Super User
Vaqif Mustafayev: “Dədə Qorqud” film festivalı türk dünyasının ortaq mədəniyyətinə böyük faydalar verəcək”
Adından da göründüyü kimi, “Dədə Qorqud” Türk Dünyası Film Festivalı möhtəşəm bir layihədir. Bu festival uğurla davam edəcək və türk dünyasına, ümumilikdə ortaq mədəniyyətimizə böyük faydalar verəcək.
“Ədəbiyyat və incəsənət” pprtalı xəbər verir ki, bu barədə Xalq artisti, kinorejissor Vaqif Mustafayev AzərTAC-a açıqlamasında bildirib.
Ölkəmizin Vətən müharibəsində qazandığı şanlı Zəfərdən bəhs edən və özünün rejissoru olduğu “Həyat, deyəsən, gözəldir” tammetrajlı bədii filminin festivala qatılacağını deyən kinorejissor bu ekran əsərinin layiqli yer qazanacağına əminliyini bildirib.
“Yuğ” teatrı beynəlxalq festivalda ölkəmizi təmsil edir
Qazaxıstanın Almatı şəhərində təşkil olunan Mərkəzi Asiya ölkələrinin VIII Beynəlxalq Teatr Festivalında ölkəmiz də təmsil olunur.
“Ədəbiyyat və incəsənət” portalı xəbər verir ki, ölkəmizi bu festivalda Dövlət “Yuğ” Teatrı təmsil edir.
Festivalın açılış mərasimində teatrın baş rejissoru Mikayıl Mikayılov və ədəbi dram hissəsinin rəhbəri Elçin Cəfərov iştirak ediblər.
Festival çərçivəsində noyabrın 4-də “Yuğ” teatrının “Kloun Bizzz” tamaşası nümayiş olunacaq.
Tamaşada teatrın sənətçiləri Zümrüd Qasımova, Təranə Ocaqverdiyeva və Natəvan Qeybani çıxış edəcəklər.
Dövlət Akademik Filarmoniyasının noyabr ayı üçün repertuarı
Müslüm Maqomayev adına Azərbaycan Dövlət Akademik Filarmoniyasının noyabr ayı üçün tədbirlər planını təqdim edirik:
7 noyabr – Zəfər Günü ilə əlaqədar “Vətən müharibəsindəki şanlı Qələbəmizə həsr olunmuş bəstəkarlıq müsabiqəsi” qaliblərinin konserti. (Üzeyir Hacıbəyli adına Azərbaycan Dövlət Simfonik Orkestri)
11 noyabr - Beynəlxalq Olimpiya Komitəsinin 30 illiyinə həsr olunmuş tədbir. (Bülbül adına Orta İxtisas Musiqi məktəbinin Xalq Çalğı Alətləri Orkestri)
12 noyabr - “Yeni adlar” layihəsi çərçivəsində konsert. (Üzeyir Hacıbəyli adına Azərbaycan Dövlət Simfonik Orkestri)
15 noyabr – Xalq artisti, bəstəkar Fikrət Əmirovun 100 illiyinə həsr olunmuş konsert. (Azərbaycan Dövlət Xalq Çalğı Alətləri Orkestri)
16 noyabr - Qara Qarayev adına Azərbaycan Dövlət Kamera Orkestrinin konserti.
17 noyabr - Xalq artisti, bəstəkar Fikrət Əmirovun 100 illiyinə həsr olunmuş konsert. (Fikrət Əmirov adına Azərbaycan Dövlət Mahnı və Rəqs Ansamblı)
21 noyabr - Könül ansamblının konserti. (Solistlər Fəraməz Gərmrudi, Nəzakət Teymurova, Gülyanaq Məmmədova, Teyyub Aslanov)
23 noyabr - Braziliya səfirliyinin tədbiri. (Azərbaycan Dövlət Simli Kvarteti)
26 noyabr - İtaliya səfirliyinin tədbiri. (Üzeyir Hacıbəyli adına Azərbaycan Dövlət Simfonik Orkestri)
29 noyabr - “Milli musiqi alətlərimiz milli sərvətimizdir” adlı konsert. (Azərbaycan Dövlət Xalq Çalğı Alətləri Orkestri)
Şuşanın Yuxarı Gövhərağa məsci barədə sənədli film təqdim edilib
Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin “Şuşa İli” çərçivəsində elan etdiyi xüsusi qrant müsabiqəsinin “İşğal dövründə Şuşanın maddi-mədəni irsinə vurulmuş zərərin araşdırılması” layihəsi çərçivəsində erməni cinayətlərindən bəhs edən “Yuxarı Gövhərağa məscidi” adlı sənədli film təqdim edilib.
“Ədəbiyyat və incəsənət” portalı xəbər verir ki, filmin ssenari müəllifi AMEA A.Bakıxanov adına Tarix İnstitutunun əməkdaşı Faiq İsmayılov, rejissoru kinematoqrafçı Amil Amaldır.
Xalq artisti Mələkxanım Eyubova ilə görüş keçirilib
Bakı Şəhər Mədəniyyət Baş İdarəsinin təşkilatçılığı ilə Zirə Mədəniyyət Mərkəzi- Eko Parkda “Qonağımız var” layihəsi çərçivəsində Azərbaycan Dövlət Mədəniyyət və İncəsənət Universitetinin professoru, Xalq artisti Mələkxanım Eyubova ilə görüş keçirilib.
“Ədəbiyyat və incəsənət” portalı xəbər verir ki, tədbirdə Azərbaycan Respublikasının Dövlət Himni səsləndirilib, şəhidlərin əziz xatirəsi bir dəqiqəlik sükutla yad edilib.
Tədbirin aparıcısı Lalə Əlimuxtarova Mələkxanım Eyubovanın yaradıcılıq yolundan bəhs edib.
Görüş zamanı Xalq artisti Mələkxanım Eyubovanın oxuduğu xalq mahnıları, zəfər mövzusundakı ifaları tamaşaçılar tərəfindən rəğbətlə qarşılanıb.
Rəngarəng musiqi nömrələri ilə davam edən görüşün sonunda M.Eyubova izləyicilərin suallarını cavablandırıb, onlarla xatirə şəkilləri çəkdirib.
Milli İncəsənət Muzeyində Cartier Zərgərlik Evinin dəstəyi ilə bərpa edilmiş gözəlliklər nümayiş olunur
Azərbaycanın maddi-mədəniyyət nümunələri, o cümlədən zərgərlik əşyaları hər zaman öz orijinallığı və zərifliyi ilə diqqəti cəlb edir. Belə ki, Azərbaycan Milli İncəsənət Muzeyi dünyaca məşhur Cartier Zərgərlik Evinin dəstəyi ilə muzeyin kolleksiyasında qorunan üç sənət əsərini bərpa edib.
“Ədəbiyyat və incəsənət” portalı xəbər verir ki, dünyaca məşhur Cartier brendi Azərbaycanın ən nüfuzlu muzeylərindən olan – Milli İncəsənət Muzeyi ilə birgə əməkdaşlığa başlayıb, eksponatların bərpa layihəsini dəstəkləyərək xalq sənətkarları və zərgərlərin əsərlərini bərpa etməyə yardım edib. Restavrasiya işləri XX əsrə məxsus rəngli daşlarla bəzədilmiş, gümüş və metaldan hazırlanmış qadın kəməri, “buta” elementləri ilə bəzədilmiş tacşəkilli baş bəzəyi, gəlinin toy ərəfəsində bəzək əşyalarını saxladığı mücrü üzərində aparılıb. “Azərsuvenir” MMC-də “şəbəkəçi zərgər” vəzifəsində çalışan peşəkar mütəxəssis muzeyin dəvəti ilə predmetlərin bərpası üzərində işləyərək tarixi əşyaları üç ay ərzində bərpa edib.
Cartier şirkətinin Rusiya və MDB üzrə idarəedici direktoru Yanina Novitskaya bildirib ki, Cartier Evi uzun və zəngin tarixi boyunca müxtəlif incəsənət formalarından, dünya mədəni irsindən ilham alıb və ilham mənbəyi olan bu dəyərli irsi gələcək nəsillər üçün saxlamağa çalışıb. İslam mədəniyyəti Cartier-in estetik dəyərlərinə böyük təsir göstərib. O, Azərbaycan Milli İncəsənət Muzeyi ilə əməkdaşlıqdan qürur duyduğunu və bu layihənin Şərqin zərif tətbiqi sənətinə diqqət cəlb edəcəyini vurğulayıb.
XIX və XX əsrlərdə yaradılan bu eksponatlar xalq ustalarının, mahir zərgərlərin əl işləridir. Tədqiqatlar göstərir ki, Azərbaycanın milli geyim mədəniyyətində qadın zinət əşyaları xüsusi yerə malik olub. Gəlin toya zinət əşyalarında çıxır və onun üzərindəki bəzəklər ailəsinin cəmiyyətdəki statusunu vurğulayırdı. Zinət əşyaları arasında kəmər və baş bəzəyi xüsusi əhəmiyyət kəsb edirdi. Kəmər gənc qadının həyatının bir mərhələdən digərinə keçidini simvolizə edirdi. Adətlərə görə toy günü kəməri gəlinin belinə ya qardaşı, ya da atası taxırdı. Gəlinə cehiz kimi mücrü də verilməli idi. Gəlin ərinin ona verdiyi zinət əşyalarını orada saxlayırdı. Bu mücrülərdə təkcə XIX əsr zərgərləri tərəfindən hazırlanmış və gələcək nəsillərə ötürülən zinət əşyaları deyil, həm də uzun tarixə malik qiymətli xatirə əşyaları saxlanılırdı. Mücrü nə qədər dəbdəbəli görünüşə malik olardısa, onun içindəki zinət əşyaları da bir o qədər qiymətli olardı.
“Toy mərasimi Azərbaycan xalqının ölməz və unudulmaz adət-ənənələrindən biridir. Bu ənənələrdə xalqın gözəllik sevgisi özünü aşkar şəkildə ifadə edir. Bu əşyaların hər biri öz dövrünün estetikasını simvolizə edir, xalq adətlərinin gözəlliyindən xəbər verir. Bu zinət əşyaları həm ailələrin tarixini, həm də əbədiyaşar xalq yaradıcılığını özündə təcəssüm etdirir” - deyə Azərbaycan Milli İncəsənət Muzeyinin direktoru, Azərbaycanın Əməkdar İncəsənət Xadimi, rəssam, professor Çingiz Fərzəliyev bildirib.
Bakı muzeyi üçün bu əlamətdar hadisə fərqli mədəniyyətlərin bədii üslubunun qəbul edilməsi yaradıcı interpretasiyasına can atan Paris Zərgərlik Evinin tarixinin 175 illik yubileyinin yeni sətri oldu. Bu yaxınlarda Parisin Dekorativ İncəsənət Muzeyində keçirilən “Cartier və İslam incəsənəti: Müasirlik axtarışında” sərgisi bunu bir daha sübut edir ki, şərq mədəniyyəti evin üslub və repertuarının inkişafına ciddi təsir göstərib. Parisdə keçirilən genişmiqyaslı ekspozisiyada Şərqin XX əsrin əvvəllərindən bu günə qədər fransız zərgərlik evinin üslubuna təsirini əks etdirən 500-dən çox eksponat təqdim olunub.
“Dekorativ-tətbiqi sənət əsərlərində: xalçalarda, tikmələrdə, bədii işləməyə malik metalda, zərgərlikdə xalqın dünyagörüşü, fəlsəfəsi özünü ən bariz şəkildə göstərir. İncəsənət əsərlərinin düzgün bərpası və konservasiyası muzeylərin ən mühüm vəzifələrindən biridir və Cartier Evinin buna köməklik göstərməsi çox yaxşı haldır. Təbii ki, bu eksponatların hər birinin yüksək bədii, elmi və tarixi əhəmiyyəti var”, - deyə Azərbaycan Respublikası Mədəniyyət Nazirliyinin Muzey, qalereya və sərgilər şöbəsinin müdiri Nərgiz Abdullayeva bildirib.
Azərbaycan Milli İncəsənət Muzeyinin Cartier Evi ilə yaradıcı əməkdaşlığı diqqəti bir daha Şərq tətbiqi sənətinə cəlb edəcək. Ekspozisiyaya gələn ziyarətçilərin bərpa olunmuş əşyalardan mənəvi zövq alması və müxtəlif dövrlərin ustad sənətkarları ilə tanış olması üçün gözəl fürsətdir, çünki layihənin əsas məqsədi sənətkarlıq və mədəni irsin gələcək nəsillər üçün qorunub saxlanılmasıdır.
Qeyd edək ki, Cartier Evi və Azərbaycan Mədəniyyət Nazirliyinin dəstəyi ilə 2019-cu ildə Abdulla Şaiq adına Azərbaycan Dövlət Kukla Teatrında "Yeddi nar çubuğu" xalq nağılının motivlərinə əsaslanan tamaşa səhnələşdirilib. 2021-ci ildə Azərbaycan Xalça Muzeyinin iştirakı ilə Dövlət Ermitajında “Görünməyən incəsənət. İmkanların sərhədlərini genişləndirərək” adlı inklüziv sərgi keçirilmiş və sərgi inklüziv muzey işi sahəsində inqilabi çevrilişə səbəb olub. Həmçinin, 2021-ci ildə Bakının möhtəşəm tarixi və memarlıq abidələri haqqında onlayn bələdçi sistemi yaradılıb.
Xalq artisti Emin Sabitoğlunun doğum günündə məzarı ziyarət olunub
Noyabrın 2-də görkəmli bəstəkar, Xalq artisti Emin Sabitoğlunun (1937-2000) anadan olmasının 85 ili tamam olur. Bu münasibətlə II Fəxri xiyabanda bəstəkarın məzarı ziyarət olunub, üzərinə tər çiçəklər düzülüb.
“Ədəbiyyat və incəsənət” portalı xəbər verir ki, mərasimdə Mədəniyyət Nazirliyinin İncəsənət və qeyri-maddi mədəni irs şöbəsinin müdir müavini Sara Timurova, Bakı Şəhər Mədəniyyət Baş İdarəsinin rəisi İbrahim Əliyev, Azərbaycan Dövlət Mədəniyyət və İncəsənət Universitetinin (ADMİU) pedaqoji kollektivi, mədəniyyət və incəsənət nümayəndələri, bəstəkarın ailə üzvləri və digər qonaqlar iştirak edirdilər.
Jurnalistlərə müsahibə verən bəstəkarın qızı, ADMİU-nun rektoru, professor Ceyran Mahmudova qeyd etdi ki, Emin Sabitoğlu xalqına, vətəninə bağlı insan idi: “Mən bilirəm ki, onun musiqisini sevərək dinləyənlər çoxdur. Emin Sabitoğlu cismən bizimlə olmasa da, onun yaradıcılığı xalqımız tərəfindən sevilir. Hər bir bəstəkar üçün yəqin ki, bu ən böyük qiymətdir”.
Bakı Şəhər Mədəniyyət Baş İdarəsinin rəisi İbrahim Əliyev Emin Sabitoğlunun müasir Azərbaycan musiqisinin inkişafındakı xidmətlərindən söz açıb. Dedi ki, onun əsərləri hər zaman insanlar tərəfindən böyük zövqlə, sevgi ilə dinlənilib, qəbul edilib. Azərbaycan musiqi mədəniyyətində Emin Sabitoğlunun özünəməxsus yeri, imzası var. Vəfatından 20 ildən artıq vaxt keçməsinə baxmayaraq, onun əsərləri əbədi yaşayacaq”.
Azərbaycan Dövlət Akademik Musiqili Teatrının direktoru, Əməkdar incəsənət xadimi Əliqismət Lalayev vurğulayıb ki, Emin Sabitoğlu elə bəstəkarlardandır ki, musiqiçilərimizin bir neçə nəsli onun əsərlərindən ilham alıb, daha sonra tanınıb, məşhurlaşıb: “Mən elə bir musiqiçi tanımıram ki, onun repertuarında Emin Sabitoğlunun mahnısı olmasın. Bu mahnıların hər birinin ilk notlarını eşidəndə bilirsən ki, bu əsərlər Emin Sabitoğlu dünyasının məhsuludur. Musiqili Teatr, demək olar ki, Emin müəllimin ikinci evi olub. Biz uzun illərdən sonra istəyirik ki, Emin Sabitoğlunun “Hicran” komediyasını səhnələşdirək”.
Xalq artistləri Zamiq Əliyev, Brilliant Dadaşova, Gülyanaq Məmmədova, Mələkxanım Əyyubova, Əməkdar artist Nüşabə Ələsgərli və başqaları görkəmli bəstəkarın bənzərsiz yaradıcılığından söz açıblar.
Sonda bəstəkarın qızı, professor Ceyran Mahmudova çıxış edərək atasının xatirəsinə göstərilən ehtirama görə tədbir iştirakçılarına təşəkkürünü bildirib.
Xatırladaq ki, Emin Sabit Rəhman oğlu Mahmudov 2 noyabr 1937-ci ildə Bakıda anadan olub. 1954-cü ildə Ü.Hacıbəyli adına Azərbaycan Dövlət Konservatoriyasına (indiki Bakı Musiqi Akademiyası) Qara Qarayevin sinfinə daxil olub. İki ildən sonra isə P.Çaykovski adına Moskva Dövlət Konservatoriyasına Yuri Şoporinin sinfinə keçirilib.
Musiqinin müxtəlif janrlarında bir çox dəyərli əsərlərin müəllifi olan Emin Sabitoğlu üç simfonik poema, üç kantata, simli kvartet, skripka və fortepiano üçün poema yazıb. O, 600-dən çox mahnı, 9 musiqili komediya, 40-a yaxın filmə musiqi bəstələyib. Paytaxt teatrları ilə yanaşı, Sumqayıt, Gəncə, Lənkəran, Mingəçevir və Naxçıvan teatrlarının tamaşalarına musiqilər yazıb. Emin Sabitoğlu 2000-ci il noyabrın 18-də Bakıda vəfat edib.
Bengü Yayınları 400-cü kitabını çıxardı
Avrasya Yazarlar Birliyinin Bengü Yayınları nəşr evi 400-cü kitabını oxucularına çatdırdı.
“Ədəbiyyat və incəsənət” portalı xəbər verir ki, Türk Dünyasından ədəbi və elmi əsərlər yayınlayan Bengü Yayınlarının 400-cü kitabı
Krım tatar şairi Şakit Selimin şeirlər kitabıdır.
Kitabı Dr. Işılay Işıktaş Sava yayına hazırlayıb. 16x24 cm formatında, 566 səhifəlik kitabda Kırım Tatar ədəbiyyatının böyük şairi Şakir Selimin bütün şeirləri, ədəbi axtarışları və incələmələri yer alır.
Bakı şəhərində olan tarix-memarlıq abidələrinin mühafizəsi ilə bağlı birgə əməkdaşlıq tədbirləri müzakirə edilib
Mədəniyyət Nazirliyində Bakı şəhəri üzrə yerli icra hakimiyyəti orqanlarının nümayəndələri ilə görüş keçirilib.
“Ədəbiyyat və incəsənət” portalı xəbər verir ki, görüşdə müvafiq rayonları tarix-memarlıq abidələrinin ümumi vəziyyətinə və mövcud problemlərə diqqət çəkilib. Azərbaycan Respublikası Nazirlər Kabinetinin 2001-ci il tarixli 132 nömrəli qərarı ilə təsdiq edilmiş mühafizə olunan tarix və mədəniyyət abidələrinin siyahısına əsasən dövlət reyestrinə daxil edilən və Mədəniyyət Nazirliyi tərəfindən yeni aşkar olunan abidələrin müştərək mühafizə tədbirləri ilə bağlı müzakirələr aparılıb.
Mədəniyyət Nazirliyi ilə yerli icra hakimiyyəti orqanları arasında əməkdaşlığın daha da genişləndirilməsi ilə bağlı təkliflər səsləndirilib. Eyni zamanda xüsusi mülkiyyətdə olan və yaşayış sahəsi kimi istifadə edilən tarix-memarlıq abidələri ilə bağlı vətəndaşların müraciətlərinə baxılma müddətinin maksimum sürətləndirilməsi və bu istiqamətdə qarşılıqlı əməkdaşlığın perspektivlərinə dair vahid strateji xəttin işlənib hazırlanmasının zəruriliyi vurğulanıb.
“Cahil bu sevdanı duymaz” - Məmməd İsmayılın doğum gününə
Şair Məmməd İsmayılın doğum günü münasibəti ilə “Ədəbiyyat və incəsənət0 portalı Elxan Zal Qaraxanlının “Türkün sevdasından doğulan şair” yazısını təqdim edir.
Bu gün ustadımız və poeziyazımızın patriarxı Məmməd İsmayılın doğum günüdür. O, ilham pərilərinin sevimlisidir və mən onun həmişə gənc ruhuna heyranam. Bu yazı da böyük şairimizə Qaraxanlı ərməğanıdır.
Bir nisgil, bir həsrət var Məmməd İsmayılın şeirlərində. Qaranlıqda da, aydınlıqda da işıq saçan bir həsrət.
O həmişə bu həsrətlə yaşayıb, ömrü boyu, addım-addım, misra- misra bu həsrətə doğru gedib və bu həsrətin sevdasına tutuşmuş ürəyini başı üstündə işıq saçan alova çevirərək minlərlə, bəlkə də milyonlarla insanı bu sevdayla yoluxdurub.
Türkün sevdasıdır bu sevda, Qızıl Alma sevdasıdır. Bölünə-bölünə, döyülə-döyülə sonda qalib olan qızıl almasını axtaran türkün. Mənim qavramımda Türk kəliməsi etnik mənsubiyyətdən çox yuxarıda dayanan bir məvhumdur, türk Ulu Törə kitabında verilənləri öz içində bəsləyib bu ideallarla yaşayan inanlara Tanrı tərəfindən verilən bir ünvandır. Sevdasına və savaşına bürünüb Tanrısına doğru gedən insandır. Tanrıdağa, Ulular Uçmağına gedən yolda başı dik, sevda və savaş mələklərinin əhatəsində ləyaqətlə irəliləyəndir. Onun arzular məkanı əbədiyyətdir.
Məmməd İsmayılın həsrəti də bu arzular məkanına yetmək yolunda ləyaqətli yaşamaq arzusudur. Ürəyini el yolunda alovlandırmaq nisgilidir. Onun həyatı da, yaradıcılığı da bu istəyin gerçəkləşməsinə xidmət eləyib həmişə. Tovuzda da, Bakıda da, Türkiyədə də.
Məmməd İcmayılın ürəyində yaşatdığ istəkləri saf və arı duyğulardan bəslənib yoğrularaq, şeir şəklində bişib sonsuz sayda insanlara mənəvi qida oldu. Ətrafdakılar çox zaman böylə duyğuların daşıyıcılarını anlaya bilmirlər. Könüllərinin qaralığından onlara ağ qarğa kimi baxırlar, çünki cahil gözsüzdür, haqq işığını görə bilməz. Amma bu haqq işığıdır cəhalət zülmətini dağıdıb parçalayan xilaskar. Göy Tanrının sonsuzluğundan mayalanan haqq işığı sevdasıdır Məmməd İsmayıl sevdası. Cahil bu sevdanı duymaz, amma var bu sevda, Məcnunun Leylası kimi var, Abbasın Gülgəzi kimi var. Məmməd İsmayılların içində tutuşub tonqallaşır, öz işığını misra-misra şeirləşdirib ətrafa yayaraq zülmətsevərləri pərişan edir.
Mən həmişə Məmməd İsmayılın şeirlərini oxuyanda, ürəyini yanar bir almaya çevirib başı üzərinə qaldırmış bir uşaq canlanır gözlərim önündə. Qorkinin ürəyini atəşə çevirən Dankosuna bənzəyən bir uşaq. O, ürəyinin işığıyla insanlığın yolunu aydınladır, amma bəzən insanların bu ürəyi tapdadığı da olur, fəqət o dayanmır, gedir, çünki onun getdiyi yol Tanrı işığı ilə aydınlanıb, böyük bir sevdanın duasıyla mıhürlənib.
Və o gedir! “Allah-məni qurd elə, “Allah məni qurd elə” deyə - deyə üzü gündoğana doğru qaça-qaça yenilməz ordulara yol göstərir, türk atlarının nallarının iz saldığı yerləri yurd eləyir. İlahi sevdadan doğulan, üzü-gözü mas-mavi işıq saçan bu xilasçı Qurd, Qızıl Almasından ötrü qəribsəmiş türk axınçılarını qazanmalara doğru aparır.
Məmməd İsmayıl Türkün bağrından, ilahi yurd həsrətindən doğulmuş bir şairdir. Tovuzda doğulub bütün Turana söz işığı saçan Dədə Qorquddur. Onun sevdası da, savaşı da bu qarışıq dünyada əlçatmaz görünən həsrət pərdəsini aralayıb ölməzliyə yol açmaq istəyidir. O doğulduğu gündən bu yana içində ölməz bir sevda yaşatdı və yaşatdığı sevda ilə oxucularını da yoluxdurdu və özü də şeiri ilə, sözü ilə, yaşam tərzi ilə türklüyün sevdasına çevrildi. Bu sevda həmişə eyni yaşdadı, Tanrıdağda da, Orxunda da, Tovuzda da, Anadoluda da.
Türkün sevgisidir Məmməd İsmayılın şeirləri. Bu türkülər həmişə yam - yaşıldır, təzə-tərdir, həmişə eyni atəşlə yanır. Onun 20 yaşında da, 60 yaşında da, 80 yaşında da yazdığı şeirlər eyni mayadan yoğrulub, eyni sevdadan doğulub. Lap Tanrı sevdası kimi. Nə qədər ki, bu cahan mülkündə türk var, türkün qaladığı türkü tonqalı var, bu tonqala istilik verənlərlə birgə Məmməd İsmayıl şeiri də var olacaq.
Onun şəxsiyyəti də, əsərləri də Azərbaycanımızın da, Türkiyəmizin də milli sərvətidir. Bu diri dünyada başını dik tutub gəzmək onun haqqıdır. O bu haqqı qazanıb, o bu haqqı yaşayıb. Salam olsun, Məmməd əmi!!!
