Super User
“18-ci Karpat Hövzəsi Ənənəvi Tekstil Festivalı”nda ölkəmizi Mədəniyyət Nazirliyinin nümayəndəsi təmsil edib
Mədəniyyət Nazirliyinin Muzey, qalereya və sərgilər şöbəsinin Muzey və daşınar mədəni irs sektorunun müdiri, sənətşünaslıq üzrə fəlsəfə doktoru Altun Mikayıllı 4-6 mart 2022-ci il tarixlərində keçirilən “18-ci Karpat Hövzəsi Ənənəvi Tekstil Festivalı”nda qədim tarixə, zəngin ənənələrə malik Azərbaycan dekorativ tətbiqi sənət sahələri olan xalça və bədii tikmə nümunələrinə dair “Azərbaycan xalçaları və tikmələri” adlı məruzə və təqdimatla çıxış etmişdir. O, Azərbaycan xalça sənəti və bədii tikmələri, o cümlədən onlardan istifadə qaydaları, xalqımızın həyatındakı rolu və s. haqqında iştirakçılara geniş məlumat vermişdir. Altun Mikayıllı festivalda iştirakına və uğurlu təqdimatına görə təşkilatçılar tərəfindən sertifikata layiq görülmüşdür.
Qeyd edək ki, festival Macarıstanın Bekeşçaba şəhərində Beynəlxalq Türk Mədəniyyəti Təşkilatı (TÜRKSOY), Macarıstan İrs Evi, Ənənəvi Macarıstan İncəsənəti Assosiasiyası, Bekeşçaba şəhər Xalq Sənəti Dərnəyinin və Gal Ferenc Universitetinin təşkilatçılığı ilə keçirildi. Festivalı açılış nitqi ilə açan TÜRKSOY-un baş katibi Dusen Kasseinov ənənəvi xalq sənət nümunələrinin yaşadılmasının vacibliyini vurğulayaraq belə tədbirlərin əhəmiyyətli olduğunu qeyd etdi. Festival çərçivəsində 300 nəfərin iştirakı ilə konfrans və ənənəvi tikmə, geyim və tekstil sahəsində çalışan sənətkarların 2000-ə yaxın əl işi nümunələrindən ibarət sərgi təşkil edilmişdir.
Festivalda Türkiyə, Sloveniya, Slovakiya, Bolqarıstan, Qırğızıstan, Qazaxıstan, Koreya və bir çox digər ölkələrin nümayəndələri də iştirak etdilər.
Mədəniyyət naziri Anar Kərimov Lənkəranda mədəniyyət müəssisələrinin fəaliyyəti ilə tanış olub
Azərbaycan Respublikasının Mədəniyyət Nazirliyi sistemində fəaliyyətin və idarəçiliyin təkmilləşdirilməsi, regionlardakı mədəniyyət müəssisələrində işinin effektivliyinin artırılması məqsədilə bölgələrə səfər planı hazırlanıb. “Ədəbiyyat və incəsənət” portalı Mədəniyyət Nazirliyinə istinadən xəbər verir ki, plana uyğun olaraq mədəniyyət naziri Anar Kərimov martın 10-da Lənkəran şəhərinə səfər edib.
Xatırladaq ki, nazir fevral ayının əvvəlində qərb bölgəsinə səfər etmiş, Gəncə və Şəmkirdə mədəniyyət ocaqlarına baş çəkmişdi.
Nazir Anar Kərimov və Lənkəran Şəhər İcra Hakimiyyətinin başçısı Taleh Qaraşov əvvəlcə ümummilli lider Heydər Əliyevin şəhərin mərkəzindəki abidəsini ziyarət edib, önünə gül dəstəsi qoyublar.
Anar Kərimov icra başçısının müşayiəti ilə Lənkəran şəhər Heydər Əliyev Mərkəzinə baş çəkib, müəssisənin fəaliyyəti ilə tanış olub. Foyedə açılan “Mərhəmət dünyanı xilas edəcək” adlı sərgi ilə tanışlıq zamanı məlumat verilib ki, təqdim olunan əsərlər mərkəzin rəsm studiyasının üzvləri tərəfindən hazırlanıb.
Anar Kərimov və Taleh Qaraşov vaxtilə Lənkəran Dövlət Rəsm Qalereyasının fəaliyyət göstərdiyi yerli əhəmiyyətli tarixi abidə – Dairəvi qalanı ziyarət ediblər.
Bildirilib ki, Dairəvi qala restavrasiya olunsa da, 2015-ci ilin fevral ayında güclü qar yağması nəticəsində qalanın dam örtüyünün müəyyən hissəsi dağılıb. Tikili uzun illər təmir olunmadığından yağıntılar binanın içərisinə daxil olmaqla daxili konstruksiyaya öz mənfi təsirini göstərib. Lənkəran Şəhər İcra Hakimiyyəti tərəfindən Dairəvi qalanın əsaslı təmiri ilə bağlı Nazirlər Kabinetinə və əlaqədar qurumlara müraciət edildikdən sonra tarixi abidənin bərpası Mədəniyyət Nazirliyində 2020–2023-cü illərdə dövlət büdcəsindən əsaslı vəsait qoyuluşu hesabına icrası nəzərdə tutulan layihələrin siyahısına daxil edilib. Hazırda abidənin əsaslı təmiri ilə bağlı layihə-smeta sənədləri hazırlanır. Dövlət büdcəsindən vəsait ayrılandan sonra burada təmir-bərpa işlərinə başlanılacaq.
Qeyd edək ki, Lənkərаn Dövlət Rəsm Qаlеrеyаsı hazırda fəaliyyətini müvəqqəti olaraq şəhər Mədəniyyət Mərkəzində davam etdirir.
Sonra Anar Kərimov Lənkəran Tarix-Diyarşünaslıq Muzeyinə baxış keçirib. Nazir 1924-cü ildən fəaliyyət göstərin muzeyin ekspozisiyasının müasir tələblərə uyğun yenidən qurulmasının vacibliyini bildirib, bununla bağlı müvafiq tapşırıqlar verib. Bildirək ki, muzey 1991-ci ildə Lənkəranın ilk çoxmərtəbəli binası olan Mir Əhməd xanın sarayına köçürülüb. Nazirə məlumat verilib ki, hazırda muzeydə 6678 eksponat mühafizə olunur. Muzeydəki eksponatlar Lənkəranın zəngin tarixini, mədəniyyətini, adət-ənənələrini əks etdirir.
Daha sonra mədəniyyət naziri tank qoşunları generalı, iki dəfə Sovet İttifaqı Qəhrəmanı Həzi Aslanovun Lənkəran şəhərindəki ev-muzeyində olub. Bildirilib ki, muzey 1969-cu ildə açılıb və beş ekspozisiya zalından ibarətdir. 125 kvadratmetr sahəsi olan muzeydə 2373 eksponat mövcuddur.
Lənkəran şəhərinin mərkəz hissəsində yerləşən və XIX əsrdə inşa olunan tarixi-memarlıq abidəsi – Böyük bazar məscidinə baxış keçirən mədəniyyət naziri məscidin yaxınlığındakı yerli əhəmiyyətli tarix-memarlıq abidəsi Hacı Qurban hamamının (XIX əsr) da vəziyyəti ilə tanış olub.
Lənkəran mayakı ilə tanışlıq zamanı Anar Kərimova məlumat verilib ki, mayakdan onunla eyni vaxtda inşa edilən Dairəvi qalaya vaxtilə yeraltı yol var imiş. 1747–1786-cı illərdə tikildiyi ehtimal edilən mayak Lənkəran qalasının dayaq məntəqələrindən biri olub.
Nazir Lənkəran şəhər Uşaq rəssamlıq məktəbində olub. Diqqətə çatdırılıb ki, təhsil ocağının yerləşdiyi bina tarixi əhəmiyyəti nəzərə alınaraq yeni aşkar olunmuş abidələrin siyahısına daxil edilib. Anar Kərimov tikilinin qorunması və bərpası, habelə binanın Mədəniyyət Nazirliyinin balansına keçirilməsi ilə bağlı müvafiq tapşırıqlarını verib.
Qeyd edək ki, binanın qəzalı vəziyyətdə olması səbəbindən Uşaq rəssamlıq məktəbi müvəqqəti olaraq Lənkəran şəhər Mədəniyyət Mərkəzində fəaliyyətini davam etdirir.
Füzuli Dövlət Dram Teatrında Milli Teatr Günü üçün “Nar şirəsi”
Milli Teatr Günündə Füzuli Dövlət Dram Teatrında Səbinə Haqverdiyevanın "Nar şirəsi" pyesi əsasında bir pərdəli psixoloji dram janrında hazırlanmış eyniadlı tamaşanın premyerası olub.
“Ədəbiyyat və incəsənət” portalı Mədəniyyət Nazirliyi yanında İctimai Şuranın mətbuat katibi Aysel Kərimə istinadən xəbər verir ki, premyerada əsəri rus dilindən tərcümə edən xalq artisti Vidadi Həsənov, Azərbaycan Respublikası Mədəniyyət Nazirliyi yanında İctimai Şuranın sədri Gəray Əlibəyov, Kürdəmir Regional Mədəniyyət İdarəsinin rəisi Faiq Xudanlı, “Human” teatrının direktoru Şamil Heydərov, Füzuli Rayon İcra Hakimiyyətinin nümayəndəsi Qabil Əliyev iştirak edib. Həmçinin rayon ictimaiyyəti, məktəblilər premyerada olublar.
Tamaşadan əvvəl teatr sexləri (musiqi, geyim, dekorasiya) ilə tanış olunub, tamaşa üçün hazırlanan eskiz, paltar, butaforlara baxış keçirilib. Teatrın unudulmaz sənətkarlarına, rəğbət qazanmış
tamaşalarına həsr olunan Foto stendə baxılıb.
Tamaşanın quruluşçu rejissoru Nicat Mirzəzadə, quruluşçu rəssamı Ellinaz Balaşova, musiqi tərtibatçısı Sənan Sevindikzadədir. Tamaşada rolları Sehran Xanlarov, Sevinc Məmmədova, İntizar Quliyeva, Emin Abışov, Nicat Süleymanzadə, Orxan Təvəkküllü və başqaları ifa edir. Tamaşada həyatı sevmək, yaşamaq mübarizəsi, cəmiyyətin fiziki qüsurlu insanlara sərgilədiyi mövqe, nəcib insanların təsiri altında belə insanların sağalması ön plana çəkilir.
Sonda premyera iştirakçıları xatirə şəkli çəkdiriblər.
Tammetrajlı bədii film müsabiqəsinin bədii seçim mərhələsinin nəticələri açıqlanıb
Mədəniyyət Nazirliyinin 2021-ci ilin dekabr ayında elan etdiyi “Tammetrajlı bədii film layihələrinə dəstək 2022” müsabiqəsinin bədii seçim mərhələsi yekunlaşıb.
Nazirlikdən bildirilib ki, müsabiqəyə ümumilikdə 45 layihə təqdim edilib. Münsiflər heyətinin müzakirələri və qiymətləndirməsi nəticəsində 45 layihədən 12-si növbəti mərhələyə - pitçinq mərhələsinə buraxılıb.
Müsabiqənin pitçinq mərhələsi martın 18-də Dövlət Film Fondunda təşkil olunacaq. Pitçinqdə layihələrin təqdimatı müəlliflər tərəfindən həyata keçiriləcək, iştirakçılar layihələrini açıq pitçinqdə təqdim edəcəklər. Müsabiqənin pitçinq mərhələsi canlı yayım formasında Dövlət Film Fondunun rəsmi yutub kanalında ictimaiyyətə nümayiş etdiriləcək. Müsabiqənin qalibləri pitçinqdən sonra Mədəniyyət Nazirliyinin rəsmi internet saytında (www.culture.gov.az) və “Mədəniyyət” qəzetində elan ediləcək.
Müsabiqə milli kinematoqrafiya sahəsində fəaliyyət göstərən yaradıcı şəxslərə dəstək olmaq, bu istiqamətdə çalışan müstəqil prodüser mərkəzlərinin və istehsal şirkətlərinin fəaliyyətini stimullaşdırmaq, milli-mənəvi və ümumbəşəri dəyərləri filmlərlə təbliğ etmək, kino peşəkarlarının təcrübələrini daha da artırmaq məqsədilə keçirilir. Qeyd edək ki, hər qalib layihəyə ən çox 100.000 (yüz min) manata qədər maliyyə dəstəyinin göstərilməsi nəzərdə tutulur. Müsabiqənin ümumi dəstək fondu 300.000 (üç yüz min) manat təşkil edir.
Müsabiqənin münsiflər heyətinin sədri Oleq Səfərəliyev, münsiflər heyətinin üzvləri İlqar Fəhmi, Mehriban Ələkbərzadə, Asif Rüstəmov, Şamil Süleymanov, Nadir Əliyev və Hacıbala Səfərovdur.
Vokalçı Türkay Məlikova “Dünya Qadın 2022” mükafatına layiq görülüb
Tanınmış vokalçı, Cafarlinsky production təsisatının Art direktoru Türkay Məlikova ilin ən uğurlu xanımı kimi “Dünya Qadın 2022” mükafatına layiq görülüb.
Bu münasibətlə xanım ifaçı öz sevincini sosial mediada bu cür bölüşüb: “Builki 8 mart hədiyyəm cox xususi oldu. İlin ən uğurlu xanımı olaraq "Dunya Qadin 2022" mukafatına layiq görüldüm.
Özü də bu mukafata təkcə vokalçı olaraq deyil, həmçinin Cafarlinsky production-un Art Direktoru olaraq layiq görülməyim məni ikiqat xoşbəxt etdi. Xüsusi təşəkkürüm, həmişəki kimi, mənim əzizim, doğmam, uğuruma uğur, gücumə güc qatan insana - Nurlan Cəfərlinskiyədir.”
Ötən günün ən çox oxunan xəbəri Özcan Dənizin səhnədə etirafı olub
Populyar türk müğənnisi Özcan Dəniz keçmiş həyat yoldaşı Feyze Aktana qarşı zorakılıqda suçlandığı iddia edilən məhkəmə qarşısında olduğunu səhnədə dilə gətirib.
“Ədəbiyyat və incəsənət” portalı SonDakika xəbər ajansına istinadən məlumat verir ki, bu, günün ən çox izlənən xəbəri olub. Dünən Özcan Dəniz çıxış edərkən deyib: "Bu, mənə qarşı çox böyük, kobud bir ədalətsizlik idi. Bu ittihamı puça çıxaran qərarın Ümumdünya Qadınlar günü, martın 8-də qəbul edilməsi isə çox yerinə düşdü. Bir qadın üzərində zorakılıq etmək kimi ittihama tuş gəlmək, təmiziyini də sübut etmək çətin bir şeydir. Amma hər halda, mənimlə belə ədalətsizlik edənləri bağışlayıram."
Günün fotosu: Rusiyanın Çernobıl AES-ə nəzarəti xof və qorxu yaradır
Günün fotosu: Rusiyanın Çernobıl AES-ə nəzarəti xof və qorxu yaradır
Rusiya Çernobıl atom elektrik stansiyasını nəzarətə götürdükdən sonra oranın 200 işçisi fasiləsiz olaraq işlədilir, stansiyanın ətraf dünya ilə əlaqəsi kəsilib.
Foto: Euronews
Beynəlxalq Muğam Mərkəzində xanəndə Canəli Əkbərovun xatirə gecəsi keçirilib
Dünən axşam Beynəlxalq Muğam Mərkəzində Xalq artisti Canəli Əkbərovun xatirə gecəsi keçirilib.
AzərTAC xəbər verir ki, tədbir iştirakçıları əvvəlcə xanəndə Canəli Əkbərovun ifasının lentə alındığı videoya baxıblar.
Əməkdar artist Azad Şükürov bildirib ki, bu təşəbbüs Azərbaycan Dövlət Mədəniyyət və İncəsənət Universitetinin Muğam kafedrasının müdiri Xalq artisti Teyyub Aslanov tərəfindən irəli sürülüb: “O zaman Canəli sağ idi. Təəssüf ki, bu tədbir onun sağlığında keçirilmədi. Bir yerdə çalışdığımız, acılı-şirinli günləri keçirdiyimiz insanları unutmamalıyıq. Canəli Əkbərov ömrünü Azərbaycan musiqisinin inkişafına həsr edən sənətkarlardan olub”.
Tədbirdə qeyd olunub ki, Canəli Əkbərov milli xanəndəlik məktəbinin nailiyyətlərini layiqincə davam etdirib və Azərbaycanın musiqi mədəniyyəti xəzinəsinə töhfələr verib. Sələflərinin yaradıcılıq ənənələrinə sadiqlik və muğamın klassik ifa tərzinin qorunub saxlanması onun altmış ildən artıq müddət ərzindəki fəaliyyətinin başlıca qayəsini təşkil edib. Canəli Əkbərovun ifasında səslənən “Orta mahur”, “Çahargah”, “Arazbarı”, “Heyratı” və digər qədim muğamlarımız, bir çox təsniflər və xalq mahnıları, həmçinin muğam operalarında yaratdığı partiyalar Azərbaycan musiqi mədəniyyətinin inciləri sırasında özünəməxsus yer tutur.
Gecədə Xalq artistləri Teyyub Aslanov, Gülyaz Məmmədova, Əməkdar artistlər Ruzə İbişova və Bəsti Sevdiyeva çıxış edib, “Ay qəşəng Ceyran”, “Bayatı-Şiraz”, “Mahur”, “Şahnaz” təsnifləri, Leyli və Məcnun operasından görüş səhnəsi, Aşıq Qərib operasından “Ayrılıq səhnəsi”nə aid partiyalar ifa olunub.
Qeyd edək ki, Canəli Əkbərov milli musiqi mədəniyyətinin inkişafı sahəsində nailiyyətlərinə görə 2000-ci ildə “Şöhrət”, 2010-cu ildə “Şərəf” və 2020-ci ildə 1-ci dərəcəli “Əmək” ordenləri ilə təltif edilib
Paris meriyası Kiyev baletinə Şatle teatrının səhnəsini verib
Paris səhnəsində çıxışdan sonra Kiyev baletinin gənc solistləri martın 9-da vətənə dönməli idilər. Amma Ukraynada müharibənin getməsi səbəbindən onlar vətənə dönə bilmirlər.
“Ədəbiyyat və incəsənət” portalı Euronews-a istinadən xəbər verir ki, fiziki olaraq kiyevli balerinalar Parisdə səhnədə olsalar da ruhən evdə -Ukraynada idilər, hər birinin orda əzizi düşmən işğalına məruz ərazidə qalmaqdadır.
Martın 8-də Kiyev Milli baletinin Fransa paytaxtında keçirilən turnesinin sonuncu tarixi olmalı idi. Başqa şəraitdə Dyagilevin ilk "rus mövsümü" nın keçdiyi və Nizhinskinin rəqs etdiyi əfsanəvi Şatle Teatrının səhnəsində çıxış etmək yalnız arzu olaraq qalardı, amma…
"Kiyev baletinin Parisdə qastrol səfərlərində olduğunu və təbii ki, indi evə qayıda bilməyəcəyini biləndə biz bütün resursları səfərbər etdik", - deyə Parisin meri Ann İdalqo bildirir. “Biz qərara gəldik ki, kiyevlilərə məhz Şatle səhnəsini müvəqqəti istifadəyə vermək lazımdır".
“Biz çox çətin günlər keçiririk, mənim sözüm yoxdur... Və birdən fransızların bu sürprizi. Biz bunu gözləmirdik, yer üzündə sevginin hökm elədiyini göstərdilər bizə”, - bu sözləri isə truppanın direktoru
İvan Kozlov söyləyir.
Kiyev balet truppasının direktoru
Fransada truppanın yalnız bir hissəsinin, əsasən, gənc rəqqasların qastrol səfərində oluğunu qeyd edir. Kiyev baletinin ulduzları Ukraynada qalıb və indi Parisə yetişməyə çalışırlar.
Parisdəki gənc rəqqaslardan biri isə mehriban insanların müharibə bürümüş Ukraynadan çıxardığı kiçik qızını götürmək üçün Ukrayna sərhədinə yollanıb. Allah köməyi olsun!
Paris hakimiyyəti Ukrayna rəqqaslarını yalnız Şatle-ın səhnəsi ilə deyil, həm də müvəqqəti mənzillərlə də təmin ediblər.
Dünya yaxşı insanlardan xali deyilmiş.
Rəsm qalereyası: Rövşən Bayramov, “Şuşa mənzərələri” silsiləsindən
Rəsm qalereyası:
Rövşən Bayramov, “Şuşa mənzərələri” silsiləsindən
