Super User
Sabahkı istinin maksimumu 36 dərəcə olacaq
Ekologiya və Təbii Sərvətlər Nazirliyinin Milli Hidrometeorologiya Xidmətindən verilən məlumata görə, Bakıda və Abşeron yarımadasında havanın dəyişkən buludlu olacağı, gündüz havanın arabir tutulacağı, əsasən yağmursuz keçəcəyi gözlənilir.
Mülayim cənub-şərq küləyi əsəcək. Havanın temperaturu gecə 21-26°, gündüz 31-36° isti olacaq. Atmosfer təzyiqi normadan aşağı - 757 millimetr civə sütunu, nisbi rütubət gecə 65-75, gündüz 45-55 faiz təşkil edəcək.
Abşeron çimərliklərində cənub-şərq küləyi əsəcək. Dəniz suyunun temperaturu şimal çimərliklərində - Sumqayıt, Novxanı, Pirşağı, Nardaran, Bilgəh, Zuğulbada 25-26° isti, cənub çimərliklərində - Türkan, Hövsan, Sahil, Şıxda 27-28° isti olacaq.
Naxçıvan şəhərində, Culfa, Ordubad, Sədərək, Şahbuz və Şərur rayonlarında hava əsasən yağmursuz keçəcək. Lakin günün ikinci yarısında yüksək dağlıq ərazilərdə qısamüddətli yağış yağacağı, şimşək çaxacağı ehtimalı var. Şərq küləyi əsəcək. Havanın temperaturu gecə 18-23°, gündüz 31-36° isti olacaq.
Xankəndi şəhərində, Şuşa, Xocalı, Xocavənd, Ağdam, Daşkəsən, Gədəbəy rayonlarında hava əsasən yağmursuz keçəcək. Lakin gecə və axşam Daşkəsən-Gədəbəy zonasının bəzi yerlərində qısamüddətli leysan xarakterli yağış yağacağı, şimşək çaxacağı, dolu düşəcəyi ehtimalı var. Gecə və səhər bəzi rayonlarda duman olacaq. Şərq küləyi əsəcək. Havanın temperaturunun gecə 11-16°, gündüz 23-28° isti olacağı ehtimal edilir.
Şərqi Zəngəzur: Cəbrayıl, Kəlbəcər, Qubadlı, Laçın, Zəngilan rayonlarında hava əsasən yağmursuz keçəcək. Lakin gündüz yüksək dağlıq ərazilərdə qısamüddətli leysan xarakterli yağış yağacağı, şimşək çaxacağı, dolu düşəcəyi ehtimalı var. Gecə və səhər bəzi rayonlarda duman olacaq. Şərq küləyi əsəcək. Havanın temperaturunun gecə 11-16°, gündüz 15-20°, bəzi yerlərdə 25-30° isti olacağı ehtimalı var.
Gəncə şəhərində, Qazax, Goranboy, Tərtər, Füzuli rayonlarında hava əsasən yağmursuz keçəcək. Lakin gecə və səhər bəzi yerlərdə qısamüddətli leysan xarakterli yağış yağacağı, şimşək çaxacağı, dolu düşəcəyi ehtimalı var. Gecə və səhər bəzi rayonlarda duman olacaq. Şərq küləyi əsəcək. Havanın temperaturunun gecə 18-23°, gündüz 30-35° isti olacağı gözlənilir.
Mingəçevir şəhərində, Balakən, Zaqatala, Qax, Şəki, Oğuz, Qəbələ, İsmayıllı, Ağsu, Ağdaş, Göyçay, Şamaxı, Siyəzən, Şabran, Xızı, Quba, Xaçmaz, Qusar rayonlarında hava əsasən yağmursuz keçəcək. Lakin bəzi dağlıq ərazilərdə arabir yağış yağacağı, şimşək çaxacağı gözlənilir. Ayrı-ayrı yerlərdə leysan xarakterli olacağı, dolu düşəcəyi ehtimalı var. Gecə və səhər bəzi rayonlarda duman olacaq. Şərq küləyi əsəcək. Havanın temperaturunun gecə 16-21°, gündüz 28-33° isti, dağlarda gecə 10-15°, gündüz 20-25° isti olacağı proqnozlaşdırılır.
Şirvan şəhərində, Yevlax, Ağdaş, Kürdəmir, İmişli, Ağcabədi, Beyləqan, Sabirabad, Saatlı, Hacıqabul, Zərdab, Salyan, Neftçala rayonlarında hava əsasən yağmursuz keçəcək. Şərq küləyi əsəcək. Havanın temperaturunun gecə 20-25°, gündüz 32-37° isti olacağı bildirilir.
Masallı, Yardımlı, Lerik, Lənkəran, Astara, Biləsuvar, Cəlilabad rayonlarında hava əsasən yağmursuz keçəcək. Gecə və səhər bəzi rayonlarda duman olacaq. Şərq küləyi əsəcək. Havanın temperaturu gecə 18-23°, gündüz 30-35° isti, dağlarda gecə 18-20°, gündüz 22-27° isti olacaq.
“Ədəbiyyat və incəsənət”
(21.08.2023)
“Tor 5” filminin hazırlıqlarına başlanılıb
Rejissor Taika Vaititinin ekranlaşdıracağı “Tor 5” filminin hazırlıqlarına başlanıb.
AzərTAC xarici KİV-ə istinadən xəbər verir ki, rejissor hələlik bu layihədə iştirak etmək üçün müqavilə imzalamayıb.
Ekran əsərində baş rolda çəkiləcək avstraliyalı aktyor Chris Hemsworth “Entertainment Weekly” jurnalına verdiyi müsahibəsində növbəti hissədə personajının taleyinin necə olacağı barədə heç bir fikri söyləməyib.
Qeyd edək ki, 2022-ci ildə ekranlara çıxan “Tor 4: Sevgi və İldırım ” filmi 760 milyon dollardan çox gəlir əldə edib.
“Ədəbiyyat və incəsənət”
(21.08.2023)
“İçərişəhərin həyatı” adlı foto müsabiqəyə start verilib
“İçərişəhər” Dövlət Tarix-Memarlıq Qoruğu İdarəsi və Azərbaycan Fotoqrafları Birliyinin birgə təşkilatçılığı ilə Dünya Fotoqrafiya Günü münasibətilə foto müsabiqəyə start verilib.
"Report" xəbər verir ki, iştirakçılar fotoqraf və mobilqraf olmaqla 2 kateqoriya üzrə müsabiqəyə qatıla bilərlər.
“İçərişəhərin həyatı” mövzusuna uyğun olaraq 2 ədəd fotoşəkil 10 sentyabr 2023-cü il saat 18:00 qədər qeydiyyat anketi ilə birgə Bu email ünvanı spambotlardan qorunur. Onu görmək üçün JavaScripti qoşmaq lazımdır. . ünvanına göndərilməlidir.
Şərtlər və qaydalar haqda əlavə məlumatı https://icherisheher.gov.az/az/news/584 saytından əldə etmək olar.
Müsabiqə ilə bağlı əlavə sualları İçərişəhər Qoruq İdarəsinin sosial media kanallarından ünvanlamaq olar.
“Ədəbiyyat və incəsənət”
(21.08.2023)
Filarmoniyada maestro Niyazinin xatirəsinə həsr edilmiş konsert təşkil olunub
M.Maqomayev adına Azərbaycan Dövlət Akademik Filarmoniyasında SSRİ Xalq artisti, görkəmli dirijor və bəstəkar maestro Niyazinin anadan olmasının 111 illiyinə həsr olunmuş konsert proqramı təqdim edilib.
Sözügedən konsertdə bədii rəhbər və baş dirijor, Əməkdar artist Fuad İbrahimovun rəhbərliyi ilə Ü. Hacıbəyli adına Azərbaycan Dövlət Simfonik Orkestri çıxış edib.
Konsert çərçivəsində Konsert valsı və “Rast” simfonik muğamı səsləndirilib. Solistlər Fatimə Cəfərzadə (soprano) və Gülnar Qüdrətli (xanəndə) orkestrin müşayiəti altında dinləyicilərə bəstəkarın “Arzu” romansı və “Qaragilə” xalq mahnısını təqdim ediblər. Xatırladaq ki, bu mahnının işlənməsi Niyaziyə məxsusdur.
“Ədəbiyyat və incəsənət”
(21.08.2023)
Ustad xanəndə Xan Şuşinskinin məzarı ziyarət olunub
Mədəniyyət Nazirliyinin təşkilatçılığı ilə az öncə Azərbaycan muğam sənətinin böyük ustadı, Xalq artisti Xan Şuşinskinin anadan olmasının 122-ci ildönümündə İkinci Fəxri xiyabanda məzarı ziyarət olunub.
“Ədəbiyyat və incəsənət” portalı xəbər verir ki, Mədəniyyət Nazirliyinin nümayəndələri və incəsənət xadimləri sənətkarın məzarı üstünə güllər düzüb, xatirəsini yad ediblər.
Mədəniyyət nazirinin müşaviri Cahangir Səlimxanov, Beynəlxalq Muğam Mərkəzinin direktoru, Əməkdar artist Sahib Paşazadə çıxış edərək, Xan Şuşinskinin musiqi mədəniyyətimizdə, muğam sənətinin inkişafında xidmətlərindən danışıblar. Qeyd olunub ki, ustad xanəndə muğamlarımızın bənzərsiz ifaçısı olmaqla yanaşı, “Şuşanın dağları”, “Məndən gen gəzmə”, “Ay gözəl” kimi dillər əzbəri olan mahnı və təsniflər bəstələyib.
Muğam ustadı İslam Abdullayevin tələbəsi olan İsfəndiyar Cavanşirov “Xan Şuşinski” adını təsadüfən qazanmayıb. Hər kəs anadan olanda ona ad verilir və nadir insanlar olur ki, onlar həyatda ad qazanırlar. Xan Şuşinski hələ gənc yaşlarından ecazkar səsi, ifası ilə muğam sənətinin Xanı olduğunu sübuta yetirmişdi. O həm də bu adı böyük şərəflə Şuşa şəhərinin əsasını qoyan Pənahəli xanın kötücəsi olaraq daşıyırdı. 16 yaşında olarkən ustadı İslam Abdullayevlə birgə iştirak etdiyi məclisdə “Kürd-Şahnaz” muğamını heyrətamiz bir tərzdə ifa etdiyinə görə müəllimi ona “Xan Şuşinski” adını verib.
Xanəndənin ailəsi adından çıxış edən oğlu Aslan Cavanşirov və qızı Bəyimxanım Verdiyeva anım tədbirinə qatılan hər kəsə təşəkkür edərək, atalarının doğma yurdu Şuşanın azad olunmasına görə Prezident, Ali Baş Komandan İlham Əliyevə və ölkəmizdə muğam sənətinin inkişafına diqqət və qayğısına görə Birinci vitse-prezident, Heydər Əliyev Fondunun prezidenti Mehriban xanım Əliyevaya minnətdarlıqlarını bildiriblər.
Qeyd edək ki, Xan Şuşinski müstəsna istedadı, geniş diapazonlu, gur və məlahətli səsi, yüksək ifaçılıq mədəniyyəti sayəsində hələ gənclik illərində şöhrət qazanıb, Azərbaycan muğam ifaçılığı sənətini zənginləşdirib. Eyni zamanda bir neçə muğama yeni xallar, guşə və şöbələr əlavə edib. 1924-cü ildən keçmiş SSRİ-nin bir çox şəhərlərində uğurla çıxış etməklə, muğam sənətini ayrı-ayrı xalqların nümayəndələrinə sevdirib, musiqimizin təbliğində özünəməxsus xidmətlər göstərib. Vaxtilə onun böyük məharətlə ifa etdiyi “Qarabağ şikəstəsi”, “Bayatı-Şiraz”, “Mahur”, “Mirzə Hüseyn segahı”, “Şahnaz”, “Şur”, “Çahargah” və “Heyratı” muğamları, bir sıra təsniflər, “Qara qaşın vəsməsi”, “Apardı sellər Saranı”, “Girdim yarın bağçasına” xalq mahnıları, milli musiqi mədəniyyətimizdə xüsusi yer tutan bu gözəl sənət nümunələrini dinləyicilərin yaddaşına əbədi həkk etdirib.
Xan Şuşinskinin müəllifi olduğu “Qəmərim”, “Şuşanın dağları”, “Ay gözəl” mahnıları da dillər əzbərinə çevrilib. O, bəstəkar mahnılarına da müraciət edib, Üzeyir Hacıbəylinin "Qara göz" mahnısının ilk ifaçısı olub.
Ustad sənətçinin gənc xanəndələrin yetişdirilməsində də əməyi var. Milli muğam ifaçılığı məktəbinin yüksək ənənələri əsasında məktəb yaratmış görkəmli xanəndə bütün səy və bacarığını istedadlı ifaçıların yeni nəslinin inkişafına sərf edib.
Xan Şuşinski 1979-cu il martın 18-də vəfat edib və Fəxri xiyabanda dəfn olunub.
“Ədəbiyyat və incəsənət”
(21.08.2023)
Sitrusda balıq steyki
Aysel Qarayeva, “Ədəbiyyat və incəsənət”
Əziz izləyicilərim. Yay, deyilənə görə, balıq mövsümü deyil. İşaqlıqdan eşitmişik ki, hansı ayda r hərfi yoxdusa o ay balıq yeyilməz. Amma gəlin biz mövhumata inanmayaq və dünya ilə birgə addımlayaq, may-avqust dövrünü - düz dörd ayı özümüzü balıq yeməkdən məhrum etməyək. Ən azı ləziz təamdan və vitamindən vaz keçməyək.
Bu gün sizə sitrusda - portağal və limon şirəsində bişən balıq steykinin reseptini təqdim edir.
Lazım olan ərzaq:
* 1 böyük dilim salmon balığı
* 1 ədəd portağal
* 1 ədəd limon
* 1 diş sarımsaq
* duz, istiot
* qızartmaq üçün kərə yağı
Hazırlanma qaydası:
İlk öncə balığa duz və istiot səpin. Portağal və limonu yaxşıca yuyub qabığını rəndədən keçirin. Daha sonra portağalın suyunu bir stəkana sıxın, limonun suyunu da başqa bir stəkana sıxıb kənara qoyun. Tavada kərə yağını əridin. Balığı tavaya qoyub qızardın. Tavada olan balıq filesinin üzərindən bıçaqla kəsiklər atın. Sarımsağı da xırda doğrayın. Rəndələnmiş limon, portağal qabığı və sarımsağı tavadaki yağa əlavə edin. Balığın bir tərəfi qızardıqda digər tərəfinin qızarması üçün çevirin. Sıxdığınız limon və portağal suyunu da tavaya əlavə edib balığı bişirin. Arabir qaşıqla tavadaki sousdan götürüb balığın üzərinə gəzdirin. Balıq bişib suyu azaldıqda boşqaba qoyub, şirəli sousunu da üzərinə tökün və süfrəyə verin.
Nuş olsun!
“Ədəbiyyat və incəsənət”
(21.09.2023)
Azərbaycanlı rəqəmsal rəssam haqqında Səudiyyə mətbuatında məqalə dərc olunub
Azərbaycanlı rəqəmsal rəssam Asya Hacızadə haqqında Səudiyyə Ərəbistanı Krallığının mətbuatında məqalə dərc olunub.
“Report” xəbər verir ki, məqalə "Əl-Hədəs" xəbər saytında yayımlanıb.
Məqalədə bildirilib ki, A.Hacızadə müasir digital incəsənətin nəhəng dünyasında yaradıcı özünüifadə üçün öz şəxsi yolunu tapıb və onun üçün fırça və kətan rolunda mobil telefon çıxış edir.
Rəssam orijinal, bəzən qeyri-standart kompozisiya həlli ilə fantastik süjetlər yaradaraq öz dərin mənəvi dünyasını mobil telefonun ekranına köçürür, rəsmi öz müsbət enerjisi və düşüncələri ilə doldurur. Onun üçün mobil telefon sərhədsiz yaradıcılıq imkanları üçün universal alətdir. Çünki rəqəmsal incəsənət ənənəvi yaradıcılığın və digital texnologiyaların hüdudsuz texniki imkanlarının simbiozudur. Bir sıra sənətşünasların fikrincə, onun əsərlərinə təkcə virtuoz bədii ifa deyil, həm də dərin fəlsəfi məzmun xasdır.
A.Hacızadə Azərbaycanda rəqəmsal incəsənətin inkişafına və geniş yayılmasına, həmçinin ölkə hüdudlarından kənarda tanınmasında öz töhfəsini verir. O, azərbaycanlı rəssam kimi öz yaradıcılığını bir sıra virtual incəsənət meydançalarında (in.gallerix.ru, pinterest.com, artchive.ru, gallereo.ru və s.) təqdim edir və onun işləri böyük maraqla qarşılanır. Bu gün məşhur incəsənət klubu “Qalleriks” reytinqində 40 000-dən çox qeydiyyatda olan rəssamın arasında 50-ci yeri tutur.
Məqalədə qeyd edilib ki, rəqəmsal incəsənətə maraq onun üçün əsas yaradıcılıq janrına çevrilib. Müasir texnologiyaların və yaradıcı özünüreallaşdırma üçün yeni alətlərin inkişafı ona bir növ təkrarolunmaz rəsmlər yaratmağa imkan verib, bu rəsmlər heç kəsi laqeyd qoymur və uzun müddət onlara baxmağa, rəssamın niyyətini anlamağa, bu və ya digər sujetin nəyi nəzərdə tutduğunu tapmağa məcbur edir. Onun rəsmlərinin adları isə ayrı bir mövzudur, onlar tamaşaçını rəssamın özü tərəfindən müəyyən edilmiş axara kökləyir. Məsələn, “Sonun əvvəli”, “Cəhənnəmə aparan qırmızı xalı”, “Sən olduqca zaman vardır”, “Hər şey müvəqqətidir”, “Qapalı məkanda idilliya”, “Leylanın qara gözləri”, “Quş hüquqları”, “Ulduzlar pilləkan olsaydı”, “Gedim biraz aglayım” və s.
Asya Hacızadənin rəqəmsal əsərlərində əfsanələr və reallıq əlaqəlidir, onun süjetləri şüuraltını illüstrasiya edir, ən məntiqli şəkildə olmasa da, maraqlı və gözlənilməz tərzdə anlaşılmazı nümayiş etdirir. Onlar sadədir və eyni zamanda dərin və səmimidir. Anadangəlmə rəssamlıq duyğusu ona harmonik palitranı təlqin edir, bu da onun əsərlərinə yüngüllük hissi və kompozisiya mükəmməlliyi bəxş edir.
Rəssamın rəqəmsal əsərlərini şərti olaraq bir neçə tematikaya bölmək olar: bu rəssamın dünyasına baxışı əks etdirən çiçəklər və peyzajlar, səmalarda mövcud olan müxtəlif quşlar, mələklər, xeyir və şər, insan duyğuları, sonsuzluq və “fantazi” ilə həmsərhəd olan mücərrəd rəsmlər. A.Hacızadə sadəcə sərbəst yaradıcılıqda pərvazlanır. O, izləyicini həyat və ölüm barədə, sonsuzluq, vaxt və məkan barədə düşünməyə vadar edir. Onun həm yağlı boyalı, həm qrafika, həm rəqəmsal işlərində təbiətə, milli xarakter və mədəniyyət mənbələrinə olan sevgi hopub, bu əsərlərdə ideal haqqında arzu asanlıqla təxmin edilir. Təkrarlanmayan əsərlər yaratmağa üstünlük verən Asyanın rəsmləri əbədi çiçəkləyən simfoniyadır, burada boyaların zənginliyi təxəyyülü həyəcanlandırır və daim bahar hökm sürür.
Məqalədə bildirilib ki, Azərbaycanın Əməkdar jurnalisti olan A.Hacızadənın planlarında nail olduğunda dayanmamaq, öz sənətkarlığını inkişaf etdirib təkmilləşdirmək, ölkəmizin rəqəmsal sənət sahəsindəki uğurlarını geniş yaymaq var.
“Ədəbiyyat və incəsənət”
(21.08.2023)
“Təbiətin zədələnməsi, canlıların ölümü, atmosferin çirklənməsi bəşəriyyətin məhvidir”
Lalə Həsəncan, “Ədəbiyyat və incəsənət”
İnsan sağlamlığına mənfi təsir göstərən amillərdən biri iqlim dəyişməsidir. Təbii fəlakətlər, istilik dalğaları, dəyişkən hava şəraiti minlərlə insan həyatını məhv edir. Bəşəriyyət üçün ən böyük fəlakətlər isə qlobal istiləşmə və amansız müharibələrdir.
Bəlli olduğu kimi təbii fəlakətlər: sunami, zəlzələ, vulkan, meşə yanğınları və s... nə qədər də zədələyici təsir göstərsə belə amansız müharibələrin açdığı qorxuducu təsirlər bəşəriyyətin duyğularında daha dərin iz salır. Əsl fəlakət insan ümidlərinin sarsılmasıdır. Bu zaman yaşadığımız ağır yaralar çarəsizliyə, ümidsizliyə səbəb olur. Hər bir travmanın gətirdiyi faciə ruh düşkünlüyü yaradır. Ruh düşkünlüyü isə sevincimizi, gücümüzü, sağlamlığımızı bizdən alır.
Bütün bunlarla yanaşı dünyanı qucaqalayan pandemiya sarsıntısı da var. Dünyanı ağuşuna alan bu bəla nəinki insan sağlamlığına, hətta iqtisadi itkilərə də səbəb oldu. Sözsüz ki, dünyada dərin böhran yaradan pandemiya dövründə karantin rejiminin tədbiq olunması tənəzzülə uğrayan bir çox ölkələrdə iqtisadiyyatın dirçəlməsi üçün uzun zaman alacaq. Pandemiyanın təhsil, səhiyyə, sosial rifah, iqtisadiyyat və mədəniyyət zəminində göstərdiyi mənfi təsirləri nəzərə alsaq, həyat fəaliyyətinin çətin sınağı insanların nə qədər mubariz olduğunu göstərir.
2019-cu ildə gündəmə gələn, “COVİD-19 “ adı ilə tanınan koronavirus infeksiyası insanlarda psixoloji gərginliyin artmasına səbəb oldu. Sərt karantin rejimi, virusun kütləvi yayılması, ölüm hallarının artması, işsizlik, bahalaşma, tədbiq olunan bəzi məhdudiyyətlər, nəfəs almağı çətinləşdirən qoruyucu maskalar və s... insanların şəxsi mənafeyinə vurulan ağır zərbə idi.
Qayıdaq müharibələrə. Son illərdə dünyanın bir çox ölkələrini ağuşuna alan amansız müharibələr insan həyatının ən ağır və ən dəhşətli sınaq hadısəsi olmaqdadır, hansı ki, bir insan üçün qəm, kədər və göz yaşından başqqa bir şey deyildir. Aclıq, səfalət və acılar nə qədər faciəvi olsa da bir insan şüurunda, təfəkküründə, düşüncəsində cəmlənən qürur obyekti azadlıq, qələbə uğrundakı savaşın mübariz daşıyıcısıdır. Təsadüfi deyil ki, indi dünya böyük bir müharibənin dirijorluğu ilə iki cəbhəyə bölünüb. Rusiyanın Ukraynaya qarşı başladığı işğalçı müharibə Rusiya və Ukrayna tərəfdarları arasındakı siyasi, iqtisadi qarşıdurmanı özündə ehtiva etməkdədir.
Məhz son illərdə dünyada baş verən təbii fəlakətlər də az deyildir. Bir çox ölkələrdə baş vermiş təbii fəlakətlər planetimizin sakinləri üçün təhlükəli hadisələrdən hesab olunur. Ən əsası da təhlükənin anidən baş verməsi, infrastrukturun məhv olmasıdır. Zəlzələ, sunami, vulkan püskürməsi, leysan yağışlar, torpaq sürüşməsi özünəməxsus dağıdıcı xüsusiyyətlər daşıyır. Elə təkcə on minlərlə insanın ölümünə və böyük dağıntılara səbəb olan Türkiyə zəlzələsini, yaxud bütün yaşayış məntəqələrinin yanıb külə dönməsi ilə nəticələnən Havay adasındakı təbii yanğınları misal gətirmək kifayət edər. Təbiətin zədələnməsi, canlıların ölümü, atmosferin çirklənməsi bəşəriyyətin məhvidir. Təbii ki, fırtına, daşqın, leysan yağışlar, dənizdə su səviyyəsinin artması, quraqlıq qlobal istiləşmənin nəticəsidir. Qlobal istiləşmə 20-ci – 21-ci əsrlərin qlobal problemidir.
Bu da sənaye və iqtisadi inkişafın infrastrukturuna böyük əks-təsir göstərir. Su qıtlığı yaradır. Bütün bunlar quraqlığa, infeksiyaya, insan sağlamlığının itirilməsinə, ishal və korluğa gətirib çıxardır. Susuzluqdan yanan taxıl sahələri fermerlərin narahatlığına səbəb olur. Çunki bitkilər də su istəyir. Sahələrdəki fəaliyyət artımı su ehtiyatından asılıdır. Uzun sürən quraqlıq, qlobal temperatur artımı, isti hava səbəbindən su ehtiyatının azalması bəşəriyyətin ciddi qida böhranı ilə üzləşəcəyindən xəbər verir. Əlbəttə, insanların sağlamlıq fəaliyyətinin vacib amillərindən biri də qida məhsulları ilə təmin olunmasıdır.
İnsanı sövq edən, dünyanı sarsan hər bir fəlakət insan həyatında çox şeyi dəyişdirir. Hər dəyişimdə isə insan bir daha yenilənir. Mənəvi maarifçilik, savadlılıq, tərbiyəvilik bir insan tərəfindən yaradılmış mənəvi-əxlaqi bir dəyərdir. Yaşadıqlarımız nə qədər ağır olsa da keçmiş itkilər gələcək ümidlərlə doludur. Ümid ruhumuzun kəşfi, bitmiş bir insanın yenidən canlanmasıdır. Nə qədər əzab-əziyyət, acı, gözyaşı yaşasaq da unutmamalıyıq ki, yalnız əzmi, ümidi ilə yaşayan insanlar yaşayar. Acı keçmiş, çətinlik, müsibət olsa da bir ruhun qidası ümiddir. Hər bir fırtına insanı böyük uğursuzluğa sövq edər, hər bir insan iradəsi, əzmi, vicdanıyla mübarizə aparar. Düşüncələr, əməllər, narahatlıqlar, biz insanları dəyişdirər. Bütün bunlara varan qətiyyətli insanlar üçün həyat davam edər, ümidlər canlanar və yaşam dolu həyat başlar.
70 ilə qədər yaşayan qartal 40 yaşında yaşamaq üçün həyatının çətin qərarını vermək məcburiyyətindədir. Dimdiyi uzanan, qanadları pırtlaşan, tükləri qartlaşan, pəncələri sərtləşən qartal bu məqamda ya ölümü seçər, ya da yenidən doğuluşun çətinliklərinə dözərək yaşayar.
İnsanlar da belədir. Keçmişimiz nə qədər ağrılı-acılı olsa da yenidən yaşamaq üçün
çətinlikləri unutmalı, gələcəyə davam etmək üçün mübarizə aparmalıyıq.
Keçmişin səninlədir, şaxtalı olsa belə.
Bu günün səninlədir, zəif olsan belə.
Gələcəyin səninlədir, çətin olsa belə.
Ən əsası da xoşbəxt olmağa çalışın ki, sevinciniz kədərinizə şərik olsun.
“Ədəbiyyat və incəsənət”
(21.08.2023)
Növbəti Putiniada lətifəsi
Sərtyel, “Ədəbiyyat və incəsənət”
Ruslar get-gedə Putin barədə daha çox lətifələr qoşurlar. Az qala bütün lətifə saytlarında Putin baş qəhrəmandır. Putin Lenin və Stalini çox geridə qoyub. Xalq yaradıcılığı çox zəngindir.
Anekdotı.ru saytının bu lətifəsi xaraktetikdir.
Əgər Putin bircə gün Rusiyaya prezidentlikdən əl götürsə, onu dərhal başqa ölkələr götürüb özlərinə prezident edərlər.
“Ədəbiyyat və incəsənət”
(21.08.2023)
Günün fotosu: Üçlərin görüşü xeyli məhsuldar keçdi
Günün fotosu: Üçlərin görüşü xeyli məhsuldar keçdi
ABŞ, Yaponiya və Cənubi Koreya liderlərinin ilk üçtərəfli görüşü cümə günü ABŞ prezidentinin yay kurortu olan Camp David-də başladı.
Prezident Bayden Yaponiya və Cənubi Koreyanı "cəsarətinə" görə təriflədi və Çini qınadı. Üçlük Şimali Koreyaya təzyiqi artıracağını və Rusiyaya qarşı sanksiyaları davam etdirəcəyini vəd etdi.
Foto: Reuters
“Ədəbiyyat və incəsənət”
(21.08.2023)
