Super User
ABŞ-da Albert Aqarunova həsr olunmuş foto müsabiqəsi elan edilib
ABŞ-ın Minnesota ştatında fəaliyyət göstərən Azərbaycan diasporu Milli Qəhrəman Albert Aqarunovun doğum gününə həsr olunmuş “Mən Azərbaycanı hər yanda axtarıram” mövzusunda foto müsabiqəsi elan edib.
“Ədəbiyyat və incəsənət” portalı Diasporla İş üzrə Dövlət Komitəsinə istinadən bildirir ki, Azərbaycan-Minnesota Assosiasiyasının təşkilatçılığı ilə 28 May – Azərbaycanın Müstəqillik Günü çərçivəsində keçirilən müsabiqədə 8-20 yaşarası uşaqlar və gənclər iştirak edə bilərlər. Mayın 28-də başa çatacaq müsabiqənin şərtlərinə əsasən, fotolar plagiatdan uzaq olmalıdır. Münsiflər heyəti tərəfindən müəyyən ediləcək qaliblərin adları iyunun 1-də – Uşaqların Beynəlxalq Müdafiəsi Günündə açıqlanacaq.
Həmin gün keçiriləcək mərasimdə I, II və III yerləri tutan qaliblərə pul mükafatları, bütün iştirakçılara isə sertifikatlar təqdim ediləcək.
Birinci yerin qalibinə 500, ikinci yerin qalibinə 300, üçüncü yerin qalibinə 200 ABŞ dolları məbləğində pul mükafatlarının verilməsi nəzərdə tutulub.
Müsabiqədə iştirak etmək istəyən uşaqlar və gənclər Azərbaycana aid olan şəkilləri Bu email ünvanı spambotlardan qorunur. Onu görmək üçün JavaScripti qoşmaq lazımdır. elektron ünvanına göndərməlidirlər.
Xatırladaq ki, ötən il ABŞ-ın Nyu-York şəhərində fəaliyyət göstərən Azərbaycan-Amerika Qadın Cəmiyyətinin təşəbbüsü ilə Azərbaycanın Milli Qəhrəmanı Albert Aqarunovun doğum gününə həsr edilmiş yazı müsabiqəsi keçirilmişdi. Özü də yüksək səviyyədə.
Bakıda Yaponiya mədəniyyət festivalı başlayacaq
Banzay, ikabana, xarakiri, karate… Gündoğan Yaponiyanın adı gələndə ilk olaraq bunlar yada düşür. Mədəniyyət aşiqləri isə rejissor Kurasavanı, yazıçı Murakamini xatırlayırlar. Bakıda yapon küləkləri əsəcək.
Yaponiyanın Azərbaycandakı səfirliyi bu gündoğan ölkə ilə maraqlanan hər kəsi , mayın 15-də keçiriləcək “Yaponiya mədəniyyət festivalı 2022” tədbirinə dəvət edir.
“Ədəbiyyat və incəsənət” portalı xəbər verir ki, bu, “Yaponiya-Azərbaycan Dostluq İli 2022” çərçivəsində ilk böyük və bütün ictimaiyyət üçün açıq tədbir olacaq. Tədbir yalnız bir gün - “Landmark Baku” otelində keçiriləcək.
Tədbirdə Yaponiya ilə bağlı rəqslər, mahnı ifaları, kospley çıxışları, bu ölkənin mədəniyyət nümunələri ilə bağlı stendlər, əl işləri nümayişi ediləcək.
Yaponiya mədəniyyəti ilə maraqlanan hər kəs iştirak edə bilər, tədbirin qapıları açıq olacaq.
Bu gün Şuşada "Xarıbülbül" Beynəlxalq Folklor Festivalı öz işinə başlayacaq
Bildiyiniz kimi, Azərbaycan Respublikası Prezidentinin müvafiq sərəncamına əsasən Azərbaycan Respublikasında 2022-ci il “Şuşa İli” elan edilmişdir. Azərbaycan Respublikası Nazirlər Kabinetinin 2022-ci il 25 fevral tarixli sərəncamı ilə təsdiq edilmiş “Şuşa İli ilə bağlı Tədbirlər Planı”na əsasən Şuşada "Xarıbülbül" Beynəlxalq Folklor Festivalınln keçirilməsi təsdiqlənib. “Ədəbiyyat və incəsənət” portalı xəbər verir ki, “Xarıbülbül” festival bu gün rəsmən açıq elan ediləcək, 14 may tarixinədək Azərbaycanın mədəniyyət paytaxtı olan Şuşa şəhərində keçiriləcək.
İlk dəfə 1989-cu ildə keçirilmiş və Seyid Şuşinskinin 100 illik yubileyinə həsr edilmiş festival II Qarabağ müharibəsində qazanılmış parlaq zəfər nəticəsində 30 illik fasilədən sonra 2021-ci ilin 12-13 may tarixlərində Şuşada, Cıdır düzündə Heydər Əliyev Fondunun təşkilatçılığı ilə yenidən keçirilmişdir. Cari ildə keçiriləcək sayca beşinci festivalda 10 xarici ölkədən müxtəlif folklor üslublarında çıxış edən musiqiçilərin, rəqs kollektivlərinin, həmçinin Azərbaycanın müxtəlif regionlarından folklor kollektivlərinin iştirakı nəzərdə tutulur.
Həsən Məmmədovun Ələsgər Ələkbərovdan yediyi şillə
Yazıçı Əyyub Qiyasın təqdimatında “AZƏRBAYCAN AKTYORLARININ HƏYATINDAN MARAQLI ANLAR” layihəsində bu dəfə sizə ƏLƏSGƏR ƏLƏKBƏROVun (1910-1963) xatirələrini təqdim edəcəyik.
***
Cavan vaxtlarımda bir özündənrazı aktyorla tərəf-müqabili idim. Adam həm istedadsız, həm də təkəbbürlü idi. Məşqləri zay edib qoyur, vaxtımızı alır, əsəblərimizi tarıma çəkirdi. Rejissor da ona görə məni qınayırdı:
– Tərəf müqabilinə kömək elə, onu öz arxanca çək apar.
– Çəkməyinə çəkim ey, adam yerindən tərpənmir axı.
– Heç bilirsən tərəf müqabili nə deməkdir? Tərəf müqabili səhnədə iki ağıllı adamın söhbətidir.
– Əgər o iki adamdan biri həm ağılsız, həm də istedadsızdırsa, onda necə?
Rejossor məni başa düşdü, başını qaşıyaraq:
– Onda, ağıllı zülülm çəkəcək, – dedi.
***
“Böyük dayaq” filminin çəkilişləri rayonda gedirdi. Filmdə belə bir yer var, Rüstəm kişi evə gələndə oğlu Qaraşın səsini qaldırıb narazılıq elədiyini eşidir və ona bir şillə çəkir. Epizodu bir-neçə dəfə məşq elədik. Qaraş roluna o vaxt cavan olan Həsən Məmmədov çəkilirdi. Mən rejissorun komandası ilə otaqda gözləyirdim. Anası ilə bacısı Qaraşın arxasınca düşüb yan otağa gəlirdilər. Yan otaqdakı çəkilişlərin səsini eşidib əsəbiləşmişdim. Yadıma qonşuluqda baş verən bir hadisə düşmüşdü. Bu vaxt Həsən mənə yaxınlaşdı. Onun üstünə çığırıb:
– Binamusluğun bəs deyil, dədəsiz-nənəsiz qıza zülm eləməyin bəs deyil, hələ bir ağbirçək anana da söz qaytarırsan, – deyib, şillə çəkdim. Məşqlərdə Həsən şilləni sağ tərəfdən gözləyirdi. Çünki kadr elə qurulmuşdu ki, mən şillə vuranda görünməməli idi. Amma mən özümdən asılı olmadan Həsənə sol əlimlə yağılı bir şillə çəkdim. Epizodu sona qədər davam etdik. Stop komandası veriləndə Həsəni pərt gördüm. Yaxınlaşıb könlünü aldım:
– Bu sənə məndən bir ata şilləsi, böyük şilləsi olsun, – dedim, – elə yaşa ki, heç kəs sənə həyatda belə şillə vurmasın.
Həsən Məmmədov gözəl ailə başçısı oldu.
İstanbulda Qara Qarayevin Birinci simfoniyasının tarixi premyerası keçirilib
İstanbulun böyük konsert salonlarından olan Cemal Reşit Rey konsert zalında Əməkdar artist, Azərbaycan Dövlət Akademik Opera və Balet Teatrının baş dirijoru Əyyub Quliyevin rəhbərliyi altında dahi Azərbaycan bəstəkarı Qara Qarayevin 1943-cü ildə yazdığı və İkinci Dünya müharibəsinin qəhrəmanlarının xatirəsinə həsr olunan Birinci simfoniyanın Türkiyədə premyerası keçirilib.
AzərTAC xəbər verir ki, Cemal Reşit Rey konsert salonunun simfonik orkestrinin ifasında təqdim olunan əsər dinləyicilər tərəfindən çox böyük maraqla qarşılanıb. Simfoniyanın ifasından sonra dirijor Əyyub Quliyev Qara Qarayevin “Yeddi gözəl” baletindən nümunələri proqramdan əlavə olaraq dinləyicilərə təqdim edib. Konsertin ikinci bölümündə dirijor Əyyub Quliyev dünya şöhrətli ispan gitara ifaçısı Marko Soçiasla bərabər Xoakin Rodriqonun gitara və orkestr üçün musiqilərini dinləyicilərə təqdim edib.
Proqramın sonunda simfonik janrın ən mürəkkəb nümunələrindən olan Klod Debüssinin “Dəniz” lövhələri ifa olunaraq türkiyəli dinləyicilər tərəfindən alqışlarla qarşılanıb.
Qeyd edək ki, konsertdən öncə keçirilən mətbuat konfransında tanınmış dirijor və bəstəkar Murat Cem Orhan, məşhur türkiyəli musiqişünas Nasir Antep, eləcə də dirijor Əyyub Quliyev Qara Qarayevin yaradıcılığı və onun Birinci simfoniyasının yaranma tarixi barədə dinləyicilərə məlumat veriblər.
Günün fotosu: Balaca İsmayıl böyük İsmayılın məzarı önündə
Günün fotosu: Balaca İsmayıl böyük İsmayılın məzarı önündə
Foto Fəxri Xiyabanda çəkilib. Xalq yazıçısı İsmayıl Şıxlının məzarını ziyarət etməyə nəticəsi İsmayıl gəlib.
Ruhu şad olsun böyük İsmayıl Şıxlının!
Bakıda Birinci Türk Dünyası Ədəbiyyat və Kitab Festivalı keçiriləcək
Mayın 26-dan 28-dək Bakı şəhərində Birinci Türk Dünyası Ədəbiyyat və Kitab Festivalı keçiriləcək.
Bu barədə “Ədəbiyyat və incəsənət” portalına tədbirin təşkilatçısı - Beynəlxalq Türk Müəllifləri Birliyinin (BEYTÜM) sədri, şair Xəyal Rza məlumat verib.
Onun sözlərinə görə, tədbir Bakı Dövlət Universitetinin həyətində - açıq havada təşkil olunacaq. Türksoylu ölkələrdən tanınmış alimlərin, qələm adamlarının qatılacağı tədbirin birinci günü Şuşa Günü, ikinci günü Türk Dünyası Günü, üçüncü günü isə Dədə Qorqud Günü adlandırılıb.
Tədbir BEYTÜM-ün təşkilatçılığı, Azərbaycan Yazıçılar Birliyinin, Milli Məclisin Mədəniyyət Komitəsinin, Beynəlxalq Türk Mədəniyyəti və İrsi Fondunun, Beynəlxalq Türk Akademiyasının, TÜRKSOY-un, TÜRKPA-nın, Yunus Əmrə İnstitutunun, İLESAM-ın, Bakı Dövlət Universitetinin və Azərbaycan Yaradıcılıq Fondunun təşkilati dəstəyi ilə keçiriləcək.
Festivalın təntənəli açılış mərasimi mayın 26-da baş tutacaq. Festivalda nəşriyyatlar çap etdikləri kitabları sərgiləyəcək və milli rəqslər, muğam konserti, tanınmış müğənnilərin çıxışları nəzərdə tutulub.
Festival türk dünyasının böyük mütəfəkkirləri Nizaminin, Yunus Əmrənin, Əlişir Nəvainin, Məhdimqulu Firakinin, Tüğölbay Sıdıkbekovun və Abayın xatirəsinə həsr edilib. Festivalda türksoylu ölkələrin alimləri yuxarıda adları qeyd edilmiş ədiblərlə bağlı məruzələrlə çıxış edəcəklər.
Tədbir çərçivəsində, həmçinin M.Ə.Sabirin, Həsən bəy Zərdabinin, Əhməd Cavadın, Xurşidbanu Natəvanın, Hüseyn Cavidin, Əhməd Baydursunlunun, M.F.Axundzadənin, Ömər Faiq Nemanzadənin yubiley tədbirləri keçiriləcək.
Festivalda Beynəlxalq Türk Mədəniyyəti və İrsi Fondunun, Beynəlxalq Türk Akademiyasının, TÜRKSOY-un, Azərbaycan Yazıçılar Birliyinin nəşr etdiyi kitabların təqdimatları da nəzərdə tutulub.
Tədbirin sonuncu günü mükafatlandırma mərasimi təşkil olunacaq.
Qeyd edək ki, Türk Dünyası Ədəbiyyat və Kitab Festivalının növbəti ili Türkiyədə təşkil ediləcək.
UNESCO gəncləri beynəlxalq fotoqrafiya müsabiqəsində iştirak etməyə dəvət edir
UNESCO-nun “Gənclərin İpək Yollarına baxışı” adlı Proqramı çərçivəsində beynəlxalq fotoqrafiya müsabiqəsinə start verilib.
“Ədəbiyyat və incəsənət” portalı AzərTAC-a istinadən xəbər verir ki, UNESCO-nun İpək Yolları Proqramı çərçivəsində və qurumun Sosial və Humanitar Elmlər Sektorunun UNESCO Gənclər Proqramının məqsədlərinə uyğun olaraq təşkil edilən fotomüsabiqənin 2022-ci il nəşri iyulun 17-dək davam edəcək.
İpək yolları dəniz və quru yolları şəbəkəsindən ibarət geniş regionu əhatə edir. Cənubi Asiya və Cənub-Şərqi Asiya, Orta Asiya yarımadası, Rusiya düzənlikləri, İran və Anadolu yaylaları, Ərəbistan yarımadası, eləcə də Tanzaniyadan Mərakeşə qədər Şimali Afrika və Şimal-Şərqi Afrika, Fransa ilə Pireney yarımadasını birləşdirən, Şərqi və Cənubi Avropa boyunca uzanan İpək yolu ölkələrinin gənclərinə ünvanlanan “Gənclərin İpək Yollarına Baxışı” müsabiqəsi bu bölgələrdə yaşayan və ya oraya səyahət etmiş gənclərə düşüncələrini bölüşməyə, İpək yollarında qarşılıqlı əlaqə və mübadilələrdən qaynaqlanan ümumi mədəni irsi və plüralist kimlikləri daha yaxşı anlamağa imkanı verir. Müsabiqə İpək yollarının əhatə etdiyi müxtəlif insanlar arasında qarşılıqlı anlaşmanı və sülhü təşviq etmək üçün bu qarşılıqlı mədəni əlaqələri və görüşləri müasir dünyaya yaymaq məqsədilə fotoqrafiyadan istifadəni təşviq edir.
Müsabiqə iki fərqli yaş qrupunu əhatə edir: 14-17 və 18-25. Üçüncü dəfə təşkil olunan müsabiqəyə bu il “İnanc və mənəviyyatlar” və “Birlikdə yaşamaq” kimi iki mövzu üzrə fotolar qəbul edilir.
Fotolar seçki komissiyası tərəfindən nəzərdən keçiriləcək və hər yaş kateqoriyası üzrə qaliblər müəyyən olunacaq. Müsabiqə mükafatlandırma mərasimi ilə başa çatacaq. Birinci yerin qaliblərinə professional fotoaparat, ikinci yerin qaliblərinə yarıprofessional kamera, üçüncü yerin qaliblərinə isə rəqəmsal kamera (standart) hədiyyə olunacaq.
Bundan əlavə, COVID-19 məhdudiyyətlərinə uyğun olaraq, qaliblərin mərasimdə iştirakı üçün bütün xərclər ödəniləcək. UNESCO-nun dəvətinə əsasən, yaşı 17-dən az olan laureatları böyüklər müşayiət edə biləcəklər.
Qalib fotolar arasından ən yaxşı 50 fotoşəkil dünyanın müxtəlif ölkələrində sərgilənəcək.
Çüneyt İşıkın filmi İtaliyada mükafata layiq görülüb
İtaliyanın paytaxtı Roma şəhərində keçirilən beynəlxalq qısametrajlı film festivalında türkiyəli rejissor Cüneyt İşıkın çəkdiyi “Quş olsaydım” qısametrajlı filmi “Ən yaxşı xarici qısametrajlı film” nominasiyası üzrə mükafata layiq görülüb.
“Ədəbiyyat və incəsənət” portalı TASS agentliyinə istinadən xəbər verir ki, festival türkiyəli rejissor Ali Atayın “Ölümlü dünya” tammetrajlı bədii filmi ilə başlayıb. Filmlər müxtəlif nominasiyalar üzrə mükafatlandırılıb.
Qeyd edək ki, ibtidai məktəbin ikinci sinif şagirdi Berfinin yenicə köçdüyü İstanbuldakı həyatından bəhs edən “Quş olsaydım” filmi gerçək bir hekayədən götürülüb.
İncəsənət xadimləri təltif olunmuşlar
Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq və “İncəsənət xadimləri üçün Azərbaycan Respublikası Prezidentinin mükafatlarının təsis edilməsi haqqında” Azərbaycan Respublikası Prezidentinin 2002‑ci il 28 may tarixli 707 nömrəli Fərmanına uyğun olaraq qərara alıram:
1. Səhnə fəaliyyəti ilə bağlı aşağıdakı aparıcı incəsənət xadimlərinə Azərbaycan Respublikası Prezidentinin mükafatları verilsin:
Abbasova-Budaqova Afaq Nurəhməd qızı
Abdurahmanov Yusif Fikrət oğlu
Abutalıbov Şirzad Əsəd oğlu
Adıgözəlov Yalçın Vasif oğlu
Ağakişiyev Rauf Fikrət oğlu
Ağaverdiyeva Məsməxanım Aslan qızı
Allahverdiyev Ceyhun Kərim oğlu
Allahverdiyeva Naibə Siyavuş qızı
Arsentyeva Olqa Anatolyevna
Atakişiyeva Mətanət Ağazair qızı
Babayev Allahverən Hacı oğlu
Babayev Əbülfət Məmməd oğlu
Babayeva İnarə Əhməd qızı
Babayeva Töhfə Ağaəli qızı
Bağırov İzaməddin Zeynal oğlu
Bağırova Sənubər Yusufovna
Baliyeva Natalya Gennadyevna
Barateliya Naala Raulyevna
Bayramov Salman Bayram oğlu
Bayramov Təyyar Allahverdi oğlu
Bədəlova Solmaz Əligözəl qızı
Bəşirov Xanlar Əyyub oğlu
Cəbrayılov Elşən Şahin oğlu
Cəfərov Samir Qadir oğlu
Dadaşov Əmrah Balaxan oğlu
Dubovitskaya Mariya Aleksandrovna
Eyvazov Yasəf Alxas oğlu
Eyvazova Ayan Fuad qızı
Eyyubov Musa Eyyub oğlu
Əfəndi Elçin Fərahim oğlu
Əfəndiyeva Xəlilova İlahə Əhsan qızı
Əflaki Ədilə Osman qızı
Əhmədli Bəhruz Vaqif oğlu
Əhmədov Çingiz Əli Əşrəf oğlu
Əhmədov İlyas Əhməd oğlu
Ələkbərzadə Mehriban Zaur qızı
Əlili Hüseyn Azad oğlu
Əliyev Ələkbər Həsən oğlu
Əliyev Əliyar Əlişan oğlu
Əliyev İqbal Adil oğlu
Əliyev Sərvər Bəhlul oğlu
Əliyev Vaqif Səfər oğlu
Əliyeva İlahə Yavər qızı
Əliyeva Münəvvər Sabir qızı
Əliyeva Ülkər Sabir qızı
Əlizadə Əkbər Müzəffər oğlu
Əlizadə Şəhla Seidşah qızı
Əmrahov Rövşən Əbdürəhman oğlu
Əsgərov Əli Rəhim oğlu
Əzizov Əzizağa Ağayar oğlu
Fətullayeva Aygün Bəhruz qızı
Hacıyev Əli Əliyusif oğlu
Hacıyev İlqar Xəlil oğlu
Hacıyeva Sevil İnşalla qızı
Hacıyeva Siddiqə Zakir qızı
Heybətov Anar Mithət oğlu
Həbibov Nicat Əli oğlu
Həsənquliyev Kazım Feyruz oğlu
Həsənov Kərim Abbas oğlu
Həsənov Vidadi İsmail oğlu
Həsənova Natavan Mikayıl qızı
Həşimov Orxan İlqar oğlu
Həşimzadə Xanlar Allahverdi oğlu
Hüseynli Anar Vaqif oğlu
Hüseynov Elnur Bəhrəmxan oğlu
Hüseynov Fizuli İsmət oğlu
Hüseynov Şövqi Ərəstun oğlu
Hüseynova İlahə Həsən qızı
Hüseynova Kamilla Fikrət qızı
Hüseynova Kəmalə Müzəffər qızı
Xəlilzadə Rüfət Eldar oğlu
İbişov Tahir Fidayə oğlu
İbrahimli Qabil Mahmud oğlu
İbrahimov Fuad Natiq oğlu
İbrahimova Nigar Rəfael qızı
İbrahimova Şəhla İbrahim qızı
İmranova İnna Aleksandrovna
İsmayılov Qurban İbrahim oğlu
İsrafilov Fərhad Ramazan oğlu
Kazımov Nicat Mirəziz oğlu
Kərimduxt Rövşən Ramazan oğlu
Kərimov Elnur Umbay oğlu
Kərimov Loğman Seyfulla oğlu
Kərimova Nərgiz Faiq qızı
Qasımov Məmmədsafa Məmmədəli oğlu
Qasımov Yusif Əli oğlu
Qasımova Sevinc Vahid qızı
Qəhrəmanov Abbas Əhməd oğlu
Qocayev Rəhim Xəlil oğlu
Quliyev Cəmil Elşad oğlu
Quliyev Elxan Əli Bala oğlu
Quliyev Əyyub Ramiz oğlu
Quliyev Hafiz Məhərrəm oğlu
Quliyeva Səbinə Kasumovna
Quliyeva Şəlalə Şahvələt qızı
Qurbanova Pərvanə Yaqub qızı
Makarova Nina Aleksandrovna
Mehrəliyev Vüsal Akif oğlu
Məhərrəmov Firudin Əliməmməd oğlu
Məmmədli Şamil Kamil oğlu
Məmmədov Ayşad Kamal oğlu
Məmmədov Murad Məmməd oğlu
Məmmədov Sabir Novruz oğlu
Məmmədova Günel Əzizağa qızı
Məsimov Qurban Abdulla oğlu
Mirişli Nazim Ramiz oğlu
Mir-Qasım Ayan Oqtay qızı
Mirzəyev Gülağası Ağa Hüseynoviç
Mirzəyev Rafiq İsmayıl oğlu
Mirzəyev Sucəddin Qiyas oğlu
Mirzəzadə Nicat Qərib oğlu
Musabəyli Nuridə Musa qızı
Musayeva Şükufə İmran qızı
Mustafayev Arzu Əhməd oğlu
Mustafayev Vüsal Sədaqət oğlu
Mustafayeva Laləzar Bəşir qızı
Nağıyev Qasım Gəncalı oğlu
Nəzərov İlham İslam oğlu
Orucova Naidə Mülük qızı
Orucova Sevda Nəbi qızı
Osmanov Fuad Tacəddin oğlu
Ömərov Gümrah Rza oğlu
Poladov Əkram Nicad oğlu
Ramazanova Nigar Azər qızı
Rəhimov Səxavət Şərif oğlu
Rəhimova Rəna Hacıyevna
Rəhmanov Rəhman Tofiq oğlu
Rəsulov İsrafil Fərhad oğlu
Rüstəmov Elşən Mərdan oğlu
Rüstəmov Mahir Eldar oğlu
Rüstəmov Rüstəm Qərib oğlu
Rzayeva Elvira Nuca qızı
Rzayeva Vəfa Əliseyran qızı
Rzayev-Sarabski İsfar Aydın oğlu
Sadıqov Anar Babalı oğlu
Salamova Gülcahan Əhməd qızı
Salmanov Nicat Fərhad oğlu
Seyidov Aqib İbrahim oğlu
Seyidova Ceyla Uran qızı
Səlimli Mirbala Seyidəsgər oğlu
Səmədov Samir Səməd oğlu
Səmədov Şükür Hacıbala oğlu
Süleymanova Elmira Süleyman qızı
Şirinov Asif Əhməd oğlu
Şirinov Aslan Adil oğlu
Yahyayev Taleh Saleh oğlu
Zeynalov Azər Zeynalabdın oğlu
Zeynalov Yaqub Oktay oğlu
Zeynalova Zülfiyyə Əsgər qızı
Zülfüqarova Əminə Cahangir qızı.
2. Azərbaycan Respublikasının Nazirlər Kabineti bu Sərəncamdan irəli gələn məsələləri həll etsin.
3. “İncəsənət xadimlərinə Azərbaycan Respublikası Prezidentinin mükafatlarının verilməsi haqqında” Azərbaycan Respublikası Prezidentinin 2021-ci il 7 may tarixli 2634 nömrəli Sərəncamının (Azərbaycan Respublikasının Qanunvericilik Toplusu, 2021, № 5, maddə 471) 1-ci hissəsi ləğv edilsin.
İlham Əliyev
Azərbaycan Respublikasının Prezidenti
Bakı şəhəri, 10 may 2022-ci il
