Bakıda “Korkut Ata” III Türk Dünyası Film Festivalı çərçivəsində Zirvə toplantısı keçirilir.

AzərTAC xəbər verir ki, festivalın məqsədi Türk dünyasının birliyini və türk xalqları arasında mədəni əməkdaşlığı inkişaf etdirmək, türk dövlətlərinin iştirakı ilə ortaq audiovizual məkan yaradaraq türk xalqlarının bu məkana inteqrasiyasına töhfə verməkdir.

Festival Azərbaycan Respublikasının Mədəniyyət Nazirliyi, Heydər Əliyev Mərkəzi, TÜRKSOY, Azərbaycan Respublikası Kino Agentliyi və Bakı Media Mərkəzinin birgə təşkilatçılığı ilə keçirilir.

Artıq üçüncü dəfə təşkil edilən festivala Azərbaycan, Türkiyə, Özbəkistan, Qazaxıstan, Qırğızıstan və Türkmənistanla yanaşı, Qaqauz Yeri (Moldova), Tatarıstan, Saxa-Yakutiya, Dağıstan (Noqay), Kabardin-Balkar, Çuvaşıstan, Qaraçay-Çərkəz, Tuva və Başqırdıstandan (Rusiya Federasiyası) 32 bədii, sənədli və animasiya filmi təqdim olunub. Filmlər oktyabrın 11-dək Nizami Kino Mərkəzində nümayiş etdiriləcək.

Qeyd edək ki, 2021-ci ildən təşkil olunan festivalın birincisi Türkiyənin İstanbul şəhərində, ikincisi isə ötən il qardaş ölkənin Bursa şəhərində keçirilib. Bu il isə ölkəmiz III “Korkut Ata” Türk Dünyası Film Festivalına ev sahibliyi edir.

“Ədəbiyyat və incəsənət”

(10.10.2023)

Bu gün Bakıda Polşa filmlərinin nümayişinə başlanılacaq.

Nizami Kino Mərkəzindən verilən məlumata görə, oktyabrın 13-dək davam edəcək nümayişlər zamanı Polşa istehsalı olan dörd film nümayiş olunacaq.

Azərbaycan dilində subtitrlə təqdim olunacaq ekran əsərləri bunlardır - “Solid Gold”, “Bread and salt”, “Filip” və “Supernova”.

“Ədəbiyyat və incəsənət”

(10.10.2023)

Oktyabrın 8-də Beynəlxalq Muğam Mərkəzində Dağıstan xalqının böyük oğlu, şair, yazıçı, ictimai xadim, Dağıstanın Xalq şairi Rəsul Həmzətovun adadan olmasının 100 illiyinə həsr edilmiş təntənəli konsert olub. Tədbir Beynəlxalq Muğam Mərkəzi və Dağıstan Respublikası Mədəniyyət Nazirliyinin dəstəyi ilə Bakıdakı Rus evi tərəfindən təşkil olunub.

Rəsul Həmzətov Azərbaycanın böyük dostu idi və öz şeirlərində dəfələrlə xalqlarımızın dostluğunu tərənnüm edib. O, Azərbaycan şairi, dramaturq və ictimai xadim, Xalq şairi Səməd Vurğunu özünün böyük yoldaşı və müəllimi adlandırırdı. Rəsul Həmzətovun yaradıcılığına sevgi və ehtiram bu gün də azərbaycanlıların qəlbində yaşayır.

AzərTAC xəbər verir ki, tədbirə gələnlər arasında bir sıra ölkələrin diplomatik korpuslarının rəhbərləri, Azərbaycanın nazirlikləri və idarələrinin nümayəndələri, mədəniyyət və incəsənət xadimləri, ölkəmizin dini təşkilatları və təhsil müəssisələrinin təmsilçiləri olublar. Tamaşaçılar konsertlə yanaşı, Mərkəzin foyesində Rəsul Həmzətovun 100 illiyi münasibətilə təşkil olunmuş fotosərgiyə də baxıblar.

Konsert proqramında çıxış edən artistlər arasında Dağıstan Dövlət Filarmoniyasının solisti Xirindu Sultanova, Azərbaycanın Xalq artisti Lyudmila Duxovnaya, Azərbaycan Dövlət Akademik Musiqili Teatrının solisti Firuz Məmmədov, Azərbaycan Dövlət Akademik Opera və Balet Teatrının solisti Yefim Zavalnı, “O2” teatrının aktyoru Yevgeni Maksimov və başqaları olublar.

Konsert proqramının müəllifi, quruluşçu rejissoru və aparıcısı qismində Rus evinin mədəniyyət layihələrinin kuratoru, “Görüş yeri Bakıdır” Beynəlxalq incəsənət festivalının vitse-prezidenti Vəfa Qavrilova çıxış edib.

Xirindu Sultanova tədbirlə bağlı təəssüratlarını AZƏRTAC-ın müxbiri ilə bölüşüb.

-Xirindu, konsertdən hansı təəssüratla ayrıldınız?

-Bu tədbirə dəvət olunmağım məni çox məmnun etdi. Rəsul Həmzətovun vətənini təmsil etmək mənim üçün böyük şərəfdir. Özüm köklü dağıstanlıyam, Mahaçqala şəhərindənəm. Konsert çox yüksək səviyyədə keçdi, yaddaşımdan silinməyəcək əla ifalar oldu. Tədbirin təşkilatçısı Vəfa Qavrilovaya xüsusi təşəkkür etmək istəyirəm, ona afərin deyirəm. Mən onun təşkilatçılıq qabiliyyətinə heyranam. Hər şey çox xoşuma gəldi!

-Bakıda ilk dəfə olursunuz?

-Bəli. Artıq Azərbaycanın Quba və Qusar şəhərlərində olmuşam, amma Bakıya ilk dəfədir ki, gəlirəm. Şəhəri çox bəyəndim! Hələ ki, ancaq Bakının Köhnə şəhər hissəsində olmuşam, amma sabah şəhər mənzərələrini çəkmək üçün fotosessiya planlaşdırıram.

-Sizinlə səhnəyə çıxmağı gözləyən artistlərin əhvali-ruhiyyəsi necə təsir bağışladı?

-Olduqca səmimi insanlardır! Azərbaycan dilində danışıq da çox xoşuma gəldi. Qrim otağındakı qızlar nəyisə müzakirə edirdi, mən də qulaq asırdım. Bir vaxtlar türk dilini öyrənmişəm, onu çox sevirəm. Ona görə də ayrı-ayrı sözləri başa düşürdüm, həm də Azərbaycan dilinin fonetikası da mənim qulağıma xoş gəlirdi.

-Rəsul Həmzətovun yaradıcılığı haqqında bir neçə kəlmə deyərdiniz...

-Hər şeydən əvvəl demək istəyirəm ki, Rəsul Həmzətovdan danışanda, nadir hallarda onun atası Həmzət Sadasını yada salırlar. Mən hər ikisinin şeirlərini sevirəm. Həmzət Sadası satirik poeziya janrında yazıb. Onun şeirlərini oxuyanda, şairin obrazları necə dəqiq təsvir etdiyinə heyran oluram. Əlbəttə, Rəsul Həmzətov atasının istedadını əxz edib. Bəziləri yazırlar ki, Rəsul Həmzətovun şeirləri tərcümədir, guya tərcüməçilər onun əvəzindən yazıb və bütün bunlar onlara məxsusdur. Amma avar dilini bilən və şeirləri orijinaldan oxuyanlar cavab verirlər ki, xeyr, Rəsul Həmzətov istedadlı şairdir və çox gözəl əsərlər yazıb. Yeri gəlmişkən, şairin özü həmişə deyirdi ki, tərcüməçilər onun yaradıcılığına böyük töhfə veriblər. Rəsul Həmzətov daim onların əməyini yüksək qiymətləndirirdi.

“Ədəbiyyat və incəsənət”

(10.10.2023)

Beynəlxalq Muğam Mərkəzində (BMM) görkəmli xanəndə, Xalq artisti Tələt Qasımovun anadan olmasının 90 illiyinə həsr olunmuş tədbir keçirilib. Bu barədə Muğam Mərkəzi mediaya açıqlama verib. 

Tədbirdə əvvəlcə xanəndənin ifasından ibarət videoçarx nümayiş olunub.

Sonra filologiya elmləri doktoru, professor Vüqar Əhməd çıxış edərək sənətkarın ömür yolundan, musiqi mədəniyyətimizin inkişafındakı xidmətlərindən danışıb.

Milli Məclisin deputatı Ziyad Səmədzadə, Xalq artistləri Firuz Əliyev, Ağaverdi Paşayev, Vamiq Məmmədəliyev, Ramiz Quliyev və sənət dostları çıxışlarında qeyd ediblər ki, yüksək ifaçılıq mədəniyyətinə malik xanəndə gözəl səsi, təkraredilməz oxuma tərzi ilə diqqəti cəlb edib. O, bütün muğam dəsgahlarının gözəl bilicisi olmaqla yanaşı, həm də Azərbaycan poeziyasını dərindən mənimsəyib. Tələt Qasımov uzun illər Azərbaycan Dövlət Filarmoniyasında solist olub, konsertlərdə çıxış edib. Vurğulanıb ki, Zülfü Adıgözəlov, Hacıbaba Hüseynov məktəbindən ustad xanəndə kimi püxtələşmiş Tələt Qasımov sənətdə öz ənənələrini yaradıb.

Xatirə gecəsi xanəndənin repertuarından ibarət konsert proqramı ilə davam edib. Xalq artistləri Alim Qasımov, Nəzakət Teymurova, Teyyub Aslanov, Gülyaz Məmmədova, Vamiq Məmmədəliyev, Əməkdar incəsənət xadimi Aqil Məlikov, Əməkdar artistlər Təyyar Bayramov, Ehtiram Hüseynov, BMM-nin solistləri Mirələm Mirələmov, Vəfa Vəzirova, Məmməd Nəcəfov, Almaxanım Əhmədlinin ifaları dinlənilib.

“Ədəbiyyat və incəsənət”

(10.10.2023)

Bu gün Beynəlxalq Muğam Mərkəzində dünyaşöhrətli italyan caz musiqiçisi, virtuoz ifaçı Fabio Lepore konsert proqramı ilə çıxış edəcək. Və konsertdə ifaçı hit caz nömrələri ilə yanaşı, dünya bəstəkarlarının yaradıcılığına da müraciət edəcək.

Onun ifası nəinki cazsevərləri, həm də ənənəvi musiqilərdə orijinallığı və xüsusilik axtaran dinləyicilərin ruhunu oxşayır.

Qeyd edək ki, o, London Caz Festivalı, Boston Yaşıl Festival, Dubay Caz Festivalı, Blue Bay Caz Festivalı kimi bir çox beynəlxalq festival və tədbirlərdə iştirak edib.

“Ədəbiyyat və incəsənət”

(10.10.1023)

Oktyabrın 20-də Heydər Əliyev Sarayında Xalq artisti, professor Azər Zeynalovun "Bir son bahar" adlı solo konserti olacaq.

Gecədə sənətçi öz könül oxşayan ifaları ilə musiqisevərlərin qarşısına çıxacaq.

Qeyd edək ki, "Liriko-dramatik tenor" səs tembrinə malik olan Azər Zeynalov 1996-cı ildən Azərbaycan Dövlət Akademik Opera və Balet Teatrının solistidir. O, Avropanın və Azərbaycanın klassik operalarında baş rolların ifaçısıdır. A.Zeynalov tək opera ifaçısı kimi yox, həm də Azərbaycan bəstəkarlarının mahnı və romanslarını, oda və oratoriyalarını da ifa edir. Buna Emin Sabitoğlunun "Şükriyyə", "Gəncədən gəlirəm", Tofiq Quliyevin "Bəxtəvər oldum", "Azərbaycan", Rauf Hacıyevin "Leyla", Ramiz Mirişlinin "Vətən harayı”, Ruhəngiz Qasımovanın "Səninləyəm, Azərbaycan", Ramiz Mustafayevin "Məhəmməd və Leyla", Vasif Adıgözəlovun "Qəm karvanı", "Təntənəli kantata", "Çanaqqala", "Qarabağ şikəstəsi", Mobil Babayevin "Ölüm-qara qarışqa", Azər Dadaşovun "Ana yurdu" odası, Siyavuş Kəriminin "Ömrümün istəyi", "Sənsizləmişəm", Sevil Əliyevanın "Əziz anam" və s. bu kimi əsərləri misal çəkmək olar. Onun repertuarında xalq mahnıları da xüsusi yer tutur. Həmçinin öz ifası ilə xeyli sayda xarici dövlətlərin böyük konsert salonlarında dəfələrlə çıxışlar edib. O, opera səhnəsində ifa etdiyi bir çox rollara görə müxtəlif mükafatlara da layiq görülüb. Azər Zeynalov 2001-ci ildən Azərbaycan Dövlət Mədəniyyət və İncəsənət Universitetində "Vokal" kafedrasının müdiri, 2015-ci ildən isə "Musiqili teatr aktyoru" kafedrasının müdiri kimi pedaqoji fəaliyyətdə olub. 2016-2017-ci tədris ilindən etibarən pedaqoji fəaliyyətini yalnız Azərbaycan Milli Konservatoriyasında davam etdirərək burada Milli vokal kafedrasına rəhbərlik edir. Onun 2012-ci ildə çap olunan "Vokal ifaçılığı" kitabı ali musiqi məktəblərində klassik opera-vokal ixtisası üzrə təhsil alan tələbələr üçün ana dilimizdə ilk dərslikdir.

Konsertə olan biletləri iTicket.az saytı və şəhərin kassalarından əldə etmək mümkündür.

“Ədəbiyyat və incəsənət”

(10.10.2023)

BU GÜN ÜMUMMİLLİ LİDERİN ANDİÇMƏ MƏRASİMİNİN İLDÖNÜMÜDÜF

Bu gün - oktyabrın 10-da Heydər Əliyev Mərkəzində “Liderin ürəyi” (“Сердце лидера”) sənədli filminin təqdimatı keçiriləcək.

TASS informasiya agentliyinin baş direktorunun birinci müavini, Rusiya Federasiyasının Əməkdar jurnalisti Mixail Qusmanın müəllifi olduğu film Ümummilli Lider Heydər Əliyevin 100 illik yubileyinə həsr edilib.

“Ədəbiyyat və incəsənət” portalı xəbər verir ki, film Ulu Öndər Heydər Əliyevin xalqın təkidi ilə Azərbaycanda siyasi hakimiyyətə qayıdışı və ölkəyə rəhbərlik etdiyi dövrü əhatə edir. Ekran əsərində belə bir qayıdışın dünya tarixində ilk dəfə baş verdiyi vurğulanır.

Filmin təqdimatı üçün 10 oktyabr tarixinin seçilməsi təsadüfi deyil. Belə ki, 10 oktyabr Ümummilli Lider Heydər Əliyevin 1993-cü ildə birinci dəfə Prezident seçildikdən sonra andiçmə mərasiminin keçirildiyi gündür.

Heydər Əliyev Azərbaycan xalqının tarixində mühüm rol oynayıb, dünya siyasətində silinməz iz qoyub. “Liderin ürəyi” sənədli filmində Mixail Qusmanın vaxtı ilə Bill Klinton, Corc Buş, Jak Şirak, Madlen Olbrayt, Toni Bleyer, Zbiqnev Bjezinski və digər dünya siyasətçiləri ilə Heydər Əliyev barədə apardığı söhbətlər də yer alıb.

Məhz Heydər Əliyevin dövründə rəsmi Bakı beynəlxalq arenada öz mövqeyini gücləndirərək strateji tərəfdaşlarının sayını artırıb, ATƏT və BMT kimi təşkilatlarda Azərbaycan diplomatiyası intensiv xarakter alıb. Uzaqgörən siyasətçi Heydər Əliyev xarici şirkətlərin Azərbaycana irihəcmli sərmayələr yönəltmələrinə, “Əsrin müqaviləsi”nin imzalanmasına nail olub.

Filmdə Heydər Əliyevin Mixail Qusmanla eksklüziv müsahibələrini, dəyərli fikirlərini dinləmək, siyasi fəaliyyəti ilə bağlı nadir arxiv kadrları görmək mümkündür.

Çəkilişlər Moskva, Bakı və Ulu Öndərin doğulduğu Naxçıvanda aparılıb.

“Liderin ürəyi” sənədli filminin rejissoru Valeri Spirin, ssenari müəllifi Marina Deniseviçdir. Azərbaycanın Xalq artisti Polad Bülbüloğlu isə film üçün şair Yuri Ryaşentsevin şeirlərinə mahnı bəstələyib.

Film Azərbaycan və rus dillərində hazırlanıb.

“Ədəbiyyat və incəsənət”

(10.10.2023)

“Ozan Dünyası” Aşıq Yaradıcılığının Təbliği İctimai Birliyində Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə “Sazbəndlik sənəti və sazbəndlər” adlı kitab ərsəyə gətirilib.

Nəfis tərtibatda işıq üzü görən kitab aşıq sənətinin və bu sənətə bağlı olan instrumental ifaçılığın inkişafında mühüm rol oynayan sazbəndlik sənətinə və sazbəndlərə həsr olunub.

Layihənin həyata keçirilməsinin məqsəd və vəzifələrindən danışan “Ozan Dünyası” Aşıq Yaradıcılığının Təbliği İctimai Birliyinin sədri, Əməkdar mədəniyyət işçisi Musa Nəbioğlu bildirib ki, sazbəndlik bir sənət sahəsi kimi çox qədim tarixə malikdir, daha doğrusu, sazbəndliyin tarixi elə sazın, aşıq sənətinin tarixi qədər qədimdir: “Sazbəndlik sənəti və sazbəndlər olmasaydı, aşıq sənəti də bunca inkişaf edə bilməzdi. Zaman-zaman bir sənət sahəsi kimi, sazbəndlik də inkişaf edib, ustad sazbəndlər tərəfindən saz bir musiqi aləti kimi daha da təkmilləşdirilib. Sazbəndlik özünəməxsus incəlikləri olan, sazbənddən peşəkarlıqla yanaşı, aşıq sənətinə, bütövlükdə mədəniyyətimizə dair zəngin bilik və geniş dünyagörüşü tələb edən spesifik bir sənət sahəsidir.

Ancaq təəssüflər olsun ki, indiyədək aşıq sənəti və ayrı-ayrı ustad aşıqlarla bağlı çoxsaylı tədqiqatlar aparılsa da, sazbəndlik və sazbəndlər, demək olar ki, diqqətdən kənarda qalıb. Qədim sənət sahəsi kimi, sazbəndliyə və sazbəndlərə diqqətin artırılması, bu sənətin tədqiq və təbliğ olunması bu gün olduqca vacibdir”.

Kitab iki hissədən ibarətdir. Birinci hissədə mədəniyyətimizin çox mühüm qollarından biri, xalqımızın qədim və ölməz sənəti kimi 2009-cu ildə UNESCO-nun qeyri-maddi mədəni irs üzrə reprezentativ siyahısına daxil edilmiş aşıq sənətinin ayrılmaz tərkib hissəsi olan sazbəndlik bir sənət sahəsi kimi diqqət önünə gətirilir, onun incəlikləri araşdırılır. İkinci hissə isə sazbəndlərə həsr olunub və burada ayrı-ayrı sazbəndlər haqqında qısa tanıtım məlumatı verilir.

Azərbaycan Aşıqlar Birliyinin sədri, Əməkdar elm xadimi, professor Məhərrəm Qasımlı kitaba yazdığı “Ön söz”də vurğulayıb: “Təəssüf ki, indiyə qədər sazla bağlı instrumental fəaliyyətin tarixi kökləri, evolyusion inkişaf dinamikası, bir sözlə, sazbəndlik sənətinin incəlikləri, onun zaman içərisində keçirdiyi dəyişikliklər heç də lazım olan səviyyədə öyrənilməyib. Bu barədə elmi monoqrafiya bir yana dursun, mənzərəni təqdim edən albom səviyyəli tanışlıq kitabı da hazırlanmayıb. Sözügedən istiqamətə Əməkdar mədəniyyət işçisi Musa Nəbioğlunun ayrıca diqqət yetirmək cəhdini bu mənada xüsusi vurğulamaq və qədirşünaslıq duyğusu ilə dəyərləndirmək lazımdır.

Araşdırma səciyyəsi daşıyan və böyük zəhmət bahasına başa gələn bu əsərdə sazbəndliyin tarixi köklərinə diqqət yetirilməklə bərabər, sazın quruluşu, onun müxtəlif hissələri barədə məlumat çatdırılır, ayrı-ayrı sazbənd emalatxanalarındakı istehsal prosesi maraqlı tərzdə təqdim olunur”.

Kitabın elmi redaktoru ADPU-nun prorektoru, filologiya üzrə elmlər doktoru, professor Mahirə Hüseynova, elmi məsləhətçi Azərbaycan Aşıqlar Birliyinin sədri, Əməkdar elm xadimi, professor Məhərrəm Qasımlı, rəyçilər filologiya üzrə fəlsəfə doktoru, Əməkdar mədəniyyət işçisi Elxan Məmmədli və ADPU-nun Ədəbiyyat kafedrasının müdiri, dosent Razim Məmmədli, müəllifi isə Əməkdar mədəniyyət işçisi Musa Nəbioğludur.

Kitabdan folklor və musiqi araşdırıcıları, ölkəmizin müvafiq ali məktəblərində aşıq sənəti üzrə təhsil alan bakalavr və magistrlər, tədqiqatçılar və eləcə də geniş ictimaiyyət faydalana bilər.

(Yazı AzərTAC-ın materialları əsasında hazırlanıb)

“Ədəbiyyat və incəsənət”

(10.10.2023)

“Ədəbiyyat və incəsənət” portalı Bir müəllifdən bir şeir rubrikasında sizlərə Dursun Musayevanın “Yaxşıdı” şeirini təqdim edir. 

Qar nə yaxşı göy saxlayıb otları,

Şaxta vurub soldurmasa, yaxşıdı.

Bəm üstündə çinlədiyim notları,

Tale zilə qaldırmasa, yaxşıdı.

Bu dünyadı, daş döyəsi canı var,

Bu ömürdü, əzəli var, sonu var.

Bu sevdanın xətası var, qanı var,

Məni qana saldırmasa, yaxşıdı.

Taleyimiz qoşa zərin dörd üzü,

Qismətimiz bu dünyanın dərd üzü.

Başımıza zəmanənin sərt üzü,

Qiyaməti qaldırmasa, yaxşıdı.

Biləmmədim bu fələyin qəsdi nə,

Biləmmədim əyri nədi, düzü nə,

Bu məhəbbət ikimizin üstünə,

Dost-düşməni güldürməsə, yaxşıdı.

Yazımızı belə yazıb baxt özü,

Hər yaranın çarəsidi vaxt özü,

Öldürsə də, şikayətim yox, düzü,

Bu dərd məni öldürməsə, yaxşıdı.

“Ədəbiyyat və incəsənət”

(10.10.2023)