Azərbaycan Milli İncəsənət Muzeyində “Həyata sevgi ilə: Mikayıl Abdullayev” sərgisi açılıb. SSRİ Xalq rəssamı Mikayıl Abdullayevin 100 illik yubileyinə həsr olunmuş sərgidə Milli İncəsənət Muzeyi, Azərbaycan Dövlət Rəsm Qalereyası və Musiqi Mədəniyyəti Dövlət Muzeyinin kolleksiyasından əsərlər nümayiş olunur.

“Ədəbiyyat və incəsənət” portalı Mədəniyyət Nazirliyinə istinadən məlumat verir ki, sərgini açıq elan edən Milli İncəsənət Muzeyinin direktoru, Əməkdar incəsənət xadimi Çingiz Fərzəliyev diqqətə çatdırıb ki, muzeyin kollektivi Mikayıl Abdullayevin 100 illik yubileyinə böyük məsuliyyət və sevgi ilə hazırlaşıb. Sərgidə görkəmli rəssamın 190-a yaxın rəngkarlıq və qrafik əsəri nümayiş olunur. Vernisajda “Axşam”, “Sevinc”, “Azərbaycan tarlalarında”, “Saədət qurucuları”, “Mingəçevir işıqları”, “Hindistan anası”, “Çəltikçi qızlar” tematik tabloları, “C.Cabbarlı”, “Y.Məmmədəliyev”, “M. P.Vaqif”, “M.F.Axundzadə”, “Yazıçı H.Seyidbəyli”, “Şair S.Rüstəm”  portretləri yer alıb. Ekspozisiyada həmçinin Əməkdar rəssam, heykəltəraş Zeynalabdin İsgəndərovun müəllifi olduğu, Mikayıl Abdullayevin obrazı canlandırılan heykəltəraşlıq kompozisiyası da sərgilənir.

Mərasimdə çıxış edən mədəniyyət naziri Anar Kərimov Mikayıl Abdullayevin Azərbaycan rəssamlıq sənətinin inkişafında xidmətlərindən söz açıb. Deyib:

-Azərbaycan incəsənətində elə şəxslər vardır ki, onların hansı dövrdə, hansı şəraitdə yaşamasından asılı olmayaraq mədəniyyətimizin tarixinə əbədi olaraq öz adlarını qızıl hərflərlə yazıblar. Bunlardan biri də SSRİ Rəssamlıq Akademiyasının akademiki, SSRİ Xalq rəssamı Mikayıl Abdullayevdir. O, bir çox beynəlxalq mükafatların laureatı olub. Fırça ustası ümummilli lider Heydər Əliyev tərəfindən “İstiqlal” ordeninə layiq görülüb.

Nazir bildirib ki, Mikayıl Abdullayevin ilham mənbəyi, yaradıcılığının təməli doğma vətəni Azərbaycandır. Rəssamın “Azərbaycan doğma Vətənim. Mən sənin doğma balan, aşiqin kimi səni, sənin gözəlliyini kətan üzərində vəsf etməkdən yorulmuram, doymuram” sözləri də bunun əyani sübutudur. O, yaradıcılığında milli-mənəvi ənənələri əks etdirməklə yanaşı, hər zaman bəşəri dəyərlərə, ideallara da geniş yer verib. Sənətkar Hindistan, Əfqanıstan, Macarıstan, Polşa, İtaliya və bir çox başqa ölkələrdə olduğu zaman gördüyü maraqlı anları, insanların həyat tərzini, mədəniyyətini əks etdirən silsilə əsərlər yaradıb. Mikayıl Abdullayevin əsərləri Paris, London, Berlin, Praqa, Budapeşt, Belqrad, Sofiya, Varşava, Dehli, Qahirə, Brüssel və digər ölkələrin muzeylərində ən dəyərli eksponatlar kimi qorunub saxlanılır.

Anar Kərimov Prezident İlham Əliyev tərəfindən bu il mədəniyyət, ədəbiyyat və incəsənət sahəsində müstəsna xidmətləri olan bir çox şəxsiyyətlərin yubileylərinin qeyd edilməsi ilə əlaqədar sərəncamlar imzalandığını qeyd edib. Bildirib ki, Mikayıl Abdullayevin 100 illik yubileyinin qeyd edilməsi ilə bağlı Azərbaycan Respublikası Prezidentinin 10 sentyabr 2021-ci il tarixli sərəncamının icrası məqsədilə Mədəniyyət Nazirliyi tərəfindən tədbirlər planı hazırlanıb, bir sıra tədbirlər həyata keçirilib. Hazırda Mikayıl Abdullayevin yaradıcılığını özündə əks etdirən nəfis tərtibatlı kataloq üzərində son tamamlama işləri aparılır və yaxın günlərdə işıq üzü görəcək. Həmçinin rəssamın mərmərdən büstü hazırlanaraq Milli İncəsənət Muzeyinin kolleksiyasına daxil edilib.

Nazir çıxışının sonunda deyib: “Mikayıl Abdullayevin əsərləri zamanın bütün sınaqlarından keçərək hələ uzun illər boyu sənətsevərləri ruhlandıracaq. Sənətkarın həyat yolu isə gələcək nəsillər üçün seçdikləri peşəyə məsuliyyətli və fədakar yanaşması baxımından hər zaman nümunə olacaq”.

Azərbaycan Rəssamlar İttifaqının sədri, Xalq rəssamı Fərhad Xəlilov çıxışı zamanı Mikayıl Abdullayevin yaradıcılıq özünəməxsusluğu barədə danışıb. Bildirib ki, o, ictimai xadim kimi hər zaman insanların köməyinə çatıb, xeyirxah əməlləri ilə qəlblərdə iz salıb.

Rəssamın oğlu Cəmil Abdullayev Prezident İlham Əliyevə atasının irsinə göstərdiyi diqqətə görə təşəkkürünü bildirib. O, həmçinin silsilə tədbir və layihələrin gerçəkləşməsinə görə Mədəniyyət Nazirliyinə minnətdarlığını ifadə edib.

Çıxışlardan sonra sərginin rəmzi açılışını bildirən lent kəsilib və qonaqlar geniş və xüsusi zövq və dizaynla hazırlanmış ekspozisiya ilə tanış olublar. Ekspozisiyada nümayiş olunan həm rəngkarlıq, həm də qrafika nümunələri, tematik tablo, portret və mənzərə janrlarında əsərlər Mikayıl Abdullayevun rəngarəng sənət duyumunu əks etdirir.

Milli İncəsənət Muzeyində “Həyata sevgi ilə: Mikayıl Abdullayev” sərgisi mart ayına qədər davam edəcək.

Dekabrın 22-də Heydər Əliyev Mərkəzində təsviri incəsənətin küçə sənəti (“street art”) üslubunda işləyən braziliyalı rəssam Nina Pandolfonun “Minnətdarlıq” (“Gratitude”) adlı fərdi sərgisi açılıb.

AzərTAC xəbər verir ki, Heydər Əliyev Fondunun vitse-prezidenti Leyla Əliyeva sərginin açılışında iştirak edib.

Mərasimdə çıxış edən Heydər Əliyev Mərkəzinin direktoru Anar Ələkbərov diqqətə çatdırıb ki, pandemiya dövründə uzun müddətdir ehtiyac duyulan belə bir sərginin məhz Mərkəzdə təşkil olunması çox əhəmiyyətlidir. Bir neçə gündür Bakıda olan Nina Pandolfo ekspozisiyanın qurulmasında şəxsən iştirak edib. Həmçinin sərginin ərsəyə gəlməsində Braziliyanın Azərbaycandakı səfiri Manuel Adalberto Karlos Monteneqro Lopes da Kruzanın, Jan David Malat qalereyasının direktoru Jan David Malatanın böyük əməyi var.

Anar Ələkbərov bütün bu əlaqələrdə, eləcə də belə tədbirlərin təşkilində Heydər Əliyev Fondunun vitse-prezidenti Leyla Əliyevanın xüsusi rolu olduğunu vurğulayıb və ona təşəkkürünü bildirib.

Sərginin konsepsiyası haqqında məlumat verən braziliyalı rəssam Nina Pandolfo əvvəlcə Heydər Əliyev Fondunun vitse-prezidenti Leyla Əliyevaya və sərginin təşkilində əməyi olan hər kəsə təşəkkürünü ifadə edib.

Rəssam qeyd edib ki, “Minnətdarlıq” sərgisi hər kəsin minnətdar olmasını ehtiva edən bir sərgidir, daha doğrusu həyat tərzi anlamındadır.

“Minnətdarlıq bizi daha yüksək səviyyəyə ucaldan ülvi bir hissdir. O, bizə çətin anların keçib getdiyini, tezliklə gözəl bir şəfəqin gələcəyini öyrədir. Bizə paylaşmağı, birləşməyi, başqalarını duymağı öyrədir. Ürəyimizin sıxıldığını hiss etdiyimiz zaman gözlərimizə təbəssüm gətirən bir hissdir. Bizi digər insanlarla və həyatla unikal və sıx şəkildə əlaqələndirir. Ümidvaram ki, bütün ziyarətçilər mənim üçün heç bir etnik mənsubiyyəti yox, daha çox qadın olmaq vəziyyətini təmsil edən personajların təsirini, gücün kövrəklikdə olduğunu hiss edə bilərlər. Çünki qadın zəif deyil, kövrəkdir. Zəiflik gücün olmamasıdır. Kövrəklik isə həssaslıqdır. İşləmək, başqalarına dəstək olmaq, onlara qayğı göstərmək, bir sözlə biz qadınların etdiyi hər şeyi etmək üçün bizə güc verən elə qadının həssaslığıdır”, - deyə rəssam bildirib.

Sərginin açılış mərasimində çıxış edən Braziliyanın ölkəmizdəki səfiri Manuel Adalberto Karlos Monteneqro Lopes da Kruza Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban xanım Əliyevaya bu möhtəşəm təşəbbüsə görə, Fondun vitse-prezidenti Leyla Əliyevaya Nina Pandolfonu Azərbaycana dəvət etdiyi üçün təşəkkürünü bildirib.

Daha sonra sərgi ilə tanışlıq olub.

Sərgidə müəllifin multikultural dünyanı təqdim edən, etnik baxımdan müxtəlifliyi ilə seçilən qadınlara həsr olunan əsərləri nümayiş etdirilir. Ziyarətçilər həm də Nina Pandolfonun qraffiti instalyasiyaları ilə də tanış ola bilərlər.

Müəllif hesab edir ki, minnətdarlıq hissi daim ətrafa aşılanmalı və təşviq edilməlidir. Vəziyyətdən asılı olmayaraq, hər zaman minnətdar olmaq üçün səbəb tapmaq mümkündür. Nina Pandolfo onda ən güclü minnətdarlıq hissinin məhz yaradıcılıq zamanı yarandığını söyləyir.

Sərgiyə çıxarılan əsərlərdəki qadın obrazları fərqli mədəniyyətlərə mənsub olaraq geniş açılmış gözlərlə təsvir ediliblər. Bununla da müəllif bizi əhatə edən multikultural dünyanın seyr edilməsinin və buna minnətdarlıqla yanaşılmasının vacibliyini vurğulayır.

Braziliyalı rəssam Nina Pandolfo əsərləri ilə bağlı təəssüratlarını jurnalistlərlə də bölüşüb. O deyib: “Mənim sərgimin əsası təkcə minnətdarlıq deyil, eyni zamanda, minnətdar olmaqdır. Mən cəmiyyətə bu mesajı ötürmək istəyirəm. Sərgi çərçivəsində yaratdığım qaranlıq otağın öz mənası var. Demək istəyirəm ki, biz minnətdar olsaq, qaranlıqda olan, kölgədə olan şeyləri işıq üzünə çıxaracağıq. O otağa keçən hər bir kəs öz işığını orada görəcək”.

Səfir Manuel Adalberto Karlos Monteneqro Lopes da Kruza isə müsahibəsində vurğulayıb ki, pandemiya dövründə bu sərginin təşkili yeni həyatın başlanğıcıdır, yəni öncədən gələn bir yazdır, canlı aləmin oyanışıdır. “Çox xoşbəxtəm ki, bu duyğuları Braziliya rəssamı gətirdi. Azərbaycan odlar yurdu olduğu kimi, biz də buraya hisslərimizlə bir od gətirdik. Bu sərgi dünyəvi xarakter daşısa da, burada Braziliyanın nüansları var. Sərgidə nümayiş olunan əsərlərdəki obrazlar müxtəlif irqlərin nümayəndələridir - Braziliyada olduğu kimi”.

Heydər Əliyev Mərkəzindəki “Minnətdarlıq” sərgisi 2022-ci il iyunun 19-dək davam edəcək.

Nina Pandolfo 1977-ci ildə Braziliyada anadan olub. Karlos de Kampos adına Dövlət Texniki Məktəbdə vizual kommunikasiya üzrə təhsil alan Nina Pandolfo incəsənətin yeni üsulu ilə San-Paulu küçələrini bəzəməyə başlayır, qısa zamanda 1990-cı illərin Braziliya qraffiti səhnəsinin ayrılmaz nümayəndəsinə çevrilir, qraffiti sənətinin muzey və qalereyalara yol tapmasında əvəzsiz rol oynayır.

Pandolfo təkcə Braziliyada yox, dünyanın bir çox yerlərində, o cümlədən Avropanın bir sıra ölkələrinin və Amerika Birləşmiş Ştatlarının müxtəlif sənət qalereyalarında keçirilən sərgilərdə iştirak edib.

2007-ci ildə Pandolfo Şotlandiyanın 800 il yaşı olan tarixi Kelburn qəsrinin fasad və qülləsini boyamaq üçün Braziliyanın tanınmış küçə rəssamları ilə əməkdaşlıq edir. Bu təşəbbüs o qədər uğurlu olur ki, layihə 2011-ci ilin “Top-10 küçə sənəti nümunələri” siyahısına daxil edilir.

Rusiya Dövlət Duması üçüncü oxunuşda avtomobillərə icbari texniki baxışın keçirilməsini ləğv etdi. Sağ əlləri bizim başımıza.
Foto: Euronews

“Auction Baku” MMC şirkətinin təşkilatçılığı ilə 2022-ci il yanvarın 10-da Azərbaycanda incəsənət əsərlərinin onlayn auksionu keçiriləcək.
Dövlət Rəsm Qalereyasından bildirlib ki, növbəti auksion respublikada mədəniyyət və incəsənət sahəsində biznes münasibətlərini yaratmaq, alıcı və satıcılar arasında əlaqə qurmaq, art biznes sahəsində rəqabət qabiliyyətliliyini gücləndirmək, ölkənin iqtisadi inkişafında yaradıcı sənayesinin rolunu artırmaq məqsədilə həyata keçiriləcək.
Xatırladaq ki, tədbir bütün dünyada geniş vüsət alan COVID-19 pandemiyasından sonra ölkəmizdə təşkil ediləcək ilk onlayn auksion olacaq.
Azərbaycan Dövlət Rəsm Qalereyası auksionun təşkilinə metodiki dəstək göstərir.
Hərracda iştirak etmək istəyən şəxslər “Auction Baku” MMC-nin sosial şəbəkədəki hesablarını izləyə bilərlər.

Fəaliyyətinin əsas missiyası Azərbaycan diaspor təşkilatlarına dəstək vermək, milli-mənəvi dəyərlərimizi inkişaf etdirmək və dünyada daha geniş tanıtmaq olan Azərbaycan Diasporuna Dəstək Fondun maliyyə dəstəyi ilə “Azərbaycan musiqi inciləri” – “Music Pearls of Azerbaijan” adlı musiqi (not) kitabı nəşr olunub.
Azərbaycan Diasporuna Dəstək Fondundan AzərTAC-a bildirilib ki, kitabın çap olunmasında əsas məqsəd bəstəkarlarımızın musiqisini xaricdə tanıtmaq, onların əsərlərini digər ölkə ifaçılarının repertuarına daxil edərək təbliğinə nail olmaqdır. Burada piano, nəfəsli alətlər və vokal ifa üçün nəzərdə tutulmuş bir sıra əsərlər yer alıb.
Üzeyir Hacıbəyli, Müslüm Maqomayev, Asəf Zeynallı, Qara Qarayev, Fikrət Əmirov, Niyazi, Süleyman Ələsgərov, Tofiq Quliyev, Vasif Adıgözəlov və Aqşın Əlizadə kimi dəyərli Azərbaycan bəstəkarlarının əsərlərini özündə cəmləşdirən bu kitabın maraqlı cəhəti hər əsərdən əvvəl müəllif və onun bəstəsi haqqında, eyni zamanda Azərbaycan musiqi mədəniyyəti və bəstəkarlıq məktəbi barədə kiçik məlumatın verilməsidir.
Vurğulanacaq digər əsas məqam mətnlərin ingilis dilində tərtib olunmasıdır. Mətn dilinin bu qaydada seçilməsi tanıtım dairələrinin daha da geniş olmasına imkan yaratmış olacaq.
Təqdim olunan layihənin rəhbəri Türkiyədə yaşayan həmyerlimiz, musiqiçi Vüqar Qurbanov, kitabın redaktoru sənətşünaslıq üzrə fəlsəfə doktoru, musiqişünas Aybəniz Növrəsli, layihənin bədii rəhbəri sənətşünaslıq üzrə fəlsəfə doktoru Vüqar Hümbətovdur. Kitabın dizaynı Kamran Nəcəfova, əsərlərin kompyüter yığımı Yavər Nemətliyə aiddir.
“Azərbaycan musiqi inciləri” Azərbaycan Diasporuna Dəstək Fondunun vasitəçiliyi ilə dünyanın bir çox ölkələrində fəaliyyət göstərən musiqi təmayüllü təhsil müəssisələrinə və kitabxanalara hədiyyə ediləcək.

“Səhnə” teatrı YARAT Müasir İncəsənət Mərkəzində yenidən “Bir dəfə Qarabağda” tamaşasını teatrsevərlərə təqdim edib.
Tamaşa mərhum aktyor Əməkdar artist Elşən Çarhanlının xatirəsinə ithaf olunub.
Mirzə Fətəli Axundzadənin “Müsyö Jordan və dərviş Məstəli şah” əsərinin motivləri əsasında müzikl janrında hazırlanan tamaşa dəfələrlə səhnə və kino kontekstində tamaşaçı ilə üz-üzə dayanan obrazların köməyi ilə bu dəfə onları bir başqa ovqatla Qarabağa aparıb. Aktyor oyunu və ecazkar musiqi tamaşaçılar tərəfindən maraqla qarşılanıb.
Tamaşanın quruluşçu rejissoru Elvin Mirzəyev, bəstəkarı Azər Hacıəsgərli, şeirlərin müəllifi isə Eminquey Akifdir.
Səhnə əsərində rolları Əhliman Ərşadlı, Ramil Məmmədov, Mətanət Eres, Elçin Hacı, Abdulla Elşadlı, İranə Kərimova, Ülvi Haşim, Ruhiyyə Yəhyayeva, Qüdrət Fətullayev və Absalam Həşimli ifa edib.
Tamaşada musiqiləri qədim milli musiqi alətlərindən ibarət “Əsrlərin sədası” ansamblı səsləndirib. Ansamblın bədii rəhbər Məmmədəli Məmmədov olub.

Bakı Slavyan Universitetinin V.f.Humbolt adına tədris və mədəniyyət mərkəzində Azərbaycan klassik ədəbiyyatının qüdrətli söz ustadları Nizami Gəncəvinin 880, İmadəddin Nəsiminin 650 və Aşıq Ələsgərin 200 illiyi münasibətilə alman dilində “Poeziya Günü” keçirilib.
Bu barədə Diasporla İş üzrə Dövlət Komitəsindən bildirilib.
Alman-Azərbaycan Cəmiyyətinin sədri, professor Çingiz Abdullayev bildirib ki, tədbir çərçivəsində dahi şəxsiyyətlərin əsərləri alman dilində təqdim olunub. Onların arasında Köln Azərbaycan Evinin dəstəyi ilə Almaniyada nəşr olunan yazıçı-alim Orhan Arasın “Nizami Gəncəvinin alman dilindəki aforizmləri”, Alman-Azərbaycan Cəmiyyətinin təşəbbüsü ilə çap edilən “Nəsiminin seçilmiş əsərləri”, “Aşıq Ələsgərin şeirləri” də olub.
Qeyd edək ki, oktyabr ayında bu kitablar Almaniyanın “Frankfurt am Main” Beynəlxalq Kitab Sərgisində nümayiş etdirilib.

“Artıq yeni bir nəsil böyüyüb. Yaşlı nəslin nümayəndələri ürəklərində Vətən, torpaq nisgil daşıyırdılar. Mən özüm də 30 ilə yaxın bu ağrı ilə yaşamışam. Şükürlər olsun ki, bizim bu ağrılarımıza son qoyuldu, doğma Qarabağımız yağı tapdağından azad olundu”.
AzərTAC xəbər verir ki, bu sözləri dekabrın 22-də Üzeyir Hacıbəyli adına Bakı Musiqi Akademiyasında keçirilən mətbuat konfransında akademiyanın "Solo oxuma və Opera hazırlığı" kafedrasının müdiri, professor, Xalq artisti, Azərbaycan Respublikasının Dövlət mükafatı laureatı, "Şöhrət", "Şərəf", və "İstiqlal" ordenli Xuraman Qasımova deyib.
“Bu otuz ildə mən bacım Xalq artisti Fidanla bütün dünyanı dolaşdıq. Tam səmimi deyirəm ki, heç yerdə Qarabağın təbiəti kimi gözəlliyə malik ikinci bir yer görmədik. Biz öz vətənimizi sevməsəydik Qarabağa qayıtmazdıq. 30 il ərzində qaçqın, didərgin taleli bir milyondan çox həmvətənimiz çox çətin günlər yaşadı. Amma heç vaxt ümidlərini itirmədilər. Onlar ölkə başçısına da, ordumuza da güvənirdilər. Nəhayət Prezident İlham Əliyevin rəhbərliyi altında müzəffər Ordumuz doğma yurdumuzu bizə qaytardı. Müharibə başlayan gündən bütün dünya bizə qarşı çıxdı. Heç bir təşkilatlar bu məsələni həll etmir, yaxud da etmək istəmirdi. Qarabağı Ali Baş Komandanın rəhbərliyi altında Azərbaycanın qəhrəman oğulları azad etdi. Hətta könüllülər dəstəsinə Bakı Musiqi Akademiyasının tələbələri də yazılmışdı. Onların 44 günlük Vətən müharibəsindən sonra bizə danışdığı hadisələri göz yaşlarsız dinləmək olmurdu. Müharibə itkisiz olmur. 44 günlük Vətən müharibəsində biz şəhidlər verdik. Allah şəhidlərimizə rəhmət eləsin, qazilərimizə cansağlığı versin”,-deyə Xuraman Qasımova bildirib.
Şuşada “Xarıbülbül” musiqi festivalının, Vaqif Poeziya Günlərinin keçirildiyini söyləyən Xuraman Qasımova qeyd edib ki, bizə Üzeyir bəyi, Vaqifi, Xurşidbanu Natəvanı, Xan Şuşinskini, Bülbülü və digər böyük dühalar bəxş etmiş bu qədim şəhər Azərbaycanın mədəniyyət paytaxtı kimi bu gün yeni dirçəliş, inkişaf yoluna qədəm qoyub.
Ölkə başçısını 60 illik yubileyi münasibətilə təbrik edən Xalq artisti deyib: “Hər bir azərbaycanlı fəxr edə bilər ki, onun Prezidentinin adı dünyanın qalib sərkərdələri siyahısındadır. Bu gün Azərbaycan Prezidenti İlham Əliyev yubileyini qəhrəman dövlət başçısı kimi qeyd edir. Heydər Əliyevin mədəniyyət siyasəti bu gün hörmətli Prezidentimiz İlham Əliyev tərəfindən çox ləyaqətlə davam etdirilir”.
Sonra jurnalistlərin suallarını cavablandıran Xuraman Qasımova bildirib ki, gərək müğənni olmaq istəyən uşaqların istedadını valideynləri düzgün dəyərləndirsin, onlara düzgün istiqamət versinlər. Qeyd edib ki, uşaqlar vokal sənətinə ciddi yanaşırlarsa 17 yaşından sonra oxumağa başlamalıdırlar. Çünki azyaşlı uşaqların istedadını qiymətləndirmək çətin olur.
Xarici dilləri bilməyin vacib olduğunu deyən X.Qasımova bildirib ki, əvvəllər Azərbaycan Dövlət Akademik Opera və Balet Teatrında əsərləri xarici dildə oxumaq ənənəsi vardı. Təəssüflər olsun ki, indi tələbələr italyan, alman, ingilis dillərini yaxşı bilmir. Buna görə də opera sənətinin dünyada daha yaxşı təbliği üçün xarici dilləri mənimsəmək olduqca vacibdir.