“Ədəbiyyat və incəsənət” portalının “Ulduz” jurnalı ilə birgə Biri ikisində layihəsində yaşı 35-ədək olan şairlərin şeirlərinin dərcini davam etdiririk. Bu gün növbə Səddam Laçınındır.

BİR QARIŞLIQ ADAM

Günəşi görmək üçün gecə baxırsan göyə...

Hamı sənə kor deyir, necə baxırsan göyə?

Çox qarışıq adamsan.

Biz isə ağıllıyıq, hər şeyi "düz" bilirik,

Ürəyin dünya boyda olsa da, biz bilirik,

Bir qarışlıq adamsan.

Saçında ağ tellərin qaralarla yarışır,

Belə də davam elə, sənə də bu yaraşır,

Tam yarışlıq adamsan.

Gözlərindən axanlar gözünə bir də baxmır,

Axı niyə baxanlar üzünə bir də baxmır?

Bir baxışlıq adamsan?

Ahın yerdən göylərə heç çatmasın, əzizim,

Səni qara buludlar aldatmasın, əzizim,

Bir yağışlıq adamsan.

YUXU YOZMA

Yum gözünü, bəlkə, hər şey düzəldi?
Bir yuxu ki gerçəyindən gözəldi,
Oyanma.
Oyandınsa, yuxulara inanma.

Bir yuxudu gerçək olan, bir həyat,
Aç gözünü, inanmasan, bir də yat.
Yubanma.
Yubandınsa, əbədi yat, oyanma.

Ölmüşəmmi ağlayasan, gözəlim?
Kim desə ki ağlamaqla düzəlir,
İnanma.
İnandınsa, ağla, qızım, utanma.

Bir eşqi ki qurban verdik bir səhvə,
Yüz dəfə də “gəlmə” desəm, bir dəfə
Gəl, amma
Bil ki, səni gözləyən var,
Yubanma.

QƏRİBƏ QADIN

Sən qəribə qadınsan,

Nəfəsin od kimidir,

Buz kimi görsənirsən.

Sən öz dərdi bir yana,

Hamının dərdin çəkən

Qız kimi görsənirsən.

Sən qəribə qadınsan,

Gözlərində həqiqət,

Dilində yalan yatır.

Ürəyində məhəbbət,

Qoynunda ilan yatır.

Sən qəribə qadınsan,

Yalandan dilin küsüb,

Dodaqların öpüşmür.

Gözlərin açıq qalıb,

Kirpiklərin görüşmür.

Özünü danlamaqla,

Ağlamaqla ötüşmür.
Sən qəribə qadınsan,

Əməlin arzularla

Bir gün üst-üstə düşmür.

BƏXTSİZ

Ay bəxti üzündən qara,
Qısqanırmı kömür səni?
Ömür deyib yaşayırsan,
Öldürəcək ömür səni.

Bu ki, heç kimə sirr deyil,
Ömür ölümlə bir deyil,
Dünya ölməli yer deyil,
Sevdiklərin gömür səni...

TREMOR RƏSSAM

Dağınıq otaq...

Fonda Mozart... Reqviem-d minor.

Kətan parça üzərində

Tələskən barmaqlar – tremor.

İki dünya bir olur hər səhər,

İki adam qovuşur hər axşam.

Səsləri kəsən bəstəkar,

Əlləri əsən rəssam,

Notlara hakim adam,

Rənglərə kəniz qız.

Bir gözü gölməçə,

Bir gözü dəniz qız…

UNUDULAN QADIN

Göz yaşını qurutmağın yanında
Bir dənizi qurutmağa nə var ki?
Dərd eləmə, qurban olum dərdinə,
Unut məni, unutmağa nə var ki?

Mən ki sənin sevmədiyin adamam,

Elədirsə, kimin dərdin çəkirsən?

Get tarının, mizrabının dərdin çək,

Niyə gəlib simin dərdin çəkirsən?

Axtardığın mən olsam da, əzizim,

İtirdiyin mən deyiləm, bilirsən.

Mən olsam da, itirdiyim adamı

Axtarmaram, sən deyiləm, bilirsən...

Bir bağçada gül olsan da, sonunda

Ləçək-ləçək qurudulan qadınsan.

Unut məni, unutmağa nə var ki?

“Ədəbiyyat və incəsənət”

(27.11.2023)

Əlibala Məhərrəmzadə, “Ədəbiyyat və incəsənət”

Əslində, uğur formulası ümumi olduğu qədər də spesifikdir, yəni bir xalq üçün lazım olan uğur qazanmaq keyfiyyətləri başqa bir xalq üçün aparıcı olmaya da bilər. Məsələn, Azərbaycanda (ümumən Şərqdə) uğur formulasında mental qayda-qanunlara, davranış tərzinə istinadı, möhkəm ailə faktorunun, nümunəvi tərbiyənin rolunun hegemonluğunu, milli kökə və dini mənsubiyyətə bağlılıq faktorunu spesifikliyə aid edə bilərik.

Mən öz şəxsi təcrübəm, eləcə də illərdir ki, davam edən müşahidələrim nəticəsində uğurun qazanılmasında aşağıdakı parametrləri xüsusi olaraq qabardardım:

2) Möhkəm ailəyə malik olmaq.

Uğura doğru yönələn gəncin möhkəm, sağlam ailədən çıxması, bir-birini anlamaq, bir-birinə güzəştə gedə bilmək üstünlüklü, münasibətlərin inam və etibar üzərində bərqərar olduğu, dedi-qodusuz, qanqaraçılıqdan uzaq, problemsiz ailənin üzvü olması da şərtdir. Belə ailə bütün qüvvələrini həyat hədəfinə yönəltməkdə, bir növ, sənin səfərbəredicin ola bilir.

Burada kişi-qadın münasibətləri də vacib detaldır. Fikri və arzuları üst-üstə düşən ərlə arvadın həyatı qədər gözəl həyat ola bilməz. Möhkəm ailə faktorunun təməlində ailə başçısının ağıllı siyasət yürütməsi (ailəni kiçik dövlət adlandırırlar) başlıca rol oynayır. Gənclər ailə həyatı qurarkən mütləq doğru seçim zərurətini də lazımınca dərk etməlidir. Hər cəhətdən bir-birini təmin edən cütlüklər ailə həyatı qurmalıdırlar. Hətta, belə bir deyim də var: çalış özünlə bir boyda olan arvad alasan, özündən hündürünü alsan ayaqları altında qalıb taptalana bilərsən.

***

Öncəki günlər isə digər parametrləri açıqlamışdım:

1) Nümunəvi tərbiyə almaq.

Həyatda uğur qazanmaqçün nümunəvi ailədən çıxmaq, ziyalı, dünyagörüşlü, cəmiyyət üçün etiket sayıla biləcək valideynlərdən tərbiyə almaq əlavə, hətta deyərdim ki, çox böyük şərt və stimuldur. Sonrakı mərhələdə bağça və məktəb müəllimlərindən, kollektivdə ustad və qabaqcıllardan, cəmiyyətdə liderlərdən, örnək götürüləcək hər bir şəxsdən əxz edilən tərbiyə, xarakter formalaşdıracaq öyüd, nəsihət və vərdişlər fərdin tam kamilləşməsinə xidmət edir, bu da onun uğur yolunda daha qətiyyətli addımlar atmasına təsir göstərir.

Nümunəvi tərbiyə alan insan sonucda mütləq özü nümunəvi tərbiyəsi olan insana çevriləcək. Bu tip insan da öz növbəsində ətrafındakılara tərbiyəli olmaq mədəniyyətini aşılamağa başlayır, gələcək nəslin tərbiyə əxz edərək formalaşmasına təkan verir.

Primitiv bir misal çəkim. Tərbiyəli olmaq o demək deyil ki, hər hansı bir məclisdə yeməyi süfrəyə dağıtmayasan. Tərbiyəli olmaq odur ki, yanında əyləşən şəxs bunu edəndə onu pərt vəziyyətə salmamaq üçün özünü görməməzliyə vurasan.

“Ədəbiyyat və incəsənət”

(27.11.2023)

Kənan Məmmədli, “Ədəbiyyat və incəsənət”

Bugünə təsadüf edən əlamətdar hadisələri diqqətinizə çatdırıram:

27 noyabr. İynə və sap günü

Nədir bu günün anlamı, dərzilərləmi bağlıdır? Dərhal deyim ki, yox. İynə və sap – bir-birini tamamlama günüdür. Sapsız iynənin, iynəsiz də sapın bir dəyəri olmadığı üçün onlar vəhdətin simvoludurlar. İnsanların da, bildiyiniz kimi həyatda ikinci yarısı, onunla vəhdət təşkil edəcək tərəf-müqabili olur. Bu iynə və sap günündə hamıya öz vəhdət yarısını düz tapmağı, səhv etməməyi arzulayıram.

27 noyabr. Ukraynada milli matəm günü

Bu gün qardaş Ukrayana xalqı Qolodomor qurbanlarının xatirəsini ehtiramla yad edəcək. 1932-33-cü illərdə ukraynalıların kütləvi olaraq aclıqdan qırılması faktı mövcuddur. 13 milyon insanını həyatını itirdiyi o dəhşətli hadisənin səbəbini uzun illər Sovet rejimi dövrün çətinlikləri, taxıl ehtiyatlarının tükənməsi, quraqlıq, eyni zamanda əksinqilabi ünsürlərin törətdikləri sobotajlarla izah edib. Amma perestroykanın aşkarlıq siyasəti sovetlərin müdhiş cinayətinin üstünü açıb. Sən demə, 30-cu illərdə Ukraynanı bürüyən milli-azadlıq hərəkatının, Ukrayna xalqının sovet imperiyasından qopma tələblərinin müqabilində Kreml süni aclıq yaradaraq xalqı cəzalandırıbmış.

27 noyabr. Nüfuzlu alim Zakir Qarayevin ad günü

Gəlin qocaman alimimizi təbrik edək və haqqında bəzi bilgilər əldə edək. 2001-2004-cü illərdə İstanbul Universitetinin Tibb fakültəsi, Mikrobiologiya və immuno­logiya kafedrasında professor vəzifələ­rində çalışan, 2004-cü ildən Azərbaycan Dövlət Tibb Universitetinin Mikrobiologiya və immunologiya kafedrasına müdirlik edən Zakir Qarayev müxtəlif mikroorqanizmlər, radiasiya, hormonal preparatlar, antibiotiklər və s. təsirindən orqanizmdə baş verən immun çatışmazlıqların və ikincili infeksiyaların formalaşma mexanizmlərinin tədqiqinə, diaqnostika, müalicə və profilaktika tədbirlərinin təkmilləşdirilməsinə nail olan görkəmli alimimizdir. (Üstünə düşsə, covid əleyhinə vaksin də hazırlaya bilər). O, 300-dən çox elmi əsərin, o cümlədən 4 monoqrafiyanın müəllifidir. Z.Qarayevin yazdığı “Tibbi mikologiya” kitabı mikoloji xəstəliklərin diaqnostikası və müalicəsi haqqında qələmə alınan yeganə əsərdir. Onun rəhbərliyi altında 69 fəlsəfə doktoru, 20 elmlər doktoru hazırlanıb. O, SSRİ-də 3 dəfə dünya miqyaslı konqres təşkil edib, 2009-cu ildə Bakıda 23 ölkədən 300-dən çox alimin qatıldığı 3-cü Avrasiya Klinik Mikrobiologiya, İmmunologiya və İnfeksion Xəstəliklər Beynəlxalq Konqresinin prezidenti kimi konqresin təşkilatçısı olub. Z.Qarayev dünyanın bir çox nüfuzlu elmi cəmiyyət və universitetlərinin akademiki və fəxri doktorudur. O, 2010-cu ildə “Əməkdar elm xadimi” fəxri adına layiq görülüb.

27 noyabr. Karandaş yadınıza düşürmü?

Hərb sevgili ruslar dəniz piyadası gününü bayram edəcəklər. Braziliyada əmək təhlükəsizliyi, İspaniyada müəllim, Britaniyada Lankaşir, Tailandda sağlamlığı möhkəmləndirmə günüdür. ABŞ isə bu dəfə Milli kremli Bavariya tortu gününü qeyd edəcək.

2010-cu ilin bu günündə amerikalı rejissor, “Ulduz müharibələri” və “Heç vaxt heç vaxt demə” kimi məşhur filmlərin rejissoru İrvin Kerşner dünyasını dəyişib. 1940-cı ildə xüsusən uşaqların çox sevdiyi, filmlərinə baxmaqdan doymadıqları, kinematoqrafiyanın savaş filmləri janrının ən görkəmli nümayəndəsi, Çin əsilli Amerika aktyoru Bryus Li doğulub.

1901-ci ildə Mixail Rumyantsev (şəkildə) – məşhur sovet klounu dünyaya gəlib. Uşaqkən bir dəfə atam məni Bakı Sirkinə aparmışdı, Karandaşın məzhəkəsinə. Bax Karandaş həmin Rumyantsevin təxəllüsüydü. Nə qədər gülmüşdümsə başımdan ağrı qalxmışdı. Sonradan – gərək ki, 83-cü ildə onun vəfat etməsi xəbərindən çox sarsılmışdım, xatırlayıram. O vaxtın yumoru, məzhəkəsi indiki kimi bayağı deyildi, hər bir ştrix hansısa anlamı ifadə edirdi. Həm gülürdün, həm düşünürdün.

1895-ci ildə isveçli Alfred Nobel Bakı neftindən qazandığı milyonlarının vəsiyyətnamə yazaraq Nobel fonduna köçürülməsini təmin edib. 1701-ci ilin bu günündə başqa bir məşhur isveşlinin – astronom, geoloq və meteroloq Anders Selsinin (temperaturun dərəcə ölçüsü onun adıyladır) doğum günüdür. 1095-ci ildə Roma Papası 2-ci Urbanın qərarı ilə tarixdə ilk səlib yürüşü baş tutub. E.ə. 8-ci əsrdə isə antik dünya ədəbiyyatının tanınmış siması, şair Horatsiy dünyasını dəyişib.

“Ədəbiyyat və incəsənət”

(27.11.2023)

Kubra Quliyeva, “Ədəbiyyat və incəsənət”

Çoxdandır yazmaq istədiyim, düzünü desəm, yazmağımı istədikləri bir mövzu var idi. Mövzumuz kişilərə həsr olunub. Bəli təəccüblü olsa da, kişilərdən danışacağıq bu dəfə.

Apardığım müşahidələrdən açıq-aydın görürəm ki, cəmiyyətdə kişilərdən elə də çox danışılmır. Onları hansısa vəzifənin incraçısı olaraq görüb də sadəcə müəyyən işlər üçün nəzərdə tutulan robotlara çevirmişik. Bəli, bu sözlərim çox ürəyaçan olmasa da, cəmiyyətimizdə kişi olmaq qadın olmaqdan daha çətindir. Çünki, kişisənsə güclü olmalısan, sərt olmalısan, özünü və çevrəni qorumalısan, iş sahibi, ev, maşın, pul sahibi olmalısan. Eyni zamanda zəhmli, hər şeyə dözən, ağlamayan, gülməyən qısacası duyğularını yox etməyi bacaran ətdən robot olmalısan. Əgər sən kişisənsə cəmiyyət səni əlləri və ürəyi qabarlı olmağa vadar edir. Bəs bu fikirlər haradan formalaşır? Belə düşüncələrin nəticəsində öz cinsiyyətindən imtina edən, qoruyan yox qorunmaq istəyən şəxsiyyətini satan neçə min insan var bilirikmi? Təssüf ki, bir çoxumuz sadəcə qınamaqla məşğuluq və öz pafoslu çıxışlarımızda insanları alçaltmaqdan başqa heç bir çarə tapa bilməyib boş danışırıq və çox zaman keçmişlə müqaisə edilməkdən bezən gənc təbəqədə formalaşan oğlanlar kişi olmaq üçün ya öz böyüklərini örnək götürür, ya da kişi olmamaq üçün özünü axırıncı yola qoyur. Məhz bu məsələdə də, məsuliyyət qadınların üstünə düşməlidir. Əgər qadın istəsə yoldaşını, övladını, hətta atasını belə tərbiyə edə biləcək gücə qadirdir. Əgər bu cəmiyyətdə qadınlar yoldaşlarına maaşları qədər hörmət etmək əvəzinə ona sevgi versə, onu xoşbəxt etmək üçün qucağına uşaq doğub yeməyini isti, yatağını, paltarlarını təmiz etməkdən əlavə onu dinləsə, söhbət etməyə çalışsa birlikdə ən azı bir ortaq mövzuda müzakirə etsə, kişi üzərində təkcə evin rəisi olmağın məsuliyyəti və bu məsuliyyət ödənildiyi təqdirdə qarşılıq görmək əvəzinə sevilmək üçün daha çox çabalayar. 

Əgər analar övladlarına kişi ağlamaz əvəzinə kişi ağlatmaz, məsumun ahını almaz, heyvanlara zərər yetirməz, yerə tüpürməz kimi olması gərəkən insani keyfiyyətləri aşılasa, onu həqiqətən normal bir fərd kimi öz işini özü görə biləcək şəkildə, yəni yemək bişirməyin, yatağını səliqəyə salmağın, dağıtdıqlarını yığışdırmağın onun kişiliyindən heç nə əskiltmədiyini anlatsalar, bu cür bəsit ehtiyaclarını ödəyə bilməyən kişilər qarşı cins ilə öz potensialını balanslaşdırmaq üçün qadınların təhsil almasına və işləməsinə mane olmaz.

Kim bilir, bəlkə belə cəmiyyətdə kişilər satın alınan gülləri zəhmətlə torpağa əkilən güllərə dəyişməz. Bəlkə də, ağlamaq istəyəndə kişiliklərindən utanmaz, bəlkə də, atalarına oxşamaq üçün yox, özlərini hiss etmək üçün yaşayarlar. Və bəlkə atasından sevgi görən qızlar sevgini başqalarında axtarıb bədbəxt olmaz.

Bəlkələrimiz xoşbəxt sonlarımız olsun.

“Ədəbiyyat və incəsənət”

(27.11.2023)

Uraqan Abdullayev, “Ədəbiyyat və incəsənət”

23-35 yaş üçün:

Yaş artdıqca anlayacaqsan ki, özünü təkmilləşdirməlisən. Bu dəfə səni hərəkətə gətirən həvəs, ya da motivasiya olmayacaq. Disiplin və iradə olacaq. 

Anlayacaqsan ki, bir işi bacarmaq üçün motivasiyaya ehtiyacın yoxdur, disiplinə və əzmkarlığa ehtiyacın var. Öyrənəcəksən, öyrəndikcə çıxacaqsan qəfəsdən. Başa düşəcəksən ki, böyümək üçün başqalarının başının üstündə cəllad kimi durmasına ehtiyac yoxdur. Sən özün özünün hakimi, hisslərinin cəlladı olacaqsan. Sevgi qatili olacaqsan özünə qarşı. 

Səni aldadan sevgilidən, nəfsini yeniləməklə qurtulacaqsan. Bəziləri üçün valideyn ən böyük dost, bəziləri üçün isə aşılması çətin olan bir baryer kimi görünür. Əgər o baryeri aşa bilsən valideynlərinlə dost olacaqsan. Ancaq o baryeri sındıraraq və ya dağıdaraq keçmək olmaz, gərək qəfəsin qapısının harada olduğunu tapasan. Onlar səni qorumaq üçün qəfəsə salıb. Qəfəsi dağıtsan onların qəlbini qıra bilərsən. O qəfəsin qapısını düyünlənmiş bir ip misali asta-asta və aramla açmalısan. Onların ürəyinə gedən yolu tapa bilsən valideynlərin sənin ən böyük dəstəkçin olacaq. Yox, əgər tapa bilməsən onların yanında dustaq olacaqsan.

“Ədəbiyyat və incəsənət”

(27.11.2023)

Hicran HÜSEYNOVA, AYB-nin üzvü, ”Ulduz” jurnalında publisistika şöbəsinin redaktoru - “Ədəbiyyat və incəsənət” üçün

Deyirlər, haqsızlığı görüb susan kəs özü də bu haqsızlığın iştirakçısına çevrilmiş olur. Bəli, bu bir həqiqətdir, əlbəttə. Çünki ən azı ictimai varlıq kimi hər birimiz yaşadığımız cəmiyyətin bir parçasıyıq. O səbəbdən də bəzən “moya xata s krayu” deyib (çoxumuz rusdilliyik axı) yaxamızı kənara çəkməyə çalışsaq da, bu mümkün olmur. Məndən ötdü, qardaşıma dəydi misalı...

Uzun girişlə oxucumu yormadan mətləbə keçim. Söhbət son günlər AYB ətrafında cərəyan edən və birliyin sədlərini aşıb az qala bütün ölkə əhalisinin söhbət mövzusuna çevrilən ev qalmaqalından gedir.

AYB-də 21 nəfərə order verildi. Necə bölgü olursa-olsun, narazı qalanlar həmişə olub və olacaq, söhbət bundan getmir heç də. Söhbət narazı tərəfləri efirlərə dəvət edib alçaldanlardan, onsuz da sınmış adamları (bunlar qələm əhlidi və qadındı) bir daha sındırıb, insanların faciəsi üzərində şou düzəldib reytinq qazanmağa çalışanlardan gedir. Amma yox! Onlar reytinq əvəzinə bütöv bir xalqın nifrətini qazandı. Məlumatı olmayanlarçün bildirim ki, ARB kanalının “Günə son” verilişində bizim Yazıçılar Birliyinin üzvləri Sevil Gültənlə Aləmzər Sadıqqızı qonaq idi. Verilişin aparıcısı Ülvira və telejurnalist Rövşanə Ağasəfqızı bu ümidləri kəsilmiş, əlləri hər yerdən üzülmüş xanımları yerdən yerə vurdu. Aparıcıların istehza dolu yersiz ittihamları, qaraqışqırıqla qonaqları sıxışdırmağı onları sanki nokauta saldı. Ən sarsıdıcı isə bilirsiz, nə oldu? Aparıcı  qonaqlarına “həyatı başa saldı”: “Gördüz ki, ədəbiyyatda pul yoxdu, başqa iş tapardız özünüzə!” Necə deyərlər, bu yerdə Qəribi ağlamaq tutdu. Burda nitqi kəsildi, burda sözü qurtardı qonaqların (düzdü, buna qədər də onlara ağzını açmağa imkan vermirdilər).

Onu deyim ki, ekranın bu başında məni və az məvaciblə dolanıb təkcə yazdığı SÖZlə ovunan mənim kimi yüzlərlə qələm sahibini də ağlamaq tutdu. Əcəba, onlara kim haqq verib ki, söz adamlarını bu cür ələ salıb təhqir etsinlər?

Aparıcıların yazar və tərcüməçi xanıma (bir növ zərərçəkmişlərə) ünvanladığı bir neçə suala cavab verim:

Siz müharibə, Qarabağ, vətən, zəfər mövzusunda yazılan şeirləri, hekayə və povestləri, romanları oxumamısızsa, bu mövzularda çəkilən onlarla sənədli, bədii filmdən xəbərsizsinizsə, günahı özünüzdə axtarın. Təkcə “Ulduz”da yüzlərlə belə yazı çap olunub. “Azərbaycan”da, “Qobustan”da, “Ədəbiyyat qəzeti”ndə də həmçinin. Şəxsən mən, bu yazının müəllifi, bir vaxtlar “Qaçqınçılıq” adlı hekayəmi tənqidçilərin ixtiyarına verərək bu sözlərlə onlara müraciət eləmişdim: “İndi tənqidçi istəyirəm ki, bu yazını analiz etsin”.

Rəhmətlik Etibar Etibarlıdan başqa heç kimdən səs çıxmadı. O, “Bir hekayə haqqında bir hekayəlik söz” adlı yazı yazdı. Nə isə. Mətləbdən uzaqlaşmayaq. Rövşanə Ağasəfqızı, nəyə görə biz yazdıqlarımızın dəyərini məhz dünyaya çıxmaq, “Biləcəridən o yana keçmək” kimi şablon kriteriyalarla müəyyən etməliyik? Dünyanın verdiyi dəyərləri, qoyduğu tələbləri görmürükmü?! Görürük axı! Çox köhnəlib bu çeynənmiş ifadələr, dəyəri özümüz verməliyik özümüzə! Hər kəs də öz dəyərini yaxşı bilir.

“Kitabın satılmırsa, niyə yazırsan, niyə ev istəyirsən?” deyirsiz, az qala “Niyə yaşayırsan?” deyəcəkdiz. Adamlara, özü də qələm əhlinə bu cür yanaşmaq, heç bir məlumatın olmadan onların çoxillik zəhmətini heçə endirib xalq qarşısında susdurmaq mənəvi ziyan deməkdi! Onların sizi məhkəməyə vermək haqqı da var. Amma heç halal ev növbələrini tələb edə bilmirlər... Belədə ilahi ədalətə sığınırıq, nə etməli?..

P.S.Mənim evim var, ona görə ev təmənnasında deyiləm qətiyyən, amma 24 il bir müəssisədə çalışan işçi kimi, Azərbaycan dilinin hər an qayğısına qalan, hər sözün, şəkilçinin üstündə əsən redaktor kimi, insanlara deyiləsi ən gözəl və ən gərəkli sözlərin müəllifi kimi evlə mükafatlandırılsaydım, onu ehtiyacı olan iş yoldaşlarıma hədiyyə edərdim - Təranəyə, Nərgizə, Talehə.

Mal-mülküylə, evi, maşını, geyimiylə özünü söz adamlarından üstün sayan qlamur aparıcılar, belə bir deyim də var, qoy xatırladım:

Mal sahibi, mülk sahibi, hanı bunun ilk sahibi?..

“Ədəbiyyat və incəsənət”

(27.11.2023)