Super User
Teatr Xadimləri İttifaqında bədii qiraət müsabiqəsi keçiriləcək
İyunun 20-də “Cənnətim Qarabağ” adlanan bədii qiraət müsabiqəsi keçiriləcək.
Azərbaycan bədii fikrinin görkəmli siması, şair və xeyriyyəçi Xurşidbanu Natəvanın anadan olmasının 190 illiyinə həsr olunan tədbir Teatr Xadimləri İttifaqında reallaşacaq.
Müsabiqənin təşkilatçıları Mədəniyyət Nazirliyi və Azərbaycan Teatr Xadimləri İttifaqıdır.
Lənkəran şəhərinin mədəni inkişaf strategiyası gündəmdədir
Lənkəran Regional Mədəniyyət İdarəsinin (RMİ) təşkilatçılığı ilə “Lənkəran Springs Hotel”də keçirilən tədbir Lənkəranın şəhərinin Avropa İttifaqı tərəfindən maliyyələşdirilən “EU4Culture” (“Avropa İttifaqı mədəniyyət naminə”) layihəsi çərçivəsində elan edilən “Şərq Tərəfdaşlığı ölkələrində iqtisadi inkişaf və sosial rifah üçün mühərrik kimi mədəniyyət və yaradıcılığın təşviqi” qrant müsabiqəsində iştirakına həsr olunmuşdu.
“Ədəbiyyat və incəsənət” portalı Mədəniyyət Nazirliyinə istinadən xəbər verir ki, mərasimdə çıxış edən Mədəniyyət Nazirliyi Yaradıcı sənayelər və rəqəmsal inkişaf şöbəsinin müdiri Ramil Abbəkirov çıxış edərək bildirdi ki, mədəniyyət həyatımızda böyük rolu olan amillərdən biridir. Gündəlik həyat tərzimiz, kulinariya, ünsiyyət və s. Bütün bunlar mədəniyyətin bir parçasıdır. Mədəni inkişaf fərd, icma və dövlət olaraq tam şəkildə bir-biri ilə əlaqəli şəkildə inkişaf etməlidir. Mədəniyyət Nazirliyi bu istiqamətdə çoxsaylı layihələr həyata keçirir ki, hazırda bu layihələrin böyük bir hissəssi işğaldan azad olunmuş ərazilərimizə yönəldilib və mədəniyyət paytaxtımız Şuşada reallaşır.
“EU4Culture” layihəsi haqqında söz açan şöbə müdiri dedi ki, bu layihə Avropa İttifaqının Şərqində yerləşən 5 ölkədə reallaşır: “Layihənin 2021-ci ildən başlayan fazasında əsas diqqət mərkəzə deyil, regionlara yönəldilib. Ölkəmizdən dən layihəyə 8 şəhər müraciət etmişdi. Birinci mərhələdə 5 şəhər, ikinci mərhələdə də isə 3 şəhər – Şəki, Xırdalan və Lənkəran – qrantı əldə etmək uğrunda yaraşır. Lənkəran çox gözəl və potensialı ilə seçilən şəhərlərimizdəndir. Bu şəhər qalib gələrsə, çalışacağıq ki, onun mədəni potensialını bu strategiya vasitəsilə üzə çıxara bilərək. Strategiyanın işləmə müddəti 4 il üçün nəzərdə tutulub. Layihə əsas olaraq cəmiyyətin aktiv dəstəyini tələb edir. Çünki yekun məqsəd yenə də insanların rifahına xidmət edir”.
Lənkəran Şəhər İcra Hakimiyyəti başçısının müavini Mikayıl Cəfərzadə təqdimatın şəhər üçün əhəmiyyətini yüksək qiymətləndirdi. Qeyd etdi ki, layihə regionda mədəniyyətimizin təbliği və təşviqində vacib rol oynayacaq. Həmçinin diqqətə çatdırdı ki, Prezident İlham Əliyevin sərəncamı ilə təsdiq olunmuş “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı” çərçivəsində Lənkəran şəhərində bir sıra tədbirlər həyata keçirilib. Yol infrastrukturunun qurulması, müasir tələblərə cavab verən müəssisələrin inşası və sahibkarlığın inkişafına yönəldilmiş işləri misal çəkə bilərik. Mədəniyyət Nazirliyinin təşəbbüskarı olduğu “EU4Culture” layihəsinin Lənkəranda icrasını yüksək qiymətləndirdiklərini deyən M.Cəfərzadə təşkilatçılara təşəkkürünü bildirdi.
Təqdimatda çıxış edən Avropa İttifaqının “EU4Culture” layihəsinin yerli əlaqələndiricisi Firuzə Bağır diqqətə çatdırdı ki, 2021-ci ilin may ayında elan edilən proqram Şərq Tərəfdaşlığı ölkələrində qeyri-paytaxt və regionlara xüsusi diqqət yetirməklə mədəniyyət və yaradıcı sektoru dəstəkləmək üçün Avropa İttifaqı tərəfindən maliyyələşdirilən dördillik layihədir. Layihənin ölkəmiz üzrə həyata keçirilməsində tərəfdaş Azərbaycan Respublikasının Mədəniyyət Nazirliyidir: “Layihə çərçivəsində alınan qrant hesabına şəhərlər üçün mədəniyyət strategiyasının hazırlanacaq. Gələcəkdə növbəti mərhələdən uğurla keçəcək şəhərlər üçün strategiyanın həyata keçirilməsi məqsədilə 300 min avro qrant ayrılması nəzərdə tutulub. Təqdim olunan müraciətlər qiymətləndirildikdən sonra ölkə üzrə Şəki, Xırdalan və Lənkəran şəhərləri öz mədəni inkişaf strategiyalarını hazırlamaq üçün 30 min avro qrant qazanıblar. Lənkəran şəhərindən layihəyə Lənkəran Regional Mədəniyyət İdarəsi müraciət edib”.
Sonra “EU4Culture” layihəsi çərçivəsində Avropa İttifaqının maliyyə dəstəyi ilə hazırlanmış Lənkərana həsr olunmuş videoçarx nümayiş etdirildi.
Daha sonra Lənkəran RMİ-nin rəisi Şahin Şahbazov şəhərin mədəniyyət strategiyasını təqdim etdi. Bildirdi ki, Lənkəran öz yerli sakinləri və onu ziyarət edən qonaqlar üçün mədəni, sosial və iqtisadi cəhətdən inkişaf edən tolerant, aktiv və canlı şəhərdir. Layihədə “Niyə Lənkəranın qalib gəlməsi vacibdir” fikrini isə idarənin rəisi regionun zəngin və multikultural mədəniyyəti, yüksələn iqtisadi və inkişaf edən nəqliyyat və turizm infrastrukturu, unikal qastronomiya (Lənkəran qastronomiya tematikası üzrə 2021-ci ildən UNESCO-nun Yaradıcı şəhərlər şəbəkəsinin üzvüdür), multietnik yaradıcı mühit və zəngin yaradıcılıq praktikası ilə əlaqələndirdi.
Şahin Şahbazov tematik istiqamətlər üzrə, strategiya çərçivəsində reallaşacaq qastronomiya, folklor, musiqi, sənətkarlıq və s. istiqamətlərdə şəhərin potensialı haqqında geniş məlumat verdi. Diqqətə çatdırdı ki, strategiyanın fəaliyyətləri bölməsində il ərzində həftə sonlarında 2-3 günlük festivalların təşkilini, 2024-cü ilin sonuna qədər 24 festivalın keçirilməsini qarşıya məqsəd qoyur. Strategiyanın reallaşması üçün əsas layihə komandasına dəstək mədəniyyət liderlərindən ibarət yerli dəstək qrupu tərəfindən təmin olunacaq və onlar gələcəkdə “Kreativ Lənkəran platforması”nı da idarə edəcəklər. Layihənin icraçısı Lənkəran Regional Mədəniyyət İdarəsi, əsas tərəfdaş Lənkəran Rayon İcra Hakimiyyətidir. Digər tərəfdaşlar sırasında Dövlət Turizm Agentliyinin Lənkəran Destinasiya Menecmenti Təşkilatı, Kiçik və Orta Biznesin İnkişaf Agentliyi (KOBİA), Lənkəran KOB İnkişaf Mərkəzi, Gənclərin İnkişaf və Karyera Mərkəzi Lənkəran nümayəndəliyi, Azərbaycan Milli Kulinariya Assosiasiyası, Lənkəran Dövlət Universiteti, “Regional İnkişaf” İctimai Birliyi, Azərbaycan Yaradıcı Sənayelər Federasiyası, Kreativ Azərbaycan Platforması, Azərbaycan Film Komissiyası və “Azərxalça” ASC-dir.
Milli Kulinariya Assosiasiyasının rəhbəri, Əməkdar mədəniyyət işçisi Tahir Əmiraslanov strategiya ilə bağlı fikirlərini bölüşdü. Qrantda Lənkəranın qalib gəlməsi üçün regionun özəl xüsusiyyətlərini vurğulayaraq belə bir təşəbbüsün reallaşmasında əməyi olan hər kəsə minnətdarlığını ifadə etdi.
Təqdimatdan sonra fikir mübadiləsi aparıldı və gələcək planlarla bağlı təkliflər müzakirə edildi. Tədbir iştirakçıları həmçinin yerli sənətkarların əl işlərindən ibarət sərgi ilə də tanış oldular.
Qobustanda elektron musiqi gecəsi keçiriləcək
Azərbaycanda elektron musiqinin bayraqdarı hesab olunan “Solong” layihəsi ənənə və idelogiyasına sadiq qalaraq bu dəfə Qobustanda yeni tədbirə hazırlaşır.
“Ədəbiyyat və incəsənət” portalı Mədəniyyət Nazirliyinə istinadən məlumat verir ki, iyunun 18-də Qobustan Dövlət Bədii-Tarixi Qoruğunda etnik və proqressiv musiqi tezliyində xarici və yerli DJ-lər çıxış edəcək.
Qeyd etmək lazımdır ki, zövqləri oxşayacaq bu möhtəşəm gecəyə hazırlıq işləri heç də asan olmayıb. Qayaların vizuallaşdırılması, işıqlandırılması üçün “Solong” layihəsinin əməkdaşları 1 həftəyə yaxın çalışıblar. Bu isə o deməkdir ki, elektron musiqi həvəskarları həmin gecə qeyri-adi işıq şousunun şahidi olacaqlar. Həmçinin şouda tarix və müasirliyin sintezi bir arada təqdim olunacaq.
Tədbirin xüsusi xarici qonaqları dünyaca məşhur İsraildən Sahar Zangilevitch və Türkiyədən Murat Uncuoğludur. Yerli DJ-lərin siyahısında isə Elcheen, U-Who və Maya Aziz yer alıb.
“Back to origin” adı ilə təqdim olunan bu layihə “Solong”un “Coca-Cola” ilə birgə əməşdaşlığı çərçivəsində baş tutacaq.
Yaxın günlərdə həyata keçəcək tədbirin xüsusi konseptdə hazırlanmasının məqsədi ölkənin mədəni irsini beynəlxalq arenada yüksək səviyyədə təbliğ etməkdir.
“Mədəniyyət/Culture” jurnalının növbəti nömrəsi çıxıb
“Mədəniyyət/Culture” jurnalının daha bir nömrəsi oxucuların görüşünə gəlib. Hər zamankı kimi, jurnal maraqlı yazıları ilə diqqəti cəlb edir.
Jurnalın ilk səhifələri Milli Məclisin deputatı Qənirə Paşayevanın müsahibəsi ilə başlayır. Müsahibədə Qənirə xanım türk dünyası arealında görülən işlər, Azərbaycanın əhəmiyyətli mövqeyi və mənəvi dəyərlər barədə dolğun cavablarla oxucunu maraqda saxlayır.
Türk dünyası adına daha bir neçə material da jurnalın bu nömrəsinin vacib bölümünü təşkil edir. Novruz mövzularına və tədbirlərinə toxunulur ki, bariz nümunəsi Beynəlxalq Türk Mədəniyyəti və İrsi Fondunun builki tədbirini əhatələyir, daha sonra oxuculara “Kitabi-Dədə Qorqud” eposunun özbək dilinə tərcüməsi faktını çatdırır.
Azərbaycan Prezidentinin sərəncamlarına uyğun olaraq, korifeylərin yubileyləri haqqında mütəmadi yazılarla çıxış edən jurnal bu dəfə də Xan qızı “Xurşidbanu Natəvan – 190”, dahi bəstəkar “Fikrət Əmirov – 100” yubileylərini, dahi şərqşünas, Nizami yaradıcılığının ən böyük tədqiqatçılarından, professor Rüstəm Əliyevi xatırlayır, Azərbaycan kinematoqrafiyası və ədəbiyyatının görkəmli simalarından biri, bu yaxınlarda dünyasını dəyişən Rüstəm İbrahimbəyovu anır.
Bu ərəfədə bölgələrdə keçirilən ən duyğusal tədbirlərdən biri də artıq bir ildir ki, həyatdan gedən gözəl şair Fikrət Qocanın anım mərasimi oldu və respublikamızın tanınmış simaları toplaşıb onu öz vətənində - Ağdaşda andılar. Bu barədə geniş reportaj jurnalın bu nömrəsində oxuculara təqdim olunur.
“Elm” rubrikasında oxucuların ixtiyarına verilən məqalələr də həmişəki kimi gənc və müqtədir araşdırmaçılarımızın üstün təfəkkürünün məhsulu olaraq Azərbaycan elminə xidmətdədir.
Azərbaycan Kulinariya Mütəxəssisləri Assosiasiyası “Worldchefs”ə üzvlüyə qəbul edilib
Dövlət Turizm Agentliyinin təşkilati dəstəyi ilə Azərbaycan Kulinariya Mütəxəssisləri Assosiasiyası (AKMA) Dünya Kulinariya Təşkilatları Assosiasiyasına (Worldchefs -World Association of Chefs Societies) assosiativ üzv qəbul edilib.
Bu barədə “Ədəbiyyat və incəsənət” portalı AzərTAC-a istinadən məlumat verir. Dünya Kulinariya Təşkilatları Assosiasiyası qlobal mətbəxlərin kulinariya standartlarının saxlanması və təkmilləşdirilməsi istiqamətində fəaliyyət göstərən peşəkar qeyri-hökumət təşkilatıdır. Yüzdən çox baş aşpaz cəmiyyətlərini özündə birləşdirən qurum qastronomiya üzrə ekspertlərin təhsili, təlimi və hüquqi statuslarının gücləndirilməsi üçün müvafiq işlər görür.
Onu da vurğulayaq ki, Dövlət Turizm Agentliyinin yeni qastronomiya strategiyasında “Worldchefs”lə intensiv əməkdaşlıq xüsusi yer tutur.
Cari ilin iyun ayının əvvəlində Dövlət Turizm Agentliyinin dəstəyi ilə ilk dəfə olaraq azərbaycanlı kulinarlar komanda şəklində “Worldchefs” tərəfindən Birləşmiş Ərəb Əmirliklərinin Əbu-Dabi şəhərində təşkil olunan Dünya Baş Aşpazlarının Konqresində iştirak ediblər. Kulinariya sahəsində dünyanın ən böyük tədbiri olan bu konqresdə 110 ölkədən 5 mindən çox nümayəndə iştirak edib. Tədbir çərçivəsində Dövlət Turizm Agentliyinin sədr müavini Azadə Hüseynovanın “Worldchefs” təşkilatının prezidenti Tomas Quqler ilə görüşü baş tutub.
Bundan əlavə, azərbaycanlı aşpazlar bu il ilk dəfə olaraq “Worldchefs”in təşkil etdiyi və baş aşpazlarımızın beynəlxalq səviyyəli yarışmalarda hakim kimi iştirakına imkan yaradacaq beynəlxalq hakimlik kurslarında komanda olaraq iştirak ediblər.
Qeyd edək ki, “Worldchefs” təşkilatı ilə əməkdaşlıq üçün Dövlət Turizm Agentliyi tərəfindən, həmçinin Dubay Beynəlxalq Kulinariya İncəsənət Mərkəzi (ICCA) ilə müzakirələrə başlanılıb. Müzakirələr əsnasında sözügedən əməkdaşlığın təlim və sertifikasiya, texniki peşə təhsili, qastronomik turizm marşrutlarının tərtibatı, eləcə də Azərbaycan qastronomiya sənayesi nümayəndələrinin dünyamiqyaslı yarışlarda və tədbirlərdə yüksək səviyyədə təmsilçiliyi ilə bağlı ilkin razılıq əldə olunub.
“İrsin idarəedilməsi bacarıqlarının inkişafı” təlim proqramının üçüncü günü
UNESCO-nun Dünya Mədəni və Təbii İrsinin Qorunmasına dair 1972-ci il Konvensiyası çərçivəsində “İrsin idarəedilməsi bacarıqlarının inkişafı” Təlim proqramının üçüncü günü keçirilmişdir və ölkəmizin irsin idarəedilməsi sahəsində aidiyyəti qurumların nümayəndələri təlim kursunda iştirak etmişdir.
“Ədəbiyyat və incəsənət” portalı Mədəniyyət Nazirliyinə istinadən xəbər verir ki, təlim kursunun üçüncü gününün təlimçisi EU4CULTURE layihəsinin yerli məsləhətiçisi, Mədəni irs üzrə ekspert Günay Rzazadə tərəfindən Konvensiyanın konkret müddəaları üzərindən real nümunələr ilə üzv ölkələr üçün imperativ olan hüquqi inzibati çərçivələr, yerli, milli və beynəlxalq səviyyələrdə izah edilmişdir. O, həmçinin, interaktiv metodlarla mədəni irsin müxtəlifliyinin təbliğinin vacibliyi, yerli icmaların irsin qorunması və inkişafında iştirakçılığı, beynəlxalq əməkdaşlıq və yardım imkanları barədə sessiyasında məlumat vermişdir, eləcə də irs idarəetməsinin ölkə kontekstində SWOT analizi aparılaraq, konkret suallar ətrafında sual-cavab sessiyası keçirilmişdir.
Təlim proqramı Mədəniyyət Nazirliyinin sifarişi, Dövlət Turizm Agentliyi, "İçərişəhər" Dövlət Tarix-Memarlıq Qoruğu İdarəsinin tərəfdaşlığı və Azərbaycan Yaradıcı Sənayelər Federasiyasının dəstəyi ilə 4 əsas mövzuya: “Milli/yerli kimliyi əks etdirən və cəmiyyətin iqtisadi inkişafına töhfə verən yerlər kimi mədəni irsdə ən yaxşı təcrübələr”, “Mədəni irs siyasəti və institutları. Konvensiyadan mövzular və qeydlər”, “Maddi və Qeyri-maddi İrs və Dayanıqlı İnkişaf”, “Mədəni irsin cəmiyyətin sosial-mədəni inkişafında rolu (ən yaxşı təcrübələr, çağırışlar və imkanlar)” həsr olunur və iştirakçıların bu sahədə səriştə və bacarıqların artırılması, həmçinin ölkəmizin beynəlxalq mədəniyyət və yaradıcılıq fəaliyyətlərinin səmərəli təşkilinə töhfə verəcəkdir. Təlim proqramı sabah 17 iyun tarixində davam edərək sona çatacaqdır.
M.Teatrın yeni məkanda premyerası olacaq
İyunun 19-da yeni məkanda - Tbilisi prospekti, 76 ünvanında, “Qanun” nəşriyyatı yerləşən binanın 3-cü mərtəbəsində M.Teatr rejissor Oktay Mehdiyevin quruluşunda “Vidalaşmadan getməyin” tamaşasının premyerasını oynayacaq.
“Ədəbiyyat və incəsənət” portalı xəbər verir ki, tamaşanın səhnələşdiricisi Vidadi Həsənov, bəstəkar Vüqar Məmmədzadə, rəssam Ülkər Əliyeva, səhnə plastikası yönətməni Mikayıl Mikayılov, rejissor köməkçisi Səbinə Süleymanovadır.
“Bəlkə mən heç yaşamamışam?!” kimi sirli çağırışla nümayiş etdiriləcək tamaşa saat 18.00-də başlayacaq.
Biletləri i ticket.az saytından əldə etmək mümkündür.
Mədəniyyət naziri Anar Kərimov Beyləqanda vətəndaşlarla görüşüb
Prezident İlham Əliyevin tapşırığına uyğun olaraq, mərkəzi icra hakimiyyəti orqanları və digər idarəetmə qurumlarının rəhbərləri tərəfindən bölgələrdə vətəndaşların qəbulu keçirilir, onların müxtəlif məsələlərlə bağlı müraciətlərinin həlli ilə əlaqədar müvafiq addımlar atılır.
“Ədəbiyyat və incəsənət” portalı Mədəniyyət Nazirliyinə istinadən xəbər verir ki, 2022-ci ilin iyun ayında şəhər və rayonlarda keçiriləcək vətəndaşların qəbulu cədvəlinə əsasən, Azərbaycan Respublikasının mədəniyyət naziri Anar Kərimov iyunun 16-da Beyləqan rayon Heydər Əliyev Mərkəzində Beyləqan, Füzuli və Xocavənd rayonlarının sakinləri ilə görüşüb.
Qəbuldan öncə mədəniyyət naziri Anar Kərimov və Beyləqan Rayon İcra Hakimiyyətinin başçısı Asif Ağayev ulu öndər Heydər Əliyevin şəhərin mərkəzində ucaldılmış abidəsini ziyarət edib, önünə gül dəstələri qoyublar.
Nazir Anar Kərimov 2012-ci ildə rəsmi açılışı olan Beyləqan rayon Heydər Əliyev Mərkəzinin fəaliyyəti ilə tanış olub, ulu öndərin həyatının və dövlətçilik fəaliyyətinin fərqli dövrlərini əks etdirən materiallar, şəkillər, tarixi sənədlər, eksponatlar, o cümlədən müxtəlif illərdə Beyləqana səfərləri ilə bağlı fotolara baxış keçirib. Nazirə məlumat verilib ki, ümummilli liderin xatirəsinin əbədiləşdirilməsi baxımından böyük əhəmiyyəti olan mərkəzdə rəsm studiyası, internet otağı, xarici dil kursu, həmçinin akt, konfrans və ekspozisiya zalları mövcuddur.
Daha sonra Heydər Əliyev Mərkəzində nazirliyin məsul əməkdaşlarının da iştirakı ilə vətəndaşların qəbulu keçirilib. Beyləqan, Füzuli və Xocavənd rayonlarından olan sakinlərin müraciətləri əsasən işlə təmin olunma, kitabxana sahəsində fəaliyyətin təkmilləşdirilməsi, kitab nəşrinə köməklik göstərilməsi, iş yerinin dəyişdirilməsi və digər məsələləri əhatə edib.
Anar Kərimov vətəndaşların ayrı-ayrı məsələlərlə bağlı müraciət və təkliflərini dinləyib, ərizə və şikayətlərinə baxıb. Qaldırılan məsələlərin operativ, hərtərəfli araşdırılması və qanunvericiliyin tələblərinə uyğun həll edilməsi üçün müvafiq tapşırıqlar verib.
Azərbaycanda Rəsul Həmzətovun yubileyi qeyd olunacaq
Gələn il Rusiya ilə bərabər Monqolustan, Qırğızıstan, Belarus və o cümlədən də Azərbaycanda Xalq şairi, Dağıstan əsilli Rəsul Həmzətovun anadan olmasının 100 illiyi münasibətilə tədbirlərin keçirilməsi planlaşdırılır. Bu barədə “Ədəbiyyat və incəsənət” portalı TASS Agentliyinə istinadən məlumat verir. Agentlik şairin qızı Salixat Rəsulovaya istinad edib. 100 illik yubiley 2023-cü ilin 23 sentyabrına təsadüf edəcək.
“Rəsul Həmzətovun şeirlərinə yazılmış mahnının ən yaxşı ifasına görə Monqolustan nümayəndəliyinin bazasında hər il “Bizim mahnı” ifaçılarının televiziya müsabiqəsi keçiriləcək. Bişkekdə Rəsul Həmzətovun anadan olmasının 100 illiyinə həsr olunmuş “Şimali Qafqaz xalqlarının mədəniyyəti” festivalı, Qırğızıstanda “Durnalar” hərbi-vətənpərvərlik mahnısı gənclər festivalı, Azərbaycanda və Belarus Respublikasında mədəni-maarif tədbirlərinin keçirilməsi planlaşdırılır”, - deyə Rəsulova bildirib.
Onun sözlərinə görə, bu il həmçinin Tehranın Əllamə Təbatəbai adına İran Universitetinin ərazisində şairin büstünün qoyulması planlaşdırılır.
Həmzətovun qızının qeyd etdiyi kimi, Rusiyada bayram çərçivəsində festivalların, konsertlərin, sərgilərin, teatr tamaşalarının, elmi konfransların və ədəbi gecələrin də keçirilməsi nəzərdə tutulur.
Xatırladaq ki, avar xalqının böyük oğlu olan Rəsul Həmzətov Səməd Vurğun, Çingiz Aytmatov, Oljas Süleymenovla birgə SSRİ-nin “Qızıl yazarlar” pleadasına üzv olan tək-tük müsəlman yazarlardan sayılır.
Anar Kərimov: “Vətən müharibəsi ilə bağlı çoxseriyalı filmin çəkilişinə başlanılıb”
“İşğaldan azad edilən Azərbaycan ərazilərində mədəni irsin yenidən bərqərar olunmasında dövlətimiz tərəfindən sistemli tədbirlər həyata keçirilir.”
Bunu Azərbaycan Respublikasının mədəniyyət naziri Anar Kərimov Şuşa Bəyannaməsinin birinci ildönümünə həsr olunan beynəlxalq konfransda çıxışında söyləyib.
Nazir bu prosesə qardaş Türkiyənin də dəstək göstərdiyini diqqətə çatdırıb. A.Kərimov qeyd edib ki, Şuşa şəhərinin 2023-cü ildə Türk dünyasının mədəniyyət paytaxtı seçilməsi də türk xalqlarının qədim şəhərimizə verdiyi dəyərin ifadəsidir.
Kino sahəsində də Azərbaycanla Türkiyənin fəal əməkdaşlığa başladığını deyən nazir söyləyib ki, Vətən müharibəsi ilə bağlı çoxseriyalı filmin çəkilişinə başlanılıb. Həmin filmin bu ilin sonuna tamamlanması nəzərdə tutulur.
Digər tədbirlər haqqında da məlumat verən A.Kərimov iki ölkə arasında mədəniyyət sahəsində əməkdaşlığın bundan sonra da uğurla davam edəcəyini əminliklə ifadə edib.
