Super User
İsveçrədə üzərində “Xarıbülbül” əks olunmuş poçt markası buraxılıb
İsveçrədə Azərbaycanın dövlət müstəqilliyinin bərpasının 30 illiyi münasibətilə üzərində Zəfərin rəmzi “Xarıbülbül” təsviri olan poçt markası buraxılıb. Bu barədə razılaşma Azərbaycan səfirliyi ilə bu ölkənin dövlət poçt müəssisəsi olan “İsveçrə Poçt” Səhmdar Cəmiyyəti (“Schweizerische Post“ AG) arasında əldə edilib.
Azərbaycanın İsveçrədəki səfirliyindən AzərTAC-a verilən məlumatda bildirilir ki, həmin poçt markaları qeyri-kommersiya məqsədilə buraxılıb və səfirlik tərəfindən istifadə ediləcəkdir. Eyni zamanda bu markalar başqa maraqlı tərəflərə göndəriləcəkdir.
Azərbaycan Dövlət Rəqs Ansamblı Beynəlxalq Folklor Festivalında birinci yeri tutub
Azərbaycan Dövlət Rəqs Ansamblı Braziliyada keçirilən “Nueva Plata Beynəlxalq Folklor Festivalı”nın (FİDAF) qalibi seçilib.
AzərTAC xəbər verir ki, üç gün davam edən onlayn yarışda müxtəlif kateqoriyalar üzrə 18 qrup iştirak edib.
Festivalda ikinci yeri Çin Xalq Respublikasının “Beijing Dance Academy”, üçüncü yeri isə Moldovanın “Baletul Na țional JOC” qrupları tutub.
“Ən yaxşı xoreoqrafiya” mükafatına Macarıstandan “Duna Art ansamblı” layiq görülüb. Münsiflər heyətinin qərarına əsasən ən yaxşı mahnını Moldavanın “Baletul Na țional JOC” qrupu səsləndirib. Geyim kateqoriyası üzrə birinci yerdə filippinli “Leyte Kalipayan Dance Company” qərarlaşıb. Münsiflər heyəti xüsusi mükafatı Meksikanın Quadalaxara Universitetinin “Folklor Balet qrupu”na təqdim edib. Festivalın fəxri adına isə Slovakiyadan “Pulse-Poddukel bədii ansamblı” layiq görülüb.
Bu ilin yeniliyi olan “Atalar sözlərini qoruyanlar” mükafatı Fransanın Polinezya adalarından “Tamariki Poerani” və Madaqaskardan “Benja Gazy” qruplarına verilib.
İbrahim Tatlısəsinin toyda gəlininə çox bahalı qızıl kəmər hədiyyə etməsi xəbəri reytinq birincisi olub
Şənbə-bazar günlərində Türkiyədə maqazin xəbərləri arasında reytinq birincisi İbrahim Tatlısəsin oğlu İdo Tatlısəsə toy etməsi və toy məclisində gəlini Yasemin Şafkatlıya bahalı hədiyyə etməsi olub. SH xəbər ajansı toyun əks-sədası barədə yazsa da hədiyyə olunan qızıl kəmərin qiymətindən bəhs etmir.
Amma sosial mediada gəzib dolaşan xəbərlərə görə, müğənninin gəlininin belinə öz əlləri ilə taxdığı kəmərin təxminən 500000 türk lirəsi qiyməti var.
“Ulduz” jurnalının qocaman rəssamı Ədalət Həsən təltif olunub
"Ulduz" jurnalının bədii redaktoru, görkəmli rəssam Ədalət Həsənin bu il 85 yaşı tamam olur. Bu münasibətlə yubilyarı qəbul edən Azərbaycan Yazıçılar Birliyinin sədri, Xalq yazıçısı Anar tanınmış fırça ustasının həyat və fəaliyyətindən söz açıb, onu namuslu və istedadlı sənətkar kimi xarakterizə edib. Onun 1967-ci ildən bu günəcən çalışdığı "Ulduz" jurnalının bədii tərtibatındakı xidmətlərini yüksək qiymətləndirib.
Anar yubilyara xoş arzularını bildirməklə yubilyara Azərbaycan Yazıçılar Birliyinin Fəxri Diplomunu və pul mükafatı da təqdim edib.
“Sevdiklərinizin sizinlə olan hər anını dəyərləndirin”
Sosial şəbəkədə tanınmış Azərbaycan şairi, mərhum Nüsrət Kəsəmənlinin oğlu Rəşad Kəsəmənli atası barədə xatirəsini bölüşüb. Həmin xatirəni oxucularımıza təqdim edirik:
Yəqin ki bu daşı çoxunuz görmüsünüz Filarmoniyayanın arxasındakı parkda. O daş orda uzun illərdir ki var. Hətta park yenidən abadlaşdırıldıqdan sonra da həmin bu daşı elə demək olar ki, əvvəl durduğu yerə qoyublar. Uşaqlığımın xatirəsidir. Hər dəfə yanından keçəndə qəribə hisslər keçirirəm. Çünki uşaq vaxtı atam bizi o parka tez-tez aparardı, dondurma yeməyə. Sonra da parkda atamla oynayardıq. Bir dəfə atamla oynayanda onu tapa bilmədim və ağlamağa başladım. Atam həmin bu daşın arxasından çıxıb məni qucaqladı. O qədər sevinmişdim ki. 2003-cü ilin oktyabr ayının 15-i isə atam həmişəlik "daşın" arxasında gizləndi. Beləliklə də bu gizlənqaç oyunu mənim məğlubiyyətimlə bitdi. İndi də hər dəfə o parkdan keçəndə atamın daşın arxasından çıxıb mənə sarılacağını gözləyirəm. Sevdiklərinizin sizinlə olan hər anını dəyərləndiririn. Bir gün xatirəyə çevriləndə toxunduqları ən ucuz əşyalar belə sizə doğma olacaq, amma onları əvəz etməyəcək.
Səni çox sevirəm Atam. Bir gün axirətdə görüşmək ümidiylə.... ALLAH rəhmət eləsin!
Vokalçılar festivalında “Bizi də tanıyın” konsert proqramı təqdim olunub
Azərbaycan Respublikası Mədəniyyət Nazirliyinin dəstəyi və Heydər Əliyev Sarayının təşkilatçılığı ilə keçirilən “II Azərbaycan Beynəlxalq Vokalçılar Festivalı” çərçivəsində Bakı şəhər Mədəniyyət Baş İdarəsi ilə birgə “Bizi də tanıyın” konsert proqramı təqdim olunub.
Heydər Əliyev Sarayından bildirilib ki, Beynəlxalq Muğam Mərkəzində baş tutan konsert proqramında müxtəlif musiqi məktəblərinin şagirdləri tanınmış bəstəkarların əsərlərini ifa ediblər.
Tədbir tamaşaçılar tərəfindən böyük maraqla və alqışlarla qarşılanıb.
Gənc dramaturq Ülviyyə Heydərovanın benefisi
Sumqayıt Dövlət Dram Teatrı uzun fasilədən sonra yenidən pərdələrini tamaşaçılarının üzünə açıb.
Gənc dramaturq Ülviyyə Heydərovanın "Uşaqlıq" pyesi əsasında hazırlanan eyni adlı tamaşa tamaşaçıların ixtiyarına verilib.
“Ədəbiyyat və incəsənət” portalı xəbər verir ki, quruluşçu rejissoru Xalq artisti Firudin Məhərrəmov olan, İlahə Səfərovanın yaratdığı obrazla yaddaşlara həkk olan tamaşa böyük rəğbətlə qarşılanıb. Tamaşanı seyr edən ayrı-ayrı mədəniyyət xadimləri həm dramaturqun, həm də yaradıcı heyətin işini yüksək qiymətləndiriblər.
Daha bir xoş sürprizlə gənc dramaturq tamaşadan sonra üzləşib. Məlum olub ki, Azərbaycan prezidentinin təltif etdiyi mədəniyyət xadimləri arasında onun da adı var. Ülviyyə Heydərova “Tərəqqi” medalı ilə təltif olunub.
Gənc dramaturqa daha böyük uğurlar arzusuyla “Yolun həmişə açıq olsun” deyirik!
“Xoşbəxtlliklə “təltif olunmağa” çalışmaq özünü aldatmaq üçün ən ümumi və banal bir yoldur” – dünyaşöhrətli psixoterapevt Rafael Monelli
Məşhur italyan psixoterapevti Rafael Morelli son dövrlər trenddədir. Onun “Özünüqiymətləndirmə. Öz həyatınızı yaşamağın 5 qaydası. İndi” kitabı bütün satış reytinqlərini qırmaqdadır. “Ədəbiyyat və incəsənət” portalı sevimli oxucuları üçün kitabın qısa icmalını hazırlayaraq təqdim edir. Xüsusən hazırkı bu gərgin, stressli dönəmdə düşünürük ki, məşhur psixoterapevtin tövsiyyələri oxucularımız üçün faydalı olacaq. İtaliyalı psixoterapevt bizi daha az təhlil etməyə və daha çox hiss etməyə çağırır. Paradoksaldır, deyilmi? "Eyni səhvi törətməkdən qorxmayın, - Morelli deyir, - həyatda eyni səhvlər olmur, axı biz artıq dünən və ya bir il əvvəlki deyilik”. Gəlin doktorun insanın özünə və ətrafındakı digər insanlara sağlam sevgi münasibətləri haqqında müdrik çağırışlarına diqqət edək.
1. Xəstəliklərimizin əksəriyyəti özümüzlə necə davrandığımızdan yaranır. Bədənimiz həmişə nə edəcəyini bilir. O hey bizə deyir, deyir, bizə hər şeyi deyir, - hətta bizim istəmədiyimiz və sözlə deyə bilmədiyimiz bir şeyləri, hətta özümüz eşitmək istəmədiyimiz və ya ifadə edə bilmədiyimiz bir şeyləri belə bizə deyir. Sadəcə, onu diqqətlə dinləməyimiz gərəkdir.
2. Ağrıdan qurtulmağa çalışdığımız zaman biz yalnız onu gücləndiririk. Problemlər haqqında daim düşünmək onları xroniki edir.
3. Heç kim sevgiyə ehtiyac duymur, çünki məhəbbət artıq bizim içimizdədir, yalnız məsələ şəffaflıq məsələsidir.
4.Qürur və qorxu keçmiş inciklikləri unutmağımıza mane olur. Biz bizə pis münasibət göstərmək amacında olan insanlarla tanış olmaq riski edirik. Nəticədə də biz məhz belələri ilə rastlaşırıq. Bu qapalı dairə mütləq parçalanmalıdır.
5. Yaşaya biləcəyimiz ən gözəl sevgi özümüzə olan sevgidir: yalnız bundan sonra biz azadlığı dərk edə bilərik və gizli dühamız bizi təəccübləndirərək həqiqətən getmək istədiyimiz yerə aparacaq.
6. Illüziyalar sevgini zəhərli edərək bizə ağrı yaşadırlar, onlar qəlbin ən böyük düşmənidirlər, onlar şeytandırlar. İllüziyalar bizim içimizdə oturan, sağlam sevgini "Qanunlar və Məcəllələr" ilə əvəz edən inanclardır.
7. Təbii və hətta çılğın olun, sevdiyiniz, bəyəndiyiniz şeyləri həyatınıza cəlb edin və sizin rahatlıq və genişlik məkanınıza müdaxilə edən, sizi boz, darıxdırıcı bir həyat yaşamağa məcbur edən insanlardan uzaq durun.
8. Yanlış yaşanan sevgi çıxılmazlıqlarla, naəlaclıqlarla və stereotiplərlə doludur. Bütün dolğunluğu ilə, tamamilə qəbul olunmadığı üçün o, bədəni və əqli xəstə edir.
9. Əgər siz sevirsinizsə, şərhlərsiz qarşınızdakının daxilində baş verən hər şeyi müşahidə edə biləcəksiniz. Sevgi hər birimizin unikallığını dərk etməkdən rişələnir, çiçəklənir.
10. Həyatınızdakı hər bir yeniliyi hansısa bir gözləntilər və özünətəlqinlər olmadan qarşılayın. Həyatın hər anında biz sanki yenidən doğuluruq, bu səbəbdən də biz heç vaxt eyni səhvləri etmirik. Hər dəfə sanki ilk dəfəmizdir. Bu dəqiqədə biz dünənki kimi deyilik axı, xeyli dəyişilmişik.
11. Depressiya – beyinin daha heç kəsi eşitmək istəməyən halıdır, sizin “Mən”inizin sizi orijinallığa daşıyan nəsnələrdən kənarlaşdırmaq cəhdidir, sizi sosial cəhətdən məqbul modellərə doğru hərəkət etdirmək cəhdidir.
12. Hər dəfə biz problemlərdən qurtulmağı planlaşdırdığımız zaman onları yalnız gücləndiririk. Yaşadığımızdan daha yaxşı gələcək həyat haqqında düşüncələr bizi qeyri-müəyyən, kövrək və gücsüz edir. Biz rifah əldə edəcəyimiz zaman ətrafımızdakı insanların bizimlə daha yaxşı davranmağa başlayacaqları, hər şeyin dəyişəcəyi ilə bağlı illərdir şikayət edə bilərik. Bu, böyük bir yanlışlıqdır! Bizi ağrıdan, əslində kənardakı təsirlər deyil, daxilimizdə baş verənlərdir, öz intuisiyamıza etibar etməməyimizdir. O, həqiqətən nə lazım olduğunu yaxşı bilir.
13. İndi bizim üçün yaxşı olan yalnız indi mövcuddur. Bizim həmişə eyni cür olacağımızı, hər şeyin də eyni cür qalacağını düşünməyimiz kökündən səhvdir.
14. Mümkün həyat həzzlərinizi də təxirə salmayın, onlar da devalvasiyaya məruz qalırlar. Başqa cür olmağa çalışmaq, xoşbəxtlliklə “təltif olunmağa” çalışmaq özünü aldatmaq üçün ən ümumi və banal bir yoldur.
15. Siz əziyyət çəkmək üçün doğulmamısınız. Ağrılardan əzilmiş halda yox, yenilənmiş halda çıxmağı öyrənin.
16. Başqalarının sizi qınamasından bilirsiniz niyə qorxursunuz? Çünki özünüzü çox tez-tez mühakimə edirsiniz.
17. Bu doğru deyil ki, sizin həyatınızda heç nə baş vermir. Sadəcə, siz proseslərə lazım olan tərəfdən baxmırsınız.
İlk tranzistorlu radioqəbuledici və ilk komikslər
Bu günə təsadüf edən əlamətdar tarixi hadisələri diqqətinizə çatdırırıq.
18 oktyabr. İnsan alveri ilə mübarizədə Avropa günü
İnsan alveri hazırda aktual mövzudur əlbəttə. Ona görə də bu günün sıradan gün olmaması dəqiqdir. İnsan alveri deyəndə, burada uşaqların qul kimi zorakı əməyə cəlb edilməsi, qadınlarınsa fahişəliyə məcbur edilməsi əsas sırada dayanır. İstəsəniz, sizə bu mövzuda maraqlı roman deyərəm, oxuyarsınız. Elçin Səfərli: “Dönüşü olmayan gediş”. Zorən fahişəliyə cəlb edilib Türkiyəyə aparılan bir rus qadının həyatı təsirli boyalarla əks etdirilib.
18 oktyabr. Beynəlxalq qadın xoşbəxtliyi günü
Karin Rokindin 2017-ci ildəki təşəbbüsü nəticəsində təqvimə salınan bu gün qadınlardakı depressiya epidemiyasına qarşı yönəlib. Qadınları depressiyaya nə salır? Ən çox yaşlaşmaq, üzdə qırışların peyda olması. Sonra kökəlmək, artıq çəkidən bədən fiqurunun pozulması. Sonra isə yaşadıqları stresslər, əsəb gərginlikləri.
Deyirlər ki, xoşbəxtliyin cəmi bir adı var, amma bu belə deyil, hər bir qadınçün xoşbəxtlik anlamı özünəməxsus bir nəsnədir. Bir qadını yaxşı həyat yoldaşı, birini əsl sevgi, birini ağıllı övladlar, birini var-dövlət, birini uğurlu karyera, birini yaxşı rəfiqələri, birini öz bədən quruluşu, birini öz sima gözəlliyi, birini eqosu xoşbəxt edir. Dinclikdən, sakitçilikdən xoşbəxt olan qadınlar yoxdurmu, var. Hobbiləri olan məşğuliyyətdən xoşbəxt olanlar necə? Belələri də var. İnanın ki, hətta ekstrimdən də xoşbəxt olanlar az deyil. Nə isə. Çox uzatmayaq, qadınlara bir ağızdan xoşbəxtlik arzulayaq.
18 oktyabr. Böyük alım Niftalı Qocayevin 85 illiyi
Niftalı Qocayev ilk azərbaycanlı biofizik alimdir. 400-dən çox məqalənin, 16 monoqrafiya, dərslik və dərs vəsaitinin müəllifi olan N.Qocayev beynəlxalq simpozium və konfranslarda 52 məruzə (onlardan 12-si Plenar məruzələrdir) ilə çıxış etmişdir. N.Qocayev Azərbaycan SSR Ali Təhsil Nazirliyi nəzdində fəaliyyət göstərən Elmi-Metodik Şuranın Fizika və astronomiya seksiyasının sədri (1980-1984), Azərbaycan Qaçqınlar Cəmiyyətinin sədri (1989-1993) vəzifələrində işləmişdir. Onun təşəbbüsü ilə 1997-ci ildə yaradılmış Azərbaycan Biofizika Cəmiyyəti özünün ilk konfransında onu Cəmiyyətin prezidenti seçmişdir. Niftalı Qocayev Türkiyədə-Ərzurum Atatürk və İstanbul Universitetlərində professor vəzifəsində çalışaraq yüksək səviyyədə elmi pedaqoji-fəaliyyət göstərmişdir. Onun elmi rəhbərliyi ilə 30 elmlər doktoru və elmlər namizədi müdafiə etmişdir. Əsasən Amerika və Avropada nəşr olunan mötəbər elmi jurnallarda (İnt.J. Peptide and Protein Res., J.Mol. Struct., Protein and Peptide Letters, v.s.) nəşr olunan və Beynəlxalq Konfranslarda məruzə olunan 376 elmi əsərin, müxtəlif ölkələrdə nəşr olunmuş 15 dərslik, dərs vəsaiti və monoqrafiyanın müəllifidir bu şəxs. “American Biographical institute” tərəfindən 2 dəfə “American Medal of Honor” medalı ilə mükafatlandırılmışdır. N.M.Qocayev keçmiş SSRİ universitetləri üçün fizika üzrə dərslik (Оптика, Москва, Из-во Высшая Школа) yazmış yeganə azərbaycanlıdır. Onun dəfələrlə yenidən nəşr olunmuş çoxcildli “Ümumi fizika kursu”, həmçinin Türkiyədə nəşr olunmuş “Temel Moleküler Fizik”, “Optik”, 2 cilddən ibarət “Molekülün Yapısı ve özellikler” dərslikləri mütəxəssislər tərəfindən yüksək qiymətləndirilir, tələbələr tərəfindən geniş istifadə olunur. Allah böyük alimimizə ömür versin.
18 oktyabr. İlk tranzistorlu radioqəbuledici və ilk komikslər
Alyaska günü. 1867-ci ildə Alyaskanın ruslardan alınıb amerikalılara verilməsi şərəfinə qeyd edilən bir gündür. Saqqalsızlıq günü. Hamıdan təvəqqe olunur ki, bu gün ictimaiyyət qarşısına saqqalsız çıxsınlar. Xorvatiyada qalstuksuzluq günü. Qalstuk taxanı hamılıqla hoydu-hoyduya götürürlər xorvatlar bu gün. Kanadada insanlar günü. Necə deyirlər bir məsəldə? Adam olmaq asandır, insan olmaq çətin. İtsax Rabinin xatirə günü. Yəhudilər öz məşhur dövlət xadimlərini bu gün anacaqlar. Polşalılar Poçtalyon gününü qeyd edəcəklər. (Görəsən onların da Novruzəliləri olubmu?) ABŞ isə şokoladlı keks gününü qeyd edəcək.
1967-ci ildə ilk dəfə SSRİ kosmonavtları Venera planetinə uçuş etmişlər. 1954-cü ildə Amerikada ilk tranzistorlu radioqəbuledici istismara buraxılıb, markası da “Texas İnstruments” olub. 1929-cu ildə Kanada qanunvericiliyi qadınların da insan sayılmasını qəbul edib. Təsəvvür edin ki, o vaxta qədər zavallı qadınlar insan hesab edilmirmişlər. 1896-cı ildə “Nyu-York Jornal”da ilk komikslər peyda olub. 1775-ci ildə Afrika amerikalısı olan şair Filips Uitli həmyerliləri arasında ilk olaraq qul olmaqdan azad edilib, kişiyə şairliyinə görə güzəşt ediblər.
Varisin “11-20 oktyabrın təqvimi” yazısından
Ankarada azərbaycanlı heykəltaraş Səid Rüstəmin fərdi sərgisi açılıb
Ankarada uzun illərdir Türkiyədə yaşayıb-yaradan azərbaycanlı heykəltaraş Səid Rüstəmin əsərlərindən ibarət sərginin açılışı baş tutub.
AzərTAC xəbər verir ki, sərgi və sənət evi ilə tanış olanlar arasında Azərbaycanın Ankaradakı səfiri Rəşad Məmmədov, səfirliyimizin digər əməkdaşları da olublar.
Tanınmış sənət adamının müxtəlif janr və üslublarda işlənən əsərləri ziyarətçilər tərəfindən böyük maraqla qarşılanıb.
Qeyd edək ki, Səid Rüstəmin əsərləri əvvəllər Azərbaycan, Rusiya, Amerika Birləşmiş Ştatları, Gürcüstan və Türkiyənin müxtəlif şəhərlərində nümayiş edilib. Bu dəfəki fərdi sərgidə əsasən müxtəlif ölçülərdəki heykəllər, həmçinin rəsm işləri, zəngin material və üslub imkanlarından istifadə edilərək yaradılmış əsərlərlə tanış olmaq mümkündür.
