan Prezidentinin müşaviri Malik Otorbayev, Prezident yanında Kommunikasiyalar Departamentinin direktoru Askar Umarov, “Xəbər” ASC – Dövlət tele-radio kompaniyasının direktoru Beqali Ueli, Azərbaycanın Qazaxıstandakı səfiri Ağalar Atamoğlanov, “Foliant” Nəşriyyatının baş direktoru Nurlan İsabekov, Qazaxıstan Yazıçılar Birliyinin başqanı, Dövlət mükafatı laureatı, Əməkdar incəsənət xadimi Uluğbek Esdevlet, Yazıçılar Birliyinin Qaraqanda filialının başqanı Janat Jankaşulı və b. ilə ayrıca görüşlər olub, maraq doğuran müxtəlif mövzular ətrafında fikir mübadiləsi aparılıb.
Qazaxıstanın çoxtirajlı, ən köklü milli qəzeti “Egemen Qazaqstan” redaksiyasında, habelə Qazaxıstan Yazıçılar Birliyinin Astana filialı – Astana Yazarlar Evində Azərbaycanlı yazarla görüş təşkil olunub, yeni nəsil qazax aydınları, şair-yazıçıları ilə qarşılıqlı maraq doğuran məsələlər müzakirə edilib.
Onu da vurğulayaq ki, 30-a yaxın qazax yazarına Qazaxıstan-Azərbaycan ədəbi əlaqələrinin inkişafına verdikləri töhfələrə görə DGTYB adından “Fəxri Fərman” təqdim edilib.
Ə.Qoşalı, Y.Okulu və S.Yuhay D.Kapulının müşayiəti L.Qumilyov adına Avrasiya Milli Universitetində “Heydər Əliyev Auditoriyası”nı ziyarət edib, orada bir qrup tələbə ilə görüşüb, habelə “Qələmkar Bağı”nda olub, “Xəbər TV”nin canlı efirində çıxış ediblər.
Görüşlərdə Azərbaycan Prezidentinin Qazaxıstana rəsmi səfəri, ölkələrimiz arasında günü-gündən güclənən mədəni əlaqələr xüsusi minnətdarlıqla vurğulanıb.
“Ədəbiyyat və incəsənət”
(02.05.2023)
“Sothebys” hərracında Şah Təhmasibin “Şahnamə”sinin illüstrasiyalı vərəqi 7 milyon dollara satılıb
HƏRRAC EVİNİN EKSPERTİ BENEDİKT KARTER KİTABI DÜNYA ƏHƏMİYYƏTLİ ŞEDEVR ADLANDIRIR
Böyük Britaniyanın məşhur “Sothebys” hərracında Şah Təhmasibin “Şahnamə”sinin əlyazmasının illüstrasiyalı vərəqi 7 milyon dollara satılıb. Bu barədə “Ədəbiyyat və incəsənət” TASS.ru-ya istinadən xəbər verir.
Hərracın İslam və Hindistan incəsənəti departamentinin direktoru Benedikt Karter məlumat verib. O qeyd edib ki, İran-Turan müharibəsinin rəsmini əks etdirən bu qiymətli nümunə auksionda ən çox təklif alanlar sırasında olub. O əlavə edib ki, bu illüstrasiyalı vərəq dünyanın orta əsrlərə aid ən nadir əsərlərindən biridir. Bu unikal nümunə 1658-ci ildə Şah İsmayılın oğlu Şah Təhmasib tərəfindən Osmanlı Sultanı II Səlimə hədiyə edilib.
Qeyd edək ki, hərracda həmçinin XVII-XVIII əsrlərə aid Yaxın Şərq, Şimali Afrika, Türkiyə, İran, Hindistan və Cənubi Asiyadan müxtəlif İslam əsərləri də satılıb. B.Karter bildirib ki, ümumilikdə 135 əsər kolleksiyaçıları tərəfindən alınıb. Onların arasında Osmanlı imperiyası zamanında – XVII-XIX-əsrlərdə məşhur müsəlman xəttatları tərəfindən yazılmış Qurani-Kərimin nadir nümunələri də var. Osmanlı sultanlarının XVII əsrə aid qızıl naxışlı xəncəri isə 254 min funt sterlinqə satılıb. Həmi əsrdə hazırlanan “Qızıl buynuz” vazasının satışından 126 min dollar, müxtəlif geyim, keramika, metal əşyalar və rəsm əsərlərindən isə “Sotheby” hərracı 15,7 milyon dollar əldə edib.
Ekspert vurğulayıb ki, son illər hərracda İslam əsərləri və irs nümunələrinə tələbat xeyli artıb. Kolleksiyaçılar onların nadir olmasına xüsusi əhəmiyyət verirlər. Ən çox tələbat isə Qurani-Kərimin müxtəlif əsrlərdə xəttatlar tərəfindən yazılmış nümunələrinədir. Hətta bu nümunələr 2-3 milyon dollara kimi qiymət alır.
“Ədəbiyyat və incəsənət”
(02.05.2023)
Ötən il Azərbaycana 230 min ərəb gəlib
“Ədəbiyyat və incəsənət” Açıq portfeldə növbəti məlumatı Dövlət Turizm Agentliyinə istinadən bildirilib.
2022-ci ildə Körfəz ölkələrindən Azərbaycana gələnlərin sayında Birləşmiş Ərəb Əmirlikləri (BƏƏ) ikinci pillədə qərarlaşıb.
“Ötən il Yaxın Şərq ölkələrindən Azərbaycana 228 min 294 xarici vətəndaş səfər edib ki, bunun da 18 faizi BƏƏ vətəndaşları təşkil edib”, -deyə məlumatda qeyd olunub.
“Ədəbiyyat və incəsənət”
(02.05.2023)
Mədəniyyət Nazirliyinin nümayəndələri ADMİU-da kadr hazırlığı prosesi ilə tanış olublar
Mədəniyyət naziri Adil Kərimli və nazirlik əməkdaşları Azərbaycan Dövlət Mədəniyyət və İncəsənət Universitetində (ADMİU) olublar.
“Ədəbiyyat və incəsənət” portalı Mədəniyyət Nazirliyinə istinadən xəbər verir ki, ADMİU-nun rektoru professor Ceyran Mahmudova qonaqları salamlayaraq
2023-cü ilin 100 illik yubileyini qeyd edən universitet üçün əlamətdar olduğunu vurğulayıb. Sonra rektor naziri son illərdə ali məktəbin fəaliyyətindəki yeniliklərlə tanış edib.
Nazir Teatr sənəti, Rəssamlıq fakültələri və Audiovizual sənətlər fakültəsinin studiyası ilə tanış olub, dekanlarla görüşərək fikir mübadiləsi aparıb.
Daha sonra qonaqlar ADMİU-nun SABAH qrupları tələbələrinin ifasında Əməkdar artist Nofəl Vəliyevin quruluşunda Bertolt Brextin "Teresa Karranın tüfəngləri" tamaşasını izləyiblər.
“Ədəbiyyat və incəsənət”
(02.05.2023)
“Heydər Əliyev irsi” mövzusunda ümumrespublika konfransı keçirilib
Mayın 1-də Azərbaycan Respublikası Mədəniyyət Nazirliyi və Heydər Əliyev Mərkəzinin birgə təşkilatçılığı ilə Gəncədə “Heydər Əliyev irsi” mövzusunda rayon-şəhər Heydər Əliyev mərkəzlərinin ümumrespublika konfransı keçirilib.
“Ədəbiyyat və incəsənət” portalı Mədəniyyət Nazirliyinə istinadən xəbər verir ki,
Gəncə şəhərindəki Heydər Əliyev Mərkəzində gerçəkləşən konfrans Ulu öndərin 100 illik yubileyinə həsr olunub.
Tədbirdə Mədəniyyət Nazirliyinin rəhbərliyi, paytaxtdakı Heydər Əliyev Mərkəzinin məsul şəxsləri, respublikanın rayon və şəhərlərinin Heydər Əliyev mərkəzlərinin rəhbərləri, alim və mütəxəssislər, ali məktəblərin tələbələri iştirak ediblər.
Öncə Gəncə şəhərindəki Heydər Əliyev Mərkəzinin qarşısında Ümummilli liderin abidəsi ziyarət edilərək önünə gül dəstələri qoyulub.
Konfrans Ulu öndər Heydər Əliyevin həyat və fəaliyyətinə dair videoçarxın nümayişi ilə başlayıb.
Azərbaycan Respublikasının mədəniyyət nazirinin müavini Səadət Yusifova açılış nitqi söyləyib.
Azərbaycan Dövlət Mədəniyyət və İncəsənət Universitetinin prorektoru Sədaqət Əliyeva, Heydər Əliyev Mərkəzinin departament rəhbəri Zafiq Xəlilov, Bakı Dövlət Universiteti Tarix fakültəsi Qafqaz xalqları tarixi kafedrasının müdiri İradə Hüseynova çıxış ediblər.
Konfransda daha sonra Lənkəran şəhər, Xaçmaz rayon, Şirvan şəhər, Yevlax şəhər və Gəncə şəhər Heydər Əliyev mərkəzləri direktorlarının mövzu ilə bağlı məruzələri dinlənilib.
Çıxış və məruzələr ətrafında müzakirələr aparılıb, Heydər Əliyev mərkəzlərinin fəaliyyəti ilə bağlı metodiki tövsiyələr verilib.
“Ədəbiyyat və incəsənət”
(02.05.2023)
Mədəniyyət naziri kino ocaqlarına baş çəkib
Ötən günü mədəniyyət naziri Adil Kərimlinin kino ocaqlarına baş çəkməsi günü adlandıra bilərik. “Ədəbiyyat və incəsənət” portalı Mədəniyyət Nazirliyinə istinadən bu missiyanı işıqlandıracaq.
ÖNCƏ “AZƏRBAYCANFİLMƏ”
Öncə nazir Cəfər Cabbarlı adına “Azərbaycanfilm” kinostudiyasını ziyarət edib. Kinostudiyanın səs, geyim-rekvizit, pirotexnika, texniki avadanlıqlar, çəkiliş pavilyonları və digər bölmələr ilə yaxından tanış olan nazir əməkdaşlarla fikir mübadiləsi apararaq, sahənin inkişaf etməsi üçün atılacaq addımlardan danışıb.
Kinostudiyanın direktoru Nazim Hüseynov naziri ərazi və inzibati binalardakı şəraitlə tanış edib. Eldar Quliyev, Həsən Seyidbəyli, Hüseyn Seyidzadə, Tofiq Tağızadə və digər görkəmli kino sənətkarlarının kinostuduyadakı iş otaqlarının mühafizə olunması gənc kinematoqrafçılar üçün mənəvi stimul kimi də dəyərləndirilib.
Kino mühitinin inkişafı üçün atılacaq addımlardan biri də 100 illik kino məbədinin dövrün rəqabətə davamlı kino təşkilatlarından birinə çevrilməsinin labüdlüyü vurğulanıb. Bütün bölmələrin müasir standartlarda texniki təminatı üçün dövlət və özəl sektor tərəfindən sərmayə qoyulması ətrafında müzakirələr aparılıb. Digər kino qurumlarının "Azərbaycanfilm"in təcrübəsinə çatmağı üçün əməkdaşlığın vacibliyi qeyd olunub.
Nazir ərazidə yerləşən Dövlət Film Fondu ilə də yaxından tanış olub.
SONRA DÖVLƏT FİLM FONDUNA
Daha sonra nazir Dövlət Film Fonduna baş çəkib. Fondun direktoru, Əməkdar incəsənət xadimi Cəmil Quliyev öncə naziri ümumi ərazi ilə tanış edib. Bildirib ki, Dövlət Film Fondu ümummilli lider Heydər Əliyevin təşəbbüsü ilə Azərbaycan Nazirlər Kabinetinin 22 dekabr 1993-cü il tarixli sərəncamına əsasən yaradılmışdır. Azərbaycan Respublikasının Prezidenti İlham Əliyevin imzaladığı “Azərbaycan kinosunun 2008-2018-ci illər üzrə inkişafına dair Dövlət Proqramı”na uyğun olaraq, 2008-ci ildə Dövlət Film Fondu üçün yeni bina istifadəyə verilib.
Mədəniyyət naziri Adil Kərimli ümumi sahəsi təxminən 6,6 min kvadrat metr olan Azərbaycan Dövlət Film Fondunun texniki avadanlıqlarla təchiz edilmiş inzibati otaqlar, laboratoriya, tamaşa salonu, yardımçı otaqlarla, həmçinin Fondda filmlərin saxlanılma və bərpa şəraiti, filmlərin saxlanma boksları, lentlərin bərpa avadanlıqları və digər texniki imkanları ilə tanış olub.
Nazirə Film Fondunun nəzdində fəaliyyət göstərən Kino Muzeyinin eksponatları haqqında geniş məlumat verilib, diqqətinə çatdırılib ki, hər il Film Fondunda Azərbaycan kino xadimlərinin xatirələrinə həsr olunmuş tədbirlər, yubiley və xatirə gecələri təşkil olunur, şəxsi arxiv fondları yaradılır və hazırda Fondda qorunan ümumi saxlanma vahidlərinin sayı 80.000-i ötüb.
Sonra mədəniyyət naziri Film Fondunun hazırkı dövrdə qarşılaşdığı problemlərlə maraqlanıb və qurumun gələcəkdə də dövlət qayğısı ilə əhatə olunacağını xüsusi vurğulayıb.
Düşünürük ki, Adil Kərimlinin bu səfərləri kino sənayemiz üçün faydalı və düşərli olacaq.
“Ədəbiyyat və incəsənət”
(02.05.2023)
TÜRKSOY Budapeştdə “Türk dünyasının muzeyləri” adlı panel təşkil edib
Macarıstanın paytaxtı Budapeşt şəhərində TÜRKSOY-un baş katibliyi tərəfindən “Türk dünyasının muzeyləri” adlı panel keçirilib.
AzərTAC xəbər verir ki, məşhur macar etnoqrafı, türk xalqları və şamanizm haqqında tədqiqatlar aparmış Dioszegi Vilmosun 100 illiyinə həsr olunmuş panelə türk dünyasının qabaqcıl muzeylərinin rəhbərləri və aparıcı mütəxəssisləri dəvət olunub. TÜRKSOY Muzeylər Birliyi, Türk Dövlətləri Təşkilatının Avropa ofisi və Macarıstan Etnoqrafiya Muzeyi ilə iş birliyi çərçivəsində reallaşan toplantıda Azərbaycan Milli Xalça Muzeyinin direktoru Şirin Məlikova da iştirak edib. O, TÜRKSOY Muzeylər Birliyinin dönəm rəhbəri kimi tədbirdə açılış nitqi ilə çıxış edib. Türk dövlətlərinin muzeyləri arasında qarşılıqlı əlaqələrin genişləndirilməsi istiqamətində artıq ənənə halını almış bu toplantıların önəmini vurğulayıb. Macarıstanla türk dünyası arasında tarixən mövcud olan və müasir dövrdə getdikcə güclənən qarşılıqlı mədəni əlaqələrdən bəhs edib.
Sonra toplantı panel sessiyalarla öz işini davam etdirib. Birinci sessiyada Şirin Məlikova “Muzey və ziyarətçi: Əməkdaşlıq üfüqləri” adlı geniş məruzəni iştirakçıların diqqətinə çatdırıb. Məruzədə Azərbaycan Milli Xalça Muzeyinin ziyarətçilərlə müasir tələblərə uyğun qurulmuş iş prinsiplərindən, tamaşaçılarda qədim milli irsə maraq yaradılması istiqamətində həyata keçirilən çoxsaylı mədəni, təhsil layihələrindən və bu aspektdə digər mühüm məsələlərdən bəhs olunub. Məruzə sessiya iştirakçıları tərəfindən maraqla qarşılanıb və müzakirələr zamanı Şirin Məlikova ona ünvanlanan sualları cavablandırıb.
Panelə qatılan Türkiyə, Macarıstan, Qazaxıstan, Qırğızıstan, Özbəkistan və s. ölkələrin nümayəndələri muzey sferasını və etnoqrafik tədqiqatları əhatə edən digər maraq doğuran məruzələrlə çıxış ediblər.
“Ədəbiyyat və incəsənət”
(01.05.2023)
