Bəzi gənclərimiz o qədər layiqli ömür sürür, elə inamla hədəfə doğru gəlirlərsə, onları mütləq hamıya örnək kimi göstərmək lazım olur. Onlardan biri - Azərbaycan Universitetləri üzrə 2023-cü ilin ən yaxşı tələbələrindən biri - Arzu Alxanova! 

“Ədəbiyyat və incəsənət” portalı Azərbaycan Universitetləri sosial media səhifəsinə istinadən xəbər verir ki, Arzu Alxanova Bakı Mühəndislik Universitetinin Pedaqoji fakültəsini 99,17 balla bitirib. Özü də tədrisi ingilis dilində alıb. 

Arzu BMU-ya yüksək 611 balla daxil olmuşdu.

Bəziləri anlamaq istəmir ki, yaxşı oxumaq, əla qiymətlər almaq gələcəyinə qoyduğun ən böyük kapitaldır. Və bu kapital hətta elə tədris dövründə də ikiqat gəlirə çevrilə bilər.

Arzu Alxanova ABŞ-ın Şimali Karolina Dövlət Universitetinin birbaşa doktorantura səviyyəsinə qəbul olub. Həm də illik 55.000 ABŞ dolları məbləğində tam təqaüdlə.

Təbrik edirik! Qürur duyuruq!

Və hamıya örnək gətiririk!

“Ədəbiyyat və incəsənət”

(07.06.2023)

Günün ən çox oxunan mədəniyyət xəbəri: Ölmədik, bu günü də gördük, Cənubi Koreyanın Seul şəhərində keçirilən konsertdə orkestri EveR-6 adlı android robot idarə edib.

“Ədəbiyyat və incəsənət” Weekly-yə istinadən xəbər verir ki, Koreya Qabaqcıl Elm və Texnologiyalar İnstitutu tərəfindən hazırlanmış insanabənzər android robotun Koreya Milli Teatrında orkestrə dirijorluq etməsi dünya mədəniyyəti tarixinə ilk belə hadisə kimi düşüb. Bəli, yavaş-yavaş “bir azdan mədəniyyəti də süni intellektlər yaradacaq” fikri özünü doğrultmağa başlayır. 

Qeyd edək ki, robot dirijor maneralarını gözəl mənimsəyib. Onun çıxışdan əvvəl  tamaşaçılara baş əyərək, konsertdə dirijor kimi dəqiqliklə çıxışı böyük maraq doğurub və alqışlarla qarşılanıb.

Konservatorlar yəqin ki, bu xəbəri oxuduqdan sonra belə deyəcəklər: Allah, sən saxla!

“Ədəbiyyat və incəsənət”

(07.07.2023)

TÜRKSOY tərəfindən 2023-cü ilin Şuşanın “Türk dünyasının mədəniyyət paytaxtı” elan edilməsi ilə əlaqədar  “Heydər Əliyev və Türk dünyası”, “Heydər Əliyev və Özbəkistan” adlı nominasiyalar müsabiqədə yer alıb və bu nominasiya üzrə Azərbaycanın qədim şəhəri, Qarabağın mərkəzi, mədəniyyət paytaxtımız Şuşa şəhəri, onun tarixi, mədəniyyəti, turizm ehtiyatları, tanınmış şuşalılar, milli-mədəni irsimizin dağıdılması, Şuşanın məşhur abidələri, şəhərin Azərbaycan mədəniyyətinə verdiyi töhfələr və s. barədə məqalələr təqdim oluna bilər. 

“Ədəbiyyat və incəsənət” portalı xəbər verir ki, Özbəkistandakı Heydər Əliyev adına Azərbaycan Mədəniyyət Mərkəzi də bu layihələrə meydan verəcək. 

Mərkəz 2023-cü il üzrə Özbəkistan mətbuatı, ictimaiyyəti arasında ölkələrimiz və xalqlarımız arasında tarixi dostluq və əməkdaşlığa dair müsabiqə elan edib.

2023-cü ilin Prezidenti İlham Əliyev tərəfindən ölkəmizdə “Heydər Əliyev İli” elan edilməsi ilə əlaqədar Azərbaycan Mədəniyyət Mərkəzi tərəfindən Özbəkistanda silsilə tədbirlərin və layihələrin həyata keçirilməsi plandaşdırılır. Bununla əlaqədar, Mərkəz müsabiqəyə TÜRKSOY-un planladığı “Heydər Əliyev və Türk dünyası”, “Heydər Əliyev və Özbəkistan” adlı nominasiyaları daxil edib.

Bu barədə Özbəkistandakı Heydər Əliyev adına Azərbaycan Mədəniyyət Mərkəzindən  məlumat verilib.

Mərkəzdən bildirilib ki, Azərbaycan ordusunun rəşadəti, Ali Baş Komandan, Prezident İlham Əliyevin uğurlu siyasəti nəticəsində Şuşanın azad olunması, işğaldan qurtarılmış Azərbaycan ərazilərində bərpa və quruculuq işləri, dinc əhalinin öz yurd yerlərinə qayıdışına dair məqalələrə, televiziya verilişlərinə nominasiyada üstünlük veriləcəkdir.

Həmçinin Özbəkistan Respublikasında 2023-cü il Prezident Şavkat Mirziyoyev tərəfindən “İnsanlara diqqət və keyfiyyətli təhsil ili” elan olunduğundan bu mövzuda müsabiqəyə nominasiya əlavə edilib.

Nominasiyalar arasında Azərbaycan-Özbəkistan dostluğu, əməkdaşlığı, tarixi əlaqələri, dövlətlərimizin strateji müttəfiqliyi mövzusu da yer alıb. 

Müsabiqədə sadalanan mövzular üzrə “məqalələr”, “televiziya verilişləri”, “sənədli filmlər”, “tərcümə əsərlər”i, habelə “Azərbaycan və Özbəkistan haqqında ən çox materiallar dərc edən mətbu orqanlar (qəzet, jurnal, sayt, televiziya kanalı)”, dostluq və əməkdaşlığımızı fəal təbliğ edən dövlət və ictimaiyyət nümayəndələri Azərbaycan Mədəniyyət Mərkəzinin fəxri diplom və pul mükafatlarına layiq görüləcəklər. 

Qeyd edək ki, müsabiqədə qalib gələn Özbək jurnalistlər ənənəvi olaraq hər ilin yay aylarında Azərbaycana təşkil olunan mediaturda iştirak etmək imkanı əldə edəcəklər.

Azərbaycan Mədəniyyət Mərkəzinin təşkilatçılığı ilə keçirilən bu mediatur zamanı Özbəkistanın aparıcı media nümayəndələri ölkəmizin paytaxtı Bakı və respublikamızın tarixi məkanları, işğaldan azad edilmiş bölgələrdə olaraq, mədəniyyət, turizm məkanlarını ziyarət edir, orada çəkilişlər aparır, xüsusi məqalələr hazırlayırlar.

Müsabiqəyə göndərilən materiallara hər iki ölkənin ictimaiyyət, mədəniyyət, mətbuat sahəsində tanınmış şəxslərin iştirak etdiyi xüsusi Təşkilat Komitəsi tərəfindən baxılır və qiymətləndirilir. Materialların qiymətləndirilməsi müstəqil ekspertlər – müvafiq sahədə zəngin bilik və təcrübəyə, ictimai nüfuza malik, müsabiqənin nəticəsində marağı olmayan peşəkar şəxslər tərəfindən həyata keçiriləcək.

Müsabiqə üçün nəzərdə tutulan materialların surəti və elektron variantı Azərbaycan Mədəniyyət Mərkəzinin Bu email ünvanı spambotlardan qorunur. Onu görmək üçün JavaScripti qoşmaq lazımdır. elektron poçtuna göndərilməsi tələb olunur. Hər jurnalist müsabiqəyə yalnız bir məqalə təqdim edə bilər. Materialların təqdim olunma müddəti elan dərc olunduğu tarixdən başlayır. Son təqdim olunma tarixi 2023-cü il noyabrın 30-na müəyyən edilib.

“Ədəbiyyat və incəsənət”

(07.07.2023)

“Ədəbiyyat və incəsənət” portalı “Qazax Xeyriyyə” İctimai Birliyinin mətbuat katibi Səbinə Yusifin Aşıq Avdı Musayevin doğum gününə həsr etdiyi yazısını təqdim edir. 

Bu gün hamımızın əzizimiz, mahalımızın sevilən Aşığı Avdı Musayevin doğum günüdür.

“Qazax" Xeyriyyə İctimai Birliyi İdarə heyətinin sədri, professor İlham Pirməmmədov, İctimai Birliyin üzvləri, Qazax mahalının ziyalıları doğum günü münasibətilə Aşıq Avdını təbrik edir, ona uzun ömür, can sağlığı, yeni-yeni yaradıcılıq uğurları arzulayır.

 Aşıq Avdı 49 yaşını tamamladı. Gələn il onun 50 yaşı tamam olacaq.  "Qazax" Xeyriyyə İctimai Birliyinin tədbirlər planına əsasən noyabr ayında yazıçı-publisist, uzun illər "Qazax" Xeyriyyə İctimai Birliyinin mətbu orqanı olan "Dəli Kür" qəzetinin redaktoru olmuş Fəridə Ləmanın 70 illik yubileyi, gələn il Rafail İncəyurdun 70 illik və Aşıq Avdı Musayevin 50 illik yubileyləri keçiriləcək.

"Qazax" Xeyriyyə İctimai Birliyinin və Qazax RİH-nin birgə tədbirlər planına əsasən Fəridə Ləmanın, Rafail İncəyurdun, Avdı Musayevin yubileyləri həm də Qazax rayonunda keçiriləcəkdir.

Var olsunlar elimizi, obamızı ucaldanlar.

“Ədəbiyyat və incəsənət”

(06.07.2023)

Yazıçı - publisist, tarixi romanlar yazarı Yunus Oğuzun yeni kitabı işıq üzü görüb.

“Ədəbiyyat və incəsənət” portalı xəbər verir ki, müəllifin  müxtəlif  illərdə  yazdığı felyetonları “Deyirəm oyan, gözünü aç, ayağa dur!  İstəmir" bölümü, esseləri isə "Mən Şuşada yazıram" adı ilə nəşr edilib.

“Ədəbiyyat və incəsənət”

(06.07.2023)

“Zeytun bağları” brendi və Xətai Sənət Mərkəzinin təşkilatçılığı və dəstəyi ilə yeniyetmə və gənclərin yaradıcılığını stimullaşdırmaq və gənc nəsildə ekoloji təfəkkürün inkişafı və ekoloji maarifləndirməyə xidmət məqsədilə “Təbiətimizin sovqatı” adlı respublika uşaq rəsm müsabiqəsinə əsər qəbulu davam edir. 

Yaşı  10-17 olan istedadlı gənclər və yeniyetmələr 2023-cü il avqust ayının 10-na qədər rəsm əsərini fotosu ilə bərabər əsərin adı, müəllifin soyadı, adı, təvəllüdü, təhsil aldığı məktəbi və əlaqə nömrəsini Bu email ünvanı spambotlardan qorunur. Onu görmək üçün JavaScripti qoşmaq lazımdır.   ünvanına göndərməklə müsabiqəyə qatıla bilərlər.

Ölçü və texnika sərbəstdir. Əsərlər tək-tək yerləşdirilməli, məlumatlar dolğun olmalı, ən çoxu 2 əsər göndərilməlidir. Seçim zamanı müəllifin yaşı nəzərə alınmaqla düzgün kompozisiya, rəng seçimi və uşaqların öz düşüncələri ilə işlənmiş əsərlərə üstünlük veriləcək.

Müsabiqədə xarici ölkə vətəndaşları da iştirak edə bilər. Seçim 10-17 yaş kateqoriyasında aparılacaq. Sərgilənmək üçün 150 əsər seçiləcək. Sərgilənən əsərlərin müəlliflərinə sertifikat təqdim olunacaq və “Zeytun Bağları” brendinin məhsulundan hədiyyə alacaqlar.

Sərgidən seçilmiş 30 əsərin müəllifi xüsusi hədiyyə ilə mükafatlandırılacaqlar və həmin əsərlər “Zeytun Bağları” brendinin ofisinin ekspozisiyasını bəzəmək üçün istifadə olunacaq və geri qaytarılmayacaq. Sərgi Xətai Sənət Mərkəzində keçiriləcək.

“Ədəbiyyat və incəsənət”

(06.07.2023)

Növbəti 2022-2023-cü təhsil ili arxada qaldı və Azərbaycan Universitetləri üzrə 2023-CÜ İLİN TƏLƏBƏSİ elan edildi. Bu, həmişə hər işdə öndə getməsinə alışdığımız Sumqayıt şəhərinin sakini Səbinə Feyzullayevadır.

“Ədəbiyyat və incəsənət” portalı “Azərbaycan Universitetləri” sosial şəbələ səhifəsinə istinadən xəbər verir ki, 4 yaşında səlis oxumağı və yazmağı bacaran, 5 yaşında ingilis dilini öyrənməyə başlayan vunderkind Səbinə Feyzullayeva Azərbaycan Tibb Universitetini 98,21 balla bitirib. 

O, 6 il öncə Sumqayıtdakı Təbiət Elmləri Təmayüllü Gimnaziyanı qızıl medalla bitirərək 690 balla ATU-nu seçib. Prezident təqaüdçüsü olub və 6 il ərzində ən yüksək akademik göstəricilərlə Prezident təqaüdü statusunu özündə saxlamağı bacarıb. 

Səbinə Feyzullayeva iş və təhsil karyerasını Almaniyada davam etdirəcək.

Təbrik edirik! Qürur duyuruq!

“Ədəbiyyat və incəsənət”

(06.07.2023)

TÜRKSOY MUSİQİÇİLƏRƏ HƏDİYYƏLƏR TƏQDİM EDİB

Şəki “İpək Yolu” XII Beynəlxalq Musiqi Festivalı üçüncü gündür ki, musiqisevərləri, şəhərin qonaqlarını maraqlı konsert proqramları ilə sevindirir. Və festival barədə sizləri məlumatlandırırıq.

Festival çərçivəsində iyulun 5-də “Marxal” kompleksinin Yay Teatrında Qazaxıstan Respublikasının Ükili Ibıray adına Akmolin vilayət filarmoniyasının “Aynakol” folklor və “Qəkku” rəqs ansambllarının konserti olub. Bu barədə AzərTAC-ın bölgə müxbirinin xəbərində deyilir. 

Konsert başlamazdan əvvəl Şəki Şəhər İcra Hakimiyyətinin başçısı Elxan Usubov Türkiyənin Safranbolu bələdiyyəsinin sədri xanım Elif Köseyə festivalın xatirə hədiyyəsini təqdim edib.

Konsertin əvvəlində məlumat verilib ki, Qazaxıstanın Akmolin vilayətinin ən parlaq musiqi kollektivlərindən olan “Aynakol” folklor ansamblı 2004-cü ildə vilayət filarmoniyasının bazasında yaradılıb. Ansambl istedadlı və peşəkar musiqiçilərdən ibarətdir. Kollektivin özünəməxsus bədii üslubu, ifa tərzi, zəngin və orijinal repertuarı var. “Aynakol”un qastrol xəritəsi də zəngindir. Almaniya, Türkiyə, Çin, Tayvan, Rusiya, Baltikyanı ölkələrin dinləyiciləri ansamblın yaradıcılığından zövq alıblar. Ansambl 2005-ci ildən başlayaraq bir çox beynəlxalq festivalların, müsabiqələrin iştirakçısı və laureatıdır. 

Həmçinin diqqətə çatdırılıb ki, Akmolin vilayətinin incisi olan “Qəkku” rəqs ansamblı 2007-ci ildə Mədinə Tleulina tərəfindən yaradılıb. Kokşetau şəhərində yeganə peşəkar xoreoqrafiya qrupu olan ansamblın 2008-ci ildən daimi rəhbəri Gülmira Ordabayevadır. Ansamblın heyətini təcrübəli rəqqaslar təşkil edir. Kollektiv peşəkar rəqs ansamblı, eyni zamanda, Kokşetau rayonunun mədəniyyət kollecinin xoreoqrafiya şöbəsinin məzunlarını öz sıralarına cəlb edir.

“Qəkku”nun əsas missiyası rəqsə məhəbbəti aşılamaq və bunun vasitəsilə nəinki qazax mədəni irsini, həmçinin dünya xalqlarının rəqslərini öyrənməkdir. Ansamblın repertuarı çox zəngin və rəngarəngdir. Repertuara incə bal rəqsləri və nəfis tarixi əsərlər, xalqın alovlu ritmləri, oynaq estrada rəqsləri, vətənpərvərlik mövzusunda hərbi tamaşalar və unudulmaz rəqs kompozisiyaları daxildir. Ansambl, həmçinin klassik əsərlərin musiqisi üzərində qurulmuş bir çox xoreoqrafik kompozisiyalar nümayiş etdirib. Əllidən çox tamaşası olan kollektiv çoxsaylı mükafat və nailiyyətləri ilə seçilir. Ansambl Qazaxıstanın mədəni irsinin təbliğatçısı kimi, bir çox yerli, respublika əhəmiyyətli və mötəbər beynəlxalq festival və müsabiqələrin iştirakçısı və qalibi olub.

“Aynakol” folklor və “Qəkku” rəqs ansambllarının çıxışı tamaşaçılar tərəfindən böyük maraqla qarşılanıb.

Konsertin sonunda Şəki Şəhər İcra Hakimiyyətinin başçısı Elxan Usubov kollektivin rəhbəri xanım Nurgul Şaikenovaya festivalın simvolunu təqdim edib. Eyni zamanda, Azərbaycanın TÜRKSOY təşkilatındakı nümayəndəsi Elçin Qafarlı tərəfindən folklor və rəqs ansambllarının rəhbərlərinə xatirə hədiyyələri təqdim olunub.

“Ədəbiyyat və incəsənət”

(06.07.2023)

Azərbaycan poeziyasından bir Akif Səməd də keçib. 2004-cü il iyulun 6-da vəfat edib bu gözəl şairimiz. Kulis.az Ulucay Akifin atası Akif Səmədin anım günü münasibətilə yazdığı "Atamın öldüyü gün" yazısını təqdim edib. “Ədəbiyyat və incəsənət” yazını  oxucularına təqdim edir, Akif Səmədə “Allah rəhmət eləsin” deyir. 

Bu gün atamın öldüyü gündür. Yəni ən çox ağladığım gün.

Həmin gün həmişə mənimlədir. Hər yerdə, hər an... Ən xoş günümdə belə...

Qardaşım, bacılarım... Cizgi filminə baxırdıq o gün. Anam bazardaydı.

Ev telefonumuza zəng gəldi.

Dəstəyi qardaşım götürdü...

Qardaşımın üzü... O ifadə... "Papa ölüb, gətirirlər" – dedi.

Bacılarımın təlaşı...

Özümü xatırlamıram.

Balaca idik, bapbalaca...

"Ölməyib, yalan deyirlər"

"Bəlkə, kimsə zarafat eləyir?"

"Mama gəlsin, biləcəyik də…"

Həmin cizgi filmini də xatırlayıram: "Casper" – ruh haqqında cizgi filmi.

19 il...

Dördbucaqlı stolun baş tərəfində həmişə atam oturardı. O gündən sonra masadakı yeri boş qaldı. Heç vaxt onun yerində oturmadıq.

İşlətmədik, işlətmədik, televizorumuz da xarab oldu.

Bir dəfə unutdum, atamın yerində oturdum, bacım yaman əsəbiləşdi, üstümə qışqırdı… Sonra o biri bacımı çağırdı. Böyük bacım aranı sakitləşdirdi.

Bir müddətdən sonra anam qardaşıma dedi ki, keç otur atanın yerində. Qardaşımı atamın yerində görüncə sevindim.

Əvvəl atam tez-tez yuxuma girirdi. Həmişə mənə yol göstərirdi. Mən də onun məsləhətlərinə uyğun qərar verirdim, sözləriylə toxtayırdım.

Çoxdandır, atam yuxuma gəlmir. 10 il olar… Niyə belə edir, bilmirəm.

Və mən onun üçün darıxıram...

“Ədəbiyyat və incəsənət”

(06.07.2023)