Aygül Bağırova, “Ədəbiyyat və incəsənət” üçün

 

Bəzən bir insanın ömrü bir xalqa dayaq olur. Bəzən bir səs, minlərlə susan qəlbin içində ümidə çevrilir. Bəzən bir baxış – bir liderin baxışı – bütün bir millətin taleyini dəyişir. Heydər Əliyev belə bir insan idi. O, gələcək deyildi – o, sabahın özü idi. O sabahın təməlini bu gündə qoyan, sabahkı fırtınaya bu gündən sipər çəkən, sabah üçün bu gün yaşamış bir ömür idi.

 

O, təkcə dövlət qurmadı, o, xalqına inam, millətinə kimlik, vətəninə güc verdi. Onu sevmək üçün tarix kitabları vərəqləməyə, nitqlər əzbərləməyə ehtiyac yoxdur. Sadəcə azərbaycanlı olmaq yetərlidir. Çünki Heydər Əliyev bizim içimizdən doğulan, bizim ruhumuza çevrilən bir şəxsiyyət idi. O, millətinə yuxarıdan baxmadı – yanında durdu. Bizdən biri idi. Və xalq onu özündən biri kimi sevdiyi üçün, onun yoxluğu bu xalqın ruhunda dərin iz buraxdı.

Onun baxışlarında bir xalqın taleyi, nitqlərində bir millətin sabahı vardı. Səssizcə “mən sizə borcluyam” deyən gözləri bu gün muzey vitrinlərində yox, xalqın içində, yaddaşında, övladlarının baxışlarında yaşayır.

Heydər Əliyev dövlətin yalnız strukturunu deyil, ruhunu qurdu. Onun üçün vətən sadəcə torpaq deyildi – xatirə idi, əmanət idi, oğul idi. O, bir dağa baxanda o dağın ətəyindəki kəndi, bir bayraq ucalanda onun kölgəsindəki insanı düşünürdü. O, xalqı seyr etmədi – xalqı dinlədi, duydu, yaşadı. Siyasəti kəskin qərarlardan ibarət görmədi – siyasəti xalqın halına yön vermək, sabaha yol açmaq kimi anladı.

O, sükutda güc gördü. O, səbrin içində qələbə gördü. O, düşüncəni qorumağın ən ali vasitəsi bildi. Milləti tərpətdi, yaddaşı oyatdı, qüruru canlandırdı. O, bizi kimliyimizə qaytardı.

Heydər Əliyev bu xalq üçün təkcə bir keçmiş deyildi. O, bu xalqın sabahı idi. Və bu sabahlar onun oğlu, siyasi varisi, bu günkü Prezident İlham Əliyevin əzmkarlığı ilə yeni zirvələrə yüksəldi.

Prezident İlham Əliyev atasının qoyduğu mirasa sadəcə sadiq qalmadı – onu əməldə, konkret nəticələrlə yaşatdı. Heydər Əliyev 2003-cü ildə çıxışı zamanı deyirdi: “İlham Əliyev mənim siyasi kursumu layiqincə davam etdirəcəkdir.” Və bu gün xalq, tarix və zaman bu cümlənin nə qədər gerçək və uzaqgörən olduğunu sübut etdi.

Qarabağın azad olunması – təkcə torpaq məsələsi deyil, bu xalqın tarixi yaddaşına vurulmuş möhürdür. Bu zəfərin arxasında duran lider – İlham Əliyev – atasının vəsiyyətini yerinə yetirdi. Bu gün İlham Əliyevin dilindən səslənən “Atamın vəsiyyətini yerinə yetirdim” sözləri yalnız bir ailənin deyil, bütün Azərbaycan xalqının duyğularına çevrildi.

Bu gün – 10 may – sadəcə bir doğum günü deyil. Bu gün – bir millətin susaraq danışdığı, danışmayaraq xatırladığı bir gündür. Bu gün – xalqın “keçmişim, bu günüm və sabahım üçün sağ ol” dediyi, başını ehtiramla əyib sükuta büründüyü bir gündür.

Heydər Əliyev bizə gələcək vermədi – o, bizə güc verdi ki, gələcəyimizi özümüz quraq. Və biz bu gün sabaha onun yaratdığı təməllər üzərindən addımlayırıq.

O heç vaxt getmədi. O, sadəcə susdu. Amma susqunluğunda belə bizə yol göstərdi.

Çünki bəzən, bir millətin ümid yeri – bir insandır.

Bəzən, bir baxış – bir ölkənin yolunu dəyişir.

Bəzən, bir susqunluğun içində – tarix danışır.

Və bəzən – sadəcə bir ad, bir xalqı qorumağa davam edir.

Heydər Əliyev – bu xalqın ən böyük sükutu,

Və ən dərin səslə söylədiyi təşəkkürüdür.

 

“Ədəbiyyat və incəsənət”

(10.05.2025)

 

 

İnci Məmmədzadə, “Ədəbiyyat və incəsənət”

 

10 mayda daha kimlər dünyay gəlib? Təqvimi vərəqləyəndə gözümə bir ad sataşdı:

Ənvər Çingizoğlu! Kimdir bəs Ənvər Çingizoğlu? Publisist, jurnalist, araşdırmaçı, ssenarist…Kifatər qədər təqdirəlayiq fəaliiyəti olub bu şəxsin.

 

Ənvər Çingizoğlu 10 may 1962-ci ildə Cəbrayıl rayonunun Xudayarlı kəndində anadan olub. Əslən Füzuli rayonunun Araz Yağlıvənd kəndindəndir. 8-ci sinifə qədər Cəbrayıl rayonu Stansiya Xələfli kənd məktəbində, sonra Bakı şəhəri, Nərimanov rayonu 2 saylı Dəmir Yolu Litseyində Azərbaycan bölməsində təhsil alıb.

Rusiyanın Xabarovsk şəhərində hərbi xidmətdə olub. Bakı Dövlət Universitetinin jurnalistika fakültəsində oxuyub. 1991-ci ildən 1993-cü ilə qədər Füzuli rayonunda "Araz" qəzetində ədəbi işçi kimi çalışıb.

1994-cü ildən 2014-cü ilin mart ayınadək Azərbaycan Televiziyası Qapalı Səhmdar Cəmiyyətinin redaktoru, böyük redaktoru, şöbə müdiri vəzifələrində çalışıb. 2014-cü ilin mart ayından Azərbaycantelefilmin Baş redaktor müavinidir. O, həm də "Soy" dərgisinin baş redaktorudur. Folklor, etnoqrafiya, geneologiya sahələrində araşdırmalar aparır.

Azərbaycanın xanlıqlar dövrü tarixi, diplomatiya tarixi və İran tarixinə dair 100-dən çox monoqrafiya, kitab, dərs vəsaiti, elmi, elmi-publisistik məqalə, dövri mətbuatda dərc olunmuş müxtəlif xarakterli yazılar və s. nəşrlərin müəllifidir. Tarixçi mövqeyi onun ssenari müəllifi olduğu tarixi-sənədli filmlərdə də əks olunmuşdur. Onun yazdığı ssenarilər əsasında "Avşarlar", "Xurşidbanu Natəvan", "Nəvvab", "Kəminə" adlı televiziya filmləri çəkilib.

Mütəmadi olaraq Azərbaycanda və onun hüdudlarından kənarda keçirilən nufuzlu beynəlxalq konfrans və simpoziumların iştirakçısıdır və bir sıra beynəlxalq elmi məclislərdə məruzələr etmişdir. Jurnalistika ilə yanaşı məhsuldar elmi fəaliyyətlə məşğul olan alimlərdəndir. İndiyə qədər onun müxtəlif konfrans, simpozium və elmi məclislərdə, dərgilər, məcmuələr və qəzet səhifələrində 300-ə qədər müxtəlif məzmunlu məqalələri işıq üzü görmüşdür.

 

Kitabları 

1. Məhəmməd bəy Aşiqin şeirləri.

2. Rzaqulu bəy Vəzirovun əsərləri. 

3. Qarabağ 1918–1920-ci illərdə

4. Ağaməhəmməd xan Qacarın ölümünə qədər baş vermiş əsas hadisələrin qısa xülasəsi ilə tərcümeyi-halı.

5. Bayram xan Baharlı, Əsərləri

6. Aleksandr Sokolov, Gündəlik qeydlər

7. Pyotr Berje, A. P. Yermolovun İrana səfirliyi

8. Mahal Qacar-75

9. Məhəmməd Rəfi Ənsari, Dəstur ül-müluk.

10. Mirzə Rza xan Ərfə, Xatirat

11. Abbas Ramazani, Fətəli şah Qacar

 

Mükafatları 

1. Dövri mətbuatda uzun müddətli səmərəli fəaliyyətinə, aktual mövzularda yazdığı məqalələrə və qazandığı nailiyyətlərə görə ilin "Jurnalist-etnoqrafı" diplomuna layiq görülmüşdür.

2. Əməkdar mədəniyyət işçisi

 

“Ədəbiyyat və incəsənət”

(10.05.2025)

Şərəf Cəlilli,

Filologiya üzrə fəlsəfə doktoru. “Ədəbiyyat və incəsənət” üçün

 

Bütün ruhu, duyğuları, sevgiləri ilə Azərbaycan olan Ulu Öndər Heydər Əliyev mayın 10-da, Naxçıvanda – Nuhun çıxdığı torpaqda dünyaya gəldi. Gəlişi mənsub olduğu millətin, məmləkətin haqq səsinə döndü.

 

O, dünyaya gələndə Şərqin ilk Demokratik Cümhuriyyəti Qızıl Ordunun “Qırmızı Terroru”na 3 ildir ki, qurban getmişdi. “Bir kərə yüksələn Bayraq, bir daha enməz!” nidası ilə tarix yaradan, yoxdan bir dövlət qurub Bayraq yapan liderlərin əksəriyyəti ölümün, mühacirətin ağuşuna atılmışdı. Tanrı onu dünyaya ən qüdrətli Türklərdən, tərcümeyi-halı ilə tarix yaradan liderlərdən biri kimi dünyaya gətirmişdi. Milli dövlətçilik tariximizdə Nəriman Nərimanov talesizliyindən, Əziz Əliyev əyilməzliyindən sonra, Ulu Öndər Heydər Əliyev yeni bir qəhrəmanlıq dastanı yazacaq, birliyin-bütövlüyün rəmzinə dönüb, “Dövlət qalan, qalan hər şey yalan!” nidası ilə tarix yaradacaqdı.

Osman Qazinin Osmanlı İmperatorluğunu qurduğu ərəfədə Şeyx Ədəbalı iki tarixi kəlam işlətmişdi: “Dərdi qədər böyük adam” və “İstanbulu fəth edən komutan, nə mutlu komutan!” Ulu Öndər Heydər Əliyev Səfəvilər hökmdarı Şah İsmayıl Xətaidən, Nadir şah Əfşardan, Ağa Məhəmməd Şah Qacardan, Fətəli şah Qacarın daha doğrusu Qacarlar dövlətinin vəliəhdi Abbas Mirzə Qacardan, “Nərimanovçuluq” məfkurəsini Azərbaycançılıq məfkurəsinə çevirən Nəriman Nərimanovdan, İkinci Dünya Müharibəsində Stalin, Molotov, Jukov, Rokassovski kimi mümkün olmayanları dağlar diyarı Dağıstanda, Dəmirqapı Dərbənddə gerçəyə çevirən Əziz Əliyevdən sonra tək və yeganə liderimiz idi ki, çiynində zər paqonlar daşısa da, General rütbəsi ilə təhlükəsizlik orqanlarına rəhbərlik etsə də, bir milli liderə xas xüsusiyyətlərlə “Mümkün olmayanları mümkünə çevirdi”. Siyasi hakimiyyətinin birinci mərhələsində 1969-cu ildən 1982-ci ilə qədər Azərbaycanı inkişaf etmiş qüdrətli dövlətə çevirdi. Milli Ordu quruculuğu siyasəti yürütməklə, Ana dilini dövlət dili elan etməklə kifayətlənmədi, Azərbaycanın tarixi şəxsiyyətlərinin adlarının və xatirələrinin əbədiləşdirilməsi üçün əmr və fərmanlar imzaladı. Azərbaycanı qüdrətli kənd təsərrüfatı və sənaye ölkəsinə, elm, təhsil, mədəniyyət mərkəzinə çevirdi. Siyasi fəaliyyətinin Moskva dövründə isə, təkcə Azərbaycanın deyil MDB məkanına daxil olan respublikaların əsas qurucularından biri kimi tarix yaratdı. Baykal-Amor magistralı ilə əfsanəyə dönən Ulu Öndər Heydər Əliyev, Türküstan, Yaxın və Orta Şərq siyasəti ilə bir Türk, müsəlman kimi dünyaya sübut etdi. Nazarbayevin, Kunanbayevin müdafiəsi ilə Kolbinlərin üstünə yeriməklə cəsarətin, ləyaqətin nümunəsinə döndü.

1985-ci ilin Qorbaçov perestroykası, erməni daşnaklarının dəyirmanına su tökən Mərkəzi Komitənin Dağlıq Qarabağ və Azərbaycan məsələlərinə, 20 Yanvar dəhşətlərinə, ölümü gözə alaraq etiraz edən Ulu Öndər Heydər Əliyev Ümummili Liderə çevrildi.

Moskvadan dönüşü, siyasi fəaliyyətinin Naxçıvan dövrü ilə Ulu Öndər Heydər Əliyev Azərbaycan Bayrağını Dövlət rəmzinə çevirməklə kifayətlənmədi, “Ümid körpüsü”nü qurmaqla Qars bəyannaməsindən Şuşa bəyannaməsinə yol saldı. 1993-cü il iyunun 14-də Naxçıvandan Bakıya tarixi dönüşü, böyük qayıdışı ilə “Qurtuluşun Dastanı”nı yaratdı. Qardaş qırğınına, Vətəndaş müharibəsinə son qoyan Ulu Öndər “Atəşkəs müqaviləsi”ni imzalamaqla, mənsub olduğu millətin genefondunu qorudu. “Əsrin müqaviləsi” ilə ölkənin iqtisadi potensialını intellekt kapitalına çevirdi. Düz 10 il siyasi hakimiyyətinin növbəti mərhələsində Müasir Azərbaycanın Memarı kimi tarix yaratdı!

Ulu Öndər Vətən, xalq, millət, məmləkət qarşısında heç bir tarixi xidməti göstərməsəydi təkcə Müzəffər Ali Baş Komandan, Sərkərdə-Xaqan Prezident cənab İlham Əliyevin atası kimi dünyaya gəlsəydi belə, 30 illik intizardan, 300 illik nisgildən sonra Xudafərin körpüsündə Bayrağa dönən millət, onu sonsuz sayğı, ehtiramla yad edəcəkdi.

Azərbaycanın I vitse-prezidenti, Heydər Əliyev Fondunun prezidenti xanım Mehriban Əliyevanın iki tarixi kəlamı var: “Həyatda hər kəsin yerini və rolunu tarix müəyyən edir!” “Heydər Əliyevin varlığı Azərbaycan Xalqı üçün Tanrının tale payıdır!” Ulu Öndər Heydər Əliyev Mete, Atilla, Məlik şah, Osman Qazi, Əmir Teymur, Sultan Bəyazid, Sultan Səlim, Sultan Süleyman, Şah İsmayıl Xətai, Nadir şah Əfşar, Ağa Məhəmməd şah Qacar kimi həyatda yerini və rolunu tarix müəyyən edən Liderlərimizdəndir. Onun varlığı təkcə Azərbaycan xalqı üçün deyil, Türk dünyası, Yaxın və Orta Şərq üçün mükafatdı. Çünki, onun adı gələndə harada, hansı ölkədə yaşamasından asılı olmayaraq, hər bir Türk, müsəlman, Azərbaycanlı qürur duyur. O, özü də qürur duyurdu. Azərbaycanlı, Türk və Müsəlman olmasıyla. O, bu dünyaya mənsub olduğu milləti, məmləkəti xilas etmək üçün gələnlərdən idi. Bütün fəaliyyəti Birliyə, Bütövlüyə xidmətə həsr olundu. Gedişi də elə idi. On minlərlə insan, onu torpaq müqəddəsliyinə qovuşdurmaq üçün Fəxri Xiyabana sonsuz sevgi, məhəbbətlə yollandı. Hər gün ziyarətinə yollandığı kimi. Bu gün Onun dünyaya gəldiyi, daha doğrusu mələklərin qanadında yer üzünə endiyi gündü. Bu gün həm də bizim günümüzdür. Onun və Varisinin iradəsi ilə Şuşa qalasında, Xudafərin körpüsündə Bayrağa dönən Millətin!

 

“Ədəbiyyat və incəsənət”

(10.05.2025)

 

Azərbaycanın Xalq Şairi Fikrət Qocanın 90 illik yubileyinin qeyd edilməsi ilə bağlı Azərbaycan Respublikası Prezidenti İlham Əliyev Sərəncam imzalayıb.

“Ədəbiyyat və incəsənət” portalı Prezident.az saytına istinadən Sərəncamı diqqətinizə çatdırır:

 

Fikrət Qocanın 90 illiyinin qeyd edilməsi haqqında 
Azərbaycan Respublikası Prezidentinin Sərəncamı 

 

2025-ci ilin avqust ayında Azərbaycanın Xalq şairi, Dövlət mükafatı laureatı Fikrət Qocanın (Fikrət Göyüş oğlu Qocayevin) anadan olmasının 90 ili tamam olur.

Fikrət Qoca milli şeir ənənələrindən və dünya bədii fikrinin nailiyyətlərindən uğurla bəhrələnərək orijinal dəst-xətini formalaşdırmış söz ustalarındandır. Novator şair kimi o, fəal vətəndaşlıq mövqeyinin ifadəsi olan, dərin humanist məzmuna malik əsərləri ilə ötən əsrin 60-cı illərində Azərbaycan poeziyasına yeni ovqat gətirmişdir. Sənətkarın həyat və zaman haqqında lirik-fəlsəfi ümumiləşdirmələrlə zəngin yaradıcılığında müasir insanın mənəvi-əxlaqi kamillik axtarışları özünün dolğun poetik əksini tapmışdır. Fikrət Qoca ədəbi fəaliyyəti boyunca yüksək ictimai amala sadiq qalmış, doğma xalqının azadlıq ideallarının tərənnümünü daim diqqətdə saxlamış, gənc nəslin vətənpərvərlik ruhunda tərbiyəsi işinə öz töhfəsini vermişdir.

Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq və Azərbaycan ədəbiyyatının inkişafında xidmətlərini nəzərə alaraq, Xalq şairi Fikrət Qocanın 90 illiyinin qeyd olunmasını təmin etmək məqsədilə qərara alıram:

 

1. Azərbaycan Respublikasının Mədəniyyət Nazirliyi Azərbaycan Yazıçılar Birliyinin təkliflərini nəzərə almaqla, Xalq şairi Fikrət Qocanın 90 illiyi ilə bağlı tədbirlər planı hazırlayıb həyata keçirsin.

2. Azərbaycan Respublikasının Nazirlər Kabineti bu Sərəncamdan irəli gələn məsələləri həll etsin.

 

İlham Əliyev

Azərbaycan Respublikasının Prezidenti

 

Bakı şəhəri, 8 may 2025-ci il

 

“Ədəbiyyat və incəsənət”

(10.05.2025)

 

 

Azərbaycan Respublikasının bir qrupincəsənət xadiminə Azərbaycan Respublikası Prezidentinin mükafatları veriləcəkdir, bu barədə ötən günAzərbaycan Respublikası Prezidenti İlham Əliyev Sərəncam imzalayıb.

“Ədəbiyyat və incəsənət” portalı Prezident.az saytına istinadən Sərəncamı diqqətinizə çatdırır:

 

İncəsənət xadimlərinə Azərbaycan Respublikası Prezidentinin mükafatlarının verilməsi haqqında Azərbaycan Respublikası Prezidentinin Sərəncamı 

 

Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq və “İncəsənət xadimləri üçün Azərbaycan Respublikası Prezidentinin mükafatlarının təsis edilməsi haqqında” Azərbaycan Respublikası Prezidentinin 2002 ci il 28 may tarixli 707 nömrəli Fərmanına uyğun olaraq qərara alıram:

 

1. Səhnə fəaliyyəti ilə bağlı aşağıdakı aparıcı incəsənət xadimlərinə Azərbaycan Respublikası Prezidentinin mükafatları verilsin:

Abbasova-Budaqova Afaq Nurəhməd qızı

Abdullayev Mətləb Fətəli oğlu

Abdullayeva Xurşud Lütvəli qızı

Abdurahmanov Yusif Fikrət oğlu

Adıgözəlov Yalçın Vasif oğlu

Ağasiyev Tural Aydın oğlu

Ağaverdiyeva Məsməxanım Aslan qızı

Ağayeva Aygül Asəf qızı

Allahverdiyeva Naibə Siyavuş qızı

Amanova Almaz Hüseyn

Aşurov Mustafa Əhməd oğlu

Atakişiyev Firdovsi Nurəddin oğlu

Babayev Allahverən Hacı oğlu

Babayeva İnarə Əhməd qızı

Bayramov Səyyad Məmiş oğlu

Bəxtiyarov Rəşad Bəhram oğlu

Cəfərov Samir Qadir oğlu

Dadaşov Ceyhun Arif oğlu

Eyvazov Anar Əli oğlu

Eyyubov Musa Eyyub oğlu

Əhmədli Bəhruz Vaqif oğlu

Əhmədov Çingiz Əli Əşrəf oğlu

Əhmədov Elşad Eldar oğlu

Əkbərov Mir Qabil Qafil oğlu

Ələkbərzadə Mehriban Zaur qızı

Əliyev Fərid Fərhad oğlu

Əliyev Samir Asəf oğlu

Əliyeva Arzu Qurban qızı

Əliyeva Münəvvər Sabir qızı

Əliyeva Nərgiz Arzu qızı

Əliyeva Ülviyyə Fərhad qızı

Əlizadə Əkbər Müzəffər oğlu

Əmirbəyova Rita Cəmil qızı

Əsədov İlham Əsəd oğlu

Əsgərov Əsgər Əkbər oğlu

Ferştandt Anton Sergeyeviç

Gözəlova İradə Vaqif qızı

Hacıyev Əli Yusif oğlu

Hacıyeva Natavan Nizami qızı

Hacıyeva Sevil İnşalla qızı

Heybətov Anar Mithət oğlu

Həsənov Kərim Abbas oğlu

Həsənov Zaman Hüseyn oğlu

Həsənova İlahə Bayraməli qızı

Həsənzadə Tuncay Ayaz oğlu

Hüseynli Anar Vaqif oğlu

Hüseynli Rauf Eyyub oğlu

Hüseynli Yeganə Tofiq qızı

Hüseynov Şövqi Ərəstun oğlu

Hüseynov Fizuli İsmət oğlu

Hüseynova Kəmalə Müzəffər qızı

Xanlarova Mehriban Aslan qızı

Xasiyev Səmədzadə Nadir oğlu

Xəlilzadə Rüfət Eldar oğlu

İbrahimov Fuad Natiq oğlu

İbrahimova Şəhla İbrahim qızı

İbrahimova Nigar Rəfael qızı

İmanov Vaxtanq Yaşar oğlu

İmanova Ləman Fuad qızı

İskəndərova Sənubər Sabir qızı

İsmayılova Gülnaz Əmir qızı

Kazımov Nicat Mirəziz oğlu

Kərimduxt Rövşən Ramazan oğlu

Kərimova Leyla Əli qızı

Kərimova Nərgiz Faiq qızı

Kuxmazova Yulizana Şəfiyevna

Qaraxanov Yalçın Ənvər oğlu

Qarayev Elnar Cəfər oğlu

Qasımov Amid Fizuli oğlu

Qasımov Sahil Ələkbər oğlu

Qədiyev Seymur Ağaddin oğlu

Qəhrəmanov Abbas Əhməd oğlu

Qubadov Ceyhun Şahbala oğlu

Qulamov Samir Ceyhun oğlu

Quliyev Cəmil Elşad oğlu

Quliyev Əyyub Ramiz oğlu

Quliyev Hafiz Məhərrəm oğlu

Quliyev Kamran Yusif oğlu

Quliyeva Qızılgül Polad qızı

Quliyeva Şəlalə Şahvələt qızı

Quliyeva Yaqut Abbasqulu qızı

Quliyeva Zümrüd Vaqif qızı

Qurbanov Cahangir Qafar oğlu

Qurbanov Rövşən Oktay oğlu

Qurbanova Gülzar Qurban qızı

Qurbanova Pərvanə Yaqub qızı

Mehdiyev Məmməd Müşfiq oğlu

Mehdiyev Oqtay Nüsrət oğlu

Mehdiyev Rasəf Varaşil oğlu

Mehmandarov Mustafa Adil oğlu

Məhərrəmov Firudin Əliməmməd oğlu

Məmmədli Şamil Kamil oğlu

Məmmədov Anar Ramiz oğlu

Məmmədov Ayşad Kamal oğlu

Məmmədov Emil Əfrasiyab oğlu

Məmmədov Xəyyam Əhrar oğlu

Məmmədov Murad Məmməd oğlu

Məmmədova Fəridə Kamal qızı

Məmmədova Lalə Mirzəli qızı

Məmmədova Tamilla Nəzər qızı

Mikayılov Mikayıl Şamil oğlu

Mir-Qasım Ayan Oqtay qızı

Mirzəyev Akif Əziz oğlu

Mirzəyev Gülağası Ağa Hüseynoviç

Mirzəyev Rafiq İsmayıl oğlu

Mirzəyev Sucəddin Qiyas oğlu

Mirzəzadə Nicat Qərib oğlu

Muradov Yadigar Məmməd oğlu

Musayeva Şükufə İmran qızı

Mustafayev Mustafa Vaqif oğlu

Mustafayev Arzu Əhməd oğlu

Mürvətova Hüsniyyə Vaqif qızı

Nağıyev Elçin Nağı oğlu

Nəsirli Uğur Asif oğlu

Nəsirova Hicran Fətəli qızı

Ocaqverdiyeva Təranə Fikrət qızı

Oduşev Timur Vladislavoviç

Orucova Naidə Mülük qızı

Osmanov Fuad Tacəddin oğlu

Ömərov Gümrah Rza oğlu

Poladov Əkrəm Nicad oğlu

Rəcəbli Məmməd Qüdrət oğlu

Rəfiyeva Aidə Fazil qızı

Rəhimov Teymur Əsgər oğlu

Rəhimov Valeh İslam oğlu

Rəhmanov Rəhman Tofiq oğlu

Rüstəmov Nurlan İbrahim oğlu

Sadıqov Anar Babalı oğlu

Salahov Əbülfət Yusif oğlu

Salamov İbrahim Salam oğlu

Salmanov Paşa Həmdulla oğlu

Səfiyev Anar Qubat oğlu

Səlimli Mirbala Seyidəsgər oğlu

Səlimov Ruslan Xanbala oğlu

Səmədov Şükür Hacıbala oğlu

Süleymanov Süleyman İman oğlu

Süleymanova Elmira Süleyman qızı

Şahbazova Esmiralda Məmmədəli qızı

Şıxaliyev Elşən Telman oğlu

Şıxəliyev Ramin Tofiq oğlu

Şirinov Aslan Adil oğlu

Tağızadə Mahir Tahir oğlu

Terequlov Zaur Rəşid oğlu

Topalaşvili Naili Varnelovna

Vəliyeva Leyli Fətulla qızı

Vəliyeva Nigar Natiq qızı

Yusifova Təranə Əbülfəz qızı

Zaliyeva Mehriban Əskəralı qızı

Zeynalov Azər Zeynalabdın oğlu

Zəki Mehriban Mürvət qızı.

2. Azərbaycan Respublikasının Nazirlər Kabineti bu Sərəncamdan irəli gələn məsələləri həll etsin.

3. “İncəsənət xadimlərinə Azərbaycan Respublikası Prezidentinin mükafatlarının verilməsi haqqında” Azərbaycan Respublikası Prezidentinin 2024-cü il 9 may tarixli 117 nömrəli Sərəncamının (Azərbaycan Respublikasının Qanunvericilik Toplusu, 2024, № 5 (I kitab), maddə 542) 1-ci hissəsi ləğv edilsin.

 

İlham Əliyev

Azərbaycan Respublikasının Prezidenti

 

Bakı şəhəri, 8 may 2025-ci il

 

“Ədəbiyyat və incəsənət”

(09.05.2025)

Azərbaycan Respublikasının bir qrup mədəniyyət və elm xadiminə Azərbaycan Respublikası Prezidentinin fərdi təqaüdü veriləcəkdir, bu barədə ötən günAzərbaycan Respublikası Prezidenti İlham Əliyev Sərəncam imzalayıb.

“Ədəbiyyat və incəsənət” portalı Prezident.az saytına istinadən Sərəncamı diqqətinizə çatdırır:

 

Azərbaycan Respublikasının mədəniyyət və elm xadimlərinə Azərbaycan Respublikası Prezidentinin fərdi təqaüdünün verilməsi haqqında 
Azərbaycan Respublikası Prezidentinin Sərəncamı 

 

Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq və “Azərbaycan Respublikası Prezidentinin fərdi təqaüdünün təsis edilməsi haqqında” Azərbaycan Respublikası Prezidentinin 2002-ci il 11 iyun tarixli 715 nömrəli Fərmanına uyğun olaraq qərara alıram:

1. Azərbaycan Respublikasında mədəniyyətin və elmin inkişafında xidmətlərinə görə aşağıdakı şəxslərə Azərbaycan Respublikası Prezidentinin fərdi təqaüdü verilsin:

Axundov Elçin Əbdül oğlu

Amənzadə Raihə Barxudar qızı

Fərəcov Sərdar Fərəculla oğlu

Göyüşov Nəsib Cümşüd oğlu

Məmmədov Sabir Novruz oğlu

Rövşən Ramiz Məmmədəli oğlu

Yaqubova Ella İsmayıl qızı.

2. Azərbaycan Respublikasının Nazirlər Kabineti bu Sərəncamdan irəli gələn məsələləri həll etsin.

 

İlham Əliyev

Azərbaycan Respublikasının Prezidenti

 

Bakı şəhəri, 8 may 2025-ci il

 

“Ədəbiyyat və incəsənət”

(09.05.2025)

 

Fikrət Əmirov adına Gəncə Dövlət Filarmoniyasının təqdim etdiyi "Sözün gücü" layihəsi çərçivəsində Filarmoniyanın Urban Mərkəzində öz şeirləri ilə qəlbləri fəth edən şair Nüsrət Kəsəmənlinin 80 illiyinə həsr olunmuş qiraət gecəsi baş tutub. 

 

“Ədəbiyyat və incəsənət” portalına Filarmoniyadan verilən məlumata görə, gecədə qiraətçilər Əməkdar mədəniyyət işçisi, şair, publisist Bəxtiyar Muradov, AMEA Gəncə bölməsi Nizami Gəncəvi Mərkəzinin direktoru, filologiya üzrə fəlsəfə doktoru Əlimuxtar Muxtarov, Əməkdar mədəniyyət işçisi, Azərbaycan Yazıçılar Birliyinin üzvü və Gəncə bölməsinin sədri Xəzəngül Hüseynova, İmamverdi Vəliyev, Əsgər Məmmədov, Lalə Həsəncan, Zülfiyyə Yaqub şairin “Getmək istəyirsən bəhanəsiz get”, “Dəli bir ağlamaq keçir könlümdən”, “Biri var idi, biri yox idi”, “Oğru olmaq istəyirəm”, “Etiraf”, “Dünən toyun idi”, “Müəllim”, “Yoxdursa”, “Bir gün görəcəksən”, “Bir sevda ağlayır”, “Sevənlər deməyəydi” və “Nələr gördüm bu dünyada” şeirlərini səsləndiriblər.

Həqiqətən də Nüsrət Kəsəmənli poeziyası poetizmin, lirikanın zirvəsidir, bunu inkar etmək mümkün deyil.

 

OĞRU OLMAQ İSTƏYİRƏM

Qoy polislər eşitməsin,
Qorxulu bir sirr deyirəm:
Çoxdandır ki, bir arzum var,
Oğru olmaq istəyirəm!…
İnsanların arasından
Əqidəsiz adamları,
Vicdanını pula satan
nadanları
Oğurlamaq istəyirəm!

Bu torpağın gündən-günə
Niyə artır dərdi-səri…
Dövlətlərin arasından sərhədləri
Oğurlamaq istəyirəm!
Axı, nə iş görmüşəm ki,
Oğurluq da işdi barı.
Mən anamın sifətinə
Vaxtsız düşmüş qırışları
Oğurlamaq istəyirəm!…
Birisini yıxmaq üçün
İkisinin ülfətini,
İnsanların ürəyindən
Hər kinini, nifrətini,
Yalanını bundan ona,
Ondan buna satanları,
İki sevən arasından
O üçüncü adamları
Oğurlamaq istəyirəm!
Araz axır…
O taydan da insan baxır,
Bu taydan da insan baxır,
Necə milyon gözüyaşlı əzizimi,
O həsrətli Təbrizimi
Oğurlamaq istəyirəm!
İndi necə dövlətlərdən
Məzlumların ah-zarinı,
Yad torpaqda yatıb qalan,
Əsrlərin arxasından
Qollarını çatıb qalan
Kərbəladan Füzulinin,
Hələbdənsə Nəsiminin məzarını
Oğurlamaq istəyirəm!
Nə gizlədək, bilir hami
Tonqal çatıb yandırırlar
bu cahanı.
Qəlbim deyir:
“Bir azəri məsəlini yadına sal:
“Oğrudan-oğruya halal…”
Prometey oğurlayib
İnsanlara verən odu
Oğurlamaq istəyirəm!
Lap qəzəbi tutsa belə
Yerin mənə, göyün mənə
Nə deyirsiz, deyin mənə
Oğru olmaq istəyirəm!!!

 

“Ədəbiyyat və incəsənət”

(10.05.2025)

Diasporla İş üzrə Dövlət Komitəsində Ümummilli Liderin anadan olmasının 102-ci ildönümünə həsr olunmuş tədbir Azərbaycan Respublikasının Dövlət Himninin səsləndirilməsi və Ulu Öndər Heydər Əliyevin, eləcə də şəhidlərimizin əziz xatirəsinin bir dəqiqəlik sükutla yad edilməsi ilə başlayıb.

 

“Ədəbiyyat və incəsənət” portalına Komitədən verilən məlumata görə, sədr Fuad Muradov çıxışında Ulu Öndərin müstəqil Azərbaycan Respublikasının müstəqilliyinin qorunması və möhkəmlənməsindəki yorulmaz fəaliyyətini xatırladıb. Azərbaycan diasporunun formalaşması, vahid diaspor şəbəkəsinin yaradılması üçün hərtərəfli düşünülmüş, məqsədyönlü siyasətindən bəhs edib. Prezident İlham Əliyevin tapşırıqları, Birinci vitse-prezident Mehriban Əliyevanın təşəbbüsü və Heydər Əliyev Fondunun dəstəyi ilə milli-mədəni irsimizin qorunub saxlanması, xaricdə yaşayan azərbaycanlıların təşkilatlanması, Azərbaycan həqiqətlərinin dünya ictimaiyyətinə çatdırılması məqsədilə ardıcıl və davamlı işlərin görüldüyünü, müxtəlif ölkələrdə Azərbaycan evlərinin açıldığını diqqətə çatdırıb.

Tədbirdə Ulu Öndərin 100 illik yubileyinə həsr edilmiş “Böyük sənət hamisi” sənədli filmindən bir hissə və “Heydər Əliyev və diaspor quruculuğu” adlı videoçarx nümayiş olunub.

Xalq rəssamı Ömər Eldarovun tələbəsi, heykəltəraş, kinorejissor Namiq Hüseynov “Heydər Əliyev: milli-mənəvi dəyərlərin hamisi” mövzusunda çıxış edib. Ulu Öndərin yalnız siyasi lider deyil, həm də xalqın mədəniyyətini, ənənələrini və dəyərlərini qorumağa və inkişaf etdirməyə çalışan bir şəxsiyyət olduğunu diqqətə çatdırıb. Heykəltəraş dahi lider Heydər Əliyevin büstünü komitəyə hədiyyə edib.

Daha sonra Komitənin gənc əməkdaşları, “Azərbaycan-Bolqarıstan Dostluğunun İnkişafına Kömək” İctimai Birliyinin sədri Mariya Atanasova-Hüseynova və digər çıxışçılar Ümummilli Lider Heydər Əliyevin Azərbaycan xalqı qarşısındakı böyük tarixi xidmətlərini qeyd edib, əvəzolunmaz lider kimi yaddaşlarda əbədi yaşayacağını söyləyiblər.

 

“Ədəbiyyat və incəsənət”

(09.05.2025)