Super User
Ən yaxşı müasir şeirlər - “Dərdi övladlığa götürən adam”
Neçə doğma adı itirmişəm mən,
Mən dünən min idim, indi neçəyəm?
Dərdi övladlığa götürmüşəm mən-
Onu balam kimi böyüdəcəyəm…
Dünya bir sobaymış- od-ocağı yox,
Bir qoca deyinir evdə qarıyla.
O yetim uşağın oyuncağı yox,
O uşaq oynayır göz yaşlarıyla…
Dəyir qulağıma ölümün səsi,
Az qalıb qırılıb yerə düşməyə.
O son budaqdakı sərçə neynəsin,
Başqa budaq yoxsa yer dəyişməyə?..
Sən elə bilirsən diriyəm, qızım-
Sənin də bir ümid baxtına düşüb.
Üstünə gələndə “qara kağız”ım,
Nə yaxşı, savadsız vaxtına düşüb…
Görən nə istəyir əlim yaxamdan,
Görən tərs keçmişəm yolu harda mən?
Bir sevgi qazandım bu dünya xamdan,
Bir ömür uduzdum bu qumarda mən.
Çoxu bu dünyayla durub güləşdi,
Yıxdı öz evini…tikmək istəyən.
Gecə ay işığı, gündüz günəşdi,
Məni göy üzünə çəkmək istəyən.
…Bizim axşamlarda yanmayır bu şam,
Sevinc bir qatardı- bizi götürmür.
İlahi, nə yaman ağır olmuşam-
Məni bu dünyanın gözü götürmür…
Əlizadə Nuri
Adı özündən çox yaşayacaq sənətkar
Bir gün Əmir Teymur öz qoşunuyla Şiraza çathaçatda atını saxlayır, vəzirinə deyir ki, bu vilayətdə ən ləyaqətli adamı tapıb gətirin!
Nə isə, Hafiz Şirazini tapıb gətirirlər, böyük hörmət və ehtiramla...
Teymur atdan düşür, əl açıb ona tərəf yürüyür. Ona yaxınlaşanda Hafiz Şirazi diz üstə çökür. Teymur geri qayıdıb atına minir və əmr edir- Bu vilayətdə başıpapaqlı qalmamamalıdır!..
Cəngavər kimidir, atıldığı döyüşdən geri çəkilməyi xoşlamır. Özünə güvənir, təzyiq göstərməyə meyillidir. Müstəqilliyi çox sevir, azadlıq onun ən böyük arzusudur. Onu cilovlamaq son dərəcə çətindir. “Mən də buradayam” deyən, cəsarətli bir davranışı var. Rəsmiyyətə nifrət edir, səbirsiz olduğundan bəzən uşaq saflığı ilə sərhədləri aşıb keçməyə səy göstərir və heç bir qaydaları tanımaq istəmir. Təmkinli olduğu qədər də əsəbidir. Qurub yaratdıqlarını bir anda dağıda bilər. Yalqız qalmağı xoşlayır, onda öz aləminə qapılır və problemləri unudur...
Tükənməz enerjisi var, bu enerji hisslərinə hakimlik edir. Dominant adamdır, üstünlüyü həmişə qoruyub saxlaya bilir. Hər zaman öndə olmağı sevir. Həm də özünü güclü şəkildə ifadə etməyi bacarır. Bu bəzən ona problem yaradır...
“Deyilənlərə görə, insan ömrünü qısaldan səbəblərdən ən əsasları - qorxu, bədbinlik, nifrət, bir də qətiyyətsizlikdir.”- söyləyir...
Haqqında söhbət açdığım Eldəniz Quliyev 20 aprel 1952-ci ildə Lənkəranda anadan olub. Azərbaycan Dövlət İncəsənət İnstitutunu bitirdikdən sonra, Moskvada Ali rejissorluq və ssenaristlər kursunun ssenari bölməsində təhsil alıb. "Mosfilm", M.Qorki adına kinostudiyalarda, Ostankino Televiziya Mərkəzində təcrübə keçib. "Azərbaycanfilm" kinostudiyasında redaktor, redaksiya kollegiyasının, bədii şurasının, dövlət film qəbulu komissiyasının üzvü, "Debüt" studiyasının baş redaktoru, “Azərkinovideo” İstehsalat birliyinin baş redaktoru, ABA televiziya şirkətinin baş redaktoru vəzifələrində işləyib. 2006-cı ildə Beynəlxalq Sülh Federasiyası tərəfindən "Sülh səfiri" fəxri adına layiq görülüb. Rus və Azərbaycan dilində nəşr edilən "Ziyalı-İntelligensiya" qəzetinin təsisçisidir. Hazırda Azərbaycan Ziyalı Hərəkatının sədridir. "Üçatılan", "Tilsimli dairə", "Təpəgöz" (Rolşa Respublikasında tamaşaya qoyulub), "Mürşüd kişi niyə susur?", "İstək" və s. dram əsərləri Azərbaycan teatrlarında tamaşaya qoyulub. "Ağ yuxu" hekayələr toplusunun, "Kölgəsiz adam" hekayə və povestlər kitabının, "Rasim Balayev" kitabının müəllifidir. Bir sıra filmlərin ssenarisi ona məxsusdur...
Deyir ki,- "Təşəbbüskar axmağın mənə yazdığı mesajdan bir neçə kəlməni sizə də söyləmək istəyirəm:
"- Adə, başınıza at təpib?! Sizə deyrlər, mumla, danışma!- danışma da! Kilitləyin də ağzınızı! Deyirlər etiraz - filan eləmiyin, olmaz - eləmiyin də bə! Eləməsəniz, ölərsiniz?! Deyirlər, biz nə deyirik onu deyin, nə istiyirik onu eləyin, bizə nə lazımdırsa, onu yazın... "Fas!", "Aport!", "Sidet", "Qolos" - bitdi də, qanmırsınız?! Deyirlər, qatlq qaradı, deməli qaradı da, atmilçəyi kimi nə yapışırsız, nə dirəşirsiz, nə hoqqa çıxarırsız?!
Demakratiya nədir, azadlığ-mazadlığ nədir?.. Ölün harda ölmüsüz, orda da köpüb qalın da!!! Başınızı salın aşağı, sürünün özünüzçün!!! Sürünməyə duxunuz çatmırsa, əyilin, bükülün, büzüşün, ikiqat olun, lap belə, donbalağ aşın!
Bunlara bax eee, gül kimi hökumətnən hökumətlik eləmək istiyirlər!.. Ölmüşdü Xandadaş! Ala, uje visyo da!!!"
Bir vaxtlar Milli Şurada təmsil olunduğundan ölkədə iqtidara müxalif ziyalılardan biri kimi tanınır. Amma onun hakimiyyətdə təmsil olunmaq arzusu heç zaman olmayıb. Bu heç mümkün də deyil. Yaşının səkkizinci on illiyinə qədəm basıb. Ona sakit həyat, nəvələrilə gün keçirmək, ömrün son mərhələsini firəvan yaşamaq daha önəmlidir. Sadəcə ölkədə baş verən neqativ hallara biganə qala bilmir. Bu da onun son dərəcə çılğınlığından irəli gəlir.
“Xalqa cənnət vəd edib onu cəhənnəmə aparmağa heç kimin haqqı, hüququ və ixtiyarı yoxdur. Mən bu cür siyasi qurumda, “Milli Şura”da olmaqdan xəcalət hissi keçirirdim. Odur ki, həmin qurumu tərk elədim, peşman da deyiləm.”- söyləyir...
Məcaralara meyillidir, daim hərəkətdə olmaq istəyi, səbirsizliyi bəzən ona problem yaradır, amma təcrübəli olduğundan bu çətinlikləri dəf edə bilir. Qəzəb və nifrət hissi ona yaddır. İnsanpərvər, xalqa bağlı adamdır. Öz qabiliyyətinə o qədər əmindir ki, uğursuzluq barədə heç zaman düşünmür və müəyyən dərəcədə məhz buna görə çox vaxt müvəffəqiyyət qazanır. O, öz problemlərinin üzərinə elə bir enerji və qətiyyətlə atılır ki, onların çoxusu sadəcə olaraq əriyib gedir.
Xoşbəxtlikdən yaddaşı elə də güclü deyil. Bu onun qəlbinin təmizliyindən, kinli adam olmadığından irəli gəlir. Onu yalnız hal-hazırda baş verənlər maraqlandırır və əgər nə isə diqqətini cəlb edirsə, keçmiş haqqında bütün fikirləri yoxa çıxır...
Deyir ki,- “Dünyanın ən gözəl heykəltəraşı SEVGİdir. Heç bir istedadlı heykəltəraş SEVGİ qədər möhtəşəm heykəl yapmaq qüdrətində deyil. Çünki SEVGİ öz "əsərlərini" bir başa insanın qəlbinə həkk edir. Qəlbin ALLAH sevgisiylə dolu olsa, ruhun sənə xoşbəxtlik qanadları bəxş edər!..”
Bəli, o da xoşbəxt insanlardan biridir, yaratdığı ekran əsərləri onu unudulmağa qoymayacaq- adı özündən çox yaşayacaq...
Elman Eldaroğlu
TÜRKSOY-un Türkiyədə bir araya gətirdiyi rəssamların əsərlərindən ibarət sərginin açılışı olub
Beynəlxalq Türk Mədəniyyəti Təşkilatı (TÜRKSOY) tərəfindən həyata keçirilən 22-ci Rəssamlar görüşü layihəsinin iştirakçılarının əsərlərindən ibarət sərginin açılışı keçirilib.
AzərTAC xəbər verir ki, TÜRKSOY Rəssamlar görüşünün bağlanış və sözügedən sərginin açılış mərasimində Safranbolu bələdiyyəsinin sədri Əlif Kösə və Azərbaycanın Beynəlxalq Türk Mədəniyyəti Təşkilatındakı rəsmi nümayəndəsi, TÜRKSOY-un adı çəkilən layihə üzrə koordinatoru Elçin Qafarlının çıxışları olub.
Çıxışlardan sonra iştirakçı rəssamlara sertifikatlar təqdim edilib və sərgi açılıb.
Safranbolu Mədəniyyət Mərkəzində sentyabrın 5-dək davam edəcək sərgidə türk dünyasının müxtəlif ölkələrindən rəssamlar görüşündə iştirak edən 23 rəssamın Safranbolunu və türk dünyasını əks etdirən 69 əsəri nümayiş olunur. Görüşdə Azərbaycanı dörd fırça ustası təmsil edir.
Qeyd edək ki, rəssamlar görüşü TÜRKSOY-un həyata keçirdiyi strateji mədəniyyət layihələri arasında mühüm yerə sahibdir. Hər il təşkil olunan bu görüş çərçivəsində türk dünyasının fırça ustaları bir araya gəlir, rəssamlarımız arasında yeni-yeni əməkdaşlıq körpülərinin təməli atılır. Beynəlxalq Türk Mədəniyyəti Təşkilatı türk dünyası rəssamlarının 23-cü görüşünü Şuşada keçirmək niyyətindədir. Təşkilat hesab edir ki, Şuşa 2023-cü ildə türk dünyasının mədəniyyət paytaxtı seçildiyi üçün növbəti rəssamlar görüşməsinə ev sahibliyi etməyə ən uyğun məkandır.
“Şuşa yaradıcılıq emalatxanası”nın iştirakçıları Şuşa şəhəri ilə yaxından tanış olublar
Avqustun 28-də “Şuşa yaradıcılıq emalatxanası” layihəsi çərçivəsində bir sıra yaradıcı insanlar Mədəniyyət paytaxtımız Şuşa şəhərini ziyarət ediblər.
“Ədəbiyyat və incəsənət portalı AzərTAC-a istinadən xəbər verir ki, tədbir çərçivəsində müxtəlif peşə istiqamətləri üzrə Azərbaycandan və Türkiyədən olan yaradıcı sahənin təmsilçiləri Şuşa şəhərinin görməli yerləri –Yuxarı Gövhər Ağa məscidi və Şuşa Realnı məktəbi, Cıdır düzü, Azərbaycanın tanınmış şəxsiyyətləri Natəvan, Bülbül və Üzeyir Hacıbəylinin güllələnmiş heykəlləri yerləşən Şuşa şəhər mərkəzi meydanında olub, Şuşa qala divarlarını ziyarət edib, şəhərdə aparılan təmir-bərpa işləri ilə tanış olublar.
Layihənin keçirilməsində məqsəd tarixi və əzəli torpaqlarımızda həyata keçirilmiş barbarlıq, dağıdılmış abidələrimiz haqqında dünya və yerli ictimaiyyəti incəsənət əsərləri vasitəsilə daha ətraflı məlumatlandırmaq, mədəni irsimiz, zəngin tariximiz və ənənələrimizi bəstəkar, şair, musiqişünas, misgər, keramika rəssamı, fotoqraf, qiraətçi və bir çox sahəni təmsil edən 30-a yaxın yaradıcı insanın təqdim edəcəyi əsərlər vasitəsilə daha yaxından tanıtmaqdır.
Qeyd edək ki, səfər təəssüratlarından ilhamlanaraq sənətçilərin ərsəyə gətirəcəyi əsərlər bir müddət sonra Bakıda təşkil olunacaq tədbirdə geniş auditoriyaya çatdırılacaq
Günün fotosu: Sel Pakistanı fəlakətə sürükləyir
Günün fotosu: Sel Pakistanı fəlakətə sürükləyir
İyun ayından Pakistanda dağıdıcı
sel müşayiət olunmaqdadır, ölənlərin sayı artıq 937 nəfərə çatıb, onların da əksəriyyəti uşaqlardır.
Hökumət Fövqəladə vəziyyət elan eləyib. Ölkənin baş naziri Şahbaz Şərif dünya ölkələrinə kömək üçün müraciət edib.
Foto: Euronews
Şuşa və Bakı Gənclər İncəsənət Düşərgəsi fəaliyyətə başlayıb
Azərbaycan Respublikasında 2022-ci ilin “Şuşa ili” elan edilməsi haqqında” Azərbaycan Respublikası Prezidentinin 2022-ci il 5 yanvar tarixli 3096 nömrəli Sərəncamına uyğun olaraq, Azərbaycan Respublikasının Nazirlər Kabineti tərəfindən təsdiq edilmiş “Şuşa İli” ilə bağlı Tədbirlər Planı”nın 25-ci bəndinə əsasən ölkəmizdə cari ilin 26 avqust tarixində “Youth ArtCamp Shusha and Baku” (Şuşa və Bakı Gənclər İncəsənət Düşərgəsi) adlı beynəlxalq layihənin icrasına başlanıb, layihə sentyabr ayının 5-dək davam edəcək.
“Ədəbiyyat və incəsənət” portalı Mədəniyyət Nazirliyinə istinadən xəbər verir ki, “Youth ArtCamp” beynəlxalq proqramı çərçivəsində təşkil ediləcək bu layihə 2008-ci ildə Andorranın UNESCO üzrə Milli Komissiyasının təşəbbüsü ilə mədəni fərqləri aradan qaldırmaq, təcrübə və dəyərləri bölüşmək, beynəlxalq harmoniya, birgəyaşayış, qarşılıqlı hörmət və əməkdaşlığı təşviq etmək məqsədilə təsis edilmişdir.
Mədəniyyət Nazirliyinin, Azərbaycan Respublikasının UNESCO üzrə Milli Komissiyasının, ölkəmizin İspaniyadakı Səfirliyi və Andorranın UNESCO üzrə Milli Komissiyasının nümayəndələrinin təşkilatçılığı ilə ərsəyə gəlmiş bu layihə xarici rəssamların Azərbaycanın tarixi məkanlarından və təbiətindən ilhamlanaraq öz əsərlərini yaratması üçün təşkil edilmişdir. UNESCO-nun xoşməramlı səfiri xanım Hedva Serin himayəsi altında olan bu beynəlxalq layihənin əsas məqsədi xarici rəssamların yaratdığı sənət əsərlərinin nümayiş olunması ilə yanaşı, UNESCO-nun fundamental dəyərlərini, o cümlədən davamlı sülhü və mədəni özünüifadə müxtəlifliyinin qorunması və təşviqini təbliğ etməkdir.
Xarici ölkələrin UNESCO üzrə Milli Komissiyalarının təqdim etdiyi namizədlərin arasından münsiflər heyəti tərəfindən 16 gənc rəssam seçilərək “Youth ArtCamp Shusha and Baku” layihəsinə cəlb olunub.
Şuşanın Azərbaycanın çoxəsrlik zəngin mədəniyyətinin, memarlıq və şəhərsalma sənətinin parlaq incisi kimi beynəlxalq aləmdə təbliği üçün sözügedən layihə mühüm əhəmiyyət kəsb edir. Tanınmış yerli sənət xadimlərinin, şairlərin, yazıçıların, musiqiçilərin, rəssamların, memarların yaradıcılığında Şuşa kifayət qədər tərənnüm olunsa da, xarici mütəxəssislərin gözü ilə ona yeni bir baxış zəruridir. Xarici mütəxəssislərin Qarabağın incisi olan qədim Şuşanın tarixi, mədəniyyəti, dahi şəxsiyyətləri və bu gün ölkə rəhbərliyinin tapşırığı ilə burada aparılan quruculuq işləri ilə yaxından tanış olmaları və qısa bir müddət Şuşada yaşamaları onlarda bu ecazkar şəhər haqqında tam təsəvvür yaranmasına səbəb olacaqdır. Dəvət olunan rəssamların yaratdığı əsərlər onların Şuşa barədə təəssüratlarının tərənnümü olacaq və müxtəlif ölkələrin kütləvi informasiya vasitələrində işıqlandırılaraq daha geniş tamaşaçı kütləsinə xitab edəcəkdir.
Layihə çərçivəsində Şuşa ilə yanaşı, Ağdam, Füzuli və Cəbrayıl rayonlarına səfər planlaşdırılır.
Mədəniyyət Nazirliyi, Azərbaycan Respublikasının UNESCO üzrə Milli Komissiyası və Andorranın UNESCO üzrə Milli Komissiyası tərəfindən sözügedən layihə çərçivəsində gənc rəssamların çəkdikləri rəsm əsərlərindən ibarət kataloqun hazırlanması və xarici ölkələrdə yayımlanması, həmçinin rəsm əsərlərindən ibarət sərginin keçirilməsi nəzərdə tutulur.
Cənnətdə qarşılanan 27-ci doğum günü
Sənədli hekayə
(Bu yazı Azərbaycan Silahlı Qüvvələrinin giziri, Vətən Müharibəsi Şəhidi İlkin Şükürovun əziz xatirəsinə ithaf edilir)
Bütün Şəhidlərin bir amalı var - Vətən sağ olsun!
Vətən uğrunda ölümə gedən, “Üçrəngli Bayraq zirvələrdə dalğalansın, təki Vətən sağ olsun” deyən oğulların ömür yolu nə qədər şərəflidir, bunu hamımız bilirik. Ancaq geridə gözüyaşlı qoyduqları (ana, bacı, nişanlı, oğul, qız, ata, nənə, baba) nələr çəkir, o acını çəkənlər daha yaxşı bilir. Biz onları duymağa, hiss etməyə çalışırıq. Onların çəkdiyi acının ağırlığını dərk edəndə insan ruhən çökür. Bəy otağı hazır et, həmin otağa gəlin gətirməmiş oğlunun Bayrağa bükülü tabutu gəlsin. Gəlninin əli isti sudan soyuq suya düşməsin deyə hər şəraitli mətbəx hazırla. Həmin mətbəxdə gəlinin oğluna çay süzməmiş, oğlunun ehsan çayı dəmlənsin. Evi təmir etdir ki, toydan sonra gənclər rahat yaşasın. Həmin evdə vüsala yetişməyən gənclərin ayrılıq havası səslənsin.
Hamı çəkilib gedəndən sonra geridə ata-ana, dörd divar, qaranlıq gecə, tarimar olan arzular, bir də tənhalığa məhkum qalmış qapı-baca qalır. Nə ata, nə də ana bilmir nədən danışsın ki, bir-birinə təsəlli olsun. Yeganə ümid yerləri olan, gözlərinin ağı-qarası oğullarının ayrılığı onlara necə təsəlli verə bilər?!
Aslan dayı ilə, Firuzə xala hey susur. Birdən İlkinin anası Firuzə xala ucadan ağlayır. Elə həsrətlə, elə yanğılı ağlayır ki. Yana-yana səsləyir oğlunu. Deyirsən ki, o yanğının qarşısında Göy yarılacaq, İlkin geri dönəcək. Elə o düşüncədə bir də baxırsan ki, Firuzə xalanın halı dəyişib, dizləri yerə gəlib. Bir ananın oğul harayı daşa dəyib, ürəyinin başına çırpılır. O səhnələrin şahidi olmaq çox çətindir.
Bir yanda da nişanlısının qəbir daşına söykənib bir qız xısın-xısın ağlayır. Sevgisini Vətənə qurban verib hələ də gözü cəbhə yollarından yığılmayan Ləman gecə-gündüz ürəyində İlkin deyib, səslənir.
Tənha gecələri özünə sirdaş seçir. Yuxuma gəl, deyib, yalvarır nakam nişanlısına. İki ilə yaxındır İlkin Şəhid olub. Ləman unutmur, unuda bilmir İlkini. Sevginin bir adı da ümiddir. İlkin Ləmanın ümidlə gözlədiyi sevgisidir.
Ləmanla tez-tez əlaqə saxlayıram. Ancaq ürək edib “sevgindən danış” deyə bilmirəm. Ləmanın sevgisi indi bir kəndə aid deyil. Ləmanın sevgisi indi Vətən boydadır. Necə ki, kasıb komalardan çıxan oğullar Vətən boyda oldular. Elə o oğulların sevgiləri də Vətən boyda oldu. Hüdudsuz.
Bu gün İlkinin 27 yaşı tamam oldu. Cənnətdə qarşıladı İlkin 27-ci ad gününü.
Bir axşam Ləman mənə yazmışdı: İlkinimin ad gününə gələrsiniz? Mən də ona cavab yazdım: Əlbəttə gələrik, əzizim.
Bu gün şair Zaməddin ——- getdik. Ləmanın yarım qalmış arzularına təsəlli olmaq üçün getdik. Aslan dayıya, Firuzə xalaya “siz elə bir oğul böyütdünüz ki, o artıq tək sizin yox, bütün Azərbaycanın oğludur”, deyib, İlkinsiz ömürlərinə təsəlli olmaq üçün Ürkməzli kəndinə getdik.
"Qazax" Xeyriyyə İctimai Birliyi İdarə Heyətinin sədri, professor İlham Pirməmmədovun və İctimai Birliyin üzvlərinin adından Şəhid İlkin Şükürovun valideynlərinə, doğmalarına, boynubükük, gözüyaşlı qoyub getdiyi Ləmanına başsağlığı dilədik.
Kasıb komalarda doğulub Vətən boyda olan oğullar ölməz. İlkin ölmədi, ölməzliyə qovuşdu.
Ölməzlik yaşın mübarək, İlkin!
P.S. Şükürov İlkin Aslan oğlu 27 avqust 1995-ci ildə Qazax rayonunun Ürkməzli kəndində anadan olub.
Azərbaycan Silahlı Qüvvələrinin giziri olan İlkin Şükürov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsi zamanı Füzuli rayonunun azadlığı uğrunda gedən döyüşlərdə iştirak edib.
İlkin Şükürov oktyabrın 14-də Füzuli döyüşləri zamanı şəhid olub. Qazax rayonunun Ürkməzli kəndində torpağa tapşırılıb.
Sonsuz ehtiramla: Səbinə Yusif
“Şuşa - Qarabağın dünəni, bu günü, sabahı”: Çəpkən
“Şuşa İli” elan olunması ilə əlaqədar Azərbaycan İstiqlal Muzeyi tərəfindən həyata keçirilən “Şuşa-Qarabağın dünəni, bu günü, sabahı” adlı layihəsi davam edir.
Layihə çərçivəsində növbəti təqdimat mədəniyyət paytaxtımız Şuşanın milli qadın geyim nümunələrindən biri olan “Çəpkən”ə həsr olunub.
Şuşanın milli geyimləri rəngarəngliyi, forma müxtəlifliyi, göz oxşayan rəngləri, yenilikləri ilə üstünlük təşkil edərək digər bölgələrin geyimlərindən seçilir.
Qadın geyimləri dəstində çiyin geyimləri özünün rəng seçimi, estetik gözəlliyi, biçim mütənasibliyi və çoxçeşidliliyi ilə diqqəti daha çox cəlb edir. XIX-XX əsrin əvvəllərində bölgənin qadın geyimləri kompleksində çəpkən, arxalıq, baharı, kürdü, pullu çəpkən və digər geyim tipləri daha çox istifadədə olmuşdur. Bölgənin geyim mədəniyyəti kompleksində qadın çiyin geyimlərindən olan çəpkənlərin xüsusi yeri vardır.
Çəpkəni iqtisadi imkandan asılı olaraq bəzən bahalı ipək parçalardan, bəzən də pambıq, yun və adi parçalardan hazırlayırdılar. Rəng seçimi çəpkəndə daha ciddi nəzərə alınırdı. Belə ki, cavan gəlin və qızlar qırmızı, mavi, yaşıl; yaşlılar göy, palıdı, bənövşəyi, qara parçalardan tikilmiş çəpkənə üstünlük verirdilər. Çəpkən bədəni bel yerinə qədər kip tutur, buradan isə yanlarda qoyulmuş çapıq vasitəsilə enlənirdi. Çəpkənin yaxasının hər iki tərəfinə bəzən cərgə ilə qızıl və gümüş pullar və müxtəlif bəzəklər (pərək, muncuq, qoza) tikilirdi. Belə çəpkənlər “pullu çəpkən” adlanırdı.
Bu gün yazıçı Seyfəddin Dağlının anadan olmasının 101-ci ildönümüdür
Bu gün yazıçı, şair, jurnalist, tərcüməçi və dramaturq Seyfəddin Dağlının anadan olmasından 101 il ötür.
Seyfəddin Dağlı ( Seyfəddin Əliağa oğlu Abbasov) 1921-ci il avqustun 27-də də Azərbaycana Cəfər Cabbarlı, Mikayıl Müşfiq, Cabir Novruz, Zeynəb Xanlarova, Şəfiqə Eyvazova kimi söz və sənət ustalarını bəxş etmiş Xızıda anadan olub.
Seyfəddin Abbasov yaradıcılığa məktəbdə oxuyarkən şeir və satirik hekayələrlə başlayıb. Sənaye texnikumunda oxuyanda "Kommunist" qəzeti ilə əməkdaşlıq edib, bu qəzetin ədəbi işçisi, şöbə müdiri, məsul katibi olub.
Böyük Vətən müharibəsi başlayanda o, Sovet Ordusu sıralarına çağırılıb və ömrünün on beş ilini hərbi xidmətə həsr edib. "Ordu" qəzetinin ədəbi işçisi, "Diviziya" qəzetinin redaktoru olub. 1944-1946-cı illərdə sovet qoşun hissələrinin tərkibində İranda xidmət keçib.
Seyfəddin Abbasov jurnalistikaya 1938-ci ildə maraqlı felyetonları ilə gəlib. İlk kitabı “Dəniz kəşfiyyatçısı” on il sonra, 1948-ci ildə işıq üzü görüb. Onun əsərləri ilk gündən geniş oxucu kütləsinin rəğbətini qazanıb. İkinci Dünya müharibəsi dövründə felyetonları və satirik hekayələri "Vətən uğrunda" jurnalında, "Ədəbiyyat", Təbrizdə çıxan "Vətən yolunda" qəzetlərində çap olunurdu.
S.Dağlı 1952-1956-cı illərdə Lenin adına Moskva Hərbi-Siyasi Akademiyasının Redaktorluq fakültəsinin müdavimi olub. 1956-cı ildə Moskvada təhsilini başa vurandan sonra ordu sıralarından tərxis olunub və Vətənə qayıdıb. Bakıda o, jurnalist və ədəbi fəaliyyətini davam etdirib. 1956-1959-cu illərdə Dövlət Radio Komitəsinin baş redaktoru, Bakı televiziya studiyasının baş redaktoru, sədr müavini işləyib.
Seyfəddin Dağlı həmkarlarından özünəməxsus üslubu ilə seçilirdi. Onun yaradıcılığı zəngin və çoxşaxəli idi. O, bir çox hekayə, oçerk, povest, romanın müəllifi idi. "Adı sənin, dadı mənim", "Aydınlığa doğru", "Mənziliniz mübarək", "Təzə gəlin", "Kölgələr pıçıldaşır", "Bahar oğlu" romanı (Cəfər Cabbarlının həyatı haqqında), "Məşəl", "Kəcil qapısı", "Sabiqlər" adlı ədəbi şedevrlər yaratdı. Lakin çoxşahəli yaradıcılığında o, satirik-yumoristik janra üstünlük verirdi. Bu sahədə o, müasir Azərbaycan ədəbiyyatının ən görkəmli nümayəndələrindən biri kimi tanınırdı. Onun pyesləri bir çox teatrlarda dəfələrlə səhnəyə qoyulub.
S.Dağlı həm satirik, həm də yumoristik povestlər, hekayələr ustası idi. Onun əsərləri oxucuda şüurlu və mənalı gülüş yaradır, ona görə də onların süjet xətti, quruluşu, ifadə tərzi, dilinin sadəliyi və şirinliyi ilə yadda qalırdı. Onun yaradıcılığında məhz satirik axar xüsusilə seçilir. Yazıçının tənqid və satira hədəfi müasir cəmiyyətin eybəcərlikləri idi, bütün qəhrəmanları həyatdan götürülüb. Müəllif tərəfindən yaradılmış hər bir obrazın öz bədii xüsusiyyətləri var və bir-birindən xeyli fərqlənir.
Yazıçının fəaliyyətinin ən mühüm mərhələsi "Kirpi" satirik jurnalına rəhbərlik etdiyi dövr olmuşdu. O, 1959-cu ildən 1976-cı ilədək bu jurnalın baş redaktoru kimi fəaliyyət göstərib. Jurnal zamanın tələbinə uyğun olaraq 1952-ci ildə məşhur "Molla Nəsrəddin" ənənələrinin davamçısı kimi çıxmağa başlayıb. Məhz bu jurnalda işlədiyi illərdə yazıçının istedadı özünü daha parlaq göstərib.
Ömrünü ədəbiyyata, oxuculara həsr etmiş insanın əsl mükafatı isə onun yaradıcılığına olan ümumxalq məhəbbəti, kitabları, ölkənin teatrlarında tamaşaya qoyulan pyesləri, "Kirpi" jurnalının bir-birindən maraqlı onlarla nömrəsidir.
Seyfəddin Dağlı 1983-cü il yanvarın 18-də dünyasını dəyişib.
Bu gün XTNS-nin “Azərbaycan” pavilyonunda “Kino gecəsi” olacaq
Bu gün Moskvada, Xalq Təsərrüfatı Nailiyyətləri Sərgisinin (XTNS) “Azərbaycan” pavilyonunda “Kino gecəsi” adlı illik ümumrusiya aksiyası başlanacaq.
“Ədəbiyyat və incəsənət” portalı AzərTAC-a istinadən xəbər verir ki, Rusiya Kinosu Gününə həsr edilmiş tədbir Moskva vaxtı ilə saat 20:00-da başlanacaq.
“Azərbaycan” pavilyonu tamaşaçılara Azərbaycan Kinematoqrafçılarının qızıl fondunu təşkil edən “Arşın mal alan” və “Qorxma, mən səninləyəm” musiqili komediyalarını təqdim edəcək.
“Kino gecəsi” adlı illik aksiya artıq yeddinci dəfədir ki, keçirilir. Açıq kinoteatrlarda, konsert salonlarında, muzeylərdə və kitabxanalarda qonaqlar üçün mühazirə və ekskursiyalar, ustad dərsləri və aktyorlarla görüşlər, konsertlər təqdim olunacaq, məşhur filmlər nümayiş etdiriləcək.
“Kino gecəsi” aksiyasının təşkilatçıları Rusiya Mədəniyyət Nazirliyi, Kino Fondu və “Kultura.RF” portalıdır.
