Fevralın 11-də Akademik Opera və Balet Teatrında görkəmli avstriyalı bəstəkar Lüdviq Minkusun üçpərdəli “Don Kixot” baletinin nümayişi nəzərdə tutulur.

Əsas rolları teatrın aparıcı solistləri Ayan Eyvazova, Timur Oduşev, Faiq Qubatov və Emil Əzizov ifa edəcəklər. Libretto müəllifi Marius Petipa olan balet Orxan Həşimov tərəfindən idarə olunacaq.

Don Kixotun otağında xidmətçiləri hesab edirlər ki, ağaları cəngavər romanlarını çox oxuduğundan ağlını itirib. Don Kixot otağa daxil olur. O həmişəki kimi cəngavər romanı oxuyur və qəhrəmanların halına acıyır...

Məşhur romandan ilhamlanaraq ərsəyə gələn bu balet şənbə günü üçün əvəzolunmaz istirahətə çevriləcək.

Biletlər teatrın kassası ilə yanaşı, şəhərin bütün kassalarından və iticket.az saytından əldə etmək olar.

“Ədəbiyyat və incəsənət”

(10.02.2023)

Prezident İlham Əliyev fevralın 9-da Xalq artisti Aleksandr Şarovskinin “Azərbaycan Respublikası Prezidentinin fəxri diplomu” ilə təltif edilməsi haqqında Sərəncam imzalayıb.

Fəxri diplom A.Şarovskiyə Azərbaycanda teatr sənətinin inkişafındakı uzunmüddətli səmərəli fəaliyyətinə görə verilib.

Qeyd edək ki, Azərbaycan Dövlət Rus Dram Teatrının baş rejissoru olan Aleksandr Şarovski ötən illər ərzində səhnədə 50-dən çox obraz yaradıb, 4 kinofilmdə çəkilib, 54 tamaşaya quruluş verib.

Xalq artisti həm də Bakıdakı Avropa yəhudiləri icmasının rəhbəri və Bakı Beynəlxalq Multikulturalizm Mərkəzi Himayəçilik Şurasının üzvüdür.

“Ədəbiyyat və incəsənət”

(10.02.2023)

NƏSİMİ İCRA HAKİMİYYƏTİNDƏN GÖZƏL TƏŞƏBBÜS

2020-ci ilin payızında 44 gün davam edən Vətən müharibəsi torpaqlarımızın işğaldan azad edilməsi ilə yanaşı, xalqımızın milli həmrəyliyinin, Vətən üçün canını qurban verən igidlərin qəhrənamlığının nümayişinə çevrildi. Üç minə yaxın igid düşmənlə ölüm-dirim savaşında şücaət göstərərək şəhidlik zirvəsinə ucaldı. İndi həmin igidlərin adı hamı üçün müqəddəs ünvan, hörmət və ehtiram mənbəyidir. Paytaxtın Nəsimi rayonunda onların adlarının əbədiləşdirilməsi üçün ardıcıl tədbirlər görülür...

Rayon icra hakimiyyətinin açıqlamasına görə, Prezident İlham Əliyevin sərəncamları ilə ölümündən sonra “Qarabağ” ordeni ilə təltif olunmuş baş leytenant Abdullayev İbrahim Habil oğlunun, “Azərbaycan Bayrağı” ordeni ilə təltif olunmuş kapitan Babaxanov Elman Ağamirzə oğlunun, 3-cü dərəcəli “Vətənə xidmətə görə” ordeni ilə təltif olunmuş mayor Cəfərov Ruslan Gündüz oğlunun, 3-cü dərəcəli “Vətənə xidmətə görə” ordeni ilə təltif olunmuş əsgər Tarıverdiyev Nicat Şöhrət oğlunun adı rayonun inzibati ərazisində yerləşən küçələrə verilib.

“Ədəbiyyat və incəsənət”

(10.02.2023)

Fevralın 17-də görkəmli opera müğənnisi Fyodor Şalyapinin 150 illik yubileyi ərəfəsində Üzeyir Hacıbəyli adına Bakı Musiqi Akademiyasının (BMA) təşkilatçılığı ilə Bakıdakı Rus evində konsert keçiriləcək. 

Xatırladaq ki, daha əvvəl konsertin bu gün keçiriləcəyi elan edilmişdi, amma Türkiyədə baş vermiş zəlzələ və elan edilmiş matəmlə bağlı konsert bir həftə sonraya ertələnib. 

Rusiya İnformasiya-Mədəniyyət Mərkəzindən (RİMM) bildirilib ki, konsert proqramında Azərbaycanın Əməkdar artisti Anton Ferştandt, Dilarə Kərimova, Ülviyyə Əliyeva, Məryəm Yusifova, Fərhad Ələkbərov, Ruslan Persan, Kamilla İmanova, Teymir Kazımov, eləcə də BMA-nın tələbələri iştirak edəcəklər. 

Konsert proqramının aparıcısı və təşkilatçısı sənətşünaslıq üzrə fəlsəfə doktoru Alyona İnyakinadır. 

Rus opera müğənnisi Fyodor Şalyapin XX yüzilliyin əvvəllərində tanınmış simalardan olub. Dünyanın ən nüfuzlu teatrlarında çıxış edən müğənni rəsm və heykəltaraşlıqla məşğul olub, bir neçə bədii filmdə çəkilib. Bəstəkarlar Sergey Prokofyev və Anton Rubinşteyn onun istedadının pərəstişkarları arasında olublar. Maksim Qorki Şalyapini “rus sənətinin ayrıca dövrü” adlandırırdı.

“Ədəbiyyat və incəsənət”

(10.02.2023)

Azərbaycan Dövlət Akademik Musiqili Teatrda dahi bəstəkar Üzeyir Hacıbəylinin “O olmasın, bu olsun” tamaşası növbəti dəfə bazar günü - fevralın 12-də göstəriləcək.

Tamaşanın quruluşçu-dirijoru Əməkdar incəsənət xadimi Nazim Hacıəlibəyov, quruluşçu-rəssamı Əməkdar rəssam İsmayıl Məmmədov, xormeysteri Əməkdar artist Vaqif Məstanov, dirijoru Əməkdar incəsənət xadimi Fəxrəddin Atayev, quruluşçu baletmeysterləri Əməkdar artistlər Zakir və Yelena Ağayevlər, konsertmeysteri Fidan Babayeva, rejissor assistenti Sevinc Məmmədovadır.

Səhnə əsərində Əməkdar artistlər Şövqi Hüseynov, Ələkbər Əliyev, Əzizağa Əzizov, Əkbər Əlizadə, Nadir Xasiyev, aktyorlar Möylə Mirzəliyev, Gülnarə Abdullayeva, Hüseyn Əlili, Əliməmməd Novruzov, Səmədzadə Xasiyev, Türkel Tariqpeyma, Elməddin Dadaşov, Fərid Rzayev, Cəbrayıl Cəbrayılov, Əli Kərimov, Rüstəm Rüstəmov, Murad Əliyev, Tərəna Əliyeva, Rahib və Nuray Məmmədzadələr iştirak edəcəklər.

İlk tamaşası 1911-ci ildə oynanılan bu əsərin Akademik Musiqili Teatrdakı sonuncu quruluşu Xalq artisti, rejissor Cənnət Səlimovaya aiddir.

Premyerası 1998-ci il dekabrın 4-də keçirilən səhnə əsəri 75-ci dəfə təqdim olunub.

“Ədəbiyyat və incəsənət”

(10.02.2023)

Xalqımızın böyük bəstəkarı Tofiq Quliyevin Bakı şəhərinin gözəl guşələrindən birində əzəmətli heykəlinin ucaldılması musiqi ictimaiyyətinin hədsiz sevincinə səbəb oldu. Tofiq Quliyev Azərbaycan musiqisinə əvəzsiz töhfələr vermiş bir bəstəkardır. Onun yazdığı nəğmələr peşəkarlıq səviyyəsi, rəngarəngliyi, özünəməxsus ahəngi ilə fərqlənir. 

Bu böyük bəstəkarla çalışmaq mənə də qismət oldu və onun bir neçə əsərini ifa etdim. “Bəxtəvər oldu” romansı, “Sənə də qalmaz”, “Bakı”, “Əziz dost”, “Bakı haqqında mahnı”, “Neft daşları” və s. mahnıları misal çəkmək olar. Hətta bəstəkarı olduğu “Bəxtiyar” filmindəki mahnını 1994-cü ildə dəyişib Azərbaycana və Ulu Öndər Heydər Əliyevə həsr etməyim Tofiq müəllimin böyük sevincinə səbəb olmuşdu. Milli musiqi sənətimizə bütün varlığı ilə xidmət edən belə bir sənətkarın heykəlinin qoyulması düşünürəm ki, bütün musiqisevərlərin ürəyincədir. Son illər ərzində Azərbaycanın görkəmli sənətkarlarının adlarının əbədiləşdirilməsi, bu şəxsiyyətlərin heykəllərinin ucaldılması dövlət başçısının incəsənətə və sənətkarlarımıza sonsuz sevgisinin və diqqətinin göstəricisidir. Ulu Öndərimiz Heydər Əliyev tərəfindən təməli qoyulan bu diqqət və qayğı, Müzəffər Ali Baş Komandan, Prezident İlham Əliyev tərəfindən layiqincə davam etdirilir. Biz, sənət adamları dövlətimizin incəsənət adamlarına göstərdiyi əvəzsiz diqqətə görə ölkə başçısına sonsuz hörmət və sevgimizi bildiririk.

Xalq artisti, professor Azər Zeynalovun 

AzərTAC-a müsahibəsindən.

“Ədəbiyyat və incəsənət”

10.02.2023

Bəli, həqiqətən də dünya heç də yaxşı günlərini yaşamır. Əgər Hollivudda da Bolkivuddakı kimi kütləvi ixtisarlar başlayıbsa, demək mədəniyyət sferasının işi bir az da dalana dirənəcək. 

Qərb mediası bu günlərdə Amerikanın əyləncə sənayesi sektorunda multiplikasiya studiyaları bazasında yaradılmış “Walt Disney” kompaniyasında işçi qüvvəsinin 3,2 faizi – təqribən 7 min nəfərin ixtisara düşəcəyi barədə həyəcanlı xəbərlər yayır. 

Baxın, əyləncə sektorunun bu nəhəngi səhmdarlarına verdiyi məlumatda bu addımın xərclərin azaldılması və 5,5 milyard dollara yaxın vəsaitə qənaət olunması strategiyasının tərkib hissəsi olduğunu bildirib. Kompaniya, həmçinin əməliyyat xərclərini də 2,5 milyard dollar məbləğində azaltmaq niyyətindədir. 

Ötən ilin oktyabrınadək bütün dünya üzrə kompaniyada təqribən 220 min əməkdaş çalışıb. 

“Walt Disney”in baş direktoru Robert Ayqerin sözlərinə görə, hələ istehsal mərhələsində olan, əyləncə və beynəlxalq məzmun kəsb edən serialların və filmlərin “aqressiv yoxlanılması” aparılacaq. Kompaniya audiovizual kontentdən imtina etməklə 3 milyard dollar vəsaitə qənaət etməyi planlaşdırır. 

“Walt Disney” yenidənqurma prosesində üç bölməyə bölünəcək: onlardan biri kino və televiziyada əyləncəli kontent, ikincisi idman proqramları, üçüncüsü isə tematik parklar, mallar və kruiz laynerləri ilə məşğul olacaq.

“Ədəbiyyat və incəsənət”

(10.02.2023)

Bazar günü “LIBRAFF˝  kitab mağazaları şəbəkəsində - “Park Akademiya" filialında yazar Ceyhun Hidayətli ilə görüş və “Əqrəb” romanının imza günü olacaq.

İctimai TV"də yayımlanan "Əqrəb mövsümü" serialı böyük ajiotaj doğurdu, ölkə serial industriyasını sanki müsbətə doğru xeyli köklədi. Filmin ssenarisi Ceyhun Hidayətlinin “Əqrəb” romanının motivləri əsasında yazılmışdı. Həmçinin  “Bəyaz şeytan” və “Qapılar arasında ölüm” kitablarının da müəllifi olan Ceyhun Hidayətli məhz “Əqrəb”lə parladı. 

“Ədəbiyyat və incəsənət”

(10.02.2023)

Dövlət Tərcümə Mərkəzi Azərbaycan dilinin və tərcümə sahəsinin təkmilləşdirilməsi istiqamətində kifayət qədər təkmilləşdirici tədbirlər həyata keçirir. 

Dilimizin qanun kitabı sayılan “Azərbaycan dilinin orfoqrafiya lüğəti” üzərində 2016-cı ildən etibarən təhlil və araşdırma işləri aparılıb və kitab 60 min orfoqrafik, qrammatik qüsurlardan, heyvan səslərindən, loru sözlərdən, söyüşlərdən, qurama və əcnəbi ifadələrdən təmizlənərək təkmilləşdirilib. 

Dövlət Tərcümə Mərkəzinin İnformasiya departamentinin rəhbəri Yaşar Əliyevin açıqlamasına görə, 2017-ci ildə nəşr olunan “Azərbaycan dilinin işlək orfoqrafiya sözlüyü”, 2020-ci ildə işıq üzü görmüş “Azərbaycan dilinin orfoqrafiya lüğəti” 100 illik milli orfoqrafiya lüğəti tariximizdə ilk mükəmməl lüğətlər hesab edilir. Mərkəzin bu sahədə ərsəyə gətirdiyi digər lüğətlər də – neft, kimya sahəsinə aid “Azərbaycanca-ingiliscə-rusca terminoloji lüğət”, “Yeni alınma sözlər lüğəti”, “Çex-Azərbaycan dili lüğəti”, “Serb-Azərbaycan dili lüğəti”, “Azərbaycan-ərəb dili danışıq kitabçası”, “Azərbaycan-alman danışıq kitabçası”, “Azərbaycan-ispan danışıq kitabçası”, “Mifoloji lüğət” kimi dəyərli nəşrlər bu sahəyə verilən qiymətli töhfələrdir ki, bu istiqamətdə işlərin davam etdirilməsi nəzərdə tutulur.

Tərcümə Mərkəzinin təşkil etdiyi seçim turları haqqında məlumat verən Y.Əliyev deyib ki, bu istiqamətdə də böyük irəliləyişlərə nail olunub: “2018-ci ildən etibarən ölkədə peşəkar tərcümə mütəxəssislərinin müəyyən edilməsi məqsədilə keçirilən turlar əsasında tərcüməçilərin mərkəzləşdirilmiş məlumat bazası, yəni reyestri formalaşdırılıb. Hazırda seçim turlarının 9-cu mərhələsi üzrə qeydiyyatlar davam edir. Budəfəki turlarda spesifik sahələr üzrə ixtisaslaşmış tərcüməçilərin dil arealı bir qədər də genişləndirilib. Bu dəfə turlarda ingilis, rus, türk, alman, fransız, ispan, ərəb, fars dilləri ilə yanaşı, artıq portuqal, italyan, polyak, macar, bolqar, İsveç, Niderland, yunan, fin, gürcü, ivrit, yapon, Çin və hind dili üzrə tərcümə mütəxəssisləri də iştirak edə biləcəklər”.

“Ədəbiyyat və incəsənət”

(10.02.2023)