Bu gün çağdaş Azərbaycan ədəbiyyatının görkəmli nümayəndəsi, hamımızın əzizimiz, "Bura Qazaxdır, oğlum" şeiri ilə Qazaxın xəritəsinin sözlə rəsmini çəkən şair Eldar Nəsibli Sibirelin 70 yaşı tamam olur. 

Həyatın keşməkeşli yolları ömür boyu Eldar Nəsiblini təqib etdi. Sovetlərin məhvedici istəklərinin qurbanına çevrildi Eldar Nəsibli Sibirelin ailəsi. Uzaq, soyuq Sibirə sürgün olundular. 70 il öncə may ayının 18-də Sibirin sərt təbiətində bir şair oğlan göz açdı dünyaya. Adına Eldar dedilər. Elə adına layiq yaşadı. Elin, Vətənin dar günündə qələmini silaha çevirdi Eldar Nəsibli Sibirel.

Mən köhnə kişiyəm, bala,

Nuh adlı sirdən gəlmişəm.

Hara Türk ayağı dəyib,

Mən həmin yerdən gəlmişəm.

Uzaq Sibirdən Azərbaycanın ən ucqar sərhəddi olan Qazağa kimi bir tale yaşadı Eldar Nəsibli Sibirel. Şəhid qəbirləri and yeri, səngərlər qibləgahı oldu:

Bu dağlar tərs, avand yerim.

Qayalar sapand yerim.

Hər Şəhid qəbri - and yerim...

Gör neçə pirdən gəlmişəm?!

Doğrunu yazdı, xəbisdən uzaq gəzdi:

Sibirel, əyrilər əyəmməz səni,

Bədxahlar, xəbislər öyəmməz səni.

Öyrənə-öyrənə bəyənməz səni,

Köçürə-köçürə alim olanlar.

Qədim Türk boylarının genetik xüsusiyyətləri ömür yolunun kredosuna çevirdi. Seçdiyi yol həm onun şəxsiyyətinə, həm ömür yoluna, həm də oxucusuna baş ucalığı, üz ağlığı gətirdi:

Azmamışam duman, çəndə,

Aç oxu tarixi məndə.

Şəhidə qəbri sinəmdə

Qazan türk oğlu türkəm mən.

Şairlər haqqın yer üzünə göndərilmiş Söz Elçiləridir. Şairlər taleyini hansısa şeirində mütləq qələmə alır. Olacağı da, ölümü də əvvəldən bilir şairlər - Haqdan gələn səslə. Ölümünü yuxuda görmüşdü Eldar Nəsibli. Vətən yollarında öləcəyini də bilirdi. İlahi verginin ən böyük sübutudur Eldar Nəsibli Sibirel.

Sən - gözümdə ağaran dan,

Damarımda qaynayan qan.

Gəlmişəm yolunda qurban

Olam, yurd yeri, yurd yeri.

12 il öncə yurd yeri ilə görüşə gedəndə qəzaya düşdü. Yurdun yollarında bu dünya ilə vidalaşdı.

Çap olunmayan şeirləri, bir də əziz xatirəsi qaldı bizlərə. Bir gün eşitdim ki, Sibirelin çap yolu gözləyən şeirləri yazı masasının üstündə qalıb - sahibi olmayan övladlar kimi. Bu haldan "Azərbaycan Sənaye Korporasiyası" Açıq Səhmdar Cəmiyyətinin baş direktoru, "Qazax" Xeyriyyə İctimai Birliyinin üzvü Kamran Nəbizadə (Kamran müəllim 2017-ci ildə 107 saylı Qazax Seçki Dairəsindən seçilən millət vəkili idi) xəbər tutdu. Dərhal şairin oğlu Alı  ilə əlaqə saxladı. Sibirelin sonuncu kitabını onun adına, yaradıcılığına layiq şəkildə çap etdirdi. Kamran müəllim Sibirelin 65 yaşına "Seçilmiş əsərlər" kitabını hədiyyə etdi. O kitab həm Eldar Nəsiblinin ruhuna, həm Azərbaycan ədəbiyyatına, həm də bütün qazaxlılara ən böyük ərmağan oldu - söz ərmağanı, kitab ərmağanı, ölməzlik ərmağanı. Bu dünyada bir söz yaşar, bir də əməl. Eldar Nəsibli Sibirel sözü ilə, Kamran Nəbizadə əməli ilə ölməzlik qazandı.

Bu gün ayrılığın təntənə ilə, bizlərin isə üzüntü, kədərlə qeyd etdiyimiz bir doğum günüdür - Eldar Nəsibli Sibirelin doğum günü. Yaşasaydı bəlkə də ən böyük salonlarda anşlaqla qarşılanan yubiley tədbiri düzənlənəcəkdi Eldar Nəsiblinin şərəfinə. Tale, qismət deyilən bir həqiqət var. Tale Eldar Nəsibliyə 70 yaşını Şıxlıda - doğma yurdda Sovetlər tərəfindən min bir əziyyətlərə məruz qalmış doğmaları ilə birgə dünyanın yenə o başında - Göy üzündə, bizdən çox uzaqda qeyd etməyi qismət etdi. 70 yaşınız mübarək olsun, yurd ünvanlı Eldar müəllim.

Səbinə Yusif,

“CARÇIOGLU GROUP" MMC-nin mətbuat xidmətinin rəhbəri, Azərbaycan Jurnalistlər Birliyinin və "Qazax" Xeyriyyə İctimai Birliyinin üzvü

Bu gün mayın 18-i Mədəniyyət Nazirliyi yanında İctimai Şuranın online iclası keçirilib.

İclası çıxış sözü ilə Şuranın sədr müavini Şahin Qədirov açaraq Şura üzvlərini salamlayıb. İrəlidə görüləcək işlər barədə ətraflı müzakirələr aparılıb.

Bölgələrdə ictimai dinləmələrin keçiriləcəyi vurğulanıb. İşlə bağlı müraciətlərə, daxil olan məktublara baxılacağı bildirilib. İyunun 2-si Şuranın ekspertlərinin ümumi yığıncağının keçiriləcəyi nəzərdə tutulub. Bundan əlavə Turanə Orucovanın Şuraya ekspert qismində qəbul olunduğu diqqətə çatdırılıb.

Aysel Kərim,

Mədəniyyət Nazirliyi yanında

İctimai Şuranın mətbuat və ictimaiyyətlə əlaqələr şöbəsinin rəhbəri

Bu gün qazax xalqının türklüyə, türklük düşüncəsinə ərməğan etdiyi böyük fikir və düşüncə adaml Oljas Süleymanovun doğum günü…

Bütün ömrü boyu  “Qızıl alma”ya doğru can atan adam!

Doğum günün qutlu olsun, savaş qardaşım mənim!

Rüstəm Behrudi

Rəsm qalereyası: Toğrul Nərimanbəyov, “Fikrət Sadığın portreti”

Günün fotosu: Tyerri Fremo Kann kinofestivalının rəsmi mövqeyini açıqlayıb

Kann kinofestivalının direktoru Tyerri Fremo deyib: “Biz kommünike açıqlamışıq və mövqeyimizi ortaya qoymuşuq. Rusiya rəsmən festivalda iştirak edə biıməz. Müharibə aparan dövlətin mədəniyyətlə nə işi.”

Foto: Euronews

Türkiyənin “Saküder” Beynəlxalq Sənət və Sənətkarlar Birliyi Dərnəyi həmyerlimiz, Azərbaycan Rəssamlar İttifaqının üzvü, Əməkdar rəssam Rəhim Məmmədovu “2022-ci il sənət” mükafatına layiq görüb.

“Ədəbiyyat və incəsənət” portalı AzərTAC-ın Türkiyə müxbirinə istinadla xəbər verir ki, mükafat Rəhim Məmmədova İzmirdə keçirilən Beynəlxalq Rəsm Sərgisi və Mükafatlandırma mərasimində təqdim olunub. 

Mərasim əsnasında açılan “İzmir sənətdə” rəsm sərgisində Azərbaycan, Türkiyə və Qazaxıstandan olan 40 rəssamın 50 əsəri nümayiş etdirilib. 

Tədbirdə Türkiyənin İzmir üzrə dövlət rəsmiləri iştirak ediblər.

Türkiyəyə 1995-ci ildə yerləşən Rəhim Məmmədov qardaş ölkənin Kayseri vilayətinin Ərciyəz Universitetinin Gözəl sənətlər fakültəsinin rəsm bölümündə müəllim olaraq fəaliyyətini davam etdirib. 1996–2003-cü illər ərzində eyni bölümün rəhbəri seçilən rəssam 2003-2010-cu illərdə bu fakültənin dekanı olub. Hazırda həmyerlimiz İzmirdə yerləşən özünəməxsus emalatxanada fəaliyyətini davam etdirir.

Rəssamın Azərbaycan, Türkiyə, Rusiya, Gürcüstan və Avropanın bir sıra ölkələrində fərdi sərgiləri açılıb.

Mədəniyyət Nazirliyi və “Mədəniyyət şəbəkələr evi” (“Cultural Network House”) assosiasiyasının birgə təşkilatçılığı ilə yeni “Ustad dərsləri” layihəsinə start verilib.

“Ədəbiyyat və incəsənət” portalı Mədəniyyət Nazirliyinə istinadən xəbər verir ki, Əməkdar artist, sənətşünaslıq üzrə fəlsəfə doktoru, dosent Toğrul Əsədullayevin rəhbərliyi ilə “Ustad dərsləri” layihəsi 11 may – 29 iyun tarixlərində həftədə iki dəfə olmaqla həyata keçiriləcək.

Layihənin məqsədi - Azərbaycan milli musiqisi və milli musiqi alətlərinin uşaqlar arasında geniş təbliğini gerçəkləşdirməklə onları milli-mənəvi dəyərlərimizə hörmət ruhunda tərbiyə etmək, uşaqların bədii estetik zövqünü yüksəltmək, istedadlı şagirdləri üzə çıxartmaq və onların yaradıcılıq qabiliyyətlərini inkişaf etdirmək, şagirdlərin hərtərəfli şəxsiyyət kimi formalaşmasına dəstək olmaq, eləcə də musiqi təhsilində Avropa standartlarını tətbiq edib ustad dərsləri vasitəsilə onlara daha bir yeni ustad töhfəsi verməkdir.

Layihə 3 mərhələdən ibarətdir:

-Bakı Şəhər Mədəniyyət Baş İdarəsinin tabeliyində olan uşaq musiqi və incəsənət məktəblərinin Xalq Çalğı Alətləri şöbəsində - tar, kamança, qanun, balaban, nağara ixtisası üzrə təhsil alan şagirdlərin arasında keçirilən (1-30 aprel 2022) seçim turu;

-11 may 2022-ci il tarixində L. və M.Rostropoviçlər adına 21 nömrəli Onbirillik Musiqi Məktəbində “Ustad dərsləri”nin başlaması;

-Ustad dərsləri keçən şagirdlərin Toğrul Əsədullayev ilə birgə konsert proqramı və onlara sertifikatların təqdim edilməsi mərasimi.

Gürcüstanın populyar “1 TV. Eleqtroliti” ədəbiyyat portalı Dövlət Tərcümə Mərkəzinin “Azərbaycan ədəbiyyatı beynəlxalq virtual aləmdə” layihəsi çərçivəsində tanınmış Azərbaycan şairi Nüsrət Kəsəmənlinin gürcü dilinə tərcümə olunmuş “Biri vardı, biri yox”, “Köhnə və təzə”, “Qar kimi”, “Paradoks”, “Kirayə yataq”, “Göndərilməyən məktub” və “Dörddivar mənzillərdə” şeirlərinin yayımına başlayıb. 

Tərcümə Mərkəzindən bildirilib ki, şairin yaradıcılığı haqqında məlumatla təqdim olunan şeirlərin gürcü dilinə tərcümə müəllifi – tanınmış şair-tərcüməçi İmir Məmmədlidir.

Qeyd edək ki, Gürcüstan İctimai Televiziya və Radio Yayımları Şirkətinin elektron portalı “1 TV. Eleqtroliti” mütəmadi olaraq səhifələrində Ömər Xəyyam, Cəlaləddin Rumi, Pol Verlen, Artur Rembo, Filip Dik, Tomas Vulf, Rudolf Lapert, Peter Handke, Lev Rubinşteyn, Con Maksvell Kutzee kimi dünyaşöhrətli yazıçı və şairlərin yaradıcılığını işıqlandırır.

Hər il mayın 18-i dünyada Beynəlxalq Muzeylər Günü (İnternational Museum Day) kimi qeyd olunur. Bu gün 1977-ci ildə Beynəlxalq Muzeylər Şurasının (ICOM) 11-ci konfransında təsis edilib. 1978-ci ildən etibarən dünyanın əksər ölkələri əlamətdar günü qeyd edir.

Muzeylərin cəmiyyətin həyatında mühüm rol oynadığını göstərmək, xalqlar arasında mədəni mübadilə və əməkdaşlığın inkişafına kömək etmək məqsədilə təsis olunmuş əlamətdar gün ICOM-un təşəbbüsü ilə hər il müəyyən deviz altında qeyd edilir. 

Bu il Beynəlxalq Muzeylər Günü “Muzeylərin gücü” (Muzeylər ətrafımızdakı dünyanı dəyişmək gücünə malikdir) devizi altında keçiriləcək.

Azərbaycan İstiqlal Muzeyinin direktoru Sədi Mirseyibli qeyd edib ki, mayın 18-də mədəniyyət ocağında əlamətdar günə həsr olunmuş "Könlüm keçir Qarabağdan" adlı konsert proqramı təqdim olunacaq. Eyni zamanda həmin gün muzeydə “açıq qapı” olacaq.

Azərbaycan Musiqi Mədəniyyəti Dövlət Muzeyində Beynəlxalq Muzeylər Gününə həsr olunmuş “Şuşa musiqiçiləri” adlı sərgi açılıb.

Musiqi Mədəniyyəti Dövlət Muzeyində və muzeyin filialları olan Niyazinin Mənzil-Muzeyi, Vaqif Mustafazadənin ev-muzeyi və Qara Qarayevin ev-muzeyində “açıq qapı” günü olacaq.

Cəfər Cabbarlı adına Azərbaycan Dövlət Teatr Muzeyinin elmi katibi Aytən Məmmədova bildirib ki, əlamətdar günlə bağlı bu gün mədəniyyət ocağında “Xan qızı” ədəbi-bədii kompozisiyası təqdim olunacaq.

Mayın 20-də Azərbaycan Milli Xalça Muzeyində Beynəlxalq Muzeylər Günü münasibətilə bir sıra tədbirlər keçiriləcək.