Super User
Xalq yazıçısı Əzizə Cəfərzadənin 100 illiyi ərəfəsində “Seçilmiş əsərləri” nəşr edilir
Bu il Azərbaycanın Xalq yazıçısı, filologiya elmləri doktoru professor Əzizə Cəfərzadənin (1921-2003) anadan olmasının 100 ili tamam olur. Yubiley ərəfəsində yazıçının çoxcildlik “Seçilmiş əsərləri”nin çapına başlanılıb və artıq bu il 12 cild nəşr olunub. “Elm və təhsil” nəşriyyatında yayımlanan cildlərə yazıçının indiyədək latın qrafikası ilə nəşr olunmamış əsərləri, eləcə də az tirajla yayımlanmış kitabları daxil edilib. Birinci cild yazıçının “Natəvan haqqında hekayələr”i ilə başlayır. Müəllifin “Seçilmiş əsərləri”ndə, həmçinin “Qobustan çökəklərində” romanı, “Qaratel”, “Manar sahillərində”, “Qoşqar”, “Bir zərrə iz...” və başqa povestləri, qırx hekayəsi ilk dəfə nəşr edilib. Hekayə və povestlərin bir qismi Əzizə Cəfərzadənin 1948-ci ildə çap edilmiş və Moskvanın qərarı ilə mətbəədən yığışdırılaraq yandırılmış “Hekayələr” kitabına daxil olan, həmçinin 1948-1963-cü illər ərzində nəşr olunmağa icazə verilmədiyi dövrdə yazdığı əsərlərdir.
Əzizə Cəfərzadənin “Seçilmiş əsərləri”nə filologiya elmləri doktoru professor Vaqif Sultanlı “Ədəbiyyatın vətənsevərlik missiyasi” adlı geniş ön sözü yazıb.
Azərbaycan Kinosu Gününə həsr olunmuş Kinosevərlər Gecəsi keçiriləcək
Avqustun 2-də YARAT Müasir İncəsənət Məkanının qarşısında 20:00-dan 00:00-dək Azərbaycan Respublikası Mədəniyyət Nazirliyi və YARAT Müasir İncəsənət Məkanının birgə əməkdaşlığı ilə Azərbaycan Kinosu Gününə həsr olunmuş açıq havada Kinosevərlər Gecəsi keçiriləcək.
Proqram nüfuzlu film festivallarında uğur qazanan milli filmlərin premyeralarından ibarətdir.
Filmlər Azərbaycan dilində (ingilis dilində altyazı ilə) nümayiş olunacaq.
Bu barədə Mədəniyyət Nazirliyi məlumat yayıb.
Film proqramı:
“Olimpiya”, 2021, Azərbaycan, melodrama, 67 dəq.
Rejissor: Əli-Səttar Quliyev
Bu fərqli həyat hekayəsi 1980-ci ildə SSRİ-nin paytaxtı Moskva şəhərində başlayıb, 2015-ci ildə Azərbaycanın mənzərəli şimal-qərb bölgələrindən birində davam edib və uzaq Kubada sona çatıb. Moskva Olimpiadasının bürünc mükafatçısı İlqar Süleymanov uzun müddətdir, peşəkar idmandan uzaqlaşıb, doğma qəsəbəsində sakit həyat sürür. İlqar yerli orta məktəbdə bədən tərbiyəsi müəllimidir. Günlərin bir günü İlqarın evinin qapısı döyülür və həyatı tamamilə dəyişir...
“Daxildəki ada”, 2020, Azərbaycan / Fransa,
dram, 100 dəq.
Rejissor: Rüfət Həsənov
Treyler: https://www.youtube.com/watch?v=7GHhfIK4Clg
Baş qəhrəman Seymur Tahirbəyov dünyanın qabaqcıl qrossmeysterlərindən biridir. Karyerasının ən önəmli oyunundan bir neçə həftə öncə özünü kəşf etmək məqsədilə yalnız bir nəfər sakini olan adaya xəlvətcə yola düşür.
“Axşama doğru”, 2020, Azərbaycan, dram, 12 dəq.
Rejissor: Teymur Hacıyev
Treyler: https://www.youtube.com/watch?v=KrMyT4YooYI
Fiziki yaxınlığı mənəvi yaxınlıq kimi görməyən cütlük, ailə məclisində iştirak etmək üçün şəhər kənarına çıxır. Məişət məsələləri onları
dayanmağa və hiss edilən, lakin gözlənilməyən reallığı kəşf etməyə sövq edir.
“Quxuroba”, 2020, Azərbaycan, dram, 21 dəq.
Rejissor: Teymur Qəmbərov
Treyler: https://www.youtube.com/watch?v=ORRZzxDxzJ4
Taksi sürücüsü Rasim, müdirindən mütləq yerinə yetirilməli olan çox vacib bir tapşırıq alır: O, şəhər kənarındakı ucqar bir kəndə gəlinlik paltarı çatdırmalıdır. Rasim yolüstü cavan bir qadın götürür: onların danışmağa heç bir mövzuları olmur, amma buna baxmayaraq bir-birlərinə deməyə yenə də sözləri var...
Rejissorların təqdimatı:
Əli-Səttar Quliyev (1981-ci il təvəllüdlüdür, Bakı, Azərbaycan)
“Mozalan” studiyasının direktorudur. Onun “Çardaq” (2016) qısametrajlı, “Əlvida, Şmidt!”(2019) və “Olimpiya” (2021) tammetrajlı bədii filmləri bir sıra beynəlxalq festivalların iştirakçısıdır.
Rüfət Həsənov (1987-ci il, Bakı, Azərbaycan)
2009- cu ildə Beyts Kollec-dən (ABŞ), 2012-ci ildə isə Moskva şəhərində Ssenaristlər və Rejissorlar Ali Kurslarından məzun olub. 2013 -cü ildə Elvin Adıgözəl ilə çəkdiyi “Buqələmun” tammetrajlı bədii filmi Beynəlxalq Lokarno festivalının “Filmmakers of Present” proqramına daxil edilib və “Golden Leopard” mükafatına namizəd olub.
Rüfət Həsənov EAVE (Avropa Audio-vizual sahibkarlar) Berlinale Talents Network və SOFA (School of Film Advancement) məzunudur.
O, 2020-ci il Sarayevo Film Festivalında “Daxildəki ada” filmi ilə “Ən yaxşı rejissor” mükafatını qazanıb.
Teymur Hacıyev (1982-ci il, Bakı, Azərbaycan)
Bir neçə qısa filmi prodüser olaraq istehsal edən Teymur, rejissorluq debütünü qısa filmi “The Wound” (Yara) ilə edib, onu Palm Springs qısa film festivalında (2013) nümayiş etdirib. Onun ikinci qısametrajlı “Şanxay, Bakı” filminin premyerası Tampere Film Festivalında (2016) və üçüncü qısametrajlı filmi “Duz, İstiot zövqə görə” Rotterdam Beynəlxalq Film Festivalında nümayiş olunub və Kinoskopun “2019-cu ilin ən yaxşı beş qısa filmi” nə daxil edilib. Onun “Axşama doğru” filminin Kann kinofestivalında “Tənqidçilər Həftəsi”nə daxil edilməsi, Teymuru həm rejissor, həm də prodüser kimi Kannda olmuş yeganə azərbaycanlı rejissor edir.
Teymur Qəmbərov (1986-cı il, Bakı, Azərbaycan)
“Starcom Mediavest” və “Red Communications” kimi bir sıra PR agentliklərində çalışıb. Onun ilk ”Quxuroba” qısametrajlı filmi Polşanın Poznan şəhərində baş tutan Avropa Short Pitch festivalının “Image Production” və “Mastering & Distribution” mükafatlarını qazanıb. 2020-ci ildə “Quxuroba” Sarayevo Film Festivalının Rəsmi Qısametrajlı Film Müsabiqəsinə seçilib.
Bugünkü “Ədəbiyyat qəzeti”nin anonsu
“Ədəbiyyat qəzeti”nin yeni layihəsi: “Türkcə və məncə” rubrikası Hədiyyə Şəfaqətin təqdimatında: Oğuz Atay: “Tutuna bilməyənlər”
Sözlə çəkilmiş tablolar – Sehran Allahverdinin şeirləri Səhər Əhmədin təqdimatında
Səlahəddin Xəlilov – Fəlsəfə və poeziya: Nizami, Nəsimi və Füzuli timsalında
Füruğ Fərruxzadın şeirləri Ümid Nəccarinin tərcüməsində
Rüstəm Məlikov - Məzarı üzərində Türkiyənin və Azərbaycanın bayraqları dalğalanan Əli bəy Hüseynzadəmiz
Çağdaş dünya şeiri – Moldovan şairəsi Marqareta Kurteskunun şeirləri Səlim Babullaoğlunun tərcüməsində
Şeyhmus Çiçək - “Ehtiras” hekayəsi Məmməd İsmayılın təqdimatında
Pamukun evi, Pamukun dünyası – Ülvi Babasoyla Ramil Əhmədin “Orxan Pamukun evində” kitabı haqqında söhbəti
İsa Həbibbəyli – Molla Pənah Vaqif: Erkən realizm ədəbi cərəyanının yaradıcısı
Nizami Cəfərov – Ən yeni tarixin yeni romanı (Yunus Oğuzun “Uçurum” romanı haqqında)
Sevinc Elsevər – Şeirlər
Bosniya, Xorvatiya və Serbiya şifahi xalq ədəbiyyatı incisi “Həsənağaxatun” balladası Həmid Piriyevin tərcüməsində
Nurlana İşıq – “Turist oğlan” (Pritça)
Sabir Rüstəmxanlı – Bizdən irəlidə (İlyas Əfəndiyev haqqında)
Pərvin – XX əsr: yekun (“Vəziyyət ruscadır” rubrikasından növbəti yazı)
Seçimin çətinliyi – “Onun romanı” rubrikasının qonağı yazıçı, jurnalist Şahanə Müşfiqdir (Söhbətləşdi: Günel Musa)
Minaxanım Nuriyeva – Dövrün tarixi-bədii tədqiqi
Orxan Aras – Bir Qəribə adam
Əyyub Qiyas – “Axır ki...” (Hekayə)
XX əsrin klassikası: Uruqvay şeiri – Xuana de İbarburunun şeirləri Tural Cəfərlinin tərcüməsində
Zemfira Məhərrəmli – Söz sevdalısı
Şövkət Zərin Horovlu, Aynur Qafarlı, Məmməd Tahir, Ramiz Təmkin, Zərəngiz Dəmirçi Qayalı, Aida Adıgözəl, Tofiq – Şeirlər
Mənbə: Edebiyyatqazeti.az
Mədəniyyət Nazirliyi yanında İctimai Şuranın ilk iclası keçirildi
İyulun 30-da Azərbaycan Milli Xalça Muzeyində Mədəniyyət Nazirliyi yanında İctimai Şuranın ilk iclası keçirilib.
AzərTAC-ın verdiyi xəbərə görə, iclasda İctimai Şuranın əhəmiyyətindən danışılıb, görüləcək işlər barədə təkliflər dinlənilib.
İclası giriş sözü ilə açan Mədəniyyət Nazirliyinin Aparat rəhbəri Vasif Eyvazzadə şuraya keçirilən seçkilərin nəticələri barədə məlumat verib. Bildirib ki, seçkilərin ötən ilin sentyabrında keçirilməsi nəzərdə tutulsa da, Vətən müharibəsinin başlaması səbəbindən bu iş təxirə salınıb. Bu ilin iyul ayında seçkilərin birinci və ikinci turu keçirilib. Nəticədə 9 namizəd səsvermənin qalibi olub.
Mədəniyyət naziri Anar Kərimov bildirib ki, Prezident İlham Əliyevin bu sahəyə göstərdiyi diqqət sayəsində Azərbaycanda vətəndaş cəmiyyəti institutlarının fəaliyyəti genişlənib, QHT-lər dövlət idarəçiliyi və qanun yaradıcılığı prosesinin iştirakçısına çevriliblər. Mədəniyyət Nazirliyinin qeyri-hökumət təşkilatları ilə yaxından əməkdaşlıq etdiyini diqqətə çatdıran A.Kərimov yaradılan İctimai Şuranın bu sahədə görəcəyi işlərin əhəmiyyətindən danışıb.
Nazir İctimai Şuranın üzvlərinə nazirliklə ictimaiyyət arasında səmərəli qarşılıqlı fəaliyyətin təşkili, onun fəaliyyətində aşkarlığın və şəffaflığın təmin olunması, dövlət siyasətinin formalaşması və qərarların qəbulu zamanı ictimai rəyin və vətəndaşların qanuni maraqlarının nəzərə alınması, əsas insan və vətəndaş hüquqlarının müdafiəsi kimi məqsədlərin həyata keçirilməsi istiqamətlərindəki fəaliyyətlərində uğurlar arzulayıb.
Mədəniyyət nazirliyində yeni islahatlar aparacağını deyən nazir bildirib ki, nazirlik keçmiş sovetlər birliyində olduğu kimi müəssisələrin idarə edilməsilə məşğul olmamalı, ümumilikdə bütün sahələrlə işləməlidir: “Biz beynəlxalq standartlara cavab verən bir idarəçilik qurmalıyıq. Burada şəffaflıq təmin olunmalı, dayanıqlı maliyyələşdirmə və iqtisadi modellər tətbiq edilməli, özəl sektor mədəniyyət sahəsinə cəlb olunmalıdır. Müəssisələr rəqabətli bir sistemə keçsələr dövlətin mədəniyyət strategiyasına töhfə vermiş olarlar”.
Sonra İctimai Şura üzvlərinin təklifləri dinlənilib.
Həmyerlimizin “Külək” hekayəsi Litvada uğur qazandı
Litvanın paytaxtı Vilnüs şəhərində rusca yazan və ya rus dilinə tərcümə olunan müəlliflər üçün “Baltiyskiy Qamayun” V Beynəlxalq Ədəbiyyat Festivalının birinci mərhələsi başa çatıb.
Litva Respublikası hökuməti yanında Milli Azlıqlar departamentinin dəstəyi ilə Yazıçı və Publisistlərinin Beynəlxalq Assosiasiyasının həyata keçirdiyi festival böyük rus yazıçısı Fyodr Dostoyevskinin anadan olmasının 200 illiyinə həsr olunub. Tədbir çərçivəsində “Baltiyskiy Qamayun - 2021” beynəlxalq ədəbiyyat müsabiqəsinin qaliblərinin adları açıqlanıb. Müsabiqədə “Nəsr” nominasiyası üzrə 5 ölkədən 18 müəllif iştirak edib. Beş müəllif qalib seçilib. Onların arasında azərbaycanlı yazıçı-dramaturq Ülviyyə Heydərova da var. Yazıçı bu beynəlxalq müsabiqəyə “Külək” hekayəsi ilə qatılıb.
Qaliblərin mükafatlandırılması mərasimi bu ilin noyabrın 20-də baş tutacaq. Həmin dövrdə festivalın ikinci mərhələsi keçiriləcək.
Şəhər büdcəsi kinematoqrafiyaya pul ayırır, gözəl təşəbbüsdür
“Ədəbiyyat və incəsənət” TASS agentliyinin çox maraqlı bir xəbərini diqqətinizə çatdırır. Belə ki, Rusiyanın şimal paytaxtı sayılan
Sankt-Peterburqun şəhər administrasiyası təxminən 20 filmin layihəsi üçün şəhər büdcəsindən kinematoqrafçılara dəstək verəcək. Ayrılan subsidiyaların ümumi məbləği təxminən 59 milyon rubl (1374110 manat) təşkil edəcək. Bu barədə bu gün vitse-qubernator Boris Piotrovski "Vkontakte" sosial şəbəkəsində bildirib.
"Bu, 15 sənədli və dörd bədii film üçün ayrılacaq məbləğdir. Bu il çəkiləcək bir çox film ölkəmizin tanınmış mədəniyyət xadimlərinə həsr olunub: Aleksey Herman və Svetlana Karmalite, Sergey Slonimski, İqor Maslennikov və digərləri. Daha bir sənədli film Leninqradın blokadada olan zamanında əfsanəvi futbol matçına həsr olunacaq", - deyə Piotrovski məlumatında bildirib.
Həmçinin, şəhərin dəstəyi ilə yaradılacaq bədii filmlərin adları da açıqlanıb. Bunlar Dmitri Qubarevin "Əlavə dərs", Dmitri Svetozarovun "Beş faiz", Aleksandr Qalininin "Mənim dəhşətli bacım" və Andrey Noskovun "Təcrübə nümunəsi" fiımləridir.
Piotrovski xatırladıb ki, iyulun 28-də Sankt-Peterburq Qanunvericilik Məclisinin deputatları kinematoqrafiyaya dəstək haqqında şəhər Qanununa dəyişikliklər qəbul ediblər. Buna uyğun olaraq, gələn il şəhər yalnız QHT-lərin deyil, kommersiya təşkilatlarının, o cümlədən kinostudiyanın layihələrini maliyyələşdirə biləcək.
Qeyd edək ki, hər il Sankt-Peterburqda təxminən 80 film çəkilir.
Gözəl təcrübədir, deyilmi?
Bu saatlarda Türkiyə alovlar içindədir
Türkiyənin cənubunda meşə yanğınları dəhşətli şəkildə min hektarlarla ərazini öz qoynuna alıb. Antalya, Bodrum, Adana alovlar içindədir. Ölənlər və yaralananlar var. Əhali, turistlər təxliyyə olunmaqdadır.
Prezident Rəcəb Tayyib Ərdoğanın rəsmi nümayəndəsi İbrahim Kalın baş verənləri milli fəlakət adlandırıb.
“Meşə yanğınları milli fəlakətdir,” deyə Kalın Tvitter hesabında yazır. “Bütün dövlət orqanları qarşılıqlı əlaqədə şiddətli mübarizə aparırlar. Prokurorluq müxtəlif aspektlərdən yanğının səbəblərini araşdırır. Mən öz Rəbbimdən mənə vəhy olunana tabe oluram".
Meşə yanğınları çərşənbə günü Türkiyənin cənubundakı Antalya vilayətindəki Manavgat kurort şəhəri yaxınlığında başlayıb, ilkin məlumata görə, bölgədəki güclü istilər səbəbi ilə. Daha sonra cümə axşamı Aydın və Muğla kurortu da daxil olmaqla bir sıra digər əyalətlər də alova bürünüb. Türkiyə Fövqəladə Hallar İdarəsinin məlumatına görə, yanğın nəticəsində həlak olanların sayı üç nəfərə çatıb, 183 nəfər xəsarət alıb.
Turizm obyektlərinə ən ciddi təhlükə Bodrumun kurort zonasında yaranıb ki, burada sutka ərzində bir sıra otellərin yaxınlığında yerləşən bir neçə yerdə yanğınlar baş verib. Güvercinlik kəndində yanğın yerli otellərin birini haqlayıb. Bununla əlaqədar olaraq, turistlər müvəqqəti olaraq həmin mehmanxananın ərazisindən köçürülüblər.
Allah Türkiyəmizə kömək olsun!
BBC-dən yanğını əks etdirən kadrları təqdim edirik.
Venesiya kinofestivalının aşılış filmi “Paralel analar”, favorit filmi isə “Dyunlar”dır
Xəbər verdiyimiz kimi, 78-ci Venesiya kinofestivalı məşhur ispan kinorejissoru Pedro Almodovarın "Paralel analar" filmiylə açılacaq, bu barədə çərşənbə axşamı Venesiya kinofestivalının bədii rəhbəri Alberto Barbera onlayn rejimdə keçirilən mətbuat konfransında bildirmişdi. İndi isə əlavə təfərrüatlar da bəlli oldu.
“Ədəbiyyat və incəsənət” portalı Euronews-a istinadən xəbər verir ki, bu dəfə Venesiya kinofestivalı sentyabrın 1-dən 11-dək keçiriləcək, festivalın proqramı və favoritləri də artıq bəllidir.
Məşhur ispaniyalı Almodovar karyerasına məhz 1983-cü ildə Venesiya kinofestivalında iştirakla başlayıb və iki il əvvəl kino sənətinə verdiyi töhfəyə görə "Qızıl Şir"i aldığı məkana xüsusi hisslə qayıdır.
"Paralel analar" filmində Almodovar yenidən öz sevimli aktrisası Penelopa Kruzu ekrana çıxarır. Penelopa ərsiz qadının obrazını yaradır, o obrazı ki, eyni gündə eyni xəstəxana palatasında yeniyetmə bir qızla bərabər uşaq dünyaya gətirir. Həmin yeniyetmə qız üçün bu doğuş psixikasını zədələyən bir zərbə olur, Penelopanın oynadığı qəhrəmanın isə bu doğuşla bağlı bol ümidləri var. Bu iki zənənin tanışlığı elə palatada qalmır, onların həyatı paralel olaraq eyni ritmdə davam edir, onlar uşaqlarını böyüdürlər və zamanla, şəraitin təsiri altında dəyişirlər. Gərgin, dramatik, psixoloji bir film!
Bu dəfəki festivala ötən il pandemiyanın məcburi qadağalarından sonra sükuta dalmış Amerika kinostudiyaları da qayıdırlar. Ridli Skott müsabiqədənkənar "Son duel "filmini təqdim edəcək. Filmin süjeti qüdrətli döyüşçü tərəfindən zorakılığa məruz qalmış qadının real həyat tarixçəsinə əsaslanır. Əri onun haqlı olduğunu sübut etmək üçün qudurğan döyüşçü ilə ölüm döyüşünə girməlidir.
Çoxdan gözlənilən daha bir blokbaster nümayiş olunacaq – söhbət Denis Villenevin haqqında portalımızda yazı getmiş "Dyunlar" filmindən gedir. Bu, Frenk Herbert tərəfindən yazılmış eyniadlı kult romanın ekran variantıdır, baş rolda Hollivudun yeni sevimlisi Timothy Shalaman oynayır. Premyerası bir neçə dəfə təxirə salınan film nəhayət ki, sentyabrın 3-də Avropa ekranlarında – yəni ki, Venesiyada görünəcəkdir.
Xatırladaq ki, filmin treyleri ötən cümə günü Warner Bros kinokompaniyasının rəsmi YouTube kanalında nümayiş olunub. Filmdə Timothy Shalamadan başqa Rebekka Ferguson, Oskar Ayzek, Zendeya, Coş Brolin, Ceyson Momoa, Stellan Skarsgard və Xavyer Bardem çəkiliblər.
Film macəra-ekşn janrındadır. Kino kritikləri prokat zamanı ona ağlasığmaz gəlir vəd edirlər.
Yeri gəlmişkən, “Dyunlar” festivalın da əsas favorit filmdir və kino mütəxəssisləri “Qızıl Şir”in bu filmə qismət olacağını proqnozlaşdırırlar.
“Qızıl Şir” üçün mübarizəyə beş italyan filmi də qatılacaq, o cümlədən, rejissor Paolo Sorrentinonun çəkdiyi, baş rolda Toni Servillonun oynadığı “Allahın əli" filmi. Bu, avtobioqrafik filmdir, rejissor Neapolda keçən uşaqlıq və gəncliyini, əfsanə futbolçu Dieqo Maradona ilə bağlı xatirələrini lentə alıb. Yəqin idmansevər oxucularımız dərhal anladılar ki, “Allahın əli” adı nəyi ehtiva edir. Bu, Maradona ilə bağlı məşhur bir əhvalatdır, Maradona 1986-cı ilin dünya çempionatında İngiltərəyə qarşı matçda əli ilə qol vurub Argentina yığmasına yarımfinala vəsiqə gətirmişdi, təkrar kadrlardan sonra qolun əllə vurulduğu sübut edilmişdi, onu əli ilə qol vurmaqda ittiham etmələri səbəbindən Maradona da söyləmişdi ki, bu, mənim deyil, Allahın əli idi.
Film Netflix rəqəmsal platformasının sifarişi ilə hazırlanıb.
Həmçinin italyan Gabriele Maynettinin "Friki" trilleri də festivalda nümayiş olunacaq. 1943-cü ildə faşizmin tüğyan etdiyi Romada qalmış "Kifirlər sirkinin" dörd artistindən bəhs edən film hədsiz dərəcədə maraqlı alınıb.
Bu il festivalın müdiriyyəti Venesiya Biennalesində dünyaşöhrətli Armani-nin dəstəyi ilə yeni bir mükafat təqdim edəcək. Armani Beauty - dünya kinosunda yeni tendensiyaları təmsil etmək üçün nəzərdə tutulmuş yeni "Ekstra üfüqləri" bölməsində tamaşaçı rəğbətini mükafatlandıracaq.
Ümumilikdə, Cənubi Koreya rejissoru Pon Cun Xonun rəhbərlik etdiyi beynəlxalq münsiflər heyəti əsas mükafatlar uğrunda mübarizə aparacaq 20 lenti qiymətləndirməlidir. Onların arasında qeyd etdiyimiz Pedro Almodovarın "Paralel analar " (Madres Paralelas) filmində baş rolu oynayan Penelopa Kruz həmçinin Argentinanın "Rəsmi müsabiqə" (Competencia Oficial) filmində də rol alıb. Müsabiqəyə təqdim edilmiş fransız lentlərindən birində ünlü Jerar Depardye də sənətsevərlərin qarşısına çıxacaq.
Kristen Stüart isə öz növbəsində Çili rejissoru Pablo Larrainin "Spenser" (Spencer) lentində şahzadə Diana rolunu canlandıracaq. Daha əvvəl çilili rejissor Venesiyada Jacqueline Kennedinin həyatından bəhs edən "Jackie" (Jackie, 2016) bioqrafik lentini təqdim etmişdi.
"Üfüqlər" müsabiqə proqramına ukraynalı rejissor İqor Sentsovun filmi də daxil edilib. Ümumilikdə, “üfüqlər”də 20 -yə yaxın film təqdim olunur, o cümlədən proqramda yeganə yapon animasiya filmi də. Sənədli kinonun böyük bölməsində müsabiqədənkənar "Səngərlər" filmi nümayiş etdiriləcək ki, bu da Donbasdakı təmas xəttində çəkilmiş fransız lentidır, həmçinin, müharibənin dağıtdığı Suriya da bir başqa filmdə nümayiş etdiriləcək. (Çox təəssüf ki, bu sayaq tribunalara Qarabağ həqiqətləri heç vaxt yüksələ bilmir. Azərbaycanda kino, ədəbiyyat sahəsi yatırımlar qoyulmaması səbəbindən sərhədləri aşmır).
Müsabiqənin bağlanışında Roberto Andonun "Gizlədilmiş uşaq" (Il Bambino Nascosto) italyan lentini təqdim edəcəklər.
Ənənəyə görə festival proqramına seriallar da daxil edilir. Bu dəfə festivalda 1973-cü ildə İnqmar Berqmanın çəkdiyi "Ailə həyatından səhnələr" (Scenes From A Marriage) filminin israilli rejissor Xaqay Levin tərəfindən lentə aldığı teleserial variantından 5 epizod nümayiş olunacaq. Cessika Çesteyn və Oskar Ayzekin rol aldığı teleserial HBO üçün çəkilmişdir.
Bir sözlə, sentyabrın 1-də makaronsevərlərin ölkəsinə əsil kino bayramı gələcək.
Güclü aparsın!
Arayış: Ümumilikdə festivala 59 ölkənin nümayəndələri qatılacaq. Festivalın prezident Roberto Çikutto Lido adasında keçirilən festival meydançasında koronavirusun yayılmasına yol verməmək üçün bütün ciddi normalara riayət ediləcəyini bildirib. Oturacaq yerlərinin sayı iki dəfə azaldılıb - 8 mindən 4 minə qədər. Əlavə nümayiş meydançaları – açıq kinoteatrlar isə Venesiyanın özündə də, şəhərin şərq hissəsində də saxlanılacaq. İtalyan hökuməti ictimai və mədəni tədbirlərə, o cümlədən kinoteatrlara baş çəkmək üçün lazım olan kovid sertifikatından necə istifadə ediləcəyinə isə hələ də izah verə bilməyib.
Tokio Olimpiadasının incəsənət tərəfi və türkləşmiş yapon samurayı
Tokioda Yay Olimpiya Oyunlarının qızğın vaxtıdır. Şübhəsiz, idman azarkeşləri böyük maraq və həyəcanla yarışları izləməkdədirlər. Hər bir olimpiadada olduğu kimi Tokio Olimpiadasında da ayrıca mədəni proqram var, incəsənət idmanla vəhdətdə insanlara xoş dəqiqələr bəxş edir. Tokionun özəlliyi və fərqliliyi də var: tamaşaçıların əhval-ruhiyyəsini yüksəltmək üçün Workd Flags layihəsinin rəssamları Olimpiya ruhunu samuray ruhuna birləşdirməklə anime stilində döyüşçülər şəklində müxtəlif ölkələrdən gələn idmançıların necə görünəcəklərini ortaya qoymaqdadırlar.
"Samuray unikal Yapon fenomenidir", - deyə Kamaya Yamamoto - layihənin yaradıcısı deyir, qeyd edir ki, onlar hamını ənənəvi yapon mədəniyyəti ilə tanış etmək istəyirlər.
Rəssamlar Hindistan və Cənubi Afrikadan Böyük Britaniya və Türkiyəyə qədər oyunlarda iştirak edən bütün 200 ölkədən “samuray idmançıların” şəkillərini yaratmağa qərar veriblər.
Layihənin müəllifləri öz işlərinə çox ciddi yanaşıblar, hər bir ölkənin bayrağının tarixini və rəmzlərini, eləcə də onların hər biri ilə assosiasiya olunan milli rəng və elementləri öyrəniblər.
“Ədəbiyyat və incəsənət” portalı BBC-yə istinadən layihədən bəzi görüntüləri təqdim edir. Əfsus ki, burada Azərbaycan nümayəndəsinin rəsmini tapa bilmədik, amma qardaş Türkiyənin idmançısı samuray görkəmində çox möhtəşəmdir, aylı-ulduzlu bayraq bu görüntüyə xüsusi özəllik qatır.
Məsələn, Meksika döyüşçüsünü yaratmaqla Yamamoto nəzərə alıb ki, ölkənin bayrağında Kaktus üzərində oturan və ilan yeyən qartal təsvir edilib, bütün bunlar da meksikalı samuray obrazına inkorporasiya olunub.
Hər bir qəhrəman onun xarakterinin əsas xüsusiyyətlərini, güclü və zəif tərəflərini əks etdirən qısa bir xarakterizə ilə müşayiət olunur, bir çox video oyunlarda olduğu kimi.
Bir qədər də tarixə rakurs edək.
Ən azı XII əsrdən etibarən samuray Yapon cəmiyyətinin həyatında mühüm rol oynamaqdadır. Bu gün Bushido və ya döyüşçü yolu, əsl samurayın özünəməxsus davranış kodeksidir, bu, artıq təbliğ edilmir, lakin onun bir çox elementləri ictimai şüura möhkəm şəkildə hopub.
Dünya bayraqlarının layihəsi Tokio Olimpiadasının reklam kampaniyası kimi görünsə də, onda çalışan bütün 15 dizaynerlər bunu boş vaxtlarında və tamamilə pulsuz ediblər.
Layihə inkişafdadır: bu interaktiv prosesdir: rəssamlar vaxtaşırı "Tvitter" də sorğular təşkil edir, artıq görülən işləri qiymətləndirmək, çatışmazlıqları aşkar etmək və ya bu və ya digər ölkə ilə bağlı ən yaddaqalan simvollar və ya əşyalar təklif etmək istəyənlərə şərait yaradırlar.
Rəssamlar tənqidə də ciddi yanaşırlar. Məsələn, ispan qəhrəmanı əvvəlcə samuraydan daha çox toreadora bənzəyirdi.
Yamamoto deyir: "Etiraf etmək lazımdır ki, biz bəzən dünyanın qalan hissəsinin Yaponiyadan necə göründüyü stereotiplərinə yuvarlanırıq. Biz öküzlərin döyüşlərini İspaniyada əsas mövzu olduğunu düşünürdük və kritik şərhlərdən sonra ispan samurayımızı dəyişdirdik".
Dünya bayraqlarının saytında və sosial şəbəkələrdə yerləşdirilən illüstrasiyalar artıq bütün dünyada şöhrət qazanmağa başlayıb.
"Şri-Lankanın sakinlərindən çox sayda mesaj aldıq, onlar şri-lankalı samuray obrazına vurulduqlarını söyləyirdilər", - Yamamoto qürurla deyir.
Yaponiyadakı bir neçə səfirlik, o cümlədən Honduras və Venesuelanın səfirlikləri artıq rəssamlara müraciət edərək, samuray obrazında öz milli qəhrəmanlarının rəsmlərini öz saytlarında yerləşdirmək istədiklərini deyiblər. Layihənin müəllifləri ümid edirlər ki, bütün bunlar bu il pandemiya səbəbindən tamaşaçı olmadan keçiriləcək Olimpiya Oyunlarında əhval-ruhiyyəni qaldırmağa kömək edəcək.
Şəkillərdə:
Türk cəngavəri samuray obrazında;
Norveç, Rusiya, İsveçrə və Danimarka layihədə bu cür təmsil olunub; Əsil yapon samurayı; Məşhur ədəbi qəhrəman Harri Potter samuray qiyafəsində.
Rəşad Məcidin “Qələmsiz yazılanlar” kitabı rus dilində də nəşr olundu
Azərbaycan Yazıçılar Birliyinin katibi, şair-publisist Rəşad Məcidin əsasən sosial şəbəkə statuslarından ibarət “Qələmsiz yazılanlar” kitabı 2019-cu ildə işıq üzü görmüş, ölkə oxucuları tərəfindən maraqla qarşılanmışdı. "Mütərcim" nəşriyyatında Nərgiz Əfəndiyevanın tərcüməsində "Ne perom napisannıe" adı ilə kitab bu günlərdə rus dilində də nəşr olunub.
2 hissədən ibarət kitabın “Status-esselər” adlanan birinci hissəsində müəllifin təxminən on ildən çox zaman kəsiyini əhatə edən və sosial şəbəkələrdə yazdığı statusları toplanıb. Bu statuslarda Rəşad Məcidin ictimai hadisələrə operativ münasibəti yer alıb. Kitabın ikinci hissəsi olan "Sms-esselər" bölümündə isə onun sms yazışmaları toplanıb.
AMEA-nın vitse-prezidenti, akademik İsa Həbibbəylinin kitaba yazdığı “Ön söz”də qeyd edilir ki, "Rəşad Məcidin statusları və “sms-esseləri” müstəqillik dövr Azərbaycan sosial şəbəkə ədəbiyyatının yol xəritəsidir”.
