Super User
Bu gün Xətai Sənət Mərkəzində “Su və rəng ahəngi-2022” adlı akvarel sərgisi açılacaq
Bu gün “IWS Azerbaijan” və Xətai Sənət Mərkəzinin təşkilatçılığı ilə “Su və rəng ahəngi-2022” adlı növbəti akvarel sərgisi açılacaq.
Xətai Sənət Mərkəzində açılacaq sərgi Mədəniyyət Nazirliyi, Azərbaycan Rəssamlar İttifaqı və Azərbaycan Dövlət Rəsm Qalereyasının dəstəyi ilə reallaşacaq.
Qeyd edək ki, sərgiyə 250-dən çox işlə 100-dən çox rəssam müraciət edib ki, bunlardan da 76 rəssamın 100 əsəri seçilib.
“Ədəbiyyat və incəsənət” (03.12.2022)
Qazıntılar zamanı tapılan qəbrin Şəki xanına məxsus olduğu təsdiqlənib
Şəki Xan məscidi kompleksində bərpa işləri çərçivəsində aparılan qazıntılar zamanı tapılan qəbrin Şəki xanına məxsus olduğu təsdiqlənib.
“Ədəbiyyat və incəsənət” portalı xəbər verir ki, Trend-in məlumatına görə, bu barədə Heydər Əliyev Fondunun dəstəyi ilə Avstriya, Böyük Britaniya, Estoniya və Türkiyədə aparılan tədqiqatlar və genetik analizlərin nəticələri, AMEA Arxeologiya, Etnoqrafiya və Antropologiya İnstitutunun elmi rəyi deməyə əsas verir.
Belə ki, 2021-ci ilin may ayından etibarən Heydər Əliyev Fondu tərəfindən Şəki Xan məscidi kompleksində bərpa işlərinə başlanılıb.
Bərpa işləri zamanı 2021-ci ilin iyun ayında mehrabın altı qazılarkən oradan böyük ölçülü sal daşları aşkar olunub. O zaman həmin hissədə bərpa işləri dayandırılıb və Şəki arxeoloji ekspedisiyası tərəfindən yoxlamalar aparılıb, ekspedisiyanın apardığı tədqiqat və qazıntı işləri nəticəsində həmin hissədən qəbir aşkar olunub.
Qəbirdən 52 muncuq və tunc təsbeh başlığının tapılması dəfn olunanın yüksək dini və ya dövlət statuslu şəxs olması ehtimalını yaradırdı. Bu ehtimallar, eləcə də Salman Mümtazın əsərində Şəki xanı Məhəmmədhüseyn xan Müştağın Xan məscidinin mehrabının altında dəfn olunmasına dair qeydlərin olması əsas götürülməklə aşkarlanan tapıntılar üzrə yoxlamalar aparılmışdı.
Heydər Əliyev Fondunun dəstəyi ilə aşkar olunan skeletdən nümunələr götürülmüş, radiokarbon və genetik analizlər aparmaq üçün Böyük Britaniyanın Oksford Universitetinin laboratoriyasına göndərilmişdi. Aşkar olunan skelet nümunələri və məscid ərazisindəki xan nəslinə aid digər qəbirlərdən götürülən nümunələr əsasında Böyük Britaniya ilə yanaşı, Avstriya, Estoniya və Türkiyədə də tədqiqatlar və genetik analizlər aparılıb. Laborator analizlərin nəticəsinə, eləcə də AMEA Arxeologiya, Etnoqrafiya və Antropologiya İnstitutunun elmi rəyinə əsasən, aşkar edilən qəbir Şəki xanı Məhəmmədhüseyn xana aiddir.
“Ədəbiyyat və incəsənət” (03.12.2022)
Baba Vəziroğlu efirdə dava salan qardaşından danışdı: “Onun yerində olsaydım...”
“İnsanlar bu mövzuda mənim adımı niyə hallandırırlar ki? Anar mənim bağçaya gedən uşağımdır, ya orta məktəbdə oxuyan şagirdimdir? Anar Vəziroğlu bəlli yaşı olan müstəqil bir insandır...”
“Ədəbiyyat və incəsənət” portalı xəbər verir ki, bu sözləri Yenisabah.az-a Əməkdar incəsənət xadimi, şair Baba Vəziroğlu deyib. Qardaşı Anar Vəziroğlunun canlı efirdə vəkil Şəfiqə Nağıyeva ilə qalmaqalından danışan şair qardaşının artıq müstəqil insan olduğunu bildirib:
“Efirdə hər şey mümkündür. Hələ Rusiya telekanallarını izləsəniz, görərsiniz ki, orada insanlar bir-birini necə şapalaqlayırlar. Efirdə hər şey olur, amma hər adam bunu özünə rəva görürmü? Bu artıq ayrı məsələdir. Mən elə verilişlərə getmirəm, heç baxmıram da. Dünən mənə də dedilər ki, belə bir hadisə baş verib. Əvvəllər mənə deyirdilər ki, qardaşın belə bir çıxış edib, mənsə cavab verirdim ki, bunu mənə deməyin, nə sözünüz varsa, yığıb özünə deyin.
Aralarında nə olub, bilmirəm, amma mən Şəfiqə Nağıyevanı normal bir vəkil kimi tanıyırdım. Bilmirəm, aralarında nə baş verib ki, bu səviyyəyə qədər gəliblər. Bəlkə də, televiziyaya xoş olmaq üçün ediblər. Çünki telekanallar bundan reytinq qazanırlar. Necə ki, keçmişdə xoruz döyüşdürürdülər, millət yığılırdı, indi telekanallar da bu metoddan istifadə edirlər”.
B.Vəziroğlu sosial mövzulu verilişlərə də, orada ekspert qismində çıxış edənlərə də pis baxdığını açıqlayıb:
“Açığı, mən bu ekspertlərə, verilişlərə pis baxıram. Çünki mən heç vaxt özümü səlahiyyətli saymaram ki, kiməsə ağıl verib, yol göstərim. Özü də o verilişlərdə böyük məsələlərdən söz açılmır, birinə deyirlər, niyə arvadını boşamısan, birinə deyirlər, niyə ərini, uşaqlarını qoyub qaçmısan, uşaqların haradadırlar? Mənim nə ixtiyarım var ki, kiməsə deyim, niyə arvadını boşamısan? Heç dəxli var? Hətta verilişlərin birində bizim ağsaqqal bir dostumuz ekspert kimi oturmuşdu, ora bir xanım gəlmişdi, deyirdi ki, hamiləyəm, bu uşağı məhv edim, ya doğum, bilmirəm. Çox qocaman sənətçimiz də bir saat efirdə bunu müzakirə etdi, gah dedi, doğ, gah dedi, yox, doğma. Mən artıq belə şeylərə gülürəm. Həm də bilirəm ki, televiziyalar bundan reytinq tutur. Görürsünüz ki, bu cür qalmaqallar efirə gedir. Redaktor bunları efirə buraxır”.
Qalmaqaldan danışan şair qeyd edib ki, özü heç vaxt bir qadına qarşı bunu etməzdi:
“Bu tip qalmaqalların hamısı efirə gedir, Anar, Şəfiqə kimi insanlar da bilə-bilə bunu edirlər, bunlar da bu cür reytinq qazanırlar. Başım çıxmır, reytinq davası gedir. Nə bilim, vallah, məşhur bir məsəl var, hər qoyunu öz ayağından asırlar. Anar uşaq deyil ki, qoyum qabağıma, başlayım danlamağa. Dostum deyil ki, deyim, belə etmə, bu sənə hörmət gətirməz-filan. Bilirsiniz, qardaş ayrı şeydir, dost ayrı.
Deyirlər, üstünə su atıb. Mənim üstümə nəinki su, yekə qara daş da atsaydılar, mən qadına eynisini etməzdim. Çünki kişinin özəlliyi odur ki, qadının hər etdiyinə cavab verməsin. Onların söylədiklərini bir az boş vermək lazımdır. Məşhur rus yazıçılarından birinin belə bir sözü var, qadınla mübarizə, mücadilə aparmaq küçəni balaca elektrik sobası ilə qızdırmaq qədər faydasız və mənasızdır. Yəni onları boş buraxmaq, reallıqla barışmaq lazımdır”.
“Ədəbiyyat və incəsənət” (03.12.2022)
“Anam içib, gecələr məni körpəmlə küçəyə atırdı” etirafı birmənalı qarşılanmadı
Bu etiraf böyük tamaşaçı kütləsinin və sosial media istifadəçinin gündəmi oldu: Aktrisa Sonaxanım Əliyeva bir vaxtlar anasının ona etdiyi zülmdən danışdı, “Xəzər” televiziyasında yayınlanan “Təsir dairəsi” verilişində.
Sonaxanım anasının daim içki qəbul etdiyini və onu azyaşlı körpəsi ilə küçələrə atdığını etiraf etdi:
“Çox şeyləri burada demək istəmirəm. Körpəmin 5 yaşı var idi. Anam içki içəndə özünü itirirdi. Evdə dava-dalaş salırdı. Gecə vaxtı məni evdən qovdu. Avtomobilim var idi. Payız ayları idi. Bizi evdən çıxartdı. Mən Nərgizi arxa oturacaqda uzatdım, yatdı”.
Xatırladaq ki, aktrisanın anası Mina bu ilin yanvarında vəfat edib. Çoxları aktrisanın bi etirafını etik normadan kənar da hesab edirlər. Rəhmətə getmiş insan haqqında bunları danışmağın axı nə faydası?
“Ədəbiyyat və incəsənət” (03.12.2022)
Dünya Gənc Türk Yazarlar Birliyi bu gün kitab təqdimatı keçirəcək
Azərbaycan Respublikasının Gənclər və İdman Nazirliyinin dəstəyi ilə Dünya Gənc Türk Yazarlar Birliyi tərəfindən çap olunmuş "Türk dünyası gəncləri-Nizami Gəncəvi dühası" kitabının təqdimatı keçiriləcək.
Tədbir Gəncliyə Yardım Fondunun konfrans zalında (Cəfərov qardaşları küçəsi 16, Tarixi Təzəbəy hamam kompleksinin yaxınlığı) baş tutacaq.
Proqramda kitabın təqdimatı, müzakirələr, təltiflər, kofe-çay fasiləsi nəzərdə tutulur.
“Ədəbiyyat və incəsənət” (03.12.2022)
Kəlağayı ustaları sabah Bakıya toplaşacaq
Bu gün Bakıda “Kəlağayı festivalı” təşkil olunacaq. Nigar Rəfibəyli 12/14 ünvanında keçiriləcək festival Azərbaycan Sənətkarları Birliyinin təşkilatçılığı ilə reallaşacaq.
Bu barədə mediaya festivalın təşkilatçısı Ella Bağırova məlumat verib.
Festival çərçivəsində Azərbaycan sənətkarlarının əl işlərindən ibarət sərgi açılacaq.
Həmçinin böyüklər və uşaqlar üçün “Dulusçuluq”, “Ebru” (su üzərində rəsm), “İpək üzərində naxış basma” və “Florarium”ə həsr edilmiş ustad dərsləri keçiriləcək.
Festivala ölkəmizin fərqli guşələrindən 200-dək sənətkar qatılacaq. Onlar burada əl işlərini sərgiləyəcəklər.
İki gün davam edəcək festivala hər kəsin qatılmaq imkanı var.
“Ədəbiyyat və incəsənət” (03.12.2022)
İlin sonunadək Kukla Teatrında iki premyera olacaq
Abdulla Şaiq adına Azərbaycan Dövlət Kukla Teatrı bu ilin sonunadək iki premyera ilə uşaqların görüşünə gələcək.
Dekabrın 10-da “Məlikməmməd” şərti adı ilə musiqili tamaşa azyaşlı seyrçilərin ixtiyarına veriləcək. Tamaşanın quruluşçu rejissoru Anar Məmmədovdur.
Teatrın səhnəsində növbəti premyera Səidə Haqverdiyevanın quruluşunda “Üç donuz balası” tamaşası olacaq.
Hər iki tamaşanın quruluşçu rəssamı İqbal Əliyev, bəstəkarı Vüqar Camalzadədir.
Bundan başqa uşaqlar üçün Hans Xristian Andersenin “Qar kraliçası” nağılı əsasında “Qar kraliçasının yeni il sərgüzəştləri” adlı Yeni il şənliyi təşkil olunacaq. Uşaqların sevimlisi Qar qızı onları darıxmağa qoymayacaq.
“Ədəbiyyat və incəsənət” (03.12.2022)
BMA-da növbəti beynəlxalq konfrans keçirilib - Şərq və Qərb musiqi mədəniyyətlərinin dialoqu
Üzeyir Hacıbəyli adına Bakı Musiqi Akademiyasında (BMA) “Şərq və Qərb musiqi mədəniyyətlərinin dialoqu” mövzusunda ikinci beynəlxalq elmi-praktiki konfrans keçirilib.
BMA-ın mediaya açıqlamasına görə, akademiyanın tarix-nəzəriyyə fakültəsinin dekanı Gülzar Mahmudovanın, həmçinin Azərbaycan Ənənəvi musiqisi və Müasir texnologiyalar kafedrasının müdiri Tariyel Məmmədovun təşəbbüsü ilə təşkil olunan konfransda Xalq artisti, Bakı Musiqi Akademiyasının rektoru Fərhad Bədəlbəyli elmi müşavirəni açıq elan edərək iştirakçılara uğur arzulayıb.
Moskva Dövlət Konservatoriyasının elmi işlər üzrə prorektoru, musiqişünas Konstantin Zenkin konfransda iştirakından məmnun olduğunu bildirərək, Üzeyir Hacıbəyli ənənələrinin çağdaş zamanda qorunub saxlanılmasının sevindirici hal olduğunu bildirib. O, paytaxt Bakını Şərqdə elm, yaradıcılıq mərkəzi kimi qiymətləndirib.
BMA-nın tədris işləri üzrə prorektor, Əməkdar müəllim Nərminə Quliyeva Beynəlxalq Elmi-praktiki konfrans çərçivəsində tarixçi alim Teymur Atayevin rus dilində nəşr edilmiş "Последние сочинения Димитрия Шостаковича: осмысление жизненного пути" (Dimitri Şostakoviçin son bəstələri: həyat yolunu dərk etmək) adlı kitabını iştirakçılara təqdim edib.
Həmçinin musiqi tarixi kafedrasının müdiri Ülviyyə İmanova və dosent İnna Pazıçeva görkəmli bəstəkar D.Şostakoviçin yaradıcılığı haqqında məlumat verərək, onun zəngin musiqi ideyası ilə mədəniyyət tarixinə verdiyi töhfələrdən bəhs ediblər.
Digər professorlar və tədqiqatçılar tarixçi alim Teymur Atayevə kitabın ərsəyə gəlməsində əməyinə görə minnətdarlıqlarını bildiriblər.
Sonra Bakı Musiqi Akademiyasının İfaçılıq fakültəsinin tələbələri dahi bəstəkar Dimitri Şostakoviçin simli kvartet üçün "Zarafat" əsərini səsləndiriblər.
“Ədəbiyyat və incəsənət” (03.12.2022)
Ciddə şəhərində Qırmızı dəniz Film Festivalı start götürüb
Səudiyyə Ərəbistanının Ciddə şəhərində start götürən Qırmızı dəniz Film Festivalında 61 ölkədə istehsal olunmuş 131 tammetrajlı və qısametrajlı ekran əsəri 41 dildə subtitrlə nümayiş etdirilir. Səudiyyə Ərəbistanının kinematoqrafçıları ilk dəfə festivala 25 bədii və sənədli film təqdim ediblər.
Qeyd edək ki, Qırmızı dəniz Film Festivalının açılış mərasimi Hollivud və Bollivud ulduzlarının iştirakı ilə daha möhtəşəm olub.
“Əl Ərəbiyə” telekanalı xəbər verir ki, festivalın açılış mərasimində məşhur aktrisalar Şeron Stoun və Priyanka Çopra, kinorejissor Oliver Stoun, aktyor Şahrux Xan, habelə Səudiyyə Ərəbistanı, Misir, Livan və digər ərəb ölkələrinin ulduzları qırmızı xalının üzərinə çıxıblar.
Dekabrın 10-dək davam edəcək kinofestival çərçivəsində Qırmızı dəniz Ticarət Sərgisi də təşkil olunacaq.
“Ədəbiyyat və incəsənət” (03.12.2022)
Dünyanı yenidən, özü də fərqli görmək konsepsiyası boyaların dili ilə
Türkiyənin 17 rəssamının “Multiperspektivdə” adlı qrup sərgisi maraqla izlənilməkdədir
Xəbər verdiyimiz kimi, YARAT Müasir İncəsənət Məkanı “Multiperspektivdə” adlı 17 türkiyəli rəssamın yeni qrup sərgisini təqdim edib. Sərgidə Setenay Alpsoy, Selçuk Artut, Vahap Avşar, Osman Bozkurt, İpek Duben, Işıl Eğrikavuk və Jozef E.Amado, Nezaket Ekici, Cevdet Erek, Ahmet Rüstem Ekici və Hakan Sorar, Özlem Günyol və Mustafa Kunt, Hakan Gürsoytrak, Ali Kazma, Serhat Kiraz və Seyhun Topuzun son illər yaratdıqları əsərləri yer alıb.
YARAT-ın baş kuratoru Fərəh Ələkbərli sərginin konsepti barədə mediaya belə bir açıqlama verib: “Multiperspektiv anlayışı insanların əsrlər boyu müstəvi üzərində təsvir etdikləri dünyanı üçölçülü səviyyəyə çatdıran bir düşüncə tərzidir. Bu günün özündə belə primitiv düşünən, hadisələrə səthi yanaşan insanlar çox zaman yanlış qərarlar qəbul edir. Sərginin ən ümdə məqsədi insan zəkasını müstəviyə müxtəlif görmə bucaqlarından yanaşmağa çağırış etməkdir”.
Sərginin kuratoru Fırat Arapoğlu “Multiperspektivdə” sərgisinin 1 ilə ərsəyə gəldiyini söyləyib. Bildirib ki, sərgidə bir qrup türk sənətçilərinin çoxperspektivlik mövzusuna fokuslanan əsərləri nümayiş olunur.
Sərgidə diqqət çəkən əsərlərdən biri də Serbiyanın konseptual və performans rəssamı Marina Abramoviçin tələbəsi olmuş Türkiyə əsilli Nəzakət Ekicinin göstərdiyi üç saatlıq performansdır. Sənətçi daş üzərində öz konturlarını cızdıqca üst-üstə geyindiyi 7 ədəd paltarı bir-bir əynindən çıxarır. Hərəkətsiz vəziyyətdə üzündəki donmuş mimika ilə tamaşaçılar arasında əlaqə yaradır, sonra performansı davam etdirir. Sonda o, Qobustandakı qayaüstü rəsmlərə istinad edərək öz çılpaq imicini ortaya qoyur.
Sərgi dünyanı təsvir etmək, onu yenidən qavramaq və habelə hadisələrin necə baş verdiyini izah etmək üçün vertikal metaforalardan istifadə olunur.”
“Ədəbiyyat və incəsənət” portalı xəbər verir ki, bu müxtəlif aspektlər və onlar arasındakı təzadların nümayişi sayılacaq sərgidə film nümayişi, panel müzakirələri də baş tutacaq, mühazirələrdən ibarət geniş ictimai proqram müzakirəsi təşkil olunacaq.
Bu gün sürətli urbanizasiyanı yaşayan dünyaya vertikal baxmaq nə məna kəsb edir? Yerin vertikal quruluşunu necə anlamaq olar? Son zamanlara qədər bizim dünyəvi biliklərimizdə üfüqi perspektiv üstünlük təşkil edirdi, ona görə də coğrafiya düz səthi xəritələrdə göstərilirdi. Geosiyasət anlayışı xəritələr və qlobuslar üzərində təşkil edilmiş ənənəvi milli dövlətlərə aiddir.
Müasir milli dövlətləri, coğrafi və geosiyasi elmləri formalaşdırmaq üçün xətti perspektiv zəruri idi. Coğrafiya və geosiyasət dövlətlərin üfüqi dünyagörüşündə regional güc və ərazi uğrunda necə mübarizə apardıqlarını izah edirdi. Belə bir perspektiv dünyanın üçölçülü quruluşunu nəzərə almır. İncəsənət, memarlıq və geologiyada bununla bağlı müzakirələr aparılsa da, gündəmdə hələ də xətti perspektiv mövzusu üstünlük təşkil edir.
İngilis coğrafiyaşünası Dorin Massi 1994-cü ildə yazırdı ki, "xəritədə sərhədlər yerləri müəyyən etmir". Əslində, onlar "sosial münasibətlərdə və şəbəkələrin anlamasında ifadə olunan məqamlardır". Çağımızda bu münasibətlərin əksəriyyəti kiçik yerlərdən keçir. "Multiperspektivdə" isə onların dünya miqyasında bir-biri ilə qarşılıqlı və vertikal şəkildə təşkil olunmuş əlaqələrinə əla nümunədir. Sərgi insan təcrübəsi ilə sıx şəkildə üst-üstə düşən material və coğrafi baxımından multiperspektiv formaları araşdırır. Vertikal və digər məkan metaforaları ünsiyyəti yenidən qurub yaratmaq üçün işləyir; vertikal birbaşa sosial həyatın fiziki təcrübəsindən irəli gəlir və insanların sosial və siyasi dünyanı necə qavramasına və formalaşmasına fəal təsir göstərir.
Konseptual olaraq, sərgi sürətlə urbanizasiyalaşan dünyamızın siyasi, sosial və şəhər mübarizəsini belə çoxölçülü və tənqidi perspektivdən təqdim edir. Sərgi bütün hadisə, mühit və dünyaları təsvir etmək, təcrübədən keçirmək və təhlil etmək, habelə bunun necə baş verdiyini problem kimi vurğulamaq üçün vertikal metaforalardan istifadə edir. Biz buna nail olduqda, bu, şəhərə, siyasətə, həyata və coğrafiyaya tənqidi, vertikal və həqiqətən də hərtərəfli baxışlarımızı inkişaf etdirərək "dünyanı yenidən görməyə" imkan verəcək.”
Qeyd edək ki, 2023-cü il aprelin 30-dək davam edəcək sərgidə film nümayişi, panel müzakirələri və mühazirələr təşkil olunacaq.
Şəkildə:
Nəzakət Ekicinin göstərdiyi üç saatlıq performansda sənətçi daş üzərində öz konturlarını cızdıqca üst-üstə geyindiyi 7 ədəd paltarı bir-bir əynindən çıxarır.
“Ədəbiyyat və incəsənət” (03.12.2022)
