“Mirvarid Dilbazi Poeziya Məclisi” İctimai Birliyinin sədri Güllü Eldar Tomarlının ideyası ilə və “Qazax” Xeyriyyə İctimai Birliyinin  sədri İlham Pirməmmədovun dəstəyi ilə ərsəyə gəlmiş, xarı bülbül elementləri ilə bəzədilmiş nəfis  kəlağayı şəhid Əlizamin Mustafalının anasına hədiyyə olundu. Bu, tədbirin kulminasiyası hesab oluna bilərdi. Həm milli mənəvi maddi irsimizə, həm də şəhidlərimizə ehtiram daim bizimlədir.

“Ədəbiyyat və incəsənət” portalı xəbər verir ki, “Mirvarid Dilbazi Poeziya Məclisi” İctimai Birliyinin təşkilatçılığı ilə Beynəlxalq Muğam Mərkəzində UNESCO-nun madii irs siyahısına düşmüş kəlağayı gününə həsr edilmiş mərasim və konsert proqramı təqdim edilib. 

Konsertdən öncə müxtəlif növ kəlağayıların yer aldığı sərgiyə baxış keçirilib. Sərgidə “Mirvarid Dilbazi Poeziya Məclisi” İctimai Birliyinin nəzdində yaradılan “Kəlağayı muzeyi”nin kəlağayıları, İB-nin tərtib etdiyi "Azərbaycan kəlağayısı min illərin yadigarı" adlı kitabı, Sosial Xidmətlər Agentliyinin Əlilliyi olan şəxslərin Peşə-əmək Reabilitasiya Mərkəzinin rəsm əsərləri, rəssam Sehran Allahverdinin "Kəlağayı" kompozisiyası, eləcədə rəssam Gülnarə Məmmədovanın rəsm əsərləri və Basqal ustalarından olan Mürşüd Talıbovun kəlağayı üzərində işlənmiş əl işləri sərgi iştirakçılarına nümayiş etdirilib.

Konsertdə tanınmış müğənnilər, aşıqlar, saz-söz adamları Azərbaycan kəlağayısını vəsf edən ifalar dinlənilib, şeirlər səsləndirilib. 

Konsert zamanı “Mirvarid Dilbazi Poeziya Məclisi” İctimai Birliyinin sədri, konsertin təşkilatçısı, şair-publisist Güllü Eldar Tomarlı, “Dədə Ələsgər Ocağı” İctimai Birliyinin ən ali mükafatı olan "Aşıq Ələsgər 200" yubiley medalı və fəxri diplomu ilə təltif edilib. Medal Aşıq Ələsgərin nəticəsi Xətai Ələsgərli tərəfindən təqdim olunub. 

Tədbir çərçivəsində kəlağayı ustası Mürşüd Talıbov Güllü Eldar Tomarlıya Azərbaycanın ilk qadın Xalq şairi Mirvarid Dilbazinin rəsmi işlənmiş kəlağayını muzeyə hədiyyə edib. Eyni zamanda rəssam Gülnarə Məmmədovanın kəlağayılı qızlar çəkilmiş rəsm əsərləri də muzeyə təqdim olunub. 

Konsertdə vətən müharibəsinin iştirakçıları, qazilər, şəhid ailələri də iştirak ediblər. 

Kəlağayı bir gözəllikdir. Gözəllik yetərincə bu tədbirdə vəsf olunub.

“Ədəbiyyat və incəsənət” (28.11.2022)

Cümə günü tizeri təqdim olunan ilk tarixi serialımız “Atabəylər: Şəmsəddin Eldəniz” sosial şəbəkələrdə müzakirə yaradıb. Ekran işinin fraqmenti bəzi  istifadəçi tərəfindən tənqidlərə məruz qalıb.

Çoxu serialı Türkiyədə yayımlanan “Diriliş: Ertuğrul”, “Uyanış: Büyük Selçuklu”, “Alparslan: Büyük Selçuklu” kimi tarixi layihələrə bənzədib. Geyimlər və döyüş səhnələrinin oxşarlığına görə “Atabəylər: Şəmsəddin Eldəniz”in sadalanan serialların təkrarı, plagiatı olduğu iddia edilib. 

Bundan əlavə, fraqmentdə “Bütöv Azərbaycan” ifadəsinin səslənməsi də müzakirə yaradıb. İddia olunur ki, tarixi həqiqətlər, o dövrdəki geyimlər və digər mövzular düzgün əks olunmayıb.

“Ədəbiyyat və incəsənət” portalı məsələ ilə bağlı ekran işinin ssenari qrupunun rəhbəri, yazıçı Varis Yolçuyevdən rəy alıb. 

“Bəzi azərbaycanlılarda bir inkarçılıq var. Yaxşı təşəbbüslərə heç vaxt xoş söz demirlər, həmişə pisləyirlər. Gülünc iddiadır ki, deyirlər, “Diriliş: Ertuğrul”, “Alparslan” və sairə kimi seriallara bənzəyir. Bu, savadsızlıqdır. Serial 12-ci əsrdən bəhs edir. Həmin vaxtlarda Azərbaycan elə deyilən layihələrdəki Səlcuq İmperiyasının tərkibində idi. Yəni Səlcuq dövləti olub, o dövrdə geyimlər də, döyüş taktikası da eyni idi.

Ona görə səlcuqlara oxşamalıdılar da, kimə oxşayacaqlar? O ki qaldı Bütöv Azərbaycan ifadəsinə... Bədii filmlər, həm real tarixi hadisələrə, həm də yaradıcı heyətin təxəyyülünə əsaslanır. Bütün filmlərdə, bədii və musiqi əsərlərində, teatrda müəllifin hüququ olur ki, hansısa tarixi hadisəni  müəyyən bir dövr ərzində kontekstdən çıxarıb, müasir mesajlar versinlər. Çünki incəsənət tək nəyisə göstərmək üçün xidmət etmir, həm də tərbiyələndirir, didaktik, əxlaqi-mənəvi dəyərlər aşılayır.

Bütün bunlara görə biz Bütöv Azərbaycan ifadəsini serialda vermək istədik. İnanın, tarixi faktların özündə də var ki, o dövrdə “Bütöv Azərbaycan” ideyası olub. Bütöv Azərbaycan deyiləndə təkcə Cənubi və Şimalı Azərbaycan nəzərdə tutulmur. O dövrdə Azərbaycanın bir hissəsi - Şirvanşahlar dövləti ayrı, Dərbənd ayrı idi, digər ərazilər isə Arran və Azərbaycan atabəyliyi adı altında Səlcuqlu imperiyasının tərkibində idi. Eldəniz məhz bu konteksdə Bütöv Azərbaycan qurmaq istəyirdi. Ermənilər özlərinə saxta tarix yaradır, biz əlimizdə olanları da itiririk. Mən 1 milyon işarəlik tarixi faktları öyrənmişəm. Ərəb, türk, ingilis və öz mənbələrimizdən araşdırmışam. Məsələn, həmin dövrü Ziya Bünyadov Sovet ideologiyasına, Əkbər Nəcəf isə müasir  milli ideologiyamıza uyğun araşdırıb. Başda Kərim Şükürov olmaqla bütün Tarix İnstitu bizim ssenari qrupumuzun içindədir, dəstək verirlər. Biz hər şeyi araşdırırıq. Kimlərsə, durub boş-boş deyir ki, tarixdən xəbərləri yoxdur. Bu, gülüncdür. Bir onu deyim ki, Şəmsəddin Eldəniz öz dövlətini qurana qədər Azərbaycan Səlcuq dövlətinin tərkibində olub. Bu tənqidlərin əsası yoxdur.”

“Ədəbiyyat və incəsənət” (28.11.2022)

Dekabrın 3-ü Peterburqda Şahnaz Kamalovanın “Nizami Gəncəvi-880” kitabının təqdimatı olacaq. Bakıdan, Moskvadan, Peterburqdan çoxlu qonaqların olacağı gözlənilir. 

Ünvan: Fontanka, 44. Mediaholl. 

Bu barədə “Ədəbiyyat və incəsənət” portalına müəllif məlumat verib və arzularını da ifafə edib: “Çox istərdim tədbirimiz haqqında Azərbaycan mətbuatında və televiziyasında məlumat verilsin, süjet olsun.

Etdiklərinə diqqətin olduğunu görəndə adam ruhlanır.”

Təbii ki, qeyd ediləsi hadisədir.

“Ədəbiyyat və incəsənət” (28.11.2022)

Kinomuz barədə daha bir şad xəbər: Rejissor Asif Rüstəmovun “Mərmər soyuğu” filmi “PÖFF Tallinn Black Nights” festivalında mükafata layiq görülüb. Xalq artisti Qurban İsmayılov filmdəki roluna görə “Ən yaxşı aktyor” nominasiyasında mükafatlandırılıb.

O ki qaldı filmin mövzusuna, süjet uğursuz rəssam və sevgilisinin qarışıq münasibətlərindən bəhs edir. Həbs həyatından sonra evə qayıdan ata müxtəlif yollarla oğlunun həyatına müdaxilə etməyə çalışır. Bu, bəzın əndazəsini aşaraq xoşagəlməz hallara da gətirib çıxarır. 

“Ədəbiyyat və incəsənət” portalı xəbər verir ki, filmin baş prodüseri Arzu Əliyeva, rejissoru Asif Rüstəmov, quruluşçu operatorları Oktay Namazov və Adil Abbasovdur. Prodüserlər Fariz Əhmədov, Balakişi Qasımov, Orman Əliyev və Guillaume de Seille, həmçinin kreativ prodüser İradə Bağırzadə, ssenari müəllifləri Asif Rüstəmov və niderlandlı həmkarı Roelof Jan Minneboo, quruluşçu rəssam Rafiq Nəsirovdur. Əsas rollarda Xalq artisti Qurban İsmayılov, aktyorlar Elşən Əsgərov və Natavan Abbaslı çəkiliblər.

“Ədəbiyyat və incəsənət” (28.11.2022)

Cəfər Cabbarlı adına “Azərbaycanfilm” kinostudiyası milli kinematoqrafiya sahəsində fəaliyyət göstərən yaradıcı şəxslərə dəstək olmaq, bu istiqamətdə çalışan gənc rejissorların fəaliyyətini stimullaşdırmaq, kino mühitinə yeni adlar qazandırmaq məqsədilə “Start - 2023” film layihəsi müsabiqəsini elan edib. “Ədəbiyyat və incəsənət” portalı müsabiqənin şərtlərini təqdim etməklə kino yaradıcılarını layihədə iştiraka dəvət edir. 

Müsabiqə “Azərbaycanfilm” kinostudiyasının fəaliyyətə başlamasının 100-cü ilinə həsr olunur.

Müsabiqə sərbəst mövzuda keçirilir. Müsabiqədə janr məhdudiyyəti yoxdur. Müsabiqədə debüt filmlərini çəkəcək (müraciət edilən kateqoriyada 1-ci və ya 2-ci film) rejissorlar iştirak edə bilərlər.

MÜSABİQƏNİN KATEQORİYALARI

Müsabiqə 2 kateqoriyada keçirilir:

Kateqoriya 1: Bədii film – tammetrajlı və ya qısametrajlı film

Kateqoriya 2: Qısametrajlı animasiya filmi (26 dəqiqəyə qədər)

MÜSABİQƏNİN MƏRHƏLƏLƏRİ

Müsabiqə aşağıdakı mərhələləri əhatə edir:

1-ci mərhələ - Layihələrin qəbulu (31 yanvar 2023-ə qədər)

2-ci mərhələ - Layihələrin dəyərləndirilməsi (1 fevral – 31 mart 2023)

3-cü mərhələ - Nəticələrin elan olunması (3-7 aprel 2023)

1-ci mərhələ - Layihələrin qəbulu

Müsabiqənin 1-ci mərhələsi kinostudiyanın nəzdində yaradılmış Ekspert Şurasının katibliyi tərəfindən həyata keçirilir.

Müsabiqəyə təqdim edilən sənədlərdə qüsurlar olmadığı halda film layihələri 2-ci mərhələdə iştirak hüququ əldə edir.

Layihələrin qəbulu – 31 yanvar 2023-cü il tarixlərində nəzərdə tutulur.

2-ci mərhələ - Layihələrin dəyərləndirilməsi

Müsabiqənin 2-ci mərhələsində film layihələri kinostudiyanın nəzdində yaradılmış Ekspert Şurası tərəfindən qiymətləndirilir.

Layihələrin 1 fevral – 31 mart 2023-cü il tarixlərində dəyərləndirilməsi nəzərdə tutulur.

3-cü mərhələ - Nəticələrin elan olunması

Nəticələr 3-7 aprel 2023-cü il tarixlərində kinostudiyanın internet informasiya ehtiyatında (www.azerbaijanfilm.az), sosial şəbəkə profillərində və onlayn media vasitəsilə elan olunur.

MÜSABİQƏNİN ŞƏRTLƏRİ

Müsabiqənin 1-ci kateqoriyasında (tammetrajlı və qısametrajlı bədii film) filmoqrafiyasında audiovizual sahədə müəyyən işi olmuş (videoçarx, sənədli film, bədii film, animasiya filmi və s.) və bu istiqamətdə 1-ci və ya 2-ci filmini çəkmək üçün müraciət edən rejissorlar iştirak edə bilər. Müsabiqənin 2-ci kateqoriyasında (qısametrajlı animasiya filmi) bu istiqamətdə 1-ci və ya 2-ci filmini çəkmək üçün müraciət edən rejissorlar iştirak edə bilər. Müraciətlər xarici film istehsalı şirkətləri və fondları, həmçinin yerli maliyyə mənbələri ilə müştərək şəkildə təqdim edilə bilər. Bu halda müştərəklik müqaviləsi və layihənin maliyyələşməsi sənədləri təqdim edilməlidir. Müsabiqədə qalib gəlmiş layihələrin ssenarisi üzərində təkmilləşdirmə işi yalnız Ekspert Şurasının rəyi və kinostudiya direktorunun əmri ilə aparıla bilər. Bu halda müraciət edən rejissor/prodüserin və ya kinostudiya rəhbərliyinin təklif etdiyi yeni müəllif layihəyə qoşula bilər. Hər müəllif hər kateqoriyada yalnız bir layihə ilə müsabiqədə iştirak edə bilər.

Təqdim edilməli olan sənədlər paketinə aşağıdakılar daxildir:

* filmin müraciət forması

* filmin layihəsi - loqlayn, sinopsis, tritment (əgər varsa), ssenari. Ssenari beynəlxalq yazılış formatına uyğun olmalıdır: font (şrift): Courier (Courier new) / Şriftin ölçüsü: 12. Tam ssenarisi göndərilməyən müraciətlər nəzərə alınmayacaq;

* filmin ssenari faylında müəllifin və ssenarinin adı ilk səhifədə yer almalı, digər səhifələrdə göstərilməməlidir. Obyektivliyi təmin etmək üçün ssenarilər kodlaşdırılmış adlarla Ekspert Şurasına təqdim olunacaq.

* rejissor şərhi (1 səhifəyə qədər);

* prodüser şərhi (əgər prodüser varsa) (1 səhifəyə qədər) ;

* müəlliflərin şəxsiyyət vəsiqələrinin (xarici vətəndaşlar üçün daimi yaşayış icazələrinin) surəti;

* Ssenarinin müəllifə aid olduğu haqqında Azərbaycan Respublikası Əqli Mülkiyyət Agentliyindən alınmış müvafiq sənədin surəti;

* Ssenari müsabiqəyə müraciət edən rejissora / ssenaristə / prodüserə və ya hər hansı başqa bir müəllifə (müəlliflərə) aid ola bilər. Əgər ssenari müəllifi rejissordan fərqlidirsə, ssenari müəllifinin rejissora müsabiqədə bu ssenari ilə iştirak etməsinə icazə verməsi haqqında müvafiq icazə məktubu tələb olunur;

* layihənin təxmini büdcəsi;

* filmin istehsal təqvimi - quruluş planı;

* müştərək layihə olduğu halda maliyyələşdirilməni əks etdirən sənədlər (müqavilə, zəmanət məktubu və s.);

* sponsorluq müqaviləsi (müştərək film kimi yerli və beynəlxalq sponsorlar tərəfindən də maliyyələşdiyi halda);

* müəlliflərin CV-ləri (rejissor, ssenarist, prodüser);

* Bütün sənədlər PDF formatında olmalıdır.

* Ssenari və digər sənədlər Azərbaycan dilində təqdim olunmalıdır;

* 

MÜKAFATLAR:

Qalib müəlliflər diplomla mükafatlandırılır. Hər kateqoriyada birinci yerin qalibi olmuş layihələrin onu təqdim edən rejissor tərəfindən “Azərbaycanfilm” kinostudyasında istehsal olunması nəzərdə tutulur. Müsabiqədə qalib gələn müəlliflərlə müqavilə bağlanılır və müqavilədə hüquq və öhdəliklər əks olunur. Ekspert Şurasının apardığı müzakirələr məxfi saxlanılır. Müsabiqəyə təqdim olunan layihələrin müəlliflik hüquqları ilə bağlı sonradan yarana biləcək hər hansı mübahisəli məsələyə görə rəhbərlik və Ekspert Şurası məsuliyyət daşımır.

Müsabiqəyə təqdim olunan sənədlər 31 yanvar 2023-cü il tarixinə qədər Bu email ünvanı spambotlardan qorunur. Onu görmək üçün JavaScripti qoşmaq lazımdır. poçt ünvanına elektron qaydada göndərilməlidir. Müsabiqəyə son müraciət tarixi Bakı vaxtı ilə 2023-cü il 31 yanvar 00:00-da bitir. Bu tarixdən gec göndərilmiş müraciətlər etibarsız hesab edilir. Elektron poçt vasitəsilə müraciətlər yalnız “Müsabiqə” başlığı altında göndərilməlidir. Müsabiqənin sənəd qəbulu qaydasının hər hansı bir bəndinə uyğun olmayan müraciət barədə müraciət edən tərəf e-mail vasitəsi ilə məlumatlandırılır. Bundan sonra sənədlər müraciət edən tərəfindən qaydalara uğun şəkildə yenidən göndərilmədikdə həmin müraciət edən müsabiqədə iştirak hüququnu itirmiş hesab olunur və bu hallarla bağlı heç bir apellyasiya müraciətinə baxılmır. Müsabiqə ilə bağlı təşkilati işlər kinostudiyanın ictimaiyyətlə əlaqələr və marketinq şöbəsi tərəfindən həyata keçirilir.

Məlumat üçün:

Telefon: (012) 430-87-84 / 85;

Həftənin iş günləri saat 10:00-17:00;

E-poçt: Bu email ünvanı spambotlardan qorunur. Onu görmək üçün JavaScripti qoşmaq lazımdır.

“Ədəbiyyat və incəsənət” (28.11.2022)

Dünən Azərbaycan Dövlət Gənc Tamaşaçılar Teatrında dahi rus klassiki A.Çexovun “Qağayı” əsəri əsasında hazırlanmış eyniadlı tamaşanın nümayişi olunub. 

“Ədəbiyyat və incəsənət” portalı xəbər verir ki, səhnə əsərinin quruluşçu rejissoru Əməkdar artist Nicat Kazımov, tərtibatçı rəssamı Telman Şıxıyevdir. Xoreoqrafik həll Nailə Məmmədzadəyə, musiqi tərtibatı Şamxal Novruzluya, fəndlərin quruluşu İsa Əsədova aiddir.

Tamaşanın əsas ideyasını ifadə edən tənhalıq, təzadlar, tərəddüdlər içərisində qalmış insanın problemi hər bir qəhrəmanın vasitəsilə qabardılıb. 

Tamaşaçılar tamaşanı alqışlarla qarşılayıblar.

“Ədəbiyyat və incəsənət” (28.11.2022)

“Ədəbiyyat və incəsənət” Daycest bölümündə əməkdat artist Mətanət İsgəndərlinin fikirlərini dərc edir. Bizcə, insanları yaxşı tanımaq üçün onları dinləmək vacibdir. 

“İnsanlara güvənib azalıb. O qədər inanmışam, o qədər güvənmişəm, sonda da gözləmədiyim hərəkətləri onlardan görmüşəm. Ürəyi təmiz insanlar üçün bu fani dünyada yaşamaq olduqca çətindir. Qarşımdakına inanmışam. Bəzən ürəyimin təmizliyindən övladlarım da əziyyət çəkib".

Bu açıqlamasından daha sonra Mətanət İsgəndərli deyib:

"Yaxşı sənətkar olmağın hələ sənin yaxşı insan olmağın demək deyil. Özünü dağ başına qoymaq yaxşı hal deyil. İnsanlara yuxarıdan aşağı baxmaqla sən Allahı qəzəbləndirə bilərsən. Şan-şöhrətə çatdım, amma bu mənim başımı gicəlləndirmədi. Dünyadan gedəndə nə var-dövlət, nə də şan-şöhrət aparırsan. Özünü sadə, insan kimi apar, qoy öləndən sonra rəhmət oxusunlar" deyə müğənni bildirib.

Sənətçi qazancını sənətinə qoyduğunu deyir.

"Bütün qazancımı sənətimə qoymuşam. 600-ə yaxın mahnım var, hələ neçəsi var ki, heç oxumamışam. Sonuncu qəpiyim də olub aranjimana vermişəm. Gedib borc edib aranjiman etdirmişəm. Özü də ən bahalı aranjimanları mən etdirmişəm. Bu sənətə pul qoymaq lazımdır ki, pul götürəsən. Amma inanın ki, məqsədim pul götürmək də olmayıb. Heç vaxt var-dövlətimlə öyünməmişəm. Çünki əvvəlindən görmüşəm" deyə müğənni bildirib.

Müğənni son günlər daha da məşhurlaşan "Qərib payız" mahnısından danışıb.

"Müğənni o ab-havaya düşməsə ondan heç nə inandırıcı alınmaz. Bu mahnını oxuyanda çox dərdli idim, böyük haqsızlıqlar qarşısında imtahan verirdim. Kefimin kök vaxtında bu mahnını gedib oxuya bilməzdim. Mən o harayı, o dərdi bu mahnı vasitəsilə çatdırmaq istəyirdim. Səs rejissoruna dedim ki, qapını bağla, heç kimi otağa buraxma, mən istəyirəm ki, içimi bu mahnıya töküm. Hönkürtü ilə bu mahnını oxumuşam" deyə müğənni bildirib.

“Ədəbiyyat və incəsənət” (28.11.2022)

Rəsm qalereyası: Vinsent Van Qoq, “Çiçəkləyən şaftalı ağacları”