Özbəkistandakı Heydər Əliyev adına Azərbaycan Mədəniyyət Mərkəzinin təşəbbüsü və layihəsi, Azərbaycan Respublikasının Mədəniyyət Nazirliyi, Azərbaycan və Özbəkistan Yazıçılar Birliyi, Dünya Gənc Türk Yazarlar Birliyi, “Özbəkistan-Azərbaycan” Dostluq Cəmiyyətinin dəstəyi ilə cari ilin mart ayından keçirilməsinə start verilən Azərbaycanın və Özbəkistanın gənc şairlərinin iştirakı ilə “Məclisi-fəramuşan” növbəti poeziya görüşləri keçirilib.

“Ədəbiyyat və incəsənət” portalı Mədəniyyət Nazirliyinə istinadən xəbər verir ki, onlayn formatda keçirilən poeziya görüşündə çıxış edən Özbəkistandakı Heydər Əliyev adına Azərbaycan Mədəniyyət Mərkəzinin direktoru Samir Abbasov 2022-ci ilin Azərbaycan Respublikasında “Şuşa ili” elan edildiyini və bu münasibətlə rəhbərlik etdiyi Azərbaycan Mədəniyyət Mərkəzi tərəfindən Özbəkistanda çoxsaylı tədbirlərin, layihələrin reallaşdırıldığını bildirib. O, iki əsrdən sonra bərpa olunan məclisin keçirilməsinin əhəmiyyəti, onun iki ölkə arasında dostluq, əməkdaşlığın inkişafına töhfəsi, ədəbiyyat sahəsində yeni istedadların üzə çıxarılması və Türk dünyası arasında ədəbi əlaqələrin genişlənməsinə dəstək olacağını qeyd edib.

Samir Abbasov ötən ay “Məclisi - fəramuşan” poeziya görüşlərinin Ermənistan işğalından azad olunan Azərbaycan mədəniyyətinin paytaxtı Şuşada keçirildiyini və hər iki ölkənin dövlət nümayəndələri, mədəniyyət, ədəbiyyat xadimlərinin rəsmi açılış tədbirində iştirakını, Azərbaycan Dövlət Televiziyasının “Körpü” verilişinin bütövlükdə Şuşada keçirilən “Məclisi - fəramuşan” poeziya görüşlərinə həsr olunmasını tarixi və əlamətdar hadisə olduğunu vurğulayıb.

Diplomat “Məclisi - fəramuşan” poeziya görüşləri vasitəsi ilə iki ölkə arasında ədəbiyyat sahəsində əməkdaşlıq platformasının yaradıldığını, şairlər öz şeirlərini təqdim etməklə yanaşı,  gələcəkdə ədəbiyyatın aktual məsələlərinə dair fikir mübadiləsi aparmaq imkanı əldə edə biləcəklər. S.Abbasov növbəti illərdə məclisinin Türk Dünyasının digər ölkələrinin ədəbiyyat, yaradıcı təşkilatlarının, şairlərinin də cəlb ediləcəyini qeyd edib.

Daha sonra hər iki ölkənin şairləri öz şeirlərini təqdim ediblər.

Azərbaycan şairləri Elvin Əlizadə, Oğuz Alparslan, Gülnarə İsrafil, Emil Rasimoğlu, Samir Mustafayev, Özbək şairlər Başorat Otajonova, Suhrob Ziyo, Rashid Xojamov, Parizoda Axrorxojayeva, Alişer Navoiylik “Məclisi-fəramuşan” poeziya görüşündə öz şeirlərini səsləndiriblər.

Qeyd edək ki,  Azərbaycan tərəfdən məclisin moderatoru Azərbaycan Yazıçılar Birliyinin üzvü, Prezident təqaüdçüsü, şair Fuad Cəfərli, Özbəkistan tərəfindən Özbəkistan Yazıçılar Birliyinin üzvü, şairə Nargiz Asadova olmuşdur.

Məclisdə səsləndirilən şeirlər ilin sonunda Azərbaycan Mədəniyyət Nazirliyi və Özbəkistandakı Azərbaycan Mədəniyyət Mərkəzinin layihəsi əsasında tərcümələri həyata keçirilərək Azərbaycan və Özbək dillərində nəşr olunacaqdır.

Azərbaycan Respublikası Kinematoqrafçılar İttifaqı "Şuşa – qürurum mənim!" devizi ilə ssenari müsabiqəsi elan edib.

İttifaqın mətbuat xidmətinin rəhbəri Əli Vəliyev AzərTAC-a bildirib ki, müsabiqənin keçirilməsində məqsəd təqdim olunan ssenarilərdə Azərbaycan Ordusunun vətənin ərazi bütövlüyü və suverenliyi uğrunda qəhrəmanlıq mübarizəsinə, gənclərimizin hərbi-vətənpərvərlik ruhunun daha da yüksəldilməsi ilə bağlı həyata keçirilən ideoloji-siyasi tədbirlərin səmərəliliyinin artırılmasına, arxa cəbhədə çalışan, Ordumuzun qarşısında duran vəzifələrin reallaşdırılmasına, türk dünyasının mədəniyyət paytaxtı olan Şuşanın simvolunu qoruyan və yaşadan fədakar Azərbaycan gənclərinin fəaliyyətini bütün əlvanlığı, obyektivliyi və romantik zənginliyi ilə əks etdirməkdir.

Müsabiqənin şərtləri aşağıdakı kimidir:

- 18-30 yaşadək bütün gənclər müsabiqəyə ssenari təqdim edə bilər.

- Müsabiqəyə bədii, qısametrajlı film ssenariləri qəbul olunur.

- Müsabiqəyə təqdim olunan ssenarinin hüquqları müəllifə məxsus olmalı, satılmamalı və çəkiliş dövründə olmamalıdır.

- Ssenari orijinal, yəni ekranlaşdırılmamış olmalıdır.

- Ssenarilər müsabiqəyə üç nüsxədə, çap olunmuş və CD diskdə rəqəmsal daşıyıcıda təqdim olunmalıdır.

- Şrift Courier New, ölçü 12 tələb olunur.

- Çap olunmuş ssenarilərdə müəllifin ad və soyadı qeyd olunmamalıdır.

- Müəllif ssenari ilə birgə tərcümeyi-hal, şəxsiyyət vəsiqəsi və iki foto şəkil təqdim etməlidir.

- Hər bir müəllif 1( bir ) ssenaridən artıq təqdim edə bilməz.

- Müsabiqəyə təqdim olunan ssenarilər geri qaytarılmır.

Ssenarilər mayın 19-dan iyulun 25-dək Azərbaycan Respublikası Kinematoqrafçılar İttifaqının ünvanına göndərilməlidir.(Ünvan: Bakı ş. Bülbül pr, 18-30, 2-ci mərtəbə).

Müsabiqənin peşəkar münsiflər heyətini Azərbaycan Respublikası Kinematoqrafçılar İttifaqı təyin edir. Münsiflər heyəti ssenariləri məxfi seçim yolu ilə qiymətləndirəcək. Qalib ssenarilər pul mükafatı və diplomla təltif olunacaq. Ssenarilərin ekranlaşdırılması nəzərdə tutulur.

Müsabiqədə birinci yerin sahibinə 2500, ikinci yerə layiq görülən ssenari müəllifinə 1800, üçüncü yerin müəllifinə isə 1000 manat pul mükafatı veriləcək. Həvəsləndirici mükafatlar da nəzərdə tutulur.

Günün fotosu: “Şəki” restoranı tarixə qovuşur

Milli elementlərlə zəngin olan, mini muzeyi xatırladan “Şəki” restoranı sökülür. Bu tədbir restoranın yerləşdiyi Nəbatət bağının təmiri və genişləndirilməsi və sahibinin dəyişdirilməsi ilə əlaqədardır. 

Foto: 1news

Bu gün çağdaş Azərbaycan ədəbiyyatının görkəmli nümayəndəsi, hamımızın əzizimiz, "Bura Qazaxdır, oğlum" şeiri ilə Qazaxın xəritəsinin sözlə rəsmini çəkən şair Eldar Nəsibli Sibirelin 70 yaşı tamam olur. 

Həyatın keşməkeşli yolları ömür boyu Eldar Nəsiblini təqib etdi. Sovetlərin məhvedici istəklərinin qurbanına çevrildi Eldar Nəsibli Sibirelin ailəsi. Uzaq, soyuq Sibirə sürgün olundular. 70 il öncə may ayının 18-də Sibirin sərt təbiətində bir şair oğlan göz açdı dünyaya. Adına Eldar dedilər. Elə adına layiq yaşadı. Elin, Vətənin dar günündə qələmini silaha çevirdi Eldar Nəsibli Sibirel.

Mən köhnə kişiyəm, bala,

Nuh adlı sirdən gəlmişəm.

Hara Türk ayağı dəyib,

Mən həmin yerdən gəlmişəm.

Uzaq Sibirdən Azərbaycanın ən ucqar sərhəddi olan Qazağa kimi bir tale yaşadı Eldar Nəsibli Sibirel. Şəhid qəbirləri and yeri, səngərlər qibləgahı oldu:

Bu dağlar tərs, avand yerim.

Qayalar sapand yerim.

Hər Şəhid qəbri - and yerim...

Gör neçə pirdən gəlmişəm?!

Doğrunu yazdı, xəbisdən uzaq gəzdi:

Sibirel, əyrilər əyəmməz səni,

Bədxahlar, xəbislər öyəmməz səni.

Öyrənə-öyrənə bəyənməz səni,

Köçürə-köçürə alim olanlar.

Qədim Türk boylarının genetik xüsusiyyətləri ömür yolunun kredosuna çevirdi. Seçdiyi yol həm onun şəxsiyyətinə, həm ömür yoluna, həm də oxucusuna baş ucalığı, üz ağlığı gətirdi:

Azmamışam duman, çəndə,

Aç oxu tarixi məndə.

Şəhidə qəbri sinəmdə

Qazan türk oğlu türkəm mən.

Şairlər haqqın yer üzünə göndərilmiş Söz Elçiləridir. Şairlər taleyini hansısa şeirində mütləq qələmə alır. Olacağı da, ölümü də əvvəldən bilir şairlər - Haqdan gələn səslə. Ölümünü yuxuda görmüşdü Eldar Nəsibli. Vətən yollarında öləcəyini də bilirdi. İlahi verginin ən böyük sübutudur Eldar Nəsibli Sibirel.

Sən - gözümdə ağaran dan,

Damarımda qaynayan qan.

Gəlmişəm yolunda qurban

Olam, yurd yeri, yurd yeri.

12 il öncə yurd yeri ilə görüşə gedəndə qəzaya düşdü. Yurdun yollarında bu dünya ilə vidalaşdı.

Çap olunmayan şeirləri, bir də əziz xatirəsi qaldı bizlərə. Bir gün eşitdim ki, Sibirelin çap yolu gözləyən şeirləri yazı masasının üstündə qalıb - sahibi olmayan övladlar kimi. Bu haldan "Azərbaycan Sənaye Korporasiyası" Açıq Səhmdar Cəmiyyətinin baş direktoru, "Qazax" Xeyriyyə İctimai Birliyinin üzvü Kamran Nəbizadə (Kamran müəllim 2017-ci ildə 107 saylı Qazax Seçki Dairəsindən seçilən millət vəkili idi) xəbər tutdu. Dərhal şairin oğlu Alı  ilə əlaqə saxladı. Sibirelin sonuncu kitabını onun adına, yaradıcılığına layiq şəkildə çap etdirdi. Kamran müəllim Sibirelin 65 yaşına "Seçilmiş əsərlər" kitabını hədiyyə etdi. O kitab həm Eldar Nəsiblinin ruhuna, həm Azərbaycan ədəbiyyatına, həm də bütün qazaxlılara ən böyük ərmağan oldu - söz ərmağanı, kitab ərmağanı, ölməzlik ərmağanı. Bu dünyada bir söz yaşar, bir də əməl. Eldar Nəsibli Sibirel sözü ilə, Kamran Nəbizadə əməli ilə ölməzlik qazandı.

Bu gün ayrılığın təntənə ilə, bizlərin isə üzüntü, kədərlə qeyd etdiyimiz bir doğum günüdür - Eldar Nəsibli Sibirelin doğum günü. Yaşasaydı bəlkə də ən böyük salonlarda anşlaqla qarşılanan yubiley tədbiri düzənlənəcəkdi Eldar Nəsiblinin şərəfinə. Tale, qismət deyilən bir həqiqət var. Tale Eldar Nəsibliyə 70 yaşını Şıxlıda - doğma yurdda Sovetlər tərəfindən min bir əziyyətlərə məruz qalmış doğmaları ilə birgə dünyanın yenə o başında - Göy üzündə, bizdən çox uzaqda qeyd etməyi qismət etdi. 70 yaşınız mübarək olsun, yurd ünvanlı Eldar müəllim.

Səbinə Yusif,

“CARÇIOGLU GROUP" MMC-nin mətbuat xidmətinin rəhbəri, Azərbaycan Jurnalistlər Birliyinin və "Qazax" Xeyriyyə İctimai Birliyinin üzvü

Bu gün mayın 18-i Mədəniyyət Nazirliyi yanında İctimai Şuranın online iclası keçirilib.

İclası çıxış sözü ilə Şuranın sədr müavini Şahin Qədirov açaraq Şura üzvlərini salamlayıb. İrəlidə görüləcək işlər barədə ətraflı müzakirələr aparılıb.

Bölgələrdə ictimai dinləmələrin keçiriləcəyi vurğulanıb. İşlə bağlı müraciətlərə, daxil olan məktublara baxılacağı bildirilib. İyunun 2-si Şuranın ekspertlərinin ümumi yığıncağının keçiriləcəyi nəzərdə tutulub. Bundan əlavə Turanə Orucovanın Şuraya ekspert qismində qəbul olunduğu diqqətə çatdırılıb.

Aysel Kərim,

Mədəniyyət Nazirliyi yanında

İctimai Şuranın mətbuat və ictimaiyyətlə əlaqələr şöbəsinin rəhbəri

Bu gün qazax xalqının türklüyə, türklük düşüncəsinə ərməğan etdiyi böyük fikir və düşüncə adaml Oljas Süleymanovun doğum günü…

Bütün ömrü boyu  “Qızıl alma”ya doğru can atan adam!

Doğum günün qutlu olsun, savaş qardaşım mənim!

Rüstəm Behrudi

Rəsm qalereyası: Toğrul Nərimanbəyov, “Fikrət Sadığın portreti”

Günün fotosu: Tyerri Fremo Kann kinofestivalının rəsmi mövqeyini açıqlayıb

Kann kinofestivalının direktoru Tyerri Fremo deyib: “Biz kommünike açıqlamışıq və mövqeyimizi ortaya qoymuşuq. Rusiya rəsmən festivalda iştirak edə biıməz. Müharibə aparan dövlətin mədəniyyətlə nə işi.”

Foto: Euronews

Türkiyənin “Saküder” Beynəlxalq Sənət və Sənətkarlar Birliyi Dərnəyi həmyerlimiz, Azərbaycan Rəssamlar İttifaqının üzvü, Əməkdar rəssam Rəhim Məmmədovu “2022-ci il sənət” mükafatına layiq görüb.

“Ədəbiyyat və incəsənət” portalı AzərTAC-ın Türkiyə müxbirinə istinadla xəbər verir ki, mükafat Rəhim Məmmədova İzmirdə keçirilən Beynəlxalq Rəsm Sərgisi və Mükafatlandırma mərasimində təqdim olunub. 

Mərasim əsnasında açılan “İzmir sənətdə” rəsm sərgisində Azərbaycan, Türkiyə və Qazaxıstandan olan 40 rəssamın 50 əsəri nümayiş etdirilib. 

Tədbirdə Türkiyənin İzmir üzrə dövlət rəsmiləri iştirak ediblər.

Türkiyəyə 1995-ci ildə yerləşən Rəhim Məmmədov qardaş ölkənin Kayseri vilayətinin Ərciyəz Universitetinin Gözəl sənətlər fakültəsinin rəsm bölümündə müəllim olaraq fəaliyyətini davam etdirib. 1996–2003-cü illər ərzində eyni bölümün rəhbəri seçilən rəssam 2003-2010-cu illərdə bu fakültənin dekanı olub. Hazırda həmyerlimiz İzmirdə yerləşən özünəməxsus emalatxanada fəaliyyətini davam etdirir.

Rəssamın Azərbaycan, Türkiyə, Rusiya, Gürcüstan və Avropanın bir sıra ölkələrində fərdi sərgiləri açılıb.