Milli Məclisin Mədəniyyət komitəsinin sədri Qənirə Paşayevanın fəlsəfə üzrə fəlsəfə doktoru, dosent Faiq Ələkbərli ilə birgə Azərbaycan mühacir ədəbiyyatının görkəmli nümayəndəsi Almas Yıldırımın həyatından, yaradıcılığından bəhs edən “Bir Vətəndən bir Vətənə Almas Yıldırım” kitabının İstanbulda – Türk Ədəbiyyatı Vəqfində təqdimatı olub.

“Ədəbiyyat və incəsənət” portalı AzərTAC-a istinadən xəbər verir ki, “Türk Ədəbiyyatı” jurnalının baş redaktoru İmdat Avşarın aparıcılığı ilə təşkil edilən tədbirdə imzası Azərbaycan oxucusuna yaxşı tanış olan Almas Yıldırımın həyat və yaradıcılığı haqqında məlumat verilib və yeni kitabın məziyyətlərindən danışılıb.

Tədbirdə Türk Ədəbiyyatı Vəqfin rəhbəri, görkəmli ədəbiyyat xadimi Serhat Kabaklı ürək sözlərini bölüşərək, Almas Yıldırımın Azərbaycan qədər Türkiyə üçün də əziz olduğunu bildirib, özəlliklə Elazığda onun irsini çoxlarının bildiyini vurğulayıb. Vəqf başqanı Türkiyə-Azərbaycan ədəbi-mədəni əlaqələrinin bu günü və gələcəyi barədə də fikirlərini bölüşüb, “Bir Vətəndən bir Vətənə Almas Yıldırım” kitabının nəşrinin və ilk təqdimatının İstanbulda baş tutmasını ədəbi əlaqələrin mövcud durumunu ifadə etmək gücündə olduğunu söyləyib. 

Milli Məclisinin Mədəniyyət komitəsinin sədri, Azərbaycan-Türkiyə parlamentlərarası əlaqələr üzrə işçi qrupunun üzvü, təqdim olunan kitabın həmmüəllifi Qənirə Paşayevaya kitabın İstanbulda nəfis tərtibatla işıq üzü gördüyünü bildirərək, təqdimat mərasiminin keçirilməsində əməyi keçən hər kəsə təşəkkür edib.

Azərbaycanın qurtuluşu uğrunda mübarizə aparan və ömrünün böyük hissəsini qardaş ölkədə, Elazığda keçirən şair, müəllim Almas Yıldırımın anadan olmasının 115-ci ildönümü münasibətilə hazırlanmış “Bir Vətəndən bir Vətənə Almas Yıldırım” kitabının yazılmasını müstəqil Azərbaycan aydınlarının vəfa borcunun ifadəsi olaraq şərh edib. Kitabın ilk təqdimatının Türkiyədə keçirilməsinin təsadüfi olmadığını vurğulayan Q.Paşayeva Almas Yıldırımın Azərbaycanı Türkiyədən, Türkiyəni Azərbaycandan ayırmadığını, bütün həyat və yaradıcılığına da yüksək qardaşlıq ruhunun hakim kəsildiyini söyləyib.

Ömrünü Azərbaycanın istiqlaliyyətinə həsr etmiş, bu şərəfli işin çox ağır bədəllərini ödəsə də, öz ideallarından geri dönməmiş, amma doğulduğu eldən-obadan, vətəndaşı olduğu ölkədən didərgin salınmış şairin ruhunu şad edən ən əsas amil kimi Azərbaycanın öz dövlət müstəqilliyini bərpa etməsini göstərən Q.Paşayeva, özəlliklə, 44 günlük Vətən müharibəsindəki tarixi Zəfərin bütün nakam ömürlərə işıq saldığını, haqq dünyasında olan aydınlarımızın ruhunu şad etdiyinin inancı içində olduğunu bildirib. 

“Azərbaycanın hürriyyət şairi, türk dünyasının “Səssiz səsi” Almas Yıldırımın xatirəsinə aid etdiyimiz bu kitabı dəyərli yeni nəsil aydınlarımızdan Faiq Ələkbərli ilə birgə yazmışıq. Əziz Türkiyəmizin oxucuları üçün nəzərdə tutduğumuz kitabın öz missiyasına layiq şəkildə ictimai, ədəbi fikrə təsirsiz ötüşməyəcəyinə inanırıq. İnanırıq ki, qardaş ölkəmizin oxucuları, qədirbilən aydınları bu kitab vasitəsilə Almas Yıldırımın həyat və yaradıcılığına yenidən nəzər salacaqdır. Heç təsadüfi deyil ki, ev sahibi qurumun təsisçiləri də Elazığlıdır və Almas Yıldırımın həyat və yaradıcılığı Bakı qədər Elazığ üçün də əzizdir”. 

Elazığın “Türkiyədəki kiçik Azərbaycan” olduğunu bildirərək Q.Paşayeva Almas Yıldırımın, digər Azərbaycan ədiblərinin xatirəsini daim əziz tutduqları üçün türk xalqına və dövlətinə təşəkkür edib. Q.Paşayeva Türkiyə Cümhuriyyətinin qurulmasının 100-cü ildönümü münasibətilə yazdığı çoxcildlikdə Elazığ haqqında özəl bölümün olduğunu söyləyib. 

Komitə sədri Qazi Mustafa Kamal Paşa Atatürkün Elazığda Almas Yıldırımın yaşamı, yaradıcılığı, əhvalı barədə soruşarkən, “Sayın Cümhurbaşqanım, hər şey yaxşıdır, bircə Xəzər yoxdur” deməsi üzərinə Atatürkün Elazığdakı məşhur gölün adının Xəzər olaraq dəyişdirilməsi təlimatı verdiyini xatırladıb: “Hesab edirik, Xəzər gölünün sahilində, Almas Yıldırımın bir abidəsinin ucaldılması tarixi irsə sayğı olar, Almas Yıldırımın da ruhunu şad edər. İkinci xahişimiz və təklifimiz, Almas Yıldırımın dəfn olunduğu Malatyada da bir xatirə abidəsinin qoyulması ilə bağlıdır. Ümidvarıq, əlaqədar bələdiyyələr, digər qurumlar bu xahişlərimizə, təkliflərə müsbət yanaşar”...

Təqdimatda Azərbaycanın Xalq şairi, Milli Məclisin deputatı Sabir Rüstəmxanlı, “UNİTY Company” şirkətinin təsisçisi Fikrət Əliyev, Türkiyənin tanınmış ictimai-siyasi xadimi Gökhan Türkeş Öngel və başqaları çıxış edib, təqdim olunan kitabın önəmi barədə fikirlərini bölüşüb.

Təqdimat Almas Yıldırımın sözlərinə yazılmış mahnıların ifası ilə davam edib.

Mərasimin sonunda Q.Paşayeva və Azərbaycan nümayəndə heyəti təqdimat iştirakçılarına Qarabağ motivli xatirə hədiyyələri bağışlayıb.

Sonda Qənirə Paşayeva təqdim olunan kitabı oxucular üçün imzalayıb.

Zamiq Hüseynov bu gün - 19 avqust tarixində Mərdəkanda yerləşən "Dalğa beach"dəki "Şazeli Bahçe" səhnəsində konsert verəcək.

Qeyd edək ki, yay boyu əyləncəli konsertlər təşkil edən "Şazeli Bahçe"də Türk və Azərbaycan estradasının ulduzlarının iştirakı ilə Festival davam edir, Zamiqdən sonra 26 avqustda Gülay Zeynallı qonaq olacaq. Daha əvvəl isə Hande Yener, Ferhat Göçer, Alişan, Gülben Ergen, Çengiz Kurtoğlu, İntizar, Namiq Qaraçuxurlu və Röya Ayxan çıxış ediblər. 

Yemək masası daxil proqram təklif olunan konsertə biletlər sayılı saydadır. Səhərə qədər davam edən şouya rezervasiya üçün: 050 777 76 91 // 050 777 76 92

Xəbər verdiyimiz kimi, Baş Prokurorluq ermənilərin Laçın və Xocalıda meşələri yandırması ilə bağlı cinayət işi açıb.

“Ədəbiyyat və incəsənət” portalı xəbər verir ki, moderator.az-a açıqlama verən xalq artisti Nurəddin Mehdixanlı ermənilərin insanlara və təbiətə qarşı vəhşiliyini beynəlxalq miqyasda ifşa etmək üçün sənətin, ədəbiyyatın imkanlarından istifadə etməyin vacibliyini vurğulayıb. 

Xalq artisti qeyd edib ki, bunun üçün siyasi və hüquqi vasitələrlə yanaşı, sənətin imkanlarından da istifadə etmək vacibdir:

"Ermənilərin və erməniliyin nə olduğunu dünya ictimaiyyətinə anlatmaqdan ötrü müxtəlif vasitələrə ehtiyac var. Bu vasitələrdən ən güclülərindən biri də incəsənətdir.  Biz erməni vəhşiliyi ilə bağlı həqiqətləri sənətin, ədəbiyyatın, kinonun, teatrın dili ilə yaymalıyıq. Onlar üzdə özlərini mələk kimi göstərirlər. Əsl niyyətləri isə türkləri, azərbaycanlıları qırmaq, məhv etmək, onları soyqırımına məruz qoymaqdır. Onlar Allahın yaratdığı təbiətə qarşı da vəhşi münasibət göstərirlər.

Biz incəsənət dili ilə bu cinayətləri beynəlxalq ictimaiyyətin diqqətinə çatdırsaq, bunun təsiri daha güclü, daha effektiv olar. Bütün bunlar onu göstərir ki, ermənilərin Yer kürəsində vətən dedikləri heç bir şey yoxdur. Vətənləri olmadığına görə, kimlərinsə vətəni olan yerlər də bunlara düşmən kimi görünür. Onlar meşələri qırır, bulaqları məhv edir, onları betonlayırlar. Onlar tikili evləri, meşləri yandırırlar. Bunlar həm də onu göstərir ki, ermənilər özləri də bilir ki, bütün bunlar onlara məxsus deyil. Çox təəssüf ki, 1-2 istisna çıxmaq şərti ilə kinomuzda, ədəbiyyatımızda açıq şəkildə ermənilərin əsl mahiyyətini ortaya qoyan sənət əsəri yoxdur. Biz savaş meydanında onlara öz yerlərini göstərdiyimiz kimi incəsənət sahəsində də göstərməliyik və bu istiqamətdə ciddi addımlar atmalıyıq".

“Ədəbiyyat və incəsənət” portalı Yeni paylaşımlar rubrikasında sevilən şair Rüstəm Behrudinin “Gecəyə doğru” şeirini təqdim edir. 

GECƏYƏ  DOĞRU

Gecə... Təklik... Qaranlıq...

Kim qurtarar de məni?

Ulduzu yox, Ayı yox,

Neylirəm bu gecəni?

Mən bu ömrü içimi,

Yeyə-yeyə bitirdim.

Kimim vardı unutdum,

Nəyim vardı itirdim.

Gizlənməyə yer də yox,

Axtaran yox bəlkə də;

Gündüzü gecəsindən

Bu qaranlıq ölkədə...

Bitir hər şey, ilahi.

Alnım ağ, üzüm qara.

Bu sonuncu badədi,

Bu sonuncu siqara...

Gecə... Təklik... Qaranlıq...

Kim qurtarar de məni.

Ulduzu yox, ayı yox,

Neylirəm bu gecəni?

“Şuşa İli” ilə əlaqədar Azərbaycan İstiqlal Muzeyi tərəfindən həyata keçirilən “Şuşa - Qarabağın dünəni, bu günü, sabahı” adlı layihə davam edir. 

Layihə çərçivəsində təqdimatlardan növbətisi görkəmli maarifçisi, pedaqoq, metodist, ədəbiyyatşünas, publisist Firidun bəy Köçərliyə həsr olunub.

Firidun bəy Köçərli 1863-cü il yanvarın 26-da Şuşa şəhərində anadan olub. 1872–1876-cı illərdə Şuşada Mirzə Kərim Münşinin mədrəsə məktəbində təhsil alıb. Daha sonra 1876-cı ildə Şuşadakı rus məktəbinə daxil olur. 1879–1885-ci illər ərzində o, Zaqafqaziya Müəllimlər Seminariyasında təhsil alır.

Təhsilini bitirdikdən sonra İrəvan gimnaziyasında, Qori Müəllimlər Seminariyasının (QMS) Azərbaycan şöbəsində müəllim işləyib. 1917-ci ildən şöbənin inspektoru təyin olunub. 1918-ci ildə F.Köçərli QMS-nin Azərbaycan şöbəsini Qazax şəhərinə köçürüb, onu müstəqil milli seminariyaya çevirib və ilk direktoru (1918-1920) olunub.

Firidun bəy Köçərli zəngin yaradıcılıq yolu keçib. Onun “Məişətimizə dair” məqalələr silsiləsi, “Azərbaycan türklərinin ədəbiyyatı”, “Qafqaz üdəbası və şüərasının tərcümeyi-halı”, “Ədəbiyyata bir nəzər” adlı əsərləri nəşr olunub.

F.Köçərli 1906-cı ildə “Molla Nəsrəddin” jurnalının nəşrə başlamasını təqdir edərək, jurnalın birinci üç aylıq fəaliyyəti barədə icmal hazırlayıb, “Tiflisskiy listok” qəzetində dərc etdirib.

Firidun bəy Köçərli 1920-ci ilin mayında “xalqa xəyanətdə”, “milli nifaq törətməkdə” ittiham olunmuş və güllələnməsi haqqında qərar çıxarılıb. Qərar təsdiq edilib və hökm yerinə yetirilib.

“Sevil Beynəlxalq Qadın Sənədli Film Festivalı”nın “Festivallardan seçmələr” bölməsində yer alan “Bal ölkəsi” sənədli filminin nümayişi keçirilib.

“Ədəbiyyat və incəsənət” portalı AzərTAC-a istinadən xəbər verir ki, onlarla izləyicinin bir araya gəldiyi nümayişdə filmin rejissoru Tamara Kotevska da iştirak edib. Nümayişdən sonra onunla izləyicilər arasında maraqlı müzakirə baş tutub.

Qeyd edək ki, “Bal ölkəsi” ekran əsəri “Sundance” film festivalında üç mükafat və 92-ci akademiya mükafatlarında “Ən yaxşı beynəlxalq bədii film” və “Ən yaxşı sənədli film” kateqoriyalarında iki nominasiya daxil olmaqla, kinofestivallarda çoxsaylı mükafatlar və nominasiyalar qazanıb. “Bal ölkəsi” filmi Oskar tarixində hər iki kateqoriya üzrə nominasiya qazanan ilk sənədli filmdir.