Nizami Gəncəvi Beynəlxalq Mərkəzinin Türkiyə Milli Kitabxanası ilə birgə əməkdaşlığı çərçivəsində Nizami Gəncəvinin 880 illiyi ilə əlaqədar kitabxana tərəfindən mərkəzə 12 əlyazmanın rəqamsal nüsxələri təqdim olunub.
Bu barədə AzərTAC Nizami Gəncəvi Beynəlxalq Mərkəzinə istinadən  məlumat yayıb.
Xatırladaq ki, avqustun 4-də mərkəzin baş katibi Rövşən Muradov və kitabxananın direktoru Əli Odabaş arasında görüş keçirilib və Nizami Gəncəvi və Yunus Əmrə irsinin Azərbaycan, Türkiyə və regionda tanıtdırılması ilə bağlı fikir mübadiləsi aparılıb.

Amerikalı ulduz aktyor Conni Depp San-Sebastyan beynəlxalq kinofestivalında kinematoqrafa verdiyi töhfəyə görə fəxri mükafat alacaq. Bu barədə sentyabrın 17-dən 25-dək keçiriləcək San-Sebastyan kinofestivalının rəsmi saytı məlumat verib.
"Conni Depp - müasir kinematoqrafın ən istedadlı və çoxplanlı aktyorlarından biri 22 sentyabr çərşənbə günü "Donostiya" mükafatını alacaq. Tədbir San-Sebastyanda 69-cu festival çərçivəsində baş tutacaq”- təşkilatçılar qeyd ediblər.
San-Sebastyan beynəlxalq kinofestivalı 1953-cü ildən bəri hər il keçirilir və Avropada ən nüfuzlu film yarışmalarından biri hesab olunur. Bir neçə dəfə dünya kinematoqrafiyasında iconic premyeralara məhz bu festival meydan oldu. Məhz San-Sebastyandakı arenada "Ulduz müharibələri" epopeyasının Avropa premyerası baş tutdu, həmçinin dünya İlk dəfə Alfred Hiçkokun "Şimal-qərb vasitəsilə şimala doğru" (North by Northvest, 1959) adlı filmini gördü.

8 avqust. Meşə yanğınlarının ağuşunda qalmış Türkiyənin Antalya bölgəsinə leysan yağışı yağır.

Rembrandt.
“The Syndicates”

İyulun 1-dən sentyabrın 8-dək Balkanlarda - Sloveniyanın paytaxtı Lyublyana şəhərində musiqi festivalı keçirilir. Builki festival sayca 69-cudur. Tədbirin saytına istinadən “ Ədəbiyyat və incəsənət” portalı məlumat verir ki, festivalın iştirakçıları olan iki opera ulduzu - azərbaycanlı tenor Yusif Eyvazov və Rusiyanın xalq artisti, soprano Anna Netrebko festival çərçivəsində konsert verdilər.
Konsert sloveniyalı yazıçı və dramaturq İvan Sankarın adını daşıyan Mədəniyyət Mərkəzində keçirildi. Duet Cüzeppe Verdi, Giacomo Puççini və digər bəstəkarların operalarından partiyalar səsləndirdi.
Böyük anşlaqla keçən konsert Lyublyana festivalının bəzəyinə çevrildi.

Avqustun 9-da “Azərkitab Kitab Mərkəzi” və “Ay işığı” ədəbi məclisinin birgə təşkilatçılığı ilə yazıçı, kouç, professor Əlibala Məhərrəmzadənin 45 illik yubileyi münasibəti ilə “Azərkitab”ın Quba filialında yaradıcılıq gecəsi və imza günü keçirildi. Əslən Qubadan olan, “Çovdar çörəyi” və “Ev tapşırığı. Uğur düsturunu tapmalı” kitabları ilə ölkə oxucusunun rəğbətini qazanmış Əlibala Məhərrəmzadə öz həmyerliləri qarşısına 10-a yaxın kitabla çıxdı.
Tədbiri giriş sözü ilə “Ay işığı” ədəbi məclisinin sədri, tanınmış şair Ramiz Qusarçaylı açdı. Ramiz Qusarçaylı həm Quba ədəbi mühitindən, həm də yubilyarın yaradıcılığının məziyyətlərindən söz açdı.
 “Azərkitab”ın layihə rəhbəri Sabir Həsənov çıxış edərək “Azərkitab”ın gələcək hədəflərindən, kitab mədəniyyətindən, Əlibala Məhərrəmzadənin yaradıcılığından danışdı.
İmza günündə tarix elmləri doktoru Şahin Fazil, Bakı Dövlət Universitetinin prorektoru, biologiya elmləri doktoru  Məcnun Babayev, tanınmış yazıçı, beynəlxalq ədəbiyyat festivalları laureatı Varis Yolçuyev, Quba Mərkəzi kitabxanasının direktoru Saməddin Nəsirov, Quba Statistika idarəsinin müdiri Sahib Məmmədov və digər ziyalılar çıxış edərək öz ürək sözlərini söylədilər, yubilyarı təbrik etdilər.
Əlibala Məhərrəmzadə tədbirdə iştirak edən hər kəsə minnətdarlığını bildirdi, onlara imzalı kitablarını hədiyyə etdi, gələcək yaradıcılıq planlarından danişdı.
Şair Ramiz Qusarçaylı son söz söyləyərək “Azərkitab”ın Quba filialının kollektivinə, əməyi keçən hər kəsə təşəkkürünü bildirdi.
Qubalılar şəhər həyatında əlamətdar hadisəyə çevrilmiş bu sayaq tədbirlərin tez-tez keçirilməsini dilə gətirdilər. Əlbəttə ki, ədəbiyyatın əyalətlərə nüfuz etməsi olduqca mütərəqqi haldır.

Azərbaycan Respublikasının Mədəniyyət Nazirliyi UNESCO-ya qeyri-maddi mədəni irs elementlərimizi təmsil edən yeni nominasiyaları təqdim eləyib.
UNESCO-ya yeni təqdim edilmiş 1 milli və 3 çoxmillətli nominasiya dosyemizin Qeyri-maddi mədəni irsin qorunması üzrə Hökumətlərarası Komitənin 2022-ci ildə keçiriləcək sessiyasında müzakirəyə çıxarılacağı təsdiqlənib. Beləliklə, komitənin 2022-ci ildə keçiriləcək sessiyasında daha 4 elementin - Türkiyə və Azərbaycanın birgə təqdim etdiyi “Çay mədəniyyəti: kimliyin, qonaqpərvərliyin və sosial təmasın simvolu”; Əfqanıstan, Azərbaycan, İran Tacikistan, Türkiyə, Türkmənistan və Özbəkistanın birgə təqdim etdiyi “Baramaçılıq, ipəkçilik və toxuculuq üçün ənənəvi ipək istehsalı”; Azərbaycan, Qazaxıstan, Qırğızıstan, Tacikistan, Türkiyə, Türkmənistan və Özbəkistanın birgə təqdim etdiyi “Molla Nəsrəddin lətifələrinin şifahi ənənəsi” çoxmillətli nominasiya fayllarının və “Pəhləvanlıq, ənənəvi zorxana oyunları və idman növləri” milli nominasiya (Azərbaycan) faylımızın UNESCO Siyahına salınması məsələsi müzakirə olunacaq.
Bu barədə AzərTAC xəbər verir.
Xatırladaq ki, ölkəmiz 1992-ci ildən UNESCO-ya üzv qəbul olunub. 1996-cı ildə isə UNESCO ilə Azərbaycan arasında əməkdaşlıq sahəsində memorandum imzalanıb. Həmin vaxtdan etibarən BMT-nin elm, təhsil və mədəniyyət üzrə bu nüfuzlu təşkilatı ilə əlaqələrimiz genişlənməkdədir. Ötən dövr ərzində ölkəmizin 15 qeyri-maddi mədəni irs elementi UNESCO-nun müvafiq siyahısında yer alır.

Pandemiya ilə bağlı olaraq uzun sürən sükutdan sonra Sumqayıt ədəbiyyatsevərləri yenidən öz ədəbiyyat ocaqlarına - Poeziya evinə yığışdılar. Arif Ərşadın “Hekayələr” kitabının təqdimatı keçirildi.
Çağdaş insanı öz gündəlik qayğıları ilə təhkiyə mövzusu edən yazarın obrazlarının, dialoqlarının canlılığı oxucunu cəlb edir, oxuyanda əsla bezmirsən. Yazıçını təbrik edən çıxışçılar həm də onun hekayələrinin əsas məziyyətlərini də dilə gətirdilər. Havanın isti olmasına baxmayaraq iştirakçılar tam sərin mühit yaratmışdılar. Onların arasında Sumqayıtın tanınmış ziyalıları - ölkə prezidentinin fərdi təqaüdçüsü, şair Əşrəf Veysəlli, yazıçı Hümbət Həsənoğlu, əməkdar jurnalist Eyruz Məmmədov, əməkdar jurnalist Rəhman Orxan, tibb elimləri namizədi, doktor Mayil Tağıyev, filologiya elmləri doktoru, professor Rafiq Yusifoglu, AYB Sumqayıt Bölməsinin sədri Gülnarə Camaləddin, yazıçı Süleyman Hüseynov, texnika elmləri namizədi, professor Sahib Fərzəliyev, texnika elmləri namizədi, professor, qəzəlxan Əli Əmirov, əməkdar incəsənət xadimi, yazıçı-publisist Agalar Idrisoglu, əməkdar mədəniyyət işçisi, xalçaçı rəssam Fazil Abasquluzadə, yazıçı
Almaz Ərgünəş Bəyazid, gənc alim, Nəsimişünas Vüsal Hətəmov, kitabsevər ziyalı Rafiq Mehdiyev, gənc şair Elvin Əlizadə, ev sahibi - Poeziya evinin müdiri, şair İbrahim İlyaslı, eləcə də digərləri tədbirə rəng qatdılar.
Arif Ərşad hər bir gələn qonağa öz dərin minnətdarlığını bildirdi, onlara imzalı kitabını hədiyyə etdi.
Xatırladaq ki, tədbirin baş tutduğu məkan - Sumqayıt Poeziya Evi tək Azərbaycana yox, aparıcı dünya dövlətlərinə də bir örnəkdir. 2019-cu ildə Heydər Əliyev Fondunun təşkilatçılığı ilə ölkəmizdə keçirilən Avrasiya materikinin ədəbiyyat üzrə möhtəşəm 4-cü LiFFt festivallar festivalının Sumqayıta təşrif buyuran qonaqları bu sənət ocağına heyranlıqlarını bildirmiş, hətta Avropada belə bir ayrıca şairlər binasının olmamasını dilə gətirmişdilər.