Super User
Dağlar başındakı incimiz, mədəniyyət pənahımız Şuşada Azərbaycan Bəstəkarlar İttifaqının 90 illik yubileyi necə qeyd edildi? - REPORTAJ
Aysel Kərim, “Accel” group-un baş direktoru, Gənclər mükafatçısı, Prezident təqaüdçüsü – “Ədəbiyyat və incəsənət” portalı üçün
Düz iki il öncəyə qayıdıb, 2022-ci il sentyabrın 9-da zəngin və şanlı tarixi keçmişə malik, Qarabağın baş tacı sayılan Şuşa şəhəri ilə ilk tanışlığımı xatırlayıram. Şuşa İli çərçivəsində və görkəmli şairə Xurşidbanu Natəvanın 190 illiyi münasibətilə Mədəniyyət Nazirliyi və Şuşa Şəhəri Dövlət Qoruğu İdarəsinin birgə təşkilatçılığı ilə XIX əsr Azərbaycan söz-sənət irsində məxsusi yeri olmuş “Məclisi-üns” ədəbi məclisinin bərpa toplantısının açılışı oldu. Xan qızının evinin qarşısında gerçəkləşən tədbirdə ud və qanun ifaçılarının müşayiəti ilə “Qanadsız mələk” adlı şeirimlə çıxış etmişdim. Həmin günün gözəlliyi xatirəmə əbədi həkk olunub.
Bakıdan Şuşaya ilk səfərim boyunca ulu öndərimiz Heydər Əliyevin bu sözləri qulağımda səslənirdi; "Şuşa Azərbaycanın ən əziz və böyük tarixi olan bir guşəsidir. Şuşanı yaradanlar, Şuşa şəhərini quranlar, Şuşa qalasını tikənlər Azərbaycan torpağının sahibləri olublar və Qarabağda Azərbaycan torpağının daim qorunması, saxlanması üçün Şuşa şəhərini, qalasını yaradıblar. Bu, Azərbaycan xalqının, əcdadlarımızın yaratdığı böyük abidədir, təkcə şəhər deyil, böyük bir tarixi abidədir".
Azərbaycansız Şuşa, Şuşasız Azərbaycan bir heçdir. Xatırlayıram, Şuşaya çatdıqda bayrağımızı görən an ayaq üstə alqışlayıb, şair, yazıçı həmkarlarımla bir-birimizi təbrik edib, göz aydınlığı vermişdik. Həmin anı sözlə ifadə etmək çox çətindir. İki il ötməsinə rəğmən hələ də yadıma düşdükdə fərəhlənib qəhərlənirəm.
Əbəs yerə Şuşa Azərbaycan mədəniyyətinin ocağı hesab olunmur. Əlbətdə ki səbəbi dərindir. Firudin Şuşinski rus dilində nəşr etdirdiyi "Şuşa" adlı əsərində yazırdı: "Azərbaycan Elmlər Akademiyasında olan məlumata görə, XIX əsrdə Şuşada 95 şair, 22 musiqişünas, 38 müğənni, 16 heykəltəraş, 5 astronom, 18 arxitektor, 16 həkim və 42 müəllim olmuşdur.”
Azərbaycanın mədəniyyət tarixində dərin iz buraxmış Şuşa şəhərində tarixən ədəbiyyata, incəsənətə böyük maraq olub, bu şəhər Azərbaycanın elm, mədəniyyət, musiqi tarixinə bir çox böyük şəxsiyyətlər bəxş edib.
Şuşada anadan olub və orada yetişən Azərbaycanın məşhur simalarının bir neçəsinin adlarını qeyd etmək yerinə düşər. Azərbaycan ədəbiyyatında yetişən görkəmli lirik-satirik şair Qasım bəy Zakir, məşhur xeyriyyəçi, Azərbaycanın tanınmış şairə və rəssamı, Qarabağ xanı Mehdiqulu xanın qızı Xurşidbanu Natəvan, İbrahim xanın qızı, məşhur xeyriyyəçi Gövhər Ağa, musiqişünas, astronom, çoxşaxəli elmi yaradıcılıq fəaliyyəti ilə məşhur olan, 21 kitabın müəllifi Mir Möhsün Nəvvab, Azərbaycan ədəbiyyatına 500-ə yaxın şeir bəxş etmiş Fatma xanım Kəminə, şairə Ağabəyim Ağa, Azərbaycan ədəbiyyatının klassikləri Nəcəfbəy Vəzirov, Əbdürrəhim bəy Haqverdiyev, məşhur yazıçı Yusif Vəzir Çəmənzəminli, məşhur jurnalist Qasım bəy Vəzirov, məşhur tədqiqatçı-alim, pedaqoq Firudin bəy Köçərli, Azərbaycan musiqisinin tacı Üzeyir Hacıbəyli, Niyazi, Əfrasiyab Bədəlbəyli, Fikrət Əmirov kimi bəstəkarlar, dünya şöhrətli General Səməd bəy Mehmandarov.
Məşhur xanəndələr Hacı Hüsü, Cabbar Qaryağdıoğlu, Məşədi İsi, Keçəçi oğlu Məmməd, Sadıq Əsəd oğlu (Sadıqcan), Seyid Şuşinski, Bülbül, Xan Şuşinski, Rəşid Behbudov kimi dünya şöhrətli xanəndə, musiqiçilərin adı da Şuşa ilə bağlıdır.
Ümummilli lider Heydər Əliyevin bu önəmli fikirləri əslində hər bir azərbaycanlının ürəyindən keçənləri ifadə edir: “Şuşa təkcə şuşalılar üçün yox, bütün azərbaycanlılar üçün, vətənini, millətini sevən hər bir vətəndaşımız üçün əziz bir şəhərdir, əziz bir torpaqdır, əziz bir qaladır, əziz bir abidədir”
2024-cü il oktyabrın 14-də Xalq artisti, professor Firəngiz Əlizadənin idarəçiliyi ilə bu dəfə bəstəkar və musiqişünas həmkarlarımla Azərbaycan Bəstəkarlar İttifaqının 90 illik yubileyi münasibətilə Şuşaya yola düşdük. Yol boyu öz-özlüyümdə düşünürdüm ki, 2019-cu ildə Azərbaycan Bəstəkarlar İttifaqına üzv seçildikdə heç bilməzdim ki, 5 il sonra İttifaqın 90 illik yubileyini Şuşada qeyd edərik. Şuşanın dağları, qayaları, meşələri, yamacları, havası, suyu əsl möcüzədir. Dumanlı, çiskinli, təvazökar və təmkinli şəhərlə yenidən görüşdükdə gördüm ki, yaraları nisbətən sağalıb, yaxşılaşıb. İlk pıçıldadığım söz bu oldu; “Səni məğrur görməyimə çox şadam, Şuşa!”
Bu 90 illik tarix milli bəstəkarlıq məktəbimizin banisi dahi Üzeyir Hacıbəylinin adı və fəaliyyəti ilə birbaşa bağlıdır. Üzeyir bəyin doğma yurdu Şuşada keçirilən səyyar plenumun ilk günü “Şuşa” hotelinin Üzeyir Hacıbəyli salonunda konfransla başladı. Azərbaycan Respublikası Prezidentinin Şuşada xüsusi nümayəndəsi Aydın Kərimov çıxış edərək qonaqları salamladı. İttifaqın sədri Xalq artisti, professor Firəngiz Əlizadə başda olmaqla tədbirdə iştirak edən və etməyən bütün üzvləri 90 illik yubiley münasibətilə təbrik etdi. Hörmətli sədrimiz, dünyanın “Sülh artisti” Firəngiz Əlizadə ön sözlə çıxış edərək dahi Üzeyir bəyin boya-başa çatdığı bu müqəddəs diyarda ABİ-nin 90 illik yubileyinin təşkilinin nə qədər şərəfli olduğunu vurğuladı. Bu qüruru bizə yaşadan Ali Baş Komandana və onun rəhbərliyi ilə Şuşanı, eləcə də, işğal altındakı digər torpaqlarımızı azad edən rəşadətli Silahlı Qüvvələrimizə minnətdarlığını bildirdi. Firəngiz xanım həmçinin Bəstəkarlar İttifaqının keçdiyi 90 illik şanlı yoldan söz açdı. 1934-cü ildə Bəstəkarlar İttifaqını yaradan dahi bəstəkar Üzeyir Hacıbəyli başda olmaqla, Qarabağı təmsil edən bəstəkarların həyat və yaradıcılığına da toxundu.
Tədbir Xalq artisti Fəxrəddin Kərimovun rəhbərliyi ilə simfonik orkestrin və birləşmiş kişi xorunun ifasında səslənən dünya şöhrətli bəstəkar Firəngiz Əlizadənin “Zəfər marşı”nın videoklipinin nümayişi ilə başladı.
Plenumun əsas müzakirə mövzusu Azərbaycanda musiqi mədəniyyətinin inkişafı üçün yeni yolların müəyyən olunması idi: Xalq artisti Sərdar Fərəcov – “Şuşanın musiqi salnaməsi”, Əməkdar incəsənət xadimi Gülnaz Abdullazadə - “Üzeyir Hacıbəyli və Azərbaycan Bəstəkarlar İttifaqı”, Əməkdar incəsənət xadimi Akif Quliyev – “Bəstəkarlarımızın şanlı qələbəyə həsr olunan əsərləri”,
Əməkdar mədəniyyət işçisi Səadət Təhmirazqızı - “Şuşa professional musiqidə” adlı yeni kitab haqqında”.
Çox şadam ki, konfrans mənim ürək sözlərimlə tamamlandı. Bu fürsəti yaratdığı üçün dəyərli sədrimizə dərin təşəkkürümü ifadə edirəm.
Plenumun axşam konsertini tanınmış violin ifaçısı Nəzrin Aslanlının rəhbərliyi ilə Dövlət Simli Kvartetinin çıxışı rəngləndirdi. Bakıda konsert salonlarında dəfələrlə dinlədiyimiz Üzeyir Hacıbəyli, Qara Qarayev, Fikrət Əmirov və Firəngiz Əlizadənin məşhur əsərlərini Şuşada dinləmək ruhumda indiyəcən yaşamadığım hisslər oyadırdı.
Plenumun ikinci günü – 15 oktyabrda həmkarlarla Şuşa Yaradıcılıq Mərkəzində olduq. Direktor Fəxrəddin Hacıbəyli qonaqları salamlayaraq, mərkəzin fəaliyyəti, “Heydər Əliyev və Qarabağ” fotosərgisi ilə tanış etdi.
Üzeyir Hacıbəylinin Şuşadakı ev-muzeyini görmək isə bir ayrı təsirləndirdi. Prezidentin Şuşadakı xüsusi nümayəndəsinin müavini Elşad Əliyev ittifaqın üzvlərini maraqlı eksponatlarla tanış etdi. Çıxışçılar; ön söz müəllifi- Xalq artisti, professor Firəngiz Əlizadə, professorlar Zemfira Qafarova, Həcər Babayeva, Məmmədağa Umudov idi.
Plenum öz işini daha bir önəmli məkanda – Bülbülün ev-muzeyində yekunlaşdırdı. Çıxışçılar – ön söz müəllifi Xalq artisti, professor Firəngiz Əlizadə, fəlsəfə elmləri doktoru, professor Mina Hacıyeva, sənətşünaslıq üzrə fəlsəfə doktoru, dosent Güllü İsmayılova, bəstəkar Vüqar Camalzadə idilər.
Azərbaycan mədəniyyətinin əzəli paytaxtı və 2024-cü il üzrə “İslam dünyasının mədəniyyət paytaxtı” Şuşada keçirilən plenum ömürlük xatirəmə həkk olundu.
Böyük qürur hissi, şəhidlərimizin ruhuna minnətdarlıqla qeyd etmək istərdim ki, 2020-ci ilin 8 noyabrında – otuzillik işğaldan azad edildiyi gün Şuşa yenidən doğuldu. Şuşa Azərbaycansız əsir kimi yaşadı. Əgər buna yaşamaq demək olardısa. Amma indi qələbəmizin böyük memarı cənab prezident İlham Əliyevin sözünə qüvvət!
Əziz Şuşa, sən azadsan!
Əziz Şuşa, biz qayıtmışıq!
Əziz Şuşa, biz səni dirçəldəcəyik!
Şuşa bizimdir! Qarabağ bizimdir! Qarabağ Azərbaycandır!”
Azərbaycan Respublikasının Prezidenti İlham Əliyevin 2020-ci il 3 dekabr tarixli Sərancamı ilə xalqımızın qüdrətinin və milli qürurumuzun təntənəsinə çevrilən, dövlətimizin nüfuzu və gələcək inkişafı baxımından müstəsna əhəmiyyət kəsb edən bu misilsiz qələbənin əbədiləşdirilməsi məqsədilə hər il noyabrın 8-i – Şuşanın azad olunduğu gün Azərbaycan Respublikasında Zəfər Günü kimi təntənəli şəkildə qeyd edilir. Bayrağımızı zirvələrə yüksəldən Zəfərimiz əbədi, Zəfər Günümüz mübarək olsun!
“Ədəbiyyat və incəsənət”
(04.11.2024)
İstanbulda azərbaycanlı tələbələr arasında futbol turniri başlayıb
Türkiyə-Azərbaycan Dərnəkləri Federasiyasının (TADEF) dəstəyi ilə Yıldız Texnik Universiteti tərəfindən İstanbulda azərbaycanlı tələbələr arasında futbol turniri təşkil edilib. Turnir 44 günlük Vətən müharibəsinin 4-cü ildönümünə həsr olunub.
“Ədəbiyyat və incəsənət” portalına Diasporla iş üzrə Dövlət Komitəsindən verilən məlumata görə, idman tədbirinin açılışında Türkiyə və Azərbaycanın Dövlət himnləri səsləndirilib, iki qardaş ölkənin şəhidlərinin əziz xatirəsi ehtiramla yad edilib.
Sonra TADEF sədri Adalet Turan və müşaviri Pərviz Məmmədzadə çıxış edərək turnirin keçirilməsində əsas məqsədin tələbələrin asudə vaxtlarının səmərəli təşkili, eyni zamanda gənclərin vətənpərvərlik ruhunda yetişməsi olduğunu bildiriblər.
Futbol turnirinə qatılan komandalar işğaldan azad edilmiş ərazilərimizin şərəfinə “Xocavənd”, “Xocalı”, “Xankəndi”, “Zəngilan”, “Cəbrayıl”, “Ağdam, “Laçın”, “Şuşa”, “Füzuli” və “Zəngilan” adlandırılıb.
İlk görüş "Xankəndi" və "Füzuli" komandaları arasında baş tutub.
Turnirin final oyunu 8 Noyabr - Zəfər Günündə keçiriləcək.
Qalib komanda TADEF tərəfindən turnirin kuboku ilə mükaflandırılacaq. Digər komandalara isə sertifikat təqdim olunacaq.
“Ədəbiyyat və incəsənət”
(04.11.2024)
“Türk” - Ayşe Şeyma Arslan
“Ədəbiyyat və incəsənət” portalının “Ulduz” jurnalı ilə birgə təqdim etdiyi layihədə Türkiyənin “Genç Yürekler” jurnalının seçimində 51 türk müəllifinin yazıları yer alır. Türkiyə türkcəsində yayılan əsərlərin əsas qayəsi budur: “Dildə, fikirdə, işdə birlik!”.
“Türk”
Ayşe Şeyma Arslan
Dağları erittik, kurdumuzla geldik,
Mücadeleyi kutsal kıldık, savaşarak can verdik,
Cihanı sardık, göğü titrettik,
Hakimiyetimizi zahir ettik,
Türk nedir dünyaya öğrettik!
Değişmeyen bir değer var aklımızda,
Dün, bu gün, elbette, yarın da
Türklük her daim var olacak kanımızda.
Dön de bir bak verilen mücadelelere, destanlara, yazılanlara:
Türk ne zaman ram olmuş düşmanlarına?!
Geçmişini bil, geleceğini parlat emin adımlarla!
Ne önemi var Hun, Selçuklu, Osmanlı;
Türk’tür her daim bunun adı!
Verdiği mücadelelerle düşmanı titreten atandan
Devralma vakti geldi artık bayrağı!
Yürü, ilerle davanda,
Pes etmek yoktur kanında!
Sen Türk’sün,
Bastığın her toprağı, her taşı
Koruyacaksın her anında!
“Ədəbiyyat və incəsənət”
(04.11.2024)
Ağdam Dövlət Sosial-İqtisad kollecində milli kinomuz təbliğ olunub
Ağdam Dövlət Sosial-İqtisad kollecində Gənclərin İnkişaf və Karyera Mərkəzinin Qarabağ Regional Nümayəndəliyinin Ağdam bölməsinin təşkilatçılığı, Qarabağ Regional Gənclər və İdman İdarəsinin Ağdam Rayonu üzrə Gənclər və İdman Sektorunun və Ağdam Dövlət Sosial-iqtisadi Kollecinin tərəfdaşlığı ilə keçirilən "Milli Kinonun Səsləri və Səhnələri: İrsimizə Bir Baxış" layihəsi çərçivəsində intellektual yarış keçirilib.
Tələbələr əvvəlcədən izlədiklərini 10 milli kino barədə hazırlanmış suallara cavab verməyə çalışıblar.
Sonda qalib komandaların üzvləri diplom və hədiyyələrlə təltif ediliblər.
İncəsənətimizin bölgələrdə təbliği baxımından əlbəttə ki, mütərəqqi addımdır.
“Ədəbiyyat və incəsənət”
(04.11.2024)
Zəfərin 44 şərəfli günü - ESSE
Murad Vəlixanov, “Ədəbiyyat və incəsənət”
Hər müharibənin taleyi fərqli cür həll olunur. Məsələn, qayıdaq ikinci dünya müharibəsinə. Alman faşizmi Berlindən yola çıxıb Moskvaya qədər gəldi. Lakin onların önünü rus ordusu deyil şimalın sərt soyuğu kəsdi. Almanlar qara, çovğuna tab gətirə bilmədilər. Çoxu demək olar ki donaraq can verdi və geri çəkilməyə məcbur oldular. Nəticədə Sovet ordusu may ayında Berlində SSRİ bayrağını qaldıraraq qələbəsini elan etdi. Nəhayət ki, bizim də zəfər günümüz oldu. Sentyabr ayında ermənilərin dinc sakinləri hədəf alaraq müharibə cinayətlərini davam etdirməsi onsuz da daşmaq üzrə olan səbr kasamızı sındırdı. Sentyabrın 27-də başlayan tarixi yürüşümüz noyabrın 10-da Ermənistan ordusunun ağ bayraq qaldırması ilə bitdi. Gəlin bu tarixi yürüyüşümüzü yenidən xatırlayaq. Əslində bunların baş verəcəyi hələ ayın əvvəlindən bəlli idi. Çünki ermənilər "yeni işğal, yeni ərazilər" məntiqi ilə öz quyularını qazmağa başlamışdılar. İstər prezident səviyyəsində, istərsə də XİN dəfələrlə Avropa şurasında və digər ali tribunalarda ermənilərin yeni müharibə üçün ayağa qalxdığını bəyan edirdi. Lakin həmişə olduğu kimi yenə bizi dinləyən, səsimizə səs verən tapılmadı. Beləliklə, bizi içdən-içə gəmirən gənənin başını əzmək vaxtı çatmışdı. Əvvəlcə ermənilərin həmləsini dəf edən ordumuz hədəf olaraq cəbhənin şimal istiqamətini seçdi və uzun illər bizdən neçə-neçə oğulları alan, yüzlərlə şəhid verdiyimiz Murovdağ silsiləsində bayrağımız ucaldıldı. Daha sonra isə keçmiş Ağdərə rayonunun Suqovuşan qəsəbəsi də azad edilən ərazilər siyahısına daxil oldu. Lakin hələ hərşey yeni başlayırdı. Cəbhənin cənub istiqamətində də qələbə xəbərləri gəldi. Füzulinin 4, Cəbrayılın isə 2 kəndi azad edilmişdi. Cəbhədə döyüşlər davam edərkən Bakıda abu-hava fərqli idi. Çünki 2016-cı ilin dörd günlük aprel döyüşlərində də irəliləyərkən önümüz kəsilmişdi və ondan sonra da xeyli şəhidlər vermişdik. Ancaq bu səfər önümüzü heç kim kəsə bilməzdi. Ordu və Xalq birliyinin önündə kim dura bilərdi ki?! Hər kəs Xankəndidən, Xocalıdan xoş xəbərlər gözləyərkən ordumuz yönünü cəbhənin cənub istiqamətinə çevirdi. Ta Səlçuqlu dövlətindən qalma Turan taktikası işə düşdü. Həm cənubdan, həm də şimaldan ermənilər üçün çəmbər daralmaqda idi. İlk qələbə xəbəri də özünü çox gözlətmədi. Oktyabrın 4-ündə CƏBRAYIL rayonu azad edildi. Bu həm ordumuzda, həm də xalqımızda böyük güc və psixoloji üstünlük yaratdı.
Ordumuz cəbhədə qələbələr qazanarkən ermənilər murdarlıqlar silsiləsinə birini daha əlavə elədi. Əvvəlcə yazıq donunu geyinən bu sürüngənlər cəsədlərin və əsirlərin dəyişdirilməsi üçün hər vəclə əməliyyatların dayandırılmasını istəyirdilər. Oktyabrın 18-ində ermənilərin istəyi təmin edildi. Ancaq heç kim yazıq maskasını taxan bu məxluqların əsl məqsədini görmədi. Livan ermənilərindən silah tədarükü edən Ermənistan ordusu onlardan aldıqları istifadə edilməsi qadağan edilən kasetli bombalarla gecə saatlarında Gəncə şəhərini bombaladı. Bəli, yenə ermənilər bütün dünyanı əlində oyuncaq kimi oynadaraq istədiklərini həyata keçirmişdi. Hər kəs də bilirdi, onların səmimi olmadığını və olmayacağını. Ermənilərin bir məqsədi var idi. Ordumuz sərhədi keçsin və digər dövlətlər "Ermənistan işğal edilir" siqnalı ilə onlara yardım etsin. Lakin ordumuz bu tələyə düşməyərək haqq mübarizəsini davam elətdirdi və oktyabrın 20-ində Füzuli şəhəri erməni işğalından azad edildi. Artıq hər şey bizim istədiyimiz formada davam edirdi. Ermənilər kimə ağız açırdısa gözüyaşlı geri dönürdülər. AZƏRBAYCAN isə haqq mübarizəsində haqqlı olduğunu bütün dünyaya sübut edirdi.
Füzuli şəhərindən sonra oktyabrın 24-ündə Zəngilan şəhəri də azad edildi. Bundan 4 gün sonra, yəni ayın 28-i Qubadlı şəhəri işğalçılardan tam təmizləndi. Bu zaman aralığında Xocavənd rayonu Hadrut qəsəbəsi də azad edildi. Artıq geriyə bir hədəf qalmışdı... ŞUŞA. Hədəf artıq alnımızda qara ləkə kimi qalan, alınmaz dedikləri qalamızı qəlbimizin baş köşəsini geri almaq zamanı gəlmişdi. Bu günlərə gəlib çatana qədər xeyli can itirmişdik, şəhidlər vermişdik. Artıq POLADIN, MÜBARİZİN, FƏXRƏDDİNİN, EMİLİN CƏBRAYILIN və cəmi şəhidlərimizin qisasını almaq vaxtı çatmışdı. Ermənilər daxil bütün dünyanı şoka salacaq və çox güman ki qiyamət gününə qədər unudulmuyacaq əməliyyat üçün düyməyə basıldı. Noyabrın 8-ində ermənilər bütün təchizatı ilə birlikdə ordumuzu şəhərin qala qapısının girişində gözləyirdi. Lakin AZƏRBAYCAN ordusunun sürprizlərə açıq bir ordu olduğunu bəlkə də bir otuz il daha keçsə dərk etməyəcəkdi. General-Polkovnik Hikmət Hacıyevin rəhbərlik etdiyi bu şanlı ordu eyni XAN ŞUŞİNSKİNİN dilə gətirdiyi başı dumanlı qayalarına dırmaşaraq düşmənin arxasına sızdı və onlara ölən günlərinə qədər unutmayacaqları bir zərbə endirdi. Beləliklə, ermənilər onurğa sümüklərinin də sındırılması ilə birlikdə noyabrın 10-unda ağ bayraq qaldıraraq təslim oldular. Bəli, XOCALININ qisası alınmışdı. Bəli, bu işgəncə, zülm, göz yaşı sona çatmışdı. Biz qələbə qazanmışdıq. Artıq qalib ordunun, qalib ölkənin vətəndaşı idik.
Bəli, alnımızdakı ləkəni, şərəfimizi vicdanımızı, sildirilməsi min hoqqadan çıxılan tarixi əzəmətimizi geri qaytarmışdıq. Artıq başı dik, alnıaçıq gəzməmək üçün bir səbəb yox idi. Əliyar Əliyevin, Əlif Hacıyevin qanı yerdə qalmadı. Xocalıda qanlarını axıtdıqları minlərlə körpənin qisasını almışdıq.
Artıq geriyə bir hədəf qalırdı. "BÖYÜK QAYIDIŞ"A hazırlaşmaq. ŞUŞANIN işğalı ilə batan BÜLBÜLÜN sədası yenidən ucalacaq. AĞDAMIN işğalı ilə soyuyan təndir çörəyi yenidən isinəcək. Qısacası QARABAĞ gözəlləşəcək!
"Ədəbiyyat və incəsənət”
(04.11.2024)
Bir daha “Vətənimsən, Azərbaycan!” adlı müsabiqə barədə
Xəbər verdiyimiz kimi, Qori Müəllimlər Seminariyasının Azərbaycan bölməsinin fəaliyyətə başlamasının 145-ci ildönümünə həsr edilmiş “Vətənimsən, Azərbaycan!” adlı müsabiqə elan edilib. Oxucularımızln müsabiqə şərtləri ilə bağlı daha geniş bilgi almaları istəklərini nəzərə alıb müsabiqə barədə daha geniş məlumat təqdim edirik.
ADA Universiteti Qazax Mərkəzi/Qazax Müəllimlər Seminariyası Qori Müəllimlər Seminariyasının Azərbaycan bölməsinin fəaliyyətə başlamasının 145-ci ildönümünə həsr edilmiş “Vətənimsən, Azərbaycan!” adlı müsabiqəni 9-cu sinif şagirdləri arasında elan edir.
Artıq ikinci dəfə təşkil olunan müsabiqənin əsas məqsədi şagirdlərin azərbaycançılıq ruhunda tərbiyə olunması, onların ölkəmizin tarixi, ana dili, Azərbaycan ədəbiyyatı, coğrafiyası və mədəniyyəti sahələrində biliklərinin artırılması, habelə şagirdlərin komanda şəklində çalışma bacarıqlarının inkişaf etdirilməsidir.
Qeyd edək ki, Qori Müəllimlər Seminariyası 1876-cı ildə Cənubi Qafqaz xalqları üçün ibtidai siniflərdə dərs keçmək üçün müəllimlərin hazırlanması məqsədilə yaradılıb. Seminariyanın Azərbaycan bölməsi isə 1879-cu ildə fəaliyyətə başlayıb. Bu bölmənin rəhbəri böyük maarifçi Aleksey Osipoviç Çernyayevski olmuşdur. Fəaliyyətdə olduğu dövr ərzində bu bölməni yüzlərlə azərbaycanlı gənc bitirmiş və maarif ənənələrinin ölkəmizdə yayılması, uşaqların məktəblərə cəlb olunmasında əvəzsiz xidmətləri olmuşdur. Məzunların arasında Firudin bəy Köçərli, Üzeyir bəy Hacıbəyli, Müslüm Maqomayev, Cəlil Məmmədquluzadə kimi dahi şəxslər də yer almışdır. Məhz bu səbəbdən, “Vətənimsən, Azərbaycan!” müsabiqəsi Qori Müəllimlər Seminariyasının Azərbaycan bölməsinin fəaliyyətə başlamasının 145-ci ildönümünə həsr olunmuşdur.
Müsabiqə 2024-2025-ci tədris ilində Qazax-Tovuz RTİ, Gəncə-Daşkəsən RTİ və Mərkəzi Aran RTİ-yə daxil olan ümumtəhsil məktəblərinin 9-cu sinif şagirdləri arasında təşkil edilir.
Qeydiyyat: Müsabiqəyə qeydiyyat onlayn qaydada həyata keçirilir. Bu zaman şagirdlər göstərilən linkə daxil olaraq lazımi xanalarda öz məlumatlarını dolduraraq, imtahan verəcəkləri imtahan mərkəzlərini seçə bilərlər.
Müsabiqənin təşkil edilmə qaydaları:
Müsabiqə 2 mərhələdən ibarətdir
I mərhələ - rayon/şəhər daxili - Bu mərhələdə onlayn qeydiyyatdan keçmiş şagirdlər iştirak edir:
* Şagirdlərə 75 sualdan ibarət sual kitabçası təqdim olunur
* Suallar Azərbaycan tarixi, Ana dili, Azərbaycan ədəbiyyatı, coğrafiyası və mədəniyyətinə dair mövzuları əhatə edir.
* Müvafiq olaraq, hər bir mövzu üzrə 15 sual təqdim olunur.
* İmtahan 2 saat davam edir
* Bu mərhələdə hər bir regional təhsil idarəsi üzrə ən yaxşı nəticə göstərmiş 5 şagird növbəti mərhələyə keçir
Final Mərhələsi - Müsabiqənin final mərhələsi “Nə, Harada, Nə zaman” intellektual oyun formatında Qazax Müəllimlər Seminariyasında keçirilir:
* I turun qalibləri öz məktəblərində (qalibin özü daxil olmaqla) 5 nəfərdən ibarət komanda yığır. I turun qalibi komandaya kapitanlıq edir.
* Ümumilikdə 15 komanda formalaşdıqdan sonra final mərhələsi təşkil edilir.
* Finala çatmış 15 komanda təyin olunmuş vaxtda Qazax Müəllimlər Seminariyasında müsabiqənin final mərhələsində iştirak edir.
* İnteraktiv oyun şəklində keçirilən bu mərhələdə komandalara moderator tərəfindən ümumilikdə 20 sual səsləndirilir.
* Hər bir sualı cavablandırmaq üçün şagirdlərə/komandaya 2 dəqiqə vaxt verilir. Yarışın sonunda ən yüksək nəticə göstərən 3 komanda qalib olur.
* Ən yüksək nəticələri göstərmiş komandalar, müvafiq olaraq, I, II və III yerlərə layiq görülüb hədiyyə və sertifikatlarla mükafatlandırılır.
Müraciət üçün Onlayn Ərizə formasını doldurmaq lazımdır.
Qeydiyyat 15 noyabr 2024-cü il tarixinədək aparılacaqdır. Əlaqə üçün: Bu email ünvanı spambotlardan qorunur. Onu görmək üçün JavaScripti qoşmaq lazımdır.
Qeyd: Onlayn ərziəni tam doldurmayan namizədlərin müraciətinə baxılmayacaq.
“Ədəbiyyat və incəsənət”
(04.11.2024)
Azərbaycan modelyerləri “Moda Birliyi” III Beynəlxalq Forumunda iştirak edəcəklər
Noyabrın 19-20-də Sankt-Peterburqdakı Tavriya sarayında “Moda Birliyi” üçüncü beynəlxalq forumu keçiriləcək.
AzərTAC tədbirin rəsmi saytına istinadla xəbər verir ki, forumun məqsədləri postsovet məkanının zəngin mədəni irsi haqqında biliklərin yayılması, mədəniyyətlərarası əlaqələrin və iqtisadi qarşılıqlı fəaliyyətin möhkəmləndirilməsi, yüngül sənayenin inkişafı yolunda mövcud inzibati maneələrin aradan qaldırılması ilə bağlı problemlərin həllindən ibarətdir.
Tədbirdə MDB ölkələrinin sənaye müəssisələrinin və moda biznesinin, peşəkar assosiasiya və birliklərin, aidiyyəti nazirlik və idarələrin, təhsil müəssisələrinin nümayəndələri bir araya gələcək.
Bu il tədbir iştirakçılarını geniş proqram gözləyir: ənənəvi treklərə - iqtisadiyyat, istehsal, yaradıcı sənaye, kadrlar, mədəni ənənələr - yeniləri əlavə olunacaq: gözəllik və sağlamlıq, moda turizmi. Forum çərçivəsində xüsusi elan edilmiş müsabiqənin qalibi də daxil olmaqla MDB ölkələrinin görkəmli və gənc dizaynerlərinin kolleksiyalarının təqdim olunacağı moda nümayişləri keçiriləcək.
Foruma hazırlıq çərçivəsində Azərbaycan, Belarus, Qazaxıstan, Qırğızıstan, Rusiya, Tacikistan və Özbəkistanın dövlət orqanlarının, uyğun assosiasiyaların, istehsal sektorunun, elmi və biznes icmalarının nümayəndələrinin daxil olduğu işçi qrup yaradılıb.
Noyabrın 10-da Tavriya sarayının Yekaterina zalında Azərbaycan, Belarus, Qazaxıstan, Qırğızıstan, Rusiya, Tacikistan, Türkmənistan və Özbəkistan dizaynerlərinin kolleksiyalarından ibarət böyük nümayiş keçiriləcək. Azərbaycandan məşhur modelyerlər Anara Zakirli, Natavan Əliyeva, həmçinin Yelena Poqirnitskaya (Belarus), Kayrolla Abişev (Qazaxıstan), Aysalkın Ismailova (Qırğızıstan), Liliya Kiselenko (Rusiya), Vays Asoyev və Laylo Habibi (Tacikistan), Selbi Sultanova (Türkmənistan), Dilrabo Mamarahimova, İrina Şaripova və Şoyista Babamirzayeva (Özbəkistan) öz kolleksiyalarını təqdim edəcəklər. Eyni zamanda, Azərbaycandan olan istedadlı modelyer Zümrüd Mirzəliyeva builki moda forumunda öz kolleksiyasını nümayiş etdirəcək.
Tədbir MDB Parlamentlərarası Assambleyası (PA) tərəfindən Rusiya Federasiyası Mədəniyyət Nazirliyi, Sənaye və Ticarət Nazirliyi, Təbii Sərvətlər və Ekologiya Nazirliyi, eləcə də Avrasiya Qadınlar Forumunun dəstəyi ilə keçirilir.
Qeyd edək ki, tədbir ilk dəfə 2022-ci ilin oktyabrında bütün Birlik ölkələrinin nümayəndələrinin iştirakı ilə keçirilib. Forumun yekunlarına əsasən, MDB PA Şurasının 2022-ci il oktyabrın 27-də Səmərqənddə keçirilən iclasında Birlik dövlətlərinin parlament rəhbərləri “Moda Birliyi” beynəlxalq forumunun formatının yüngül sənaye sahəsində təcrübə, rəy və ekspert məlumatlarının mübadiləsi üçün daimi illik platformaya çevrilməsi barədə yekdil qərar qəbul ediblər.
“Ədəbiyyat və incəsənət”
(04.11.2024)
Azərbaycan XXX Minsk Beynəlxalq Kinofestivalında təmsil olunur
Azərbaycan noyabrın 1-dən 8-dək Minskdə “Keyfiyyət nişanlı kino” devizi altında keçirilən XXX Minsk Beynəlxalq “Listapad” Kinofestivalında təmsil olunur.
AzərTAC kinofestivalın saytına istinadla xəbər verir ki, yubiley film festivalı Belarus kinosunun 100 illiyi və festivalın 30 illiyinə həsr olunub.
Azərbaycanı kinofestivalda “Gənclərin kinosu” müsabiqəsinin münsiflər heyətinin sədri kimi prodüser, rejissor, ssenarist Cavid İmamverdiyev təmsil edir. Onunla birlikdə filmləri İsveçrədən olan rejissor və sənədli film prodüseri Domeniko Lukkini və belaruslu rejissor Kirill Xaletski qiymətləndirəcək.
Bildirilir ki, festivala artıq 112 ölkədən 2200-dən çox müraciət daxil olub. Tamaşaçılara dünyanın müxtəlif yerlərindən ən yaxşı filmlərin daxil edildiyi yeddi müsabiqə proqramı təqdim ediləcək.
Bu il “Listapad” kinofestivalı qürurla iki müsabiqənin təkrar keçiriləcəyini elan edir. Milli müsabiqədə istedadlı Belarus rejissorlarının yaratdığı 23 film, milli kino məktəbi müsabiqəsində isə aparıcı kino universitetlərindən tələbələrin 15 seçilmiş işi təqdim olunacaq.
Əsas bədii film müsabiqəsi tamaşaçılara 24 ölkədən 18 film təqdim edəcək. Onların arasında 2024-cü ildə Kann Film Festivalında Qran-Priyə layiq görülmüş Hindistan rejissoru Payala Kapadianın “Bizə işıqlı görünən hər şey” dramı var.
Sənədli film kateqoriyasında 7 ölkədən 12 əsər əsas mükafatlara namizəd olacaq. Animasiya şedevrləri də festivalda öz yerini tapacaq: bu kateqoriyada 24 ölkədən 50 film təqdim olunacaq.
Bununla yanaşı, 17 ölkədən 11 filmin özünü və ailəsini tapmaq üçün yeni perspektivlər təqdim edəcəyi “Gənclərin kinosu” müsabiqəsi də keçiriləcək. 2024-cü ildə bu istiqamət gənc istedadların potensialının açılmasını, ölkələrin birləşməsini əks etdirir.
Gənc tamaşaçılar üçün kinofestivalda 6 ölkədən 8 filmin nümayiş olunacağı “Listapadzik” müsabiqəsi də olacaq. Burada uşaq və gənclər filmlərinin tamaşaçıları üçün yeni ekran əsərləri təqdim ediləcək. Müsabiqə zamanı “Belarusfilm” milli kinostudiyası tərəfindən istehsal olunmuş “Sirin quşu. Slavyan əfsanələrinin qanadları” filminin premyerası olacaq.
“Ədəbiyyat və incəsənət”
(04.11.2024)
Beynəlxalq Muğam Mərkəzində şair Mahirə Nağıqızının yaradıcılıq gecəsi keçirilib
Noyabrın 2-də Beynəlxalq Muğam Mərkəzində Qərbi Azərbaycan İcmasının təşkilatçılığı ilə tanınmış alim və pedaqoq, istedadlı şair və ictimai xadim, Azərbaycan Dövlət Pedaqoji Universitetinin (ADPU) prorektoru, professor Mahirə Nağıqızının yaradıcılığına həsr edilmiş poeziya gecəsi keçirilib.
AzərTAC xəbər verir ki, tədbirdə əvvəlcə Mahirə Nağıqızının həyat və fəaliyyətini özündə əks etdirən videoçarx nümayiş olunub.
Sonra tədbirdə çıxış edən Qərbi Azərbaycan İcmasının Qadınlar Şurasının sədri, Milli Məclisin deputatı Məlahət İbrahimqızı Mahirə Nağıqızının zəngin söz dünyasından, yaradıcılığının özünəməxsus cəhətlərindən danışıb, onun pedaqoq, istedadlı şair, vətənpərvər ziyalı və tanınmış alim olduğunu bildirib.
"Mahirə xanımın yaradıcılığında müxtəlif mövzular əks olunur. Bunlar vətən sevgisi, təbiət, ilahi məhəbbət, insanın ruh aləmi mövzularıdır. Lakin onun poeziyasında ən diqqətçəkən məqamlardan biri Vətənə olan sevgisidir. O, Vətən torpağının hər qarışını sevgi ilə tərənnüm edir. Mahirə xanımın yaradıcılığında Qarabağın 30 il müddətində işğal altında olduğu dövrdə elə bir guşəsi yoxdur ki, onunla bağlı şeir və ya hekayəsi olmasın. Bu gün isə artıq Qarabağ azaddır, Azərbaycanın ərazi bütövlüyü bərpa olunub və bu tarixi zəfər Mahirə xanımın yaradıcılığında yeni bir mərhələnin başlanğıcıdır", - deyə M.İbrahimqızı diqqətə çatdırıb.
Tədbirdə digər çıxış edənlər Azərbaycan Milli Elmlər Akademiyasının prezidenti, akademik İsa Həbibbəyli, ADPU-nun rektoru, professor Cəfər Cəfərov, Azərbaycan Atatürk Mərkəzinin direktoru, akademik Nizami Cəfərov, Milli Məclisin deputatı Hikmət Babaoğlu Mahirə xanımın yaradıcılığı haqqında fikirlərini bölüşüblər. Bildirilib ki, Mahirə xanım bu gün elmi fəaliyyəti ilə bərabər, ölkənin ictimai həyatında da fəal iştirak edir. Onun Qərbi Azərbaycan İcmasının fəaliyyətində də çox böyük əməyi var və Qərbi Azərbaycan həqiqətlərinin ölkə daxilində və xaricində təşviq edilməsi istiqamətində intensiv fəaliyyət göstərir.
Çıxış edənlər vurğulayıblar ki, çoxşaxəli və məhsuldar fəaliyyəti ilə tanınan professor 60-dan çox elmi əsərin, monoqrafiyanın, tədqiqat əsərlərinin müəllifidir. Bildirilib ki, bu əsərlərin bir çoxu müxtəlif dillərdə, xarici ölkələrdə nəşr edilib və tədris edilir.
Qeyd edək ki, müasir Azərbaycan poeziyasında imzası ilə tanınan və sevilən şair Mahirə Nağıqızı Türk dünyasının bir sıra universitetlərinin fəxri professorudur. Onun 70-dən çox şeirinə musiqi bəstələnib.
Tədbirdə şairin müəllifi olduğu şeirlər səsləndirilib.
Sonda çıxış edən Mahirə Nağıqızı təşkil olunmuş gecəni öz yaradıcılığının hesabatı kimi dəyərləndirib, elmi fəaliyyətinə göstərilən diqqətə görə minnətdarlığını bildirib.
Tədbir bədii hissə ilə davam edib.
Qeyd edək ki, ədəbiyyatşünas alim, elm və maarif təşkilatçısı kimi Mahirə xanım həm də Qərbi Azərbaycan Televiziyasında “Ziyalı” elmi-publisistik verilişin müəllifidir.
“Ədəbiyyat və incəsənət”
(04.11.2024)
COP29 günlərində Bakıda 2-ci Yüksək Səviyyəli Nazirlər Dialoqu keçiriləcək
Birləşmiş Millətlər Təşkilatının İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) çərçivəsində noyabrın 15-də Bakıda mədəniyyətə əsaslanan iqlim fəaliyyəti üzrə 2-ci Yüksək Səviyyəli Nazirlər Dialoqu keçiriləcək.
“Ədəbiyyat və incəsənət” portalı xəbər verir ki, Mədəniyyət Nazirliyindən AzərTAC-ın sorğusuna cavab olaraq bildirilib ki, dialoqun COP29 Mavi zonasında 90 dəqiqə ərzində baş tutması planlaşdırılır.
Birləşmiş Ərəb Əmirlikləri, Braziliya və Azərbaycanın mədəniyyət nazirliklərinin təşkilatçılığı ilə tədbirdə nazirlər, nazir müavinləri və beynəlxalq təşkilat rəhbərləri iştirak edəcəklər. Bu tədbirdə ekspert və qeyri-hökumət təşkilatı nümayəndələri ilə birgə 120-yə yaxın qonağın iştirakı gözlənilir. Yüksək səviyyəli dialoq mədəniyyəti, o cümlədən incəsənət və irsi iqlim fəaliyyəti gündəliyinə daxil etmək üçün beynəlxalq konsensusa nail olmağa çalışacaq.
COP29 çərçivəsində Azərbaycan pavilyonunda Mədəniyyətə Əsaslanan İqlim Fəaliyyətinin Dostları Qrupu, UNESCO, Azərbaycan, BƏƏ və Braziliya Mədəniyyət nazirliklərinin birgə təşkilatçılığı ilə yan tədbirin keçirilməsi, həmçinin tədbirdə Azərbaycanın təşəbbüsü olan Culture for Climate (C4C) layihəsinin təqdimatı da nəzərdə tutulur.
Qeyd edək ki, Mədəniyyət Nazirliyi COP29-a hazırlıq çərçivəsində cari ilin ötən dövründə bir çox tədbirlər təşkil edib. Bunlara UNESCO Baş Qərargahında Mədəniyyət Nazirliyi tərəfindən COP29 çərçivəsində həyata keçiriləcək mədəniyyət məzmunlu tədbirlərə dair təqdimat, “COP29 və Mədəniyyət: İqlim dəyişikliyinin mədəni ölçüləri” adlı konfransı, VI Ümumdünya Mədəniyyətlərarası Dialoq Forumunda ətraf mühitin mühafizəsi və iqlim dəyişmələrinin mədəni irsə təsirinə dair panel və plenar sessiyalar, Ağdam şəhərində baş tutmuş “Minaların və partlamamış hərbi sursatların mədəni mülkiyyətə təsiri”nə həsr olunmuş Xüsusi Konfrans, “Yaşıl dünya naminə həmrəylik ili”nə həsr olunmuş “Azərbaycan ekologiyası” adlı biblioqrafiya kitabının təqdimatı, eləcə də irili-xırdalı 10-larla tədbir daxildir.
“Ədəbiyyat və incəsənət”
(04.11.2024)
