YARAT Mərkəzində “Praktika” Teatrının YARAT təşkilatı ilə əməkdaşlığı çərçivəsində müasir üslubda hazırlanan “Özüm ilə təklikdə” adlı plastik tamaşa nümayiş olunub.

YARAT-dan AzərTAC-a bildirilib ki, tamaşa İosif Brodskinin yaradıcılığından ilhamlanan, “Praktika” Teatrının rezidenti Jack’s Garret komandasının 2022/2023-cü il mövsümündəki bədii fəaliyyətinin nəticəsidir. Daxili münaqişədən bəhs edən “Özüm ilə təklikdə” tamaşası küçə rəqsi və müasir xoreoqrafiya texnikalarını birləşdirərək hərəkətlərin gücü ilə poeziyanın dərinliyini bir araya gətirir. Baş qəhrəman yol ayrıcındadır: mübarizə aparmaq, ya da özünü qəbul etmək və işığa doğru irəliləmək, ya da qaranlığa dalmaq.

Aktyorlar Aleksandr Tronov və Aleksandr Alyoxin İ.Brodskinin şeirlərini yenidən mənalandıraraq tamaşaçını metaforalar və simvollar aləminə qərq etdilər. Səhnəqrafiya və ideyası xoreoqraflar Anna Deltsova və Aleksandr Tronova məxsus tamaşaya 150-yə yaxın qonaq qatılıb.

Tamaşadan bir gün sonra isə YARAT və “Praktika” Teatrının əməkdaşlığının davamı olaraq Jack’s Garret komandası tərəfindən müasir xoreoqrafiya üzrə ustad dərsi keçirildi. Rusiyalı xoreoqraf və aktyor Aleksandr Tronovun rəhbərliyi ilə ikihissəli təlimə qatılan iştirakçılar küçə rəqsi texnikalarını və hərəkətlərlə emosiyaların necə çatdırılacağını öyrəniblər.

“Praktika” Teatrı Moskvada yerləşən, dövrün tendensiyalarına cavab verən və fəaliyyətində çağdaş ədəbiyyatından istifadə edən eksperimental mərkəzdir. “Praktika” tamaşaçılarla müasir yazılar, musiqi, dizayn, memarlıq, multimedia və aktyor oyununun aktual bədii dili ilə danışır. Teatr bugünkü incəsənəti yaradan fənlərarası sahəni araşdırır.

“Ədəbiyyat və incəsənət”

(09.12.2024)

Özbəkistanda fəaliyyət göstərən Heydər Əliyev adına Azərbaycan Mədəniyyət Mərkəzində həmin ölkədə yaşayan Qərbi azərbaycanlıların təşkilatçılığı və Azərbaycanın Özbəkistandakı Səfirliyinin dəstəyi ilə tədbir keçirilib.

“Ədəbiyyat və incəsənət” portalına Diasporla İş Üzrə Dövlət Komitəsindən verilən məlumata görə, Mədəniyyət Mərkəzinin direktor müavini Nadir Əlimirzəyev açılış nitqi ilə çıxış edərək tarixi faktlarla ermənilərin Qərbi Azərbaycanda əsrlər boyu azərbaycanlılara qarşı törətdiyi etnik təmizləmə və deportasiya haqqında, eləcə də XIX-XX əsrdə azərbaycanlıların Qafqazın və Qərbi Azərbaycanın ictimai-siyasi, ədəbi-mədəni mühitində oynadıqları rol barədə məlumat verib.

İclasın sədri Vidadi Qurbanov yaradılacaq ictimai birliyin rəhbəri və onun müavini vəzifəsinə namizədlərin irəli sürülməsi üçün müraciət edib.

İclas iştirakçıları İsmayıl Məmmədovun təklifi əsasında “Özbəkistanda Yaşayan Qərbi Azərbaycanlılar” İctimai Birliyininrəhbəri vəzifəsinə əslən Qərbi Azərbaycanın Basarkeçər rayonundan olan İlham Abdullayevin, müavin vəzifəsinə isə Ədalət Qocamanovun namizədliyini dəstəkləyib.

Konfrans iştirakçıları “Özbəkistanda yaşayan Qərbi Azərbaycanlılar” İctimai Birliyinin təsis iclasının yekunu olaraq müvafiq təşkilatlara ünvanlanmaq üçün sənədlərin hazırlanmasına dair razılığa gəlib.

“Ədəbiyyat və incəsənət”

(09.12.2024)

Gürcüstanın Laqodexi rayonunun Qabal kəndində Azərbaycan Respublikasının Diasporla İş üzrə Dövlət Komitəsinin dəstəyi və layihələri çərçivəsində fəaliyyət göstərən “Qabal İnkişaf Mərkəzi” görkəmli yazıçı, şair, publisist və ictimai xadim İlya Çavçavadzeyə həsr olunmuş dəyirmi masa keçirib.

“Ədəbiyyat və incəsənət” portalına Diasporla İş üzrə Dövlət Komitəsindən verilən məlumata görə,  Gürcüstanın Laqodexi rayonunun “Qabal Ədliyyə Evi”ndə baş tutan tədbirdə azərbaycanlı və gürcü ziyalılar, gənclər və məktəblilər iştirak edib.

Mərkəzin direktoru Yavər Məmmədov çıxışında bu cür tədbirlərin azərbaycanlılar və gürcülər arasında mədəni əlaqələrin möhkəmlənməsinə, dialoqun təşviqinə töhfə verdiyini deyib. İlya Çavçavadzenin azərbaycanlılara böyük rəğbət bəslədiyindən və onların milli xüsusiyyətlərinə dair bir sıra məqalələr dərc etdirməsindən danışıb.

Mərkəzin gürcü dili müəllimi Telli Qiyasova tədbir iştirakçılarına böyük gürcü mütəfəkkirinin həyat və yaradıcılığı haqqında geniş məlumat verib.

Rayonun gürcü ziyalıları çıxışlarında azərbaycanlı gənclərin İlya Çavçavadzenin həyat və yaradıcılığına göstərdikləri böyük maraqdan fərəh duyduqlarını, onların Gürcüstan və Azərbaycan arasında gələcək münasibətləri inkişaf etdirərək daha da möhkəmləndirəcəyinə ümid bəslədiklərini bildiriblər.

“Ədəbiyyat və incəsənət”

(09.12.2024)

ABŞ-nin Kolorado ştatında yaşayan soydaşlarımız orada Azərbaycan icmasının ilk diaspor təşkilatını yaradıb.

“Ədəbiyyat və incəsənət” portalına Diasporl İş Üzfrə Dövlər Komitəsindən verilən məlumata görə, “Koloradoda Azərbaycan Diasporu” adlanan təşkilatın məqsədi yerli Azərbaycan icmasının Amerika cəmiyyətində təmsilçiliyini artırmaq və bu missiyanı gələcək nəsillərə ötürməkdir. Kolorado azərbaycanlılarının ABŞ-də yaşayan digər etnik qruplar, yerli icmalar və gənc nəsil arasında sıx əlaqələrin qurulması, habelə Azərbaycan dilinin və mədəniyyətinin təbliği də təşkilatın əsas hədəflərindəndir.

Yeni yaradılan təşkilatın təsisçisi və rəhbəri Nigar Şıxsəfiyeva Azərbaycanın diaspor fəaliyyətinin genişləndirilməsi, ölkəmizin ABŞ-də tanıdılması istiqamətində mühüm addımlar atılacağını vurğulayıb.

“Ədəbiyyat və incəsənət”

(09.12.2024)

Nizami Kino Mərkəzində Azərbaycan Kinematoqrafçılar İttifaqı və Azərbaycan Dövlət Film Fondunun təşkilatçılığı ilə Xalq yazıçısı, kinodramaturq Natiq Rəsulzadənin 75 illik yubileyi qeyd olunub.

AzərTAC xəbər verir ki, Xalq yazıçısı tədbirdən öncə jurnalistlərə açıqlamasında oxucularla daim ünsiyyətdə olduğunu deyib: "Çalışıram oxucularımla tez-tez görüşüm. Fikrimcə, yazıçı öz oxucusunu tanımalıdır. Mənim təkcə Azərbaycanda deyil, həmçinin MDB məkanında və Avropada da oxucularım var. Onlarla ünsiyyət qurub, fikirlərini öyrənmək mənim üçün çox önəmlidir. Amma bu, o anlama gəlmir ki, yazıçı oxucunun dedikləri ilə tam razılaşmalıdır. Çünki yazıçının öz dəst-xəti, yolu var".

Onun sözlərinə görə, bəzən yazıçılar yorulur və əsərlərində zəif tərəfləri görmür. Oxucu kitabı ilk dəfə oxuyanda o məqamları görür. Buna görə də oxucularla vaxtaşırı ünsiyyət qurmaq bu məsələdə kömək olur.

Əvvəlcə Natiq Rəsulzadənin həyat və yaradıcılığından bəhs edən videoçarx nümayiş olunub.

Yubiley gecəsində çıxış edən Azərbaycan Dövlət Film Fondunun direktoru Cəmil Quliyev, Azərbaycan Kinematoqrafçılar İttifaqının sədri Rasim Balayev, Azərbaycan Yazıçılar Birliyinin katibi Çingiz Abdullayev, şair, Əməkdar incəsənət xadimi Baba Vəziroğlu və digərləri Natiq Rəsulzadənin əsərlərindəki xarakterlərin bitkinliyi ilə diqqəti cəlb etdiyini bildiriblər. Natiqlər yazıçının gənc yaşlarında inkişaf etdirdiyi üsluba sadiq olduğunu deyiblər. Qeyd olunub ki, yazarın əsərləri üzərində qurulan ssenarilər aktyor üçün asandır. Təsadüfi deyil ki, onun kitabları bu gün bir sıra Avropa dillərinə tərcümə olunur.

Qeyd edək ki, Natiq Rəsulzadə Azərbaycanda, Rusiyada, Avropa və bir çox başqa ölkələrdə nəşr olunan 50-dən çox kitabın müəllifi, ədəbiyyat sahəsində bir sıra yerli və xarici mükafatların laureatıdır. 

“Ədəbiyyat və incəsənət”

(09.12.2024)

 Aygün Bayramlı, “Ədəbiyyat və incəsənət” portalının Beyləqan təmsilçisi

Azərbaycan Respublikasınin Gənclər və İdman Nazirliyi tərəfindən gənclər təşkilatlarının fəaliyyətlərinin dəstəklənməsi məqsədilə 2024- cü il üzrə elan edilmiş qrant müsabiqəsi çərçivəsində  "Beyləqan Gənclərinin Maarifləndirilməsi və Sosial İnkişafı" İctimai Birliyi tərəfindən həyata keçirilən "Ətraf mühitin qorunmasında region gənclərinin təşəbbüslərinə dəstək" layihəsi baş tutmuşdur. 

 Layihənin icra planına uyğun olaraq, düșərgədə iștirak etmiş Beyləqan gənclərinin "Gənc təbiət dostları" şəbəkəsi yaradılmışdır və yașadiqları bölgədə onların iştirakı ilə "Tullantılarla İncə Sənət" kiçik layihə təşəbbüsü həyata keçirilmişdir.

Layihənin keçirilməsində əsas məqsəd məişət tullantılarından müxtəlif sənət nümunələri hazırlanaraq tədbir iştirakçılarına nümayiş etdirməklə bərabər, gəncləri ətraf mühitə duyarlı yanaşmaq vərdişləri formalaşdırmaq, zərərli əşyaları,  plastikləri, sellofan torbaları düşünmədən zibil qutularına, su hövzələrinə atmaq vərdişlərindən çəkindirməkdir. Həmçinin yaradıcı yeniyetmə və gəncləri dəstəkləməyi, həvəsləndirməyi məqsəd kimi qarşısına qoymuşdur.

“Ədəbiyyat və incəsənət”

(06.12.2024)

Dekabrın 5-də Azərbaycan Milli Xalça Muzeyində Avstriyanın dünyada məşhur zərgərlik brendi “Freywille”nin “Sehrli xalça” adlı yeni kolleksiyasının təqdimatı keçirilib.

AzərTAC xəbər verir ki, tədbirdə əvvəlcə “Sehrli xalça” kolleksiyasının yaranması haqqında məlumatları özündə əks etdirən videoçarx nümayiş etdirilib.

Milli Xalça Muzeyinin direktoru Əminə Məlikova çıxış edərək milli-mədəni irsimizə xüsusi rəğbət və sevgidən yaranan “Sehrli xalça” kolleksiyası və Azərbaycan zərgərlik sənəti haqqında məlumat verib. O qeyd edib ki, bu unikal kolleksiya Milli Xalça Muzeyi ilə “Freywille” brendi arasında imzalanan Anlaşma Memorandumuna əsasən milli irsimizin dünya miqyasında tanıdılması məqsədilə hazırlanıb.

“Müasir incəsənət və zərgərlik texnologiyası ilə xalqımızın zəngin tarixini özündə birləşdirən “Sehrli xalça” kolleksiyası Qarabağın məşhur xovsuz xalçası “Vərni”nin orijinal naxışlarından ilhamlanaraq yaradılıb. Xalçanın əsas özəlliyi üzərində stilizə edilmiş həndəsi əjdaha motivlərinin olmasıdır. Bu layihə üzərində altı aya yaxın proses gedib. İnanırıq ki, kolleksiya Azərbaycanda və bütün dünya miqyasında layiqincə qiymətləndiriləcək, daha geniş kütlələr arasında xalça sənətimizin tanıdılması və bu sokral bəzək elementlərinin tərəddüdsüz milli-mədəni irsimizin bir hissəsi olduğunu bir daha təsdiq edəcək", - deyə Ə.Məlikova əlavə edib.

Mədəniyyət nazirinin müşaviri Cahangir Səlimxanov diqqətə çatdırıb ki, “Freywille” brendi ilk dəfə zərgərlik məmulatlarının dizaynında Azərbaycan xalça naxışları və motivlərindən istifadə edib.

“Freywille” şirkətinin rəhbəri Fridrix Ville öz videomüraciətində onların Milli Xalça Muzeyində kəşf etdikləri nümunələrin zərgərlikdə növbəti sənət əsəri yaratmaq üçün möhtəşəm ilham qaynağı olduğunu söyləyib.

Şirkətin Azərbaycandakı nümayəndəliyinin rəhbəri Nigar Namazova yeni kolleksiyanı sənətkarlığın, tarix və mədəniyyətin möhtəşəm harmoniyası kimi dəyərləndirib.

Bədii hissədə tanınmış tarzən, Əməkdar artist Şəhriyar İmanov və onu müşayiət edən musiqiçilər - İlqar Əliyev (klaviş) və Şükür Əliyev (ritm alətləri) Azərbaycan və Avstriyanın musiqilərindən ibarət kompozisiya təqdim ediblər.

Həmçinin “Mirvari” rəqs ansamblı Qara Qarayevin “Yeddi gözəl” baletinin sədaları altında xoreoqrafik kompozisiya nümayiş olunub.

Sonda muzeyin Ənənəvi texnologiya şöbəsində yeni toxunan “Vərni” xalça fraqmentlərinin qədim ənənələrə uyğun hanadan kəsimi mərasimi reallaşıb.

“Ədəbiyyat və incəsənət”

(06.12.2024)

Fikrət Əmirov adına Gəncə Dövlət Filarmoniyasında 25 dekabr saat 19:00-da "Göygöl" Dövlət Mahnı və Rəqs Ansamblının 55 illik yubileyinə həsr olunmuş konsert proqramı baş tutacaq.   

“Ədəbiyyat və incəsənət” portalına filarmoniyadan verilən məlumata görə, konsertdə "Göygöl" Dövlət Mahnı və Rəqs Ansamblının müşayiəti ilə solistlərin ifasında mahnılar, rəqslər təqdim olunacaq.

“Ədəbiyyat və incəsənət”

(06.12.2024)

Diasporla İş üzrə Dövlət Komitəsinin dəstəyi və Gürcüstanın Saqareco rayonunda fəaliyyət göstərən “Parlaq Gələcək” Tədris Mərkəzinin layihəsi çərçivəsində yaradılan “Aşıq dərnəyi” gənc nəslin yetişməsində müstəsna rol oynayır.

“Ədəbiyyat və incəsənət” portalına komitədən verilən məlumata görə, mərkəzin direktoru Rafael Süleymanov kursların ödənişsiz olduğunu bildirərək: “Tərbiyənin bir çox növləri var. Lakin musiqi tərbiyəsi daha böyük imkanlar yaratmaq qüdrətinə malikdir. Xalqımızın milli-mənəvi dəyərləri Gürcüstanda musiqi zövqünün tərbiyə olunmasında əsas amil kimi dəyərləndirilir. Milli musiqi nümunələrimizdə - xalq mahnılarında, rəqslərdə, aşıq musiqisində xalqın yüksək mənəviyyatı, onun arzu və istəkləri əks olunur”,- deyə qeyd edib.

Aşıq Əlibala Qurbanov uşaqların bu qədim el sənətinə böyük maraq göstərdiyini, aşıq sənətinin öyrədilməsində əsas məqsədin şagirdlərdə yaradıcılıq qabiliyyətini üzə çıxarmaq, musiqi bacarıqlarını inkişaf etdirmək, həmçinin xalqımızın milli-mənəvi dəyərlərini yaşatmaq olduğunu söyləyib.  

Saz dərnəyinin üzvü Sərvət Yusifov ailələrində həmişə saz olduğunu, ona görə də aşıq sənətini sevdiyini, Nuray Hacıyeva isə bu qədim el sənətinə uşaqlıqdan maraq göstərdiyini qeyd edib.

“Ədəbiyyat və incəsənət”

(06.12.2024)