Super User
Polşadan başladım, Venesuelada bitrdim
Könül, “Ədəbiyyat və incəsənət”
Həftəsonu Kinoya getməyə qərar verdim, amma bunu orijinal yolla -hansısa festival, yaxud kino-baxış tədbirlərinə qatılmaqla etmək istədim. Və axtarıb iki belə mərasim topdım.
POLŞA FİIM FESTİVALI
Azərbaycan Kinematoqrafçılar İttifaqının “Visla” Polşa film festivalı ilə əməkdaşlığı çərçivəsində səkkizinci dəfə keçirilən Polşa Film Festivalı oktyabrın 31-dək davam edəcək, filmlər “Azərbaycan” CinemaPlus-da nümayiş olunur.
Oktyabrın 10-da start götürən festival çərçivəsində artıq Azərbaycan tamaşaçıları Maçey Kavalskinin “Təhlükəli centlmenlər”, Yeji Skolimovskinin “İA”, Yakub Skoçenin “Vəftiz” və digər ekran əsrlərini izləyiblər.
Mən “İA” fiımini izlədim. Yeji Skolimovski Polşanın çağdaş dövr ən məşhur rejissorlarındandır. “İA” filmi də onun ən uğurlu işlərindəndir, filmin premyerası ötən il Kann kinofestivalında olub.
Soruşarsınız, film nədən bəhs edir. Bu mənim 30 illik həyatımda gördüyüm uzunqulaq barədə ilk film idi. Bəli, fiımin qəhrəmanı ağıllı gözləri olan bir uzunqulaqdır, ia isə onun çıxardığı səsdir.
Qapaq şəklində maraqla izlədiyim İA filmindən kadrı görürsünüz.
Builki “Visla” çərçivəsində Azərbaycan tamaşaçısına təqdim edəcək son film rejissor Yan Holoubekin “Günahsız 25 il” ekran əsəri olacaq. Bu film real hadisələr əsasında çəkilib və 20 ilə yaxın günahsız yerə həbs edilmiş Tomaş Komendanın təsirli hekayəsindən bəhs edir.
Festival çərçivəsində “Azərbaycan” CinemaPlus-da ümumilikdə 6 polyak filminin nümayişi nəzərdə tutulub.
Bu arada festivalın koordinatoru və layihə meneceri Yanna Nekanın başlanğıcda mediaya açıqlamasını da qeyd etmək istəyirəm. Xanım Yanna deyib: “Bakıya səfər bizim üçün xüsusi anlam daşıyır, çünki biz Polşa filmlərinin unikal seçimini Azərbaycan tamaşaçısı ilə bölüşə biləcəyik. Biz Bakı sakinləri ilə görüşməyi və polyak film dünyasından birlikdə həzz almağı səbirsizliklə gözləyirdik. “Visla” Festivalı dünyanın onlarla şəhərində keçirilən polyak kinematoqrafiyasının ən böyük festivalıdır. Festivalın əsas niyyəti mədəniyyətlərarası dialoqu yaratmaq və onu gücləndirmək, eləcə də kino yaradıcıları və xadimləri arasında beynəlxalq əməkdaşlığının inkişafına töhfə verməkdir. Məqsədimiz yerli tamaşaçıları müasir polyak kinosu ilə tanış etmək, eləcə də polyak kinosunu xarici kino sənayesinin nümayəndələri arasında populyarlaşdırmaqdır. Bu işdə bizə dəstək olan Azərbaycan Kinematoqrafçılar İttifaqına öz təşəkkürümüzü bildirir və qarşıdakı illərdə də əməkdaşlıq etməyi arzulayırıq”.
Həqiqətən də Polşa kinosu təriflənəsi kinodur, indi sizə bir film adı çəkəcəm, yəqin əksəriyyət baxıb, baxmayanlar isə çütləq baxsınlar: “Loğman”.
II LATIN AMERİKASI FİLMLƏRİ FESTİVALI
Bu günlər Bakıda II Latın Amerikası Filmləri Festivalı da keçirilir. Festival çərçivəsində “Landmark” biznes mərkəzinin kinoteatrında Venesuela istehsalı olan “Bazar ertəsi və ya çərşənbə axşamı, bazar günü heç vaxt” (“Monday or Tuesday Never On Sunday”) adlı filmin nümayişi idi, əsla bu ölkənin kinematoqrafı ilə tanışlığımın olmaması səbəbindən dedim, tanış olum. Və
“road movie” janrında çəkilən filmi bəyəndim. Filmdə bu Latın Amerikası ölkəsinin gözəl mənzərələri göstərilib. Hadisələr Merid ştatının dağlarında başlayır, daha sonra quraqlıq regiona – Falkon ştatına ötürülür.
Ekran əsərində tamamilə fərqli iki qadından söhbət açılır: Venesuelanın And dağlarından olan gənc kəndli Qreqori və ortayaşlı, yüngülxasiyyətli şəhərli Lusiya. Onlar yaranan vəziyyətlə əlaqədar mənzilbaşına çatmaq üçün birgə səyahətə çıxmalıdırlar. Onlardan biri öz keçmişini, digəri bu gününü öyrənir. Hər ikisi sevginin gücünü hiss edir.
Qeyd edim ki, noyabrın 25-dək davam edəcək festival çərçivəsində Latın Amerikasının müxtəlif ölkələrində istehsal olunan filmlərin nümayişi planlaşdırılır.
Xatırladım ki, Bakıda Latın Amerikası Filmləri Festivalı ilk dəfə 2018-ci ildə keçirilib.
Mətn fotosunda: bakılılar Venesuela filmini maraqla izləyirlər.
“Ədəbiyyat və incəsənət”
(23.10.2023)
Fidan Hacıyeva: “Beynəlxalq Vokal Festivalı opera musiqisi dinləmək istəyən hər kəsi əhatə edəcək”
Bakıda opera sənəti sahəsində irimiqyaslı tədbirə hazırlıq işləri gedir. Azərbaycan Dövlət Akademik Opera və Balet Teatrının solisti, Xalq artisti, pedaqoq Fidan Hacıyeva 2024-cü ilin baharında keçirməyi planlaşdırdığı birinci Beynəlxalq Vokal Festivalına hazırlıq işləri ilə bağlı AzərTAC-ın müxbirinə müsahibə verib.
Daycest bölümündə “Ədəbiyyat və incəsənət” portalı həmin müsahibəni diqqətinizə çatdırır:
- Fidan xanım sosial şəbəkədəki səhifənizdə yazmısınız ki, bu festivalın keçirilməsi ideyası artıq bir neçə ildir ki mövcud idi, lakin onu gerçəkləşdirmək yalnız indi mümkün oldu. Nəyə görə?
- Yəqin ki, qismət belə imiş. Mən bu layihəyə tam hazır olmalı idim. Çünki o olduqca irimiqyaslı tədbir olacaq. Çox şadam ki, həmin vaxt nəhayət ki, yetişib və mən artıq öz arzumu həyata keçirə bilərəm. Layihədə tanınmış opera dirijorları, məşhur opera müğənniləri və mütləq şəkildə bizim opera solistlərimiz iştirak edəcəklər. Çünki doğma Azərbaycan artistlərinin olduqca zəngin, maraqlı səsləri, böyük repertuarları var və onları bütün dünya eşitməlidir. Mənə dəstək olan dostlarımın hər birinə öz təşəkkürümü bildirirəm. Xüsusi olaraq, Opera teatrına və bu ideyanı dəstəkləyən və öz məsləhətləri ilə mənə kömək olan Akademik Opera və Balet Teatrının direktoru Yusif Eyvazova minnətdaram. O, dünyada tanınmış müğənnidir, onun dəstəyi və tövsiyələri olduqca dəyərlidir.
- Festivalın məqsədləri barədə danışardınız.
- Bu layihəni biz, hər şeydən əvvəl, incəsənət naminə həyata keçiririk. Bu tədbir Azərbaycan və digər ölkələr arasında mədəniyyət mübadiləsidir. Festival zamanı həm Azərbaycan, həm də Qərbi Avropa bəstəkarlarının – Verdi, Puççini, Sen-Sans, Bize və başqalarının əsərləri səslənəcək. Dəvət olunmuş dirijorlar bizim musiqimizi təqdim edəcəklər. Çox istərdim ki, xaricdən dəvət etdiyimiz solistlər də Azərbaycan ariyalarını ifa etsinlər və ya solistlərimizlə birgə duet oxusunlar. Layihədə həmçinin gənc vokalçılar da iştirak edəcəklər, çünki onlara mütləq yol açmaq lazımdır. Bu festival onlar üçün əlamətdar hadisəyə çevriləcək, onlar məşhur artistlərlə eyni səhnəni bölüşəcəklər. Bir də bizim musiqi məktəbinin (Fidan Hacıyevanın musiqi məktəbi – red.) şagirdləri mütləq bu tədbirdə çıxış edəcəklər.
- Qarşıdakı yarım il ərzində hansı işləri görməlisiniz?
- Birincisi, proqram tərtib etməliyəm. İfaçılar öz repertuarlarını mənə təqdim etməlidirlər. Biz orkestrin müşayiəti ilə məşqlər keçirməliyik. Festivalda Mezzo kamera orkestri çıxış edəcək. Bu, mənim rəhbərliyim ilə yaradılmış qadınlardan ibarət ilk Azərbaycan orkestrdir. Onlar gənc vokalçılarla çıxış edəcəklər. Azərbaycanın rayonlarından birində, Bakıya gələ bilməyənlər üçün də konsert təşkil etmək istəyirəm. Biz özümüz onların yanına gedəcəyik. Yəni bu tədbir opera, klassik musiqini dinləmək istəyən hər kəsi əhatə edəcək. Bundan əlavə, Yusif Eyvazov festival çərçivəsində mənə həm də tamaşa nümayiş etməyi məsləhət görüb. Bu, yeni müasir quruluşda “Karmen” olacaq. Bütün bunları təşkil etmək üçün böyük iş görmək lazımdır.
- Festivalda hansı ölkələr iştirak edəcək?
- Hələ ki, İtaliya, Almaniya, Latviya, Mərakeş və Türkiyəni dəqiq deyə bilərəm – onlar iştirakını artıq təsdiq ediblər. Lakin digər ölkələrlə də danışıqlar aparılır.
- Siz gənc ifaçıların iştirak edəcəyini qeyd etdiniz. Hansı yaş kateqoriyaları nəzərdə tutulur?
- Mənim məktəbimdə, misal üçün, səkkiz yaşında uşaqlar var və onlar klassik ariyalar oxuyan çox istedadlı ifaçılardır. Onlar, ən gənc artistlər kimi iştirak edəcəklər. Biz mütləq konservatoriyanın tələbələrini cəlb edəcəyik. Yeri gəlmişkən, konsertlərdən birini konservatoriyada təşkil etmək istəyirəm. Təbii ki, yetkin ifaçılar kateqoriyası olacaq – bunlar, stajı olan təcrübəli müğənnilərdir. Bundan əlavə, ustad dərsləri təşkil edəcəyik. Burada opera musiqisi ilə maraqlanan, oxumaq istəyən və ya artıq oxuyan və inkişaf etmək istəyən hər kəs iştirak edə bilər.
- Festivalda iştirak edənlərin hansı üstünlükləri və perspektivləri olacaq?
- Təcrübəli müğənnilər üçün bu, ölkəsini təmsil etmək, sənətini nümayiş etmək və xalqlar arasında mədəni mübadilədə iştirak etmək imkanı yaradacaq ki, bu da çox vacibdir. Gənc ifaçılar üçün isə böyük səhnəyə qədəm qoymaq, orkestr ilə çıxış etmək və misli-bərabəri olmayan təcrübə əldə etmək şansı olacaq. Mən, misal üçün artıq 19-20 yaşda opera teatrında oxumuşam, lakin belə böyük festivallarda iştirak etməmişəm. Üstəlik adlı-sanlı peşəkarların dirijorluq etdiyi simfonik orkestr ilə çıxış etmək sənətə yeni başlayan artist üçün çox böyük fürsətdir. Opera musiqisi – bütün ölkələrdə tanınan dünya musiqisidir, bu, əsl mədəniyyətdir. Mən çox istərdim ki, Azərbaycanda bu janr hər zaman zirvədə olsun.
“Ədəbiyyat və incəsənət”
(23.10.2023)
“Daily News Hungary” nəşri Macarıstanda Nizami Gəncəvinin büstünün açılışı mərasimi haqqında məqalə dərc edib
Macarıstanın ingilisdilli populyar “Daily News Hungary” internet-nəşri oktyabrın 21-də ölkənin Lakitelek şəhərində keçirilən əlamətdar hadisə haqqında məqalə yayıb.
AzərTAC xəbər verir ki, məqalədə dahi Azərbaycan şairi Nizami Gəncəvinin büstünün təntənəli açılış mərasimindən söhbət açılır.
“Ədəbiyyat və incəsənət”
(23.10.2023)
Lənkəran mətbəxindən Mərci Pətə
Aysel Qarayeva, “Ədəbiyyat və incəsənət” üçün
Bu dəfə əslən lənkəranlı olan qonşumuz Fəridə xaladan bir Lənkəran yeməyinin reseptini alıb sizinlə bölüşmək qərarına gəldim.
Bildiyiniz kimi, Lənkəran mətbəxi zəngin çeşidi, dadlı, ləzzətli, özünəməxsus yeməkləri ilə tanınır. Cənub bölgəsinin mərkəzi kimi tanınan Lənkəran boş yerə deyil ki, UNESKO tərəfindən 4 il müddətinə dünya mətbəx mədəniyyətinin paytaxtı elan olunub.
Bu mətbəxə məxsus ləvəngi, qozlu kükü, boranı plov, mərci plov, turşu kabab, badımcan ləvəngisi, fisincan, balıq sırdağı, lökü, qiyməqatıq kimi ləziz təamlar ölkədən kənarda da tanınır və sevilir.
Fəridə xala isə bizə Lənkəran mətbəxinə məxsus qədim bir yeməyi - “Mərci pətə”ni bişirməyi öyrətdi.
Lazım olan ərzaqlar:
* 1 stəkan yaşıl mərcimək
* 100 qr qoz ləpəsi
* 1 ədəd soğan
* 1-2 dilim boranı
* duz, istiot
* üyüdülmüş keşniş toxumu
Hazırlanma qaydası:
İlk öncə mərciməyi yuyub üzərinə su töküb bişməyə qoyun. 1-2 dilim boranı da qabığını soyub mərciməyə əlavə edib suyu çəkilib yumşalana qədər bişirin. Başqa bir tavada yağda aypara şəklində doğranmış soğanı yüngül qovurun. Qoz ləpəsini qozçəkəndən keçirib və ya xırda doğrayıb soğanın üzərinə töküb qarışdırın. Bişmiş mərcimək və balqabağı, zövqə görə duz, istiot, üyüdülmüş keşniş toxumunu da əlavə edib qarışdırın. Daha sonra blenderlə püre halına gələnə qədər əzin.
Nuş olsun!
“Ədəbiyyat və incəsənət”
(23.10.2023)
“Şəki Siti” klubunun ispan legioneri
Sərtyel, “Ədəbiyyat və incəsənət”
Azərbaycan futbolunda birinci və ikinci divizionlarda oyunların keçirilməsi inkişafa xidmət etdi. Futbolumuz kütləviləşdi, bu çox gözəldir.
İkinci divizionda qaradərili futbolçuları, asiyalı və hətta avropalıları görəndə isə xeyli təəccübləndim. Əcabə, Azərbaycan kimi futbolu 3-cü sort hesab edilən bir ölkənin Lerik kimi bir ucqarında təbii ki, qəpik-quruş məvacibə gəlib top qovan legionerin səviyyəsi barədə nə söyləmək olar?
Parodiyam bu barədədir:
“Şəki Siti” və “Bakı Sportinq” klublarının oyunudur. Şərhçi şəkililərin heyətini təqdim edir:
-28 nömrəli futbolçu Xuan Qonsales - “Şəki Siti”nin ispaniyalı legioneri. Kifayət qədər tanınmış və təcrübəli oyunçudur. Karyerası boyunca dəfələrlə “Real” Madrid və “Barselona” kimi dahi klubların oyunlarını stadiondan izləyib.
“Ədəbiyyat və incəsənət”
(23.10.2023)
Rəsm qalereyası: Arif Hüseynov, “Miniatür”
Rəsm qalereyası: Arif Hüseynov, “Miniatür”
GÜNEY AZƏRBAYCAN POEZİYASI ANTOLOGİYASInda Arğın Paşadan “Baxıram” şeiri
“Ədəbiyyat və incəsənət” portalının Güney Azərbaycan Poeziyası Antologiyası layihəsində portalımızın Güney təmsilçisi Əli Çağla bu dəfə sizlərə Arğın Paşanın şeirlərini təqdim etməkdədir.
Arğın Paşa təxəllüsü ilə tanınan Məhəmməd Paşapur, 1989-cu il, muğanda doğulub böyüdü. Bilim yurdunda bitki uzmanlığı bitirdi. Gənc çağından ana dilində şeir yazmağa maraqlandı. Az sonra şeirləri qəzetələrdə göründü.
2013-cü il, Azərbaycan folkloru əsasında uşaqlar üçün, "Cırtdan", 2016-cı il "Axmaq tülkü", 2017-ci il Azərbaycan folkloru əsasında bir daha uşaqlar üçün, "Duzlu çəpiş" və 2019-cu il "Cırtdan" kitabı ikinci dönə çapdan çıxdı. Neçə başqa şeir kitabı çapa hazırlanır. Bu çağ, muğanın ustad şəhriyar dərnəyi ilə füzuli məclisinin ictimaiyyətlə ələqələr müdiridir.
BAXIRAM
Gözündə bir qorxu, min bir həyəcan,
İlahi nə duyur xəyalən görən?
Könlündə yaşıl və sıcaq bir muğan,
Sənmisən röyamda məni öldürən?
Bir olay sındırıb yenə vüqarı,
Keçmişi büsbütün itirdim daha.
Qaldırıb içimdə yetim divarı,
Çəkilir kimliyim bu gün, sabaha.
Gəlib gözlərimin önündə durub,
Baxıram könlünün pəncərəsindən.
Gəlişin sevinci beynimə vurub,
Qopardın tənimi yer kürəsindən.
Gözlərin gözümə zillənən çağı,
Elə bil köksümdən güllə sovuşdu.
Dodağın bir anlıq güllənən çağı,
Sürəkli qışımdan çillə sovuşdu.
“Ədəbiyyat və incəsənət”
(23.10.2023)
AKTUAL ŞEİRdə “Necə əliniz gəldi?”
Habil Yaşar, “Ədəbiyyat və incəsənət”
3 il öncə bu günlərdə müzəffər ordumuz erməni qəsbkarlarını iti qovan kimi torpaqlarımızdan qovmağa başlamışdı. Həmin vaxt vəhşilər Gəncəni və Bərdəni bombalayır, dinc sakinlər, o cümlədən uşaqlar tələf olurdu.
Necə əliniz gəldi?
(Zəhra balanın timsalında bu taleyi yaşayan bütün fidanlara həsr olunur)
Bir balaca körpənin həyatına qıymağa,
Ümid dolu fidanı yarı yolda qoymağa,
Necə əliniz gəldi?
Ürəyiniz daşdımı? Ruhunuz şeytandımı?
İki yaşlı Zəhranı öldürən insandımı?
Necə əliniz gəldi?
Göylər də qan ağladı, fırtınalar başladı,
Tanrının özü belə sizləri qarğışladı.
Necə əliniz gəldi?
Yazdıqca yanır adam, yandıqca yazır adam,
Bu dəhşətin üzünə baxmağa qorxur adam,
Necə əliniz gəldi?
Nə deyim, nə söyləyim gözünüz kor olaydı,
O gülləni atarkən əliniz quruyaydı,
Necə əliniz gəldi?
Ey insanlıq adından uzaq olan erməni,
Cavabsız sualıma bir cavab ver sən mənim,
Necə əliniz gəldi?
“Ədəbiyyat və incəsənət”
(23.10.2023)
Müharibə mövzusu böyük ekranda
Əli Nəcəfxanlı yazır
“Ədəbiyyat və incəsənət” portalı Əməkdar jurnalist Əli Nəcəfxanlının Azərbaycan kinosunun 125 illiyinə həsr olunmuş “Müharibə mövzusu böyük ekranda” yazısını təqdim edir.
Azərbaycan kinematoqrafiyasında müharibə mövzusunda xeyli gözəl film var. İkinci Dünya müharibəsinə aid olan “Uzaq sahillərdə”, “Sizi dünyalar qədər sevirdim”, “Şərikli çörək”, “Bizim Cəbiş müəllim”, “Mən ki gözəl deyildim”, “Bizim küçə”, “Ölsəm, bağışla”, “Tütək səsi” filmləri mükəmməldir. Bu ekran işlərində həm döyüş səhnələri göstərilib, qəhrəmanlıq tərənnüm olunub, həm də topsuz-tüfəngsiz arxa cəbhədəki insan taleləri əsas götürülərək savaşın faciələrinə işıq tutulub.
Ermənistan–Azərbaycan münaqişəsinə gəlincə isə, bu mövzuda hələlik Birinci Qarabağ müharibəsi mövzusunda müəyyən filmlər çəkilib: “Dolu”, “Fəryad”, “Yarımçıq xatirələr”, “Ümid”, “Girov”, “Yalan”, uşaqlar üçün “Ağ atlı oğlan” və s. Debüt filmi sayılan “Qara bağ” da bu sıraya aid edilməlidir. Məsələ bundadır ki, istər bədii, istərsə də sənədli janrda lentə alınan bütün filmlər ümumən tarix üçün, eyni zamanda gələcək nəsillər üçün bir növ xronika kimi vacibdir. 44 günlük “Zəfər yürüşü”, şəhidlərimizin qəhrəmanlığı, dünyada analoqu olmayan uğurlu döyüş əməliyyatları, psixoloji məqamlar hələ özlərinin ekran təcəssümünü gözləyir. Bir sözlə, Qarabağ müharibəsi özünün hər üzü ilə dünyaya çatdırılmalıdır.
Onu da xatırlayırıq ki, bir neçə il əvvəl kinoda Qarabağ mövzusu ölkəmizin sərhədlərini də adlayıb. Söhbət türk rejissoru Gökalp Yamenin “Qarabağ – Turan” adlı 18 dəqiqəlik qısa filmindən gedir. Mübariz İbrahimovun qəhrəmanlığının da geniş yer aldığı həmin ekran işinin Şimali Kiprin Yaxın Doğu Universitetində təqdimat mərasimi də keçirilib.
Son dövr kinomuzda Qarabağ mövzusunda uğurlu filmlərin rejissoru kimi tanınan Əməkdar incəsənət xadimi Elxan Cəfərovun bu barədə fikirləri maraqlıdır: “Bilirsiniz ki, mən vaxtında bu mövzuda üç film işləmişəm. “Dolu” (2012), “Yarımçıq xatirələr” (2015) və “Qarabağdır Azərbaycan” (sənədli-bədii film 2009). Əgər bundan əvvəl bizim filmlərdə Qarabağa necə qayıtmağımız, Qarabağsız Azərbaycan, “Biz Qarabağı heç vaxt unutmayacağıq” kimi mövzular əsas idisə, bundan sonrakı dövrdə kinonun Qarabağla bağlı paradiqması artıq dəyişib. Biz Qarabağ savaşında qalib gəldik, torpağımızı qaytardıq və bundan sonra Qarabağımızı necə dirçəldəcəyik, orada necə möhkəmlənəcəyik kimi məsələlər də önə keçməlidir”.
Avqustun sonunda Mədəniyyət Nazirliyinin Azərbaycan Ədəbiyyat Fondu ilə “Ədəbiyyatın kinoya transferi” mövzusunda keçirdiyi dinləmələrdə də bu məsələ ətraflı müzakirı olunub. Fondun baş direktoru, tanınmış yazıçı Varisin dediyinə görə, həmin tədbirdə məqsəd keyfiyyətli filmlərin ərsəyə gətirilməsi üçün yazıçıların kino sənayesinə daha yaxından cəlb edilməsi olub. Mədəniyyət nazirinin müşaviri, Əməkdar incəsənət xadimi Orxan Fikrətoğlu, Milli Məclisin deputatı, Xalq şairi Sabir Rüstəmxanlı, AYB-nin katibləri İlqar Fəhmi və Elçin Hüseynbəyli, birliyin dramaturgiya seksiyasının müdiri Firuz Mustafa, Azərbaycan Kino Agentliyinin şöbə müdiri Rəşad Qasımov, rejissor Adil Azay və başqaları ədəbiyyatla kinonun vəhdətindən, yaxşı filmlərin çəkilməsi üçün yaxşı dramaturji materialın olması zərurətindən bəhs ediblər. Mədəniyyət naziri Adil Kərimlinin kinodakı durğunluğu aradan qaldırmaq üçün atdığı zəruri tədbirlərə diqqət çəkilib. Müharibə mövzusunda filmlərin ən yaxşı müəlliflər tərəfindən çəkilməsi zərurəti vurğulanıb və bildirilib ki, bu mövzuda film müsabiqəsi keçirmək nəzərdə tutulur.
Ölkənin kino cameəsinin birləşməsi, “Debüt studiyası”nın bərpası, mediasının maliyyələşdirilməsinə başlanılması, prodüser mərkəzlərinin çoxalması və təkmilləşməsi üçün atılan addımlar nikbinlik yaradır. Mədəniyyət Nazirliyinin seleksiya yolu ilə tələbələr arasından, gənc istedadlar arasından yeni rejissorlar, ssenaristlər, operatorlar, aktyor və aktrisaların seçilməsində maraqlı olması da inam yaradan amildir.
Nazirlik, həmçinin, dünyaçaplı studiyaların gəlib Azərbaycanda filmlər çəkməsini gerçəkləşdirmək, hətta onları maliyyələşdirmək əzmindədir. Azərbaycan ərazisində film çəkən bütün xarici şirkətlərdən yalnız bir şey tələb olunacaq: 60–70 faiz yerli kadrlardan – azərbaycanlı mütəxəssislərdən istifadə etsinlər ki, kinoda milli kolorit hiss olunsun.
Bu günlərdə müharibə mövzusunda iki filmin təqdimatının keçirilməsi fərəhli hadisədir. Biri qəhrəmanlıq xronikasına aid olan “Oğul”, digəri isə müharibə itkinləri haqqında çəkilmiş “Coğrafiya müəllimi” adlı qısametrajli bədii-sənədli filmdir. Bu ekran işlərinin ingilis dilində titrlərlə müşayiət olunması filmləri xarici auditoriyaya çıxarmaq məramına xidmət edir.
Şübhə etmirik ki, şanlı qələbədən sonra Vətən müharibəsi haqqında daha güclü ssenarilər yazılacaq, filmlər çəkiləcək. Ali Baş Komandanın bu 44 gündə xalqa müraciətləri, əsgərlərimizin qəhrəmanlıqları və sair əsl salnamədir, tarixdir, bütöv seriallar üçün münbit materialdır. Bu mövzular ədəbiyyatda və kinoda özünün layiqli əksini tapacaq.
Amma kinematoqrafçılar unutmamalıdırlar ki, Qarabağ müharibəsi haqqında maraqlı və dərin məzmunlu filmlərin çəkilməsi hər zaman aktual məsələ olaraq qalacaq. Dünya arenasına çıxmağın başqa yolu yoxdur.
“Ədəbiyyat və incəsənət”
(23.10.2023)
GÜNDƏM ŞEİRLƏRİndə “Yandırıb”
“Ədəbiyyat və incəsənət” portalının bugünkü Gündəm şeiri Yusif Nəğməkardan gəlir. O, şeiri yazma səbəbini özü izah edir.
İstedadlı şairə xanım Adilə Nəzər öz Facebook səhifəsində riyakar dünyanın QARABAĞ məsələsində yenidən ciddi haqsızlığa... yol verəcəyi təqdirdə özünü yandıracağını yazdı...
Özünü yandırma, Adilə Nəzər,
Sənin yandıranın HAQDAN yandırıb.
Qədimdir etdiyin fəryad, dad-həzər;
Qəlbini söz eşqi çoxdan yandırıb!..
Canda qalaqlanıb fikrin külləri,
Duyğunun, ilhamın alov dilləri...
Yağı-düşmənlərin xain əlləri
Yurduna tuşlanan oxdan yandırıb...
Haçan ocaq çatdın misralarında,
Alov çiçəkləndi əsrarlarında...
Səni od mizrabın könül tarında
O gündən, o an, o vaxtdan yandırıb...
Var ikən ATƏŞGAH- yanar çağımız,
Özünü yandırma, ruhusağımız.
Bəs edər od saçan YANARDAĞIMIZ;
TANRI ULUMUZU dağdan yandırıb!..
Yanmaq-- fədakarlıq andırmağındır,
Anmaq-- sınmaz sanı sındırmağındır...
Hər şeir-- özünü yandırmağındır --
Qədərdən, taledən, baxtdan yandırıb!..
Donan heyrətindir yanan qeyrətin,
Onsuz, od püskürür qalib MİLLƏTİN;
Çıxıb axırına zülmün, zillətin,
İşğal divanını taxtdan yandırıb!..
Neyləyək, namərddir həyatda çoxluq?!.
Arayıb-axtarma, yox gözütoxluq...
Dünyada ədalət deyilən yoxluq
Sənin varlığını yoxdan yandırıb...
“Ədəbiyyat və incəsənət”
(23.10.2023)
