Super User

Super User

 

Dünyanın ən böyük film festivalı olan 76-cı Kann Film Festivalı mayın 16-dan başlayacaq və 27-dək davam edəcək.

 

“Ədəbiyyat və incəsənət” AzərTAC-a istinadən xəbər verir ki, Kann Film Festivalının 76-cı buraxılışında “Çiçək ayın qatilləri” filmi ilə Martin Skorsez, sevimli aktyorlar Leonardo Di Kaprio , Robert de Niro, Tom Kruz və Harrison Fordun iştirakı artıq təsdiqlənib. Həmçinin məişət zorakılığı ittihamları ilə məhkəmə qarşısına çıxmış və sonda məhkəməni udan fransız aktyoru Coni Deppin də festivalda olacağı bildirilir. 

Pedro Almodovarın yeni qısametrajlı filmi "Qəribə həyat tərzi" rəsmi seçimdə və dünya premyerasında nümayiş etdiriləcək. Festivalda qısametrajlı və uzunmetrajlı məşhur filmlərin rejissorları və aktyorlarının iştirakı gözlənilir. Ancaq tanınmış rejissor və aktyorların bəzilərinin seçilməsi hələ də sual altındadır. 

Festivala seçkilərdə qadın rejissorların yeri də araşdırılacaq. 

Netflix Kann Festivalı qaydasına əməl etməkdən imtina edərək, “La Mostra de Venise” İtaliya film festivalında iştiraka üstünlük verir.

 

“Ədəbiyyat və incəsənət”

(13.04.2023)

Beynəlxalq Uşaq Kitabı Şurası (IBBY) X.K.Andersen mükafatını 1956-cı ildə təsis edib. Bu mükafat ədəbiyyat sahəsində çalışan müəllif və rəssamlar üçün ən nüfuzlu beynəlxalq mükafat olub. “Uşaq” müəllifləri üçün bu mükafat ən nüfuzlu beynəlxalq mükafatdır, o, çox vaxt “Kiçik Nobel mükafatı” adlandırılır. Mükafat yalnız hazırda həyatda olan yazıçılara və rəssamlara verilir. 

 

Solmaz Amanova AzərTAC-a bildirib ki, mükafata namizədlər Beynəlxalq Uşaq Kitabı Şurasının milli bölmələri tərəfindən irəli sürülür. Azərbaycanda mükafata namizədlər F.Köçərli adına Respublika Uşaq Kitabxanası tərəfindən irəli sürülür. Qaliblər bir qayda olaraq Bolonyada Beynəlxalq uşaq ədəbiyyatı yarmarkasında IBBY-nin mətbuat konfransında elan olunur. 

Ənənəvi olaraq qızıl medallar IBBY-nin milli bölmələri olduğu ölkələrdən birində iki ildən bir keçirilən Ümumdünya IBBY Konqresləri günlərində təqdim olunur. IBBY-nin qərarı ilə aprelin 2-si, X.K.Andersenin doğum günü, 1967-ci ildən bütün dünyada fəal şəkildə qeyd olunan Beynəlxalq Uşaq Kitabı Günü elan olunub. Hər il IBBY-nin milli bölmələrindən biri Beynəlxalq Uşaq Kitabı Gününün təşkilatçısı olur. 

2022-ci il sentyabrın 5-dən 8-dək Putradjaya şəhərində 38-ci Ümumdünya Beynəlxalq Uşaq Kitabı Şurasının konqresi (IBBY) keçirilib. Konqresin əsas təşkilatçısı kimi IBBY-nin Malayziya Milli Bölməsi çıxış edib. 

Konqresin proqramı çərçivəsində sentyabrın 6-da Şuranın milli bölmələri tərəfindən irəli sürülmüş qaliblərin təqdimatı və IBBY Fəxri Siyahısının diplomlarının təqdimatı olub. 

Mükafatın laureatları arasında uşaq yazıçısı, professor, “İrs” Nağıllar evinin rəhbəri, “Everest” Nəşriyyat evinin baş redaktoru Solmaz Amanovanın “Qoçaq ayı balası və onun dostları” kitabı da yer alıb (illüstrator İsgəndər Məmmədov). Kitab “Everest” Nəşriyyat evi tərəfindən nəşrə hazırlanıb. Nağılda həm uşaqların, həm də intellektual ayı balası oyuncağının hissləri əks olunur. “Qoçaq ayı balası və onun dostları” uşaqlara xalqının irsi və ənənələrinə məhəbbət və xeyirxahlıq, hörmət hisslərini aşılayır. Bütün bunlar barədə siz “Qoçaq ayı balası və onun dostları” kitabçasını oxuyub öyrənə bilərsiniz. Bu kitab bütün məktəb kitabxanalarında Azərbaycan və ingilis dillərində vardır. 2022-ci ilin Fəxri Siyahısına 53 ölkədən 47 müxtəlif dildə 163 nominasiya daxildir. 2022-ci ilin Siyahısı üçün “Müəllif” kateqoriyasında – 63, “İllüstrasiya” kateqoriyasında - 52 və “Naşir” kateqoriyasında - 48 iş seçilib. Azərbaycan hər üç kateqoriya üzrə Fəxri diplomlar alıb. 

Diplomlar və kataloq Azərbaycan Milli Kitabxanasında Mədəniyyət Nazirliyinin şöbə müdiri Akif Marifli və Milli Kitabxanasının direktoru Kərim Tahirov tərəfindən qaliblərə təqdim olunub.

 

“Ədəbiyyat və incəsənət”

(13.04.2023)

 

Dünənki Kosmonavtika gününün ardınca təqvimdə bu gün bir mədəniyyət günüdür. Belə ki, 13 aprel Ümumdünya Rok-n-Roll günü elan olunub.

Rok deyiləndə də, rok-n-roll deyiləndə də ilk öncə yada məşhur Bitlz qrupu düşür. Amma bugünkü qeydetmənin mənbəyində heç də məşhur ingilis qrupu dayanmayıb. 

 

“Ədəbiyyat və incəsənət” portalı sizlərə 13 aprel - Ümumdünya Rok-n-Roll günü barədə bilgilər verəcək. 

Bayramın mənşəyi ötən əsrin əllinci illərinə və Amerikaya gedib çıxır. Bill Heylinin məşhur "Rock around the clock" mahnısı ilə çəkildiyi film ABŞ ekranlarına çıxdığı gün - 1954-cü il aprelin 13-ü rok-n-roll rəqsinin rəsmi yaranma günü hesab olunur.

1940-cı illərin sonu və 1950-ci illərin əvvəllərindəki bu musiqi istiqaməti ABŞ-ın cənubunda qaralar və ağlar arasında uzunmüddətli mədəni qarşılıqlı əlaqə nəticəsində yaranıb.

Ümumdünya Rok-n-Roll Günü dünyada bu musiqini öz həyat tərzinə və üslubuna çevirənlərin bayramı kimi qəbul olunur. Rock around the clock” sinqlı cəmiyyətə və ənənələrə meydan oxuyaraq ABŞ-ın sərhədlərini aşıb, bütün ölkələrə və qitələrə yayılıb. Musiqidə bu istiqamətin yaradıcılarından biri də əfsanəvi Elvis Presli olub. Onun geyim üslubu, hərəkətləri və davranışları onu yeniyetmə və gənclərin kumirinə çevirib. 1960-cı illərin əvvəllərində rok-n-rollun yeni üslubu olan pop-rok meydana gəlib. Onun əsas nümyəndələri öndə adını vurğuladığımız “Bitlz” qrupunun üzvləri, liverpullu dördlük olub. Ötən illərin geniş yayılan rok musiqisi daha çox texniki, sürətli, güclü səslə müşayiət olunur.

1964-cü ildə sürətli, güclü və texniki səslənməsi ilə “Rolling Stones” meydana gəlir. 1970-ci illərdə isə psixodepik rok yaranır, onun parlaq nümayəndələri “Pink Floyd”, “Deep Purple”, “Led Zeppelin”, “Black Sabbath” idi. Bu onilliyi rok mədəniyyətinin Qızıl dövrü hesab edirlər. Yetmişinci illərin sonu pank-rokun (“zəhlətokən rok”) meydana gəlməsi ilə fərqlənib. Sadə musiqi stemi vokalı və mətnləri ön plana çəkir. Burada tez-tez hökumətlərin, siyasətin və cəmiyyətin varlı təbəqələrinin tənqidinə rast gəlinir. Pank dalğasında “Sex Pistols”, “The Clash”, “Stooges”, İqti Pop qrupları məşhurlaşıb. 1980-cı illərdə qadın roku meydana gəlir, praktiki sayılan 90-cı illərdə isə ən parlaq rok-n-rollçu Kurt Kolbeyn və onun “Nirvana” qrupu fəaliyyətdə olub.

Bu gün rok musiqisi yüngül rəqs rok-n-rolundan başlamış brutal aqressiv qrayndkora qədər çoxsaylı istiqamətlərə malikdir. Mahnıların mətnləri dərin və fəlsəfi məzmundan ibarətdir. Çox vaxt rok musiqisi ilə pop musiqisini qarşılaşdırırlar, hərçənd bu iki anlayış arasında görülə bilən elə bir sərhəd yoxdur. 

Onu da vurğulayaq ki, Klivlend şəhərində Rock-n-Roll Hall of Fame adlı bu istiqamət üzrə bir muzey də var.

O ki qaldı Azərbaycana, Azərbaycanda ümumən rokun, o cümlədən rok-n-rollun və hard-rokun yaradıcıları sumqayıtlı gənclər olub. İbrahim Eminin başçılıq etdiyi “Yuxu” qrupu bizim bir əfsanəmizdir.

Onlardan sağ olanları portalımız adından təbrik edir, vəfat edənlərəsə Allahdan rəhmət diləyirik.

 

Şəkildə: “Bitlz” və “Yuxu” qrupları

 

“Ədəbiyyat və incəsənət”

(13.04.2023)

Bakı Şəhər Mədəniyyət Baş İdarəsi Səbail rayon Mərkəzləşdirilmiş Kitabxana Sisteminin Mərkəzi Kitabxanasında "Heydər Əliyev İli" çərçivəsində Ulu Öndərə həsr edilmiş "Hekayələr toplusu" adlı yeni kitabının təqdimatı keçirilib.

 

Kitabxananın yaydığı məlumata görə, tədbirdə müstəqil Azərbaycan dövlətinin qurucusu, görkəmli dövlət və siyasi xadim Heydər Əliyevlə bağlı fikirlər səsləndirilib. 

Bədii hissədə Azərbaycan Milli Konservatoriyası tərkibində İncəsənət Gimnaziyasının Musiqi şöbəsinin şagirdlərinin ifasında musiqi nömrələri, rəqslər təqdim olunub. 

 

Şəkildə: Təqdimat mərasimindən bir görüntü

 

“Ədəbiyyat və incəsənət”

(13.04.2023)

“Ədəbiyyat və incəsənət” portalı günümüzün ən aktual sitatını təqdim edir:

“Dördüncü Sənaye İnqilabının Təhlili və Koordinasiya Mərkəzi Azərbaycanın milli süni intellekt strategiyası üçün Yol xəritəsi hazırlayıb.

Yaxın zamanlarda süni intellekt satınalmaları layihəsinin təqdimatını planlaşdırırıq. Qurum Dünya İqtisadi Forumunun Dördüncü Sənaye İnqilabının Təhlili və Koordinasiya Mərkəzi şəbəkəsinin Azərbaycandakı mərkəzinə də ev sahibliyi edir. Mərkəz Dünya İqtisadi Forumu ilə 3 platforma - süni zəka və maşın öyrənməsi, əşyaların interneti və şəhər transformasiyası, həmçinin rəqəmsal ticarət üzrə əməkdaşlıq edir. Mərkəzin əsas istiqamətləri Dördüncü Sənaye İnqilabı sahəsində fəaliyyət göstərən beynəlxalq təşkilatlarla əməkdaşlığı, bu sahədə əlaqələndirməni, həmçinin rəqəmsal iqtisadiyyat sahəsində strategiyaların, təşəbbüslərin, layihələrin koordinasiyası həyata keçirməkdir"

Sitatı Dördüncü Sənaye İnqilabının Təhlili və Koordinasiya Mərkəzinin icraçı direktoru Tamerlan Tağıyev "Dayanıqlı inkişaf üçün texnologiyalar: 4Sİ texnologiyaları və bulud həlləri" mövzusunda keçirilən tədbirdə işlədib.

 

Şəkildə: Tamerlan Tağıyev çıxış edərkən

 

“Ədəbiyyat və incəsənət”

(13.04.2023)

Milli Muğam Müsabiqəsinə qeydiyyat başa çatıb. Bu barədə Heydər Əliyev Fondu məlumat yayıb.

Qeyd olunub ki, martın 1-dən aprelin 10-dək aparılan qeydiyyatda yaşı 18-dən 35-dək olan xanəndə və instrumental ifaçılar iştirak ediblər. Yarışmaya vəsiqə qazanan iştirakçılar aprelin 20-də elan ediləcək.

Yarışmanın birinci turu aprelin- 24-25-də, ikinci turu isə aprelin 26-27-də keçiriləcək. Xanəndə və instrumental ifa kateqoriyaları üzrə qaliblər aprelin 27-də müəyyənləşəcək.

Müsabiqənin yekun konserti aprelin 30-da təşkil olunacaq. 

Milli Muğam Müsabiqəsinin qalibləri ölkəmizi “Muğam aləmi” 6-cı Beynəlxalq Muğam Festivalında təmsil edəcəklər.

 

“Ədəbiyyat və incəsənət”

(13.04.2023)

Azərbaycanda felyeton janrının tanınmış ustadı Yunus Oğuz “Ədəbiyyat və incəsənət” oxucularına növbəti felyetonunu təqdim edir.

 

Deyirəm oyan! Zaman üstündən qatar kimi yox, uçaq kimi keçir. Oyanmır. Zalım oğlu elə bil fil qulağında yatıb. Oyansa ətrafına baxacaq, diribaş qonşularını görəcək. Anlayacaq ki, dünya onun beyninə yeridilən dünya deyil. Dünya al-əlvandır; müharibəsilə, sevgisilə, nifrətilə, məhəbbətilə, yeniliyilə, köhnəliyilə. Bunları qəbul edə bilməyəcək.

Odur ki, yuxuda pıçıldayır: "Əl çək məndən! Mən dini məsələlərdə mühafizəkaram. Gərəkdir ki, insan qatı dindar, müsəlman olsun. Çarşabda gəzsin qadınlar. Kişinin qulu olsun qadınlar. Necə ki, Allahın quludur cəmi cümlə. Gərəkdir cocuqlar, qadınlar kişinin tarlasında səssiz və müti olsunlar. Heç bir yeniliyi qəbul etməsinlər. Öl desən, ölsünlər, qal desən, qalsınlar. Kişi onlar üçün yerdə Allah olmalıdır".

Görürəm yatıb yuxuda qalmış adam köhnəlikdən çıxıb, amma özlüyündə. Mollalıq edir, ölülərimizi müsəlman qaydası ilə dəfn edir, "Fatihə", "Yasin" oxuyur, salavat çevirir, amma əbasının altında telefon gəzdirir, surələri, ayələri birbaşa ordan oxuyur. Qeyri-müsəlmanların əleyhinədir, ancaq onların istehsal etdikləri komfort maşının birindən düşüb , o birinə minir. Evində, həyətində işıqdan, hamamda isə onların icad etdiyi ləvazimatlardan istifadə edir.

Soruşuram ki, ay kişi, bəs belə mühafizəkarsansa, bütün bunlardan niyə istifadə edirsən? Get cəhalətin, xurafatın dövründə qal. Telefon əvəzinə göyərçindən, maşın yerinə at, eşşəkdən istifadə et.  Evinə elektrik çəkmə. Romantik ol, evinin hər tərəfinə şam düz, ay işığında surə oxu. Hamamda tavadan, tasdan əlini çəkmə. Daha neyləyirsən kafirlərin istehsal etdiyi "Head&shoulders" şampununu, "Chanel" ətrini?

Cavab verir ki, əşi, deməyimə baxma! Bir çətən külfətim var. Onların ruzusu dindən, xurafatdan, cəhalətdən çıxır. Əlimdən başqa iş gəlir? Bir sənət sahibi deyiləm axı. Nə olsun deyirəm ki, qadınlar çarşab geyinməlidilər ki, bədən cizgiləri görünməsin. Elə onun zibilinə düşmüşəm. Çarşab görəndə ürəyim atlanır. Fikirləşirəm görən onun altında nə var, o bədən cizgiləri necədir? Odur da cocuq-coluq bədənimi zəncirləyib, əlimi-qolumu bağlayıb, bunlardan başqa heç nə fikirləşə bilmirəm...

Başqa birisinə deyirəm, oyan, gözünü aç! İndi gözübağlı yaşamaq vaxtı deyil. Dünyaya gözüaçıq bax. Dünya elm dalınca qaçır. Halal çörək qazanır. Yarıyuxulu dillənir: Nə elm, nə çörək, nə qazanc? Sən "Kazbek"i doldur qoy damağıma, ya da  qəlyanın muştuğunu dodaqlarımın arasından əksik eləmə. Qəlyanın üstündə də tiryəki bol elə. Elə et ki, hallanandan sonra haldan çıxmayım. Elm xırda şeydir. Əsas diplomdur. Gedib pul verib diplom alacam. Sonra qışqıracam ki, ali təhsilli kadrlara bu ölkədə yer yoxdur. Hallı-hallı hökumətlə məzələnəcəm. Dünyaya şikayət edəcəm. O de ...e... nə çoxdur bu hökumətdən narazı qalan dövlətlər. Birinə torpaq vermir, birindən torpaq istəyir. O birinə yol vermir, digərinə neftdən, qazdan faizi az verir..., canım sənə desin, nələr...nələr...

Qoşulacam beşinci kalona, pul göndərirlər, şey göndərirlər. Etirazımızı edib hallanacayıq. Nəyimizə lazımdır dövlət, xalq, şanlı tarixi keçmişimiz,  İndi hallı, biraz da kal olmaq lazımdır. Bədəbəddə gedib kənd toylarında qafiyə açıb, meyxana deyəcəm. Toylardan gələn pulu televizorlara buraxacam. Məşhur olacam. Pul basıb "xalq meyxanaçısı" adını alacam. Nəyimə lazımdır elm!?

Üçüncüsünə deyirəm oyan, gözünü aç, ayağa dur, silkələn! İndi ayağa durmaq vaxtıdır! Böyrünü narazılıqla yana çevirib şirin yuxusunu davam etdirir.

O da yarıyuxulu deyir ki, qarşıma çox çətin məsələ qoyursan. Ayaqda qalmaq ayağa durmaqdan çətindir. Ayaqda qalmaq üçün hansı yolla olur- olsun pul qazanmaq, yaltaqlıq etmək, ayaqda duran dizlərini kiminsə önündə qattalamaq lazımdır. Dizlərin qattalanmasa ayaqda dura bilməzsən.

Lap elə bil ayağa durdum, dediklərimi həyata keçirdim. Çoxlu pul qazandım. Bəs onları neyləyəcəm? Əttovbə, birdən ağlına gələr ki, bu puldan xəstəyə kömək edəcəm, yetimə dayaq olacam, kasıb tələbənin təhsil haqqını ödəyəcəm, tariximiz haqqında  kitab yazdıracam, film çəkdirəcəm, hansısa qaçqına ev tikdirəcəm. Ağlına belə şeylər gəlməsin.  Biz belə şeylərə öyrəncəli deyilik. Olsa-olsa, "yaxşı oğlan, pul xərcləyən oğlan" adını özümüzdə saxlamaq üçün villamıza üç-beş qız çağırıb kef edəcəyik. Sonra soyundurub şəkillərini, lap elə canlı çəkib internetə qoyacayıq, "Like" yığacayıq. Ayaqda durmaq üçün bundan yaxşı bir şey olmaz ki? Hamı bizdən danışacaq, tərifləyən də, söyən də olacaq, amma ayaqda olacayıq, Mənə bu lazımdır?

Soruşuram ki, bəs zəkanı, ağlını  inkişaf etdirmək istəmirsən? O sənin dayağın, çörək ağacın ola bilər.

Cavab verir ki, hələ zəkanın, ağlın zəmanəsi yetişməyib. İndi öz dilinin əvəzinə üç-dörd əcnəbi dil bilsən sənə bəs edər. Mən də bunları bildiyim üçün ayağa durmaq istəmirəm.

Bu zaman susuram. Bilirəm ki, onların hər üçü haqlı deyil. İndi zəmanə dəyişib, yenilənib, şəffaflaşıb. Görən bunu çoxları başa düşürmü?..

Deyirəm oyan, gözünü aç, ayağa dur! İstəmir. Yüz illərin ağrı -acısını, toz-pasını üstündən at, silkələn, yenilən. İstəmir. Yüz il bundan öncə necə idisə, indi də eləcə istəmir.

 

“Ədəbiyyat və incəsənət”

(13.04.2023)

Cümə axşamı, 13 Aprel 2023 16:30

Növbəti qəbul Qobustanda!

Bir elanı diqqətinizə çatdırırıq.

Mərkəzi icra hakimiyyəti orqanları və digər idarəetmə qurumlarının rəhbərlərinin şəhər və rayonlarda vətəndaşların qəbulu cədvəlinə əsasən Azərbaycan Respublikasının mədəniyyət nazirinin birinci müavini, nazir vəzifəsini icra edən Adil Kərimli aprelin 28-də saat 10:00-da Qobustan rayonu Heydər Əliyev Mərkəzində (Qobustan şəhəri, Elyar Vəliyev küçəsi, 162) əsasən Qobustan, Şamaxı şəhərləri, Ağsu rayonundan olan vətəndaşları qəbul edəcək.

 

“Ədəbiyyat və incəsənət” portalı Mədəniyyət Nazirliyinə istinadən xəbər verir ki, vətəndaşlar aprelin 19-dək nazirliyin Bu email ünvanı spambotlardan qorunur. Onu görmək üçün JavaScripti qoşmaq lazımdır. elektron poçt ünvanı, (012) 493-30-02 telefon nömrəsi vasitəsilə və vatsap xidmətinə (0 777 147 147) müraciət etməklə qəbula yazıla bilərlər.

 

“Ədəbiyyat və incəsənət”

(13.04.2023)

Cümə axşamı, 13 Aprel 2023 16:00

Gözəlliyin növbəti qaydaları

“Ədəbiyyat və incəsənət” portalının Gözəllik bələdçisi rubrikasının aparıcısı Kəmalə Nəsirova baharın gəlişi ilə bağlı qadınlara əməl etməli olduqları şərtləri izah edir. 

Günəşin öz təsirini göstərməyə başladığı bir zamanda dərini günəşdən və yeni hava şəraitindən qorumaq lazımdır.

Dərinin təravətli və uşaq dərisi kimi görünməsi üçün hansı şərtlərə əməl etmək lazımdır? 

Hava dəyişikliyi və günəş dərini quruda və çatlada bilər. Bunun üçün ən vacib məsələ dərini yaxşı bəsləməkdir. Xüsusən də nəmləndirici və günəş qoruyucu kremləri çəkməyi unutmayın. 

 

1. 

İlk olaraq dərini təmiz saxlamaq lazımdır. Dəri təmizliyində ən vacib məsələ onu səhər tezdən və yatmamışdan qabaq yumaqdır. Beləcə məsamələrin azalmasını təmin etmiş olarsınız. 

 

2. 

Dəridə yaranan qara nöqtələri və yağları təmizləmək üçün həftədə bir dəfə təmizləyici maska çəkmək lazımdır. Əks halda məsamələr dolar və ləkə kimi qala bilər. 

 

3. 

Səhər yuxudan durduqdan sonra mütləq üzünüzə nəmləndirici çəkin. 

 

4. 

Yaz aylarına girərkən daha çox çiy su içmək lazımdır. Bu zaman dəri daha parlaq və canlı olur. Günə su qəbul edərək başlayın. 

 

5. 

Qızartmalardan və doymuş yağlardan hazırlanan qidalardan uzaq durun. 

 

6. 

Həddindən artıq kofein, çay və siqaretdən istifadə dərini korlayan təsirlər arasındadır. Davamlı olaraq qidalanmalı və meyvə, tərəvəzlər yemək lazımdır.

 

7. 

Çox yağlı dəriniz varsa, masəmələri təmizləyən toniklər istifadə edin. 

 

8. 

E vitamini ilə zəngin olan kosmetik məhsullar alın. E vitamini dərini hər cür mənfi təsirlərdən qoruyur.

 

9. 

Hər həftədə 2 dəfə dərinizə kremlərlə masaj edin. Bu, qan dövranını yaxşılaşdırdığına görə dəri gənc göstərir. 

 

10.

Qazlı şirin içkilərdən mütləq uzaq durun! 

 

Bu maddələri tətbiq etdikdən sonra dəriniz təravətli olacaq. Baxımlı və sağlam dəri bir az çəhrayı olur. Dərhal dərinizə baxın və müqayisə edin. 

Sizlərə gözəl görünmək arzusu ilə.

 

“Ədəbiyyat və incəsənət”

(13.04.2023)

Günün fotosu: Pentaqondan məxvi məlumatların sızması ciddi təşviş yaradıb

 

Foto: Vaşinqtonda mətbuat konfransı-Müəllif Hüquqları Manuel Balce Ceneta / AP

 

“Ədəbiyyat və incəsənət” Euronews-a istinadən xəbər verir ki, ABŞ hakimiyyəti gizli sənədlərin geniş miqyaslı sızması ilə bağlı cinayət istintaqı aparır. Bir çox analitik 2013-cü ildə Vikileaks ("Vikiliks") nəşrlərindən sonra sızmalar barədə ən əhəmiyyətli hadisələrdən biri kimi danışır. 

Pentaqon "sızma mənbələri və miqyası aşkarlanana qədər hər daşın üstünü altına çevirəcəyini" vəd edir. 

ABŞ müdafiə naziri Lloyd Austin bildirib: 

"Mən cavab tədbirlərimizi müzakirə etmək üçün hər gün baş departament rəhbərlərini toplayıram. Mən də təcili sahələrarası səylər barədə göstəriş verdim. Bu məsələni cinayət istintaqına başlayan Ədliyyə Nazirliyinə verdik. Ancaq biz buna çox ciddi yanaşırıq. Və Amerikanın təhlükəsizliyini təmin etməyimizə heç nə mane ola bilməz."

 

“Ədəbiyyat və incəsənət”

(13.04.2023)

Sayt Azərbaycan Respublikası Mədəniyyət Nazirliyi tərəfindən 2024-cü ildə “Qeyri-hökumət təşkilatları üçün qrant müsabiqəsi” çərçivəsində Azərbaycan Ədəbiyyat Fondunun həyata keçirdiyi “Yeniyetmə və gənclərdə mütaliə mədəniyyətinin formalaşdırılması” layihəsinin tərəfdaşı olaraq yenilənmiş, yeni bölmələr əlavə ediımiş, layihənin təbliği üzrə funksional fəaliyyət aparılmışdır.